Qərb ölkələrinin Ukraynaya göndərdiyi “Patriot” hava hücumundan müdafiə sistemləri Ukraynaya çatıb. Sozcu.az xəbər verir ki, bu barədə Ukrayna Prezidenti Vladimir Zelenski Teleqram kanalında yazıb. “İndi artıq deyə bilərik ki, hava hücumundan müdafiə sistemimiz gücləndirilib. Alman “Patriot”u Ukraynaya çatdırıldı. Bu addıma görə Almaniya və ABŞ-a minnətdarlığımı bildirirəm”, - deyə dövlət başçısı qeyd edib.

ABŞ Prezidenti Co Baydenin seçki yarışından geri çəkilmək qərarı onun ölkənin maraqlarını hər şeydən üstün tutduğunu göstərir. Sozcu.az xəbər verir ki, bu fikri amerikalı senator, demokrat Çak Şumer X səhifəsində yazıb. "Onun qərarı asan deyildi, lakin o, bir daha ölkəni, partiyanı və gələcəyimizi birinci yerə qoydu", - deyə o bildirib.

ABŞ-ın keçmiş prezidenti Bill Klinton və onun həyat yoldaşı, keçmiş dövlət katibi Hillari Klinton vitse-prezident Kamala Harrisi Demokratlar Partiyasından prezidentliyə namizəd kimi dəstəkləyiblər. Sozcu.az xəbər verir ki, bu barədə Bill Klinton X səhifəsində bildirib. "Biz Baydenə qoşularaq ABŞ-nin vitse-prezidenti Kamala Harrisi dəstəkləyirik", - paylaşımda deyilir. Qeyd edək ki, seçki yarışından geri çəkilən ABŞ Prezidenti Co Bayden prezident seçkilərində Demokratlar Partiyasının namizədi olaraq vitse-prezident Kamala Harrisi dəstəklədiyini açıqlayıb.

Əfqanıstan SSRİ-nin, Ukrayna Rusiyanın sonunu gətirəcək SSRİ-nin yıxılmasının vacib səbəblərindən biri Əfqanıstanda apardığı müharibə oldu. Bu gün Rusiyanın Ukraynada apardığı müharibə Əfqanıstan müharibəsindən daha ağır və daha çox itkilərlə müşahidə olunur. Əgər Əfqanıstanda 9 il ərzində SSRİ-nin itkiləri 15 min nəfər təşkil edirdisə, Ukrayna cəbhəsində iki il yarımda Rusiyanın canlı qüvvə itkisi 10 dəfə Əfqanıstandakından çoxdur. Təəssüf ki, bizim bəzi siyasi şərhçilər Rusiyanın imkanları və gücü haqqında yanlış, şişirdilmiş mövqe sərgiləyirlər. Doğrudur Rusiyanın bütün sahələrdə resursları Ukraynadan qat-qat çoxdur, amma Əfqanıstan da SSRİ ilə müqayisə ediləsi ölkə deyildi.  Həm də məsələ yalnız canlı qüvvə itkisində deyil. Rusiya bir sıra mühüm sahələrdə gərginlik yaşayır, bəzən isə böhran həddinə yaxınlaşır. Bir sıra sahələrə diqqət edək: Rusiya yalnız cəbhədə deyil, nəqliyyat sistemində, xüsusilə mülki aviasiya və dəmir yolda itkilərə məruz qalır. Səbəb sanksiyalar və komplekt ehtiyat hissələrinin olmamasıdır. Mülki aviasiya təyyarələri ilə bağlı insidentlər artır. Bu, sanksiyalara görə xaricdən aldıqları ehtiyat hissələrinin yerli istehsalla əvəz edilməsinin nəticəsidir. Sanksiyalar adi məişət səviyyəsində də problemlər yaradır.Hətta, yanğını söndürmək üçün mütəxəssislər və texnika çatışmazlığı ciddi şəkildə narahatlıq yaradır, çünki onların bir qismi Ukrayna cəbhəsinə göndərilib.  Təkcə 2024-cü ildə 850 min hektar torpaq sahələri yanıb, Krasnodar vilayətində isə bir sutka yanğını söndürmək mümkün olmayıb  Əfqanıstanda müharibəni uda bilməyəndən sonra SSRİ dağılmağa başladı. İdarəetmə sistemində çatışmazlıqlar var. Əhalini cəbhəyə göndərənlərin ailə üzvləri çoxdan xaricdə məskunlaşıblar. Putin və ətrafı sülhdən qorxurlar, çünki müharibə dayanandan sonra hesab aparsalar ki, Rusiya nə qazandı və məlum olacaq ki, ağlsız avantyuranın nəticəsində fəlakətdən başqa heç nə. Bu “xüsusi əməliyyat” Rusiyanı təhlükəsiz etdimi? Əksinə, dörd bir tərəfi daha təhlükəli duruma düşdü. Ukrayna müharibəsi üzündən Rusiyada insan qıtlığı yaranıb. Yenilərini Afrikadan yığırlar. Xidmət sahəsində ciddi kadr çatışmazlığı yaranıb. Afrika ölkələrindən əmək miqrasiyasının miqyası dəfələrlə artıb, hətta Tailand və Filippindən də gətirilənlərin sayı çoxalmağa başlayıb. İşçi qüvvəsinə ehtiyac hər ay böyüyür. Müharibədə ölən Rusiya vətəndaşlarını arxa cəbhədə Keniyanın, Kamerunun, Zambiyanın və Əlcəzairin vətəndaşları tutur.  Elə bu səbəbdən də miqrantlar tərəfindən törədilən cinayətkarlığın sayı statistikaya görə sürətlə artır. Miqrantlar tərəfindən zorlamaların sayı 5 faiz, uşaqlara qarşı 25 faiz yüksəlib. İstintaq Komitəsinin rəhbəri Aleksandr Bastrıkin bildirdi ki, xarici vətəndaşlar tərəfindən törədilən cinayətlər bu ilin altı ay ərzində 55 faiz artıb.  İnsan resursları bütün sahələrdə, o cümlədən polisdə belə çatışmır. RF DİN rəhbəri Vladimir Kolokoltsev may ayında çıxış edərək şəxsi heyəti tam komplektləşdirmək üçün 152 min adama ehtiyac olduğunu vurğulayıb. Tezliklə Moskvada nəinki inşaatçılara, “dvornik”lərə, hətta sahə müvəkkilərinə böyük ehtiyac yaranacaq.  Təəssüf ki, bütün bunlara baxmayaraq 10 iyulda  RF Təhlükəsizlik Şurası katibinin müavini Dmitri Medvedyev heç bir sülh müqaviləsini imzalamamağa çağırır və fikrini onunla əsaslandırır ki, sülhdən sonra yenə “banderovçular” hakimiyyətə gəlib Rusiyaya meydan oxuyacaq, ona görə də bütün Ukraynanı Rusiyaya “qatmaq” lazımdır.   Əfqanıstanı son tərk edən sovet qoşunları raport verəndə ki, “bir əsgər belə Əfqanıstanda qalmayıb”, cəmi il yarımdan sonra SSRİ dağldı. Ukrayna müharibəsi bütün bəşəriyyəti təhlükə qarşısında qoyub, amma ilk növbədə Rusiyanın özünü. NATO baş katibi təsadüfən söyləmədi ki, “Ukrayna müharibəsi 10 il də davam edə bilər”. Hələ iki il yarımın nəticələri bu qədər ağırdırsa, 10 ilin nəticələrini təsəvvür etmək belə dəhşətlidir.  Moderator.az-ın analitik qrupu

"Tramp Ukraynanın məğlubiyyətinin Amerika üçün çox böyük məğlubiyyət olacağı gerçəkliyi anlayır..." Böyük Britaniyanın sabiq baş naziri Ukrayna üçün sülh planını açıqlayıb Böyük Britaniyanın sabiq baş naziri Boris Conson Donald Trampa Rusiya-Ukrayna böhranının həll variantlarını təklif edib. Sozcu.az xəbər verir ki, bu barədə o, "Daily Mail" qəzetində dərc edilən məqaləsində yazıb. Məqalənin əvvəlində britaniyalı siyasətçi ABŞ prezidentliyinə namizədin onun həyatına sui-qəsd zamanı cəsarət göstərdiyini yüksək qiymətləndirib və qeyd edib ki, Tramp "Amerikaya göstərib ki, qatil gülləsi onu nə fiziki, nə də psixoloji səhətdən məğlub edə bilməyib". "Hesab edirəm ki, indi dünyaya da, Ağ Evə də lazım olan məhz yenilməz ruhdur", - Conson yazıb. O, əmindir ki, məhz bu keyfiyyət Trampa o cümlədən Rusiya-Ukrayna kimi münaqişələrin həllində kömək edəcək.   Bu zaman britaniyalı siyasətçi Trampın "Amerika hər şeydən öncədir" siyasətini nəzərə alaraq Şərqi Avropada müharibənin dayandırılmasına kömək edəcək bir neçə praktiki məsləhətlər vermək qərarına gəlib. "Bəzi respublikaçıların keçmişdə Ukrayna haqqında nə deməsindən asılı olmayaraq, hesab edirəm ki, Tramp gerçəkliyi anlayır: Ukraynanın məğlubiyyəti Amerika üçün çox böyük məğlubiyyət olacaq", - britaniyalı siyasətçi buna əmindir. O, hesab edir ki, Putin Ukrayna ilə qane olmayacaq və öz təcavüzkar siyasətini davam etdirəcək. Polşa, Baltikyanı ölkələr və ya Gürcüstan zərbə altına düşə bilər. Onun fikrincə, Putinin potensial qələbəsi Ronald Reyqanın nailiyyətlərinin və "soyuq müharibə"nin başa çatmasından sonra bərqərar olan balansın üzərindən xətt çəkəcək. Üstəlik, Çin Rusiyadan nümunə götürərək "Tayvanı zəbt etməyə ruhlanacaq". "Biz qəflətən əsl dəhşət doğuran münaqişənin astanasında qala bilərik. Bu münaqişədə amerikalılar seçim qarşısında qalacaq: ya dünya liderliyi uğrunda bütün iddialardan əl çəkmək, ya da qayda-qanunun bərpasına trilyonlarla dollar xərcləmək və gənc həmvətənlərimizi yenidən xaricə özgəsinin torpağında ölümə göndərmək", - Conson xoşagəlməz proqnoz verib. Onun fikrincə, Ukraynaya vaxtında yardımı nizama salmaq və Ukrayna Silahlı Qüvvələrinə (USQ) var gücü ilə döyüşməyə imkan vermək lazımdır. "Hal-hazırda Rusiya qoşunları havada planlaşdırıcı bombalardan istifadə edərək Ukraynanın mövqelərinə xeyli zərər vurur. Lakin USQ buna cavab verə bilmir, çünki ABŞ onlara Rusiyanın hava limanlarını məhv etmək üçün ATACMS-dan istifadə etməyə icazə vermir, Böyük Britaniya isə, təəssüf ki, Ukraynaya bu hədəfləri məhv etmək üçün "Storm Shadow" raketlərindən istifadə etməyi qadağan edir. Consonun fikrincə, Tramp "bütün bu bürokratik tərəddüdlərə son qoya və zəruri icazələr verə bilər". Rusiya qoşunları geri oturulduqdan sonra isə ABŞ prezidenti rusiyalı həmkarına sövdələşmə təklif edə bilər. "Putinə ən azı 2022-ci ilin sərhədlərinədək geri çəkilmək lazım gələcək. Gələcək münaqişələrdən və qeyri-müəyyənlikdən yan keçmək üçün Ukraynanın qalan hissəsinin öz taleyini Avropa İttifaqı və NATO-da seçim etməyə qadir olan suveren ölkə kimi tanımaq lazımdır", - o, hesab edir. O, əmindir ki, Ukraynaya tezliklə bu təşkilatlarda üzlük verilməlidir. Bundan sonra böyük döyüş təcrübəsinə malik olan USQ bölmələri NATO-nun Avropa ölkələrində Amerikanın 70 minlik kontingentini əvəz edə bilər. "Bu, Trampa qənaət etməyə, ABŞ hərbi qulluqçularını evlərinə qaytarmağa və avropalıların öz müdafiəsi üçün daha çoxunu etməyə imkan verə bilər. Bu, onun əsas məqsədlərindən biridir", - Conson bəyan edib. Digər tərəfdən, Rusiya prezidenti Putinə "qələbə mənzərəsini çəkməyə" mane olunmamalıdır. "O, əlbəttə ki, "xüsusi hərbi əməliyyat"ın uğurla bitməsini və Ukraynanı denasifikasiya etdiyini bəyan edə bilər", - Conson yazıb. Lakin praktiki addımlar da atılmalıdır. Bunlardan biri Ukraynanın rusdilli əhalisinin qanunvericiliklə müdafiəsi ola bilər. Onun fikrincə, Moskvaya qarşı təkcə qamçı ilə deyil, həm də kökə ilə hərəkət etmək gərəkdir. "Hər şeydən öncə, Tramp Ağ Evi Rusiya ilə qlobal yaxınlaşmaya sövq edər, Putini isə Rusiyanın "Böyük səkkizlik" və hətta NATO ilə əməkdaşlıq etdiyi günlərə qaytara bilər", - Conson buna əmindir. Lakin buna yalnız güc nümayiş etdirməklə nail olmaq mümkündür, o, qeyd edib. "Vaşinqton və Trampa beynəlxalq sərhədlərə hörmət edilməsinin zəruriliyini və sovet imperiyasını güclə bərpa etməyin mümkünsüzlüyünü göstərmək lazım gələcək", - britaniyalı siyasətçi güman edir. "Heç vaxt unutmayın ki, Obama və ya Bayden deyil, məhz Tramp ukraynalılara 2022-ci ildə Kiyev uğrunda döyüşdə həlledici rol oynayan "Cavelin" tankəleyhinə silah verib. Tramp artıq Ukrayna demokratiyasının müdafiəsində qətiyyətli hərbi əməliyyatlarda təcrübəyə malikdir", - Conson xatırladıb.

Bakı şəhərinin Qaradağ rayonunda “Abşeron” ticarət mərkəzinin ərazisində yanğın olub. Bu barədə Sozcu.az-a Fövqəladə Hallar Nazirliyindən bildirilib. Ümumi sahəsi 130 m² olan taxta sexinin içərisində sahəsi 10 m² olan köməkçi tikilinin yanar konstruksiyaları, 1 ədəd kondisioner və 30 m² sahədə taxta materialları yanıb. Sexin qalan hissəsi yanğından mühafizə olunub. Yanğın yanğından mühafizə bölmələri tərəfindən söndürülüb.

Azərbaycan Ermənistanı COP29 iqlim sammitinə dəvət edib. Sozcu.az The National-a istinadla xəbər verir ki, bunu Azərbaycan Prezidentinin köməkçisi - Prezident Administrasiyasının Xarici siyasət şöbəsinin müdiri Hikmət Hacıyev deyib. Onun sözlərinə görə, Ermənistana dəvət göndərilib. “Deyirəm... bu, beynəlxalq media üçün ilk dəfədir”, - o, işğal altında olan Şuşidə keçirilən II Qlobal Media Forumunda deyib. “(COP29-un prezidenti təyin edilmiş) Muxtar Babayev... Ermənistanın xarici işlər nazirinə dəvət məktubu göndərib. Biz rəsmi dəvət göndərmişik”. Hacıyevin sözlərinə görə, rəsmi diplomatik münasibətlərin olmadığı bir şəraitdə bu dəvətin göndərilməsi Azərbaycanın xoşməramlılığının və inklüziv yanaşmasının nümunəsidir. Prezidentin köməkçisi əlavə edib ki, COP29 qlobal hadisədir və ən mühüm danışıqlar Ermənistan və Azərbaycanın hüdudlarından kənara çıxıb. "İndi Ermənistan hökumətinin qərar vermə vaxtıdır", - Hacıyev bildirib.

İddiasızsansa, seçimlərində və hərəkət trayektoriyalarında özünə, gücünə görə haqlı ola bilərsən ki, bu, çox doğru qərardır – hər kəs gücünü bilməli, buna görə addım atmalıdır. Sən seçkiyə qəti getmə. Amma bunu qəbul etmək lazımdır ki, siyasət birmənalı olduğu halda hər təşkilatda fərqli rənglərdə ola bilir. Bu da təşkilatların fərqli siyasət mexanizmləri, xüsusilə strukturlarda güc fərqi, qərarların fərdi deyil, kollegial verilməsi ilə bağlıdır. -Müsavat gücünə inanır – anormal seçki mühitinin mövcudlugunun fərqindədir, ölkədə mitinq keçirməyə imkan verilmir, 3-5 adam bir yerə toplaşıb ölkədəki siyasi mühiti müzakirə edə bilmir, öncəki seçki biyabırçılıqlarını bilir, siyasi məhbus, fundamental insan haqlarının vəziyyətindən xəbərdardır və bununla yanaşı unutmamalı olduğu yuxarıda dediyimiz qızıl qaydanı əsas tutaraq siyasətlə məşğuldur. Bu məqamda müxalif siyasi partiya nə etməlidir? -Seçkidə iştirak seçimindən asılı olmayaraq siyasətlə məşğul olan hər kəs bilməlidir ki, siyasi uğurun qızıl qaydası seçki qutusuna kimin atılmasının vacibliyidir. Əgər hazırkı çətin dövrdə Müsavat Partiyası Məclis üzvlərinin əksəriyyəti seçkidə iştiraka meyillidirsə, gücünü ortaya qoymağı vacib görürsə, həm partiya olaraq, həm sıravi müsavatçı olaraq bu siyasəti dəstəkləməliyik. Bu həm də demokratiyanın aliliyinə xidmət edir. Azlıq çoxluğa tabedir. -Vəziyyət kifayət qədər aydındır, nəticələri öncədən təxmin edirik. Bəli, bu ən maraqsız olanıdır. Ancaq namizəd olaraq hər seçicidən aldığımız səs qazandığımız bir vətəndaşdır, bunu unutmuruq, fürsət dəyərləndirməsi etməyə calışırıq. Hədəfimiz gələcəyə hesablanıb. Seçkiyə qatılma səbəbimiz hər bir halda bu gun və ya gələcək üçün elektorat qazanmağımıza xidmət edir. İştirak növbəti dövrün nəticələrini proqnozlaşdırmağa kömək edəcək. -Siyasət elə bir sahədir ki, burada “gözlənilməz nəticələr” tüğyan edir. Nə qədər bacarıqlı, praqmatik düşüncə sahibi olsanız da, qarşılıqlı əlaqənin istiqamətini və nəticələrini müəyyən edə bilməzsiniz. Çünki insanların iradəsi var və bu, mütləq bir gün ortaya qoyulacaq. Siyasətin bu qızıl qaydasını həmişəlik pozacaqlarını düşünənlər əslində vətəndaşı iradəsiz olduğuna inandıranlardır, bu siyasəti aparanları gələcək seçkilərdə yaxşı heç nə gözləmir. Müsavatın seçkiyə qoşulan üzvlərini izləsəniz, müşahidə edərsiniz ki, onların hər biri seçici ilə görüslərində müəyyən hesablama aparır, güclərindən istifadə edir, seçkidə qutudan kimin çıxacağından asılı olmayaraq gələcək dövr üçün həm güclərini hesablayır, həm də ümumilikdə elektoratını müəyyənləşdirirlər. Bu seçkidə onların gözlədiyi nəticə müsbət mənada yoxa bərabər olsa da təqdirəlayiqdir, seçki prosesində maksimum saxtakarlıq ifşa edəcəklər, rejimin əsl simasını yenidən ortaya qoyacaqlar. Bununla da dövlətçilik üçün ən əhəmiyyətli missiyanı yerinə yetirərək hakimiyyətin demokratik don geyindirmək istədiyi seçki şousunun mahiyyətini faktlarla tarixə yazacaqlar. Siyasət çoxlu aktorların iştirak etdiyi oyundur Bütün ziddiyyətli və ya bitişik iradələr hərəkətə keçir və bilyard şarları kimi bir-birinə dəyir, yeni istiqamətlər alır. Bununla belə, siyasətin bilyarddan böyük fərqi var. Nə qədər bacarıqlı olsanız da, qarşılıqlı əlaqənin istiqamətini və nəticələrini müəyyən edə bilməzsiniz. Çünki insanların iradəsi var və bu, nə qədər məhdudlaşdırılsa da, bir mərkəzdən müəyyənləşəcək bir şey deyil. Bilyard şarlarının iradəsi yoxdur. Buna baxmayaraq, ən təcrübəli bilyardçılar da bilirlər ki, hər zaman qalib gələ bilməzlər. Bu gün bu döyüşdən qalib çıxdığını hesab edənlər tarixdə öz adları, yanlışları, doğruları ilə qalacaqlar. Kozların paylaşıldığı bu qarışıq və həlledici məqamda boykot ən asanıdır. -Bəs isti yay günlərində istirahət etməyi, təzyiq, təqiblərdən uzaq boykotu seçənlər bu məşəqqətli prosesdə iştirakdan imtinalarına necə haqq qazandırsınlar? -Elektoratı itirmək bu yolun yolçusu olanlar üçün çox pis nəticə verəcək. Bu məqamda özlərinə rəqib hesab etdikləri təşkilatları qaralamaq işə yaraya bilərmi? Boykotu seçənlər bunu seçərkən heç uf da demirlər. -Ancaq siyasətin ən çox yayılmış, sınanmış və effektiv hesab olunan yolu mövcud elektoratı əlində saxlamağı qənimət bilib başqalarını qaralamaq yox, zoru (seçkidə iştirakı) seçib yeni elektorat toplamaqdır. Təəssüf ki, boykot deyənlər ilk ağıllarına gələn bu bəsit taktikanı sınamaqdan usanmırlar. Asanı yox, zoru seçəni qaralamaqla buna nail olmağa çalışırlar – bunun adı başqadır. Könül Alı

Ukrayna müharibənin 879-cu günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 566 710 hərbçi, 8 266 ədəd tank, 15 963 ədəd zirehli döyüş maşını, 15 586 ədəd artilleriya sistemi, 1 121 ədəd RYAS (reaktiv yaylım atəş sistemi), 896 hava hücumundan müdafiə sistemi, 362 ədəd hərbi təyyarə, 326 ədəd helikopter, 21 036 ədəd avtomobil texnikası, 12 402 ədəd PUA, 2 401 qanadlı raket, 28 gəmi/kater, 1 sualtı qayıq, 2 616 xüsusi avadanlıq itirib.

Ukraynanın Rusiya neftinin öz ərazisindən tranzitini dayandırması səbəbindən Macarıstan enerji böhranı ilə üzləşib. Sozcu.az xəbər verir ki, bu barədə “Politiko” nəşri yazıb. “Centre for Eastern Studies” analitik mərkəzinin Macarıstan üzrə eksperti İlon Qizinski nəşrə açıqlamasında deyib ki, Ukraynanın gördüyü tədbirlər çətin vəziyyət yarada bilər: “Budapeşt cəmi bir neçə həftə ərzində artan enerji qiymətləri və elektrik çatışmazlığı ilə üzləşə bilər. Ölkə yalnız üç ay davam edəcək strateji enerji ehtiyatlarından istifadə etməyə başlamalı olacaq”.

2023-cü ilin sentyabr ayına olan məlumata görə, ABŞ 3 min 748 nüvə başlığına malikdir. Sozcu.az xəbər verir ki, bu ABŞ Energetika Nazirliyi yanında Milli Nüvə Təhlükəsizliyi Administrasiyasının saytında dərc olunan məlumatlarda göstərilib. Qeyd olunub ki, ABŞ-nin nüvə silahı ehtiyatları 1967-ci ildən bəri təxminən 88 faiz ixtisar olunaraq 31 255 nüvə başlığına, Berlin divarının çökdüyü 1989-cu ildə isə daha 83 faiz ixtisar edilərək 22 217 başlığadək azaldılıb. ABŞ 1994-cü ildən 2023-cü ilə qədər ümumilikdə 12 088 nüvə başlığını, o cümlədən 2020-ci ildən bu yana 405 nüvə başlığını məhv edib. Eyni zamanda, təxminən 2 min döyüş başlığı istifadədən çıxarılıb. Həmçinin 1991-ci il sentyabrın 30-dan bəri qeyri-strateji taktiki nüvə başlıqlarının sayı 90 faizdən çox ixtisar olunub.

Bilgəh çimərliyində ölüm hadisəsi qeydə alınıb. Sozcu.az APA-ya istinadən xəbər verir ki, hadisə Bilgəh qəsəbəsində baş verib. 2003-cü il təvəllüdlü Alıxanlı Nicat Elman oğlu və hələlik kimliyi bilinməyən dostu dənizdə boğularaq ölüb. N.Alıxanlının meyiti sudan çıxarılaraq morqa təhvil verilib. Digər şəxsin də meyiti artıq tapılıb. Onun kimliyi müəyyənləşdirilir. Fövqəladə Hallar Nazirliyindən verilən məlumata görə, axtarışlara Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri cəlb olunublar.

Ermənistan silahlı qüvvələrinin bölmələri Azərbaycan Ordusunun Kəlbəcər rayonunun İstisu yaşayış məntəqəsi istiqamətində yerləşən mövqelərini iriçaplı silahlardan atəşə tutub.  Bu barədə Sozcu.az-a Müdafiə Nazirliyindən bildirilib.  "İyulun 20-si saat 22:10 radələrində Ermənistan silahlı qüvvələrinin bölmələri Basarkeçər rayonunun İstisu yaşayış məntəqəsi istiqamətində yerləşən mövqelərindən Azərbaycan Ordusunun Kəlbəcər rayonunun İstisu yaşayış məntəqəsi istiqamətində yerləşən mövqelərini iriçaplı silahlardan atəşə tutub. Bölmələrimiz tərəfindən qeyd olunan istiqamətdə adekvat cavab tədbirləri görülüb", – hərbi qurumun məlumatında diqqətə çatdırılıb. 

Türkiyənin Antalya bölgəsində meşə yanğını baş verib. Sozcu.az xəbər verir ki, meşəlik ərazidə baş verən yanğına havadan və qurudan müdaxilə edilir. Yanğının söndürülməsinə 3 təyyarə, 2 helikopter, 5 su tankeri, 2 su təchizatı maşını və çoxlu sayda yanğınsöndürən qüvvə cəlb olunub.

Bu gündən Almaniya və Fransa arasında sərhəd nəzarəti tətbiq ediləcək. Sozcu.az xəbər verir ki, bu barədə Fransa Daxili İşlər Nazirliyi qərar verib. Bildirilir ki, sərhəd nəzarəti Parisdə keçiriləcək Olimpiya Oyunları ilə əlaqədar tətbiq olunur. Qərar iyulun 20-dən sentyabrın sonuna qədər qüvvədə olacaq. Oxşar sərhəd nəzarəti hava limanı sərnişinlərinə də şamil olunacaq.

Daxili İşlər Nazirliyinin (DİN) Kibercinayətkarlıqla Mübarizə Baş İdarəsinin əməkdaşlarının həyata keçirdikləri əməliyyat nəticəsində bank kartlarından xüsusi proqramlardan istifadə etməklə maddi vəsaitlər oğurlamaqda şübhəli bilinən Cavanşir Rüstəmzadə, Mehman Əsədov və Novruz Qulami saxlanılıblar. Bu barədə Sozcu.az-a nazirlikdən məlumat verilib. Bildirilib ki, araşdırmalarla müəyyən olunub ki, M.Əsədov vətəndaşlara məxsus kartların məlumatlarını müxtəlif üsul və vasitələrlə əldə edib. Sonradan o, kartlarda olan külli miqdarda pul vəsaitini Cavanşir Rüstəmzadə və Novruz Qulaminin adına açılmış hesablara köçürüb. Pul vəsaitləri müxtəlif bankomatlarda nağdlaşdırılaraq saxlanılan şəxslər arasında bölünüb. Dəstə üzvləri həmçinin internet üzərindən onlayn maliyyə əməliyyatları aparan vətəndaşların ödəmə sistemlərindəki məlumat bazalarına da müdaxilə edərək onların rekvizitlərini əldə ediblər. Saxlanılanların istifadələrində olan kompüter avadanlıqlarına və məlumat daşıyıcılarına baxış zamanı çoxsaylı elektron sübutlar və digər dəlillər müəyyən edilərək götürülüb. Faktlarla bağlı Baş İdarədə cinayət işi başlanılıb. Saxlanılan şəxslər barəsində məhkəmənin qərarı ilə həbs qətimkan tədbiri seçilib, araşdırmalar davam etdirilir.

Çinin Siçuan əyalətində şiddətli yağışların yaratdığı sel və daşqın 40-dan çox evi dağıdıb, 30-dan yuxarı sakin itkin düşüb. Sozcu.az xəbər verir ki, təbii fəlakət gecə saatlarında Hanyuan rayonunun Sinhua kəndində baş verib. Rayonun fövqəladə hallarla mübarizə qərargahından verilən məlumata görə, sel və daşqın avtomobil yollarına və kommunikasiya xətlərinə də böyük ziyan vurub. Hazırda itkin düşənlərin axtarışları əlverişsiz hava şəraitində davam edir.

Biz bəzən açıq ictimai şəkildə, bəzən də pərdəarxası mesajlarımızı veririk ki, Cənubi Qafqazda Azərbaycanın maraqları təmin edilməlidir, kimsə bizim maraqlarımızı görməməzliyə vurmağa çalışsa, əlbəttə ki, onlar yanılacaq və uğursuzluğa düçar olacaqlar. Sozcu.az xəbər verir ki, bu fikirləri Prezident İlham Əliyev “Yalan məlumatların ifşası: Dezinformasiyaya qarşı mübarizə” mövzusunda 2-ci Şuşa Qlobal Media Forumunda çıxışında ifadə edib. “Mən səmimi deyirəm ki, anti-Azərbaycan fəaliyyətin (ABŞ-da – red.) bir hissəsi prezident seçkiləri ilə bağlıdır. Onlar ermənilərin səslərini istəyirdilər, onlar onu təmin etmək istəyirdilər. Zənnimcə, bu, mənim fikrimdir ki, bəlkə də məqsəd məhz bundan ibarət idi”, - söyləyən dövlətn başçısı seçkilərdən sonra Vaşinqtonda və Avropada Azərbaycan, bizim potensialımız, bizim rolumuz haqqında daha yaxşı anlayışın olacağına ümid etdiyini vurğulayıb.

Saat 11:00-a olan məlumata görə dağlıq və dağətəyi rayonlarda qısamüddətli leysan xarakterli yağış yağıb, şimşək çaxıb. Bu barədə Sozcu.az-a Milli Hidrometeorologiya Xidmətindən məlumat verilib. Bildirilib ki, düşən yağıntının miqdarı Sədərəkdə 2 mm, Naxçıvan, Şərur, Tovuz, Balakən, Gədəbəy, Şəmkir, Şamaxı, Daşkəsən, Şahdağ, Lerikdə 1 mm-dək olub. Lerik, Şahdağ, Qrızda duman müşahidə olub. Şərq küləyi sarı xəbərdarlığa uyğun olaraq Culfada arabir 17 m/s-dək güclənib. Havanın maksimal temperaturu Bakıda və Abşeron yarımadasında 33, Naxçıvan MR-da 35, Aran rayonlarında 37, dağlıq rayonlarda isə 26 dərəcəyədək isti olub.

Azərbaycan "Zəfər Şəhid Ailələrinə Dəstək" İctimai Birliyi Qarabağ müharibəsində şəhid olan hərbçilərimizin övladları ilə birlikdə Şimali Kipr Türk Cümhuriyyətinin paytaxtı Lefkoşada olub. Sozcu.az xəbər verir ki, Qarabağda şəhid olan hərbçilərin övladlarına dəstək olmaq və onların təhsilinə töhfə vermək kimi vacibfəliyyətləri olan İctimai Birlik həm Kipr Sülh Hərəkatının ildönümü, həm də şəhid övladlarının iştirakı üçün hazırlanmış yaz düşərgəsi çərçivəsində Şimali Kipr Türk Respublikasında olub.  174 Kipr veteranı və Şimali Kipr Türk Cümhuriyyətində olan Cümhuriyyət Xalq Partiyasının (CHP) heyəti azərbaycanlı şəhid övladlarının qaldığı otelə gəlib, onlarla görüşüblər. CHP-nin sədri Özgür Özəl, sabiq sədrlər Murat Karayalçın, Hikmət Çətin ve eks-katib Önder Sav, eləcə də müdafiə siyasətindən məsul sədr köməkçisi təqaüddə olan kontr-admiral Yankı Bağcıoğlu və xarici siyasətdən məsul köməkçi İlhan Üzgelin də olduğu heyət Şimali Kipr Türk Cümhuriyyəti qaziləri və azərbaycanlı şəhid övladları ilə bir araya gəlib. Bu vacib görüşdə CHP sədrinin ardınca "Zəfər Şəhid Ailələrinə Dəstək" İctimai Birliyinin sədri Sevinc Əlizadə çıxış edib. Görüş fərqli coğrafiyalarda oxşar əməllər uğrunda verilən mücadilələrin birgə yad edilməsini təmin etmək baxımından olduqca mənalı olub. CHP rəsmiləri bir daha həm Şimali Kipr türklərinin, Azərbaycan türklərinin  yanında olmağa davam edəcəklərini vurğulayıblar.modern)

Rəqəmsal inkişaf və nəqliyyat nazirinin müavini Rəhman Hümmətov, sitat: "Əvvəl Bakıda 65-70 min taksi fəaliyyət göstərirdi, indi isə 35 minə yaxın taksi var. Bu rəqəmi elektron sistem üzərindən əldə etmişik. Taksi sahəsində tənzimləmələr davam etdiriləcək”. Cənab məmur, Sizin hədəfiniz taksi sayının azaldılması olmamalı idi, hökumətin məqsədi taksi xidmətinin keyfiyyətinin artması, müştəri məmnuniyyəti, bu xidmətin əmək məhsuldarlığının ölkədə artmasına tövhəsi olmalıdır. Sozcu.az-ın xəbərinə görə, bunu iqtisadçı Natiq Cəfərli bildirib. "Sizin fəaliyyətiniz nəticəsində isə 30-35 min insan çörəksiz qaldı, işsizlər ordusuna qoşuldu, qiymətlər 50%-ə yaxın artdı, keyfiyyət isə aşağı düşdü - əvvəl 4-5 dəqiqəyə gələn taksi, indi 20-25 dəqiqəyə gəlir. Yaxşı, Sizin məqsədiniz nədir ki, həm işsizlik yaratdınız, həm qiyməti artırdınız, həm də xidmət keyfiyyətini aşağı çəkdiniz?! Sizin hədəflər bu olmamalı idi axı! Hə, cənab məmur, onu da deyim ki, bizim millət kreativdir, SSRİ belə paralel taksi xidmətini qadağan, bu sahəyə nəzarət edə bilmirdi. İndi isə internet çağıdır, müxtəlif messenger-lər var, Siz rəsmi fəaliyyəti qadağan edəcəksiz, vətəndaşlar da heç bir rəsmi icazə almadan qohum-qonşuya, dost-tanışa zənglə, mesajla xidmət göstərəcək, o zaman nə edəcəksiniz?! Maşında sürücüdən başqa kimsə olsa, onları bir-bir saxlayıb sorğu-suala tutacaqsız?! Hətta Vasif Talıbovun zamanında Naxçıvanda belə sərt qaydalardan yan keçirdilər, özəl taksi xidməti müştəri maşına əyləşəndə 2-3 dəqiqə özü, kəndi, nəsli haqqında məlumat verirdi ki, birdən yolda saxlayıb soruşsalar “qohum”, tanış olduğunu sübut etsinlər. Siz də bu metoda keçəcəksiniz?! Bakıda 1 milyon avtomobil var, hər gün onları yoxlayacaqsınız?! Cənab məmur, insanlar kefindən taksi sürmürdü, bu iş çox ağır işdir, gündə 15-16 saat işləyirdilər, yəni, başqa qazanc, iş yerləri olsaydı, taksi sürməzdilər, indi bu 30-35 min vətəndaş nə etsin?! Siz məcbur edirsiniz ki, insanlar qanundankənar fəaliyyətə keçsinlər, bəli, məhz Siz onları bu addıma məcbur edirsiniz, yaxşı, tənzimləmələri (oxu - qadağaları) davam etdirib nəyə nail olacaqsınız? Bunu da açıqlayın, camaat işini bilsin..." - o qeyd edib.

Şəhid anası Nabat Rzayeva Ağstafa Rayon İcra Hakimiyyətinin başçısı Seymur Orucovdan şikayətçidir. Şəhid anası Qaynarinfo-ya ünvanladığı müraciətdə yazır ki, Ağstafa rayonunun Eynallı kəndində yaşayan qızı Həmayə Mustafayevanın yaşadığı ev təbii fəlakət nəticəsində yararsız vəziyyətə düşüb. Nabat Rzayevanın sözlərinə görə, qızının Birinci Qarabağ savaşının veteranı olan həyat yoldaşı dünyasını dəyişib. Bu baxımdan, onun maddi vəziyyəti çətinləşib. “Qızımın maddi vəziyyəti çətinləşdiyindən yararsız hala düşmüş evini təmir etmək imkanı yoxdur. Digər tərəfdən, təbii fəlakət nəticəsində evləri zərər çəkmiş vətəndaşlara dövlət yardım edir. Biz digər bölgələrdə bunun şahidi olmuşuq. Mən də düşündüm ki, yardım üçün Ağstafa Rayon İcra Hakimiyyətinin başçısı Seymur Orucova müraciət edim. Amma müraciətimə cavab gəldi ki, imkanımız yoxdur. Mən icra hakimiyyətindən qızıma dəbdəli imarət, villa tikməyi xahiş etmirəm axı. Bir evi sadəcə yaşamaq üçün normal hala gətirmək nə böyük işdir ki?”, – şəhid anası müraciətində yazıb. Şikayətçi hesab edir ki, Ağstafa Rayon İcra Hakimiyyəti sadəcə məsələyə biganə yanaşıb: “Düşünürəm ki, imkanın olmaması barədə deyilənlər sadəcə bəhanədir. Bir daha təkrar edirəm ki, mən yeni ev tikilməsini, qızıma villa verilməsini istəmirəm. Zədələnmiş evin təmirini istəyirəm ki, bu da o qədər böyük xərc aparmaz”. Nabat Rzayeva sonda qeyd edib ki, icra hakimiyyətinin məlum cavabından sonra yuxarı instansiyalara müraciət etməyi düşünür: “Mən şəhid anasıyam. Qızımın mərhum həyat yoldaşı isə Birinci Qarabağ savaşının iştirakçısı olub. Ümid edirəm ki, ölkə rəhbərliyi Ağstafanın icra başçısı Seymur Orucovdan fərqli olaraq müraciətimə biganə qalmaqacaq”. Seymur Orucov 2020-ci ildən Ağstafaya rəhbərlik edir.

İyulun 20-də saat 08 radələrində paytaxtın Qaradağ rayonu Ümid qəsəbəsində 1967-ci il təvəllüdlü Aybəniz Məhəmməd qızı Şükürzadənin kəsici alətlə qətlə yetirilməsi barədə polisə məlumat daxil olub. DİN-in Mətbuat Xidmətindən Sozcu.az-a bildirilib ki, cinayət əməlini törətməkdə şübhəli bilinən oğlu - 1991-ci il təvəllüdlü Kamran Etibar oğlu Şükürzadə saxlanılıb. O, polisə könüllü gəlib.

Mayın 1-dən start verilən 2024-2025-ci tədris ili üzrə uşaqların I sinfə elektron qəbulu prosesi hazırda davam edir. Bu barədə Sozcu.az-a Məktəbəqədər və Ümumi Təhsil üzrə Dövlət Agentliyindən məlumat verilib. Bildirilib ki, hazırda ölkə üzrə bütün ümumi təhsil müəssisələrində Azərbaycan və digər bölmələr üzrə sərbəst qaydada məktəb və müəllim seçimi aparılır: "Bu günə qədər ümumilikdə 122 min uşaq I sinfə qəbul edilib. 2024-2025-ci tədris ili üçün birinci sinfə qəbulu proqnozlaşdırılan məktəbyaşlı uşaqların sayı ilə qeydiyyatdan keçənlərin sayında fərq müşahidə edilir". "Tədris ili yaxınlaşdıqca ümumi təhsil müəssisələrində uşaqların qeydiyyatının aparılması, sənədləşmə işlərinin dəqiq və vaxtında başa çatdırılması baxımından bu mərhələnin əhəmiyyətini nəzərə alaraq bildiririk ki, övladlarının 2024-2025-ci tədris ili üzrə I sinfə elektron qəbulu prosesini həyata keçirmək istəyən valideynlər mektebeqebul.edu.az saytı vasitəsilə şəxsi kabinet yaradaraq məktəb və müəllim seçimi edə bilərlər", - deyə məlumatda qeyd edilib.