Dünya

Ukrayna döyüşçüləri cəbhənin Liman istiqamətində uğurlu əks-hücuma keçiblər. Sozcu.az xəbər verir ki, bu barədə Ukraynanın Xortitsa əməliyyat-strateji qrupunun nümayəndəsi Viktor Trequbov məlumat yayıb. O bildirib ki, Ukrayna ordusu ruslara həm canlı qüvvə və texnika itikisi yaşadır, həm də ələ keçirilən Ukrayna əraziləri geri alınır. Trequbov digər detalları açıqlamayıb, yalnız Ukrayna qüvvələrinin aktiv müdafiədə olduğunu təsdiqləyib.

Qəzza zolağında atəşkəs yanvarın 19-da yerli vaxtla saat 8:30-da qüvvəyə minəcək. Sozcu.az-ın məlumatına görə, İsrail Baş Nazirinin ofisinin müşaviri Dmitri Gendelman bildirib ki, İsrail Müdafiə Qüvvələri girovların qaytarılması ilə bağlı razılaşmanı həyata keçirməyə hazırlaşır. “İsrail ordusu qüvvələri sazişdə təsdiq edilmiş əməliyyat planına uyğun fəaliyyət göstərəcək. İsrail HƏMAS terror təşkilatı tərəfindən əsirlikdən geri qaytarılan azad edilmiş girovları qəbul etməyə hazırlaşır”, - deyə məlumatda bildirilir. Qeyd edək ki, yanvarın 17-də İsrail və HƏMAS ABŞ və Qətərin köməyi ilə girovların azad edilməsi ilə bağlı saziş imzalayıb.

Ləğv olunmuş qondarma rejimin sabiq “müdafiə naziri” general-leytenant Cəlal Arutyunyanın yanvarın 15-də Sünik vilayətində (Zəngəzur - red.) keçirilən məhkəmə prosesinin detalları məlum olub. Sozcu.az Globalinfo.az-a istinadla xəbər verir ki, Arutyunyanın vəkili Liparit Simonyanın proseslə bağlı “Azadlıq” radiosunun Ermənistan bürosuna müsahibəsi ictimaiyyətin diqqətini çəkib. Simonyan erməni generalın müharibə zamanı hərbi vəziyyətə nəzarətdə səhlənkarlığa yol vermək və faciəyə səbəb olmaqda ittiham edildiyini bildirib. Vəkilin sözlərinə görə, məhkəmə Cəlal Arutyunyanı 44 günlük müharibə zamanı – oktyabrın 12-də Füzuli rayonunun Cuvarlı yaşayış məntəqəsi yaxınlığında, Xocavəndin “Sor” hərbi hissəsinin 20 əsgərinin ölümündə təqsirli bilib. “Diviziya cəbhədə olduğu zaman general kənardan qoşunun gəldiyini görüb. Əsgərlər bunun Ermənistan ordusunun hərbçiləri olub-olmadığını soruşublar. General Arutyunyan onların 100 faiz erməni əsgərlər olduğunu deyib və bundan əmin olduğunu bildirib, atəş açmamaq əmri verib. Lakin gələnlər Azərbaycan ordusunun hərbçiləri olub, nəticədə 20 erməni əsgər mühasirəyə alınıb. Say və güc üstünlüyünün Azərbaycan əsgərlərində olması səbəbindən erməni əsgərlərin hamısı döyüşdə ölüb”, – vəkil bildirib. C.Arutyunyanı 5 ildən 10 ilə qədər həbs gözləyir.

Türkiyə prezidenti Rəcəb Tayyib Ərdoğan hakim Ədalət və İnkişaf Partiyasının (AKP) parlament qrupu ilə görüşündə çıxış edib. Sozcu.az xəbər verir ki, Ərdoğan Suriyadakı vəziyyətə xüsusi diqqət yetirməklə yanaşı, dekabrın 8-də Suriya hökumətinin gedişi ilə bağlı bəzi hadisələrə də toxunub. Türkiyə prezidenti Suriyanın keçmiş lideri Bəşər Əsədin yürütdüyü siyasətdən danışıb, onu ölkənin daxili problemlərini zorakılıq, qan tökmək, təzyiq yolu ilə həll etməkdə suçlayıb. Ərdoğanın sözlərinə görə, Əsədlə onun arasında keçirilən görüşlərdə Suriyanın keçmiş prezidenti heç vaxt reallığa çevrilməyən islahatların həyata keçirilməsindən danışıb. “Onunla keçirdiyimiz bütün görüşlərdə Əsəd bizə islahatlar vəd etdi, lakin heç vaxt sözünün üstündə durmadı”, - o əlavə edib. Bundan başqa, o, Suriyadakı mövcud vəziyyətə toxunaraq, terrorçu “Suriya Kürd Özünümüdafiə Qüvvələri”ni (YPG) Suriyanın ən böyük problemi adlandırıb. Ərdoğan daha əvvəl Türkiyənin xarici işlər naziri Hakan Fidanın səsləndirdiyi oxşar cümləni təkrarlayaraq, YPG-nin dağılmayacağı təqdirdə Suriyada əməliyyata başlayacaqlarını bildirib. “Suriyanın təbii sərvətlərini ələ keçirən YPG terror təşkilatı dağılıb silahlarını yerə qoymasa, acı taleyindən xilas ola bilməyəcək”. “Suriyalı qardaşlarımızla birlikdə həm İŞİD və YPG, həm də digər terror təşkilatlarını ən qısa zamanda məğlub edəcəyik", - Ərdoğan xəbərdarlıq edib.

Ukrayna müharibənin 1058-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 814 150 hərbçi, 9 791 ədəd tank, 20 368 ədəd zirehli döyüş maşını, 22 015 ədəd artilleriya sistemi, 1 262 ədəd RYAS (reaktiv yaylım atəş sistemi), 1046 hava hücumundan müdafiə sistemi, 369 ədəd hərbi təyyarə, 331 ədəd helikopter, 34 132 ədəd avtomobil texnikası, 22 503 ədəd PUA, 3049 qanadlı raket, 28 gəmi/kater, 1 sualtı qayıq, 3 697 xüsusi avadanlıq itirib.

Beynəlxalq Ədalət Məhkəməsinin sədri Nəvaf Salam yanvarın 14-də istefa verib. Sozcu.az xəbər verir ki, bu barədə məhkəmənin mətbuat xidməti məlumat yayıb. Onun məhkəmənin üzvü və sədri kimi səlahiyyət müddəti 2027-ci il fevralın 5-də başa çatırdı. Qeyd edək ki, ötən gün Livan Prezidenti Cozef Aun Nəvaf Salamı ölkənin Baş naziri təyin edib və ona yeni hökuməti formalaşdırmağı tapşırıb. Salam parlamentin 128 üzvündən 85-nin dəstəyini qazanıb.

İran hazırda 1979-cu ildən bəri ən zəif durumdadır. Sozcu.az xəbər verir ki, bu sözləri Ağ Evin milli təhlükəsizlik müşaviri Ceyk Sallivan deyib. "İran hazırda 1979-cu ildən bəri ən zəif vəziyyətdədir. Suriyada da Əsəd rejimi süqut etdi. İndi Amerikanın yeni administrasiyası üçün böyük fürsət yaranıb", - deyə o bildirib.

Ukrayna Prezidenti Vladimir Zelenski 2024-cü il ərzində ayda ortalama 28 min qrivna (664 dollar) məvacib alıb. Sozcu.az xəbər verir ki, Ukraynanın 24-cü kanalı bu barədə Dövlət İşlər İdarəsinə istinadla məlumat yayıb. Qurumun məlumatına görə, eyni dövrdə prezident ofisinin rəhbəri Andriy Yermakın aylıq maaşı 121 min qrivna (2,870 min dollar) təşkil edib ki, bu da Vladimir Zelenskinin əmək haqqından dörd dəfə çoxdur. Telekanal qeyd edir ki, 2023-cü ildə ölkənin vəzifəli şəxsləri arasında ən yüksək maaşı Ukraynanın sabiq xarici işlər naziri Dmitri Kuleba alıb. Onun məvacibi təxminən 34,9 min dollar olub. Hazırkı ədliyyə naziri Denis Malyuska 2023-cü ildə 31,5 min dollar maaşla siyahıda ikinci, daxili işlər naziri İqor Klimenko isə 30,2 min dollar maaşla üçüncü yerdə qərarlaşıb.

Portuqaliyanın paytaxtı Lissabonda Venesuela Baş Konsulluğunun binasına naməlum şəxslər tərəfindən partlayıcı atılıb. Sozcu.az xəbər verir ki, bu barədə “Avronyus” məlumat yayıb. Bildirilib ki, hadisə zamanı xəsarət alan olmasa da, binaya zərər dəyib. Portuqaliya rəsmiləri hücumu pisləyib və təhlükəsizlik tədbirlərinin artırılmasına göstəriş verib.

Yəməndə qaz anbarında partlayış baş verib. Sozcu.az xəbər verir ki, bu barədə “Röyters” məlumat yayıb. Hadisə Əl-Bayda əyalətində qeydə alınıb. Partlayış nəticəsində 8 nəfər ölüb, 50-ə yaxın şəxs yaralanıb. Hadisənin səbəbləri hələlik açıqlanmayıb.

Ukrayna müharibənin 1053-cü günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 806 500 hərbçi, 9 751 ədəd tank, 20 271 ədəd zirehli döyüş maşını, 21 817 ədəd artilleriya sistemi, 1 260 ədəd RYAS (reaktiv yaylım atəş sistemi), 1042 hava hücumundan müdafiə sistemi, 369 ədəd hərbi təyyarə, 331 ədəd helikopter, 33 534 ədəd avtomobil texnikası, 21 958 ədəd PUA, 3017 qanadlı raket, 28 gəmi/kater, 1 sualtı qayıq, 3 692 xüsusi avadanlıq itirib.

ABŞ Serbiyanın “Naftna Industrija Srbije” (NIS) neft şirkətini də sanksiya siyahısına daxil edib. Sozcu.az xəbər verir ki, bu barədə ABŞ Maliyyə Nazirliyi məlumat yayıb. Bildirilir ki, ABŞ bu addımı Rusiyanın enerji sektoruna tətbiq edilən yeni məhdudiyyətlərin bir hissəsi olaraq atıb. Qeyd edək ki, bu gün ABŞ Rusiyaya qarşı sanksiya siyahısını genişləndirib.