Ölkə öz sərhədlərini qorumalıdır, lakin bu o demək deyil ki, o, başqa ölkələr və təşkilatlarla əməkdaşlıq edə bilməz. Sozcu.az Armenian News-a istinadla xəbər verir ki, bunu Ermənistanın baş naziri Nikol Paşinyan yanvarın 31-də keçirdiyi mətbuat konfransında deyib. “Biz artıq Ermənistanın İran və Türkiyə ilə sərhədində birgə xidmət həyata keçiririk və "Zvartnots" hava limanında özümüz xidmət göstəririk. İranla sərhəd məntəqəsi 100% erməni sərhədçilərinin nəzarətindədir və Ermənistan sərhəd qoşunları da bu ərazidə xidmətə başlayıb. Bu proses davam edəcək”, - deyə o qeyd edib. Paşinyan bunu iki ölkə arasında iradə məsələsi adlandırıb: “Hazırda biz birgə xidmət həyata keçiririk və istisna etmirəm ki, bu birgə xidmətin əhatə dairəsi genişlənəcək”.

Yerevanla Moskva arasında dialoq təhdid dili ilə aparıla bilməz. Sozcu.az Armenpress-ə istinadla xəbər verir ki, bunu Ermənistanın baş naziri Nikol Paşinyan yanvarın 17-də Rusiya prezidenti Vladimir Putinlə telefon danışığını şərh edərkən mətbuat konfransında bildirib. "Aydındır ki, Aİ-yə üzvlük haqqında qanun layihəsi ilə bağlı Rusiyanın narahatlığı var. Bu, faktdır ki, bizim də Rusiya Federasiyasının siyasəti və mövqeyi ilə bağlı müəyyən narahatlıqlarımız mövcuddur. Lakin söhbətimiz heç vaxt “təhdid dilində” olmayıb və olmayacaq”. Paşinyanın sözlərinə görə, Ermənistan parlamenti Avropa İttifaqına daxil olmaq haqqında qanunun qəbulunu rədd edərsə, o zaman müəyyən müddətdən sonra müvafiq referendum keçiriləcək. "Bəs niyə Ermənistan vətəndaşları arasında Aİ ilə bağlı bu cür fikirlər və istəklər formalaşıb? Bu, həm də Ermənistan-Rusiya münasibətlərinin gündəliyi ilə bağlıdır. Ermənistanla Rusiya arasında bu barədə söhbət olub və davam edir. ", - Paşinyan qeyd edib.

Ötən ilin yayında Nərimanovda “Metro Park”ın qarşısında baş verən silahlı insidentin məhkəmə araşdırması başa çatıb. Sozcu.az “Qafqazinfo”ya istinadən xəbər verir ki, Bakı Hərbi Məhkəməsində keçirilən son iclasda hökm elan edilib. Belə ki, qazaxlı həmkəndlilərin Bakıdakı davası birinin ölümü ilə nəticələnib. Hadisə 2024-cü il iyunun 26-sı axşam saatlarında baş verib. 24 yaşlı Tural Kosayev və əvvəldən tanıdığı 21 yaşlı İsmayıl Allahverdiyev ayrı-ayrı avtomobillərlə hadisə yerində olublar. Həmin vaxt Tural xanımla olub. Cinayət də onun gözləri qarşısında baş verib. Həmkəndlilər arasındakı sözlü mübahisə yavaş-yavaş daha da qızışıb. Tural getmək istəyərkən İsmayıl belindəki silahı çıxarıb onu güllələyib. Ağır yaralanmış gənc elə yerindəcə ölüb. Xüsusi amansızlıqla törədilən cinayətə görə İsmayıl həbs edilib. İfadəsindən onun müddətdən artıq həqiqi hərbi xidmət qulluqçusu olduğu məlum olub. Elə bu səbəbdən onun işinə hərbi məhkəmədə baxılıb. Prokuror təqsirləndirilən şəxsin 18 il 6 ay azadlıqdan məhrum edilməsini tələb edib. Qətlə yetirilən şəxsin yaxınları isə 18 il yarımla razılaşmır, ömürlük azadlıqdan məhrum etmə istəyirlər. “Bu adam ictimai-təhlükəli üsulla cinayət törədib. Təqsirləndirilən üzr istəməsini tələb edib, zərərçəkmiş də qəbul etməyib. Buna görə adam öldürürlər? Heç kim deyə bilməz ki, bu adam azadlığa çıxandan sonra cinayət törətməyəcək. Ona görə ömürlük həbs istəyirik”, - zərərçəkmiş tərəfin vəkili Ceyhun Məmmədov deyib. Müttəhim son sözündə əməlindən peşmanlığını dilə gətirib: “İstəməzdim belə olsun. Əgər Turalı öldürmək istəsəydim, elə bunu təklikdə edərdim. Çünkü hadisədən bir az əvvəl birlikdə kafedə oturmuşuq. Yeganə səbəb məni təhqir etməsidir. Son olaraq məhkəmədən ədalətli qərar çıxarılmasını xahiş edirəm”. Zeynal Ağayevin sədrlik etdiyi hakimlər dəlil və sübutları araşdırdıqdan, şahid ifadələrini dinlədikdən sonra təqsirləndirilən şəxsə verilmiş ittihamların əsaslı olduğunu təsdiq ediblər. Hökmə əsasən, İsmayıl Allahverdiyev cəzasını ciddi rejimli cəzaçəkmə müəsisəsində çəkməsi şərti ilə 17 il azadlıqdan məhrum edilib.

İranın paytaxtı Tehran şəhərindəki 157-ci Məsudiyyə Polis Bölməsinə silahlı basqın edilib. Sozcu.az xəbər verir ki, bu barədə İran mətbuatı məlumat yayıb. Məlumata görə, hücum nəticəsində ən azı bir polis əməkdaşı ölüb.

Donald Tramp qlobal ticarətdə dollara alternativ yaratmağa çalışacaqları təqdirdə BRİKS ölkələrinə 100% idxal rüsumları tətbiq edəcəyinə söz verib. Sozcu.az xəbər verir ki, Tramp bu barədə “Truth Social” hesabında yazıb. “Bu düşmən kimi görünən ölkələrdən yeni BRİKS valyutası yaratmayacaqlarını və ya güclü ABŞ dollarını əvəz etmək üçün başqa bir valyutanı dəstəkləməyəcəklərini tələb edəcəyik, əks halda onlar 100% rüsumla üzləşəcək və gözəl Amerika iqtisadiyyatına mal satmaq imkanı ilə vidalaşacaqlar”, - o bildirib.

Qanunla nəzərdə tutulmuş hallarda işəgötürən işçilərin iş yeri və orta əməkhaqqını saxlamalıdır. Bu, Əmək Məcəlləsinin 179-cu maddəsi ilə tənzimlənir. Əmək qanunvericiliyi üzrə ekspert Nüsrət Xəlilov hərbi toplanışa çağırılan işçinin hüquqlarını şərh edib. Sozcu.az xəbər verir ki, o, "vergiler.az"a şərhində hərbi toplanışa çağırılan işçinin əməkhaqqının hesablanması qaydasından danışıb. Əmək Məcəlləsinin 179-cu maddəsinin 1-ci bəndinə əsasən, işçi qanunvericiliklə nəzərdə tutulmuş hallarda və qaydada dövlət və ictimai vəzifələrin yerinə yetirilməsinə cəlb edildiyi müddət ərzində iş yeri, vəzifəsi (peşəsi) saxlanılmaqla ona orta əməkhaqqı ödənilməlidir. Həmin maddənin 2-ci bəndində isə iş yeri saxlanılan və əməkhaqqı ödənilən hallar sadalanır. Onlardan biri də (g bəndi) hərbi mükəlləfiyyətlə bağlı vəzifələrin yerinə yetirilməsi üçün hərbi və xüsusi toplanışlara və səlahiyyətləri daxilində hərbi komissarlıqların cəlb etdiyi digər hərbi tədbirlərdə iştirak etmək, habelə hərbi nəqliyyat vəzifəsinin yerinə yetirilməsi ilə əlaqədar ezam olunmaqdır. "Hərbi vəzifə və hərbi xidmət haqqında" Qanunun 52-ci maddəsində toplanışlara çağırılmış hərbi vəzifəlilərin maliyyə və maddi təminatı aşağıdakı kimi qeyd edilib: Toplanışa çağırılmış hərbi vəzifəlilər çağırış üzrə vəzifələrini yerinə yetirdikləri, toplanış yerinə gedib-gəldikləri və toplanış keçirdikləri bütün dövrdə daimi iş yerində orta əməkhaqqı saxlanılmaqla işdən azad edilirlər. Göstərilən şəxslərin əmək müqaviləsinə, onlar çağırış vərəqəsi aldıqları gündən toplanışdan qayıdana qədər təşkilatın ləğv edildiyi hallar istisna olmaqla, xitam verilə bilməz. Hərbi vəzifəlinin işlədiyi təşkilat ləğv olunduqda toplanış dövründə ona verilməli məbləğlər ləğv edilən təşkilat və ya onların hüquq varisi tərəfindən ödənilir. Toplanış dövründə xəstələnmiş hərbi vəzifəlinin iş yeri (vəzifəsi) müalicə müddəti ərzində saxlanılır, ona müvafiq icra hakimiyyəti orqanı tərəfindən müəyyən edilmiş qaydada müavinət ödənilir. Misal 1: Fərz edək ki, özəl təşkilatda mühasib vəzifəsində çalışan Fərid sentyabr ayında hərbi toplanışla əlaqədar 14 günlük hərbi təlimlərə çağırılıb. Beləliklə, sentyabr ayı üçün ona verilməli əməkhaqqının necə hesablanacağına baxaq: Qeyd edək ki, Fərid iyul ayında 22 iş günü çalışıb və 900 manat əməkhaqqı alıb. Avqust ayında isə 23 iş günü çalışıb və 1.000 manat əməkhaqqı alıb. Onun tarif maaşı isə 750 manatdır. Sentyabr ayında 22 iş günü vardır və Fərid həmin günlərin 10 iş gününü (14 təqvim günü) hərbi təlimlə əlaqədar işdə olmayıb. Bu zaman onun sentyabr ayında alacağı əməkhaqqının məbləği belə hesablanacaq: (900 + 1.000) : (22 + 23 ) = 42.22 manat (1 günlük orta əməkhaqqı məbləği); 10 x 42.22 = 422.22 manat (hərbi təlimdə olduğu dövrə düşən orta əməkhaqqı məbləği); 750 : 22 = 34.09 manat (sentyabr ayında bir iş gününə düşən əməkhaqqı məbləği). Fərid 22 iş gününün 10 iş gününü təlimdə, 12 iş gününü isə işdə olub. Deməli, işlədiyi günlərə görə hesablama belə olacaq: 12 x 34.09 = 409.08 manat; 422.22 + 409.08 = 831.3 manat. Beləliklə, sentyabr ayı üçün onun alacağı ümumi əməkhaqqı 831.3 manat təşkil edəcək. İyul və avqust aylarında tarif maaşından əlavə bonuslar da aldığı halda, Fəridin sentyabr ayında alacağı əməkhaqqı 750 manatdan yüksək olacaq.

Azərbaycanın Yunanıstandakı səfirin birinci katibi vəzifəsində işləmiş Rəhman Şahhüseynli saxlanılıb. Sozcu.az report-a istinadla xəbər verir ki, sabiq birinci katib xırda xuliqanlıqda, məhkəmə və digər orqanların qərarlarının icrası ilə əlaqədar icra məmurunun tələblərinin yetirməməkdə və polis işçisinin qanuni tələbinə qəsdən tabe olmamaqda şübhəli bilinib. R. Şahhüseynli Sumqayıt şəhər Polis İdarəsinin 3-cü Polis Şöbəsinin əməkdaşları tərəfindən saxlanılaraq məsuliyyətə cəlb olunub. Barəsində 3 maddə üzrə protokollar tərtib olunub və baxılması üçün Sumqayıt şəhər Məhkəməsinə göndərilib. Protokolda polis onun 2 ay müddətinə həbs edilməsini istəyib. Sumqayıt Şəhər Məhkəməsində Rəhman Şahhüseynli barəsində xırda xuliqanlıqla bağlı bəraət verilib, digər iki əmələ görə isə 500 manat cərimə edilib. Faktı Rəhman Şahhüseynlinin vəkili Könül Cəfərli "Report"a təsdiqləyib. Qeyd edək ki, Yunanıstan səfirliyinin birinci katibi olan Rəhman Şahhüseynli 2024-cü ilin sentyabrında geri çağırılıb və “diplomatik xidmət orqanlarının əməkdaşına uyğun olmayan əməllər törətdiyi” üçün diplomatik fəaliyyətinə xitam verilib.

Bu gün görkəmli ictimai-siyasi xadim, Azərbaycan Xalq Cümhuriyyətinin banilərindən biri, Azərbaycan Milli Şurasının sədri Məhəmməd Əmin Rəsulzadənin anadan olmasından 141 il ötür. Sozcu.az xəbər verir ki, Məhəmməd Əmin Rəsulzadə 1884-cü il yanvarın 31-də Bakının Novxanı kəndində anadan olub. Gənc yaşlarında sosial demokratlarla birgə “Hümmət” təşkilatının yaranmasında iştirak edib. Çarizmin təqiblərinə məruz qalaraq 1909-cu ildə İrana mühacirət edən Rəsulzadə bir müddət orada “İrane-nou” qəzetinin baş redaktoru kimi çalışıb, məşrutə inqilabı yatırıldıqdan sonra Türkiyəyə mühacirət edib. O, 1911-ci ildə Müsavat Partiyasına üzv qəbul edilib və 4 il sonra Müsavat Partiyası Mərkəzi Komitəsinin sədri seçilib. 1918-ci ildə Fətəli Xan Xoyski ilə birgə Şərqdə ilk respublikanın yaradılmasını rəsmi şəkildə elan edib. 1920-ci il aprelin 28-də bolşevik işğalından sonra həbs edilib. Az sonra Stalinin göstərişi ilə həbsdən azad edilərək Moskvaya aparılıb. Stalinin təkidlərinə baxmayaraq, sovet hakimiyyəti ilə əməkdaşlıqdan imtina edərək SSRİ-ni tərk edib. Məhəmməd Əmin Rəsulzadə 1955-ci ilin martın 6-da Ankarada dünyasını dəyişib. 1992-ci il dekabrın 24-də Azərbaycan Prezidenti Əbülfəz Elçibəy "Görkəmli ictimai-siyasi xadim Məhəmməd Əmin Rəsulzadənin totalitar sovet rejimi dövründə repressiyaya məruz qalmış ailə üzvlərinin Azərbaycana qaytarılması və onların sosial-məişət məsələlərinin həlli haqqında" sərəncam imzalayıb. 29 dekabr 1993-cü ildə Azərbaycan Prezidenti Heydər Əliyev "Azərbaycanın görkəmli ictimai-siyasi xadimi Məhəmməd Əmin Rəsulzadənin anadan olmasının 110 illik yubileyinin keçirilməsi haqqında" sərəncam imzalayıb. 22 noyabr 2013-cü ildə isə Azərbaycan Prezidenti İlham Əliyev Məhəmməd Əmin Rəsulzadənin 130 illik yubileyinin keçirilməsi haqqında sərəncam verib. Sərəncama əsasən, respublikada və respublikadan kənarda silsilə yubiley tədbirləri keçirilib. Həmçinin, Azərbaycan Xalq Cümhuriyyətinin qurulmasının 100-cü ili münasibətilə Prezident İlham Əliyev tərəfindən 2018-ci ili "Cümhuriyyət İli" elan edilib. Prezident İlham Əliyev 30 dekabr 2023-cü ildə Məhəmməd Əmin Rəsulzadənin 140 illiyinin qeyd edilməsi haqqında Sərəncam imzalayıb.

Ölkədə dana və quzu ətinin qiyməti kəskin ucuzlaşıb. Son üç gündə ət və ət məhsullarının qiymətində nəzərəçarpacaq dəyişiklik müşahidə edilir.  Sozcu.az xəbər verir ki, hazırda Bakıətrafı qəsəbələrdə dana ətinin bir kiloqramı 12 manata təklif olunur. Quzu ətinin qiymətində də ucuzlaşma var. Əgər ötən həftə quzu ətinin bir kiloqramı 21-22 manata satılırdısa, indi bu məbləğ 17-18 manat təşkil edir. Rayonlarda isə dana ətinin bir kiloqramı 11, quzu əti isə 15 manatdır. Alıcılar ucuzlaşmanı bazarda qırmızı ətə tələbatın azalması ilə əlaqələndirirlər. Onlar Novruz bayramı ərəfəsində ətin qiymətinin yenidən artacağını istisna etmirlər.

Rusiyanın Barnaul şəhərində qız anasının üzərinə qaynar su tökərək öldürüb. Sozcu.az .az medianews.az-a istinadən xəbər verir ki, buna səbəb güya anasının evdə su və qaza qənaət etməməsi olub. Təqsirləndirilən şəxs qardaşı və anası ilə birgə yaşayıb. Nə vaxtsa qadınlar kommunal ödənişlərin artdığını görüblər və bu, dava-dalaşa səbəb olub. Qızı anasını su və elektrik enerjisini israf etməkdə günahlandırıb. Anası hamama gedərkən, 34 qadın duşdan istifadə edərək onun üzərinə qaynar su tökməyə başlayıb. Zərərçəkən qadın bədəninin səthinin 30 faizinin yanıq xəsarəti ilə xəstəxanaya yerləşdirilib və sonra dünyasını dəyişib. İndi mənzildə su və işıqdan yalnız mərhumun oğlu istifadə edir. Mərhumun qızı həbs edilib. Onun cinayət işi üzrə istintaq davam edir.

Ermənistan hökuməti Azərbaycanla sülh gündəmini həyata keçirmək əzmindədir. Sozcu.az xəbər verir ki, bunu Ermənistan Baş naziri Nikol Paşinyan İrəvanda gürcüstanlı həmkarı İrakli Kobaxidze ilə birgə brifinqdə bildirib. Onun sözlərinə görə, İrəvan bu istiqamətdə səylərini davam etdirəcək. Bununla yanaşı, Paşinyan Kobaxidzeyə Azərbaycanla sərhədin delimitasiyası və demarkasiyası prosesinin gedişi, əldə olunmuş razılaşmalar barədə məlumat verib.

Səfərbərlik və Hərbi Xidmətə Çağırış üzrə Dövlət Xidmətinin Şuşa şəhər Şöbəsinin sabiq rəisi polkovnik Seymur Qurbanovun cinayət işi üzrə məhkəmə baxışı başlayıb. Sozcu.az xəbər verir ki, bu gün Bakı Hərbi Məhkəməsində hakim Zaur Hacıyevin sədrliyi ilə keçirilən prosesdə ittiham aktı elan olunub. Ən popluyar məhsulların kolleskiyalarını sənin üçün yaratdıq İttihama görə, təqsirləndirilən şəxs vəzifə səlahiyyətlərindən sui-istifadə edərək çağırışçılara hərbi möhlətin verilməsi, hərbi xidmət yerinin təyin edilməsi, habelə SHXÇDX və Müdafiə Nazirliyi Hərbi Polis İdarəsində xidmətə qəbulla bağlı vədlər verərək dələduzluq edib. O, 2021-ci il iyul ayında hərbi möhlətin verilməsi üçün 4800 manat, 2022-ci il may ayında möhlət hüququn verilməsi müqabilində 4000 manat, 2023-cü il may ayında möhlət hüququn verilməsi müqabilində 4500 manat pul alıb. Həmçinin təqsirləndirilən şəxs təhsillə əlaqədar 1 illik hərbi xidmətdən möhlətin verilməsi üçün 4000 manat məbləğində pul alıb. Bununla yanaşı, o, hərbi çağırışçının Daxili Qoşunlarda xidmət keçməsini təmin edəcəyi vədi verərək 5000 manat pul alıb. Bundan başqa, təqsirləndirilən şəxs 2023-cü il sentyabr ayında bir nəfərin SHXÇDX-də hərbi qulluqçu kimi qəbul edilməsinə kömək edəcəyi vədini verərək 13 min manat, digər şəxsdən isə Müdafiə Nazirliyinin Hərbi Polis İdarəsində xidmətə düzəldəcəyi vədi verərək 14 min manat almaqda ittiham olunur. Daha sonra zərərçəkənlər ifadə verib. Zərərçəkən H.Əmrəliyev ona dəymiş ziyanın ödənildiyini bildirib və şikayətçi olmadığını qeyd edib. İş üzrə digər zərərçəkən M.Muradov ona dəyən maddi zərərin ödənilmədiyini və şikayətçi olduğunu bildirib. Təqsirləndirilən şəxs zərərçəkənlərin çıxışına münasibət bildirərək qeyd edib ki, hərbi xidmətə möhlət hüququ vermək onun səlahiyyətində deyil: "Çağırışçılara xəstəliklə əlaqəli hərbi xidmətdən möhləti xəstəxana verir. Bu, mənim səlahiyyətimdə deyil. Zərərçəkənə dəymiş ziyan ödəniləcək. Xidmətdə qulluğa qəbula gəldikdə isə rəhbərlik dəyişildi və o iş qaldı. Həmin şəxsə də ziyan ödənilib". Məhkəmə fevralın 27-də davam etdiriləcək. Qeyd edək ki, Azərbaycan Respublikası Hərbi Prokurorluğunun İstintaq idarəsində istintaq olunan cinayət işi üzrə Səfərbərlik və Hərbi Xidmətə Çağırış üzrə Dövlət Xidmətinin Şuşa şəhər şöbəsinin sabiq rəisi, polkovnik Qurbanov Seymur Pənah oğluna Azərbaycan Respublikası Cinayət Məcəlləsinin 178.2.2-ci (Dələduzluq, təkrar törədildikdə), 178.2.3. (Şəxs tərəfindən öz qulluq mövqeyindən istifadə etməklə törədildikdə), 178.2.4. (Xeyli miqdarda ziyan vurmaqla törədildikdə), 311.3.2-ci (Rüşvət alma, təkrar törədildikdə) və digər maddələri ilə ittiham elan edilib. Onun barəsində Bakı Hərbi Məhkəməsinin qərarı ilə həbs qətimkan tədbiri seçilib.apa)

Son illər Azərbaycanda rus dilli məktəblərin saylarının artırılması cəmiyyətdə ciddi müzakirələrə səbəb olub. Bakıda fəaliyyət göstərən "Rus Evi" nin mədəniyyət mərkəzindən daha çox ölkəmizdə milli və dini zəmində nifaq salmağa, separatçılıq toxumları səpməyə çalışan şəxslərin-agentlərin yuvasına çevrilməsi haqqında da mətbuatda geniş məlumatlar dərc edildi. Rus dilli əhalinin geniş yaşamadığı bölgələrimizdə rus məktəblərinin olması kimə və nəyə görə lazımdır? Maraqlı deyilmi?  Qəbələ rayonunun Nic qəsəbəsində oldum. Nic qəsəbəsini daha çox  etnik xalqlardan olan udilərin yaşadığı qəsəbə kimi tanınsa da, bu qəsəbədə udilərlə bərabər , Azərbaycan turkləri, ləzgilər, az sayda yahudilər və çox az sayda ruslar yaşayır.  Bu qəsəbədə yaşayan əsas xalqların heçbirinin ana dili rus dili olmamasına baxmayaraq, qəsəbədə olan 5 orta məktəbin 3- ü rus məktəbi, 2 uşaq bağçasının 1 - i rusdilli uşaq bağçasıdır.  Qəsəbədə olan  rus məktəblərinin təməli  sovet imperiyası dövründə qoyulsa da, müstəqillik illəri dövründə də, bu ənənə davam etdirilmiş və hazırda da, rus dili qəsəbədə yaşayan xalqların, əsasəndə udilərin əsas dili - ana dili kimi formalaşması ənənəsi  bilərəkdən davam etdirilir. Əgər bu siyasət qəsəbədə yaşayan udilərin sitayiş etdikləri dinin xristian dini olması ilə əlaqədardırsa, onda bu məntiqlə, Azərbaycanda yaşayan xalqların əksəriyyətinin dininin islam dini olmasını əsas tutaraq, məktəblərimizdə ərəb dilində dərslər keçirilməlidir? Bundan başqa, xristian inancından olan dövlətlərin böyük əksəriyyətinin dili rus dili deyil. Yaxşı, niyə məhz rus dili? Hər kəsə məlumdur ki, rus imperiyası bütün dövrlərdə Azərbaycanda separatizm toxumunu səpmək üçün əsasən etnik xalqlardan istifadə etməyə çalışıb. Etnik xalqların, yaşadığı bir qəsəbədə 5 məktəbin 3-nün rus dilli məktəb kimi qalması rus imperiyası siyasətinə xidmət etmirmi?  Azərbaycan hakimiyyəti bu məsələyə münasibət bildirməlidir.  Mən hesab edirəm ki, bu çox ciddi məsələdir və Azərbaycanın aparıcı media orqanları, tanınmış ictimai xadimlər  rus imperiyası siyasətinin tərkib hissəsi olan rus məktəblərinin süni artımının qarşısını almağa nail olmalıdırlar. Azərbaycan hakimiyyəti bir qəsəbədə 5 məktəbin 3- nün rus məktəbi olmasının vacibliyinə necə izah verəcəklər bilmirəm. Rusların geniş tərkibdə yaşamadıqları bir qəsəbədə Azərbaycan dilində olan uşaq bağçası ilə  yanaşı, alternativ rus bağçasının nəyə görə fəaliyyət göstərdiyinə nə izah verəcəklərini isə maraqla gözləyirəm. Elşən Əlisoy

Prezident İlham Əliyev “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nın təsdiq edilməsi haqqında sərəncam imzalayıb. Sozcu.az xəbər verir ki, bu barədə Prezidentin Mətbuat Xidməti məlumat yayıb.

Xəbər verdiyimiz kimi, 20-24 mart tarixləri Novruz bayramı günləridir. Sozcu.az xəbər verir ki, Əmək Məcəlləsinə əsasən, istirahət günləri bayram günləri üst-üstə düşərsə, həmin istirahət günləri bayram günündən sonrakı iş gününə keçirilir. 22-23 mart tarixləri şənbə və bazar gününə təsadüf edir, ona görə də 25-26 mart tarixləri də qeyri-iş günü olacaq. İki gün (27-28 mart – cümə axşamı və cümə günləri) iş gününün ardınca 29-39 mart - şənbə-bazar günləri gəlir. Bazar günü – 30 mart həm də Ramazan bayramının ilk günüdür. Belə ki, bu il Ramazan bayramı 30-31 mart tarixlərində qeyd ediləcək. Buna görə də 30 mart bazar günü 1 aprel tarixinə keçiriləcək və 29 mart-1 aprel günləri də qeyri-iş günü olacaq. Beləliklə, 20 martdan 1 aprelə qədər yalnız 27-28 mart iş günləridir. Qeyd edək ki, qeyri-iş günlərinin ardıcılığını təmin etmək üçün adətən Nazirlər Kabineti iş və istirahət günlərinin yerini dəyişdirir. Bu baxımdan 20 mart-1 aprel tarixlərinin ardıcıl qeyri-iş günü olacağı istisna edilmir.

Laboratoriya tədqiqatları və müayinələr üçün lazım olan tibbi reaktiv, reagent və ləvazimatların alınmasına sərf ediləcək vəsaitin həcmi açıqlanıb. Sozcu.az-ın xəbərinə görə, Akademik C.M.Abdullayev adına Elmi-Tədqiqat Kardiologiya İnstitutu "Triolab" MMC ilə müqavilə bağlamağı və 1 837 745 AZN köçürməyi planlaşdırır. İnstitutun direktoru Gülnaz Dadaşova, şirkətin qanuni təmsilçisi İlqar Soltanəli oğlu Məmmədovdur.pravda.az)

Yanvarın 31-ə gözlənilən hava şəraiti açıqlanıb. Milli Hidrometeorologiya Xidmətindən Sozcu.az-a verilən xəbərə görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Cənub-şərq küləyi əsəcək. Havanın temperaturu gecə 5-7° isti, gündüz 8-12° isti olacaq. Atmosfer təzyiqi 771 mm civə sütunu təşkil edəcək. Nisbi rütubət 70-80 % olacaq. Azərbaycanın rayonlarında havanın əsasən yağmursuz keçəcəyi gözlənilir. Lakin gündüz bəzi şərq rayonlarında çiskinli yağış yağacağı ehtimalı var. Bəzi yerlərdə arabir duman olacaq. Şərq küləyi əsəcək. Havanın temperaturu gecə 2° şaxtadan 3°-dək isti, gündüz 8-13° isti, dağlarda gecə 5-10° şaxta, gündüz 2-7° isti olacaq.

Sertifikasiya imtahanlarının vaxtı və hansı fənnlərdən keçiriləcəyi ilə bağlı məlumatların açıqlanmaması müəllimlər arasında narahatlığa səbəb olub. Məsələ barədə qərarı Elm və Təhsil Nazirliyinin Təhsilverənlərin Sertifikatlaşdırılması Şurası verir. Ancaq Şuranın iclası hələlik keçirilməyib. Bir neçə gün əvvəl saytımıza daxil olan məlumata görə, 2025-ci ildə 7 fənnin -  tarix, fizika, kimya, biologiya, coğrafiya, texnologiya, informatika müəllimlərinin sertifikasiyası təşkil ediləcək. Ancaq fənlərlə bağlı yekun qərar hələlik verilməyib Təhsil eksperti Elçin Əfəndi Modern.az-a açıqlamasında bildirib ki, sertifikasiya imtahanlarının tarixləri hər il aprelin sonu mayın əvvəllərində açıqlanır: "Bundan əvvəlki sertifikasiya imtahanları da imtahana 1 ay qalmış açıqlanıb. İndi daha erkən açıqlanması mənə görə əvvəlki illərdə imtahan verən müəllimlərə haqsızlıq olar. Eyni zamanda imtahanın keçirilməsi bir neçə qurumun razılığı əsasında keçirilir. Burada Elm və Təhsil Nazirliyi ilə yanaşı Səhiyyə Nazirliyi və hüquq mühafizə orqanları da iştirak edirlər. Ona görə də imtahan tarixi həmin qurumlarla da dəqiqləşdirilməlidir". Ekspert bildirib ki, imtahanlar böyük ehtimalla iyunun 14-dən sonra keçiriləcək: “Tədris ili ərzində sertifikasiya imtahanı olmayacaq. Tədris bitdikdən sonra iyunun 20-21-dən başlamaqla, iyulun ortalarına qədər bu proses davam edə bilər. Müəllimlər bilməlidirlər ki, iyunun 14-ə qədər imtahan olmayacaq. Qərarı isə aprelin sonu mayın əvvəlinə gözləmək olar”. Təhsil eksperti Məzahir Məmmədli isə qeyd edib ki, bu məsələ ilə bağlı cavab verəcək orqan Məktəbəqədər və Ümumi Təhsil üzrə Dövlət Agentliyidir (MÜTDA): “Onlar bu məsələlərə aydınlıq gətirməli, izahat verməlidirlər. Amma təəssüflər olsun ki, bu məsələ ilə bağlı mediada və sosial şəbəkələrdə səslənən fikirlərə belə konkret cavab yoxdur. Ona görə də müəllimlər bu məsələ ilə bağlı haqlı narahatlıq ifadə edirlər. Amma 2025-ci ildə müəyyən fənnlərin imtahanı ilə bağlı fikirlər var. Amma konkret olaraq vaxt müəyyən olunmayıb. Düzdür təlimatda nəzərdə tutulub ki, imtahana 1 ay qalmış xəbər verilir. Amma pis olmazdı ki, müəllimlər ən azından hansı ixtisasların sertifikasiyaya cəlb olunmasını bilələr və hazırlıqlı olalar”. M.Məmmədli müəllimləri təmkinli olmağa çağırıb: “Qanunvericiliyə görə, müəllimlər imtahanda müvəffəq olmasalar belə, onlara 1 il müddət verilir və yenidən imtahan verə bilirlər. Yəni imtahanı keçə bilməsələr birbaşa işdən azad edilmirlər. Onlar yenidən hazırlaşıb sonrakı il imtahanda iştirak edə bilərlər”.

Zaqatalada 27 yaşlı oğlan xəstəxanada ölüb. Sozcu.az-ın məlumatına görə, rayonun Yeni Suvagil kənd sakini, 1998-ci il təvəllüdlü Əhməd Şüay oğlu Əliyev yanvarın 26-da yüksək temperaturla Zaqatala Mərkəzi Rayon Xəstəxanasına daxil olub. 27 yaşlı Ə. Əliyev bu gün xəstəxanada dünyasını dəyişib. Onda xəstəxanaya daxil olmazdan əvvəl 3 gün yüksək hərarət müşahidə olunduğu, temperatur düşmədiyi üçün xəstəxanaya müraciət edildiyi bildirilir. Faktla bağlı araşdırma aparılır.

Güney Azərbaycanın Urmiya şəhərindəki “Durnalar Yuvası” idman kompleksində milli şüarlar səsləndirilib. Sozcu.az xəbər verir ki, “Urmu” voleybol klubu öz meydanında “Sircan Fulad” komandasını qəbul edib. Azarkeşlər tribunalarda “Təbriz, Bakı, Ankara - Biz hara, farslar hara!” şüarları səsləndiriblər.

Azərbaycanla münasibətlərin normallaşdırılması və sülh prosesində irəliləyiş məqsədilə aparılan danışıqlar davam edir. Sozcu.az xəbər verir ki, bunu Ermənistanın xarici işlər naziri Ararat Mirzoyan İrəvanda Gürcüstanın xarici işlər naziri Maka Boçorişvili ilə görüşü zamanı deyib. O bildirib ki, Ermənistanın mövcud mövqeyi dəyişməzdir: "Biz sülh gündəliyinə sadiqik və bunu davam etdirəcəyik. Bu, sülh müqaviləsinə, nəqliyyat kommunikasiyalarının açılmasına və sərhədlərin delimitasiyasına aiddir. Ermənistan və Azərbaycan arasında sərhədlərin delimitasiyası prosesində artıq müəyyən razılaşmalar və addımlar atılıb. Eyni zamanda, Ermənistan və Gürcüstan arasında sərhədlərin delimitasiyası mövzusunda da möhkəm niyyətimiz var və bu prosesi davam etdirməyə hazırıq".

Lənkəranda ana və oğul eyni gündə vəfat edib. Sozcu.az “Oxu.az”a istinadən xəbər verir ki, Lənkəran sakini, Seyran Cəfərli Bakı şəhərində dünyasını dəyişib. Övladının ölüm xəbərini eşidən ana Məhrəba Cəfərova da həyatını itirib. Ana və oğul bu gün Lənkəran rayonunda dəfn olunublar. Qeyd edək ki, Seyran Cəfərlinin bir qardaşı Fikrət Cəfərov Lənkəranda məktəb direktoru, digər qardaşı Rüstəm Cəfərov isə Hirkan qəsəbə inzibati ərazi dairəsi üzrə nümayəndədir.

Ağcabədidə ölümlə nəticələnən yol qəzası baş verib. Sozcu.az xəbər verir ki, hadisə dünən saat 14 radələrində Zərdab-Ağcabədi yolunun 15-ci kilometrliyində qeydə alınıb. Belə ki, Esmira Binnətəliyeva idarə etdiyi “Hunday Aksent” markalı təlim avtomobili ilə hərəkət edərkən “Mercedes” markalı avtomobildən düşən Rafiq Məmmədovu vurub. Kişi aldığı xəsarətdən hadisə yerində ölüb. Faktla bağlı faktla bağlı cinayət işi başlanılıb

Dünən gecə Salyan rayonunun Seyidlər kəndində 4 nəfərin ölümü ilə nəticələnən yol qəzasının bəzi təfərrüatları məlum olub. Sozcu.az “Qafqazinfo”-ya istinadla xəbər verir ki, “Mercedes” markalı avtomobilin sürücüsü Aqil Məmmədov maşında olan 1983-cü il təvəllüdlü sərnişin Elşən İsmayılovun bibisi oğlu imiş. Belə ki, gecə saatlarında qardaşıgildə baş tutan qonaqlıqdan çıxan Elşən İsmayılov ailə üzvləri ilə birgə Aqil Məmmədovun maşınına əyləşərək Seyidlər kəndindən qonşuluqda yerləşən və yaşadığı Dayıkənd kəndinə yola düşüb. Lakin bir neçə dəqiqə sonra onların olduğu avtomobil kəndin içindəki su kollektoruna düşüb. Nəticədə E.İsmayılovun 1990-cı il təvəllüdlü həyat yoldaşı Nərmin İsmayılova, onun 2010-cu il təvəllüdlü övladı Rza və 2012-ci ildə doğulmuş Hüseyn, eləcə də sürücü A.Məmmədov suda boğularaq ölüblər. Elşən İsmayılov və 2021-ci il təvəllüdlü oğlu Ziya isə sudan sağ çıxarılıb. Onlar xəstəxanaya aparılıb. Bildirilir ki, E.İsmayılov Salyanda avtobus sürücüsü işləyir. Onun bibisi oğlu Aqil Məmmədov isə Salyan Rayon İcra Hakimiyyətinin Sosial-iqtisadi inkişafın təhlili və proqnozlaşdırılması şöbəsinin baş məsləhətçisi vəzifəsində çalışırmış. Faktla bağlı cinayət işi açılıb, araşdırma aparılır.