Prezident İlham Əliyev “Avronyus” televiziyasına müsahibəsində Ermənistan ilə Azərbaycan arasında sülhə nail olunması ilə bağlı sualı da cavablandırıb. Sozcu.az xəbər verir ki, dövlətimizin başçısı bu barədə danışarkən deyib. “Vaxt qrafiki ilə bağlı mən nikbin fikirdə idim, çünki biz Azərbaycanın özünün hazırladığı sülh sazişinin ilkin layihəsi ilə bağlı şərhləri bir neçə dəfə Ermənistanla mübadilə etmişdik. Bundan sonra isə iki ölkə arasında altı dəfə şərhlər mübadilə edilmişdir və keçən dəfə “Avronyus”a bunun haqqında danışdıqda mən ümid edirdim ki, Ermənistan bizim təkliflərin nəzərdən keçirilməsi vaxtını uzatmayacaq. Biz sentyabrın 11-də onlara sonuncu şərhlərimizi təqdim etmişdik və onlardan cavabı yalnız iki gün əvvəl almışıq. Beləliklə, təqribən iki ay yarımdır ki, onlar bir neçə səhifədən ibarət mətn layihəsini nəzərdən keçiriblər. Bu, nə deməkdir? O deməkdir ki, onlar süni olaraq prosesi ləngitmək istəyirlər. İndi noyabrın sonudur və ilin axırına qədər sülh sazişinin imzalanması ilə bağlı ümidlər o qədər də nikbin deyil. Lakin hesab edirəm ki, zaman qrafiki o qədər də vacib deyil. Vacib olan hər iki ölkənin gündəliyidir. Məhz Azərbaycan işğaldan və etnik təmizləmədən əziyyət çəkib. Bir milyon azərbaycanlı Ermənistan hökuməti tərəfindən deportasiya edilib. Təxminən sahəsi 15 min kvadratkilometr olan ərazi dağıdılıb”, - ölkə başçısı vurğulayıb. Bununla belə, sülh sazişini imzalamaq və delimitasiya işlərini başlamaq üçün təklifi Azərbaycanın verdiyini vurğulayan Prezident İlham Əliyev qeyd edib: “Hazırda Qarabağ məsələsi bitdikdən sonra düşünürəm ki, Ermənistan bizimlə razılığa gəlməkdə daha həvəsli olacaq. Çünki suverenliyimizin bərpası və Qarabağda qeyri-qanuni separatçı rejimin ləğv edilməsi ilə, fikrimcə, Ermənistana daha cəsarətli davranmağa və ya danışıqlara getməyə mane olan əsas amil artıq mövcud deyil. Bir sözlə, biz qeyd etdiyim kimi, iki gün əvvəl aldığımız ən son təklifləri dəyərləndirəcəyik və öz şərhlərimizi verəcəyik. Bununla yanaşı, biz müxtəlif rəsmilər arasında və fərqli kanallar vasitəsilə işçi səviyyədə təmasları saxlayırıq. Düşünürəm ki, sülh üçün alternativ yoxdur. Əgər sülh sazişi imzalanmasa, bu, bütöv bölgə üçün çox pis olacaq. Biz istəyirik ki, Cənubi Qafqaz bölgəsində hər hansı risk olmasın. Əlbəttə, biz istəyirik ki, Ermənistan nə bu gün, nə də gələcəkdə ərazi bütövlüyümüzü sual altına qoymasın və Azərbaycana qarşı hər hansı ərazi iddialarından tam əl çəksin”.

Saat 00:00 radələrində Azərbaycan Dəmir Yolları QSC-yə (ADY) məxsus lokomotiv Tovuz-Qovlar mənzilində hərəkətdə olarkən 1998-ci il təvəllüdlü Tovuz rayonu Hacıhəsənli kənd sakini Eldəniz İsmayıl oğlu Cəfərov dəmir yolu xəttini müəyyən olunmamış yerdən qəfil keçməyə cəhd edib. Sozcu.az xəbər verir ki, bu barədə ADY-dən bildirilib. Maşinist təcili tormozlama aparsa da, toqquşma qaçılmaz olub və həmin şəxs hadisə yerində dünyasını dəyişib. ADY bir daha piyadaları kritik təhlükəli zona hesab olunan dəmir yolu xətlərini yalnız müəyyən olunmuş yer və keçidlərdən istifadə etməklə keçməyə çağırıb: “Piyadaların yol hərəkəti qaydalarına riayət etməsi yalnız hərəkətin təşkili, infrastruktur və digər amillərə deyil, onların şəxsi məsuliyyət hissinə, ictimai davranış vərdişlərinə daha çox bağlıdır. Qış mövsümünün başlanmasını nəzərə alaraq bir daha piyadalara səslənirik: Dəmir yolu xətlərini müəyyən olunmuş piyada keçidlərindən keçin, məhdudiyyətli görünmə şəraitində, habelə sutkanın qaranlıq vaxtı xüsusilə diqqətli olun, qulaqlıqdan istifadə ətraf aləmlə əlaqəni məhdudlaşdırdığı üçün dəmir yolunu keçərkən ondan istifadə etməkdən çəkinin, qəflətən qatarın yoluna çıxmayın”.

Nikol Paşinyan Su Patrul Xidmətinin fəaliyyətə başlaması ilə bağlı mərasimdə iştirak etmək üçün sabah Göyçə gölünə yola düşəcək. Sozcu.az xəbər verir ki, bu barədə erməni mediası yazıb. Qeyd edilib ki, bu ildən Göyçə gölündə Su Patrul Xidməti fəaliyyət göstərəcək. Yeni yaradılan bölmə Ermənistan Daxili İşlər Nazirliyinin Polis Patrul Xidmətinin Göyçə bölməsinin nəzdində fəaliyyət göstərəcək.

Ermənistanın xarici işlər naziri Ararat Mirzoyan ABŞ-da Azərbaycanla təmasların bərpa edilməsinə razılıq verib. Rəsmi Bakının da Vaşinqton danışıqlarına razı olduğu deyilir. Həmçinin Ceyhun Bayramovla Ararat Mirzoyanın ABŞ-da görüşünün planlaşdırıldığına dair məlumatları var. Azərbaycan və Ermənistan arasında vasitəçisiz görüşün keçirilməsi, son olaraq birgə bəyanatın yayılması, əsirlərin dəyişdirilməsi kimi müsbət addımlardan sonra Vaşinqton görüşünün gündəmə gəlməsi müzakirələrə səbəb olub. Artıq sülhə doğru irəli bir addımın da atıldığı, müqavilənin yaxın günlərdə imzalana biləcəyinə dair iddialar gündəmə gəlir. Sülh danışıqları Vaşinqton masasına qayıdır? Bu görüşdən gözləntilər nələrdir? Sülh müqaviləsi Vaşinqtonda imzalana bilərmi? Mövzu ilə bağlı Globalinfo.az-a danışan Beynəlxalq Münasibətlərin Təhlili Mərkəzinin (BMTM) İdarə Heyətinin sədri Fərid Şəfiyev Bakı və İrəvan rəsmiləri arasında ilk görüşün başqa məkanda keçirilə biləcəyini deyib: “Vaşinton masasında hər hansı sənədin imzalanacağına inanmıram. Bu istiqamətdə müxtəlif platformalar arasında ciddi rəqabətin olduğunu görürük. Bir platformada hansısa irəliləyiş olanda, razılaşma əldə ediləndə digər tərəflər bunu qısqanclıqla qarşılayır. Görünən odur ki, Qərb platforması yenidən gündəmdədir. Səhv etmirəmsə, tərəflər arasında ilk görüş Brüsseldə olacaq. Lakin Vaşinqtonda da keçirilə bilər”. F.Şəfiyev Qarabağdan köçən ermənilərin geri qayıtması məsələsinin mümkün görünmədiyini bildirib: “Sülh müqaviləsinin şərtləri ilə bağlı Bakı ilə İrəvan arasında müəyyən fikir ayrılığı var. Prezident İlham Əliyev də ötən günlərdə bu barədə məlumat vermişdi. Biz ermənilərin Qarabağa, azərbaycanlıların Qərbi Azərbaycan ərazilərinə qayıdışı məsələsinə qarşılıqlı prinsip əsasında yanaşırıq. Ermənistan parlamentinin spikeri Alen Simonyan elə erməni stilində qeyd etdi ki, azərbaycanlıların Ermənistana qayıdışı qeyri-konstruktivdir. Mən düşünürəm ki, ümumiyyətlə sülh sazişində Qarabağdan köçən şəxslərin geri qaytarılması məsələsi öz əskini tapmayacaq. Çünki biz bu prosesin birtərəfli şəkildə həyata keçirilməsinə razı olmayacağıq. Belə görünür, ermənilər də azərbaycanlıların Ermənistan ərazisinə qayıtmasını qəbul etməyəcək”.

Bu il oktyabr ayının 1-dən sonra paytaxtda tikilən sənədsiz evlər elektrik və istilik enerjisi, qaz və su təchizatı şəbəkələrinə qoşulmayacaq. Yeni qərara görə, sənədsiz evlərə kommunal xidmətlər göstərilməyəcək. Bu xidmətlərin göstərilməsi üçün mütləq şəkildə evin çıxarışı olmalıdır. Bu qərar əmlak bazarına öz təsirini göstərib. Alqı-satqı edənlər arasında çaşqınlıq yaranıb. “Cebhe.info” əmlak bazarını araşdırdıqda, məlum olub ki, yarıtikili evlərdə qiymətlər aşağı düşüb. Sənədi olan evlərdə də alıcı qıtlığından qiymətlərdə azalma olduğunu deyən “maklerlər” var. Adının çəkilməsini istəməyən “makler” bildirib ki, sənədsiz yarıtikili evlərə bəzi kommunal xidmətlərin verilməsində qanundankənar yollar axtarılır: "Qanunla həmin evlərə kommunal xidmət göstərilməsə də, bunun da çarəsini axtarırlar. Bəzən kimlərsə riskə gedib müəyyən razılaşma ilə başqa ünvanlara aid abonent kodunu aktivləşdirib yeni ünvanlara verməyə cəhd edir. Alınmasa belə, ilkin cəhdlər edilir. Amma nail ola bilmirlər”. Vasitəçi bazardakı son durumu acınacaqlı hesab edir: "Bazarda son bir ayda çox durğunluq var . Bir aydır ki, ev satmaq olmur, evin hər bir sənədi olsa belə satılmır. Hər kəs zəng edir, məlumat almaq istəyir. Bu qərardan sonra əhalinin əmlak bazarına maraqı azalıb. İnsanlar bilmir nə etsin, necə etsin. Çünki bələdiyyə sənədi olan evlər çoxluq təşkil edir. Qəbul edilmiş son qərardan sonra elə evlərə də maraq çox azalıb. Alıcılar daha çox sənədli evlərə üstünlük verirlər. Onun da qiyməti münasib olmadığına görə alıcısı azlıq təşkil edir". “Azərsu” ASC-nin mətbuat katibi Anar Cəbrayıllı açıqlamasında bildirib ki, onun təmsil etdiyi qurumda ümumiyyətlə, belə hallar mümkün deyil. “Azərsu” ASC ancaq sənədi qanunun tələblərinə cavab verən evlərə xidmət göstərir: "Prezident Fərmanı ilə qanuna dəyişiklik edilib və 1 okyabrdan tikintiyə icazəsi olmayan evlərə suyun verilməsi qanunla qadağan olunub".

Azərbaycan və Ermənistan xarici işlər nazirləri arasında Brüsseldə heç bir danışıqlar planlaşdırılmır. Sozcu.az xəbər verir ki, bu barədə Ermənistan Xarici İşlər Nazirliyinin mətbuat katibi Ani Badalyan deyib. “Azərbaycanın xarici işlər naziri Ceyhun Bayramovla heç bir danışıqlar və ya görüş nəzərdə tutulmur”, - deyə Badalyan bildirib. Qeyd edək ki, Ermənistan və Azərbaycanın xarici işlər nazirləri dekabrın 11-də Brüsseldə keçiriləcək Şərq Tərəfdaşlığı sammitində iştirak edəcəklər.

Azərbaycanda növbədənkənar prezident seçkilərinin təyin olunması ilə əlaqədar Müsavat Partiyasının bəyanatı: 1993-cü ildən başlayaraq Azərbaycanda keçirilən ümummilli seçkilərin və referendumların heç birində demokratik seçkilərin əsas şərtlərinə əməl edilməyib. Belə ki: ⁃ ölkədə bir qayda olaraq seçkilərin azad və ədalətliliyini təmin edən seçkiqabağı demokratik şərait mövcud olmayıb, ⁃ seçki qanunvericiliyi demokratik standartlara cavab verməyib, seçki komissiyaları iqtidarın nəzarəti altında olub, ⁃ seçki kampaniyası dövründə iddiaçı tərəflərin bərabərhüquqlu təbliğat imkanları təmin edilməyib, ⁃ səsvermə və səslərin sayılması prosesi kobud qanun pozuntuları və kütləvi saxtakarlıqla müşayət olunub. Bütün bunlar azmış kimi, son illərdə siyasi hakimiyyət öz “qələbəsini” asanlaşdırmaq  məqsədilə növbədənkənar seçkilər praktikasından istifadə edir. Ölkə başçısı İlham Əliyev, bunun səbəbləri barədə cəmiyyətə hər hansı izahat vermədən, 2024-cü il fevralın ayının 7-də Azərbaycanda növbədənkənar prezident seçkilərinin keçirilməsi barədə sərəncam imzalayıb. Hakimiyyət bu qərarla siyasi müxalifətin və ölkədə dəyişiklik istəyən təbəqələrin, eləcə də potensial müşahidəçi missiyalarının seçkilərə hazırlaşmaq imkanını minimuma endirib. Seçki kampaniyasının tətillərin çox, günlərin qısa, havanın soyuq dövrünə düşməsi əhalinin seçki prosesində aktivliyinin azalmasına səbəb olacaq ki, bu da seçkini formal bir prosedura çevirmək istəyən hakimiyyətin maraqlarına uyğundur. Seçkilər ərəfəsində ölkədə repressiyaların yeni dalğasına rəvac verilməsi, siyasi fəalların və jurnalistlərin həbsi hakimiyyətin bu dəfə də demokratik seçki keçirmək niyyətinin olmadığını bir daha təsdiq edir. Müsavat Partiyası Azərbaycan hakimiyyətindən seçkilərin keçirilməsi üçün demokratik mühitin yaradılmasını, bütün siyasi məhbusların azad olunmasını, sərbəst toplaşma, söz və ifadə azadlığının, seçki komissiyalarında iddiaçı tərəflərin təmsilçiliyinin təmin olunması tələb edir. Müsavat Partiyası Azərbaycan hakimiyyətindən bu şərtlərə əməl etməyi, seçkilərin bərabərhüquqlu siyasi rəqabət şəraitində keçməsini əngəlləyən bütün məhdudiyyətlərin aradan qaldırılmasını tələb edir.  Basta

Türkiyəli aktrisa Meltem Cumbul 2 il aradan sonra ekrana qayıdır. Sozcu.az xəbər verir ki, aktrisa Mahsun Kırmızıgülün "Güzel atlar diyarı" serialında rol alacaq. Amerikada yaşayan aktrisa bunun üçün Türkiyəyə gəlib.  Qeyd edək ki, Meltem son olaraq "Kırmızı oda" serialında rol alıb.

Ermənistan Xarici İşlər Nazirliyi nazir Ararat Mirzoyanın dekabrın 11-də Brüsselə səfəri ilə bağlı məlumatı təsdiqləyib.  Sozcu.az xəbər verir ki, nazirliyin mətbuat katibi Ani Badalyan "Sputnik Armenia"ya bu barədə məlumat verib.  O bildirib ki, XİN rəhbəri Şərq Tərəfdaşlığı ölkələrinin nazirlərinin görüşündə iştirak edəcək.  Qeyd edək ki, Azərbaycan xarici işlər naziri Ceyhun Bayramov da görüşə qatılacaq. 

Elm və Təhsil Nazirliyinin aparatında struktur dəyişiklikləri edilib. Nazirlikdən Sozcu.az-a verilən məlumata görə, dəyişikliklərə əsasən, nazirliyin aparatında şöbə və sektorlar yenidən adlandırılıb, yeni şöbələr yaradılıb. Belə ki, yeni struktur bölmələr Məktəbəqədər və ümumi təhsil siyasəti, Elm və ali təhsil siyasəti, Peşə təhsili siyasəti, Uşaq və gənclərin inkişafı siyasəti, İctimaiyyətlə əlaqələr və kommunikasiya, Strateji planlaşdırma və icraya nəzarət şöbələri, Satınalmalar və qrantlar sektorudur. Həmçinin nazirliyin aparatında mövcud olan Beynəlxalq əməkdaşlıq, Maliyyə, Təhsilin iqtisadiyyatı, Vətəndaşlara xidmət və sənədlərlə iş, Hüquq, İnsan resursları, Daxili nəzarət və Audit şöbələri də fəaliyyətini davam etdirəcək. Struktur dəyişikliyindən sonra Ümumi və məktəbəqədər təhsilin təşkili və idarə olunması, Məktəbdənkənar fəaliyyətin təşkili və Təhsilin inkişafı proqramları şöbələri ləğv edilib. Bununla yanaşı, Əliyev Elnur Qəzənfər oğlu nazirin müşaviri təyin edilib. Elnur Əliyev eyni zamanda Təhsil İnstitutunun direktoru vəzifəsini icra edəcək. Nazirin müvafiq əmri ilə Elvin Rüstəmov Aparat rəhbərinin müavini təyin olunub. Aparılan vəzifə dəyişikliklərinə əsasən, Məktəbəqədər və ümumi təhsil siyasəti şöbəsinə Vəfa Yaqublu, Elm və ali təhsil siyasəti şöbəsinə Turxan Süleyman, Uşaq və gənclərin inkişafı siyasəti şöbəsinə Elnur Əliyev, Beynəlxalq əməkdaşlıq şöbəsinə Simuzər Feyzullayeva, İctimaiyyətlə əlaqələr və kommunikasiya şöbəsinə isə Səbuhi Rzayev müdir təyin olunublar. Strateji planlaşdırma və icraya nəzarət şöbəsinin müdir səlahiyyətlərinin icrası isə Strateji planlaşdırma və koordinasiya sektorunun müdiri Leyla Xəlilova Rzazadəyə həvalə olunub. Maliyyə şöbəsinin müdiri Rauf Orucov, Təhsilin iqtisadiyyatı şöbəsinin müdiri Kənan Kərimzadə, Vətəndaşlara xidmət və sənədlərlə iş şöbəsinin müdiri Rəşad Xanlarov, Hüquq şöbəsinin müdiri Səbuhi Mahmudov, Daxili nəzarət şöbəsinin müdiri Gündüz Əbdülov, Audit şöbəsinin müdiri isə Vaqif Məmmədovdur.

Bu gün Bakı Ağır Cinayətlər Məhkəməsində rüşvət alma ittihamı ilə həbs edilmiş jurnalist Əvəz Zeynallı və “Səda TV” youtube kanalının rəhbəri Elnur Şükürovun məhkəmə iclası keçirilib. Sozcu.az lent.az-a istinadən xəbər verir ki, hakim Əli Məmmədovun sədrliyi ilə keçirilən prosesdə vəkil Aqil Layıc və Rəşad Əliyev məhkəməyə birgə vəsatət təqdim edib. Vəsatətdə bildirilib: “Elçin Sadıqovnan Əvəz Zeynallı eyni mövqedədilər. İşin ayrılıb-ayrılmaması mahiyyətə təsir etmir. Elçin Sadıqov təqsirləndirilən şəxs olduğu üçün o, məhkəmə zalında ifadə verməsin. Bundan əlavə, Elçin Sadıqovun istintaqdakı ifadəsinin sübutlar siyahısından çıxarılmasını müşavirə otağında qiymət verilməsini istəyirik. Elçin Sadıqov ifadə verərsə, şahid kimi and içəcək. Amma o, təqsirləndirilən şəxs olduğu üçün özünü müdafiə məqsədli yalan danışa bilər”. Münasibət bildirən prokuror vəsatətin təmin edilməməsini istəyib. Məhkəmə yerində müşavirə keçirərək bildirib: “Epizodların əksəriyyəti Elçin Sadıqovla bağlı olduğu üçün onun məhkəmə zalında ifadə verməsi məcburidir”. Şahid Elçin Sadıqov məhkəmə zalına dəvət edilib. Onun anket məlumatları dəqiqləşdirilib. Elçin Sadıqov bildirib: “Mən ibtidai istintaq materialında verdiyim ifadəmi təsdiq edirəm. Bura gəlmək istəmirdim. Amma görürəm ki, gəlməməyimdən qarşı tərəf sui-istifadə edib. İstintaqdakı ifadəmi təsdiq edirəm. Əlavə hansısa sözüm yoxdur. İltizama da imza atmıram. Çünki təqsirləndirilən şəxs qismindəyəm”. Rəşad Əliyev Elçin Sadıqovun şahidlər siyahısından çıxarılmasını və ifadənin dayandırılmasını istəyib. Hakim bunun hazırki məqamda baş tuta bilməyəcəyini deyib. Elçin Sadıqov barəsində aparılan cinayət işinə görə, bu prosesdə şahid qismində çıxış etməkdən imtina edib. Prokuror şahidin ifadə verməkdən imtina etdiyi təqdirdə məsuliyyətə cəlb ediləcəyini vurğulayıb. Hakim son dəfə şahid qismində göstərilən Elçin Sadıqova ifadə verməsi ilə bağlı sual verib. O, ifadə vermək istəmədiyini və istintaqdakı ifadəsini təsdiqlədiyini bildirib. Elçin Sadıqovun istintaqdakı ifadəsi elan edilib. Daha sonra, hazırda həbsdə olan “Baku Steell Company”nin keçmiş rəhbəri Rasim Məmmədovun yoldaşı Mehriban Məmmədovanın və Rasim Məmmədovun sürücüsü Səxavət Hümbətovun istintaqdakı ifadəsi elan edilib. Elan olunduqdan sonra, Əvəz Zeynallı vəsatət qaldıraraq Elnur Şükürovun ev dustaqlığına buraxılmasını istəyib. Məhkəmə müşavirə keçirdikdən sonra Elnur Şükürov barəsində qərar verilmənin hazırda prosesə uyğun olmadığını bildirib. Nəticədə vəsatət təmin edilməyib. Məhkəmənin növbəti iclası dekabrın 22-nə təxirə salınıb. Qeyd edək ki, Əvəz Zeynalova Cinayət Məcəlləsinin 178.2.1, 311.3.2, 311.3.3, 311.3.4, 32.4, 312.2 və 312-1.1 və digər maddələri, Elnur Şükürova isə həmin Məcəllənin 178.2.1, 32.4, 312.2 və 312-1.1 və digər maddələri ilə ittiham irəli sürülüb. Xatırladaq ki, ötən ilin avqustunda jurnalist Eynulla Fətullayev Əvəz Zeynallının səs yazısını yayaraq onun həbsdə olan iş adamı Rasim Məmmədovun ailəsindən rüşvət almaqda ittiham etmişdi. İddia olunmuşdu ki, Ə.Zeynallı R.Məmmədov barəsində müsbət imic formalaşdırmaq üçün müvafiq verilişlər hazırlamağı vəd edərək onun ailəsindən 20 min manat rüşvət alıb.

Özəl tibb müəssisəsində lentə alınan videogörüntülər cəmiyyətdə narazılığa səbəb olub. Sozcu.az oxu.az-a istinadən bildirir ki, sosial şəbəkələrdə paylaşılan görüntülərin metronun “Elmlər Akademiyası” stansiyası yaxınlığında, Kazım Kazımzadə, 99 ünvanında yerləşən “Uni” klinikasında həkim Elmir Qəhrəmanovun icra etdiyi əməliyyat zamanı lentə alındığı iddia edilir. Belə ki, əməliyyat gedərkən həkimin assistenti olduğunu bildirən xanım “TikTok” platformasında canlı yayım açıb. Canlı yayım zamanı izləyicilər şərh bölməsindən xanıma “Komutan”, XTQ, “Hidayət” kimi sözləri əlinə yazmasını istəyirlər. Xanım isə əlcəklərin üzərinə qeyd edilən sözləri yazır. Sözügedən canlı yayımda aparılan cərrahi əməliyyata dair heç bir məlumatlandırıcı məzmunun olmaması və xanımın əməliyyat zamanı lağlağı etməsi sosial şəbəkə istifadəçiləri tərəfindən birmənalı qarşılanmayıb. Steril mühitin pozulmasını, pasiyentin sağlamlığının riskə atılmasını qınayan sosial şəbəkə istifadəçiləri bu davranışı həkimin və tibb müəssisəsinin pasiyentlərə qarşı qeyri-peşəkar yanaşması kimi qiymətləndiriblər. Məsələ ilə bağlı sözügedən klinikanın direktoru Elmir Daşdəmirov ilə əlaqə saxladıq. Direktor saytımıza açıqlamasında sözügedən videogörüntülərin onun klinikasında və həkim Elmir Qəhrəmanovun əməliyyat zamanı çəkildiyinə dair iddiaları təsdiq edib: “Videogörüntülərdən xəbərim yox idi, indi gördüm. Həkim çağırılacaq, töhmət veriləcək. Mən işdən azad eləsəm, gedib ayrı müəssisədə işləyəcək. Həkimdir, diplomunu da əlindən ala bilmərəm. Digər məqamı Səhiyyə Nazirliyi yoluna qoymalıdır”.

Azərbaycanda 2024-cü il üçün yaşayış minimumu təsdiqlənib. Gələn il bu meyar 270 manat olacaq. Yaşayış minimumu artıq bir neçə ildir ki, dəyişmir. Halbuki ölkədə mövcud inflyasiya və davamlı bahalaşma mövcuddur. İqtisadçı ekspert Elmir Səfərli “Yeni Sabah”a açıqlamasında gözlənilən iqtisadi proseslər nəzərə alınmaqla, bu rəqəmlər realist saymır: “Ötən illərlə müqayisədə real inflyasiya həddinin artması nəticəsində müxtəlif mal və məhsulların qiymətlərində artıma səbəb olub. Nəzəri olaraq, bu artımlar yaşayış minimumun da artırılmasını nəzərdə tutur. Sözügedən məsələ ilə bağlı gözləntilər böyük idi.  Azərbaycanda satılan mal və məhsulların bir çoxu idxal olunur. Bunun da başlıca səbəbi yerli istehsalın o qədər də inkişaf etməməsidir. Mövcud vəziyyət isə məhsulların qiymətlərində bahalaşmaya gətirib çıxarır. İnflyasiya həddi isə ilbəil artmaqda davam edir. Belə olduğu təqdirdə, əhalinin yaşayış minimunun bir ay üçün 270 manat nəzərdə tutulması real görünmür.  Bu baxımdan düşünürəm ki, bu rəqəm 350-400 manat aralığında olmalıdır. Həmin rəqəm bir insanın tək yaşaması üçün nəzərə alınmır. Bir ailədə 3 nəfər yaşayırsa, 1 adam üçün yaşayış minimumu ortalama olaraq 270 manatdan 810 manat edir. Bu o deməkdir ki, ailənin aylıq gəliri 1000 manatdırsa, yaşayış minumumu qarşılanır”. İqtisadçı qeyd edib ki, yaşayış minimumu üçün təsdiq edilən rəqəmlərin nə dərəcədə real olması növbəti ilin ortalarından sonra baş verəcək iqtisadi proseslərin əsasında və inflyasiya həddinin dəyişməsi ilə ortaya çıxacaq.

Ermənistanın Baş naziri Nikol Paşinyan ilə Qazaxıstan Prezidenti Qasım-Jomart Tokayev arasında telefon danışığı olub. Sozcu.az xəbər verir ki, bu barədə Ermənistan mediası məlumat yayıb. Ermənistan-Qazaxıstan münasibətlərinin gündəliyinə aid məsələlər müzakirə edilib. İki ölkə arasında əlaqələrin inkişafında qarşılıqlı maraq, iqtisadi və digər sahələrdə əməkdaşlıq potensialının reallaşdırılmasının zəruriliyi vurğulanıb. Bildirilir ki, N.Paşinyan Tokayevi Ermənistana rəsmi səfərə dəvət edib. Qazaxıstan Prezidenti də dəvəti qəbul edib.

7 dekabr 2023-cü il tarixdə, Azərbaycanda parlamentarizmin təsis olunmasının 105-ci ildönümündə  bir qrup ictimai-siyasi  şəxs tərəfindən III Respublika Platforması yaradılıb. Sozcu.az xəbər verir ki, bu barədə Platformanın rəsmi sosial şəbəkə hesabında məlumat yayılıb. Bildirilib ki, Platformanın Əsasnaməsi qəbul edilib: “Qurucu üzvlər (təsisçilər) arasından Platformanın fəaliyyətinə rəhbərlik edəcək Qurucu Heyət seçilib. 7 nəfərdən ibarət Qurucu Heyətin üzvləri aşağıdakılardır: Akif Qurbanov Araz Əliyev Elman Fəttah Rövşən Ağayev Ruslan İzzətli Səməd Rəhimli Yadigar Sadıqlı Sonra Qurucu Heyətin ilk iclası keçirilib. Qurucu Heyət Platformanı təmsil etmək, qərarların icrasını təşkil etmək üçün 1 il müddətinə Akif Qurbanovu spiker seçib. Həmçinin Qurucu Heyətin digər üzvləri arasında sahələr üzrə məsuliyyət bölgüsü aparılıb”. III Respublika Platformasının Quruluş Bəyanında bildirilir ki, Platformanın fəaliyyətinin ağırlıq mərkəzi təməl hüquq və azadlıqların təminatını hədəfləyən fəal iştirakçılıq əsasında ölkənin taleyüklü məsələləri ilə bağlı ictimai rəyin formalaşdırılması olacaq: “Bizimlə eyni hədəfləri bölüşən hər kəsi Platformanın işində fəal iştiraka dəvət edirik. Çıxdığımız bu yolda missiyamız budur: idarə olunan cəmiyyətdən özünü idarə edən cəmiyyətə keçidi təmin etmək. Bu missiyanın mütərəqqi vətəndaşlarımızın rəğbətini qazanacağına, cəmiyyəti proqressə aparacağına əminik!” – bəyanatda bildirilir.

78 saylı Lerik seçki dairəsindən millət vəkili seçilən İqbal Məmmədov tərəfindən təsis olunan “Kaspi Yıldız” Azərbaycan-Türkiyə Müştərək Müəssisəsinə qarşı məhkəmə iddiası qaldırılıb. Sozcu.az xəbər verir ki, məhkəmə iddiası Bakı Kommersiya Məhkəməsinin hakimi Zaur Pirverdiyevin icraatına verilib. “Kaspi Yıldız” Azərbaycan-Türkiyə Müştərək Müəssisəsi barədə iddianı “Tekno Crusher” MMC qaldırıb. Məhkəmə iddiası alqı-satqı müqaviləsi üzrə mübahisələrlə bağlı qaldırılıb. Məlumat üçün bildirək ki, nizamnamə kapitalı 45 min dollar olan “Kaspi Yıldız” Azərbaycan-Türkiyə Müştərək Müəssisəsi 16 oktyabr 1996-cı ildə dövlət qeydiyyatına alınıb. Qanuni təmsilçisi Məmmədov Ramiz Fərman oğlu olan “Kaspi-Yıldız”ın hüquqi ünvanı “Nizami rayon, Özbəkistan, ev 24E”də yerləşir. “Kaspi-Yıldız” barəsində iddia qaldıran “Tekno Crusher” MMC isə 2012-ci ildə qeydiyyata alınıb. Nizamnamə kapitalı 4 manat olan şirkətin qanuni təmsilçisi Padayev Nikolay İvanoviçdir. MMC mərkəzi ofisi Rusiyada yerləşən “Tekno Crusher” şirkətinə bağlıdır. Bu şirkət Azərbaycandan başqa İran və Qazaxıstanda da fəaliyyət göstərir. Şirkət mədən sənayesində istifadə olunan avadanlıqların istehsalı və satışı ilə məşğuldur. Onu da qeyd edək ki, şirkətin təsisçisi 78 saylı Lerik seçki dairəsindən millət vəkili seçilən İqbal Məmmədovdur. 2019-cu ildə mətbuata verdiyi açıqlamada İqbal Məmmədov bildirib ki, o, 2010-cu ildə deputat seçildikdən sonra müəssisəyə rəhbərliyi qardaşına həvalə edib. Bir müddət “Kaspi Yıldız” Azərbaycan-Türkiyə Müştərək Müəssisəsinə rəhbərlik edən İqbal Məmmədovun qardaşı Asif Məmmədov isə 2006-2013-cü illərdə Balakən və Şamaxı rayonlarının İcra Hakimiyyətinin başçısı vəzifəsində işləyib. Onu da bildirək ki, ötən ilin yanvar ayında “Kaspi Yıldız” Azərbaycan-Türkiyə Müştərək Müəssisəsinin Türkiyə vətəndaşı olan təsisçilərindən biri Rafet Ekmekçioğlu özünə məxsus 50% payı İqbal Məmmədova verib. Nəticədə “Kaspi Yıldız” Azərbaycan-Türkiyə Müştərək Müəssisəsinin təsisçisi 100% pay ilə millət vəkili İqbal Məmmədov olub. İqbal Məmmədovun təsis etdiyi şirkət uzun zamandır dövlət büdcəsinə olan böyük miqdarda vergi borcuna görə mətbuatda müzakirə olunur. Hazırda “Kaspi Yıldız” Azərbaycan-Türkiyə Müştərək Müəssisəsinin dövlət büdcəsinə 9 milyon 392 min 818 manat 93 qəpik vergi borcu var. İqtisadiyyat Nazirliyi yanında Dövlət Vergi Xidməti daha əvvəl “Kaspi Yıldız” Azərbaycan-Türkiyə Müştərək Müəssisəsinə qarşı məhkəmə iddiası qaldırıb. Amma görünən odur ki, müəssisənin vergi borcu bu günə kimi ödənilməyib. Bundan başqa Azərbaycanın ən böyük bankı hesab olunan “Kapital Bank” da (səhmlərinin 99,87%-i “Paşa Holdinq”ə məxsusdur) borc müqaviləsi üzrə mübahisələrlə əlaqəli olaraq millət vəkili İqbal Məmmədova, həmçinin Məmmədov Nəriman Qədir oğluna (deputatın atası), Məmmədov Çingiz Nəriman oğluna (deputatın qardaşı) və “Kaspi Yıldız” Azərbaycan-Türkiyə Birgə Müəssisəsinə qarşı məhkəmə iddiası qaldırıb.yeniavaz)

Ermənistan hakimiyyətinin Azərbaycan və Türkiyəyə gedən dəmir yolu xətlərinin bərpasının dəyəri ilə bağlı hesablamaları son iki ildə kəskin şəkildə dəyişib. Sozcu.az xəbər verir ki, bu barədə Ermənistanın maliyyə naziri Vahe Ovannisyan “Civilnet”ə müsahibəsində bildirib. Ermənistanın maliyyə naziri Vahe Ovannisyan bildirib ki, “Dünyanın kəsişməsi” layihəsi təxminən 400-500 milyon dollara başa gələcək. Bura 318 milyon dollara Hrazdan – İcevan – Qazax – Ağstafa, 61,5 milyon dollara Yeraşx – Horadiz və 8-9 milyon dollara Gümrü – Türkiyə ilə sərhəd hissələrinin bərpası daxildir. Bu hesablamalar 2021-2022-ci illərdə, təkcə Hrazdan-İcevan-Azərbaycan sərhədi sahəsinin 496 milyon dollar dəyərində qiymətləndirildiyi əvvəlki hesablamalardan xeyli aşağıdır ki, bu da cari hesablamalardan 1,5 dəfə bahadır. Eyni zamanda, Yeraşx – Horadiz 226 milyon dollar, Gümrü – Türkiyə sərhədi isə 16,8 milyon dollar hesablanıb.

Milli Məclisin Mədəniyyət komitəsinə sədr seçilib. Sozcu.az xəbər verir ki, komitəyə sədr Fazil Mustafa seçilib. Bu barədə Milli Məclisin iclasında qərar qəbul edilib. Komitənin sədr müavini isə Ülviyyə Ağayeva olub. Qeyd edək ki, sentyabr ayında 48 yaşında vəfat edən deputat Qənirə Paşayeva Milli Məclisin Mədəniyyət komitəsinin sədri idi. Onun vəfatından sonra onun vəzifəsini Fazil Mustafa icra edirdi.

Rusiya qüvvələri son sutkada Ukrayna ərazisində daha 990 hərbçisini itirib. Sozcu.az "Unian"a istinadən xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb. Bildirilib ki, bununla da Rusiya tərəfinin müharibə başlayandan bəri ümumi itkilərinin sayı 337 220 nəfərə çatıb. Həmçinin son sutka ərzində Rusiyaya məxsus 8 tank, 26 zirehli döyüş maşını, 12 artilleriya sistemi Ukrayna ordusu tərəfindən sıradan çıxarılıb. Xatırladaq ki, ötən ilin 24 fevralında Rusiyanın Ukraynaya hücumu nəticəsində başlayan müharibə davam edir. Rusiya Ukraynanın Xerson və Zaporojye vilayətlərini, habelə qondarma "Donetsk XR" və "Luqansk XR" separatçı qurumlarını birtərəfli qaydada ilhaq etdiyini açıqlayıb.

Ermənistan Təhlükəsizlik Şurasının katibi Armen Qriqoryan Böyük Britaniya baş nazirinin milli təhlükəsizlik üzrə müşaviri Tim Barrou ilə görüşüb. Sozcu.az xəbər verir ki, bu barədə "Sputnik Armenia" məlumat yayıb. Bildirilib ki, görüş Qriqoryanın Londona səfəri çərçivəsində baş tutub. Bu, səfər qrafikinin ilk hadisəsi olub. Qeyd olunub ki, strateji dialoqa start verilib və Qriqoryanın vəzifəsi bunu mümkün qədər gücləndirməkdir.

Hazırda qızılca ilə bağlı vəziyyət stabildir. Sozcu.az xəbər verir ki, bunu TƏBİB İdarə Heyətinin sədri Vüqar Qurbanov deyib. O qeyd edib ki, qızılcaya yoluxma halları ilə bağlı tibb müəssisələrinə vətəndaş müraciətləri var: "Vətəndaşların müraciətlərinə əsasən infeksion və yoluxucu şöbələrimiz tam hazır vəziyyətdədir. Həm ambulator, həm də stasionar müraciətlər edilir. Xəstələrin vəziyyəti dəyərləndirilir və ehtiyac olduğu halda stasionar müalicə üçün yerləşdirilir. Digərləri isə ambulator olaraq evdə həkim nəzarəti altında saxlanılır". TƏBİB sədri vurğulayıb ki, qızılcaya yoluxan xəstələrin evdə və ya özlərinin bildikləri kimi müalicə edilmələri düzgün hesab edilmir. Onun sözlərinə görə, xəstəyə ixtisaslı həkimlərin baxmağına ehtiyac var: “Bu xəstələrin evdə və ya özlərinin bildikləri kimi müalicə etmələri düzgün hesab edilmir. Tibb müəssisələrimiz də buna hazırdır. İstənilən sayda ambulator şəraitdə xəstə də qəbul edə bilirik”. TƏBİB sədri həmçinin qızılca ilə bağlı valideynlərə çağırış edib: “Valideynlər və vətəndaşlar övladlarında qızılca ilə bağlı hansısa simptomun olduğu görəndə tibb müəssisələrimizə müraciət etsinlər”.

Azərbaycan Respublikasının Prezidenti İlham Əliyev dekabrın 8-də Avropa Şurasının Baş katibi Mariya Peyçinoviç Buriçi qəbul edib. Sozcu.az xəbər verir ki, bu barədə məlumatı Azərbaycan Prezidentinin Mətbuat Xidməti yayıb.

Xəbər verdiyimiz kimi, Azərbaycan ilə Ermənistan arasında hərbçilərin qarşılıqlı surətdə azad edilməsi barədə razılıq əldə olunub.  Sozcu.az xəbər verir ki, Azərbaycan tərəfindən erməni əsilli 32 şəxsin, Ermənistan tərəfindən isə 2 Azərbaycan hərbçisinin azad edilməsi barədə razılıq əldə edilib.  32 nəfərlik siyahıya Azərbaycan xalqına qarşı müharibə cinayətləri və bəşəriyyət əleyhinə cinayətlər törətmiş qondarma rejimin rəhbərləri Araik Arutunyan, Bako Saakyan, Arkadi Qukasyan, Ruben Vardanyan, o cümlədən Vaqif Xaçaturyan, Alyoşa Xosrovyan kimi şəxslər daxil deyil.  Onlar Bakıda qalacaqlar və törətdiləri cinayətlərin cəzasını çəkəcəklər.

Ermənistan COP29-un ev sahibliyinə Azərbaycanın xeyrinə öz namizədliyini geri götürüb. Sozcu.az xəbər verir ki, bu barədə Azərbaycan Respublikası Prezidentinin Administrasiyası və Ermənistan Respublikası Baş nazirinin Aparatının birgə açıqlamasında bildirilir. "Xoş niyyətin təzahürü olaraq, Ermənistan Respublikası BMT-nin İqlim Dəyişmələri üzrə Çərçivə Konvensiyasına Tərəf Dövlətlərin 29-cu Konfransına (COP29) ev sahibliyinə öz namizədliyini geri götürərək, Azərbaycan Respublikasının namizədliyini dəstəkləyir. Azərbaycan Respublikası və Ermənistan Respublikası ümid edirlər ki, Şərqi Avropa Qrupuna daxil olan digər ölkələr də Azərbaycanın namizədliyini dəstəkləyəcək. Xoş niyyətin təzahürü olaraq, Azərbaycan Respublikası Ermənistanın Şərqi Avropa Qrupundan COP-un Büro üzvlüyünə namizədliyini dəstəkləyir", - açıqlamada deyilir.