ABB ASC Əsas fəaliyyət göstəriciləri (KPI) şöbəsinin mütəxəssisi/aparıcı/baş mütəxəssisi Son tarix 14 may 2025 -  Özünə və peşəkar qabiliyyətlərinə güvənən, davamlı fərdi inkişafa və bərabər imkanlar mühitində karyera irəliləyişlərinə can atan, ən əsası isə ABB komandasının fəal üzvü kimi Bankın yeni uğur hekayəsinin bir hissəsinə çevrilmək istəyən hər bir uyğun namizəd bu imkanı dəyərləndirə bilər.   “ABB” ASC-nin komandasına qoşulun və bu üstünlüklərdən Siz də faydalanın: Cənubi Qafqazın ən böyük bankında işləmək imkanı; beynəlxalq standartları yerli bazara gətirən qurumda potensialınızı reallaşdırmaq şansı; rəqəmsal həllərin, innovasiyaların tətbiqi sahəsində bazar liderinin əməkdaşı olmaq fürsəti; peşəkar kollektivdə çalışmağın üstünlüyü; yüksək komanda ruhunda əməkdaşlıq; karyera irəliləyişlərində hamıya yaradılan bərabər imkanlar; Bankda həyata keçirilən transformasiya prosesində zəngin təcrübənin qazanılması;  əməkdaşların yeni trendlərə uyğun təşkil olunan daxili və xarici təlimlərdə iştirak;   əməkdaşların beynəlxalq sertifikatlar əldə etməsi üçün həvəsləndirmə proqramı; Bankdaxili aktiv sosial həyat. Görəcəyiniz işlər: Dövri əsasda fəaliyyət göstəricilərinin (KPİ) və onların nəticələri əsasında mükafatların hesablanması; Hesablanan əsas fəaliyyət göstəricilərinin nəticələrinin təhlili, təqdimatların hazırlanması və rəhbərliyə hesabatların verilməsi; Əsas fəaliyyət göstəriciləri üzrə hədəflərə dair təkliflərin verilməsi; İşçilərlə bağlı xərclərin analizi, büdcə icrasının proqnozlaşdırılması və nəticələrin dövri təhlili. Bizim üçün uyğun namizəd: Ali maliyyə və İqtisadi sahədə təhsil; ACCA sertifikatlarına sahib (F2, F3, F5, F7); MS office proqramları üzrə biliklərə malik; SQL, vizualizasiya proqramları və Excel bilikləri yüksək olan; Performance və menecment hesabatlıq sahəsində minimum 1 il təcrübəyə malik; Komandada iş bacarıqları olan; İnduktiv və analitik təhlil bacarığı olan; Yaradıcılıq və innovasiya bacarığı olan; Problemləri həll etmə bacarığı olan şəxsdir. Əgər axtardığımız namizəd sizsinizsə Müraciət Et butonuna daxil olub qeydiyyatdan keçərək vakansiya üzrə müraciət edə bilərsiniz. Nəzərinizə çatdırmaq istərdik ki, müsahibələrə yalnız göstərilən kriteriyalara cavab verən şəxslər cəlb ediləcək.Fed.az)

Ermənistanla Azərbaycan arasında yeni eskalasiya və hətta yeni müharibəni proqnozlaşdıran bütün söhbətlərə cavab vermək istəyirəm. Müharibə üçün heç bir əsas yoxdur. Ermənistan və Azərbaycan bir-birinin ərazi bütövlüyünü, suverenliyini, beynəlxalq səviyyədə tanınmış sərhədlərinin toxunulmazlığını, güc tətbiqinin yolverilməzliyini tanıyıb. Sozcu.az xəbər verir ki, bunu Ermənistan baş naziri Nikol Paşinyan parlamentdə çıxışında deyib. “Ermənistan və Azərbaycan xalqları sülhə və dinc yanaşı yaşamağa layiqdirlər. Müharibə olmayacaq, sülh olacaq”, - o bildirib.

2025-ci ilin yanvar-fevral aylarında Ədliyyə Nazirliyinin rayon (şəhər) qeydiyyat şöbələri tərəfindən 7741 nikah və 3414 boşanma halları qeydə alınıb. Sozcu.az xəbər verir ki, bu barədə Dövlət Statistika Komitəsi məlumat yayıb. Bildirilib ki, ötən ilin müvafiq dövrü ilə müqayisədə əhalinin hər 1000 nəfərinə nikahların sayı 4,0-dan 4,7-yə qədər artıb, boşanmaların sayı isə dəyişməyərək eyni səviyyədə (2,1) qalıb.

Milli Hidrometeorologiya Xidməti aprelin 15-i saat 10:00-a olan faktiki havanı açıqlayıb. Sozcu.az xəbər verir ki, gecədən başlayaraq ölkənin əksər rayonlarında hava şəraiti yağıntılı keçir, yağıntılar bəzi yerlərdə intensiv leysan xarakterlidir. Düşən yağıntının miqdarı Beyləqanda 23 mm (aylıq normanın 75 %-i), Ağdamda 19 mm (aylıq normanın 39 %-i), Zərdab, Göyçay, Quba və Lerikdə 18 mm (aylıq normanın 25-58%-i), Xaltanda 17 mm (aylıq normanın 24 %-i), Kürdəmir və Yardımlıda 16 mm (aylıq normanın 26-46 %-i) Oğuzda 14 mm (aylıq normanın 14 %-i), Sabirabad, Yevlax və Qəbələdə 12 mm (aylıq normanın 12-44 %-i), Şuşa, Ağsu, İsmayıllı və Şamaxıda 10 mm (aylıq normanın 10-15 %-i), Xaçmaz və Tərtərdə 9 mm (aylıq normanın 26-30 %-i), Altıağac, Şabran və İmişlidə 8 mm (aylıq normanın 11-27%-i), Şəki, Tovuz və Mingəçevirdə 7 mm (aylıq normanın 8-21 %-i), Qobustan, Goranboy, Şahbuz, Qəbələ, Naftalan və Lənkəranda 6 mm, Bərdə, Gəncə, Göygöl, Gədəbəy, Şəmkir, Daşkəsən, Astara, Biləsuvar, Qax, Zaqatala və Balakəndə 5 mm-dir. Bakıda və Abşeron yarımadasında düşən yağıntının miqdarı 6 mm-dir, bu da aylıq normanın 26 %-ni təşkil edir. Dağlıq ərazilərə qar yağır, yağan qarın hündürlüyü Xınalıqda 20, Qrızda (Quba) 16, Şahdağda 12, Kəlbəcərdə 5, Qusar və Laçında 4, Qubadlıda 3 sm-dir. Hazırda bəzi yerlərdə şimal-qərb küləyi əsir, küləyin maksimal sürəti Şamaxıda 16, Qobustanda 18, Şahbuzda 19, Şahdağda 20, Culfada 24, Bakıda və Abşeron yarımadasında 27 m/s-yə çatır. Havanın temperaturu Bakıda və Abşeron yarımadasında, eyni zamanda Aran rayonlarında 11, Naxçıvan MR-da 10 dərəcəyədək isti, dağlıq rayonlarda 2 dərəcəyədək şaxta qeydə alınıb.

Yeniyetmələrin itkin düşməsi və ya evdən qaçması hallarına dair xəbər lentlərində hər həftə məlumatlar görünür. Bir çoxları bu davranışın səbəbini valideynlərin münasibətlərində, ailədaxili konfliktlərdə axtarır. Digərləri mobil telefon, onlayn oyun  və filmlərin uşaqların psixologiyasına təsirini ön plana çəkir. Psixoloq Zeynəb Əyyubova “Yeni Sabah”a açıqlamısında bunu sadəcə bir sosial hadisə deyil, həm də ailə və psixoloji sistemdəki dərin çatların göstəricisi sayır. "Uşaqlar nə zaman evdən qaçır? Bu heç vaxt bircə səbəbdən qaynaqlanan hadisə olmur. Oxşar davranışlar çox zaman uzun müddət yığılan emosional boşluğun, anlaşılmamağın və bəzən də zorakılığın nəticəsidir. Uşaq evdə özünü eşidilməmiş, dəyərsiz, sıxılmış və ya təhlükədə hiss etdikdə, təbii ki, həmin mühiti tərk etməyə çalışır. Onun üçün ev artıq sığınacaq deyil, boğucu divarlardır. Əlbəttə, əsas səbəblərdən biri ailədaxili münasibətlərdir. Valideyn-uşaq arasında yaxın emosional bağın olmaması, uşağın fikirlərinə, hisslərinə hörmət edilməməsi, tənqid və təzyiqlərin çoxluğu uşağı evdən uzaqlaşdırır. Bəzən valideynlər uşağı sözəbaxan etmək üçün sərt metodlara üstünlük verirlər. Halbuki uşaqların duyğularını, ehtiyaclarını anlamaq və onları bir fərd kimi qəbul etmək vacibdir”. Z.Əyyubova qeyd edib ki, bu günün uşaqları virtual aləmdə özlərinə yeni “dünyalar” qururlar: “Onlayn oyunlar, sosial şəbəkələr və izlədikləri filmlər onlara başqa həyat tərzlərinin, sərbəstliyin, sərgüzəştlərin mümkün olduğunu göstərir. Reallıqda tapa bilmədiklərini bu platformalarda gördükdə, o dünyaya daha çox bağlanırlar. Bu da onları evdəki reallıqdan uzaqlaşdırır. Amma bütün günahı texnologiyaya atmaq ədalətli deyil. Uşağın nə üçün virtual aləmə meyil göstərdiyini anlamadan bu problem həll olunmaz. Uşaq texnologiyaya qaçırsa, deməli real həyatda onun qaça biləcəyi bir narahatlıq var. Oyunlar və sosial media sadəcə vasitədir. Əsas səbəb yenə də emosional ehtiyacların ödənilməməsidir. Nəticə olaraq, uşaqlar evdən qaçmır. Onlar sadəcə sığınacaq, anlaşılmaq, azad nəfəs almaq üçün özünə yer axtarır. Valideynlər öz uşaqları ilə güclü və açıq münasibət qurmağı, onları dinləməyi, sevgi və şəfqətlə yanaşmağı öyrənməlidirlər. Uşağa sərbəstlik vermək, amma bu sərbəstliyi məsuliyyətlə müşayiət etmək çox önəmlidir. Yeniyetmənin ən çox ehtiyac duyduğu şey anlayış, dəstək və qəbul edilməkdir. Bunlar yoxdursa, uşaq harada olursa-olsun, orada qalmaq istəməyəcək. Təhlükəsizlik hissi ailədən başlamalıdır. Əgər evdə yoxdursa, uşaq onu başqa yerdə axtaracaq”.

Azərbaycanın tanınmış hüquqşünası Elçin Namazov Bosniyada faciəli şəkildə həlak olub. Sozcu.az xəbər verir ki, bu barədə jurnalist Rövşən Hacıbəyli məlumat yayıb. 2011-ci ilin sentyabrında Vəkillər Kollegiyasının qərarı ilə E.Namazov vəkillikdən uzaqlaşdırılmışdı. Allah rəhmət eləsin.

Bakıda dəhşətli intihar hadisəsi olub. Sozcu.az Lent.az-a istinadən xəbər verir ki, hadisə Binəqədi rayonu Biləcəri qəsəbəsində baş verib. 18 yaşlı Nihad Rəşad oğlu Məmmədli yaşadığı evdə odlu silahla başından atəş açaraq, özünü öldürüb. Evdən mərhumun atasına məxsus odlu silah aşkarlanaraq götürülüb. Faktla bağlı Binəqədi rayon Prokurorluğunda araşdırma aparılır.

Duyğu, vicdan çəki ilə ölçülməz, Tanrı vermiş bu həyata bir düzən,  Yollar çoxdur  sıldırımli, keçilməz, Həyat yolu gərək ola düz-düzən.  Uca daglar qar altında dayanmaz, Əritdikcə  suyu  daşdan keçirər,  Xəstə ürək sakit sakit vuranmaz, Qan dövr edə beyin, başdan keçirə.  Qəlbdə nisgil, dağda duman, çən yaşar, Xain xoflu, düşmən şərin içində.  Quşlar uçar, göydə süzər, şən yaşar, Şeytan xislət  şər zəhərin içində. Baxça bağın gül çiçəyi göz oxşar, Qurdlar, quşlar ləçəyinə salar, iz.  Söz var dərin məna verər, söz oxşar, Söz var ali, sözlər də var, saf təmiz. Zakir deyər daim sözün düzünü, Bu dünyada düzə zaval olar tez.  Hər gün gördüm əzrayılın üzünü, Pislər qalar, yaxşıları  alar tez . Zakir İsmayil

Abşeron yarımadasında aprelin 15-də küləkli və yağıntılı hava şəraiti gözlənilir ki, bu da meteohəssas insanlar üçün əlverişsizdir. Bu barədə Sozcu.az-a Milli Hidrometeorologiya Xidmətindən məlumat verilib. Xatırladaq ki, Bakıda və Abşeron yarımadasında aprelin 15-də hava şəraitinin fasilələrlə yağıntılı olacağı, şimşək çaxacağı, yağışın leysan xarakterli olacağı, arabir intensivləşəcəyi gözlənilir. Yağıntı aprel ayının 17-dək davam edəcək.

Valyuta alqı-satqısı həyata keçirməklə gəlir əldə etmək istəyən üç nəfərin külli miqdarda pulunu ələ keçirməkdə təqsirləndirilən Nizami Alışanın cinayət işi üzrə məhkəmə prosesi keçirilib. Sozcu.az xəbər verir ki, Bakı Ağır Cinayətlər Məhkəməsində hakim Aytən Əliyevanın sədrliyi ilə keçirilən prosesdə zərərçəkənlər iştirak etməyib. Bildirilib ki, zərərçəkən Babək Məmmədzadə ölkə xaricindədir. Ona görə də prosesdə iştirak edə bilmir. Hakim zərərçəkən barədə məcburi gətirilmə ilə bağlı qərar çıxarılmasının zəruri olduğunu deyib. Həmçinin, prosesdə zərərçəkən Yadigar İsrafilov barədə məcburi gətirilmə qərarı çıxarılıb. Növbəti proses aprelin 24-nə təyin olunub. Qeyd edək ki, cinayət işi üzrə Zeynal Mütəllim oğlu Usubov, Babək Məhəmməd oğlu Məmmədzadə və Yadigar Şibi oğlu İsrafilov zərərçəkən kimi tanınıblar. İttihama görə, təqsirləndirilən Nizami Alışan asan pul qazanmaq istəyən şəxslərə özünü səhm və valyuta alqı-satqısı ilə məşğul olan mütəxəssis kimi təqdim edib. Bununla da o, Babək Məmmədzadənin 1 milyon 300 min, Zeynal Usubovun 945 min, Yadigar İsrafilovun isə 200 min dollar pulunu ələ keçirib. Zərərçəkənlərə dəyən ümumi ziyan 2 milyon 445 min dollar (4 milyon 156 min 500 AZN) təşkil edir. Nizami Alışan Cinayət Məcəlləsinin 178.4-cü (dələduzluq - xüsusilə külli miqdarda ziyan vurmaqla törədildikdə) maddəsi ilə təqsirli bilinir. O, ABŞ-də yaşayan müğənni Elariz Məmmədoğlunun kürəkəni, AzTV-nin keçmiş sədri Arif Alışanovun isə qardaşı oğludur. Təqsirləndirilən şəxsin mərhum atası polkovnik Akif Alışanov Sumqayıt Mühafizə İdarəsinin rəisi, həmçinin Müdafiə Sənayesi Nazirliyinin Mühafizə və təhlükəsizlik şöbəsinin rəisi vəzifəsində çalışıb.

Kəlbəcər rayonunda qəzaya düşərək, həlak olduğu bildirilən İlahə Rəsul qızı Şahverdiyevanın ötən ilin yazında cavan oğlu da dünyasını dəyişib. Sozcu.az bakupost.az-a istinadən xəbər verir ki, bu barədə İ.Şahverdiyeva ötən ilin mayında sosial şəbəkədə paylaşım edib. “Sənsiz yaşamaq cəhənnəmdə yaşamaqdı, mən bu dünyada cəhənnəmdə yaşadım, sən cənnətdə ol, ömrümün bəzəyi oğlum. Sən ananın cənnətisən. Mən səndən ayri yaşamaq istəmirəm, canım oğlum..”, – deyə o, oğlunun fotosunu paylaşaraq yazıb. Qeyd edək ki, bu gün “Nissan Pathfinder” markalı avtomobil idarəetmədən çıxaraq aşıb. Nəticədə sürücü, 1983-cü il təvəllüdlü İlahə Rəsul qızı Şahverdiyevanın həlak olduğu bildirilir. Hadisə ilə bağlı İ.Şahverdiyevanın əmisi oğlu Anar Şahverdiyev bildirib ki, İlahə Şahverdiyeva hərbi hissələrdən birində aşpaz kimi çalışırmış. Onun dediyinə görə, xanım hərbçi qəzadan sonra Gəncəyə hospitala aparılıb. “Biz də yeni xəbər tutmuşuq. Bizə onun ölmədiyini, vəziyyətinin ağır olduğunu bildiriblər. Gəncəyə hospitala aparıblar. Biz də oraya gedirik”, – deyə İ.Şahverdiyevanın əmisi oğlu A.Şahverdiyev bildirib. Qeyd edək ki, İlahə Şahverdiyeva Milli Qəhrəman İsrafil Şahverdiyevin qardaşı, Birinci Qarabağ müharibəsi şəhidi Rəsil Şahverdiyevin qızıdır.

Astarada 3-cü sinif şagirdi itkin düşüb. Sozcu.az APA-ya istinadən məlumat verir ki, hadisə Astara rayonunun Maşxan kəndi ərazisində baş verib. Məktəbdən evə qayıdan 9 yaşlı Reyhan Məmmədzadənin itkin düşdüyü bildirilir. Faktla bağlı polisə məlumat verilib.

Sabah Bakıda və Abşeron yarımadasında, eyni zamanda bəzi bölgələrdə güclü külək əsəcək. Sozcu.az xəbər verir ki, Milli Hidrometeorologiya Xidməti gözlənilən küləkli hava şəraiti ilə bağlı sarı və narıncı xəbərdarlıq yayıb. Naxçıvan MR, Kəlbəcər, Laçın, Zəngilan, Balakən, Zaqatala, Qax, Şəki, Oğuz, Qəbələ, İsmayıllı, Qazax, Ağstafa, Tovuz, Şəmkir, Şamaxı, Daşkəsən, Gədəbəy, Göygöl, Gəncə, Naftalan, Goranboy, Samux, Mingəçevir, Neftçala, Salyan, Biləsuvar, Hacıqabul, Lerik və Yardımlıda qərb küləyi əsəcək, küləyin sürəti 13.9-20.7 m/san təşkil edəcək. Bakıda və Abşeron yarımadasında, Qobustan, Xızı, Siyəzən, Şabran, Xaçmaz, Quba və Qusarda şimal-qərb küləyi əsəcək, küləyin sürəti 20.8-28.4 m/san-dək güclənəcək.

Azərbaycandan qatarla daşınan yüklər Ermənistanda yoxlanılmayacaq. Bu məhsulların bəyannaməsi Azərbaycanın özündə qeyd olunacaq və Mehridən keçərək, maneəsiz şəkildə Naxçıvana aparılacaq. Sozcu.az Publika.az-a istinadla xəbər verir ki, bu barədə erməni şərhçi David Sərkisyan deyib. Onun sözlərinə görə, Antalya Demokratiya Forumunda səslənən fikirlər də bunu təsdiq edir. D.Sərkisyan iddia edir ki, Ermənistanın daşınan malları nəzərdən keçirməsi qadağan ediləcəyi üçün Azərbaycan Naxçıvana istədiyi yükü daşıya biləcək.

Ağdamda 35 yaşlı kişi dəm qazından boğularaq ölüb. Sozcu.az xəbər verir ki, hadisə Birinci Dördyol qəsəbəsində qeydə alınıb. Belə ki, həmin qəsəbədə yaşayan Kəlbəcər rayonunun Zülfüqarlı kənd sakini, 1990-cı il təvəllüdlü Niyaməddin Nizami oğlu Bayramov evdə dəm qazından zəhərlənərək dünyasını dəyişib. Faktla bağlı cinayət işi açılıb, araşdırma aparılır.

Qarabağdakı peşə məktəblərində oxuyanların təhsil haqqını dövlət ödəyəcək. Sozcu.az xəbər verir ki, Prezident İlham Əliyev bununla bağlı "Təhsil haqqında" və "Peşə təhsili haqqında" qanunlara dəyişikliyi təsdiqləyib. Belə ki, təhsil müəssisələrində ödənişli əsaslarla təhsil aldıqları müddətdə təhsil haqqı dövlət büdcəsinin vəsaiti hesabına ödənilən şəxslər sırasına işğaldan azad edilən ərazilərdə məskunlaşan və 2025/2026, 2026/2027, 2027/2028-ci tədris illərində dövlət, bələdiyyə və özəl peşə təhsili müəssisələrinə qəbul olunmuş, habelə həmin təhsil müəssisələrində təhsil almaqda olan şəxslər də daxil edilib. Qanun sentyabrın 15-dən qüvvəyə minəcək.

Lids Universitetinin britaniyalı alimlərinin araşdırmalarına görə, hətta qlobal istiləşmənin ən əlverişli ssenarisində (+2°C) belə, cari əsrin sonunda Xəzər dənizinin səviyyəsi 5-10 metr aşağı düşə bilər. Sozcu.az Publika.az-a istinadla xəbər verir ki, alimlər iddia ediblər ki, ən pessimist proqnoz doğru olarsa, eniş 21 metr olacaq. Bu perspektiv 15 milyona yaxın insanın yaşadığı bütün region üçün genişmiqyaslı ekoloji fəlakət vəd edir. Elmi araşdırmanın nəticələri “Communications Earth & Environment” (CEE) jurnalında dərc olunub. Planetin ən böyük endoreik su hövzəsi olan Xəzər dənizi unikal ekosistemin saxlanmasında əsas rol oynayır. Xəzər suitisi, ağcaqayın, ulduz nərə balıqları və bir çox digər endemik növlərin məskəni kimi xidmət edir. Hesablamalar göstərib ki, temperaturun minimal artması ilə dənizin su səthinin sahəsi 112 min kvadrat kilometr azala bilər ki, bu da İslandiya kimi bir ölkənin ərazisindən böyükdür. Ekoloji və iqtisadi cəhətdən ən qiymətli torpaqların çoxu dayaz sularda yerləşdiyinə görə belə dayazlaşma biomüxtəlifliyə və yerli əhalinin rifahına dağıdıcı təsir göstərə bilər. Xəzərin şimal sahillərinin sakinləri ən həssas olacaqlar, çünki balıqçılığın yoxa çıxması onları əsas gəlir mənbəyindən məhrum edəcək, sərt iqlim şəraiti isə alternativ iqtisadi fəaliyyətlərin, o cümlədən kənd təsərrüfatının inkişafını faktiki olaraq qeyri-mümkün edəcək. Üstəlik, Bakı və Aktau kimi iri liman şəhərləri yeni sahil zolağından onlarla kilometr aralıda yerləşə bilər ki, bu da regionda neft hasilatı üçün zəruri olan bütün logistik infrastrukturun köklü şəkildə yenidən qurulmasını tələb edəcək. Nəhayət, Aral faciəsi kimi Xəzərin dayazlaşması da dəniz dibindən duz və sənaye çirkləndiricilərinin yayılması nəticəsində yaranan zəhərli toz fırtınalarına səbəb ola bilər. Yekun olaraq, tədqiqatçılar gözlənilən fəlakətin təsirini yumşaltmaq üçün tədbirlər kimi qorunan ərazilərin yaradılmasını, biomüxtəlifliyin monitorinqinə aktiv investisiya qoyulmasını və sahilyanı iqtisadiyyatların şaxələndirilməsini qətiyyətlə tövsiyə edirlər.

Milli Hidrometeorologiya Xidmətinin məlumatına görə, yaxın günlər ərzində ölkə ərazisində hava şəraitinin fasilələrlə yağıntılı keçəcəyi, yağışın ayrı-ayrı yerlərdə leysan xarakterli güclü olacağı, dağ çaylarından sel və daşqın keçəcəyi, şimşək çaxacağı, bir sıra ərazilərdə güclü külək əsəcəyi proqnozlaşdırılır. Sozcu.az xəbər verir ki, bu barədə Fövqəladə Hallar Nazirliyinin (FHN) ölkə ərazisində gözlənilən hava şəraiti ilə əlaqədar əhaliyə müraciətində bildirilib. “Qeyd olunanları nəzərə alaraq, Fövqəladə Hallar Nazirliyi əhaliyə müraciət edərək müvafiq təhlükəsizlik qaydalarına riayət etməyə çağırır. Belə ki, intensiv yağıntıların səbəb ola biləcəyi sel və daşqından qorunmaq üçün sel və daşqın təhlükəli ərazilərdən uzaq durmaq, bu təhlükə ilə üzləşdikdə dərhal yaxınlıqdakı yüksəkliyə qalxmaq tövsiyə olunur. Həmçinin, güclü külək zamanı yüngül konstruksiyalı və müvəqqəti tikililərdən, bina və reklam lövhələrindən uzaq durmaq, elektrik dirəyi və naqillərinin, hündür ağacların altında dayanmamaq tövsiyə olunur. Güclü küləyin baş verən yanğınların söndürülməsi ilə əlaqədar yaratdığı çətinlikləri nəzərə alaraq, küləkli hava şəraitində yanğın təhlükəsizliyi qaydalarına xüsusilə ciddi riayət edilməlidir. Bundan əlavə, kiçikhəcmli gəmi istifadəçiləri belə hava şəraitində dənizə çıxmağın qadağan olduğunu nəzərə almalıdırlar. Eyni zamanda, ildırımla bağlı təhlükələrdən qorunmaq üçün elektrik cihazlarını şəbəkədən ayırmaq, telefonla (sabit şəbəkə, mobil, taksofon və s.) danışmamaq, açıq havada olarkən elektrik xətti, ildırım ötürücüsü, navalça və antenaya yaxınlaşmamaq, hündür ağacların altında daldalanmamaq və bu məqsədlə nisbətən çökək yer seçmək, avtomobildə olduqda isə hərəkəti dayandıraraq şüşələri qaldırıb ildırımın bitməsini gözləmək lazımdır. Unutmayın: Qaydalara biganəlik – həyatımıza təhlükədir! Təhlükə zamanı 112-yə zəng edin!”, - müraciətdə qeyd olunub.

Ukraynadakı müharibə Üçüncü Dünya müharibəsinə çevrilə bilər. Sozcu.az CBS News-a istinadla xəbər verir ki, bunu Ukrayna prezidenti Vladimir Zelenski telekanala müsahibəsində deyib. "Əgər qətiyyət nümayiş etdirməsək, Putin irəliyə gedəcək. Bu, möhtəkirlik deyil, real təhlükədir. Onun əsas məqsədi Rusiya İmperiyasını dirçəltmək və hazırda NATO-nun himayəsində olan əraziləri geri almaqdır. Bütün bunları nəzərə alaraq, məncə, vəziyyət dünya müharibəsinə çevrilə bilər". Ukrayna prezidenti vurğulayıb ki, dünyada heç kim üçün təhlükəsiz yer olmayacaq. Zelenski Rusiyanın hücumunun nəticələrini öz gözləri ilə görə bilməsi üçün Donald Trampın Ukraynaya səfərini görməkdən şad olacağını bildirib: "Mövqeyinizə hörmətlə yanaşırıq. Amma lütfən, hər hansı qərar, danışıqlar planından əvvəl gəlin və məhv edilmiş və ya ölən insanlara, mülki şəxslərə, əsgərlərə, xəstəxanalara, kilsələrə, uşaqlara baxın". O əlavə edib ki, ABŞ bu müharibədə bitərəf qalmamalı və Tramp güclü dövlətin lideri kimi Ukraynanı dəstəkləməlidir.

Böyük Britaniyanın Baş naziri Keyr Starmer Rusiyadan Ukraynadakı münaqişəni dərhal dayandırmağı tələb edib. Sozcu.az xəbər verir ki, bu barədə o, X sosial şəbəkəsində yazıb. Siyasətçi Suma edilən hücumdan hiddətləndiyini bildirib. Eyni zamanda o, Ukrayna lideri Vladimir Zelenskinin artıq sülhə sadiqliyini nümayiş etdirdiyi qənaətində olduğunu bildirib. "Putin indi heç bir şərt olmadan tam və dərhal atəşkəsə razılaşmalıdır”, - deyə Starmer qeyd edib. Qeyd edək ki, bu gün Rusiya Ukraynanın Sum şəhərinə raket zərbələri endirib. İndiyə qədər olan məlumata görə, zərbələr nəticəsində 31 nəfər ölüb, 84 nəfər isə yaralanıb.

"Ukraynanın dronlarla düşmən hədəflərinə dəqiq zərbələr endirmək qabiliyyəti Moskvanın irəliləyişini mümkünsüz edir..." Ukrayna Rusiyadan yeni genişmiqyaslı hücum gözlədiyi bir vaxtda, Moskva qoşunları Ukrayna mövqelərinə hücumlarını intensivləşdirir. Kiyev Rusiyanın növbəti böyük hücuma hazırlaşmaq üçün ehtiyat qüvvələr topladığını bildirir. Sozcu.az xəbər verir ki, bu barədə "The Telegraph" nəşri yazıb. Lakin analitiklərin fikrincə, Vladimir Putinin mümkün sülh sazişindən əvvəl yeni əraziləri ələ keçirmək ambisiyalarının reallaşması çətin görünür. Səbəb Rusiya ordusunda çoxsaylı problemlər, zəif təşkilatçılıq və texnika çatışmazlığıdır. Hücumların tempi artır Müşahidəçilər bildiri ki, Rusiya qoşunlarının tank və zirehli texnika ehtiyatları demək olar ki, tükənib. Hətta kiçik taktiki uğurlar əldə olunsa belə, Rusiya bu uğurlardan məhdud resurslar səbəbilə istifadə edə bilməyəcək. Bundan əlavə, Ukraynanın dronlar vasitəsilə dəqiq zərbələr endirməsi Moskva üçün cəbhə xəttində böyük qüvvələr yerləşdirməyi çətinləşdirir ki, bu da genişmiqyaslı irəliləyişin mümkün olmadığını göstərir. Ukrayna Təhlükəsizlik və Əməkdaşlıq Mərkəzinin icraçı direktoru Dmitri Jmaylo nəşrə deyib: "Hazırda Rusiyanın cəbhə xətti boyunca hər hansı irəliləyişi mümkün deyil. Rusiya cəbhədə böyük hərbi uğurlar əldə edə bilməyib, buna görə də, guya, böyük hərəkətlər və üstünlüklər varmış kimi təsəvvür yaratmaq istəyirlər. Biz ərazidə belə bir şey görmürük". Ötən ay prezident Vladimir Zelenski və G7 liderləri xəbərdarlıq edib ki, Rusiya xüsusilə Sumı və Xarkov istiqamətlərində yeni hücumlar planlaşdırır. Bu, Putinə gələcək danışıqlarda üstünlük qazandıra bilərdi. Çərşənbə günü Ukrayna Silahlı Qüvvələrinin Baş komandanı Aleksandr Sırski təsdiqləyib ki, hücum əməliyyatları artıq başlayıb, Rusiya hücumlarının intensivliyi xeyli artıb. Bu zaman Kiyev dünyada diqqəti Ukraynada baş verənlərə yönəltməkdə maraqlıdır, baxmayaraq ki, Donald Trumpın gündəmində sülh razılaşması yoxdur. "Hücumlar ciddi nəticə verməyəcək" Lakin Demokratiyaların Müdafiəsi Fondunun Rusiya proqramı üzrə direktor müavini Con Hardi əmindir ki, artan hücumlar mühüm nəticələr verməyəcək: "Gördüyümüz şey, sadəcə, hücumların tempində artımdır. Bu, çox kiçik miqyaslıdır. Onlar Ukrayna xəttində bir dəlik aça bilərlər, amma bu dəlikdən istifadə edib sürətli və əməli nəticə əldə edə bilməzlər". Təxminlərə görə, ən zəif nöqtə Sumı vilayətidir. Ukrayna ordusu burada qonşu Kursk bölgəsində Rusiyanın sürətli irəliləyişindən sonra yenidən qruplaşır. Kursk yaxınlığındakı döyüşlərdə iştirak etmiş ukraynalı hərbçi nəşrə bildirib ki, geriçəkilmə gecələr kiçik qruplar şəklində baş verib: "Çoxlu texnika orada qalıb", - o, deyib. Hardi qeyd edir ki, hücumlar əsasən texniki dəstəyi olmayan kiçik qruplar tərəfindən həyata keçirilir, çünki resurslar məhduddur. Təxminən 100 əsgərdən ibarət bölük ilə hücumlar nadir hallardandır. Ukrayna Rusiya müharibəsinə uyğunlaşıb Son bir ildə Rusiya təxminən 3000 tank, 9000 zirehli texnika və azı 13 000 artilleriya sistemi itirib. Hardi deyir: "Siz anbarlarda qalanlara, xüsusilə istifadə oluna biləcək texnikaya baxsanız, ehtiyatlar çox azalıb. Mən gözləyirəm ki, ilin sonuna qədər müharibəni davam etdirmək onlara çox çətin olacaq, tam tükənəcəklər". Rusiyanın üstünlüyü isə insan qüvvəsinin çoxluğudur. Putin bu yaxınlarda əlavə 160 min nəfərin orduya çağırılmasına dair fərman imzalayıb. Lakin Hardinin sözlərinə görə, bu çağırılanlara çox minimal-çox vaxt bir aydan az hazırlıq verilir. "Bu, Rusiyanın şüurlu qərarıdır- Ukraynaya təzyiqi davam etdirmək, bu əsgərləri "ət maşınına" atmaq və müharibə davam etdiyi müddətdə qüvvələrin keyfiyyətini artırmağa vaxt sərf etməmək". Hazırda Ukraynanın əsas vəzifəsi Rusiyanın çoxsaylı qoşunlarını bir məkanda toplamasının qarşısını almaqdır, çünki bu, müdafiə xəttinin yarılmasına səbəb ola bilər. Burada dronlardan istifadə həlledici rol oynayır. Hardi deyir ki, Ukrayna ən güclü dron bölmələrini genişləndirir və ümumilikdə pilotsuz sistemlərə güvənir ki, digər sahələrdəki çatışmazlıqları kompensasiya etsin. "Onlar Rusiyanın necə döyüşdüyünə yaxşı uyğunlaşıb", - ekspert bildirib.

“Türkiyə Suriyada İsraillə qarşı-qarşıya gəlmək istəmir”. Sozcu.az xəbər verir ki, bunu Türkiyənin xarici işlər naziri Hakan Fidan IV Antalya Diplomatiya Forumu çərçivəsində keçirdiyi mətbuat konfransında deyib. O bildirib ki, Türkiyənin Suriya ilə bağlı prioriteti sabitlikdir: “İsrail Suriyada təxribatlardan çəkinməlidir”. Nazir, həmçinin İsrailin uzun müddətdir Suriyada sabitliyə zərbə vurduğunu diqqətə çatdırıb.

Şimali Kipr Türk Cümhuriyyətinin Prezidenti Ersin Tatar türk dövlətlərinə ölkəsində səfirlik açmaları ilə bağlı çağırış edib. Sozcu.az Türkiyə mediasına istinadən xəbər verir ki, o, bu barədə IV Antalya Diplomatiya Forumunda çıxışında deyib. E.Tatar bəzi türk dövlətlərinin Kiprin yunan hissəsini tanımaq cəhdlərinə münasibət bildirərək qeyd edib ki, bu, Avropa İttifaqının (Aİ) təlqinləri ilə həyata keçirilir: “Mən türk dövlətlərini eyni münasibəti Şimali Kiprlə də qurmasını istəyərdim”.

Rüşvət alma ittihamı ilə həbs edilmiş jurnalist Əvəz Zeynallının səhhətində problem yaranıb. Sozcu.az xəbər verir ki, bu barədə onun həyat yoldaşı Məlahət Zeynallı feysbuk hesabında paylaşım edib. Məlumata görə, Ə.Zeynallıya xərçəng diaqnozu qoyulub: “Əvəz Zeynallını təxminən 1 ay əvvəl Onkologiya Mərkəzinə aparıb, “biopsi” götürdülər. Nəticəsi bayramdan sonraya qaldı dedilər, biz də gözlədik. 10 gün əvvəl nəticəni Əvəz bəyə açıqlayıblar. “Hər şey yaxşıdır” - bizə, ailəsinə müqəddəs yalan deyib, heç kəs üzülməsin deyə. Dünən yanında olduq. Bir iki sual verəndən sonra məntiqsiz və əlaqəsiz cavabları bizi şübhələndirdi. Çox yalvar-yaxardan sonra həqiqəti söyləməli oldu. Bağırsağında olan bədxassəli şiş artıq “metastaz” verib, xərçəng qaraciyərinə yayılıb. Bu günlərdə “ximiya”ya başlayacaqlar”. Qeyd edək ki, ötən ilin avqustunda jurnalist Eynulla Fətullayev Əvəz Zeynallının səs yazısını yayaraq onu həbsdə olan iş adamı Rasim Məmmədovun ailəsindən rüşvət almaqda ittiham etmişdi. İttihama görə, Ə.Zeynallı R.Məmmədov barəsində müsbət imic formalaşdırmaq üçün müvafiq verilişlər hazırlamağı vəd edərək onun ailəsindən 20 min manat rüşvət alıb. Bundan başqa o, dələduzluqda və vəzifəli şəxsin qərarına qanunsuz təsir etməkdə ittiham elan edilib. Bakı Ağır Cinayətlər Məhkəməsi onu 9 il müddətinə azadlıqdan məhrum edilib, daha sonra cəzası iki ay azaldılıb.