Müğənni Manaf Ağayevin oğlu həbs edilib. Müşviq Ağayev idarəetməsində olan retro avtomobillə Bayraq Meydanının yaxınlığında yol patrul xidmətinin əməkdaşları tərəfindən saxlanılıb. Ona Səbail Rayon Dövlət Yol Polis Şöbəsinin əməkdaşları sərxoş halda sükan arxasına əyləşmənəyi tövsiyyə edib. Lakin Müşviq yol polis əməkdaşlarına müqavimət göstərib. Daha sonra post patrul xidmətinin əməkdaşları hadisə yerinə gəlib. Onlar Müşviq Ağayevi polis bölməsinə aparıb. Məlum olub ki, Müşviq Ağayev ağır dərəcəli sərxoşdur. Onun barəsində 5 sutkalıq həbs-qətimkan tədbiri seçilib.

“Qəbul qaydalarında müəyyən dəyişiklik edilməsinə ehiyac var”.  Bunu bu gün elm və təhsil naziri Emin Əmrullayev Milli Məclisdə “Ali təhsil haqqında” qanun layihəsi ilə bağlı birgə ictimai dinləmədə çıxışı zamanı deyib.  E.Əmrulayev bildirib ki, hazırda qəbul sistemi şaquli qəbul sistemidir. “Mahiyyət etibarı ilə abituriyent ixtisasları ardıcıl olaraq seçir. Son illərdə tarixçilər hüquqşünas ixtisasına qəbul ola bilməyənlərdir”, - deyə nazir qeyd edib.  O bildirib ki, bu gün abituriyentlər ixtisas seçimini bazara görə yox, özündən əvvəlki abituriyentin seçiminə görə edir: “Qəbul bu gün hələ də statistik ölçmələrlə aparılmır”, - deyə nazir əlavə edib. Məsələ ilə bağlı Yenisabah.az-a danışan təhsil eksperti Məzahir Məmmədli E.Əmrullayevin bu açıqlamasını yüksək qiymətləndirib: “Biz bu fikirlə əlaqədar olaraq daim media qurumlarında öz istəyimizi dilə gətirmişik. Təəsüflər olsun ki, bu cəhdimizin heç bir nəticəsi olmayıb. Qəbulla bağlı hazırki sistem birmənalı olaraq dəyişilməlidir. İlk növbədə nazirin özünün də qeyd etdiyi kimi bu günün tarixçiləri dünən hüquqa qəbul ola bilməyənlərdir. Dünyanın heç bir ölkəsində qruplar üzrə ixtisas seçimi olmur. Xaricdə abitiriyent ixtisas seçməkdə azaddır. Özün harada görmək istəyirsə, oranı da seçir. Mən dəfələrlə qeyd etmişəm ki, Dövlət İmtahan Mərkəzi (DİM) abituriyentlərin test bankın hazırlaya bilməz. Çünki bu qurum həm test bankı, həm də onu həyata keçirən icraçı orqan rolunu oynayır. Yaxşı olardı ki, DİM-in əlindən publik hüququ şəxs olmaq hüququ alınsın və sadəcə qurum olaraq fəaliyyət göstərsin. Bu gün DİM publik hüququ şəxs olduğu üçün onu ancaq qazanc maraqlandırır. Qazancın digər yolunu da dərsliklərdən kənar əlavə oxu materialları dərc etdirməkdə görürlər. Ən pis tərəfi də odur ki, imtahanda da sualları həmin əlavə vəsaitdən salır. Hal belə olduqda da uğur göstəricilərinin sayı aşağı düşür. Mənim zənnimcə, dəyişiklik ediləcəksə, ilk növbədə DİM ya ümumiyyətlə ləğv olunmalıdır,. ya da onun səlahiyyətlərinin bir hissə əlindən alınmalıdır. Test bankı fəaliyyəti onun əlindən alınmalı və bu işlə ayrıca bir inistitut məşğul olmalıdır. Bu gün yaranmış bu çətin vəziyyətin başlıca səbəbkarı xüsus kurslar təşkil etmiş insanlardır. Mən bunu çəkinmədən dedim, deyəcəm də. DİM-ə qəbul sualların həmin kurslar hazırlayır. Dövlət İmtahan Mərkəzi də öz növbəsində həmin testlərdə şagirdlərin ilişə biləcəyi bir nöqtə qoyur ki onlar kurslara üz tutsun kursun gəlir mənbəyi artsın. Repetitorların fəaliyyəti bu gün imkan vermir ki DİM-in test bankı sağlam şəkildə fəaliyyət göstərsin”. 

Hərbi xidmətə çağırışla bağlı rüşvət alan vəzifəli şəxslər cinayət başında yaxalanıb. Baş Prokurorluğun Mətbuat xidmətindən verilən məlumata görə, Baş prokuror yanında Korrupsiyaya qarşı Mübarizə Baş İdarəsi tərəfindən həyata keçirilmiş əməliyyat-axtarış tədbirləri ilə Səfərbərlik və Hərbi Xidmətə Çağırış üzrə Dövlət Xidmətinin Sabunçu Rayon İdarəsinin vəzifəli şəxsləri vətəndaşlardan rüşvət alarkən cinayət başında yaxalanıb. Qeyd olunan qurumun rəis müavini - Səfərbərlik şöbəsinin rəisi Adil Hüseynovun saxta tibbi rəy əsasında hərbi xidmətə yararsızlıq müddətinin 3 il müddətinə uzadılması, həmin idarənin Sabunçu Rayon İdarəsinin Həqiqi hərbi xidmətə çağırış şöbəsinin rəisi Toğrul İsgəndərovun isə həqiqi hərbi xidmətə cəlb olunmama müqabilində rüşvət almasına əsaslı şübhələr müəyyən edilib. Həmin vəzifəli şəxslərin üzərində və xidməti otaqlarında axtarış aparılan zaman iş üzrə əhəmiyyət kəsb edən sübutlar aşkar edilərək götürülüb. Baş İdarədə başlanmış cinayət işi üzrə Adil Hüseynov və Toğrul İsgəndərov Cinayət Məcəlləsinin 311.3.2 və 311.3.3-cü (təkrar və külli miqdarda rüşvət alma) maddələri ilə təqsirləndirilən şəxs qismində cəlb olunaraq barələrində məhkəmə qərarı əsasında həbs qətimkan tədbiri seçilib. Hazırda istintaq-əməliyyat tədbirləri davam etdirilir.

"Azərbaycanda "Kristal Abşeron" və digər şirkətlər tərəfindən tikilən binaların 80 faizi bir-birinə çox yaxın inşa edilir. Normativ və standartlara əməl olunmur". Bu fikirləri Demokrat.az-a açıqlamasında tikinti məsələləri üzrə ekspert Nüsrət İbrahimov deyib. Ekspert bildirib ki, hər bir bina inşa olunarkən, tikinti standartlarına əməl olunmalıdır: "Normativ və standartlar var, orada da binaların ara məsafəsi göstərilir. Lakin yeni tikilən əksər binalarda ara məsafəsi gözlənilmir. İnsanların azad toplanması üçün yerlər olmalıdır. Deyək ki, bu gün forsmajor hadisəsi, zəlzələ oldu, həmin binadan qaçıb çölə yığışmağa təhlükəsiz boş yer olmalıdır. Yoxsa hər tərəf binadırsa, əlbəttə ki, bu risklidir, çünki uçan bina onların üstünə uçacaq. Çox təəssüflər olsun ki, son illərə qədər tikilən binalarda bu normativlər gözlənilməyib. "Kristal Abşeron" şirkəti tərəfindən Xırdalan ərazisində inşa olunan binaların təhlükəsizliyi məsələsinə də toxunan Nüsrət İbrahimov qeyd edib ki, Xırdalanda tikilən binalar Bakıdan da təhlükəli vəziyyətdədir. Ekspert "Kristal Abşeron" şirkəti tərəfindən metronun "Azadlıq prospekti" stansiyasının üzərində hündürmərtəbəli yaşayış binalarının tikilməsinə də münasibət bildirib: "Hündürmərtəbəli binaların metro üzərində və ətrafında tikilməsi yolverilməzdir. Təəssüf ki, ölkəmizdə metro tunelləri ətrafında və üzərində bina tikən şirkətlər var. Bu, qanunsuzdur. Belə binalar çox risklidir. Metro üzərində yalnız kiçik iaşə obyektləri ola bilər".

Bakı Dövlət Universitetinin rektoru Elçin Babayevin Milli Məclisdə “Ali təhsil haqqında” qanun layihəsi ilə bağlı keçirilən ictimai dinləmədə çıxışı müzakirələrə səbəb olub. Rektorun "reytinqlərdə geri qalmağımızın səbəbi tək bizim inkişafımızın zəifliyi ilə yox, digərlərinin çox sürətli inkişafı ilə bağlıdır" deməsi birmənalı qarşılanmayıb. Təhsil eksperti Nabatəli Qulamoğlu da Pravda.az-a açıqlamasında Elçin Babayevin fikirlərini tənqid edib. “Hər yolla istəyirlər ki, gerçəkləri, həqiqətləri gizlətsinlər. Başqası sürətlə inkişaf edirsə, lap elə olsun. Sən ona çatmamısansa, deməli, geri qalmısan. Bu, nə deməkdir? Əslində, təhsilimizin geri qalması, dövlət universitetlərinin dünya reytinq cədvəllərində aşağı yer tutması müxtəlif səbəblərlə bağlıdır. Səbəblərdən ən başlıcası budur ki, Azərbaycan hökuməti təhsilə “Lenin burjuaziyaya baxan kimi” baxır. Təhsilə ayırdığı maliyyə kifayət etmir, təhsilə lazımlı kadrlar gətirmir, korrupsiya baş alıb gedir. Korrupsiya olan yerdə inkişaf ola bilməz. Bu, birmənalıdır. Elçin Babayev orda bir söz deyib, guya hardasa hansısa hakimiyyət nümayəndəsinin xoşuna gəlsin ki, “bu kişi qanadlı bir söz dedi”. Əslində o, qanad deyil, qanad bağlamaqdır - olmayan bir şeyə yalandan qanad bağlamaq. Qəti şəkildə belə bir fikri inkar edirəm. Lap sürətlə inkişaf edirlər, sən də inkişaf elə. Niyə inkişaf etmirsən? İndi biz nə edək? Gedək inkişaf etmiş ölkələri qoyaq, öküzlə yer şumlayan zamanla ayaqlaşaq? Həmin zamanı götürək? Yadıma gəlir, vaxt var idi, müəllim çatmırdı, dördüncü sinfi bitirmiş uşaqları məktəbdə müəllim qoyurdular, hesab dərsi keçirdi. Həmin zamanla müqayisə edək? Məsələn, Xəzər Universiteti qismən müstəqildir, çalışırlar, təbii ki, maliyyələri çoxdur, məmurlar tərəfindən həddindən çox güclü maliyyələşir. Xəzər Universitetini çıxmaqla Azərbaycandakı bütün universitetlər, demək olar, bu vəziyyətdədir. Reytinq cədvəllərində Azərbaycan universitetlərinin yer tutmamasının səbəbi lazımi təhsil resurslarının, kadrlarının, təhsilə marağın olmamasıdır”. N.Qulamoğlu Elçin Babayevin “sürəli inkişaf” deyərkən Qazaxıstan kimi ölkələri misal gətirməsinə isə belə cavab verib: “Guya Qazaxıstan sürətli inkişaf edib? Tamamilə yanlış fikirdir. Qazaxıstanla əlaqəm var. Onlarda da elə bir inkişaf yoxdur. Bizdən bir o qədər də fərqlənmirlər. Yeganə fərq budur ki, bizə nisbətən təhsilə babat pul qoyurlar. Pul ayırmadınsa, heç bir sahə inkişaf etmir, bu, təbiidir”.

Paytaxtın müxtəlif ərazilərində ucuz qiymətə kolbasa satışı həyata keçirilir. Maraqlıdır ki, görəsən, bu kolbasaları marketdə satılan kolbasalardan nə fərqləndirir ki, bu qədər ucuz qiymətə satılır? Onların donuz dərisindən hazırlandığı iddiaları doğrudurmu? Məsələ ilə bağlı “Yeni Sabah”a Azad İstehlakçılar Birliyinin sədri Eyyub Hüseynov açıqlamasında deyib ki, sözügedən kolbasaların tərkibi haqqında dəqiq məlumat yoxdur: “Azad İstehlakçılar Birliyi birmənalı şəkildə istehlakçıların ucuz və keyfiyyətli mal almağının tərəfdarıdır. Biz qətiyyən qiymətlərin yuxarı olmasının tərəfdarı deyilik, lakin görürük ki, ölkənin ət məhsulları sektorunda böyük hərc-mərclik var və təəssüflər olsun ki, ölkədə normal, standartlara uyğun kolbasa istehsal edən şirkətlər öz bazarlarını qorumaq üçün heç bir iş görmürlər. Təxminən 3 muşketyor qalmışıq, birimiz hamımız, hamımız birimiz üçün. Baxmayaraq ki, onları birləşdirən bir assosiasiya var, həmin assosiasiya heç bir iş görmür ki, bazar təmizlənsin və o cür qiyməti şübhə doğuran hətta təhlükəli kolbasa və sosiskalar hər yerdə satılır. Belə məhsullara metro çıxışlarında, 8-ci kilometr bazarında rast gəlmək mümkündür. Bütün bu işlərin qarşısını almaqda məsuliyyət daşın Qida Təhlükəsizliyi Agentliyi çox təəssüflər olsun ki, jurnalistlərin əməyini heçə sayır. Jurnalistlər bütün gün belə məhsulları satanları axtarır, tapır, efirə verir, yazırlar, lakin Qida Təhlükəsizliyi Agentliyi onları kifayət qədər təqib etmir. Hələ ki, biz KİV-lərlə Qida Təhlükəsizliyi Agentinin birgə işlərini görmürük. Nə qədər ki, dövlət qurumları KİV-lərin əməyini qiymətləndirə bilmir, onlarla sinxron işləyə bilmir, ictimai nəzarətlə bağlı çağırışlar müsbət nəticə verməyəcək. Çünki hər şey KİV-lər üzərindən gedir. Baxın, bu gün siz bu mövzu barədə yazırsınız, görək Qida Təhlükəsizliyi Agentliyi buna reaksiya verəcəkmi? Böyük ehtimalla, yox. Mən bu mövzunu hətta agentliyin özündə də qaldırmışam, amma qeyri-səmimi şəkildə cavablayıblar ki, təqib edirik. Əslində isə təqib olunmur”. Ekspert təsdiqləyib ki, ayaq altında satılan bu cür kolbasa məhsulları süni ətdən və donuz dərisindən hazırlanır: “Bəli, bu gün satışda belə mallar var və birmənalı şəkildə təhlükəlidir. Sovet zamanı kolbasa istehsalçıları arasında belə bir söz vardı: Kolbasa nədir? Sudur, duzdur, bir az da vicdan. Vicdan sözü əti göstərirdi, yəni vicdanın nə qədərdirsə, əti də o qədər qoyarsan. Bu gün kolbasa məmulatlarını nədən gəldi - süni ətdən, dəridən hazırlayırlar. Ucuz nə varsa, onu məhsulun içinə qatırlar. Heç şübhəsiz ki, 26 ildir Azad İstehlakçılar Birliyi ölkədəki murdar ət biznesini ifşa etmək istəyir və bu sahədə ən uğurlu işi Daxili İşlər Nazirliyi Baş Mütəşəkkil Cinayətkarlıqla Mübarizə İdarəsi görür. Onlar həmin məsələ ilə bağlı cinayət işi qaldırır, məsuliyyət daşıyanları həbs edir. Lakin digər dövlət orqanları adətən ifşa edir, cərimə qoyur və buraxır. 26 ildir ki, biz bunu ifşa edib qurtara bilmirik. Şübhəsiz ki, murdar olmuş heyvan ətləri bu cür kolbasa istehsalında istifadə olunur. İstisna olunmur ki, qonşu ölkələrdən də bu cür kolbasalar ölkəmizə keçirilir. Bu kolbasa məmulatları adətən etiketsiz olur, ayaq altda satılır və qırmızı olur, insanları cəlb edir, guya hisə verilmiş kolbasadır. Lakin bu məmulatlar insanların həyatında mənfi izlər qoyur. Biz hələ görməmişik ki, Qida Təhlükəsizliyi Agentliyi bunu kökünə qədər ifşa etsin və ictimai şəkildə həmin məhsullar məhv edilsin. Bu, problem olaraq qalır. Əhalini belə mallar almaqdan imtina etməyə çağırıram, biz bunu boykot etməliyik. Yerli kolbasa istehsalçıları da öz bazarlarını təmizləməlidir. Əhalidə belə bir fikir var ki, xaricdən gələn kolbasalar daha keyfiyyətlidir, amma bu belə deyil, onlar daha çox kimyəviləşdiriliblər. Nəzərə almaq lazımdır ki, yerli, təmiz mal ətindən, standartlara uyğun şəkildə hazırlanan kolbasalar da var. Təəssüf edirəm ki, mağazalarda 70 faiz xarici ət və kolbasa məhsullarına yer verilir. Bu da istehlakçıların seçim hüququnda problem yaradır. Düşünürəm ki, marketlərdə hamı üzünü yerli mallara çevirməlidir, necə ki, vaxtilə bir nəfər deyirdi ki, hamı yerli mal alsın, xeyir vətənə qalsın, belə yanaşmalıyıq”.

Ukraynanın AB və NATO-ya üzvlüyü xeyriyyə kimi qəbul edilməməlidir. Çünki bu, Avropanın öz maraqlarına da cavab verir. Sozcu.az xəbər verir ki, bunu Ukrayna xarici işlər naziri Dmitri Kuleba deyib. “Ukraynanın bu təşkilatlara qəbulu Avropa ictimaiyyətinin özü üçün də praqmatik maraq kəsb edir. Ukraynanın AB və NATO-ya üzvlüyü uzunmüddətli sülh və sabitliyin təminatı olacaq”, - o bildirib.

18:14 Fövqəladə Hallar Nazirliyinin (FHN) “112” qaynar telefon xəttinə Qəbələ rayonunun Vəndam qəsəbəsi yaxınlığında meşəlik ərazidə yanğın baş verməsi barədə məlumat daxil olub. Dərhal əraziyə FHN-in Dövlət Yanğından Mühafizə Xidməti Qəbələ Rayon Yanğından Mühafizə Hissəsinin qüvvələri cəlb olunub. FHN-dən Sozcu.az-a verilən məlumata görə, yanğınsöndürənlərin səyi nəticəsində yanğın geniş əraziyə yayılmasına imkan verilmədən qısa müddətdə məhdudlaşdırılıb. Hazırda yanğının tam söndürülməsi istiqamətində zəruri və təxirəsalınmaz tədbirlər davam etdirilir. Yanğınla mübarizə tədbirlərinə FHN-in Dövlət Yanğından Mühafizə Xidməti Qəbələ Rayon Yanğından Mühafizə Hissəsinin qüvvələri və Ekologiya və Təbii Sərvətlər Nazirliyi Meşə Təsərrüfatı Mərkəzinin əməkdaşları cəlb olunub. *** Fövqəladə Hallar Nazirliyi Dövlət Yanğından Mühafizə Xidməti tərəfindən görülmüş zəruri və təxirəsalınmaz tədbirlər sayəsində Qəbələ rayonunun Vəndam qəsəbəsi yaxınlığında meşəlik ərazidə baş vermiş yanğın geniş sahəyə yayılmasına imkan verilmədən qısa müddətdə söndürülüb. Bu barədə Fövqəladə Hallar Nazirliyinin (FHN) Mətbuat Xidmətindən məlumat verilib. Yanğın nəticəsində 2 hektar sahədə qurumuş ağaclar, kötük, kol-kos və xəzəl yanıb. Sıx meşəlik ərazi yanğından mühafizə olunub. Yanğınla mübarizə tədbirlərində FHN-in Dövlət Yanğından Mühafizə Xidməti Qəbələ Rayon Yanğından Mühafizə Hissəsinin qüvvələri və Ekologiya və Təbii Sərvətlər Nazirliyi Meşə Təsərrüfatı Mərkəzinin əməkdaşları iştirak edib.

Azərbaycan Respublikası Prezidentinin Administrasiyası Qarabağın erməni ictimaiyyətinin nümayəndələrini reinteqrasiya ilə bağlı təmasların davam etdirilməsi, habelə Qarabağda infrastruktur layihələrinin reallaşdırılması məsələlərinin müzakirəsi üçün ikinci görüşə dəvət edir. Bu barədə Sozcu.az-a Azərbaycan Respublikası Prezidentinin Administrasiyasından məlumat verilib. Görüşün yaxın günlərdə Bakı şəhərində keçirilməsi təklif olunur.

Abşeronda fəhlənin iş yerində ölməsi faktı ilə bağlı cinayət işi başlanılıb. Bu barədə Sozcu.az-a rayon prokurorluğundan məlumat verilib. Bildirilib ki, martın 11-i saat 03 radələrində Abşeron rayonu ərazisində yerləşən kərpic zavodlarının birində fəhlə işləyən 1995-ci il təvəllüdlü Elşən Babayevin iş yerində ölməsi barədə rayon prokurorluğuna məlumat daxil olub. Araşdırmalarla Elşən Babayevin zavodda quraşdırılmış dəzgaha yıxılması nəticəsində almış olduğu xəsarətlərdən ölməsinə əsaslı şübhələr müəyyən edilib. Faktla bağlı rayon prokurorluğunda Cinayət Məcəlləsinin 162.2-ci (əmək mühafizəsi qaydalarını pozma ehtiyatsızlıqdan insan ölümünə səbəb olduqda) maddəsilə cinayət işi başlanıb. İş üzrə istintaq davam etdirilir. Bizim Telegram kanalımıza abu

Mərkəzi əyalətin Ərak şəhərində yaşayan ictimai fəal və müəllim Məhəmməd Sadiqi təhlükəsizlik məmurları tərəfindən həbs edilib. Bu barədə Müəllimlərin Həmkarlar İttifaqı Koordinasiya Şurası məlumat yayıb. Məlumatda azərbaycanlı müəllimin şagirdlərin zəhərlənməsi ilə bağlı maryın 7-də keçirilən etiraz aksiyasına qoşulduğu üçün saxlanıldığı bildirilib.

Ali təhsil müəssisələrinə akademik muxtariyyətin verilməsi doğru olardı. Sozcu.az xəbər verir ki, bunu elm və təhsil naziri Emin Əmrullayev "Ali təhsil haqqında" qanun layihəsi ilə bağlı keçirilən ictimai dinləmədə deyib. Nazir qeyd edib ki, lakin bundan əvvəl akademik muxtariyyətin nə olduğu qanunda vahid bir tarif şəklində öz əksini tapmalıdır: “Qanun elə çevik formada yazılmalıdır ki, hökumətə və digər qurumlara daha səmərəli işləməyə imkan versin. Bəzən hansısa ölkə ilə saziş imzalamaq istəyirik, lakin qanunvericiliklə bunu tənzimləmək olmur. Ona görə Milli Məclisə gəlmək məcburiyyətində qalırıq. Azərbaycan-Türkiyə Universitetinin yaradılmasının ləngiməsi də qanunvericilikdə problemin olmasıdır”.

Cəlilabadda vətəndaşlara at əti satılması müəyyən olunub.  AQTA və Cəlilabad rayon Polis Şöbəsi əməkdaşları rayon ərazisində birgə əməliyyat keçirib. Əməliyyat tədbirləri nəticəsində Cəlilabad rayon Maşlıq kənd sakini Abbasov Səbuhi Tərlan oğluna məxsus həyətyanı təsərrüfatına baxış keçirilən zaman, tövlədə ümumi çəkisi təqribən 200 kq olan bir baş kəsilmiş at cəmdəyi, bir baş ata məxsus sümüklər və 9 baş diri at aşkarlanıb. Bundan əlavə həyətdə olan ata qoşulmuş arabada 6 baş kəsilmiş atın sümükləri ayaqları və baş nahiyəsi müəyyən edilib. Həyətin digər hissəsində olan tövlədə isə 6 diri at aşkarlanıb. Faktla bağlı araşdırma aparılır.

Bakıda vətəndaşların bank hesablarından 16 min manatdan çox pul oğurlanıb. Bu barədə Daxili İşlər Nazirliyinin (DİN) Mətbuat Xidmətindən məlumat verilib. Bildirilib ki, paytaxtda ayrı-ayrı vətəndaşlara məxsus bank hesablarından kütləvi talama əməlləri həyata keçirən şübhəli şəxs müəyyən olunub. Bakı Şəhər Baş Polis İdarəsi əməkdaşlarının keçirdikləri əməliyyat tədbirləri nəticəsində 8 nəfərin bank hesablarından ümumilikdə 16 702 manat pul vəsaitlərini oğurlamaqda şübhəli bilinən Bakı şəhər sakini Nicat Rzazadə saxlanılıb. Araşdırma aparılır.

Prezident İlham Əliyev Roma Papası Fransisk Həzrətlərinə məktub ünvanlayıb. Sozcu.az məktubun mətnini təqdim edir: Zati-müqəddəsləri, Tacqoyma Gününüz münasibətilə Sizi və Sizin simanızda bütün həmməzhəblərinizi şəxsən öz adımdan və Azərbaycan xalqı adından ürəkdən təbrik edir, ən səmimi və xoş arzularımı çatdırıram. Azərbaycan ilə Müqəddəs Taxt-Tac arasında münasibətlərin hazırkı səviyyəsi məmnunluq doğurur. Biz sivilizasiyalararası və dinlərarası dialoqun, multikulturalizm dəyərlərinin qorunub saxlanması və daim inkişaf etdirilməsi yolunda uzun illərdən bəri davam edən fəal və səmərəli əməkdaşlığımıza xüsusi əhəmiyyət veririk. Ölkəmizin Müqəddəs Taxt-Tacda səfirliyinin təsis edilməsi münasibətlərimizin keyfiyyətcə yeni mərhələyə yüksəlməsinin göstəricisi və Azərbaycan-Müqəddəs Taxt-Tac əlaqələrinin inkişafına verdiyimiz önəmin bariz təzahürüdür. Multikulturalizm və tolerantlıq xalqımızın həyat və yaşam tərzini özündə əks etdirən mühüm dəyərlər olmaqla yanaşı Azərbaycanın dövlət siyasətinin əsas prioritetlərindəndir. Əsrlər boyu müxtəlif din və etiqadlara mənsub insanların mehribanlıq və qarşılıqlı hörmət şəraitində yaşadığı ölkəmizdə məscidlərin, sinaqoqların və kilsələrin yanaşı fəaliyyət göstərməsi bizim böyük tarixi nailiyyətimizdir. Azərbaycandakı katolik dini icmasının daim böyük diqqət və qayğı ilə əhatə olunması bunun əyani göstəricisidir. Ölkəmizin Vatikanın tarixi yerlərinin bərpasında iştirakından məmnunluq duyur və bunun dünya mədəni irsinin, zəngin incəsənət xəzinəsinin qorunub saxlanmasına və gələcək nəsillərə ötürülməsinə, eləcə də mədəniyyətlərarası dialoqa töhfə verəcəyinə inamımı ifadə edirəm. Zati-müqəddəsləri, mən Sizin Azərbaycan və Müqəddəs Taxt-Tac arasında əlaqələrin inkişaf etdirilməsində və möhkəmləndirilməsində, səmimi dialoqumuzun genişləndirilməsində xidmətlərinizi xüsusi qeyd etmək istərdim. Azərbaycandakı multikultural mühit və tolerantlıq ənənələrinə daim verdiyiniz yüksək qiymətə görə Sizə təşəkkür edirəm. İnanıram ki, Azərbaycan ilə Müqəddəs Taxt-Tac arasında ümumbəşəri dəyərlərin təşviqi, insanlar arasında qarşılıqlı anlaşma və həmrəyliyin bərqərar olması istiqamətində əməkdaşlıq birgə səylərimizlə bundan sonra da müvəffəqiyyətlə davam edəcəkdir. Belə bir əlamətdar gündə Sizə möhkəm cansağlığı, xoşbəxtlik, xeyirxah və müqəddəs missiyanızda uğurlar diləyirəm.

Suraxanı Rayon Polis İdarəsinin 32-ci Polis Bölməsinin əməkdaşlarının keçirdikləri əməliyyat-axtarış tədbirləri nəticəsində moped oğurluğu ilə məşğul olan paytaxt ərazisində yaşayan Əli Abbasov saxlanılıb. Bu barədə Sozcu.az-a DİN-dən məlumat verilib. Araşdırma zamanı müəyyən edilib ki, Ə.Abbasov Qaraçuxur qəsəbəsində kuryer fəaliyyəti ilə məşğul olan şəxslərin istifadəsində olan mopedləri sutkanın qaranlıq saatlarında oğurlayaraq müxtəlif ünvanlara pul müqabilində satıb. Onun Bakı şəhərinin digər ərazilərində də analoji cinayətlər törətmələri istisna edilmir. Ə.Abbasov barəsində 32-ci Polis Bölməsində toplanmış materiallar Suraxanı Rayon Polis İdarəsinin İstintaq Şöbəsinə göndərilib araşdırmalar davam etdirilir.

Səhiyyə Nazirliyinə yeni səlahiyyət verilib. Nazirlər Kabineti bununla bağlı “Təbii fəlakət, qəza və digər fövqəladə vəziyyətlər zamanı qanın, qan komponentlərinin donorluğunun təşkili Qaydası”nda dəyişiklik edib İndiyə qədər təbii fəlakət, qəza və digər fövqəladə hallar baş verdikdə və bu zaman qana və qan komponentlərinə kəskin ehtiyac yarandıqda, İcbari Tibbi Sığorta üzrə Dövlət Agentliyi Fövqəladə Hallar Nazirliyi və yerli icra hakimiyyəti orqanları ilə birlikdə kütləvi qan donorluğunu təşkil edib. Dəyişikliyə əsasən, İcbari Tibbi Sığorta üzrə Dövlət Agentliyinin bu sahədə səlahiyyəti Səhiyyə Nazirliyinə həvalə edilib.

“Azərsu” ASC tərəfindən həyata keçirilən içməli su təchizatı və tullantı sularının axıdılması xidmətlərinin tariflərinin artırılması ilə bağlı Tarif (qiymət) Şurasına müraciət edilməyib və belə bir müraciət nəzərdə tutulmur. Sozcu.az xəbər verir ki, bu barədə qurumun İctimaiyyətlə əlaqələr şöbəsi məlumat yayıb. Hazırda içməli su təchizatı və tullantı sularının axıdılması xidmətlərinin tarifləri Azərbaycan Respublikası Tarif (qiymət) Şurasının 30 yanvar 2021-ci il tarixli 5 nömrəli qərarı ilə tənzimlənir.

Bu gün Rumıniyanın paytaxtı Buxarestdə güləş üzrə U-23 Avropa çempionatı start götürəcək. Sozcu.az xəbər verir ki, yarışın ilk günündə Azərbaycanın beş yunan-Roma güləşçisi mübarizəyə başlayacaq. Rahim Həsənov (55 kq) 1/4 final mərhələsində Karapet Manvelyan (Ermənistan) / Sabolç Losonç (Serbiya) cütünün qalibi ilə üz-üzə gələcək. Ziya Babaşov (63 kq) təsnifatda Sahak Hovannisyanın (Ermənistan) müqavimətini qırmağa çalışacaq. Xasay Həsənli (77 kq) təsnifatda Şahan Acarla (Türkiyə), Məhəmməd Əhmədiyev (87 kq) eyni raundda Açika Bolkvadze (Gürcüstan) ilə, nəhayət, Sərxan Məmmədov (130 kq) Mixaylo Vişnivetski (Ukrayna) ilə görüşəcək. Qeyd edək ki, Avropa çempionatı martın 19-da başa çatacaq.

"Google Translate"in masaüstü veb-səhifəsinə şəkillərin tərcüməsi funksiyası əlavə edilib. Sozcu.az oxu.az-a istinadən xəbər verir ki, daha əvvəl mobil versiyada mövcud olan şəkillərin tərcüməsi funksiyası, nəhayət, masaüstü kompüterlərdə də tətbiq edilib. Əslində "Google Lens" uzun müddətdir fotoları tərcümə edir. Lakin bu funksiya yalnız hansısa sayta yüklənmiş fotoşəkillər üçün mövcud idi, kompüterdə olan fotonun tərcüməsi mümkün deyildi. "Translate.google.com" bu problemi həll edib və yüklənən fotolardakı mətnlərin tərcüməsini mümkün edib. "Google Translate" səhifəsini açdığınız zaman yuxarıdakı "Text"in yanında "İmage" seçimini görəcəksiniz. "İmage"ə keçdiyiniz zaman sizdən kompüterinizdən bir şəkil yükləməyiniz istəniləcək. "Tut-burax" seçimi olmadığı üçün şəkli kompüterinizdən bu formada yükləyə bilərsiniz. Şəkli yüklədiyiniz zaman mətni tərcümə etmək istədiyiniz dili seçin. "Google" avtomatik olaraq şəkildəki mətni aşkar edib tərcümə edəcək. Əgər yuxarı sol tərəfdəki "Orijinalı göstər"i seçsəniz, fotonun həm orijinalını, həm də tərcümə edilmiş versiyasını eyni zamanda görə bilərsiniz. "Google" burada sizə iki seçim təklif edir. Siz mətni kopiyalaya və ya tərcümə edilmiş şəkli yükləyə bilərsiniz. Bununla belə internet üzərindən etdiyiniz bu tərcümədə mətnin səsli versiyasını dinləmək mümkün deyil. 

Amerikalı Brendan Freyzer "Balina" (The Whale, 2022) filmindəki roluna görə "Ən yaxşı aktyor" nominasiyasında "Oskar" mükafatını qazandı. Sozcu.az Trend-ə istinadən xəbər verir ki, bu barədə 95-ci Amerika Kino Sənətləri və Elmləri Akademiyasının mükafatlandırma mərasimində bildirilib. O, əvvəllər bu rola görə ABŞ-ın Kino Aktyorları Gildiyası Mükafatını (Screen Actors Guild Award, SAG) qazanıb.

Miqren - hamımızın bildiyi paroksismal baş ağrısıdır. Lakin bu xəstəliyin başqa bir forması da var. Sozcu.az "Medicina"-ya istinadən xəbər verir ki, Ggöz miqreni və ya atrial skotoma adlanan xəstəlik miqrenin digər formasıdır. Bu xəstəlik zamanı insanın görmə sahəsinin müxtəlif yerlərində müvəqqəti olaraq təsvir itir və titrəmə effekti yaranır. Bu xəstəliyə daha çox 30 yaşdan yuxarı qadınlarda rast gəlinir. Bu, görmə funksiyasının kəskin pozulması kimi baş verir. Bu zaman görmə sahəsində "kor nöqtələr" görünür, işıq parıltıları ilə əhatə olunur. Göz miqrenində görmə sistemində aşkar qüsurlar olsa da, bu patoloji nevroloji xarakter daşıyır. Onun simptomları beyində yerləşən vizual analizatorun pozulması ilə bağlıdır. Göz miqreninin ümumi simptomları parıldıyan ləkələr, yaxud həmin ləkələr yanıb - sönür və yenidən parlayır. Obyektlərin bulanıq konturları və bulanlıq görmə də göz miqreninin simptomlarıdır. Bu simptomlarla bərabər başqa simptomlar da özünü biruzə verir ; başın bir tərəfində cəmlənmiş silkələyici xarakterli baş ağrısı (belə bir simptom aura ilə migreni xarakterizə edir); • vizual hallüsinasiyalar; • görmə funksiyalarının pozulması; • ürəkbulanma və qusma; • çəpgözlüyün görünüşü; • yuxarı göz qapağının sallanması.

Ali təhsil müəssisələrə qəbul sistemində problem var. Sozcu.az xəbər verir ki, bunu elm və təhsil naziri Emin Əmrullayev "Ali təhsil haqqında" qanun layihəsi ilə bağlı keçirilən ictimai dinləmədə deyib. O bildirib ki, bunlardan əsası ixtisas seçimidir: "Abituriyent bir neçə ixtisası yazır, birinə düşmürsə, o birinə düşür. Nəticədə biologiya, kimya ixtisaslarını istəyirsə, axırda gəlib başqa bir ixtisasa düşür. 95 faiz halda abituriyentlər belə davranır. Mahiyyət etibarilə həkim olmaq istəməyən insanlar həkim olur”.

Rusiya ordusunun Ukraynadakı son itkiləri açıqlanıb. Bu barədə Ukrayna Silahlı Qüvvələrinin Baş Qərargahı məlumat yayıb. Qeyd olunub ki, 2022-ci il fevralın 24-dən indiyədək Rusiya ordusunun 159800 (+710) nəfər canlı qüvvəsi, 3474 (+8) tank, 6774 (+5) ədəd zirehli döyüş maşını, 2503 (+16) ədəd artileriya sistemi, 493 (+0) reaktiv yaylım atəşi sistemi, 259 (+0) hava hücumundan müdafiə sistemi, 304 (+0) təyyarə, 289 (+0) helikopter, 2109 (+1) PUA, 907 (+0) qanadlı raket, 18 (+0) gəmi, 5354 (+6) avtomobil texnikası və avtosistern, 251 (+9) xüsusi texnikası məhv edilib.