Erməni əsgər Kirantsda mina partlaması nəticəsində yaralanıb. Sozcu.az xəbər verir ki, bu barədə Ermənistan Müdafiə Nazirliyi məlumat verib. Yaralı İcevan tibb məntəqəsinə köçürülüb. Qeyd edək ki, bu gün səhər saatlarından Ermənistan Milli Təhlükəsizlik Xidməti və polis əməkdaşları Qazaxla sərhəddə yerləşən Tavuş rayonunun Kirants kəndinə gələrək demarkasiya çərçivəsində artıq ölçmə işlərinə başlayıblar. Sakinlərə əraziyə yaxınlaşmaq qadağan edilib.

Müsavat Partiyasının Xl Qurultayı davam edir.  Qurultayda Türkiyə Cümhuriyyətində fəaliyyət göstərən Azərbaycan Kültür Dərnəyinin rəhbəri Cəmil Unal iştirak edib.  Sozcu.az xəbər verir ki, Qurultayda çıxış edən Cəmil Unal Müsavat Partiyasını möhtəşəm qurultayı münasibəti ilə təbrik edib. Hər bir azərbaycanlıda Müsavatın ruhunun dolaşdığını deyən Cəmil Unal, Müsavat Partiyasının hakimiyyətə gəlməyi haqq etdiyini də qeyd edib.  Cəmil Unal çıxışında dövlət başçısı İlham Əliyevə müraciət edərək, siyasi məhbusların azad edilməsini xahiş edib.  Cəmil Unal qeyd edib ki, olan jurnalistlər və siyasi fəaliyyətinə görə həbs olunanlar cinayətkar deyillər. 

Bakıda yataqxanada tələbə yoldaşını öldürməkdə təqsirləndirilən Rəşad Muxtarova hökm oxunub. Bu barədə hökm Bakı Ağır Cinayətlər Məhkəməsinin hakimi Rasim Sadıxovun sədrliyi ilə keçirilən prosesdə elan edilib. Hökmə əsasən, Rəşad Muxtarov 19 il müddətinə azadlıqdan məhrum edilib. Xatırladaq ki, prokuror Rauf Malışov təqsirləndirilən şəxsin 18 il müddətinə azadlıqdan məhrum edilməsini istəmişdi. Qeyd edək ki, hadisə ötən il fevralın 8-də Sənaye və İnnovasiyalar üzrə Bakı Dövlət Peşə Təhsili Mərkəzinin yataqxanasında qeydə alınıb. Belə ki, 2002-ci il təvəllüdlü Əliəkbər Mərəyev adıçəkilən təhsil müəssisəsinin tələbəsi, otaq yoldaşı, 2007-ci il təvəllüdlü Rəşad Muxtarov tərəfindən bıçaqla yetirilmiş xəsarətlərdən ölüb. Rəşad Muxtarova qarşı Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi üzrə ittiham irəli sürülüb. /ARBTV/

5 ailə üzvünün qətlinə görə saxlanılan Əhməd Əhmədovun cinayət işi üzrə istintaq davam edir. Sozcu.az APA-ya istinadən xəbər verir ki, bunu Xətai rayon prokuroru Sərdar İmanov deyib: “Hazırda həmin iş üzrə istintaq davam edir. İlkin ekspertiza rəyi alınıb. Əlavə komissyon psixiatriya ekspertizası təyin edilib. Ekspertizanın rəyindən asılı olaraq obyektiv ədalətli qərarın qəbul edilməsi təmin ediləcək”. Prokuror Əhməd Əhmədovun hazırda istintaq təcridxanasında saxlanıldığını deyib. Qeyd edək ki, fevral ayının 13-də 5 nəfər ailə üzvünün qəsdən öldürülməsinə dair Xətai rayon prokurorluğunda istintaq edilən cinayət işi üzrə təqsirləndirilən şəxs Əhməd Əhmədovun barəsində təyin olunmuş komission məhkəmə-psixiatrik ekspertizasının 4 aprel 2024-cü il tarixli rəyinə əsasən, o cinayət əməlini törədən zaman anlaqsız vəziyyətdə olub. İstintaq orqanı tərəfindən təqsirləndirilən şəxs Ə.Əhmədovun cinayətin törədildiyi anda psixi vəziyyətinin yenidən müayinə olunması üçün 5 aprel 2024-cü il tarixdə təkrar komission məhkəmə-psixiatrik ekspertizası təyin olunub və o, məhkəmənin qərarı ilə tibb müəssisəsinə yerləşdirilib. Xatırladaq ki, bu il fevralın 13-də 1999-cu il təvəllüdlü Əhməd Əhmədovun aralarında yaranmış mübahisə zamanı atası - 1972-ci il təvəllüdlü Mehman Əhməd oğlu Əhmədovu, anası - 1977-ci il təvəllüdlü Pikə Bədəl qızı Əhmədovanı və qardaşı 2015-ci il təvəllüdlü Məhəmməd Mehman oğlu Əhmədovu, bundan əvvəl başqa bir ünvanda isə bacısı - 1997-ci il təvəllüdlü Elmira Əhmədovanı və onun azyaşlı qızını qətlə yetirməsinə əsaslı şübhələr müəyyən edilib. Faktla bağlı Xətai Rayon Prokurorluğunda Cinayət Məcəlləsinin 120.2.4 (xüsusi amansızlıqla qəsdən adam öldürmə) və 120.2.7-ci (iki və ya daha çox şəxsi öldürmə) maddələrilə cinayət işi başlanıb, Əhməd Əhmədov prokurorluğun qərarı ilə iş üzrə təqsirləndirilən şəxs qismində istintaqa cəlb edilib.

İndiyədək Azərbaycanın işğaldan azad edilmiş 134 min hektardan çox ərazisi mina və partlamamış hərbi sursatlardan təmizlənib. Sozcu.az xəbər verir ki, bunu Azərbaycan Minatəmizləmə Agentliyinin (ANAMA) İdarə Heyətinin sədri Vüqar Süleymanov Bakıda keçirilən “Minalardan Təmizləmə üzrə Avropa Qrupu Təşəbbüsü” tədbirində çıxışı zamanı bildirib. O xatırladıb ki, Azərbaycan bu gün dünyada minalarla ən çox çirklənmiş ölkələrdən biridir: “Bu günə kimi işğaldan azad edilmiş 134 min hektardan çox ərazi mina və partlamamış hərbi sursatlardan təmizlənib. İlk növbədə nəqliyyat və enerji infrastrukturunun keçdiyi ərazilərdə, o cümlədən kənd təsərrüfatı təyinatlı torpaqlarda və yaşayış binalarının tikintisi nəzərdə tutulan ərazilərdə minalardan təmizləmə işləri aparılıb. Ümumilikdə 119 mindən çox mina və partlamamış hərbi sursat aşkar edilərək təhlükəsiz şəkildə zərərsizləşdirilib”.

Mayın 2-də Gəncə şəhər 17 nömrəli tam orta məktəbin şagirdləri arasında dərsdən sonra məktəb binasından kənarda insident (şagirdlərin bir-birinə xəsarət yetirməsi) yaşanıb. Gəncə-Daşkəsən Regional Təhsil İdarəsindən Sozcu.az-a bildirilib ki, baş vermiş hadisə ilə bağlı dərhal hüquq-mühafizə orqanlarına məlumat verilib, hazırda araşdırma aparılır. Araşdırmanın nəticəsi barədə ictimaiyyətə məlumat veriləcək. Qeyd edilib ki, məktəb rəhbərliyi və kollektivi insident zamanı xəsarət almış şagirdə baş çəkib, vəziyyəti ilə maraqlanıb. Şagirdin vəziyyəti yaxşı olaraq qiymətləndirilir.

Ermənistanın Tavuş vilayətinin Kirant kəndindən Qazaxın kəndlərinə gedən yolda minatəmizləmə işləri aparılır. Sozcu.az Globalinfo.az-a istinadla xəbər verir ki, bu barədə “Hraparak” məlumat yayıb. Nəşr yazır ki, polis xüsusi əməliyyat keçirildiyini bildirərək sakinləri yoldan uzaqlaşdırıb. Hazırda Kirantdan keçən dövlətlərarası yol bağlıdır. Məlumata görə, Kirantdan Qazaxın təhvil verilməsi nəzərdə tutulan kəndlərinə gedən yolun əksər hissəsi minalardan təmizlənib, artıq əraziyə sərhəd dirəkləri yerləşdirilib. Nəşr bildirir ki, Ermənistan tərəfi həmin ərazidə demarkasiya prosesinə uyğun olaraq ən mühüm mövqeləri Azərbaycana təhvil verib. Sərhəddə proses yekunlaşana kimi əraziyə, hətta ümumilikdə kəndə girişin məhdudlaşdırılacağı qeyd olunur.

Baş plana əsasən, Kəlbəcər şəhəri mövcud məskunlaşma ərazisini və yaxınlığındakı Boyaqlı kəndini əhatə edəcək. Sozcu.az xəbər verir ki, bu, “Kəlbəcər şəhərinin 2040-cı ilədək inkişafına dair Baş planı”nda əksini tapıb. Şəhərin şimal-şərq istiqamətindəki əsas girişindən başlayaraq cənub-qərb istiqamətində uzanan baş küçəsi planlaşdırma strukturunun əsasını təşkil edir. Küçənin başlanğıc nöqtəsində şəhərin sənaye və istehsalat zonası, orta hissəsində şəhər mərkəzi, bitiş nöqtəsində isə turizm və sosial xidmət obyektləri nəzərdə tutulub.

CHP-nin keçmiş sədri Kamal Kılıçdaroğlu həbs oluna bilər. Sozcu.az xəbər verir ki, bu barədə NTV məlumat yayıb. Bildirilib ki, Kılıçdaroğlunun Türkiyənin keçmiş ekologiya və şəhərsalma naziri Ərdoğan Bayraqdarı təhqir etdiyi iddiası ilə bağlı məhkəməsi baş tutub. CHP lideri “dövlət məmurunu açıq şəkildə təhqir etmək” cinayəti ilə ittiham olunub. Qeyd olunub ki, təqsirləndirilən şəxsin qarşı tərəfə ünvanladığı sözlər ifadə azaqlığına uyğun deyil. Məhkəmədə K.Kılıçdaroğlunun 1 il 2 aydan 2 il 4 aya qədər həbsi istənilib. Proses mayın 30-na kimi təxirə salınıb.

Rusiya ordusu cəbhə xəttini keçsəydi və Kiyev bizdən kömək istəsəydi, Ukraynaya quru qoşunları göndərmək barədə düşünərdik. Sozcu.az xəbər verir ki, bunu Fransa Prezidenti Emmanuel Makron “Ekonomist”ə müsahibəsində deyib. “Mənim aydın strateji məqsədim var: Rusiya Ukraynada qalib gələ bilməz. Rusiya Ukraynada qalib gəlsə, Avropada təhlükəsizlik olmayacaq. Kim deyə bilər ki, Rusiya orada dayanacaq?” - o bildirib. Makron qeyd edib ki, digər Qərb ölkələri bu variantdan “apriori” imtina etməməlidir, çünki 2022-ci ilin yayında tanklar, uzaqmənzilli raketlər və təyyarələr göndərilməsini istisna edirdilər, lakin indi bütün bunlar Ukraynaya verilir. Qeyd edək ki, Makron Rusiyanın hansı cəbhə xəttini keçməsini nəzərdə tutduğunu dəqiqləşdirməyib.

09:24 Mayın 2-si saat 08:00-a olan məlumata əsasən Bakıda və Abşeron yarımadasında şimal-qərb küləyi əsir. Bu barədə Sozcu.az-a Milli Hidrometeorologiya Xidmətindən məlumat verilib. Hazırda küləyin sürəti bəzi yerlərdə 20-25 m/s-yə çatır. Neft Daşları stansiyasının məlumatına əsasən dalğanın hündürlüyü 2,3 mertdir. Müşahidə olunan küləkli hava şəraitinin mayın 3-ü axşamadək fasilələrlə davam edəcəyi gözlənilir. *** Mayın 2-si saat 16:00-a olan məlumata əsasən əvvəlcədən xəbər verildiyi kimi, şimal-qərb küləyi Bakıda və Abşeron yarımadasında 24 m/s, Goranboyda 19 m/s, Naftalanda 18 m/s-dək güclənib. Milli Hidrometeorologiya Xidmətindən verilən məlumata görə, Neft Daşları stansiyasının məlumatına əsasən dalğanın hündürlüyü 2.4 metrdir. Daşkəsən, Gədəbəydə arabir yağış yağıb. Qrız, Şəmkirdə duman müşahidə olunub. Havanın temperaturu Bakıda və Abşeron yarımadasında 21, Naxçıvan MR-da 26, Aran rayonlarında 27, dağlıq rayonlarda 20, yüksək dağlıq ərazilərdə isə 8 dərəcəyədək isti olub.

İsrail Qəzzada Rəfah bölgəsinə qurudan hücuma keçərsə, məhbus mübadiləsi ilə bağlı danışıqlar başa çatacaq. Sozcu.az xəbər verir ki, bunu HƏMAS-ın Siyasi Bürosunun üzvü Üsamə əl-Həmdan deyib. “İsrail Rəfaha qurudan hücum edəcəyi təqdirdə davam edən əsir mübadiləsi dərhal başa çatacaq. Müqavimət cəbhəsi atəş altında olarkən danışıqlar apara bilməyəcək”, - Həmdan bildirib.

Ermənistan və Ukrayna xarici işlər nazirləri – Ararat Mirzoyan və Dmitri Kuleba arasında telefon danışığı baş tutub. Sozcu.az xəbər verir ki, bu barədə Ermənistan XİN-in məlumatında deyilir. Tərəflər Cənubi Qafqazdakı vəziyyəti və Bakı və İrəvan arasındakı danışıqlar prosesini müzakirə ediblər. Söhbət zamanı Mirzoyan Cənubi Qafqazda davamlı sülh və sabitliyə nail olmaq üçün səy göstərildiyini vurğulayaraq, Ermənistan və Azərbaycan arasında münasibətlərin normallaşdırılmasının, xüsusilə delimitasiya prosesində ərazi bütövlüyü prinsipinə qeyd-şərtsiz hörmət edilməsinin vacibliyini qeyd edib.

Məhbus həyatı yaşayan Gürcüstanın eks-prezidenti Mixail Saakaşvili hesab edir ki, onun Gürcüstanda olması ölkəsinin demokratiya mübarizəsinə əlavə güc qatır və bir çoxlarına qol-qanad verir. Musavat.com xəbər verir ki, bu barədə Mixail Saakaşvili “Dojd” kanalına yazılı müsahibəsində bildirib. Qeyd edək ki, Gürcüstanın eks-prezidenti 2021-ci il oktyabrın 1-dən həbsdədir. Müsahibəni təqdim edirik. – Aleksey Navalnı Rusiyaya qayıtdı, həbsxanaya düşdü və öldürüldü. Gürcüstana qayıtdınız və həbsxanaya düşdünüz. Hazırda həbsxana xəstəxanasındasınız. Həyatınız üçün qorxmursunuz? – Aleksey Navalnının öz kamerasından mənimlə həmrəylik ifadə etməsi məni çox təsirləndirdi. Mənim üçün o, dünya tarixinin böyük qəhrəmanıdır. Putin Navalnını Saakaşvili adlandırırdı. Putin dəfələrlə məni öldürməklə hədələyib. Deyə bilərik ki, Putinin öldürməklə hədələdiyi yeganə şəxsəm. Amma hələ də sağam. – Ukraynadakı müharibədə dalana dirənən, müxalifətin məhv edildiyi və ya qovulduğu bir vaxtda Putinə nə demək istərdiniz? O qalib gəlir? – Putin öz qoşunları ilə Ukraynaya hücum edən kimi dərhal dedim ki, bu, onun sonudur. Xüsusilə də indi – Vaşinqtonda və Avropada verilən son qərarlardan sonra bu daha aydın görünür. – “Xarici agentlər haqqında” qanun Gürcüstanda hakimiyyət dəyişikliyinə səbəb ola bilərmi? – Gürcüstanda hakimiyyət dəyişikliyi istənilən halda baş verəcək, lakin bu qanun hakimiyyətin dəyişdirilməsi prosesini dərinləşdirəcək və sürətləndirəcək. – Dəfələrlə demisiniz ki, İvanişvili Putin siyasətinin ardıcılıdır. Birbaşa bağlılığa dair sübutunuz varmı? – Çoxlu sayda sübut var. İvanişvili hakimiyyətə gəldikdən sonra Gürcüstanın Rusiyanın “Birinci kanal”ı Qafqaz kanalı dərhal bağlanıb. Amma Rusiyanın “Sputnik”inin Gürcüstan filialının fəaliyyətinə imkan verilib. O, Amerika Texnologiya Universitetini və Gürcüstanda amerikalı müəllimlər proqramını bağladı. Moskvanın göstərişi ilə iki mühüm infrastruktur layihəsi – Lazika-Anaklia liması və Batumidəki “Royal Caribbean” terminalı ləğv edildi. Rusiyaya casusluq ittihamı ilə saxlanılan şəxslər siyasi məhbus kimi azadlığa buraxıldı. 2008-ci il müharibəsinin gürcü iştirakçılarının siyahıları Rusiya xüsusi xidmət orqanlarına təhvil verildi. Ruslara qarşı xüsusi əməliyyatların bir çox iştirakçısı Gürcüstan ərazisində öldürüldü və əksərinə qarşı baş prokuror tərəfindən cinayət işi açılıb. Dövlət Departamentinə görə, həmin prokuror Rusiya Federal Təhlükəsizlik Xidmətinin agentidir. Son illərdə Gürcüstan hökuməti kəskin anti-Ukrayna mövqeyi tutaraq ölkəni rus pullarının yuyulması məkanına çevrilib və ötən həftə bu istiqamətdə ayrıca qanun qəbul edilib. – Oktyabrda keçiriləcək seçkilərlə bağlı proqnozlarınız necədir? – Onların “Arzuları” sarsıdıcı hesabla məğlub olacaq. Baxmayaraq ki, onlar seçkiləri saxtalaşdırmağa çalışacaqlar. – Prezident Zurabişvilidən əfv gözləyirsinizmi? – Zurabişvili indi, bütövlükdə, konstruktiv rol oynayır. Onun görüşdüyü bütün həmkarları, o cümlədən onun mənşəcə aid olduğu ölkənin prezidenti Makron ondan mənim azad olunmağımı tələb edir. Bu tələb yüz minlərlə gürcünün imzası ilə möhkəmləndirilir. Onun bu hərəkəti etməyə cəsarəti çatacaqmı, bilmirəm. Axı, Ukrayna kəşfiyyatına görə, mən Putinin şəxsi məhbusuyam. – Özünüzü Gürcüstan müxalifətinin lideri hesab edirsiniz? – Mənim çoxlu sayda sadiq tərəfdarlarım var. İndiki mərhələdə müxalifətin birliyinin təmin olunmasında öz şəxsi rolumu görürəm. – Özünüzü necə hiss edirsiniz? – İki ildən artıqdır günəşi görmürəm, təmiz hava udmuram. Ağır metal zəhərlənməsinin izləri hələ də qalmaqdadır. Mən Vladimir Kara-Murza ilə yazışıram və əlamətlərimiz çox oxşardır. Mən işləməyə çalışıram. Gürcü və ukrayna dilində yayımlanan kanallara baxıram. Qanunlara zidd olaraq deputatları mənim yanıma buraxmırlar, mənə həm də qanunsuz olaraq istənilən telefon danışığı qadağan edilib. – Partiyanızın reytinqi düşür. Niyə? – Mən belə düşünmürəm. O əvvəlki kimidir. Amma nəzərə alsaq ki, partiyanın bir hissəsi ayrılıb, ayrıca partiya yaradıb və seçicilərin əksəriyyəti də onları “mənim layihəm” hesab edir (baxmayaraq ki, bu, belə deyil) – bu iki partiya “Arzu”ya asanlıqla qalib gəlir. Bütün sorğulara görə, “Arzu”nun rusiyapərəst təbliğatının uzun illər demonizasiyasına baxmayaraq, mənim şəxsi dəstəyim xeyli artıb. – Gürcüstana qayıtdığınız üçün təəssüflənmirsiniz ki? – Mən yalnız ona təəssüflənirəm ki, Ukraynaya daha fəal şəkildə kömək edə bilmirəm. Orada hələ də prezident Zelenskinin yanında İslahatlar üzrə Milli Şuranın sədriyəm. Digər tərəfdən, mənim Gürcüstanda olmağım ölkədəki insanları çox ruhlandırır.

Azərbaycanda icra hakimiyyətləri parlament seçkilərindən dərhal sonra arxivə göndəriləcək. Sozcu.az xəbər verir ki, bu barədə “Yeni Sabah” öz mənbələrinə istinadla məlumat yayıb. Mənbənin iddiasına görə, yaxın 2-3 ay ərzində keçirilməsi planlaşdırılan parlament seçkiləri icra hakimiyyətlərinin sonunu gətirəcək. Qeyd edək ki, Azərbaycanda icra hakimiyyəti strukturunun ləğv ediləcəyi, əvəzində 14 iqtisadi rayon üzrə Prezidentin xüsusi nümayəndəliklərinin yaradılacağı haqda bir müddətdir ekspertlər iddialar səsləndirirlər. Ancaq İH-lərin ləğvi və yeni struktur üçün Konstitusiya dəyişikliyinə ehtiyac var.

“Kəlbəcər şəhərinin 2040-cı ilədək inkişafına dair Baş planı” təsdiqlənib. Sozcu.az bildirir ki, Nazirlər Kabineti bu barədə qərar verib. Nazirlər Kabinetindən verilən şərhdə bildirilib ki, “Kəlbəcər şəhərinin 2040-cı ilədək inkişafına dair Baş planı” Azərbaycan Respublikasının Şəhərsalma və Tikinti Məcəlləsinin 5.1.1-ci maddəsinin icrasını təmin etmək məqsədilə Azərbaycan Respublikasının Dövlət Şəhərsalma və Arxitektura Komitəsinin sifarişi ilə hazırlanıb. Kəlbəcər şəhərinin sonuncu Baş planı 1969-cu ildə tərtib olunub və hesabat dövrü 2000-ci ilə qədərki müddəti əhatə edib. Baş planda nəzərdə tutulan illər üzrə şəhər əhalisinin yaşayış fondu, sosial və mədəni-məişət xidməti obyektləri üçün ərazilər ayrılıb. Bundan əlavə şəhərin inkişafına uyğun olaraq təbii landşaftın qorunması və ərazi zonalarının nəzərə alınması ilə məskunlaşmanın aparılması prinsipi əsas götürülüb. Nəqliyyat və mühəndis-kommunikasiya təminatı infrastrukturu şəhərin inkişafına uyğun planlaşdırılıb.

Məlum olduğu kimi, ötən ilin yayında Kürdəmirin Pirəköcə kəndində atasını ov tüfəngi ilə öldürən 24 yaşlı Azay Qaraşova 1 ay əvvəl 10 il həbs cəzası verildi. Lakin hadisənin dəqiq necə və hansı səbəbdən baş verməsi barədə nə ilkin istintaq, nə də məhkəmə dövründə məlumat yayılmasına imkan verildi. İşə baxan hakimlər belə qənaətə gəlmişdilər ki, məhkəmə baxışı media üçün qapalı keçirilməlidir. Yayılan məlumat isə sadəcə bu oldu: “Azay Qaraşov atasını öldürməkdə təqsirli bilinərək 10 il azadlıqdan məhrum edildi”. Sozcu.az xəbər verir ki, “Qafqazinfo” ailə faciəsinin necə baş verdiyi ilə bağlı bəzi detalları əldə edib. Münaqişəli ailə, narkotik, qisas... İstintaq materiallarında yazılıb ki, mərhum Azər Qaraşov ailəsi ilə uzun müddət konfliktdə olub. O, mütəmadi olaraq xüsusilə həyat yoldaşına şiddət göstərib, müxtəlif səbəblər gətirərək onu döyüb. Oğlu Azay isə təsdiq edib ki, atası eyni rəftarı özü də daxil olmaqla övladlarına da göstərib. Ailədaxili gərgin münasibətdən polis də məlumatlı olub. Bu səbəbdən münaqişəli ailə kimi qeydiyyata alınan ailənin başçısı Azər Qaraşovun sonradan ölümünə səbəb olacaq ov tüfəngi rəsmi qaydada əlindən alınıb. Lakin mərhum Qaraşov bir müddət sonra həmin silahı qohumunun adına rəsmiləşdirərək yenidən ələ keçirib. “Tez özünü çatdır, atamla anam yenə savaşır, anamı öldürür” Cinayət hadisəsi təxminən saat 17 radələrində baş verib. Hadisədənin baş verməsinə gətirib çıxaran sonuncu səbəb isə mərhum A.Qaraşovun mətbəxdə ev işləri görən arvadı Nurcahan Qaraşovanı səbəbsiz yerə döşəməsilən taxta ilə döyməsi olub. Anasının üzünün qan içində olduğunu görən qızı “Azay, tez özünü çatdır, atamla anam yenə savaşır, anamı öldürür” qışqıraraq qardaşını köməyə çağırıb. Həmin vaxt otaqda uzanıqlı vəziyyətdə olan Azay tez ayağa qalxaraq mətbəxə qaçıb. Otaqdan çıxarkən dəhlizdə anasını qan içində görən 18 yaşlı Azay atasından qisas almalı olduğunu düşünüb. O, dərhal otağına qayıdıb, atasından təmizləmək üçün aldığı ov tüfəngini götürərək qonaq otağına gedib. Atası otağa daxil olan vaxt Azay tez silahın qoruyucusunu açaraq ona atəş açıb. İlk atəş ata Qaraşovun dirsək nahiyəsindən dəyib, o yaralı halda qaçmaq istəyib. Amma qərarında qəti olan Azay yerə yıxılmış atasının ölmədiyini görüb ona tərəf daha 3 atəş açıb. Həmin atəşlərdən ikisi zərərçəkmişə, biri isə evin qapısına dəyib. Ağır xəsarət alan Qaraşov arvadının və uşaqlarının yanında vəfat edib. Anası oğlunun əməlinə ağlayaraq “Azay, sən nə etdin?!” deyə reaksiya versə də, artıq gec olub. İstintaq zamanı başqa bir məsələ də ortaya çıxıb. Məlum olub ki, mərhum Azər Qaraşov öldürüldüyü gün narkotik vasitənin təsiri altında olub. Bu fakt ekspert rəyi ilə təsdiqini tapıb. Məhkəmə istintaqı dövründə müttəhim Qaraşov özünü tam təqsirli bildiyini deyib. Oğul Qaraşov etiraf edib ki, həmin gün ilk olaraq atasını qorxutmaq istəyib, lakin ani olaraq atasının əvvəllər onu, anasını və bacısını dəfələrlə döydüyünü, əsasən də anasını daim incitdiyini, həmişə onlara qarşı sərt və qəddar davranışlarını, həyatlarını dözülməz vəziyyətə saldığını, hətta bir neçə dəfə onları ölümlə hədələdiyini və bunun davam edəcəyini ağlına gətirərək qorxutmaq yox, öldürmək qərarına gəlib. Azayın anası və bacısı da məhkəmədə bənzər şeyləri danışıblar. Onlar da hadisənin baş verməsinə gətirib çıxaran səbəbin mərhumun davranışları ilə bağlı olduğunu deyiblər.  Azər Qaraşovun ittiham olunduğu Cinayət Məcəlləsinin 120.1-ci (qəsdən adam öldürmə) maddəsinin sanksiyasında 9 ildən 14 ilə kimi azadlıqdan məhrumetmə cəzası nəzərdə tutulur. Məhkəmə müttəhimin gənc olmasını, əvvəllər cinayət törətməməsini nəzərə alaraq onu 10 il azadlıqdan məhrumetmə cəzasına məhkum edib. Qeyd edək ki, qətlə yetirilən Azər Qaraşov Lənkəranın icra başçısı Taleh Qaraşovun qardaşıdır. Azər Qaraşov özü isə Kürdəmirdə müxtəlif vəzifələrdə, son olaraq Kürdəmir Rayon Mədəniyyət İdarəsində çalışıb.

Son günlər dəhşətli xəbərlər yayılır – doğrusu, insan o qədər narahat olur ki, gecə yata da bilmir. Biri odur ki, xalq artistlərimizdən birinin qızı öz nişanını geri qaytarıb. Şokedicidir – axı, necə yəni qaytarıb, nə təhər qaytarıb – elə-belə, nişan üzüyünü çıxarıb verib, yoxsa nişan zamanı içdiyi şirinçayı qaytarıb? Hələ dövlətdən səs çıxmaması da adamı narahat edən əsas cəhətlərdəndir. Axı, ən azı Mədəniyyət Nazirliyi bir açıqlama verə bilərdi ki, xalq narahat olmasın! Və yaxud DİN – nə olardı, bir press-reliz yayardılar ki, üzük xonçaya qoyularaq, polis əməkdaşlarının müşayiəti ilə təntənəli şəkildə geri aparılıb, ya yox? Yainki hər hansı insident-saxlanılan zad varmı? Üzük araşdırmaya cəlb edilibmi? AQTA şirinçayın tərkibini yoxlamalıdır. Bəlkə bütün bəlaların kökü o şirinçaydadır? İçəndə stəkanı düz tutmayıblar və ya qənd atanda, sayını düz bölməyiblər? Digər dəhşətli xəbər də var: iki aparıcı ər-arvad xalq artistinin övladının toyundan küsüb gediblər. Vayyy! Belə xəbəri də sakit-sakit elan edərlər? Şok-xəbər verəndə gərək oxucunu hazırlayasan – bunun ürəyi xəstəsi, qocası-cavanı var axı. Necə ola bilər ki, ölkədə bunca tragik hadisəni manşetə daşıyırsan və qabağına “ürəyi zəif olanlar oxumasın” xəbərdarlığını etmirsən? Kərbəlayi İsmayılın oğlu Yədullanın müsibəti belə olmamışdı – nəinki xalqımızın aldığı bu sarsıdıcı xəbər! DİN-in bu məsələdə susması da təbii deyil. Bu, o deməkdir ki, daxili işlər orqanlarında çalışanlar cəmiyyəti narahat edən məsələlərə çox soyuqqanlı, hətta laqeyd yanaşırlar. Sosioloqlar, psixoloqlar bu məsələyə münasibət bildirməli, cəmiyyət mütləq bu problemlərin həllini tapmalıdır. Bu, sıradan hadisə deyil – ümummilli, taleyüklü, xalqın gələcəyi ilə bağlıdır. Hələ onu demirəm ki, hansısa rayonda fəaliyyət göstərən və bu hadisədən sonra qəfildən “məşhur aşıq” olduğu üzə çıxan bir el sənətkarının oğlunun arvadı – yəni gəlini 15-20 gündür yoxa çıxıb. Yəni bu məşhur aşıq indiyə qədər bütün yaradıcılığı ilə xalqın yadına düşməyib, ancaq gəlini evdən küsüb gedən kimi məşhurlaşıb. Ümumiyyətlə, bu “küsmək məsələsi” həllini tapmalıdır: biri verilişdən küsür, biri evdən küsüb uşaqlarını da götürüb atası evinə gedir, biri toydan, biri dostundan... Belə dəhşətli iqlim dəyişikliyi ilə üz-üzəyik və təəssüf ki, mediamız aylardır bu xəbərləri tirajlamasına baxmayaraq, milli problemin həllini tapa bilmir. Xalqımız küsəyənlərdən o qədər narahatdır ki, yeməkdən-içməkdən imtina edib, üzülüb-incəlib, gülməyi özünə haram edib – ona görə hamı küçədə qaşqabaqlı gəzir, sifətindən zəhrimar tökülür. Belə şey olar? xalq artistinin toyundan küsüb gediblər axı – xalq buna nə təhər dözsün? Təklif edirəm ki, Novruzu gözləməyək, çünki yenicə yola salmışıq və o zamana 10 ay var: dövlətimizə təzyiq edək, küsülülərin barışması üçün ayda bir dəfə Novruz qayırsın və birləşib, yumurta döyüşdürüb, xalq olaraq Kosa-Keçəllə toydan küsənləri geri qaytarıb, təzədən toy edək! Xilas yolu təklif edirəm – sonra deməyin ki, demədi...(axar) Şeyx Teymur

Bu ilin ilk üç ayı ərzində daşınmaz əmlak üzərində 88 mindən çox mülkiyyət hüququnun qeydiyyatı aparılıb. Sozcu.az xəbər verir ki, bunu Xəzər TV-yə açıqlamasında Daşınmaz Əmlakın Dövlət Kadastrı və Reyestri public hüquqi şəxsinin departament direktoru Lalə Əkbərova deyib. Bu dövrdə qeydiyyata alınan mülkiyyət hüquqlarının 21 min 664-ü Bakının, qalan hissəsi isə bölgələrin payına düşür. Departament direktoru sənədsiz evlərlə bağlı məsələyə də toxunub. Prosesin davam etdiyini deyən Lalə Əkbərova evlərə çıxarışların müəyyən sənədlər əsasında verildiyini bildirib. Onun sözlərinə görə, sovet dövründə və müstəqilliyin ilk illərində verilən sənədlər hüquqmüəyyənedici olmadığına görə, vətəndaşlar daşınmaz əmlaklarını qeydiyyata aldıra bilməyiblər. Əmlak Məsələləri üzrə ekspert Elnur Azadov isə bildirib ki, hazırda həyət evləri ilə bağlı amnistiya işləri aparılır. Onun sözlərinə görə, bununla bağlı xüsusi portalın istifadəyə verilməsi nəzərdə tutulur. Ekspert əlavə edib ki, gələcəkdə müəyyən sənədləri olan əmlakların qeydiyyat prosesi daha sürətli şəkildə aparılacaq.

Türkiyə Silahlı Qüvvələri İraqın şimalında “Pənçə-Kilit” əməliyyat zonasında daha bir şəhid verib. Sozcu.az xəbər verir ki, bu barədə Türkiyənin Milli Müdafiə Nazirliyini məlumat yayıb. Çavuş Sait Toktaş "Pənçə-Kilit" əməliyyatı bölgəsində onun olduğu posta ildırım düşməsi nəticəsində şəhid olub.

2024.05.01 - 20:21 Gürcüstanın paytaxtı Tiflisdə "Xarici agentlər haqqında" qanunun qəbuluna qarşı növbəti mitinq keçirilir. Sozcu.az xəbər verir ki, mitinqə çox sayda insan Gürcüstan və Avropa Birliyinin bayraqları ilə gəlib və izdihamın arasında ABŞ bayrağı da dağlalandırılıb. Hazırda parlamentin qarşısındakı meydan insanlarla doludur. *** Gürcü Arzusu Partiyasının deputatları parlament binasından çıxdıqdan sonra xüsusi təyinatlılar ərazini tərk ediblər. Onlar binanın Gürcüstan Xüsusi Dövlət Mühafizə Xidmətinin yanında yerləşən həyətinə keçiblər. Xüsusi təyinatlıların meydanı tərk etməsi etirazçıların alqışları ilə müşayiət olunub. *** Tiflisdə keçirilən aksiyada etirazçılara qarşı rezin güllələrdən istifadə edilib. Nəticədə bir neçə nəfər xəstəxanaya aparılıb. *** Gürcüstan parlamenti təhlükəsizlik səviyyəsini qırmızı elan edib. "Parlamenti sədrinin “Gürcüstan Parlamentinin Sarayında Təhlükəsizlik Qaydalarının təsdiq edilməsi haqqında” sərəncamına uyğun olaraq, mayın 1-də saat 23:00-dan Gürcüstan Parlament Sarayında qırmızı təhlükəsizlik səviyyəsi qüvvəyə minib. Parlament Sarayında insanların həyatı və sağlamlığı üçün təhlükə yaradan hücumla əlaqədar olaraq qırmızı təhlükəsizlik səviyyəsi elan edilib", - məlumatda qeyd olunub.

Azərbaycanla razılaşmaya əsasən, sərhəd qoşunları delimitasiya olunmuş ərazilərə yerləşdiriləcək. Sozcu.az xəbər verir ki, bu barədə Ermənistanın baş naziri Nikol Paşinyan bildirib. "Azərbaycanla razılaşma əsasında delimitasiya olunmuş ərazilərdə sərhəd qoşunları yerləşdiriləcək. Çünki sərhədlərdə təhlükəsizliyi təmin etmək onların vəzifəsidir. Yəni sərhəddə Müdafiə Nazirliyinin postları olmayacaq", - Paşinyan Ermənistanın İctimai telekanalına müsahibəsində deyib.

Ermənistan qoşunlarını Geqarkunikdən (tarixi Göyçə mahalı) geri çəkir, burada da demarkasiya işlərinin aparılması gözlənilir. Bu məqsədlə həmin ərazinin minalardan təmizlənmə işi həyata keçirilir. Bu haqda iddialar Ermənistan mediasında yayılıb. Məlumatlara görə, erməni qoşunları Çəmbərək və Cildən (Göyçə gölü ətrafındakı kəndlər) çıxarılır. Ermənilər hesab edir ki, Tavuş-Qazax istiqamətində sərhədin demarkasiyasından sonra digər ərazilərdə də Bakının istəkləri qəbul olunacaq. Ermənistan Müdafiə Nazirliyi isə Geqarkunik bölgəsidə minaların təmizlənməsi və qoşunların çıxarılması xəbərlərini təkzib edib.

Ölkəmizdə hər 1000 uşaqdan 10-u dünyasını dəyişir. Bu rəqəm az görünsə də, olduqca üzücü faktdır.  Həkimlər bildiriblər ki, uşaqlar arasında ölüm halları əsasən patoloji hamiləliklə bağlıdır. Mövzu ilə bağlı ATV-nin süjetini təqdim edirik: