Biləsuvar rayonunda “Kia" markalı minik avtomobilinin yanar hissələri yanıb. Fövqəladə Hallar Nazirliyindən Sozcu.az-a bildirilib ki, ətraf ərazilər yanğından mühafizə olunub. Yanğın yanğından mühafizə bölmələri tərəfindən söndürülüb.

Bakıda sevgilisinin dodağını siqaretlə yandıran, həmçinin onu dəfələrlə döyərək xəsarətlər yetirən şəxs həbs edilib. Hadisə paytaxtın Yasamal və Nərimanov rayonları ərazisində baş verib. Nərimanov RPİ-nin 17-ci Polis Şöbəsinə müraciət edən Səidə Fətəliyeva (ad-soyad şərtidir) sevgi münasibətində olduğu Elman adlı şəxsin ona iztirablar verdiyini bildirib. Bundan sonra 1995-ci il təvəllüdlü E.Məmmədov barəsində Cinayət Məcəlləsinin 133-cü (Əzab vermə) maddəsi ilə cinayət işi açılıb. Məlum olub ki, Elman Məmmədov Səidəyə qısqanclıq zəminində xəsarətlər yetirib. Sevgilisi yatdığı zaman cəzalandırmaq məqsədilə onun dodağını qaynar halda olan siqaretlə yandırıb. Bundan başqa, Nərimanov rayonu Keşlə qəsəbəsi ərazisində küçədə saçından tutaraq sürüyüb və yerə yıxaraq döyüb. Zərərçəkən qız məhkəmədə ilkin ifadəsində Elmanın törətdiyi əməllər barədə ətraflı məlumat verib. Lakin o daha sonrakı ifadəsində E. Məmmədovun ehtiyatsızlıqdan onun dodağını yandırdığını bildirib. Şahid ifadələri və digər dəlillər xəsarətlərin qəsdən yetirilməsini göstərib. Nərimanov Rayon Məhkəməsinin 4 iyun tarixli hökmü ilə Elman Məmmədova 2 il həbs cəzası verilib. İbtidai istintaq və məhkəmə prosesi dövründə polisin nəzarəti altında olan 29 yaşlı şəxs məhkəmə zalındaca həbs edilib. ("Qafqazinfo")

Hər fərdin və ya hər xalqın həyatında müəyyən əlamətdar günlər, bayramlar var. Ancaq müsəlmanlar üçün dinimizin buyruğu olan iki gözəl bayram - Ramazan bayramı və Qurban bayramı xüsusi əhəmiyyət və məna daşıyır. Yəni, bu iki bayram özlüyündə həm təfəkkür mövzusu, həm də bir mükafat mövzusudur. Qurban bayramı Həcc ziyarəti ilə üst-üstə düşür. Həcc ziyarəti insana ölümdən sonra dirilib Məhşər meydanında toplaşmağın ifadəsi olduğu kimi, qurban kəsmək də verdiyi bütün nemətlər üçün Allaha (c.c.) şükür etməyin ifadəsidir. Qurban vermək əslində hər bir insanın xarakterini formalaşdıran dəyərlər arasında ən mühüm xüsusiyyətdir. İbadətlərin mahiyyətini tam olaraq ancaq Allah (c.c.) bilir, amma bizə də bildirdiyi bəzi mühüm məqamlar var. Qurban ibadətinin mahiyyətini qısa şəkildə belə ifadə edə bilərik: Allahın əmri hər cür dünya nemətindən, zövqündən üstündür. Qurban kəsilən heyvan əl əməyinin, alın tərinin nəticəsidir. İnsan çalışaraq əldə etdiyi dünya nemətini Allah yolunda qurban kəsir və ehtiyacı olanlara paylayır və bununla da sübut edir ki, hər şeyin sahibi olan Allah üçün hər cür dünya nemətini fəda etmək olar. Beş növ heyvan qurban kəsmək olar: qoyun, keçi, inək, camış və dəvə. Bir qoyunu və ya bir keçini bir adam qurban kəsə bilər. Qurban kəsilən qoyun və ya keçi bir yaşından az olmamalıdır. Əgər bir yaşını tamamlamayıbsa, ən azı bir yaşındakı kimi görünməlidir. Qurban kəsiləcək inək və ya camış iki yaşından yuxarı olmalıdır. Dəvə isə ən azı beş yaşına gəlməlidir. Bir inəyə, bir camışa və ya bir dəvəyə yeddiyə qədər adam ortaq ola bilər. Ancaq bir adam istəsə, təkbaşına bir inəyi, bir camışı, bir dəvəni qurban kəsə bilər. Əsas odur ki, Allah sənin niyyətindən, sənin əməlindən razı olsun. Qurban kəsiləcək heyvanlar xəstə, qoca və şikəst olmamalıdır. Bu məsələdə heyvanların əlamətlərini kifayət qədər sadalamaq olar, ancaq bircə onu bildirməyi lazım bilirik ki, hər kəsin kəsdiyi qurban elə özünə verdiyi dəyərdir. Quşlardan, həmçinin ov heyvanlarından qurban kəsmək olmaz. Qurban kəsmək varlı müsəlmanların borcudur, qurban payı gözləmək kasıb müsəlmanların haqqıdır. Qurban ətini 3 yerə bölmək, bir hissəsini yoxsullara, bir hissəsini qohumlara və qonşulara, bir hissəsini də evə ayırmaq daha doğrudur. Qurban ətindən müsəlman olmayanlara da vermək olar. Qurbanı incitmədən kəsmək, kəsərkən də “Bismillah, Allahu Əkbər” və ya “Bismillah” demək lazımdır. Yaxşı olar ki, qurbanı özünüz kəsəsiniz, əgər kəsə bilmirsinizsə, heç olmasa heyvanın yanında dayanın, kəsənlə birlikdə “Bismillah” deyin. Allah bu gözəl bayramla yurdumuza xeyir-bərəkət, insanlarımıza könül xoşluğu nəsib etsin! Qurban bayramınız mübarək olsun! (yeniavaz) Murad Məmmədov

“Sədərək” ticarət mərkəzində yanğın olub. Bu barədə Sozcu.az -a Fövqəladə Hallar Nazirliyindən bildirilib. Məlumata görə, Qaradağ rayonunda yerləşən ticarət mərkəzinin ərazisində ümumi sahəsi 50 m² olan tikinti materialları anbarının qarşısına yığılan plastik borular və digər obyektdə ümumi sahəsi 200 m² olan anbarın 2 ədəd plastikdən ibarət pəncərəsi və 5 m² sahədə dam örtüyü yanıb. Anbar yanğından mühafizə olunub. Yanğın yanğından mühafizə bölmələri tərəfindən söndürülüb.

Bu gündən Azərbaycanda çimərlik mövsümünə start verildi. Artıq əksər restoran və iaşə obyektləri tam hazır vəziyyətə gətirilib. Stol-stul dəstləri düzülüb, abadlıq işləri isə yekunlaşıb.  “Cebhe.info" dənizkənarı obyektlərdə qiymətləri araşdırıb. SEO Xidməti Bilgəh, Novxanı, Buzovna və Şixov ərazisində olan akvaparklara giriş ara günləri 25 manat, həftəsonu isə 30 manatdır.  Məşhur "Dalga Beach" akvaparkına girişin qiyməti isə həftəiçi 30 manat, həftəsonu isə 40 manat təşkil edir.  Akvaparklara bəzi əlavə qidaları gətirməyə icazə verilsə də, böyük əksəriyyəti isə ümumiyyətlə qida ilə girişə qadağa tətbiq edir.

Bir ilə yaxındır icra başçısız qalan Daşkəsən rayonu ilə bağlı xəbər var.  AzFakt.com-a daxil olan məlumatda bildirilir ki, Prezidentin 17 iyul 2023-cü ildə Daşkəsən icra başçısı vəzifəsindən çıxartdığı Əhəd Abıyev hələdə bu rayonda "kölgə" icra başçısı rolunu oynayır. Əhəd Abıyevə bu məsələdə yardımı isə hazırda Daşkəsən rayon İcra Hakimiyyətində başçının müavini, İctimai-siyasi və humanitar məsələlər şöbəsinin müdiri vəzifəsində çalışan Namiq Süleymanovun etdiyi bildirilir. SEO Nədir Daşkəsəndəki mənbə bildirir ki, hazırda Daşkəsəni Əhəd Abıyevin göstəriş və məsləhəti ilə Namiq Süleymanov idarə edir. Namiq Süleymanovun ayda bir neçə dəfə Əhəd Abıyevlə görüşərək ondan göstəriş və təlimatlar aldığı deyilir. Məlumatda qeyd edilir ki, Əhəd Abıyev bütün əlaqələrini işə salaraq Namiq Süleymanovun Daşkəsən rayon icra başçısı olmasına çalışsa da, hələki bu istəyi reallaşmır. Qeyd edək ki, Namiq Süleymanov Əhəd Abıyev deputat olanda onun sürücüsü, daha sonra köməkçisi və icra başçısı işlədiyi dövrdə isə müavini vəzifəsinə yüksəlib. Onun diplomunun da saxta olması ilə bağlı iddialar var.

İsmayıllıda Talıstan kənd sakini bədbəxt hadisə nəticəsində ölüb. Sozcu.az oxu.az-a istinadən xəbər verir ki, Göyçə Hacıalı qızı Hüseynova həyətdə cücələrə su verərkən elektrik naqilinə toxunub və nəticədə onu cərəyan vurub. Bildirilib ki, 47 yaşlı qadın 3 uşaq anasıdır. SEO Xidməti Faktla bağlı İsmayıllı Rayon Prokurorluğunda araşdırma aparılır.

İyunun 14-də paytaxtın Sabunçu rayonu ərazisində 2006-cı il təvəllüdlü Rəşid İmanovun öldürülməsi barədə rayon prokurorluğuna məlumat daxil olub. Sozcu.az xəbər verir ki, bu barədə Sabunçu rayon prokurorluğu məlumat yayıb. Araşdırma zamanı 2006-cı il təvəllüdlü Rəhim Əsədovun rayonun Balaxanı qəsəbəsi ərazisində aralarında yaranmış mübahisə zamanı bıçaqla xəsarət yetirərək Rəşid İmanovu qəsdən öldürməsinə əsaslı şübhələr müəyyən edilib.  Faktla bağlı Sabunçu rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanaraq istintaq aparılır. Rəhim Əsədov iş üzrə şübhəli şəxs qismində tutulub.

2023-cü il fevralın 8-i gecə saatlarında Bakının Binəqədi rayonunda yerləşən 6 saylı Peşə məktəbinin yaxınlığında bıçaqlanma hadisəsi olur. Bu barədə vətəndaş Daxili İşlər Nazirliyin "102" xidmətinə zəng edərək məlumat verib. Bundan 10-15 dəqiqə sonra isə 2007-ci il təvəllüdlü Əliəkbər Mərəyevin qətlə yetirilməsi barədə 5-ci Polis Bölməsindən rayon prokurorluğuna məlumat daxil olub. Cinayəti törədən 2002-ci il təvəllüdlü Rəşad Muxtarov hadisə yerində saxlanılıb. Məlumatla əlaqədar prokurorluq əməkdaşları məhkəmə-tibbi ekspertinin iştirakı ilə hadisə yerinə yollanıblar. Məlum olub ki, hadisə Sənaye və İnnovasiyalar üzrə Bakı Dövlət Peşə Təhsil Mərkəzi yataqxanasının 204 saylı otağında baş verib. Çarpayıda Əliəkbər Mərəyevin meyiti, yastıqda, yorğanda, döşəmədə, mələfədə, hamam otağında çoxlu sayda qan ləkələri aşkarlanıb. Faktla bağlı Binəqədi Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb. Lent.az qətl hadisəsinin istintaq materiallarını əldə edib. Bakıda yataqxanada DƏHŞƏT: Onu yatmağa qoymayan tələbəyə 38 bıçaq zərbəsi vurdu İstintaqla müəyyən edilib ki, fevralın 8-i gecə saat 2 radələrində Rəşad Muxtarov 204 saylı otaqda onunla birlikdə yaşayan, həmin Mərkəzin tələbəsi Ələkbər Mərəyevə yatmaq istədiyini bildirərək, ondan otaqdakı işığı söndürməsini və mobil telefonunun səsini azaltmasını xahiş edib. Ancaq aralarında mübahisə yaranıb. Bu zaman Rəşad Muxtarov otaqdakı masanın üzərindən mətbəx bıçağını götürüb və arxası üstə çarpayıya yıxdığı Əliəkbər Mərəyəvin döş qəfəsinə bir neçə zərbə vurub. Daha sonra onun döş qəfəsinə və bədəninin digər nahiyələrinə ümumilikdə 38 dəfə zərbə endirib. Nəticədə yeniyetmə ölüb. İş üzrə dindirilmiş Rəşad Muxtarov bildirib ki, Mingəçevir şəhərində Səməd Vurğun adına 16 nömrəli orta məktəbi bitirib, səhhəti ilə bağlı hərbi xidmətdə olmayıb. 2022-ci ilin sentyabr ayında "Sənaye və İnnovasiyalar üzrə Bakı Dövlət Peşə Təhsil Mərkəzi"nə qəbul olunub: "Mərkəzin yataqxanasında 204 saylı otaqda, Əliəkbər Mərəyev, Elcan Talıbov və Məhəmməd Səfəralıyevlə birlikdə yaşayırdım. Həmin uşaqlarla münasibətimiz yaxşı idi. Axırıncı dəfə, mənimlə söyüşlə etdiyi zarafatlara görə, Əliəkbərlə münasibətim pisləşmişdi. Bu növ zarafatları qəbul etmədiyimdən otaq yoldaşıma iradımı bildirəndə, Əliəkbər zarafatdır da edirəm, sən də məni söy dedi. 2023-cü il fevralın 7-də dərsə getməmişdim. "28 may" metostansiyasının yanında yerləşən Ticarət Mərkəzində bir az vaxtımı keçirib, saat 22 radələrində yataqxanaya qayıtdım. Otaqda Əliəkbər idi, Məhəmmədlə Elcan bir neçə günlük yaşadıqları rayona getmişdilər. Öz yerində uzanan Əliəkbərə salam versəm də, o, salamımı almadı, fikri əlindəki telefonda idi. Paltarlarımı soyunub, yatağımda uzandım. Saat 23 radələrində Şamil adlı komendant otağa gəlib, nəzər yetirib getdi. Əliəkbər telefonunda oyun oynayırdı. Telefonun səsi və işığına görə yata bilmirdim. Telefonu söndürməsini tələb etsəm də, otaq yoldaşım sözlərimə məhəl qoymayaraq, mənə "işinlə məşğul ol" dedi. Əliəkbərə "sənə 10 dəqiqə vaxt verirəm, telefonun səsini al, yatıram" söyləsəm də, o, buna əhəmiyyət vermədi. Ünvanıma işlədilən söyüşdən qəzəblənərək, ayağa qalxdım və onun üstünə getdim. Ondan üzr istəməsini tələb etdim. "Məni səni vurmağa vadar etmə" deyəndə, Əliəkbər yenə "işimlə məşğul olmağımı" bildirdi. Artıq söyüşlərə dözə bilmədiyimdən, əlimdə bıçaqla otaq yoldaşıma yaxınlaşdım. Bunu görən Əliəkbər ayağa qalxıb mənimlə əlbəyaxa olmaqla, bıçağı əlimdən almağa çalışdı, amma bunu bacarmadı. Əllərimlə itələyib onu çarpayıya yıxdım. Dərhal sinəsinə bir neçə zərbə endirdim. Əliəkbər söyüşlər söyüb, özünü müdafiə etməyə çalışsa da, əsəbimdən ona xəsarətlər yetirməkdə davam etdim. Əliəkbər yataqda, üzü üstə uzanıqlı, hərəkətsiz vəziyyətdə qaldı. Tibbi Yardım stansiyasına zəng etdim. Atam, sonra da anamla əlaqə saxlayaraq, onlara adam bıçaqladığımı dedim. Daha sonra otaqda işıqları söndürüb, həkimlərin gəlməsini gözlədim". İstintaq zamanı, Rəşad Muxtarov hamam otağında, su borusunun arxasından mətbəx bıçağını çıxarıb, müstəntiqə təqdim edib. Zərərçəkmiş şəxsin hüquqi varisi Zamin Mərəyev bildirib ki, Əliəkbər Mərəyev onun bacısı oğlu olub: "Hadisə haqqında mənə polis əməkdaşı zəng edib məlumat verib. 5-ci bölməyə gedəndə bildim ki, Əliəkbəri otaq yoldaşı Rəşad Muxtarov öldürüb. Bacım oğlu Lənkəran rayonunun Şağlaküçə kəndində böyüyüb. 9-cu sinifdən sonra, 2022-ci ildə Əliəkbər "Sənaye və İnnovasiyalar üzrə Bakı Dövlət Peşə Liseyinə qəbul olunub. Qohumum heç vaxt otaq yoldaşlarından mənə şikayət etməmişdi". Şahid Ülvi Kazımov bildirib ki, Sənaye və İnnovasiyalar üzrə Bakı Dövlət Peşə Təhsil Mərkəzində təhsil alan tələbələrin yataqxanasında və yeməkxanasında maddi-texniki təminatın həyata keçirilməsi ilə məşğuldur: "Yataqxanada oğlanların yaşadığı hissəyə Şamil Qasımov, qızlar olan hissəyə isə Gülyanaq Qarayeva nəzarət edir. Fevralın 7-də gün ərzində yataqxanada olmuşam. Şamil Qasımov saat 22:00-da gündəlik rejimə uyğun olaraq, tələbələrin otaqlarına daxil olaraq, səliqə-sahmana, eləcə də, digər zəruri təhlükəsizlik qaydalarına riayət edilib-edilməməsini yoxlayıb və bu barədə mənə məlumat verib. Fevralın 8-i gecə saat 2:30-da Rəşad Muxtarovun anası zəng edib, mənə oğlunun kiminləsə dalaşdığını və bıçaqlanma hadisəsi baş verdiyini dedi. Yolda olan zaman Şamil mənimlə əlaqəsi saxlayıb, Rəşadın Əliəkbəri bıçaqla vurduğunu bildirdi. Polisə və təcili yardım stansiyasına zəng edib xəbər verdim. Sonradan öyrəndim ki, Şamil qapını döyüb Rəşadı çağırıb. Otaqdan heç bir reaksiya verilmədiyini görüb qapını çiyni ilə vurub açıb. İşığı yandıranda Rəşadı əlində bıçaqla, Əliəkbərin isə çarpayıda, hərəkətsiz vəziyyətdə qaldığını görüb". Məhkəmə iclasında Rəşad Muxtarov ittiham üzrə özünü təqsirli bilib. Zərərçəkmiş şəxsin hüquqi varisi təqsirləndirilən şəxsə qanun çərçivəsində cəza verilməsini xahiş edib. Məhkəmə qənaətə gəlib ki, Rəşad Muxtarovun Cinayət Məcəlləsinin 120.2.2-ci (xuliqanlıq niyyəti ilə qəsdən adam öldürmə) və 120.2.4-cü (xüsusi amansızlıqla qəsdən adam öldürmə) maddələri ilə nəzərdə tutulan cinayət əməlini törətməsi tam sübuta yetirilib. Bakı Ağır Cinayətlər Məhkəməsinin hökmü ilə Rəşad Muxtarov cəzasını ciddi rejimli cəzaçəkmə müəssisəsində çəkməklə 19 il müddətinə azadlıqdan məhrum olunub.

İyunun 12-də Xocalı aeroportunda Azərbaycan bayrağının qaldırılmasından sonra sosial şəbəkə istifadəçiləri hava limanına Milli Qəhrəman Əlif Hacıyevin adının verilməsini təklif edirlər. Sozcu.az xəbər verir ki, buna səbəb kimi Əlif Hacıyevin 1992-ci ilin fevralında həm Xocalı sakinlərinin xilasındakı rolu, həm də şəhərin hava limanının müdafiəsi uğrunda mübarizəsi göstərilir. Belə ki, 1970-ci illərdə inşa edilən Xocalı aeroportundan müxtəlif məqsədlər üçün AN-2 (“Kukuruznik”) təyyarələri uçurdu, Bakıdan Xocalıya, Xocalıdan İrəvana gedirdi. Bundan başqa, kənd təsərrüfatı məqsədilə istifadə olunub. Amma Heydər Əliyev Azərbaycan Respublikasının Mərkəzi Komitəsinin Birinci katibi olduğu zaman – 1975-ci ildə onun rəhbərliyi altında Xocalı hava limanı müasir formada qurulur. 1990-cı ildə isə Əlif Hacıyev Xocalı hava limanı xətt daxili işlər bölməsinə rəis təyin edilir, eyni zamanda Xocalı hava limanının komendantı olur. Bir müddət sonra Azərbaycana qarşı ərazi iddiaları ilə hərəkətə keçən erməni terrorçuların növbəti hədəfi Xocalı olur. Şəhərin hava limanının strateji əhəmiyyətinə görə buranı zor gücü ilə ələ keçirməyə çalışan ermənilər aeroportu mühasiəyə alır və oranı boşaltmaq üçün azərbaycanlılara vaxt verirlər. Əlif Hacıyev isə üstün zəkası ilə həm hava limanı uğrunda mübarizəsini davam etdirir, həm də binadakı azərbaycanlıları xilas etmək üçün hərəkətə keçir. Bu səyləri zamanı da 1992-ci ilin fevralın 25-də erməni gülləsinə tuş gələrək, şəhid olur. Xocalı hava limanına Əlif Hacıyevin adının verilməsi ilə bağlı təklifləri hərbi ekspert Üzeyir Cəfərov da dəstəkləyib: “Ordumuzun hələ qurulmadığı dövrdə Əlif Hacıyev və onun tərəfdarları, polis orqanlarından çalışanlar çox sadə və primitiv silahlarla düşmənə qarşı döyüşdülər, canlarından keçdilər. Dəfələrlə ermənilər onun həyatına sui-qəsdə cəhd edirlər. Əlif isə vətəndaşlarımızın oradan çıxarılması, dinc əhalinin nisbətən təhlükəsiz yerə çatdırılması üçün amalından dönmür. Bu səbəbdən də Əlifin adı Xocalı camaatı üçün əzizdir. Bu gün Əlif Hacıyev əqidəsində minlərlə polis əməkdaşları, hərbçilər, insanlarımız var ki, onun göstərdiyi şücaətdən danışır, yolunu davam etdirirlər. Ona görə deyirik ki, Əlif Hacıyevin adı Xocalı aeroportuna verilsə, həm cəmiyyət, həm də insanlarımız, bir növ, onların hansı amallar uğrunda vuruşduğunun bir daha şahidi olarlar. Düzdür, Əlifin adına Bakıda küçə var, ancaq mənə elə gəlir ki, Xocalımız azaddır deyə, onun adı doğma yurdunda da əbədiləşdirilməli, canını fəda elədiyi aeroporta onun adı verilməlidir. Bir sözlə, Xocalı aeroportunun təzədən qurulması, ora unudulmaz, əfsanəvi qəhrəmanımız Əlif Hacıyevin adının verilməsi həm hərbi vətənpərvərlik, həm də qəhrəmanlarımıza verdiyimiz dəyər nöqteyi-nəzərdən yaxşı olardı. Bu məsələnin həlli əlaqədar qurumlar tərəfindən aktuallaşdırılmalıdır”. Ekspert həmin döyüşlərdə Əlif Hacıyevin qardaşının da şəhid olduğunu xatırladaraq, ümumiyyətlə, böyük qəhrəmanlıq göstərən şəhidlərimizin adının işğaldan azad olunmuş ərazilərdə əbədiləşdirilməsi gərəkdiyini bildirib: “Bilirsiniz ki, artıq Füzulidə, Şuşada, Ağdamda insanlarımızın yaşayışı təmin olunur. Təkliflər hazırlanmalı, o torpaqlar uğrunda qəhrəmanlıq, şücaət göstərən şəhidlərimizin, o cümlədən canlı qəhrəmanlarımızın adları küçələrə, prospektlərə, məktəblərə, uşaq bağçalarına, idman obyektlərinə verilməsi məsələsi gündəmə gətirilməlidir”.axar

Ukrayna müharibənin 843-cü günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 524 150 hərbçi, 7 956 ədəd tank, 15 263 ədəd zirehli döyüş maşını, 13 855 ədəd artilleriya sistemi, 1 103 ədəd RYAS (reaktiv yaylım atəş sistemi), 853 hava hücumundan müdafiə sistemi, 359 ədəd hərbi təyyarə, 326 ədəd helikopter, 18 911 ədəd avtomobil texnikası, 11 148 ədəd PUA, 2 293 qanadlı raket, 28 gəmi/kater, 1 sualtı qayıq, 2 322 xüsusi avadanlıq itirib.

Rusiyanın Belqorod vilayətinin qubernatoru Vyaçeslav Qladkov son sutkada regionun atəşə tutulması nəticəsində 7 mülki sakinin öldüyünü deyib. Sozcu.az xəbər verir ki, bu barədə vilayət başçısı Teleqramda yazıb. “Ötən gün Ukrayna Silahlı Qüvvələrinin hücumu nəticəsində 7 dinc sakin həlak olub, 10-u yaralanıb, 3-ü xəstəxanaya yerləşdirilib”, - Qladkov bildirib.

Azərbaycanda bayram tətili başlayıb. Sozcu.az xəbər verir ki, Azərbaycan xalqının Milli Qurtuluş Günü və Qurban bayramı ilə əlaqədar ardıcıl 5 gün iş olmayacaq. 15 iyun Azərbaycan xalqının Milli Qurtuluş Günüdür. Nazirlər Kabinetinin "2024-ci il üçün Novruz, Ramazan və Qurban bayramları günlərinin müəyyən edilməsi haqqında" 9 dekabr 2023-cü il tarixli qərarına əsasən, bu il iyunun 16, 17-si Qurban bayramı günləri müəyyən edilib. Əmək Məcəlləsinə əsasən, həftələrarası istirahət günləri və iş günü hesab olunmayan bayram günləri üst-üstə düşərsə, həmin istirahət günü bilavasitə bayram günündən sonrakı iş gününə keçirilir. Bu il 15 iyun şənbə, 16 iyun bazar gününə təsadüf etdiyi üçün 18 və 19 iyun qeyri-iş günləri olacaq. Beləliklə, ardıcıl olaraq 15, 16, 17, 18 və 19 iyun tarixlərində iş olmayacaq.

Tərtər rayonunda 32 yaşlı kişi qətlə yetirilib. Sozcu.az xəbər verir ki, bu barədə Daxili İşlər Nazirliyinin Mətbuat Xidmətindən bildirilib. Məlumata görə, hadisə iyunun 14-də qeydə alınıb: “Tərtər rayonu ərazisində 1992-ci il təvəllüdlü Əliyev Abil Mətləb oğlunun kəsici alətlə qətlə yetirilməsi barədə polisə məlumat daxil olub”. SEO Nədir Bildirilib ki, hazırda şübhəli şəxs axtarılır: “Cinayət əməlini törətməkdə şübhəli bilinən şəxsin saxlanılması istiqamətində polis əməkdaşları tərəfindən əməliyyat axtarış tədbirləri görülür”.

"Ukrayna xalqı dəyanət göstərir, Ukrayna qüvvələri öz məharəti ilə dünyanı heyran edir..." "Müharibə başlanandan ən azı 350 min rusiyalı hərbçi qətlə yetirilib və yaralanıb..." "Təkcə 2023-cü ilin sentyabrından rusiyalı işğalçılar 2 600-dən çox döyüş maşını itirib..." Rusiyanın qəsbkar qoşunlarının Ukraynaya 2022-ci il fevralından tammiqyaslı hərbi müdaxiləsi başlanandan 350 mindən artıq hərbçisi həlak olub və yaralanıb. Moderator.az xəbər verir ki, bu barədə ABŞ müdafiə naziri Lloyd Ostin Brüsseldə NATO-nun mənzil-qərargahında keçirilən Ukraynanın müdafiəsi məsələləri üzrə Təmas Qrupunun  ("Ramştayn-23") iclasında bəyan edib. Nazir o cümlədən deyib ki, Ukrayna qüvvələri ağır mübarizə aparır, Kreml isə Ukraynanın şəhərləri və mülki əhalisinin, o cümlədən Xarkovun bombardman edilməsini gücləndirməkdə davam edir. "Ukraynanın təcili olaraq öz səmasını müdafiə etmək üçün çoxlu sayda hava hücumundan müdafiə imkanlarına ehtiyacı var", - Ostin vurğulayıb. Eyni zamanda o, vurğulayıb ki, Ukrayna xalqı dəyanət və qalibiyyət nümayiş etdirir, Ukrayna qüvvələri öz məharəti ilə dünyanı heyrətə gətirir. "Ukrayna qoşunları Rusiyanın Xarkovda yeni hücumunu dəf edir və öz xəttdə, Ukraynanın şərqi və cənubunda möhkəm dayanıb", - Ostin qeyd edib. Onun sözlərinə görə, Rusiya diktatorunun Ukraynaya tammiqyaslı hərbi müdaxiləsindən artıq 840 gün keçir. "Ukrayna müdafiəçiləri rusiyalı qəsbkarlarını heyrət doğuran itkilərə məruz qoyub. 2022-ci ilin fevralından ən azı 350 min rusiyalı hərbçi həlak olub və yaralanıb. Ukrayna qüvvələri Rusiyanın Qara dənizdə 24 gəmisini batırıb və ya zədələyib", - Ostin vurğulayıb. ABŞ müdafiə naziri əlavə edib ki, 2023-cü ilin sentyabrından Rusiya Ukraynanın cəbhə xəttində 2 600-dən çox döyüş maşınını itirib. Həmçinin təkcə may ayında rusiyalı qəsbkarlar Avdeyevkadan qərbə doğru irəliləməsi zamanı 160-dan çox döyüş maşınını itirib. "Bu, Rusiyanın Putinin imperiya ambisiyalarına görə ödədiyi bədəlin daha bir xatırlatmasıdır", - Ostin vurğulayıb. Bununla əlaqədar olaraq Ostin qeyd edib ki, beynəlxalq tərəfdaşlarının Ukraynaya dəstək verməsinə şübhə olmamalıdır. Rusiyanın Ukraynada itkiləri - Ukrayna Silahlı Qüvvələrinin məlumatı USQ Baş Qərargahının məlumatına görə, Ukraynaya tammiqyaslı hərbi müdaxilə başlanandan Rusiyanın döyüş itkiləri şəxsi heyətinin 522 810 nəfərini təşkil edib. Son sutka ərzində minədək rusiyalı qəsbkar məhv edilib. Rusiya döyüş meydanında 7928 tank, 15 208 zirehli maşın, 13 770 artilleriya sistemi, 1099 yaylım atəşli reaktiv sistem itirib.

Xəbər verdiyimiz kimi, iyunun 9-da naməlum şəraitdə itkin düşmüş Müdafiə Nazirliyinin N saylı hərbi hissəsinin hərbi qulluqçusu, əsgər Hüseynov Ceyhun Tofiq oğlunun ölümü ilə bağlı cinayət işi açılıb. C.Hüseynovun qətlə yetirilməsinin dəqiqləşməsi ilə bağlı açılan cinayət işinin maddəsi onun erməni silahlı birləşmələri tərəfindən öldürülməsi ilə bağlı şübhələr yaradır. Faktla bağlı Cinayət Məcəlləsinin 120.2.12-ci, yəni, milli, irqi, dini ədavət və ya düşmənçilik niyyəti ilə adam öldürmə maddəsinin tətbiq edilməsi bunu deməyə əsas verir. Hadisənin hansı şəraitdə və necə baş verməsi aparılan istintaq tədbirlərinin yekununda məlum olacaq. Hazırda başlanmış cinayət işinin ibtidai istintaqı davam etdirilir. Elə Ceyhunun itkin düşməsi ilə bağlı ilkin xəbər yayılandan bir neçə saat sonra erməni mediası əsgərimizin Naxçıvan istiqamətindən Ermənistan ərazisinə keçdiyi ilə bağlı məlumat yaymışdı. Daha sonra Ermənistan Milli Təhlükəsizlik Xidməti Azərbaycan Ordusunun hərbi qulluqçusunun sərhədi keçmə ehtimalı ilə bağlı məlumata sahib olmadığını bildirmişdi. Ermənistan silahlı birləşmələrinin bu ilin fevral ayında Zəngilanda atəş açaraq sərhədçimizi yaraladığı, hərbçilərimizin minaya düşərək şəhid olduğu, erməni diversantın gizli şəkildə Kəlbəcərə keçərək diversiya cəhdi göstərdiyi və digər hadisələrdə, eləcə də separatçıların lideri olmuş Arayik Arutyunyana da qeyd edilən maddə üzrə cinayət işləri açılıb. Qeyd edək ki, Ceyhun Hüseynovun meyiti itkin düşdükdən 2 gün sonra Naxçıvan Muxtar Respublikasının Şərur rayonunun Günnüt yaşayış məntəqəsi istiqamətində yerləşən ərazidə aşkar edilib. Baş Prokurorluğun Mətbuat xidmətindən bildirilib ki, cinayət işi üzrə məhkəmə-tibbi, komplesk məhkəmə-ballistik, daktiloskopik və trasoloji eskpetizalar təyin edilib, hadisə yerinə və meyitə baxış keçirilib, şahidlər dindirilib. Habelə, iş üzrə əhəmiyyət kəsb edən predmetlər maddi sübut kimi götürülərək təxirəsalınmaz zəruri istintaq hərəkətləri icra olunur. Onu da əlavə edək ki, Ceyhun Hüseynov ölkənin ən savadlı gənclərindən biri olub. Belə ki, o, 2016-cı ildə Akademik Zərifə Əliyeva adına liseyi qızıl medalla bitirib. Həmin il 627 balla ADA Universitetinin Beynəlxalq münasibətlər ixtisasına daxil olan Ceyhun daha sonra Yaponiyada mübadilə proqramı çərçivəsində təhsil alaraq yüksək göstərici ilə məzun olub. Magistr dərəcəsini Təl-Əvivdə alan Ceyhun vətənə qayıtdıqdan sonra hərbi xidmətə yollanıb. Xatırladaq ki, Ceyhunun adını daşıdığı əmisi Hüseynov Ceyhun Tahir oğlu 1994-cü ildə Talış kəndi uğrunda döyüşərkən şəhid olub.

Ukrayna prezidenti Volodimir Zelenski İsveçrəyə səfər edib. Sozcu.az xəbər verir ki, bu barədə o, özünün teleqram kanalında yazıb. Ukrayna lideri iyunun 15-dən 16-dək keçiriləcək sülh sammitində iştirak edəcək. Sammit çərçivəsində Ukrayna prezidentinin təklif etdiyi sülh formulası müzakirə olunacaq. “Sülh sammiti qlobal əksəriyyətə dünyada hər kəs üçün vacib olan sahələrdə konkret addımlar atmağa imkan verəcək”, - dey Zelenski kanalında yazıb. O əlavə edib ki, sammitdə təxminən 100 ölkə iştirak edəcək. İsveçrənin Bürgenstok şəhərində keçirilən sülh sammitinə 160 ölkədən nümayəndə heyəti dəvət olunub.

Sabahdan Azərbaycanda bayram tətili başlayır. 15 iyun Milli Qurtuluş Günü, 16-17 iyun Qurban bayramı günləridir. Əmək Məcəlləsinə əsasən, həftələrarası istirahət günləri və iş günü hesab olunmayan bayram günləri üst-üstə düşərsə, həmin istirahət günü bilavasitə bayram günündən sonrakı iş gününə keçirilir. Bu il 15 iyun şənbə, 16 iyun bazar gününə təsadüf etdiyi üçün 18 və 19 iyun tarixləri də qeyri-iş günləri olacaq. Bununla da, ardıcıl olaraq 15, 16, 17, 18 və 19 iyun tarixləri qeyri-iş günləridir. Həmçinin, iyunun 26-da Azərbaycan Respublikasının Silahlı Qüvvələri Günü qeyd ediləcək./qafqazinfo

Azərbaycan əhalisinin sayı ilin əvvəlindən 12 min 801 nəfər və ya 0,1 faiz artaraq 2024-cü il may ayının 1-i vəziyyətinə 10 milyon 193 min 571 nəfərə çatıb. Sozcu.az xəbər verir ki, bu barədə Dövlət Statistika Komitəsindən məlumat verilib. Bildirilib ki, əhalinin ümumi sayının 54,5 faizini şəhər, 45,5 faizini kənd sakinləri təşkil edir. Onlardan 49,8 faizi kişi, 50,2 faizi isə qadınlardır.

Cari ilin ilk dörd ayı ərzində Ədliyyə Nazirliyinin rayon (şəhər) qeydiyyat şöbələri tərəfindən 13 min 859 nikah qeydə alınıb. Sozcu.az xəbər verir ki, bu barədə Dövlət Statistika Komitəsinin yaydığı məlumatda deyilir. Qeyd olunub ki, həmin dövrdə 6 min 933 boşanma qeydə alınıb: “Ötən ilin müvafiq dövrü ilə müqayisədə əhalinin hər 1000 nəfərinə nikahların sayı azalaraq 4,5-dən 4,1-ə düşüb, boşanmaların sayı isə dəyişməyərək eyni səviyyədə (2,1) qalıb”.

Rusiyanın Voronej vilayətinin Liskinsk rayonundakı neft bazasına PUA hücumu edilib. Sozcu.az xəbər verir ki, bu barədə Rusiya Teleqram kanalları məlumat yayıb. Hücum nəticəsində bir neçə yanacaq çəni partlayıb. Məlumatı Voronej vilayətinin qubernatoru Aleksandr Qusev də təsdiqləyib.

Bakıda iki yaşlı körpə xəstəxanada ölüb. TƏBİB-dən Sozcu.az-a bildirilib ki, yol-nəqliyyat hadisəsi nəticəsində ağır xəsarətlər alan 2022-ci il təvəllüdlü azyaşlı (kişi cinsli) iyunun 13-ü saat 22:00 radələrində huşsuz vəziyyətdə Respublika Neyrocərrahiyyə Xəstəxanasına hospitalizasiya olunub. Qeyd olunub ki, vəziyyəti ağır qiymətləndirilən azyaşlı dərhal Reanimasiya şöbəsinə yerləşdirilib, instrumental müayinələr aparılıb və zəruri tibbi xidmətlər göstərilib. "Təəssüf ki, reanimotoloji tədbirlərə baxmayaraq, azyaşlının iyunun 14-ü saat 02:30 radələrində posthemorragik şok, baş beynin ağır dərəcəli əzilməsi, kəskin ürək-qan dövranı, tənəffüs pozuntuları diaqnozları ilə ölüm faktı qeydə alınıb", - məlumatda vurğulanıb.

Qusarda qəbiristanlıq dağıdılıb. Hadisə Qılahoba kəndində qeydə alınıb. Naməlum şəxs qəbiristanlığa girərək, məzar daşlarını yerlə yeksan edib. Bu barədə kənd sakinləri polisə müraciətində bildirib. Onların sözlərinə görə, naməlum şəxs ailə üzvlərinin qəbir daşlarını dağıdıb. Kənd sakinlərinin müraciəti əsasında rayon Polis Şöbəsinin əməkdaşları hərəkətə keçiblər. Keçirilən əməliyyat-axtarış tədbirləri ilə qəbirləri dağıdan şəxsin 44 yaşlı Pərviz Eldarov olması müəyyən edilib. O, saxlanılaraq istintaqa təhvil verilib. Araşdırma aparılır. Lent.az

“Paşinyan ilk növbədə ad çəkərək hadisələrin arxasında duranları ittiham etdi- Robert Köçəryanı və erməni katolikosu Qaregini... Amma maraqlıdır ki, o, Serj Sərkisyanın adını çəkmədi...” “Ən başlıcası da Paşinyan ona da nail olub ki, erməni cəmiyyəti yalnız müxalifət və hakimiyyətə münasibətdə deyil, həm də kilsəyə münasibətdə parçalanıb. Bütün səylərinə baxmayaraq, kilsə Paşinyana qarşı davamlı, kütləvi etirazlar təşkil edə bilmədi...” “İrəvanda baş verən hadisələr qəribə bir məcraya düşüb. Bunun qəribəliyi ondan ibarətdir ki, Paşinyana müxalif olan keşiş Qalstanyana dəstək verən qüvvələr artıq müəyyən bir limiti keçə biliblər. Görünən budur ki, hadisələrin axarında zəruri qüvvə toplayıb ölkədə dəyişikliyə və təbii ki, hakimiyyət dəyişikliyinə nail ola bilməyən müxalifət çalışır bir tərəfdən zorakılığa əl atmasın, çünki bu halda hakimiyyət də zorakılıqla cavab verəcəkdir. Digər tərəfdən isə onu da anlayır ki, bu gedişatla onun ciddi bir şansı yoxdur. Çünki müəyyən bir kritik kütlə toplaya bilmirlər”.  Bu fikirləri Moderator.az-a açıqlamasında siyasi təhlükəsizlik məsələləri üzrə ekspert Ərəstun Oruclu dilə gətirib. “Lakin başqa bir tərəfdən də görünən odur ki, artıq hakimiyyət də, yəni Paşinyan hakimiyyəti kartları açmağa başlayır. Məsələn, əvvəllər Paşinyan özü də ümumi sözlərlə kifayətlənirdi. Lakin dünənki çıxışında bir xeyli sensasyon bəyanatlar verdi və o cümlədən də ilk dəfə baş nazirin dilindən açıq şəkildə bu hadisələrin arxasında kimlərin durduğu deyildi.  Paşinyan katolikos Qaregini və Robert Köçəryanı ittiham elədi. Əslində bu, belə də var- bu, sirr deyil. Paşinyan hökumətinin bəzi rəsmiləri bu barədə artıq danışmışdılar. Amma olaylar istənilən halda zorakı müstəviyə keçməyə başlayır. Baş nazir də bu haqda xəbərdarlıq etdi. Və Paşinyanı narahat edən məqamlardan biri də odur ki, müxalifət müvafiq güc toplaya bilməsə də, gündəmi öz xeyrinə yönləndirə bilibdi. Yəni Ermənistanda hazırkı gündəm etirazlardır, həmin etirazların təşkilatçılarıdır. Və bu proses davam etdikcə həm də onların populyarlığının artmasına gətirib çıxara bilər. Ona görə də Paşinyanın müxtəlif bəyanatlarla zəngin və yetərincə ciddi məqamlarla dolu dünənki çıxışı həm də gündəmi dəyişməyə yönəlmişdi. Və yüksək ehtimalla baş nazir buna nail ola bildi”, - deyə davamında analitik bildirib.  “Paşinyan ilk növbədə ad çəkərək hadisələrin arxasında duranları ittiham etdi- Robert Köçəryanı və erməni katolikosu Qaregini... Amma maraqlıdır ki, o, Serj Sərkisyanın adını çəkmədi. Belə görünür ki, Köçəryanla Sərkisyan arasında da etirazların təşkilinə və hətta ola bilsin, hədəflərinə dair müəyyən ziddiyyətlər var. Və Paşinyan bu şəkildə mesaj verməklə həmin ziddiyyətlərin varlığını üzə çıxarmağa çalışdı. Bu da, yəqin ki, Köçəryan və Sərkisyanın lideri olduğu siyasi blok və partiyaların üzvləri, onları dəstəkləyənlər arasında müəyyən bir etimadsızlıq yaratmağa yönəlmişdi... Ermənistan baş nazirinin bəyanatlarının sensasyon məqamlarından biri də o idi ki, o, bəyan elədi ki, mən Qarabağı vaxtında Azərbaycanın tərkib hissəsi kimi tanımalıydım. Bu da Ermənistanda gündəm olub və yəqin ki, olacaqdır. Çünki Paşinyan 2018-ci ildən danışırdı. Yəni demək istəyirdi ki, biz bununla müharibədən, ermənilərin Qarabağdan köç etməsindən də qaça bilərdik.  Və çox güman ki, bu məsələlər bir müddət Ermənistanın siyasi gündəminin əsas mövzularından olacaqdır”, - siyasi təhlilçi diqqətə çatdırıb. Analitik işarə edir ki, İrəvandakı son olayların gedişatına Ermənistan baş nazirinin növbəti dəfə çıxışında bir daha anti-Rusiya mövqeyi nümayiş etdirməsi fonunda İrəvanda Birləşmiş Ştatların həm hərbi, həm də siyasi dairələri ilə rəsmi görüşlər keçirilməsi də yetərincə təsir göstərir. “Amma hesab edirəm ki, Paşinyanın mayın 12-dəki çıxışında daha sensasyon bəyanat müxalif deputatlardan birinin sualını cavablandırarkən Ermənistan-Rusiya münasibətlərinə aid verdiyi bəyanat idi. Və erməni baş nazir ölkəsinin KTMT-dən çıxa biləcəyini vurğulamağa qədər irəli getdi. Bununla Paşinyan göstərdi ki, o heç ksədən çəkinmir, qorxmur və zamanı gələndə Moskvaya qarşı deyilən addımlar da atılacaqdır. Və artıq bunun anonsunu verdi...  Nəhayət, bilirik ki, dünənki hadisələrdən öncə ABŞ-la Ermənistan arasında həm hər iki tərəfdən hərbçilərin iştirakıyla, həm də Paşinyanın özünün ABŞ Dövlət katibinin müavini Ceyms O Brayenlə görüşündə strateji tərəfdaşlığa dair çox intensiv məsləhətləşmələr gedibdir...   Bir sözlə, görünən odur ki, Paşinyan hökuməti artıq qəti addımlar atmağa hazırlaşır. Çünki o, etirazçıları polisə güc tətbiqində ittiham etdi. Buradan belə qənaətə gəlmək olar ki, hadisələrin növbəti mərhələsində tərəflər artıq güc tətbiqinə hazırlaşırlar. Və bunun hansı nəticələr verəcəyini söyləmək çətindir. Ona görə ki, hələlik görünən budur ki, dediyim kimi, müxalifət kritik kütlə toplaya bilmir, iqtidar isə, baş nazirin dünənki çıxışından bəlli oldu ki,  bu etirazlara son qoymağa hazırlaşır. Yəqin ki, biz yaxın günlərdə, hətta ola bilsin, bu gün, yaxud sabah İrəvanda baş verən hadisələrin öz kulminasiya nöqtəsinə çatmasının  şahidi olacağıq. Lakin hər bir halda Paşinyan  hökumətinin etirazlar, fiziki təzyiq yolu ilə istefa verəcəyi görünmür. Artıq o təhlükə sovuşdu. Ən başlıcası da Paşinyan ona da nail olub ki, erməni cəmiyyəti yalnız müxalifət və hakimiyyətə münasibətdə deyil, həm də kilsəyə münasibətdə parçalanıb. Bütün səylərinə baxmayaraq kilsə Paşinyana qarşı davamlı, kütləvi etirazlar təşkil edə bilmədi. Və Paşinyan da bu məqamı gördü, seçdi və dediyim kimi, dünənki çıxışıyla artıq konkret ittihamlara keçdi. Bütün hallarda, mənə elə gəlir ki, bu həftənin sonunda Ermənistandakı hadisələrin sonluğu bəlli olacaqdır”, -deyə ekspert yekunlaşdırıb.