Bu gün Türkiyənin “Qalatasaray” klubu ilə “Qarabağ” arasında xeyriyyə matçından öncə maraqlı anlar yaşanıb. Sozcu.az xəbər verir ki, “Qarabağ” klubunun baş məşqçisi Qurban Qurbanov görüşü izləməyə gələn şəhid övladları ilə görüşərək onların əlindən öpüb. Q. Qurbanovun şəhid mayor Elsevər Paşayevin qızları Nəzrin və Banuya xüsusi diqqəti sosial şəbəkələrdə təqdir olunub. Həmin görüntünü təqdim edirik: Foto: Firi Salim

"Mən müharibəni müharibə adlandırıram və Putinin onu uduzacağını deyirəm..." Tanınmış politoloq, hazırda İsraildə yaşayan Abbas Qallyamov Rusiya hakimiyyətinin onu nədə ittiham etdiyini hələlik bilmədiyini bəyan edib. Sozcu.az xəbər verir ki, bu barədə o, özünün "Telegram-kanal"ında yazıb. Xəbər verildiyi kimi, Qallyamov "cinayət maddəsi ilə" (konktret göstərilmir) axtarışda olan qismində məlumatlar bazasına daxil edilib. 2002-2008-ci illərdə Qallyamov Rusiya prezidenti yanında Başqırdıstan nümayəndəsinin müavini vəzifəsində olub.  2008-2010-cu illərdə Rusiya prezidentinin çıxışlarının hazırlanması üzrə Departamentdə işləyib və Rusiyanın o zamankı baş naziri Vladimir Putinin nitqlərini tərtib edib. 2010-2014-cü illərdə Başqırdıstan prezidenti administrasiyasının rəhbəri Rüstəm Xamitovun müavini işləyib. Politoloqun özü jurnalistlərə məlumat verib ki, "cinayət maddəsi" ilə bağlı heç bir bildiriş və ya çağırış vərəqəsi almayıb. O, güman edib ki, cinayət işi Rusiyada dəbdə olan "Rusiysa Federasiyası Silahlı Qüvvələrinin nüfuzdan salınması haqqında" maddəsi ilə açıla bilər. Avqust ayında Abbas Qallyamov ilə KİV-lərdə dərc edilən müsahibəsində o, güman edib ki, Putin elə bir davaya girişib ki, oradan qalib çıxmaq mümkün deyil.

"Həm çeçen hakimi, həm də Kreml rəhbəri törətdikəri bütün cinayətlərə görə məsuliyyətə cəlb edilməlidir..." Ukrayna ərazisində Kadırovu devirmək və Putini məhkəməyə vermək əmrini gözləyən legion formalaşıb Ukraynada xarici legionun tərkibində İçkeriya Respublikasının silahlı qüvvələri fəaliyyətdədir. Sozcu.az xəbər verir ki, bu barədə sürgündə olan hökumətin rəhbəri Əhməd Zakayev "Müharibə xronikası" proqramı üçün jurnalist Tatyana Popovaya müsahibəsində deyib. Zakayevin sözlərinə görə, İçkeriya Respublikası qoşunlarının formalaşdırılması prosesi 26 noyabr 2022-ci ildə, prezident Vladimir Zelenski tərəfindən xarici legionun yaradılması haqqında fərman imzalandıqdan sonra başlanıb. Elə həmin vaxt Zakayev Rusiya təcavüzünə qarşı durmaq üçün çeçenlərə könüllülər sıralarına qoşulmağa çağırış edib. "Bu gün Ukraynada daimi əsaslarla İçkeriya Respublikasının müdafiə nazirliyi fəaliyyətdədir. Mən çox vaxt praktiki olaraq Ukraynada həm ali baş komandan, həm də işğaldan azadetmə dövlət komitəsinin sədri kimi oluram. Biz Ukraynanın bir idarəsi ilə bizim idarə arasında hərbi əməkdaşlıq və qarşılıqlı əlaqə barədə saziş imzalamışıq. Ona görə də bu gün demək olar ki, bu il ərzində biz praktiki olaraq məhz Ukrayna ərazisində İçkeriua Çeçen Respublikası silahlı qüvvələrini bərpa etməyə müvəffəq olmuşuq. Bax, burada yaratdığımız bu legion, bu tabor, prinsipcə, işğaldan azadetmənin və Çeçenistan ərazisində çeçen dövlətçilirinin bərpasının avanqardı olacaq", - o, deyib. Onun fikrincə, həm çeçenlər, həm də Belarus legionu Belarus və Rusiyanın indiki hakim rejimindən azad edilmənin əsas nüvəsi olacaq. "Düşünürəm ki, bu legion Rusiyada və Rusiya siyasətində mövcud reallıqları dəyişməkdə maraqlı olmalıdır. Bu, imperiya siyasətindən, imperializmdən imtina deməkdir. Bu, bu ölkədə yaşayan xalqların müstəmləkədən azad olunması yolu ilə getməsi deməkdir. Mən əminəm ki, bu gün Ukraynada döyüşən və bununla da öz azadlığı və müstəqilliyi uğrunda mübarizə aparmaqda davam edənlər bunu məhz belə anlayır. Bu adamlarda, çeçenlərdə belə anlaşma var. Mən inanıram ki, bu gün burada olan ruslar, belaruslar, Qafqazın digər xalqlarında da bu var", - Zakayey deyib. O, qeyd edib ki, İçkeriya Respublikası hakimiyyəti qarşısına Çeçenistan rəhbəri Ramzan Kadırovun aradan götürülməsi vəzifəsini qoyub. Zakayevin fikrincə, həm çeçen hakimi, həm Kreml rəhbəri məhkəmə qarşısına çıxarılmalı və Rusiyanın ərazisində və onun hüdudlarından kənarda törətdiyi bütün cinayətlərə görə tam məsuliyyət daşımalıdır.

Qərb mətbuatı İranla İsrail arasında məxfi danışıqların başlandığına dair sensasiya xarakterli məlumat yayıb. Danışıqlar Çinin vasitəçiliyi ilə Honkonq şəhərində keçirilir. Görüşün təşəbbüskarı kimi Pekin çıxış etsə də, bu işdə Rusiyanın da maraqları hiss olunur. Çin əvvəlcə İranla Səudiyyə Ərəbistanını barışdırdı, tərəflər arasında danışıqlar Pekində həyata keçirildi. Pekin indi daha ağır işə girişib, iki qatı düşməni barışdırmaq alınmasa da, İsraillə İranı qarşıdurmadan çəkindirmək istəyir. İranın Rusiya və Çinlə sıx əlaqələri mövcuddur. İsrail İran qədər Çin və Rusiya ilə tərəfdaş olmasa da, Moskva və Pekinlə dialoqu mövcuddur. Ona görə də Çin və Rusiya var gücləriylə İsraillə İranı müharibədən çəkindirmək istəyirlər. Bunun başlıca şərti İran nümayəndə heyətini nüvə silahı əldə etməyi düşünmədiklərini barədə İsrailin nümayəndə heyətini inandırmaqdır. Bu alınmasa Çində danışıqlar nəticə verməyəcək.  Bu arada, başqa sual aktuallaşır. İran regional rəqibi Səudiyyə Ərəbistanı ilə barışmaq və qatı düşməni İsraillə müharibədən sovuşmaq istəyərkən qonşusu Azərbaycanı niyə hədələməkdə davam edir? Məntiqlə Tehran eyni ilə Bakı ilə də münasibətlərin normallaşması və mövcud problemlərin həllini sürətləndirmək barədə düşünməməlidirmi?  Əksini müşahidə edirik. Belə çıxır ki, İran rejimi üçün Azərbaycana qarşı təxribatları davam etdirmək daha vacibdir. O ki qaldı, İranın Səudiyyə Ərəbistanı və İsraillə dialoqa başlamasına, hər ikisinin perspektivi dumanlıdır. İranda mövcud olan rejimin istənilən an atacağı təxribatçı addım Tehranın Səudiyyə Ərəbistanı və İsraillə münasibətlərini yenidən gərginlik nöqtəsinə gətirəcək. Digər tərəfdən ABŞ Çinin və ya Rusiyanın vasitəçiliyi ilə İranın Səudiyyə Ərəbistanı və ya İsraillə barışmasının əleyhinədir və bu prosesə müxtəlif vasitələrlə mane olacaq. Elxan Şahinoğlu, politoloq 

"Ukraynaya qarşı təcavüz cinayətlərinə görə bilavasitə Rusiyanın hərbi-siyasi rəhbərliyi cavabdehdir..." Rusiya prezidenti Vladimir Putin eyni zamanda Ukrayna uşaqlarının Rusiyaya deportasiyası və Ukraynaya qarşı təcavüz cinayətlərinə görə məhkum edilə bilər. Sozcu.az xəbər verir ki, bu barədə "FreeDom" telekanalının efirində Rusiyanın Ukraynaya qarşı hərbi cinayətlərinin sübutlarının toplanması ilə məşğul olan vəkil Yuri Belous bəyan edib. "Putinin Ukraynanın işğal edilmiş ərazilərindən uşaqların oğurlanmasına görə məsuliyyətə cəlb edilməsi təcavüz cinayətlərinə görə Ukraynanın təkid etdiyi xüsusi tribunalın yaradılması ideasını əvəz etmir. Rusiya prezidenti həm Ukrayna uşaqlarının deportasiyasına görə, həm də təcavüz cinayətlərinə görə məhkum edilə bilər", - o, deyib.  O, əlavə edib ki, Ukraynaya qarşı təcavüz cinayətlərinə görə bilavasitə Rusiyanın hərbi-siyasi rəhbərliyi cavabdehdir.  Vəkil həmçinin qeyd edib ki, Beynəlxalq Cinayət Məhkəməsi (BCM) və baş prokuror Kərim Xan Rusiya üzrə ayrıca xüsusi tribunalın yaradılmasına qarşı çıxır və onların təsisatları çərçivəsində işləməyi təklif edir.  "Onlar nümayiş etdirir ki, daimi orqan olan Haaqadakı BCM mükəmməl işləməyə qadirdir və belə də işləyir. Ona görə ki, onlar birbaşa prezidentə qarşı qərar çıxarıb", - Belous deyib. Bundan öncə xəbər verilib ki, Ermənistan BCM-in Rusiya prezidenti Vladimir Putinin həbsinə verdiyi orderi dətəkləyib. Ermənistanın Konstitusiya Məhkəməsi BCM-in 17 iyul 1998-ci ildə imzalanmış Roma Nizamnaməsində təsbit edilən öhdəlikləri tanıyıb.  Başqa sözlə desək, Ermənistan hökuməti öz ərazisində prezident Putini və uşaq hüquqları üzrə müvəkkil Mariya Lvova-Belovanı BCM-in həbsinə verdiyi orderlərə uyğun olaraq saxlamalıdır.

Ukrayna hökuməti ordu üçün pilotsuz təyyarələrin alınmasına 541 milyon dollar ayıracaq. Sozcu.az xəbər verir ki, bunu Ukrayna Prezidenti Vladimir Zelenski deyib. Onun sözlərinə görə, bu həftə Ukrayna Nazirlər Kabineti bir neçə vacib qərarlar qəbul edib.

“Rusiya Prezidenti Vladimir Putin uduzduğunu və qorxduğunu etiraf edir”. Bunu Ukrayna Prezident Ofisinin müşaviri Mixaylo Podolyak tviterdə yazıb. O bildirib ki, rəsmi Moskva proqnozlaşdırıla bilən siyasət həyata keçirir. M.Podolyak hesab edir ki, Rusiya lideri Belarusda taktiki nüvə silahının yerləşdirilməsini elan etməklə həm də cinayət törətdiyini boynuna alır: “O, nüvə silahının yayılmaması ilə bağlı müqaviləni pozur”. Xatırladaq ki, V.Putin “Rossiya-24” telekanalına müsahibəsində Belarusda taktiki nüvə silahının yerləşdiriləcəyini açıqlayıb. ABŞ-ın Müharibə Araşdırmaları İnstitutu Rusiya Prezidentinin bu qərarını blef hesab edir./Report

Azərbaycanlı milyarder Fərhad Əhmədovla rusiyalı prodüser İosif Priqojinə aid olduğu iddia edilən telefon danışığının səs yazısı üzə çıxıb. Sozcu.az xəbər verir ki, telefon danışığı zamanı hər iki şəxs Rusiya rəhbərliyi və Prezident Vladimir Putinin addımlarını dəyərləndirərək, onun fəaliyyətini tənqid ediblər. Üstəlik, Fərhad Əhmədov Priqojinə müraciətində ölkə rəhbərliyinin Rusiyanı bataqlığa atdığını və indiyə qədər gələcəklə bağlı normal açıqlama eşitmədiyini bildirib: “Onlar öz aralarında bir-birini qırırlar, bəyanatlar ziddiyyətlidir, konsolidasiya və koordinasiya olunmayıb. Vətəndaş qarşıdurması, hakimiyyət uğrunda mübarizə gedir. Onların kollektiv günahı var. O deyir ki, əsas ordudur, amma bəlli oldu ki, heç ordu da yoxdur. Bizdə respublikadır, prezident ölkəsidir. Prezident hər şeyə görə cavab verəcək. Hər şeyə görə! Ondan soruşacaqlar”. Həmsöhbətlər həmçinin Moskvanın Ukraynadakı işğalçılıq fəaliyyətindən də narazılığını ifadə ediblər. Belə ki, hər iki şəxs Putinin ətrafının yalan məlumatlar verərək, onu bəlanın içərisinə itələdiyini deyiblər. Əhmədov Priqojinə Rusiyanın gələcəyindən qorxduğunu və bundan sonra ölkədə vətəndaş müharibəsinin olub-olmayacağını təxmin edə bilmədiyini söyləyib. Milyarder Rusiyanın Ukraynadakı savaşını “qardaşın qardaşı öldürməsi” adlandırıb və Moskvanın bundan necə canını qurtaracağını bilmədiyini qeyd edib./Globalinfo.az

Yevlaxda süpürgəçi işləyən iki qadını avtomobil vurub, onlardan biri ölüb. Sozcu.az Report-a istinadla xəbər verir ki, hadisə şəhərin Nizami Gəncəvi küçəsində qeydə alınıb. Onlardan biri - 1974-cü il təvəllüdlü Səbinə Rafiq qızı Əsgərova hadisə yerində dünyasını dəyişib. Hadisə nəticəsində 1992-ci il təvəllüdlü Bəsti Mirzəyeva ağır bədən xəsarətləri alıb və xəstəxanaya yerləşdirilib. Faktla bağlı araşdırma aparılır.

Şimali Makedoniya ordusu Ukraynaya 12 ədəd Mi-24 helikopterinin təhvil verilməsi barədə qərar qəbul edib. Sozcu.az xəbər verir ki, bu haqda Ukrayna mətbuatı məlumat yayıb. Bildirilib ki, Şimali Makedoniya 2001-ci ildə bu helikopterləri Ukraynadan alıb. Onlardan 4-ü modernləşdirilib, digərləri isə ümumiyyətlə istifadə olunmayıb.

Gürcüstanın keçmiş prezidenti Mixail Saakaşvili Norveç Mühafizəkarlar Partiyasının həmtəsisçisi Sjur Lindebrekke mükafatına layiq görülüb. Sozcu.az xəbər verir ki, bu barədə Mixail Saakaşvili özünün Feysbuk səhifəsində yazıb. “İnsan hüquqları və demokratiya uğrunda mübarizədə insan haqları və demokratiyanın ən yüksək səviyyəsinə malik ölkədən mükafat almaqdan şərəf duyuram”, - Saakaşvili bildirib. Osloda keçirilən mükafatlandırma mərasimində keçmiş prezidentin anası Giuli Alasaniya və oğlu Nikoloz Saakaşvili iştirak edib.

Masallı rayonu, Şərəfə kəndində yaşayan 36 yaşlı Asif Abuşov Bakıda döyülüb. Sozcu.az xəbər verir ki, hadisə paytaxtın Nəsimi rayonu, Azadlıq prospekti 13 ünvanının qarşısında qeydə alınıb. Naməlum şəxs onu döyərək ağır xəsarət yetirib. Faktla bağlı Nəsimi Rayon Polis İdarəsində araşdırma aparılır.

Bərdə Rayon Polis Şöbəsinin əməkdaşları tərəfindən keçirilən əməliyyat-axtarış tədbirləri nəticəsində satış məqsədi ilə “Kalaşnikov” pulemyotunu əldə edib saxlamaqda şübhəli bilinən şəxs cinayət məsuliyyətinə cəlb edilib. Bu barədə Sozcu.az- a Daxili İşlər Nazirliyinin mətbuat xidmətindən bildirilib . DİN-in Mətbuat Xidmətinin Bərdə regional qrupundan verilən məlumata görə, polis əməkdaşlarının keçirdiyi tədbirlərlə qanunsuz olaraq satış məqsədi ilə silah-sursat əldə edərək saxlamaqda şübhəli bilinən rayon sakini Səyyaf Həsənov tutulub. Ondan texniki cəhətdən işlək və atəşə tam yararlı “PK” markalı pulemyot, həmin silaha məxsus 7,62 çaplı 98 ədəd patron və 1 ədəd patron lenti aşkar edilərək götürülüb. Faktla bağlı Bərdə RPŞ-də Cinayət Məcəlləsinin 228.1-ci maddəsi ilə cinayət işi başlanılıb, məhkəmənin qərarı ilə S.Həsənov barəsində həbs qətimkan tədbiri seçilib.

Bu gün Azərbaycanda Ramazan ayının dördüncü günüdür. Sozcu.az xəbər verir ki, bu gün üçün imsak saat 05:07, iftar isə 19:13-ə təyin olunub. İmsak duası: “Allahummə inni əs-əlukə fihi ma yurzik. Və əuzu bikə mimma yu-zik. Və əs-əlukət-tovfiqə fihi li-ən utiəkə və la ə-siyək. Ya cəvadəs-sailin”. İftar duası: “Allahummə ləkə sumtu və əla rizqikə əftərtu və əleykə təvəkkəltu. Bismillahir-Rəhmanir-Rəhim. Ya vasiəl-məğfirəti iğfirli”. Allah orucunuzu qəbul etsin!

Ağ Evin İqtisadi Məsləhətçilər Şurasının sədri Sesiliya Rouz martın 31-də istefa verəcək. Sozcu.az xəbər verir ki, bu barədə Bloomberg məlumat yayıb. Qeyd olunub ki, Rouz əvvəllər İctimai və Beynəlxalq Əlaqələr Məktəbinin dekanı olduğu Prinston Universitetində işə qayıtmağa hazırlaşır. O, gələcəkdə Ağ Evə qayıda biləcəyini istisna etməyib. Cari ilin fevral ayında ABŞ Prezidenti Cozef Baydenin baş iqtisadi müşaviri Brayan Diz də vəzifəsini tərk edib. O da Prinston Universitetində işləməyi planlaşdırır.

Prezident Vladimir Zelenski axşam videomüraciətində ABŞ, Litva, Finlandiya, Almaniya, Yaponiyadan yeni yardım paketləri və dünyanın bütün sahələrdə Rusiyaya təzyiqi artırmaq üçün atdığı digər addımlardan danışıb. Sozcu.az-ın xəbərinə görə, bu barədə Ukrayna mətbuatı məlumat verib. “Biz addım-addım və hər yerdə mümkün olan hər şeyi edirik ki, rus revanşizmi Ukraynaya qarşı təcavüzünün hər bir elementində məğlub olsun. Rusiya döyüş meydanında, iqtisadiyyatda, beynəlxalq siyasətdə, tarixi həqiqəti öz imperiya mifləri ilə əvəz etmək cəhdlərində uduzmalıdır. Kreml xalqımızı mənəvi əsarət altına almaq cəhdlərində uduzur, məhz Rusiyanın tammiqyaslı itkisi yeni təcavüz və böhranlara qarşı etibarlı təminat olacaq”, - deyə Zelenski vurğulayıb.

"Ermənistanın baş naziri Nikol Paşinyan İkinci Qarabağ müharibəsindən sonra məğlubiyyətlə faktiki barışmışdı, Qarabağdan imtina etməyə hazır idi. Ancaq son aylarda İranın Azərbaycana qarşı artan təxribatları, Rusiyanın Qarabağ separatçılarını silahlandırması və bəzi Qərb mərkəzlərindən, o cümlədən Parisdən aldığı dəstək sayəsində Paşinyan “cəsarətləndi” və onun Qarabağsız sülh sazişinə marağı azaldı. Azərbaycan ordusunun bölgənin yollarını və yüksəkliklərini nəzarətə götürməsi əməliyyatlarının sayının çoxalması Qarabağ separatçılarının fəaliyyət imkanlarını daraltmağa yönəlib. Bu Paşinyanı əvvəlki mövqeyinə qaytarmalıdır".  Bu arada, İrandan yeni təxribatlara hazır olmalıyıq. Azərbaycan ordusunun Qarabağda mövqelərinin möhkəmlənməsi nə Rusiyanın, nə də İranın maraqlarına cavab verir. Rusiya Azərbaycanı sözdə də olsa tərəfdaş adlandırdığına görə, “qırmızı çizgiləri” tam aşmamağa çalışır. İranın isə Azərbaycanla münasibətlərdə belə dərdi yoxdur, bütün “qırmızı çizgiləri” aşıb. Rusiya Azərbaycana qarşı İranın əliylə hərəkət edir. Elxan Şahinoğlu, politoloq

Rusiyanın Rostov vilayətinin Azov şəhərində güclü partlayış baş verib. Sozcu.az xəbər verir ki, bu barədə Ukrayna Teleqram kanalı məlumat yayıb. Partlayışın səbəbi məlum deyil. Hadisənin səbəbləri araşdırılır.

Türkiyə və Ermənistan milli komandaları arasında bu gün İrəvanda baş tutan oyun zamanı erməni azarkeşlər daha bir pankart açmaqla, öz mahiyyətlərini ortaya qoyublar. Sozcu.az xəbər verir ki, erməni azarkeşlər “NEMEZİS” yazılan iri pankartı oyun boyu nümayiş etdiriblər. Nemezis əməliyyatı – ASALA erməni terror təşkilatının Osmanlı İmperiyası və Azərbaycan Xalq Cümhuriyyəti rəsmilərinə qarşı planlaşdırılan terror hücumlarının adıdır. Əməliyyat öz adını yunan intiqam ilahəsi Nemezidanın adından götürüb. Guya ermənilər bununla “soyqırıma” cavab veriblər. Halbuki 1918-ci ildə ermənilərin Bakı da daxil olmaqla, Azərbaycanın bir çox ərazilərində dəhşətli soyqırım və qətliamlar törətmiş, minlərlə azərbaycanlını qətlə yetirmişdilər. Qeyd edək ki, oyun 2:1 Türkiyə millisinin qələbəsi ilə yekunlaşıb.

Bu gün müstəqil Azərbaycanın tarixində ən yüksək fəxri adın təsis edildiyi gündür. 1992-ci ilin bu günündə “Azərbaycan Milli Qəhrəmanı” adı rəsmiləşdirilib. Azərbaycan tarixinin şanlı səhifələrində qəhrəmanlar çox olub. Vaxtilə onlara “Xalq qəhrəmanı” deyirdilər. Sonralar isə bu ad Ali Dövlət mükafatı və Fəxri ad kimi rəsmiləşdi. 1991-ci ilin 18 oktyabr - Dövlət Müstəqilliyinin bərpasına qədər Azərbaycanın çoxlu sayda igid oğul və qızları keçmiş SSRİ-nin zamanında “Sovet İttifaqı Qəhrəmanı” adına layiq görülüblər. Onların ümumi sayı 42 nəfərdir. “Sovet İttifaqı Qəhrəmanı” adını alan ilk soydaşımız isə İsrafil Məmmədov olub. Bu ali adı iki dəfə qazanan isə tank diviziya komandiri general-mayor Həzi Aslanov olub. Müstəqilliyimizin bərpasının ikinci ilində -1992-ci ilin iyununda “Azərbaycanın Milli Qəhrəmanı” fəxri adı təsis edilib. Bu tarixdən başlayaraq Azərbaycanın ərazi bütövlüyü uğrunda xüsusi xidmətlər və qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə, həmçinin vəzifə borcunu yerinə yetirərkən igidlik və mərdlik nümayiş etdirən şəxslərə Azərbaycan Respublikası Prezidentinin Sərəncamı ilə “Azərbaycanın Milli Qəhrəmanı” fəxri adı verilməyə başlanılıb. Müstəqil Azərbaycanın ilk Milli Qəhrəmanı Daxili İşlər Nazirliyinin Daxili Qoşunlarının kapitanı Məhərrəm Seyidovla birlikdə 1992-ci il iyunun 6-da imzalanan fərmanla bu ada 12 nəfər layiq görülüb. Sozcu.az Bizim.Media -ya istinadən həmin siyahını təqdim edir: 1. Məhərrəm Seyidov 2. Əlif Hacıyev 3. Valeh Müslümov 4. Mehdi Abbasov 5. Albert Aqarunov 6. Mikayıl Cəbrayılov 7. Vüqar Hüseynov 8. Səfəralı Məmmədov 9. Nofəl Quliyev 10. Yuri Kovalyov 11. Yusif Əliyev 12. İlham Əliyev Ümumilikdə isə müstəqillik dövründə 218 qəhrəman soydaşımıza bu fəxri ad verilib. Sonuncu Milli Qəhrəmanlarsa 2020-ci ilin iyul ayında Tovuz döyüşlərində həlak olan general-mayor Polad Həşimovla polkovnik İlqar Mirzəyev olublar. Hazırda Azərbaycanın 218 Milli Qəhrəmanından yalnız 14 nəfəri sağdır: 1. Bəxtiyar Allahverdiyev 2. İntiqam Atakişiyev 3. İbad Hüseynov 4. Vahid Quliyev 5. Şahin Tağıyev 6. Fəxrəddin Cəbrayılov 7. Ehtiram Əliyev 8. Fariz Qəhrəmanov 9. Mədət Quliyev 10. Mirzə Quliyev 11. Zabit Quliyev 12. Fariz Mədətov 13. Mövsüm Məmmədov 14. Sahil Məmmədov

Belçikanın paytaxtı Brüsseldə Avropa Parlamentinin binasının qarşısında “Azadlıq və ədalət marşı” mitinqi keçirilib. Sozcu.az  xəbər verir ki, mitinqdə Avropada yaşayan Cənubi Azərbaycandan olan türklər iştirak ediblər. Bildirilib ki, onlar Fransa, AFR, Böyük Britaniya, Skandinaviya ölkələri, Benelüks və digər dövlətlərdən gəliblər. Mitinqin başlıca devizi “Azadlıq! Ədalət! Milli hökumət” olub. Qeyd edib ki, mitinq iştirakçıları İran rejimindən bu ölkənin çoxmilyonlu türk əhalisinin hüquqlarına hörmətlə yanaşmağı, İran KİV-lərində Azərbaycana qarşı informasiya hücumlarını dayandırmağı, həmçinin molla rejiminin zindanlarında əzab çəkən minlərlə azərbaycanlı türkün azad edilməsini tələb ediblər.

"Halbuki, ötən 2 ildən çox müddətdə Rusiya hərbi kontingenti həm faktiki, həm də gündəlik dislokasiya xəritələri üzərində həmin 1-ci bəndi pozmaqla günlərlə öz məsuliyyət  zonalarından kənara çıxmışlar.  Bundan əlavə, eyni sənədin 4-cü bəndinə də əməl etməyərək Azərbaycan ərazisindəki qanunsuz erməni birləşmələrinin tərksilah edilməsinə nail olmamışlar. Və üstəlik..."  İki il yarıma yaxındır ki, 10 noyabr bəyanatının bir sıra bəndlərini pozaraq Azərbaycan dövlətinin, o cümlədən Müdafiə Nazirliyinin haqlı tələblərini yerinə yetirməyən  Rusiya  “sülhməramlı”ları bu dəfə daha irəli gedərək Azərbaycan Silahlı Qüvvələri qarşısında tələb qoymaq həddinə gəlib çatıb. Moderator.az xəbər verir ki, Rusiya Federasiyası Müdafiə Nazirliyinin rəsmi saytının “sülhməramlı”lara aid bölməsində martın 25-i üçün yayılan bülletendəki məlumatda “sülhməramlı” kontingent komandanlığı Azərbaycan Silahlı Qüvvələrinə qarşı tələblə çıxış edir.  “2023-cü il martın 25-də Azərbaycan Silahlı Qüvvələrinin bölməsi Azərbaycan Respublikası Prezidentinin, Ermənistan Respublikasının Baş nazirinin və Rusiya Federasiyası prezidentinin 9 noyabr tarixli bəyanatının 1-ci bəndini pozaraq, 2020-ci il Şuşa rayonu ərazisində qoşunların təmas xəttini keçərək 2054,0 nişanlı yüksəkliyi (Sarıbaba dağından 2,9 km şimal-şərqdə) tutub və postda mühəndis-texniki işlərinə başlayıb. Rusiya sülhməramlılarının komandanlığı böhranlı vəziyyətin gərginləşməsinin qarşısını almaq və qarşı duran tərəflərin qarşılıqlı təxribatlarının qarşısını almaq üçün tədbirlər görür. Azərbaycan tərəfinə dövlət başçılarının üçtərəfli sazişlərinin müddəalarına əməl olunması, mühəndis-texniki işlərin dayandırılması və milli silahlı qüvvələrinin bölmələrinin əvvəllər tutduqları mövqelərə çıxarılması üçün tədbirlərin görülməsinin zəruriliyi barədə tələb çatdırılıb”. Göründüyü kimi, bundan öncə Azərbaycan Müdafiə Nazirliyinin  dəfələrlə 10 noyabr bəyanatına uyğun olaraq müəyyən olunmuş  Laçın-Şuşa yolundan başqa digər torpaq yollarla  Xankəndi-Xəlfəli-Turşsu yoluyla Ermənistandan Qarabağa silah-sursat daşınmasının və həmin marşrutdan şimalda keçən Xankəndi-Kosalar-Mirzələr-Turşsu yollarında ermənilər tərəfindən qeyri-qanuni tikinti və təkmilləşdirmə işlərinin durdurulması tələblərini qulaqardına vuran Rusiya “sülhməramlı”ları hədlərini aşaraq Azərbaycan tərəfinə guya məlum bəyanatın 1-ci bəndini pozulmasıyla bağlı tələb qoymağa da cəsarət ediblər. Halbuki, öncə dediyimiz kimi, ötən 2 ildən çox müddətdə Rusiya hərbi kontingenti həm faktiki, həm də gündəlik dislokasiya xəritələri üzərində həmin 1-ci bəndi pozmaqla günlərlə öz məsuliyyət  zonalarından kənara çıxmışlar.  Bundan əlavə, eyni sənədin 4-cü bəndinə də əməl etməyərək Azərbaycan ərazisindəki qanunsuz erməni birləşmələrinin tərksilah edilməsinə nail olmamışlar. Və üstəlik, Ermənistandan Qarabağa əlavə canlı qüvvə və silah-sursat, bəlkə də zirehli texnika da  və s. daşınmasına şərait yaratmışlar. Və s. və i.a. Sultan Laçın

Türkiyənin Gənclər və idman naziri Mehmet Muharrem Kasapoğlu Ermənistanla Türkiyə arasında keçiriləcək 2024 Avropa Futbol Çempionatının (EURO 2024) seçmə turunun oyununu izləmək üçün Ermənistana gedib. APA Türkiyə mətbuatına istinadən xəbər verir ki, sonuncu dəfə 2008-ci ildə Türkiyənin 11-ci prezidenti Abdullah Gül, Ermənistan - Türkiyə futbol qarşılaşması səbəbilə İrəvana səfər etmişdi. 15 ildən sonra, nazirlik səviyyəsində ilk ziyarət yenə iki ölkə arasındakı futbol qarşılaşması səbəbilə gerçəkləşdirilir. Sozcu.az

Azərbaycan Respublikasının Müdafiə Nazirliyi tərəfindən verilmiş məlumata əsasən, 25 mart tarixində Azərbaycan Ordusunun bölmələri Laçın yolunun şimalında torpaq yollarından qeyri-qanuni fəaliyyətlər üçün istifadənin, eləcə də Ermənistan tərəfindən Azərbaycanın ərazilərinə silah-sursat daşımaqla vəziyyətin daha da gərginləşməsinin və potensial təxribatların törədilməsinin qarşısını almaq məqsədilə müvafiq nəzarət tədbirləri həyata keçirib. Sozcu.az xəbər verir ki, bu barədə Azərbaycan Xarici İşlər Nazirliyindən bildirilib. Qeyd olunub ki, son günlər Ermənistandan Rusiya sülhməramlı kontingentinin müvəqqəti yerləşdiyi Azərbaycan ərazisindəki Ermənistan silahlı qüvvələri üçün canlı qüvvə, silah-sursat, mina, eləcə də digər hərbi təyinatlı vasitələrin daşınması intensivləşib. Bununla yanaşı, son bir neçə gündə Xankəndi-Xəlfəli-Turşsu və bu marşrutdan şimalda keçən Xankəndi-Kosalar-Mirzələr-Turşsu yollarında ermənilər tərəfindən qeyri-qanuni yol tikinti işlərinin aparılması müvafiq müşahidə vasitələri ilə qeydə alınıb. Azərbaycan tərəfinin çoxsaylı müraciətlərinə və bu xüsusda aparılmış müzakirələrə baxmayaraq silah-sursat və digər hərbi təyinatlı vasitələrin daşınmasının qarşısının alınması üçün bu günədək heç bir zəruri tədbir görülməyib. Bununla yanaşı, 5 mart tarixində Xankəndi-Xəlfəli-Turşsu yolunda, habelə 20 mart tarixində Zəngilan rayonu istiqamətində Ermənistanın törətdiyi təxribatlar nəticəsində Azərbaycan hərbçilərinin şəhid olması və yaralanması Ermənistanın vəziyyəti qəsdən gərginləşdirmək niyyətini nümayiş etdirib. Qeyd edək ki, Ermənistan tərəfinin sözügedən hərbi təxribatları həmçinin Ermənistan rəhbərliyinin son günlərdə təcavüzkar ritorikası ilə müşayiət olunub. Xüsusilə, Ermənistan Prezidenti, Baş naziri və xarici işlər naziri tərəfindən Azərbaycanın suverenliyi və ərazi bütövlüyünə qarşı davam edən bəyanatları, bu ölkənin Azərbaycana qarşı ərazi iddialarından hələ də əl çəkmədiyinin bazir nümunəsidir. Ermənistan tərəfinin bu addımları, son zamanlar sülh sazişi üzrə beynəlxalq səylərin canlanması şəraitində Ermənistanın sülh prosesini məqsədyönlü şəkildə pozmaq niyyətini, eləcə də bölgədə sülh və sabitliyin təmin edilməsində maraqlı olmadığını göstərib. Ermənistanı bölgədə vəziyyəti gərginləşdirən təxribatçı addımlardan və bəyanatlardan, Azərbaycanın daxili işlərinə müdaxilədən çəkinməyə, beynəlxalq ictimaiyyəti çaşdırmaq cəhdlərini davam etdirmək əvəzinə üzərinə götürdüyü öhdəlikləri yerinə yetirməyə çağırırıq. Ermənistan tərəfinin son təxribatları göstərir ki, Azərbaycanın suveren ərazilərində qeyri-qanuni fəaliyyətin qarşısının alınması məqsədilə, Laçın yolunun son nöqtəsində Azərbaycanla Ermənistan arasında sərhəd-keçid və nəzarət məntəqəsinin yaradılması zəruridir.