Ermənistan Baş naziri Nikol Paşinyan növbədənkənar parlament seçkilərinə gedə bilər. Sozcu.az xəbər verir ki, bu barədə “İravunk” qəzeti məlumat yayıb. Qəzet qeyd edir ki, ötən ilin sonuna qədər hakim komandanın üzvü olan Ovik Ağazaryan hakimiyyətin yaxın çevrəsində gedən müzakirələrdən xəbərdardır, hələ də onların bəziləri ilə ünsiyyətini davam etdirir. “Ağazaryanın fikrincə, Ermənistanın xarici siyasətində elə inkişaflar var ki, növbədənkənar seçkilər Paşinyana xeyir edə bilər", - məqalədə bildirilir. Hakim “Vətəndaş Müqaviləsi” Partiyasının keçmiş üzvü deyib ki, hazırda onun hakimiyyətini saxlamaq və planlarını həyata keçirmək üçün daha böyük fürsəti var: "Təkcə baş verən hadisələr deyil, hakimiyyətin növbədənkənar seçkilərə getmək maraqlarından irəli gələn başqa səbəblər də var”. Qeyd edək ki, erkən seçkilər olmasa, Ermənistanda növbəti parlament seçkiləri 2026-cı ilin iyununda keçiriləcək.

“Təbriz-Bakı-Təbriz” aviareysi üzrə uçuşlar bərpa olunub. Sozcu.az IRNA-ya istinadən xəbər verir ki, Təbrizin hava limanında bununla bağlı mərasim keçirilib. Tədbirdə Şərqi Azərbaycan əyalətinin qubernatoru və əyalətin rəhbər şəxsləri iştirak edib.

Rüşvət almaqda ittiham olunan Ağdam rayonu Dördyol qəsəbə-2 uşaq bağçasının müdiri Kəmalə Quliyevaya hökm oxunub. Sozcu.az Qaynarinfo.az-a istinadən xəbər verir ki, Cinayət Məcəlləsinin 311.1-ci (Rüşvət alma, yəni vəzifəli şəxsin xidməti vəzifəsinin (səlahiyyətlərinin) icrası ilə əlaqədar hər hansı hərəkətə (hərəkətsizliyə) görə, eləcə də xidmət üzrə ümumi himayədarlıq və ya laqeydlik müqabilində özü və yaxud üçüncü şəxslər üçün birbaşa və ya dolayı yolla, şəxsən və ya vasitəçidən istifadə etməklə maddi və sair neməti, imtiyazı və ya güzəşti istəməsi və ya alması, yaxud bu barədə təklif və ya vədi qəbul etməsi) maddəsi ilə təqsirləndirilən Kəmalə Quliyeva Gəncə Ağır Cinayətlər Məhkəməsində mühakimə edilib. Hakim Dadaş İmanovun çıxardığı hökmə əsasən, Kəmalə Quliyevaya 3 il müddətinə dövlət orqanlarında və yerli özünüidarə orqanlarında rəhbər vəzifə tutmaq hüququndan məhrum edilməklə 4 il müddətinə azadlıqdan məhrumetmə cəzası təyin edilib. Kəmalə Quliyeva 2024-cü ildə başqa bir cinayət işinə görə Xətai Rayon Məhkəməsinin hökmü 1 il 11 ay 26 gün müddətə azadlığın məhdudlaşdırılması cəzasına məhkum edilib. Bu cəza 11 ay 28 gün (1 günə 2 gün hesabı ilə) azadlıqdan məhrumetmə cəzasına bərabər tutulmaqla hazırki cəza ilə qismən toplanılıb. Beləliklə, Kəmalə Quliyevaya qəti olaraq 3 il müddətinə dövlət orqanlarında və yerli özünüidarə orqanlarında rəhbər vəzifə tutmaq hüququndan məhrum edilməklə 4 il 6 ay azadlıqdan məhrumetmə cəza təyin edilib. İş materiallarından məlum olur ki, Kəmalə Quliyeva Dilguşə İmanova adlı rəfiqəsi ondan həyat yoldaşını uşaq bağçasına işə götürməsini istəyib. Kəmalə Quliyeva isə onu ocaqçı vəzifəsinə düzəldə biləcəyini deyib. Bunun müqbailində isə Dilguşə İmanovadan 2300 manat pul alıb.

Musiqi sənəti istiqamətinə aid Harmoniya və solfecio, Musiqi nəzəriyyəsi və solfecio fənləri üzrə imtahanın nəticəsi elan olunub. Bu barədə Sozcu.az-a Dövlət İmtahan Mərkəzindən məlumat verilib. İmtahan nəticələri DİM-in internet səhifəsində yerləşdirilib. Abituriyentlər imtahan nəticələri haqqında məlumatı mobil operatorlar (Azercell, Bakcell, Nar, Naxtel) vasitəsilə bu imtahan üçün nəzərdə tutulan buraxılış vərəqəsində göstərilən kodu 7727 nömrəsinə göndərməklə də öyrənə bilərlər. İmtahanda 1064 nəfər iştirak edib. “Harmoniya və solfecio”, “Musiqi nəzəriyyəsi və solfecio” fənlərinin hər biri üzrə iştirakçılara 30 qapalı tipli tapşırıq təqdim olunub. Qeyd edək ki, qiymətləndirmə fənlərin hər biri üzrə 10 ballıq şkalada aparılır. İxtisaslar üzrə nəzəriyyə fənləri və müsabiqə balları burada təqdim olunub. İmtahan nəticələri ilə bağlı Apellyasiya komissiyasına müraciət etmək istəyənlər 30 iyul saat 10:00-dan 31 iyul saat 17:00-dək DİM-in saytında yerləşdiriləcək elektron ərizəni doldurmaqla qeydiyyatdan keçə bilərlər. Göstərilən müddət ərzində qeydiyyatdan keçməyənlər sonradan apellyasiya üçün müraciət edə bilməyəcəklər. Apellyasiya prosesi telefon əlaqəsi vasitəsilə təşkil edilir. Bir abituriyentin ərizəsi (müraciəti) üzrə ən çox 15 dəqiqə müzakirə aparıla bilər. Ayrılan vaxt bitdikdə, kənar şəxs müzakirəyə qoşulduqda və ya etik davranış qaydaları pozulduqda müzakirə prosesi dayandırılır. Qeyd edək ki, 27 iyul 2025-ci il tarixində DİM ali təhsil müəssisələrinin qabiliyyət tələb edən musiqi sənəti istiqaməti üzrə ixtisasların Harmoniya və solfecio, Musiqi nəzəriyyəsi və solfecio fənləri üzrə imtahan keçirib. İmtahanlar Bakı, Gəncə, Naxçıvan şəhərlərində təşkil edilib.

"Gündəlik Bakı" qəzetinin həbsdə olan təsisçisi və baş redaktoru Habil Vəliyevlə bağlı hökmdən verilən apellyasiya şikayətinə baxılıb. Sozcu.az APA-ya istinadən xəbər verir ki, bu gün Bakı Apellyasiya Məhkəməsində hakim Zəfər Əhmədovun sədrliyi ilə keçirilən prosesdə qərar elan olunub. Qərara əsasən, birinci instansiya məhkəməsinin hökmü dəyişdirilib. Habil Vəliyevin cəzası 1 il azaldılıb. Qeyd edək ki, Bakı Ağır Cinayətlər Məhkəməsinin hökmünə əsaəsn Habil Vəliyev 8 il müddətinə azadlıqdan məhrum edilib. Habil Vəliyev barəsində hüquq-mühafizə orqanlarına vətəndaşdan daxil olan müraciətlər əsasında saxlanılıb. Habil Vəliyev bir neçə nəfəri şantaj etməkdə ittiham edilir. Ona qarşı Cinayət Məcəlləsinin 182.2.2-ci (hədə-qorxu ilə tələb etmə təkrar törədildikdə) və 182.2.4-cü (xeyli miqdarda əmlak əldə etmək məqsədi ilə törədildikdə) maddələri ilə ittiham irəli sürülüb. H.Vəliyev daha əvvəl eyni ittihamla 4 il müddətinə azadlıqdan məhrum edilmişdi.

Nyu-Yorkun COMEX əmtəə birjasında qızılın bir troya unsiyasının qiyməti 7,1 dollar artaraq 3 373,9 dollar təşkil edib. Sozcu.az xəbər verir ki, gümüş isə 0,11 dollar artaraq 38,32 dollara bərabər olub.

Sumqayıtda yol-nəqliyyat hadisəsi baş verib, ölən var. Sozcu.az Report-a istinadla xəbər verir ki, hadisə şəhərin Sahil küçəsində qeydə alınıb. Belə ki, avtoqəza zamanı "Kia" markalı minik avtomobilində olan 1992-ci il təvəllüdlü Günel Bəylər qızı Hüseynova müxtəlif dərəcəli bədən xəsarətləri alıb. Yaralı xəstəxanaya çatdırılsa da, həkimlərin səylərinə baxmayaraq, onun həyatını xilas etmək mümkün olmayıb. Faktla bağlı araşdırma aparılır.

Azərbaycan Həmkarlar İttifaqları Konfederasiyası uzun illərdir ki, müəllimlərin, həkimlərin və digər peşə sahiblərinin əməkhaqqından müəyyən məbləğdə vəsait tutur. Qurum bu vəsaitlərin əvəzində tətil, sanatoriya və digər sosial xərclərin qarşılanacağını vəd edir. Lakin son dövrlər bu istiqamətdə ciddi narazılıqlar müşahidə olunur. Sosial şəbəkələrdə müəllimlər üçün yaradılmış “Təhsil forumu” qrupunda yüzlərlə müəllim İttifaqdan narazılığını ifadə edərək bildirir ki, onlara nəzərdə tutulan heç bir xidmət göstərilmir. Şikayətçilər uzun illər əməkhaqqılarından tutulmalara baxmayaraq, sanatoriya və digər istirahət mərkəzinə göndəriş ala bilmədiklərini vurğulayırlar. Qeyd edək ki, ötən ilə qədər bu xidmətlərdən yalnız az sayda müəllim yararlana bilib. Çoxsaylı şikayətlərdən sonra guya şəffaflığın təmin olunması məqsədilə onlayn müraciət sistemi istifadəyə verilib. Müəllimlər bu portal üzərindən qeydiyyatdan keçərək tətil üçün "putyovka" almağa çalışsalar da, müraciət edənlərin böyük əksəriyyəti əsassız şəkildə rədd cavabı aldıqlarını bildirir. Hətta bəzi müəllimlər bu səbəbdən quruma üzvlükdən imtina etmək üçün ərizə ilə müraciət edəcəklərini də qeyd edirlər. Müəllimlərə təzyiq olunacağı ehtimalını nəzərə alaraq, onların adlarını gizlətmək məcburiyyətində qaldıq. Eyni zamanda, rədd cavabı ilə bağlı bir qrup müəllim redaksiyamıza şikayət edib. Hətta Publika.az-ın əməkdaşının müəllim olan ailə üzvünün müraciətinə də rədd cavabı gəlib. Maraqlıdır, müəllimlərin maaşından tutulan vəsait konkret olaraq hansı istiqamətlərə yönəldilir? Tətbiq edilən onlayn müraciət sistemi ilə bağlı nə qədər müraciət qəbul olunub və bunlardan neçə nəfər müsbət cavab alıb? Rədd cavabının səbəbi nədir? Bütün bu suallara cavab tapmaq üçün Azərbaycan Həmkarlar İttifaqları Konfederasiyasına sorğu göndərdik. Lakin sorğumuza və zəngimizə cavab verən olmadı.

Bakıda çimərlikdə daha iki nəfər boğulub. Sozcu.az bildirir ki, Oxu.Az-ın məlumatına görə, hadisə Sabunçu rayonu, Pirşağı qəsəbəsi ərazisindəki ictimai çimərlikdə baş verib. İmişli rayon sakini 2017-ci il təvəllüdlü Arif Aqil oğlu Rüstəmov dənizdə boğulmağa başlayıb. Həmin vaxt çimərlikdə olan Bakı şəhər sakini, 1994-cü il təvəllüdlü Rüfət Adil oğlu Cabbarov səkkiz yaşlı uşağın boğulduğunu görüb onu xilas etmək üçün dənizə girib. A.Rüstəmovu xilas edə bilməyən R.Cabbarov özü də boğulub. Hər iki şəxsin meyiti dənizdən çıxarılaraq aidiyyəti üzrə təhvil verilib.

Xəbər verdiyimiz kimi,  Dördpendirli pizzaiyulun 26-da Laçında baş verən ağır yol qəzasında 3 nəfər ölüb, 1-i isə yaralanıb. Sozcu.az xəbər verir ki, "Unikal"ın məlumatına görə, qəzada həyatını itirənlər sürücü Mahir Abdullayev, onun həyat yoldaşı Şəhla Novruzova və qadının bacısı Xədicə Novruzovadır. 

Ermənistan İstintaq Komitəsinin Baş İdarəsində arxiyepiskop Mikael Acapaxyan barəsində başlanmış cinayət işi üzrə ibtidai istintaq yekunlaşıb. Sozcu.az xəbər verir ki, bu barədə erməni mətbuatı məlumat yayıb. Məlumata əsasən, istintaq zamanı müəyyən edilib ki, Mikael Acapaxyan mediaya verdiyi müsahibələrin birində Ermənistanın iki keçmiş prezidentinə dəfələrlə hərbi çevriliş həyata keçirməyi təklif etdiyini bildirib. O, bu planın ordu, polis və milli təhlükəsizlik sistemində vəzifə tutan, onların siyasi baxışlarını bölüşən generalların dəstəyi ilə reallaşdırıla biləcəyini ifadə edib. Yerli istintaq orqanının rəyinə görə, Mikael Acapaxyan bu açıqlamaları ilə kütləvi informasiya vasitələrindən istifadə edərək dövlət hakimiyyətinin zorakı yolla ələ keçirilməsinə və ya saxlanmasına, eləcə də konstitusiya quruluşunun zorla dəyişdirilməsinə açıq çağırışlar edib. Bu əməllə əlaqədar olaraq Acapaxyan barəsində Ermənistan Cinayət Məcəlləsinin 422-ci maddəsinin 2-ci hissəsi ilə (dövlət hakimiyyətinin zorla ələ keçirilməsinə və ya zorla saxlanmasına, konstitusiya quruluşunun zorla dəyişdirilməsinə və ya dövlətin ərazi bütövlüyünün zorla pozulmasına yönəlmiş açıq çağırışlar) cinayət təqibi başlanıb.

Mətbuatda və sosial şəbəkələrdə Cermuk istiqamətində ordu mövqeyinin ələ keçirildiyi barədə yayılan məlumatlar həqiqətə uyğun deyil. Sozcu.az xəbər verir ki, bu barədə KİV-in sorğusuna cavab olaraq Ermənistan Respublikasının Müdafiə Nazirliyi bildirib.  "Biz sizi yalan və dezinformasiya yaymaqdan çəkinməyə çağırırıq, xüsusən də Müdafiə Nazirliyi ilk jurnalist sorğusuna cavab olaraq bu məlumatı təkzib edib", - Müdafiə Nazirliyinin sözçüsü qeyd edib./unikal.az 

Şəkidə ağır yol qəzası olub. Sozcu.az report-a istinadla xəbər verir ki, hadisə axşam saatlarında Yevlax-Zaqatala-Gürcüstan avtomobil yolunun Şəki rayonu ərazisindən keçən hissəsində qeydə alınıb. “VAZ-2107” və “Mitsubishi” markalı avtomobillərin toqquşması nəticəsində “VAZ”ın sürücüsü, 1962-ci il təvəllüdlü Səxavət Salamov hadisə yerində ölüb. Digər nəqliyyat vasitəsində olanlar isə xəsarət alıblar.  Faktla bağlı cinayət işi başlanılıb.

ABŞ Prezidenti Donald Tramp bildirib ki, rusiyalı həmkarı Vladimir Putinlə gələcək təmaslarda o qədər də maraqlı deyil. Sozcu.az xəbər verir ki, bu barədə ABŞ lideri Şotlandiyada Britaniyanın Baş naziri Kir Starmer ilə birgə mətbuat konfransında bildirib. "Mən artıq Putinlə danışmaqda maraqlı deyiləm. Mən Rusiya ilə böyük ticarət təsəvvür edirdim", - Tramp deyib.

Amerika Birləşmiş Ştatları Prezidenti Donald Tramp Ukraynada sülhlə bağlı müəyyənləşdirdiyi zaman aralığını ixtisar edib. O, bu müddəti 10-12 günə endirib. "Putin məni çox məyus etdi. Ona verdiyim 50 günlük müddəti azaldıram. Çünki cavabın nə olacağını zatən bilirəm", - deyə ABŞ prezidenti Şotlandiyada Britaniya Baş naziri Starmer ilə görüşdən öncə bildirib. Sozcu.az xəbər verir ki, siyasi şərhçi Şahin Cəfərli Trampın çıxışını belə şərh edib: “Bir gün əvvəl ABŞ və Avropa İttifaqı arasında ticarət anlaşması əldə edilməsi də Ukrayna məsələsində Qərbin vahid mövqedən çıxış etməsinə təsir göstərən önəmli hadisədir. Razılığa əsasən, Aİ qarşıdakı 3 ildə ABŞ-dən hər il 250 milyard dollarlıq təbii qaz, neft və digər enerji daşıyıcıları alacaq və ABŞ iqtisadiyyatına 600 milyard dollar investisiya qoyacaq. Bununla yanaşı, Aİ ABŞ-dən milyardlarla dollarlıq silah alaraq Ukraynaya ötürəcək. Bu anlaşma Trampın Avropadakı ideoloji müttəfiqləri olan radikal sağçı partiyalar tərəfindən tənqidlə qarşılanıb. Putin rejiminin Avropaya müharibə, qan, göz yaşı gətirdiyini və strateji situasiyanın bu səbəbdən dəyişdiyini qəbul etmək istəməyən Avropa anti-sistemi Rusiya ilə enerji sahəsində əməkdaşlığı davam etdirməyə tərəfdar çıxaraq Aİ liderlərini ABŞ-dən baha qiymətə xammal almaqda ittiham edir. Bu, qeyri-əxlaqi mövqe olmaqla bərabər, Tramp komandasının iqtisadi siyasətini də baltalamağa yönəldiyindən, respublikaçı administrasiya ilə həmin qüvvələrin ideoloji yaxınlığının praktik əhəmiyyətini azaldacaq”.

Şəmkirdə qohumlar arasında mübahisə bıçaqlanma ilə nəticələnib. Sozcu.az Teleqraf-a istinadən xəbər verir ki, Şəmkir şəhər sakini 1972-ci il təvəllüdlü Fidayıl Mirzəməmmədov münaqişə zəminində qardaşı oğlu, 1985-ci il təvəllüdlü Vüsal Mirzəməmmədova bıçaqla xəsarət yetirib. Yaralı xəstəxanaya çatdırılıblar, onların vəziyyəti kafi qiymətləndirilir. Faktla bağlı araşdırma başlanılıb.

Hərbi cinayətlər törətməkdə təqsirləndirilən erməniəsilli şəxslərin cinayət işi üzrə məhkəmənin baxış iclası keçirilir. Sozcu.az xəbər verir ki, proses Bakı Məhkəmə Kompleksində Bakı Hərbi Məhkəməsinin hakimi Zeynal Ağayevin sədrliyi ilə baş tutur. Xatırladaq ki, ötən prosesdə zərərçəkmiş şəxslər ifadə verib. Qeyd edək ki, onlar Ermənistan dövləti və onun silahlı qüvvələri, o cümlədən Ermənistan tərəfindən Azərbaycanın işğal olunmuş ərazilərində yaradılmış qondarma Dağlıq Qarabağ respublikası və onun qanunsuz silahlı birləşmələri tərəfindən Azərbaycana və xalqına qarşı sülh və insanlıq əleyhinə cinayətlər, müharibə cinayətləri, o cümlədən təcavüzkar müharibə aparma, soyqırımı, əhalini məcburi köçürmə, təqib, işgəncə, hərbi soyğunçuluq və digər qanunsuz əməllərdə təqsirləndirilirlər. Xatırladaq ki, Ermənistan Respublikası və onun silahlı qüvvələri, o cümlədən Ermənistanın yaratdığı qanunsuz “Dağlıq Qarabağ respublikası” və onun qanunsuz silahlı birləşmələr tərəfindən törədilən cinayətlərdə ittiham olunan 15 nəfər - Harutyunyan Arayik Vladimiri, Qukasyan Arkadi Arşaviri, Sahakyan Bako Sahaki, İşxanyan Davit Rubeni, Manukyan David Azatini, Babayan Davit Klimi, Mnatsakanyan Levon Henrikoviç, Beglaryan Vasili İvani, Qazaryan Erik Roberti, Allahverdiyan Davit Nelsoni, Stepanyan Qurgen Homeri, Balayan Levon Romiki, Babayan Madat Arakeloviç, Martirosyan Qarik Qriqori, Paşayan Melikset Vladimiriyə qarşı Azərbaycan Respublikası Cinayət Məcəlləsinin 100 (təcavüzkar müharibəni planlaşdırma, hazırlama, başlama və aparma), 102 (beynəlxalq müdafiədən istifadə edən şəxslərə və ya təşkilatlara hücum etmə), 103 (soyqırımı), 105 (əhalini məhvetmə), 106 (köləlik), 107 (əhalini deportasiya etmə və ya məcburi köçürmə), 109 (təqib), 110 (insanları zorakılıqla yoxa çıxarma), 112 (beynəlxalq hüquq normalarına zidd azadlıqdan məhrumetmə), 113 (işgəncə), 114 (muzdluluq), 115 (müharibə qanunlarını və adətlərini pozma), 116 (silahlı münaqişə zamanı beynəlxalq humanitar hüquq normalarını pozma), 118 (hərbi soyğunçuluq), 120 (qəsdən adam öldürmə), 192 (qanunsuz sahibkarlıq), 214 (terrorçuluq), 214-1 (terrorçuluğu maliyyələşdirmə), 218 (cinayətkar birlik (təşkilat) yaratma), 228 (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 270-1 (aviasiya təhlükəsizliyinə təhdid yaradan əməllər), 277 (dövlət xadiminin və ya ictimai xadimin həyatına sui-qəsd etmə), 278 (hakimiyyəti zorla ələ keçirmə və onu zorla saxlama, dövlətin konstitusiya quruluşunu zorla dəyişdirmə), 279-cu (qanunvericiliklə nəzərdə tutulmayan silahlı birləşmələri və qrupları yaratma) və digər maddələri ilə ittiham olunurlar.

Bərdə sakinini elektrik cərəyanı vuraraq öldürüb. Sozcu.az xəbər verir ki, 1964-cü il təvəllüdlü Feyruz Salahov öz evinin həyətində elektrik naqili ilə ehtiyatsız davranıb. Nəticədə onu elektrik cərəyanı vuraraq öldürüb. Report )

Abşeronda dənizdə batan iki nəfərin meyiti sudan çıxarılıb. Bu barədə Sozcu.az-a Fövqəladə Hallar Nazirliyindən məlumat verilib. Bildirilib ki, nazirliyin "112" qaynar telefon xəttinə Abşeron rayonu, Novxanı kəndində dənizdə nəzarətsiz ərazidə 2 nəfərin batması barədə məlumat daxil olub və dərhal FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-axtarış qrupları tərəfindən axtarışlara başlanılıb. Dalğıc-xilasedicilər tərəfindən vətəndaşlar - 2003-cü il təvəllüdlü Əliyev Rəvan Şahin oğlunun və 2009-cu il təvəllüdlü Cabbarov Əli Elşən oğlunun meyiti suda tapılıb çıxarılaraq aidiyyəti üzrə təhvil verilib.

İyulun 26-da saat 05 radələrində Suraxanı rayonu, Bülbülə qəsəbəsi ərazisində yerləşən “İmamzadə” məscidində 1990-cı il təvəllüdlü Nadir Səfərovun öldürülməsi barədə rayon prokurorluğuna məlumat daxil olub. Suraxanı rayon prokurorluğundan Sozcu.az-a bildirilib ki, ilkin araşdırmalarla 1996-ci il təvəllüdlü Elvin Məmmədovun bıçaqla xəsarətlər yetirərək Nadir Səfərovu qəsdən öldürməsinə əsaslı şübhələr müəyyən edilib. Faktla bağlı Suraxanı rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, E.Məmmədov iş üzrə şübhəli şəxs qismində tutulub.

Şəmkir Şəhər Mərkəzi Parkındakı attraksionlar və uşaq əyləncə alətləri kim tərəfindən özəlləşdirilib ? Şəmkir rayonunda əsas istirahət məkanlarından biri Şəmkir Şəhər Mərkəzi Parkıdır. Vaxtilə bu park öz gözəlliyi və cəlbediciliyi ilə regionda birinci idi. Sonrakı illərdə parkda müəyyən bərpa və abadlıq işləri aparılıb. Mətbuatda getmiş məlumatlara baxsaq 2023-cü ildə mərkəzi parkda aparılmış abadlıq işləri çərçivəsində parkın elektrik və işıqlandırma sistemi yenidən qurulmuş, sıradan çıxmış lampalar yeniləri ilə əvəz olunmuş, işıq dirəkləri, o cümlədən skamyalar, tullantı qabları təmir olunaraq rənglənmişdir. Bununla yanaşı Şəmkir Şəhər Mərkəzi Parkında əvvəllər mövcud olmuş velosiped yolu bərpa edilərək asfalt örtüyü salınmış, müvafiq xətlər çəkilmişdir. İlk dəfə olaraq parkda kiçik yaşlı sakinlərin əyləncəsi üçün uşaq oyun meydançası, eyni zamanda digər yaş qruplarından olanların sağlam həyat tərzinin təmin olunması üçün açıq idman meydançası yaradılıb, idman qurğuları quraşdırılıb. Mətbuatda getmiş məlumatlarda attraksionlar və uşaq əyləncə alətləri haqqında heç bir məlumat yoxdur. Bildiyimiz kimi bir neçə ildir ki, onlar fəaliyyətini dayandırıb. Müəyyən açıqlamalarda oxuyuruq ki, onlar özəlləşdirilib və özəlləşdirən şəxsin qərarı əsasında fəaliyyətini bərpa edə bilər. İndi sual doğurur dövlətin parkının attraksionlarının satılmasına səbəb nə olub ?  Azərbaycanın ən böyük rayonlarından birinin Mərkəzi Parkında uşaqların istirahəti   hansı səbəbdən bir şəxsin keyfinə, istəklərinə həvalə edilib ?   Parkadakı attraksionları, uşaq əyləncə alətlərini alan adı açıqlanmayan x şəxs kimdir? Həmin şəxsin Şəmkir rayonu kimi böyük bir rayonun Mərkəzi Parkını bu vəziyyətə salmasında məqsədi nədir? Ceyhun Nəbi, "Sozcu.az"saytının redaktoru 

ABŞ prezidenti Donald Tramp Rusiya hakimiyyətinə qarşı səbrini itirir, çünki Ukrayna müharibəsinin dayandırılması ilə bağlı danışıqların ləngiməsi onu narahat edir. Sozcu.az xəbər verir ki,bu barədə ABŞ-ın dövlət katibi Marko Rubio Fox News telekanalında çıxışı zamanı bildirib. Dövlət katibi qeyd edib ki, Tramp sülh razılaşmasına nail olmaq və nəhayət Rusiyanın Ukraynaya qarşı müharibəsini bitirmək istəyir. Lakin Rubionun sözlərinə görə, hazırda ABŞ prezidenti getdikcə daha da əsəbiləşir, çünki Vladimir Putinlə aparılan müsbət telefon danışıqları real nəticə vermir. “O, səbrini və Rusiya tərəfinin hər hansı addım atmasını gözləmə əzmini itirir”, – deyə Rubio vurğulayıb.

Ukrayna müharibənin 1250-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 049 250 hərbçi, 11 057 ədəd tank, 23 063 ədəd zirehli döyüş maşını, 30 822 ədəd artilleriya sistemi, 1 449 ədəd RYAS (reaktiv yaylım atəş sistemi), 1 201 hava hücumundan müdafiə sistemi, 421 ədəd hərbi təyyarə, 340 ədəd helikopter, 56 493 ədəd avtomobil texnikası, 48 158 ədəd PUA, 3 546 qanadlı raket, 28 gəmi/kater, 1 sualtı qayıq, 3 935 xüsusi avadanlıq itirib.

İranda ölüm cəzasına məhkum edilən siyasi fəallar – Mehdi Həsəni və Bəhruz Ehsani İslamlu edam ediliblər. Sozcu.az xəbər verir ki, bu barədə İran mətbuatı məlumat yayıb. Məlumata görə, onlar bu gün səhər İran Ali Məhkəməsində cinayət işi üzrə tam mühakimə və hökmün təsdiqindən sonra asılıblar.