İranın PKK ilə əlaqələri uzun illərdir ki, mövcuddur və bu, hamıya məlumdur. Sözügedən əlaqələr dəfələrlə Türkiyə-İran münasibətlərinin əsas gündəm mövzularından olub. Bu sözləri Axar.az-a İranın terror təşkilatları ilə əlaqələri haqqında danışan Türkiyədə fəaliyyət göstərən Təbriz Araşdırmaları İnstitutunun mütəxəssisi Babək Şahid deyib. Mütəxəssis İranın Azərbaycan və Türkiyə sərhədinə yaxın məsafədə yerləşən bir kəndi PKK-nın ixtiyarına verdiyini qeyd edib: “Son iki ildə daxili işlər naziri Süleyman Soylu da bir neçə dəfə İranı PKK məsələsində üzərinə düşənləri yerinə yetirmədiyinə görə sərt tənqid edib. Səbəb isə rəsmi Tehranın Qərbi Azərbaycan vilayətində Avacıq şəhərinin kəndlərindən birini PKK-nın ixtiyarına verməsidir. Sözügedən ərazi həm Türkiyə, həm də Azərbaycanın Culfa rayonu ilə sərhədə yaxındır. Bu addım Türkiyənin PKK-ya qarşı mübarizəsinə müəyyən əngəllər törədir. Yəni Şimali İraqda terror təşkilatına qarşı əməliyyat keçiriləndə terrorçular ordan qaçaraq Avacıqdakı kənddə gizlənirlər. Digər tərəfdən, biz Türkiyənin əməliyyat keçirmək istədiyi zamanlarda İranın və onun Qüds Qüvvələri Komandanlığının dəstəklədiyi Haşdi-Şabi qruplaşmasına bağlı Kataib Hizbullah və digər şiə milislər tərəfindən Başika hərbi bazasına hücumlar təşkil edildiyinin şahidi oluruq. Hətta oradakı bəzi İrana yaxın müctehidlər “kafirə qarşı vuruşmaq” haqqında cihad fitvası verə biləcəklərini də vurğulayıblar”. Babək Şahid İranın Qüds qüvvələrinin Suriyada ermənilərdən ibarət terror qruplaşmalarının qurulmasına və fəaliyyətinə ciddi dəstək verdiyini qeyd edib: “İrana bağlı qruplar ilə ermənilər arasında əlaqələrin doğurduğu terror qruplaşmalarından ən məşhuru Masis Mutanyanın başçılıq etdiyi Nübar Ozanyan Briqadasıdır. Briqada İranın Qüds qüvvələrinin dəstəyi ilə 2019-cu ildə Suriya ermənilərindən təşkil olunub. Terror təşkilatının hazırda 500-ə yaxın üzvü var. Belə “könüllü”lər vasitəsilə İran, Bəşər Əsəd və ermənilər arasında körpü qurulur və koordinasiya edilir. Digər qruplaşma Suriyadakı müharibə zamanı YPG terror təşkilatının tərkibində Süryani Birliyinin qolu kimi fəaliyyətə başlayan Suturo Briqadasıdır. Briqada 2014-cü ildə YPG-dən ayrılıb və İranın Qüds qüvvələri ilə yaxınlaşıb. Qarşılıq olaraq isə Qüds qüvvələri Qamışlı kəndindəki təlim düşərgələrindən birini sözügedən terror dəstəsinə verdi. Düşərgənin adını “Ağa Petros” qoydular. Ağa Petros 1918-ci ildə Cənubi Azərbaycanda Cilovluq faciəsini törədən ermənilərin başçısıdır. Hazırda Ermənistanda Daşnaksütyun Partiyasının sədri olan Hrant Markaryan bu ölkə ilə İranın Qüds qüvvələri arasındakı əlaqələrin qurulmasında vasitəçilik edir. Qeyd edim ki, Markaryan 1958-ci ildə İsfahan şəhərində Culfa məhəlləsində dünyaya gəlib, orada universitetdə erməni dili üzrə təhsil alıb, 1992-ci ildə isə Ermənistana gedib. Haşdi Şabiyə bağlı digər bir terrorçu dəstə isə Kataib Babiliundur. Tərcüməsi “İncil Briqadaları” deməkdir. Bu terrorçu qruplaşma rəsmi şəkildə Qüds qüvvələrinin tərkibindəki Bədr Ordusu ilə sıx əlaqədədir. Rəhbəri Rayan əl-Kəldani isə ABŞ-ın sanksiya tətbiq etdiyi şəxslər siyahısındadır. Kataib Babiliun Haşdi Şabi içərisində “50-ci Briqada” kimi də tanınır və təqribən 1000 nəfərlik terrorçudan ibarət olduğu bildirilir. Siyahıya Kataib Babiliuna yaxın olan Sehl-i Ninova terror qruplaşmasını da əlavə etmək olar”. Ekspert bildirib ki, VOMA terror təşkilatı haqqında Azərbaycan mətbuatında da çoxlu yazılar gedib. Bu terror təşkilatının başçısı Vladimir Vartanov Ermənistan vətəndaşıdır və onun PKK ilə çox yaxın əlaqələri var: “Vartanovun ən az 300 nəfər PKK terrorçusunu Ermənistana apardığı haqqında dəqiq məlumat var. Bunların hərəkət marşrutu isə böyük ehtimalla İran ərazisindən keçir. Terrorçuların İrana məxsus təyyarələr ilə daşınması da mümkündür”. Babək Şahid İranın sözügedən terror təşkilatlarından da istifadə etməklə Cənubi Qafqazda müəyyən dəyişikliklərə ciddi hazırlaşdığını vurğulayıb: “İranın yuxarıda sadaladığımız terror təşkilatlarına verdiyi dəstəyi dəqiq bilirik. Onların PKK ilə əlaqəsini də əksər hallarda İran qurur. Rəsmi Tehran cidd-cəhdlə Cənubi Qafqazda müəyyən dəyişikliklərə hazırlaşır. İki-üç gün əvvəl də SEPAH yayımladığı videoda Ermənistanın ərazi bütövlüyünü özünün “qırmızı xətti” adlandırdı və bunun üçün lazım olarsa, vuruşacağını bildirdi. Bütün əlimizdə olan məlumatlar əsasında İranın nəzarətində olan terror təşkilatlarından və PKK-dan terrorçuları bölgəyə daşıdığını, Türkiyə və Azərbaycana qarşı müharibə hazırlığı gördüyünü iddia edə bilərik”.

Ukraynadakı müharibə zamanı 100 mindən çox ukraynalı hərbçi həlak olub. Sozcu.az xəbər verir ki, bu barədə “Politiko” qəzeti ABŞ rəsmilərinin bəyanatlarına istinadən məlumat yayıb. “Müharibədə il ərzində ən təcrübəli əsgərlər də daxil olmaqla, 100 mindən çox ukraynalı əsgər həlak olub”, – məlumatda deyilir. Qeyd olunur ki, bu itkilərin əksəriyyəti Artyomovskda baş verib.

Martın 15-də Ukrayna Silahlı Qüvvələri Rusiyanın ZALA pilotsuz uçuş aparatını (PUA) vurub. Sozcu.az xəbər verir ki, bu barədə "RBC Ukrayna" məlumat yayıb. PUA Ukrayna ordusunun 58-ci briqadası tərəfindən məhv edilib. Qeyd olunur ki, bu model havadan kəşfiyyat və müşahidə üçün nəzərdə tutulub. Kamera və termal görüntü sistemi ilə təchiz edilən sistem 4 saat uça bilir. PUA-nın çəkisi 7,5 kq, qanadlarının uzunluğu 2,8 metrdir.

Müdafiə Xətti” İnsan Hüquqları Mərkəzinin rəhbəri Rüfət Səfərov küçədə naməlum şəxsin hücumuna məruz qalıb. Sozcu.az xəbər verir ki, bu barədə hüquq müdafiəçisi özünün sosial şəbəkə hesabında yazıb.

Son günlər hamının “ferma yumurtası” dediyi broyler yumurtasının qiyməti 18-19 qəpikdən 25 qəpiyə yüksəlib. Kənd yumurtasının topdansatış qiyməti 30-35 qəpik, pərakəndə satışı isə 40 qəpikdir. Amma mövsüm olaraq toyuqların yumurtladığı dövrdür. Bəs hansı səbəbdən bahalaşma indi baş verib? Bizim.Media-ya açıqlamasında iqtisadçı ekspert Fuad İbrahimov yumurtanın qiymətinin artmasını inhisarçılıq amili ilə əlaqələndirib: “Yumurtanın bahalaşmasında heç bir iqtisadi amil yoxdur. Son illər elektrik enerjisi, su təchizatı, nəqliyyat vasitələri və dizel yanacağının qiymətində kifayət qədər artım baş verib. Bu fonda bəzi digər məhsullar kimi, yumurtanın da qiymətində artımın olması başadüşüləndir. Ancaq bu heç də o anlama gəlmir ki, yumurtanın qiyməti son 15 ildə iki dəfəyə qədər bahalaşsın. 2007-ci ildən üzü bəri yumurtanın qiyməti iki dəfədən də çox artıb. Bu isə anormal haldır və belə vəziyyətin yaranması birmənalı şəkildə inhisarçılıqla bağlıdır. Yumurta istehsalı tənzimlənmir. Bunun üçün dövlət orqanları müdaxilə etməli, bazar araşdırmaları aparmalı, səbəblər öyrənilməlidir”. Digər ekspertlərin fikrincə isə bu, bayramla əlaqədardır. Adətən, Azərbaycanda dünya ölkələrindən fərqli olaraq, hər şey bayramqabağı bahalaşır. Quşçuluq Cəmiyyətindən verilən məlumatda isə bildirilir ki, düzdür, toyuq yemlərində dünyada baş verən böhrandan dolayı müəyyən bahalaşma baş verib. Amma dövlətin gördüyü tədbirlər nəticəsində yemin də kəskin bahalaşmasının qarşısı alınıb: “Elə də ciddi böhran halı baş verməyib. Eyni zamanda, Cəmiyyət tərəfindən bazara çıxarılan yumurtalar topdansatış qiymətinə əvvəlki şəkildə satılır. Sadəcə, bu işlə məşğul olan ticarətçilər süni artıma gedirlər. Amma bu, müvəqqəti xarakter daşıyır, indi yumurtanın daha çox istehsalı dövrüdür”.

Pentaqonun rəhbəri Lloyd Ostin Ramşteyn-10 toplantısında çıxış edib. Sozcu.az "Ukrinform"a istinadən xəbər verir ki, o, Ukraynadakı savaşın həlledici mərhələyə daxil olduğunu bildirib. "ABŞ və Rusiya Federasiyasının genişmiqyaslı təcavüzünə qarşı müqavimət göstərməkdə Ukraynanı dəstəkləyən digər ölkələrin koalisiyası qətiyyət nümayiş etdirir. Hazırda ukraynalıların azadlıq mübarizəsinin həlledici məqamındayıq və birlik çox önəmlidir", - deyə ABŞ müdafiə naziri bildirib. Qeyd edək ki, Ramşteyn-10 onlayn formatda keçirilir.

Artıq uzun müddətdir ki, “Kontakt Home” mağazalar şəbəkəsi ilə bağlı şikayətlər bitmək bilmir. Şirkət isə bu şikayətlərə ciddi yanaşmır. Alınan məhsulun xarab çıxması, texniki nasazlığın olması isə müştəri məmuniyyətinin daha da aşağı düşməsinə yol açır. Təsadüfi deyil ki, şirkətlə bağlı şikayətlərə sosial şəbəkələrdə də sıx rast gəlinir. Sozcu.az Yenicag.az-a istinadən xəbər verir ki, şikayətçilərdən biri “Kontakt Home”un müştərisi olan Elvin Bəylər oğludur. Onun sözlərinə görə, kreditlərini vaxtından tez ödəsə də, sistemdə hələ də şirkətə borclu olduğu görünür: “Kontakt Home”dan mebel və ütü almışıq. Öncədən 1380 manat ödəniş etmişəm və kreditimi vaxtından qabaq ödəyib bitirmişəm. Ancaq buna baxmayaraq, şirkət adıma gecikmə düşdüyünü bildirir. Bununla bağlı şirkətin *6060 qaynar xəttinə yığmışam və mənə deyirlər ki, tam ödəniş edilməyib. Halbuki əlimdə ödəniş qəbzləri var. Krediti həyat yoldaşım Sahibə Nizaməddin qızı Balabəyovanın adına götürmüşük. Əgər şirkət sistemdən gecikməni silməsə, hüquq-mühafizə orqanlarına müraciət edəcəm”. Digər şikayətçi isə vurğulayıb ki, endirimlə aldığı məhsulun qiymətini nəğd şəkildə ödəsə də, şirkət məhsulu təhvil verməkdən boyun qaçırıb: “25 noyabr 2022-ci il tarixində “Böyük Cümə” endirimi zamanı “Kontakt Home”dan endirimlə 139 manata blender almışdıq. İlk önce məhsulun 2 gün ərzində çatdırılacağı bildirilmişdi. Daha sonra məhsulun 2 gün gecikəcəyi bildirildi. Düzü tələsmirdik, anlayışla qarşıladıq ki, alıcı çox olub, çatdırılma zaman ala bilər düşündük. Bir həftədən sonra əlaqə saxladıq ki, məhsulumuz haradadır? Bildirdilər ki, sistemdə məhsulun bizə verildiyi qeyd olunub. Xülasə, sübut etdik ki, məhsul bizə çatdırılmayıb. Dedilər, onda 2 günə göndərərik… Sonra məhsulu aldığımız “Əhmədli” filialına getdik, vitrindən cızıq, qutusu cırıq məhsul gətirdilər ki, buyurun. Düzü heç təəccüblənmədik. “Anbarda məhsul qalmayıb” adı ilə bizə bunu verməyə çalışdılar. Sonra malı qaytarmağı təklif etdilər. Yəni mən həmin gün məhsulu başqa mağazadan eyni qiymətə ala bilərdim, amma indi qaytarıb daha baha qiymətə almalıyam?! Sonra bildirdilər ki, “Masallı” filialında var, onu çatdıraq. 1 həftə keçdi, xəbər olmadı. Məlumat mərkəzinə zəng edib şikayət etdik, 1 həftə keçdi, yenə də xəbər çıxmadı. Bir sözlə, “Kontakt Home” 25.11.22 tarixində satılmış məhsulu bizə hələ də təhvil verməyib və pulumuzu qanunsuz olaraq mənimsəyib. Məhkəməyə müraciət edib məbləğin 100 misli həcmində kompensasiya almaq istəyirik”. Daxil olan şikayətlərdən belə başa düşmək olur ki, “Kontakt Home”un servis xidmətində də müəyyən problemlər mövcuddur. Şikayətə görə, alınan məhsulun təmirə ehtiyacı olsa da, şirkət vaxtı uzatmaqla məsuliyyətdən qaçmağa çalışır: “”Kontakt Home”dan qızıl zəmanətlə paltaryuyan maşın almışam. Qızıl zəmanət üçün isə əlavə 450 manat ödəniş etmişəm. Maşının qapağı xarab olduğu üçün servisə aparıblar və artıq 1 aydır ki, xəbər yoxdur. Servislə əlaqə saxladım və mənə dedilər ki, hələ vaxtım tamam olmayıb, gözləməliyəm. Məğər bir qapağı dəyişməyə 1 ay vaxt lazımdır?! Ən əsası paltaryuyan maşını aparan usta niyə 1 aydan sonra gətirəcəkləri barədə öncədən məlumat vermir?! Bu qədər özbaşınalıq olarmı? Əgər “Kontakt Home” problemləri həll edə bilmirsə, onda camaatı niyə aldadır?!”.

“Xural” internet televiziyasının rəhbəri Əvəz Zeynallı və “Səda TV” MMC-də rəhbər vəzifədə işləmiş Elnur Şükürovun cinayət işi icraata verilib. Sozcu.az xəbər verir ki, iş Bakı Ağır Cinayətlər Məhkəməsində hakim Əli Məmmədovun sədrliyi ilə araşdırılacaq. Məhkəmənin hazırlıq iclasının vaxtı hələlik təyin edilməyib.APA

"Bakı şəhərində və ətraf qəsəbələrdə, xüsusən Xırdalanda, Biləcəridə tikintilər Şəhərsalma Məcəlləsinə və Tikinti Məcəlləsinə uyğun aparılmayıb. Hamı da bundan şikayətçidir, səkiləri zəbt edilib və onsuz da yüklənmiş şəhərdə əlavə yüklənmə aparırlar". Sozcu.az xəbər verir ki, bunu iqtisadçı alim, sabiq deputat Nazim Baydəmirli deyib. Sabiq deputat "Kristal Abşeron" şirkətinin inşa etdiyi binaların vəziyyətini tənqid edib. O, sözügedən binaların əksəriyyətində parkinq yerlərinin nəzərdə tutulmadığını söyləyib: "Ümumiyyətlə, hər hansı yanğın və digər məsələlərlə bağlı maşınların girməyi çətinləşib. Dəfələrlə bunu sosial media resurslarında izləmişik və əksər binaların həm xarici görünüşü, həm də üslubu çox bərbad vəziyyətdədir. Şəhər sakini olaraq biz onların bir çoxlarını görürük. Eyni zamanda, sakinlərin özləri layihələrdən kənar müxtəlif rekonstruksiya işləri apararaq divarları zədələyir, həmçinin əlavə olaraq balkonlar çıxarılır. Hətta, sovet vaxtı tikilən binalarda da qeyri-yaşayış sahəsində müxtəlif pozuntular olur. Bunlar hər yerdə var, çünki rayon icra hakimiyyətləri buna qazanc mənbəyi kimi baxırlar. Bundan da qaynaqlanaraq sözügedən problemlər ortalığa çıxıb. Keyfiyyətin, nəzarətin olmaması indiki vəziyyətə gətirib. "Kristal Abşeron" şirkətinin inşa etdiyi “Qobu Park-2” yaşayış kompleksi ilə bağlı görünən vəziyyət odur ki, bu cür tikililərə doğru nəzarət edilmir. Ona görə də bu cür acınacaqlı vəziyyət ortaya çıxıb".Demokrat.az

Bakıda tələbə müalicə aldığı xəstəxanada intihar edib. Sozcu.az xəbər verir ki, bu barədə tələbənin təhsil aldığı Azərbaycan Dövlət Pedaqoji Universiteti məlumat yayıb. Qeyd olunub ki, universitetin İbtidai təhsil fakültəsinin III kurs tələbəsi Gülşən Abbaslı uzun sürən xəstəlikdən sonra müalicə aldığı xəstəxanada intihar edib.

Martın 5-də və 12-də keçirilən buraxılış imtahanlarından sonra cəmiyyət iki yerə bölünüb. Hazırda test üsulunun ləğv edilməsini tələb edənlərlə yanaşı, bunun ciddi fəsadlara səbəb olacağını düşünənlər arasında mübarizə gedir. Birincilər hesab edirlər ki, testin tətbiqi əzbərçiliyə gətirib çıxarır və nəticədə şagirdlər fundamental biliklərə yiyələnə bilmirlər.  İkincilər isə test üsulunun ləğv edilməsinin təhsildə rüşvətxorluğun yayılmasına səbəb olacağından narahatdırlar.  Vəziyyətdən çıxış yolu nədir? Ənənəvi qaydada davam edək, yoxsa sovet dövründəki proseduru tətbiq edək?  Yenisabah.az-a açıqlamasında tanınmış rejissor, “SOY Production”ın rəhbəri Oqtay Əliyev deyib ki, bu gün nə sovet dövrünü tətbiq etmək, nə də hazırkı test üsulunda qalmaq lazımdır: “Çünki test üsulunda daha çox əzbərçilik var. Onlar bir müddət nə var əzbərliyirlər, ikinci-üçüncü kursdan sonra isə 80-85% tələbə hamısını unudur. Abituriyentlər sadəcə olaraq sualın cavabını bilir, lakin məsələnin mahiyyətinə enmir. Onlar sadəcə qısa-qısa ensiklopedik savad əldə edirlər”. Onun sözlərinə görə, uşaqların belə ensiklopedik savadla da çox şeydən xəbərləri olmur:  “Təbii ki, savadlı uşaqlarımız var, amma bu gün biz savavsızlığa doğru gedirik. O ki qaldı sovet dövründəki partiya və katib uşaqlarının istədiyi ixtisasa qəbul olmasına, nəzərinizə çatdırım ki, sovet dövründə hüquq fakültəsinə vəzifəli şəxslərin uşaqlarının qəbul olması qəti qadağan idi. Yaxud Xalq Təsərrüfatı İnstitutuna da, həmçinin... Sadəcə olaraq, bu ixtisaslara fəhlə, kəndli və kolxozçuların uşaqlarıı qəbul oluna bilərdi. Katib uşaqları tarix fakültəsinə girəndən sonra tarixdən çıxıb milisdə işləyirdilər. Amma hüquq fakültəsi və xalq təsərrüfatına qəti qadağa qoyulmuşdu”.  Onun fikrincə, sovet dövrünün də mənfi cəhətləri var idi:  “Orada da rüşvət və tapşırıqlar mövcud idi. Anarın bir əsəri var: “Şəhərin yay günləri”. Orada görürük ki, o-bu gəlir qapısına, rüşvət verir ki, uşağı qəbul olsun.  Bunun ortaq bir çıxış yolunu tapmaq lazımdır. Məsələn, bu gün Asan Xidməti görürük. İmtahan sistemində də Asan Xidmət kimi bir strategiya olmalıdır. İndi Asan Xidmətdəki pəncərələrin hamısı vaxtilə bir rüşvət yuvası və pəncərəsi idi. Adicə şəxsiyyət vəsiqəsi, pasport, çıxarış alanda da pul istəyirdilər. İndi bunların biri də yoxdur. Deməli, təhsildə də alternativ nələr isə etmək olar”.  “O ki qaldı imtahanların suallarına, tanış-biliş deyir ki, elə suallar qoyublar ki, hələ uşaqlar onu keçməyib. Mart ayında mayda uşağa keçirilməsi planlaşdırılan hansısa bir fənnin sualını qoymaq o deməkdir ki, bu uşaq sualın cavabını bilməsin və kəsilsin. Məsələn, aprel ayında Mirzə Fətəli Axundovu keçirlər. Bu uşağa isə qəbulda o haqda sual düşüb, hansı ki, bu adam onu oxumayıb və keçməyib”, - əlavə edib.  “Ona görə də belə nüansları aradan qaldırmaq lazımdır. Məndən olsa, institutların qapısını taybatay açmaq lazımdır ki, hamı oxusun. Sadəcə təhsili elə etmək lazımdır ki, yanvar semestrində artıq orada sadəcə savadlılar qalsın, bacarmayanlar da getsin. Heyfim ona gəlir ki, 680-700 bal yığan uşaqlar universitetə girəndən sonra hamısını unudur. Özləri də özlərinə heyfslənir ki, mən bu boyda əziyyəti axı nəyə çəkdim? Biz universitetlərdəki təhsildən başlamalıyıq. Onsuz da universitetlərdə keçirilən təhsilin səviyyəsini də bilirik. Bunları dəyişməliyik”, - yekunlaşdırıb. 

Dəyişmək, yeniləşmək zamanın tələbidir. Test Quran ayəsi deyil ki, toxunmaq qadağan olunsun...  Mən Azərbaycanda test üsulu ilə tələbə adını qazanan ilk pionerlərdən biriyəm. Əgər 1992-ci ildə ölkədə test üsulu tətbiq olunmasaydı, bəlkə də indi hansısa dərədə qoyun güdürdüm. İndiki gənclər bilməz, sovet dövründə ali təhsil almaq üçün təkcə yaxşı oxumaq kifayət etmirdi. Həm də yaxşı “dayı”, yaxşı pul lazım idi. Yaxşı “dayın”, yaxşı pulun olmayanda, yaxşı təhsilin əhəmiyyəti olmurdu. Oxuculardan üzr istəyirəm, iki eşşəyin arpasını bölə bilməyən adamlar dədəsinin pulu sayəsində tələbə ola bilirdilər. Nəinki tələbə, hətta məmur da olurdular. Pul bütün qapıları onların üzünə açırdı. Demirəm ki, savadlı, istedadlı gənclərimiz hamısı kənarda qalırdı, amma o vaxt ali təhsil almaq indiki kimi asan deyildi. Yüzdə, bəzən mində bir adama rüşvət vermədən tələbə adını qazanmaq qismət olurdu.  Mən Cəbrayılın ən adlı-sanlı, tanınmış kəndlərindən birində anadan olmuşam. Hələ sovet dövründə kəndimizdən 50-dən çox alim çıxmışdı. Soltanlı kənd orta məktəbinin məzunları bütün SSRİ-yə səs salmışdı. Müxtəlif ali məktəblərdə çalışan alimlərimiz öz qohum-qardaşlarının, yaxınlarının qolundan tutub irəli çəkirdilər. Buna görə də hər il məktəbimizin məzunlarının 70-80 faizi ali məktəblərə qəbul ola bilirdi. Onların arasında savadsız gənclərlə yanaşı, çox savadlı, istedadlı uşaqlar da vardı. Dərd burasındaydı ki, təkcə savadsız deyil, həm də savadlı uşaqların valideynləri qəbul vaxtı qapısındakı danaları bazara çıxarırdı. Nə qədər savadlı olsan da öküzün, davarın pulu olmasaydı, sən də tələbə ola bilmirdin.  Test üsulu kəndlini bu problemdən xilas etdi. 1992-ci ildən bəri heç kim uşağını oxutmaq üçün qapısındakı damazlıq dananı satmır, savadı olan abituriyentlər heç kimin minnətini götürmədən tələbə ola bilirlər.  Son günlər test üsulu ilə bağlı müzakirələr yenidən qızışıb. Hətta bəzi dostlarımız test üsulunun ləğv edilməsini, DİM-in səlahiyyətlərinin Elm və Təhsil Nazirliyinə verilməsini təklif edirlər. İnanın, bu sözləri eşidəndə canımı qorxu alır. Kimlərsə bilərəkdən, ya da bilməyərəkdən bizi rüşvətin tüğyan etdiyi sovet dövrünə qaytarmaq istəyir. Elm və Təhsil Nazirliyinə etibar etmək olar?  Sizi deyə bilmərəm, şəxsən mən bu barədə düşünmək belə istəmirəm. Bir nazirliyin ki, tabeliyində olan məktəblərdə hətta süpürgəçini də işə rüşvətlə götürürlər, o quruma qəbul imtahanını həvalə etmək ağılsızlıq olardı. Test üsulundan imtina etsək, sürətlə keçmiş dövrə qayıdacağıq; yenə prokurorun balası prokuror, çobanın balası çoban olacaq... Bəs nə edək? Məncə, testi təkmilləşdirək, ağıllı adamların, mütəxəssislərin verdikləri təklifləri süzgəcdən keçirək, ölçək-biçək, xarici təcrübədən yaxşı nümunələr götürək, pisi atıb yaxşını seçək, amma nə isə edək... Bunu yazmağa əlim gəlmir, çəkinirəm, ehtiyat edirəm, amma belə olacağına yüz faiz əminəm: test ləğv olunsa, savadlı uşaqlar kənddə dana otaracaq... Seymur VERDİZADƏ

Ukrayna hərbçiləri Rusiyanın Su-24 bombardmançı təyyarəsini məhv edib. Sozcu.az xəbər verir ki, bu barədə Ukrayna Prezident Ofisinin rəhbəri Andrey Yermak məlumat yayıb. Məlumata görə, təyyarə Donetsk vilayətinin Baxmut yaxınlığında vurulub.

Ermənistanın Sünik (Zəngəzur) vilayətində hərbçilərin olduğu avtomobil qəzaya uğrayıb. Sozcu.az xəbər verir ki, bu barədə “Sputnik Ermənistan” məlumat yayıb. Məlumata görə, hadisə zamanı 4 hərbçi yaralanıb. Xəsarət alan hərbçilər xəstəxanaya yerləşdirilib.

14:18 Türkiyənin Adıyaman və Şanlıurfa ərazilərində daşqınlar baş verib. Sozcu.az xəbər verir ki, bu barədə “CNN Türk” məlumat yayıb. Məlumata görə, daşqın nəticəsində 5 nəfər ölüb, 5 nəfər isə itkin düşüb. Əkin sahələri, evlər və iş yerləri su altında qalıb. Məktəblərdə dərslər dayandırılıb. *** Adıyaman və Şanlıurfada baş verən daşqınlar zamanı ölənlərin sayı 10 nəfərə yüksəlib. Məlumatı Türkiyə mediası yayıb.

Bəzən bal çəlləyinin içində milçək olduğu kimi, Rusiyadakı diasporumuzda da kökünü çoxdan unudub, ruslaşanlar var. Üstəlik, onlar müstəqil Ermənistanı istəməyən Rusiyanın imperiya ambisiyalarına xidmət etməkdən məmnundurlar. Onların adları ölkəmizdə yaxşı tanınır: Ara Abrahamyan, Sergey Kurginyan, Semyon Baqdasarov, Karen Şahnazarov, Marqarita Simonyan və Marqaritanın əri Tiqran Keosayandır. Sozcu.az xəbər verir ki, bunu tanınmış erməni analitik Tevos Arşakyan deyib. “Simonyandan ayrıca danışmaq istərdik. Marqo da yuxarıda adları çəkilən erməni soyadlı, lakin rus ruhlu şəxslər kimi uzun illərdir ki, Ermənistanın Rusiyaya birləşdirilməsinin ölümcül qaçılmazlığını ağzı köpüklənə-köpüklənə təbliğ edir. Yeri gəlmişkən, yuxarıda adları çəkilən ermənilərin heç biri özlərini xalqımızın bir hissəsi hesab etmir. Onlar tamamilə ruslaşıb. Və onlar Ermənistanla Qərb arasında istənilən əlaqəni ən dəhşətli cinayət hesab edirlər. Amma gəlin Marqoya qayıdaq. Şəxsən mən və ölkəmizdəki bütün tanışlarım onun Rusiyaya tabe olan dövlətdən çıxıb Kremllə bərabərhüquqlu münasibətlər qurmağa çalışan, eyni zamanda Qərblə əlaqələri gücləndirməkdən imtina etməyən müasir Ermənistana münasibətindən ikrah hissi keçiririk. Onun üçün biz hamımız Sorosun marionetləri, satqınlarıyıq. Sonda saysız-hesabsız əsassız ittihamlardan yorulan Ermənistan hakimiyyəti Marqo da daxil olmaqla, bir sıra Rusiya ermənilərini arzuolunmaz şəxs elan edib. Dünənki mətbuat konfransında Paşinyan bu giriş qadağasına aydınlıq gətirib. Təbii ki, bu qadağa bir sıra rusiyalı ermənilərin antierməni siyasətinə bir qədər gecikmiş reaksiya oldu. Amma bu reaksiyanı erməni vətəndaşları dəstəklədi. Və Marqo ölkədə istənilməyənlərdən biridir. Paşinyan ölkəyə giriş qadağasının səbəbini izah etməyə vaxt tapmamış “Çerkizonda” iç paltarı alverçisi kimi Simonyan Baş nazirin ünvanına təhqirə yol verdi. Marqo, sən Kremlə xoş gəlmək üçün saxtakarlıqla məşğul olmağa davam et. Siz rusun çəkməsini yalamağa hazırsınız, amma eyni zamanda, bizə nifrət edirsiniz, çünki biz bunu istəmirik”, - o bildirib.axar.az

Martın 15-i saat 00:10-dan 02:30-dək Ordumuzun mövqeləri atəşə tutulub. Sozcu.az xəbər verir ki, bu barədə Müdafiə Nazirliyi məlumat yayıb. Bildirilib ki, Ermənistan silahlı qüvvələrinin bölmələri Basarkeçər rayonunun Əzizli və Qaraiman istiqamətlərində yerləşən mövqelərindən Ordumuzun Kəlbəcər rayonunun Yuxarı Ayrım və Daşkəsən rayonunun Astaf yaşayış məntəqələri istiqamətlərində yerləşən mövqelərini müxtəlif çaplı atıcı silahlardan fasilələrlə atəşə tutub. Bundan başqa, Rusiya sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri tərəfindən Azərbaycan Ordusunun Xocalı və Xocavənd rayonları istiqamətlərində yerləşən mövqeləri də fasilələrlə atəşə tutulub. Ordumuzun bölmələri tərəfindən adekvat cavab tədbirləri görülüb.

Rusiya Federasiyası Qarabağın Azərbaycanla inteqrasiyasının əleyhinədir. Sozcu.az erməni mediasına istinadla xəbər verir ki, dünən Nikol Paşinyan Putinlə son söhbətinin əsasən Qarabağda vəziyyətin gərginləşməsi təhlükəsinə həsr olunduğunu açıqlayıb. Rusiya Federasiyasının Qarabağın Azərbaycanla inteqrasiyasının tərəfdarıdırmı sualına o, belə cavab verib: “Bu məsələlərdə Rusiyanın mövqeyini səsləndirməyi düzgün hesab etmirəm, xüsusən də Rusiya Federasiyası öz mövqeyini dəfələrlə səsləndirib”. Qarabağdakı qondarma qurumun “deputat”ı Metakse Akopyan deyib ki, Rusiya inteqrasiyanın əleyhinədir. “Rusiya inteqrasiyanın əleyhinədir, əks halda Qarabağ məsələsi Rusiyanın təklif etdiyi sülh müqaviləsinin variantında Qərb variantında olduğu kimi olacaq. Rusiya Federasiyası məsələni sonraya saxlamağı təklif edir”, – deyə Akopyan bildirib.konkret

Martın 12-də Qafan şəhərinin Bağaberd məhəlləsinə bitişik dağın ətəyində baş verən yanğın hələ də söndürülməyib. Sozcu.az xəbər verir ki, bu barədə Ermənistan Fövqəladə Hallar Nazirliyi məlumat yayıb. Məlumata görə, Qafanda yanğının söndürülməsi istiqamətində işlər davam etdirilir.

Əslən Güney Azərbaycanın Muğan bölgəsinin Parsabad şəhərindən olan fəal Zeynəb Həmrəng Seyidbəyli təhlükəsizlik məmurları tərəfindən Tehranda həbs edilib. Bu barədə onun yaxınları məlumat veriblər. Xanım fəalın hara aparıldığı və həbs səbəbləri barədə məlumat əldə etmək mümkün olmayıb. Qeyd edək ki, müəllimlərin sinfi təşkilatında fəal üzvlərdən biri olan Zeynəb Həmrəng təhsil işçilərinin hüquqlarının qorunması tələbi ilə etiraz aksiyalarına qatıldığı üçün bundan əvvəldə saxlanılıb.  Həmrəng 2020-ci il sentyabrın 5-də Qərbi Azərbaycan əyalətinin Xoy şəhərində səfəri zamanı təhlükəsizlik məmurları tərəfindən həbs edilib.  Güneyli müəllim “ölkənin təhlükəsizliyinə qarşı aksiya toplaşmaq və əlbir olmaq” ittihamına görə 5 il, “hökumətə qarşı təbliğat” ittihamına görə isə 1 il həbs cəzasına məhkum edilib.  O, 2022-ci il oktyabrın sonlarında şərti azadlığa buraxılıb.

Planetin demək olar ki, bütün çaylarının sularını çirkləndirən antibiotiklər "superbakteriyaların" yaranmasına səbəb ola bilər. Sozcu.az Lent.az-a istinadən xəbər verir ki, alimlər çay sularının yüksək səviyyədə antibiotiklərlə çirklənməsini aşkar ediblər. Bu, bütün dünyada insanların kütləvi ölümünə səbəb ola bilər. Tədqiqatçılar 72 ölkədən axan çayların suyunu sınaqdan keçiriblər. Məlum olub ki, onlardan 65-də ən populyar 14 antibiotikin izləri aşkarlanıb. Ən çox antibiotik Asiya və Afrika çaylarında tapılıb. Eyni zamanda Banqladeşdə çayda dərmanların konsentrasiyası yol verilən həddi 300 dəfə keçib. Alimlər qeyd edirlər ki, dərmanların qalıqları kanalizasiya ilə birlikdə çay sularına düşür. Bu, antibiotiklərin daimi təsiri altında mikroorqanizmlərin mutasiyaya uğrayaraq "superbakteriyalara" çevrilməsi ilə nəticələnir ki, bu da öz növbəsində 2050-ci ilə qədər milyonlarla insanın ölümünə səbəb olacaq.

“Telekanal rəhbəri var idi, seiral çəkirdi. 10 ilin söhbətidir. Gözəl aktrisamız var idi, indi də sağdır. Onların adlarını çəkmirəm. Bir məkan yaratmışdıq, serialı çəkirdik. O vaxt qonorarlar çox az idi. İçi mən qarışıq bütün heyətə günə 50 manat qonorar verirdilər”. Sozcu.az Olay-a istinadla xəbər verir ki, bu sözləri “Səhərin səsi” verilişində aktyor-aparıcı Azər Aydəmir deyib. Onun sözlərinə görə, adını çəkmək istəmədiyi aktrisa kanal rəhbərinə qonorara görə etiraz edib: “Həmin aktrisa kanal rəhbərinə dedi ki, bizi adam yerinə qoymursuz, 50 manata seriala çəkilərlər? Heç olmasa qonorarı artırın, yaxşı iş görək. Bu kanal rəhbəri utanmadan-qızarmadan hər kəsin içində aktrisaya dedi ki, mən sizə 500 manat da versəm, belə oynayacaqsız, 50 manat da. Qonorarla yaradıcılığın heç bir əlaqəsi yoxdur. Qonorar texniki hissəyə aiddir. Mən bədii təxəyyülümü ortaya qoymuşam, rejissor da həmçinin. Mənə operator lazımdır. Məsələn, Əhməd 3 min istəyir, Məmməd 500.  Burada pul lazımdır ki, o filmi Əhməd çəksin, çünki Hollivud görüntüsü yarada bilər. Məmməd isə maksimum Türkiyə görüntüsü verəcək. Yaradıcılıq, içdən gələn işlərdə qonorar vacib deyil. Əlbəttə insanın beyin məhsuluna pul vermək lazımdır. Bu da imic məsələsidir, mən bu işi 5 manata görürəm, ya 105 manata. Əgər özünü 105 manata sata bilmirsənsə, bu, sənin problemindir”.

Erməni Telegram kanalları Azərbaycan Silahlı Qüvvələrinin Ermənistan və Qarabağla sərhəddə toplanması barədə iddialar yayırlar. Dünən baş nazir Paşinyan da öz çıxışında sərhəddə yenidən eskalasiya ehtimalının yüksək olduğunu bildirib. Məsələnin maraqlı tərəfi budur ki, İran mediası da heç bir əsas olmadan eyni iddialarla çıxış edir. Bu da İran və Ermənistan dayanışmasının növbəti sübutu sayıla bilər. Məsələn, İranın molla mediası iddia edir ki, İslam İnqilabı Keşikçiləri Korpusu (İİKK) "...Bakı Respublikasının (molla rejimi Azərbaycan adını çəkməyi də öz kirli mahiyyətinə yaraşdırmır-Red.) böyük qoşun kolonlarının hərəkətini qeydə alır". İran adlanan molla respublikasının saytları iddia edir ki, rəsmi Bakı "...Qafqazda regional müharibəyə başlamaq niyyətindədir". Arxasınca da heç bir əsası olmayan bu yalançı iddiaya guya cavab verərək, Azərbaycanı "düşmən" adlandırır və təhdid edir. Sitatı yazaq ki, oxucularımız bu həyasızlıqla tanış olsunlar və bir az da gülsünlər: "İran İslam Respublikası Qafqazın təhlükəsizliyinə cavabdehdir və düşmənlərin istənilən niyyətini kökündən məhv etmək fikrindədir". Öz xalqını təmin və idarə edə bilməyən, xalqlar həbsxanasına çevrilən İran Qafqazın təhlükəsizliyinə cavabdehmiş. Başlarına haradan gəldiyini hələ də müəyyən edə bilmədikləri dronlar yağır, ərazisində yaşayan xalqlar aclıqdan və səfalətdən, haqsızlıqdan və zülümdən bezərək, üsyana qalxıb, rejimi devirmək istəyir, bunlar da özlərini "Qafqazın təhlükəsizliyinə cavabdeh" sayırlar. Ölkənin hakim zümrəsi olan mollalar ictimai yerdə xalqın qorxusundan əmmamə ilə gəzə bilmirlər. Yanlarından keçən hər kəs dərhal onların əmmamələrini vurub, başlarından salır. Bu bədbəxtlərsə görün nələrə iddia edirlər. Yazının sonunda İranda yeni trend olan əmmaməsalma hobbisinə dair videoları təqdim edirik! Başında sarığı qoruya bilməyın molla rejimi Qafqazı Azərbaycandan qoruyacaqmış.Müsavat.com

"Qarabağ Daxili İşlər Nazirliyi" etiraf edib ki, Laçın dəhlizindən yan keçərək Ermənistanla alternativ əlaqə qurulub və fəaliyyət göstərir. Azərbaycan tərəfi rusiyalı sülhməramlıların müşayiətilə erməni avtomobil karvanının alternativ yol ilə hərəkət etməsinə dair videonu yaydıqdan sonra separatçılar aşağıdakı etirafı ediblər: Azərbaycan tərəfinin yaydığı videoda hərbi texnika deyil, Fövqəladə Hallar Nazirliyinə məxsus maşınlar yer alıb. Xilasedicilər Şuşadan yan keçərək dağ yoluyla Rusiya sülhməramlılarının müşayiətilə Qarabağda qalan vətəndaşları Ermənistana aparıblar, "Daxili İşlər Nazirliyi"nin məlumatında deyilir. Deyilənlərdən belə nəticəyə gəlmək olar ki, erməni tərəfi Şuşadan yan keçməklə Xankəndidən Qeybalı və Xəlfəli kəndləri vasitəsilə Zarıslıya, daha sonra Laçın yoluyla nəqliyyatın hərəkətini təşkil ediblər. Bu vəziyyətdə Rusiya sülhməramlılarının baş verənlərdə rolu ilə bağlı sual yaranır. Qeyd edək ki, bundan öncə ermənilər Ermənistanla alternativ əlaqə faktını inkar edərək bildirirdilər ki, martın 5-də həlak olan polislər hərbi postlardan birində "rotasiya" həyata keçirirmişlər.