Hindistan-Pakistan arasında birincinin gecə saatlarında başlatdığı savaş davam edir.  Sozcu.az xəbər verir ki, bu haqda  xarici nəşrlər məlumat yayıb. Hindistan rəsmiləri bildiriblər ki,raket zərbələri həm Pakistan, həm də Pakistanın idarə etdiyi Kəşmirdə doqquz obyekt hədəf alınıb. Həm Hindistan, həm də Pakistan mübahisəli Kəşmir sərhəd bölgəsinin bəzi hissələrinə nəzarət edir. Hindistan mülki, iqtisadi və ya hərbi obyektlərə deyil, yalnız “terror infrastrukturunun” vurulduğunu iddia edir, lakin Pakistan bunu təkzib edərək, mülki əhalinin və məscidlərin altı yerdə vurulduğunu söyləyir. Pakistanın cavabı:  Pakistan Hindistan Hərbi Hava Qüvvələrinə məxsus beş təyyarəni və bir pilotsuz təyyarəni “özünümüdafiə” məqsədi ilə vurduğunu bildirir və vurulanların arasında “Rafale” təyyarələrinin – Fransa istehsalı olan müasir çoxməqsədli qırıcıların olduğunu iddia edir. Hindistan səlahiyyətliləri hələ heç bir təyyarənin itdiyini təsdiqləməyib və “CNN” müstəqil olaraq iddianı təsdiq edə bilmir. Zərərçəkənlər:  Pakistan bildirir ki, Hindistanın zərbələri nəticəsində uşaqlar da daxil olmaqla 8 nəfər ölüb , daha 35 nəfər yaralanıb. Hindistan Ordusu bildirib ki, Hindistanın idarə etdiyi Kəşmirdə üç mülki şəxs Pakistan əsgərlərinin sərhəddən atəşə tutması nəticəsində həlak olub. Bu gərginliyin mərkəzində mübahisəli Kəşmir bölgəsi dayanır - burada silahlı şəxslər keçən ay mənzərəli bir yerə basqın edərək əsasən hindistanlı turistlər daxil olmaqla 36 nəfəri öldürüblər. Dehli qonşusunu günahlandırır və uzun müddət Pakistanı sərhəddən keçən silahlı qruplara sığınacaq verməkdə günahlandırır.  İslamabad bunu təkzib edib və əvvəllər hücumçulara qarşı qisas alacağına söz verib. Hindistanın əksəriyyətini hindu təşkil edən Hindistan və müsəlmanların çoxluq təşkil etdiyi Pakistan Britaniya Hindistanının qanlı parçalanmasından doğulduğundan, iki xalq Kəşmir üzərində üç müharibə aparıb.  1999-cu ildəki sonuncu toqquşmadan sonra, ən son 2019-cu ildə çoxsaylı toqquşmalar baş verib, lakin heç biri yenidən genişmiqyaslı müharibəyə çevrilməyib. Risklər yüksəkdir; hər iki ölkə öz ordusunu gücləndirib, o cümlədən nüvə silahı ilə silahlanıb. Qlobal reaksiyalar:  Prezident Donald Tramp Hindistanın Pakistana qarşı təsdiqlənmiş hərbi əməliyyatını “ayıb” adlandırdı və ABŞ Dövlət Departamenti hökumətin “hadisələri diqqətlə izlədiyini” söylədi. Beynəlxalq ictimaiyyət gələcək hərbi əməliyyatlara qarşı xəbərdarlıq edir, BMT rəhbəri iki ölkəni "nəzarətdən asanlıqla çıxa biləcək hərbi qarşıdurmadan qaçmağa" çağırıb.

Avropa İttifaqı (Aİ) Rusiyaya qarşı 17-ci sanksiya paketinə 60 şəxsi və təşkilatı, eləcə də 150 tankeri daxil edəcək. Sozcu.az xəbər verir ki, bu barədə “Bloomberg” agentliyi bildirib. Agentliyin məlumatına görə, sanksiyalar siyahısına daxil edilən tankerlərin sayı 300-dən çox olacaq, onların Avropanın yurisdiksiyasında olan limanlara girişi qadağan ediləcək. Qeyd edək ki, Avropa Komissiyası Aİ ölkələrinə Rusiyadan uran və nüvə yanacağı almağı qadağan etməyi təklif edib.

12:43 Xristian Demokratlar İttifaqının lideri Fridrix Merz ilk turda Almaniya kansleri seçilmək üçün Bundestaqda kifayət qədər səs toplaya bilməyib. Sozcu.az xəbər verir ki, bu barədə Almaniya parlamentinin spikeri Yuliya Klokner deyib. Qeyd olunur ki, Merzi 310 deputat dəstəkləyib, kansler seçilımək üçün isə lazım olan səslərin sayı 316-dır. *** Fridrix Merz Almaniyanın yeni kansleri olub. Bundestaq onun namizədliyini ikinci cəhddə təsdiqləyib. Siyasətçi tələb olunan 316 səsdən 325-ni toplaya bilib.

Rusiya Hərbi Hava Qüvvələrinin 76-cı qvardiya desant-hücum diviziyasına (Pskov diviziyası) rəhbərlik edən polkovnik Əbdüləziz Şıxabidov Ukraynada öldürülüb. Sozcu.az xəbər verir ki, bu barədə Rusiya mətbuatı məlumat yayıb. Məlumata görə, Şıxabidov 76-cı diviziyanın komandiri vəzifəsinə şəxsən Rusiya Prezidenti Vladimir Putin tərəfindən, 2025-ci il martın 10-da təyin edilmişdi. Qeyd edək ki, Şıxabidov bu vəzifəyə təyin edilməzdən əvvəl Cənubi Osetiya və Suriyada gedən döyüşlərdə iştirak edib. O, üç “Şücaət” ordeni və Suvorov ordeni, həmçinin 1-ci və 2-ci dərəcəli “İgidliyə görə” və “Vətənə xidmətə görə” medalları ilə təltif edilib.

CHP lideri Özgür Özəl həbs edilən İstanbul Böyükşəhər Bələdiyyəsinin (İBB) sabiq sədri Əkrəm İmamoğluna həbsxanada sui-qəsd ediləcəyini iddia edib. Sozcu.az Türkiyə mediasına istinadən xəbər verir ki, Özəl bu barədə CHP-nin qrup toplantısında çıxışı zamanı deyib. “Ötən gün mənə hücum edən Səlcuq Tengioğlu yanvar ayında İBB-yə gəlir. Bildirir ki, həbsxanada kamera yoldaşlarına təlimat verilib. İmamoğlu öldürüləcək. Mən bunu xəbər verməyə gəlmişəm deyib. Həmin vaxt bizimkilər onu polisə təhvil veriblər. Bildiriblər ki, bu şəxs belə bir iddia səsləndirib, siz məşğul olun. İndi isə işıq sürəti ilə həmin şəxs barəsində həbs qərarı verildi. Hansı kamerada yatıb? Dostları kim olub? Bu suallar ona verilməyibsə, yenidən ifadəsini alsınlar”, - partiya sədri əlavə edib.

Ağdaşda avtomobil piyadanı vurub. Sozcu.az apa-ya istinadən xəbər verir ki, bu gün Ağdaş şəhərində Murad Əsədovun idarə etdiyi “Mersedes” markalı avtomobillə yolu keçən piyada, 2009-cu il təvəllüdlü Yusif Məmmədov vurulub. Nəticədə piyada aldığı xəsarətlərdən hadisə yerində ölüb. Yeniyetmənin Göyçay Dövlət İdarəetmə və Texnologiya Kollecinin I kurs tələbəsi olduğu bildirilir. Faktla bağlı cinayət işi başlanılıb.

Ermənistan parlamentinin sədri Alen Simonyan bildirib ki, bu gün ictimai rəy sorğuları parlament çoxluğunun - hakim “Mülki müqavilə” fraksiyasının lider mövqedə olduğunu göstərir. Sozcu.az xəbər verir ki, Simonyan bu haqda jurnalistlərlə söhbətində danışıb. O deyib ki, əgər bu bazar günü Ermənistanda parlament seçkiləri keçirilsə, hakim partiya yenə də qalib gələcək. "Mən əminəm ki, “Mülki müqavilə” parlament yerləri uğrunda 50%+1 səslə qalib gələcək. 2026-cı ildə isə daha da yüksək səs faizini qazanacağımız şübhə doğurmur", - Simonyan bildirib. Jurnalistlər ona martın 30-da Ermənistanın Şirak vilayətinin Gümrü Ağsaqqallar Şurasına keçirilən seçkilərdə müxalifətin qalib gəldiyini xatırladanda, Simonyan parlament və bələdiyyə seçkilərini müqayisə etməməyə çağırıb. Onun sözlərinə görə, 2021-ci ildə Ermənistan Milli Məclisinə keçirilən seçkilərdə onların Gümrüdəki partiyası seçicilərin 60%-nin dəstəyini qazanıb və 2 ay sonra həmin şəhərdə, lakin artıq yerli hakimiyyət orqanlarına keçirilən seçkilərdə 20% səs toplayıb. Alen Simonyan müxalifətin ancaq sosial şəbəkələrdə fəal olduğunu deyib. O, sosial şəbəkələrdən kənarda həyatın olduğunu bəyan edərək, reallığın pul müqabilində təhrif olunduğu Facebook-un məlumatlarına əsaslanmamağa çağırıb. “Mən başa düşürəm ki, xaricdən çoxlu pul xərclənir”, - deyə Alen Simonyan Rusiyanı nəzərdə tutduğunu təsdiqləyib. “Müxtəlif yerlər, xüsusən də şimal qonşumuz Ermənistana qarşı hibrid müharibə aparır”. Simonyan bu səylərin 2026-cı ildə Ermənistan Milli Məclisinə keçiriləcək seçkilərə qədər daha da güclənəcəyinə əmin olduğunu bildirib. “Mən bunu ucadan deməkdən belə qorxmuram: bütün bunlar əks effekt verəcək və Ermənistan Respublikasının hazırkı hökumətinin reytinqi ikiqat artacaq”. O, Ermənistan xalqına güvəndikləri üçün Rusiyadan real çevriliş təhlükəsi görmədiyini vurğulayıb.

Putin sülh istəmir, o, Ukraynanı istəyir. Artıq iki aya yaxındır ki, Ukraynanın razılaşdığı atəşkəsə əməl etməsini, Rusiyanın isə bunu gecikdirərək, bəhanələr gətirib sülhə riayət etməməsini izləyirik. Sozcu.az xəbər verir ki, bunu ABŞ-ın keçmiş vitse-prezidenti Mayk Pens deyib. “Putin yalnız gücü başa düşür, ona görə də ABŞ Ukraynaya davamlı dəstəyini açıq şəkildə bildirməlidir. Tramp administrasiyasının son aylardakı zəif dəstəyi Rusiyanı yalnız cəsarətləndirdi. Putin Ukraynada uğur qazansa, NATO üzvü olan ölkələri işğal etməsi an məsələsidir, o zaman uniformalı kişi və qadınlarımız gedib onunla döyüşməli olacaq”, - Pens bildirib.

Göyçayda 51 yaşlı kişi xəstəxanada əməliyyat zamanı ölüb. Sozcu.az xəbər verir ki, Göyçay Mərkəzi Xəstəxanasında Ucar rayon sakini, 1974-cü il təvəllüdlü Vidadi İsgəndərov damar əməliyyatı zamanı ölüb. Araşdırmalar aparılır.

Bakıda fəhlə hündürlükdən yıxılaraq ölüb. Sozcu.az xəbər verir ki, ötən gün saat 21 radələrində Ağ Şəhər Yaşıl Ada küçəsi ev 21-də fəhlə-Kürdəmir rayon sakini, 1960-cı il təvəllüdlü Elman Umudov 2-ci mərtəbədən yıxılaraq ölüb. Faktla bağlı araşdırma aparılır.

Astara rayon Toradi kənd sakini olan 16 yaşlı Gülnarə Şahid qızı Əlizadə Bakıdakı xəstəxanalardan birində vəfat edib. Sozcu.az "Qafqazinfo"ya istinadən xəbər verir ki, təxminən 1 ay əvvəl səhhətində problem yaranan 10-cu sinif şagirdinin həyatını xilas etmək mümkün olmayıb. Yaxınları bildiriblər ki, Gülnarənin beyninə virus düşüb və bundan sonra müalicəsinə başlanılıb. Lakin müalicələr nəticə verməyib. Qeyd edək ki, vəfat edən məktəbli təhsil aldığı məktəbin və rayonun tədbirlərində aktiv iştirak edirmiş.

İsrail ordusu Suriyanın keçmiş prezidenti Bəşər Əsədin Hermon dağının zirvəsində yerləşən mərkəzi komandanlıq qərargahını vurub. Sozcu.az xəbər verir ki, bu barədə İsrail ordusundan məlumat verilib. Qeyd olunub ki, hücum keçən həftə həyata keçirilib və qərargah məhv edilib.

Milli Hidrometeorologiya Xidməti mayın 6-da bəzi bölgələrdə gözlənilən küləkli hava şəraiti ilə bağlı sarı xəbərdarlıq yayıb. Bu barədə Sozcu.az-a Xidmətdən məlumat verilib. Naxçıvan MR, Qazax, Ağstafa, Tovuz, Şəmkir, Daşkəsən, Gədəbəy, Samux, Gəncə, Göygöl, Naftalan, Goranboy, Yevlax, Bərdə, Tərtər, Mingəçevir, Xaçmaz, Şabran, Xızı, Siyəzən, Quba, Qusar, Laçın, Kəlbəcər, Füzuli, Zəngilan və Cəbrayılda qərb küləyi əsəcək, küləyin sürəti 13.9-20.7 m/san təşkil edəcək.

AB-nin xarici siyasət və təhlükəsizlik məsələləri üzrə ali nümayəndəsi Kaya Kallasla İranın xarici işlər naziri Abbas Arakçı arasında telefon danışığı baş tutub. Sozcu.az xəbər verir ki, bu barədə Kallas özünün X hesabında məlumat yayıb. Kallas Tehrandan Rusiyaya hərbi yardımı dayandırmağı tələb edib: “İranı Rusiyaya hərbi dəstəyi dayandırmağa çağırdım, həbsdə olan AB vətəndaşları və İranda insan haqlarının pozulması ilə bağlı narahatlığımı bildirdim”. O qeyd edib ki, AB ilə İran arasında münasibətlər bu sahələrdə irəliləyişdən asılıdır.

İsrailin Ben-Qurion hava limanı husilər tərəfindən hipersəsli ballistik raketlərlə hədəfə alınıb. Raket zərbələri nəticəsində hava limanının fəaliyyətində müvəqqəti məhdudiyyətlər tətbiq olunub. Bəzi reyslər dayandırılıb. Sozcu.az xəbər verir ki, məlumatı “Yerusəlim Post” nəşri yayıb. Qeyd olunub ki, son hadisələrlə əlaqədar bir neçə beynəlxalq aviaşirkət İsrailə uçuşları 7 may tarixinədək dayandırıb. Uçuşları dayandıran aviaşirkətlər arasında Azərbaycan Hava Yolları (AZAL) da yer alır.

Aprelin 26-da Bəndər-Abbas şəhərindəki Şəhid Rəcai limanında baş verən partlayış nəticəsində İran 5 milyard dollara qədər ziyana məruz qalıb. Sozcu.az xəbər verir ki, bunu İranın telekommunikasiya və informasiya texnologiyaları nazirinin müavini Məhəmməd-Möhsün Sədr deyib. Onun sözlərinə görə, dəymiş ziyanın miqyasına baxmayaraq, ölkə müasir texnologiyaların köməyi ilə hadisənin nəticələrinin aradan qaldırılmasını gözləyir. Qeyd edək ki, Şəhid Rəcai limanında baş verən partlayış nəticəsində 57 nəfər həlak olub, 1200-ə yaxın insan yaralanıb.

Xəbər verdiyimiz kimi, ötən gün Xaçmaz rayon sakini Kənan Abdullayev dəmiryol xəttində qatarın altında qalması nəticəsində ölüb. Sozcu.az Unikal-a istinadla xəbər verir ki, hadisə nəticəsində həyatını itirən K.Abdullayev FHN-in Şimal bölgəsinin Xüsusi Riskli Xilasetmə Xidmətinin əməkdaşı olub. K.Abdullayev ailəli idi, bir azyaşlı övladı var.

Ürək-damar xəstəlikləri ilə bağlı dərman vasitələrinin resept əsasında icbari tibbi sığorta tərəfindən qarşılanması nəzərdə tutulub. Sozcu.az xəbər verir ki, bunu İcbari Tibbi Sığorta üzrə Dövlət Agentliyinin sədri Zaur Əliyev "Azərbaycan əczaçılıq sənayesi: dünən, bu gün və sabah” adlı tədbirdə deyib. O bildirib ki, növbəti mərhələdə həzm və tənəffüs xəstəliklərinin dərman vasitələrinin resept əsasında sığorta tərəfindən qarşılanması nəzərdə tutulub.

Bu ilin yanvar-mart ayları ərzində Azərbaycanda daşınmaz əmlak üzərində 86708 mülkiyyət hüququ qeydə alınaraq çıxarışla təmin edilib. Əmlak məsələləri dövlət xidmətinin məlumatına əsasən, bunun 14224-ü fərdi yaşayış evləri və bağ evləridir. 19200-ü mənzillərdir, 49386-sl isə torpaq sahələrinin payına düşür. Bi tərəfdən qeydiyyatsız evlərin sənədləşdirilməsi üçün işlər görülür, amma digər tərəfdən yeni sənədsiz evlər hətta məhəllələr inşa edilir. Söhbət qiymətinin ucuz olması ilə alıcıları cəlb edən makler evlərdən gedir.  Bəs bu evlərin hansı problemləri olur?  Məsələ ilə bağlı Moderator.az-a daşınmaz əmlak üzrə ekspert Elnur Azadov deyib ki, qanunla icazə verilməyən ərazilərdə tikilən əmlakların leqallaşdırılması nəzərdə tutulmayıb və buna ümid etməyə də ehtiyac yoxdur: "Bəzi vətəndaşlar düşünürlər ki, onların aldıqları evlər gələcəkdə leqallaşa bilər. Təəssüflər olsun ki, bununla bağlı heç bir əsas yoxdur. Vətəndaş birinci növbədə bilməlidir ki, leqallaşdırdığı halda o əmlakın özünü də riskə atır. T'bii ki, vətəndaş orda qeydiyyatda olmur. Sığorta hallarından da istifadə edə bilməyəcək və qanunla nəzərdə tutulmuş imtiyazlardan və imkanlar məhdudlaşdırılmış olur. Əsasən, əmlak bazarında vasitəçilikdə məşğul olan sahibkarlar, maklerlər qeyri-yaşayış təyinatlı torpaqları alaraq bu evləri tikir və ucuz qiymətə satır. Bu ərazilərdə isə payız, qış vaxtı bataqlıq zonalar əmələ gəlir. Bundan əlavə evə yaxın ərazilərdə məktəb, uşaq bağçası olmur. Ən əsası isə bu evlərin keyfiyyəti aşağı olur".  Məsələ ilə bağlı hüquqşünas Nəriman Əliyev bildirib ki, rəsmi sənədi olmayan evlərin mülkiyyət hüquqlarının mühafizəsi də mümkün olmur: "Bu cür evlər sökülə də bilər, dövlət ehtiyacları tərəfindən müsadirə də edilə bilər. Belə ki, mülkiyyət hüququ həm sərəncam, həm sahiblik, həm də istifadə hüququnu özündə birləşdirir. Daşınmaz əmlak mülkiyyət hüququ isə onun rəsmi olaraq dövlət tərəfindən qeydiyyata alındığı andan əmələ gəlir. Əgər bu mülkiyyət hüququ dövlət tanınmırsa, bu vətəndaşlar gələcəkdə mülkiyyət hüququnun tanınması istiqamətində böyük çətinliklərlə üzləşə bilərlər".  Qeyd edək ki, 2023-cü ilin oktyabrın 1-dən çıxarışla təmin olunmamış evlərə komunal xidmətlərin göstərilməsi, qadağan olunub. Amma buna baxmayaraq maklerlər tikdikləri evləri müxtəlif yollarla kommunikasiya xətlərinə qoşmağa çalışırlar. Müvafiq qurumlar isə hər an bu xətləri kəsə bilərlər.

Ukrayna Prezidenti Volodimir Zelenski Moskvada 9 May – Qələbə Günü paradına qatılmağı planlaşdıran xarici ölkə nümayəndələrinin təhlükəsizliyi ilə bağlı risklərə diqqət çəkib. O, Rusiya paytaxtında keçiriləcək tədbirdə iştirakın müəyyən təhlükələr daşıdığını vurğulayıb. Buna cavab olaraq, Rusiya Təhlükəsizlik Şurasının sədr müavini Dmitri Medvedyev sosial media hesabında sərt açıqlama verib. O bildirib ki, Qələbə Günü təxribat baş verərsə, Kiyev mayın 10-nu görməyəcək. Bəs Zelenski bu riski gözə alacaqmı? Bu barədə Moderator.az-a danışan politoloq Oqtay Qasımov bildirib ki, Zelenskinin bəyanatı əsasən xəbərdarlıq və mesaj xarakteri daşıyır: "Düşünmürəm ki, 9 Mayda – bir çox xarici dövlət rəhbərlərinin də iştirak edəcəyi bir tədbir zamanı Moskvaya birbaşa hücum həyata keçirilsin. Doğrudur, Ukraynanın belə bir təcrübəsi var – bir müddət əvvəl PUA-lar Kremlə qədər uça bilmişdilər. Lakin bu bəyanat daha çox həmin tədbirdə iştirak edəcək ölkələrə siyasi mesaj xarakteri daşıyır". Politoloq qeyd edir ki, Zelenskinin əsas məqsədi bu bəyanat vasitəsilə həmin dövlətlərin diqqətini Rusiya-Ukrayna müharibəsindəki təhlükəli vəziyyətə yönəltməkdir: "Şübhəsiz ki, Zelenski yaxşı başa düşür ki, 9 Mayda Moskvaya zərbə endirilsə, bunun qarşılığı çox sərt ola bilər. Üstəlik, tədbirdə iştirak edən xarici dövlət rəhbərləri də təhlükə altına düşərsə, bu, Ukraynanın beynəlxalq imicinə mənfi təsir göstərə bilər". O. Qasımov hesab edir ki, Zelenski Moskvanın birbaşa hədəf alınmasından çəkinəcək. Lakin  həmin günlərdə Rusiyanın digər bölgələrində hərbi obyektlərə və infrastruktur nöqtələrinə hücumlar həyata keçirilə bilər: "Bu hücumlar da Ukraynanın özünü müdafiə hüququ çərçivəsində qiymətləndirilə bilər. Ukrayna təcavüzə məruz qalmış bir ölkədir və atdığı addımlar da əsasən bu çərçivədə dəyərləndirilməlidir". Sonda politoloq vurğulayıb ki, Moskvanın 9 Mayda hədəf alınması ehtimalı aşağıdır. Çünki bu, Ukrayna üçün beynəlxalq aləmdə əlavə diplomatik risklər yarada bilər.

May ayında Günəş fəallığının artması Yer kürəsində bir neçə maqnit qasırğasının qeydə alınmasına səbəb olacaq. Mütəxəssislərin proqnozlarına əsasən, bu hadisələr müxtəlif günlərdə müxtəlif intensivliklə baş verəcək və xüsusilə meteohəssas insanlar üçün sağlamlıq problemləri yarada bilər. 4-5 may – orta səviyyəli maqnit aktivliyi (G1-G2 səviyyəsində)  11 may – aşağı səviyyəli dalğalanmalar 16-18 may – güclü maqnit qasırğası (G3 səviyyəsində) 23 may – yenidən orta güclü aktivlik 28-29 may – zəif maqnit dəyişiklikləri Xüsusilə G3 səviyyəsində olan maqnit qasırğaları bəzi bölgələrdə texnoloji sistemlərə və rabitəyə təsir göstərə bilər. Həmçinin, ürək-damar xəstəliklərindən əziyyət çəkən şəxslərdə baş ağrısı, yuxusuzluq, halsızlıq kimi simptomların artması mümkündür. Sozcu.az xəbər verir ki, son dövrlər sosial şəbəkələrdə maqnit qasırğaları ilə zəlzələlər arasında əlaqə ola biləcəyi barədə iddialar yayılıb. Bu narahatlıqlar əsasən Günəş fəallığının artdığı dövrlərdə baş verən bəzi zəlzələ hadisələri ilə üst-üstə düşən təsadüfi vaxtlara əsaslanır. Lakin elmi cəhətdən bu iddiaların əsaslandırılması üçün kifayət qədər sübut yoxdur. Geofiziklər bildirirlər ki, zəlzələlər Yerin daxili qatlarında baş verən təbii geoloji proseslərin nəticəsidir. Əsas səbəb tektonik plitələrin hərəkətidir. Bu proseslər minlərlə kilometr dərinlikdə baş verdiyindən, Günəşdən gələn maqnit sahəsindəki dəyişikliklərin bu hərəkətlərə təsir etmək ehtimalı praktiki olaraq yoxdur. Bəzən insanlar Günəş fəallığının artdığı dövrlərdə zəlzələ hadisələrinin çoxaldığını müşahidə etdiklərini deyirlər. Amma bu, yalnız təsadüfi zaman uyğunluğudur. Statistika və elmi təhlillər bu iki hadisə arasında səbəb-nəticə əlaqəsini sübut etmir. Zəlzələlər geoloji aktiv zonalarda baş verir və onların baş vermə vaxtını dəqiq proqnozlaşdırmaq hələ ki, mümkün deyil. Eyni mövzu ilə bağlı NASA və Avropa Kosmik Agentliyi (ESA) kimi nüfuzlu qurumlar da dəfələrlə açıqlama verərək bildiriblər ki, Günəşdəki partlayışlar və nəticəsində yaranan maqnit qasırğaları Yer kürəsində seysmik aktivliyə səbəb olmur. Bu baxımdan, may ayında gözlənilən maqnit qasırğaları ilə bağlı ictimaiyyətin zəlzələ riski ilə bağlı narahatlığı elmi əsaslara söykənmir və bu kimi xəbərlərin yayılması panika yaratmaqdan başqa bir nəticə vermir.yenisabah)

"2030-cu ilə kimi tikiləcək 10 yeni stansiyanın dəqiq yerlərinin müəyyənləşdirilməsi prosesi tamamlanmaq üzrədir". Bu fikirləri "Bakı Metropoliteni" QSC-nin mətbuat katibi Bəxtiyar Məmmədov metroda gözlənilən yeniliklərlə bağlı danışarkən deyib. O bildirib ki, 2030-cu ilə qədər icrası nəzərdə tutulmuş genişmiqyaslı layihəyə əsasən, 10 yeni stansiyanın 6-sı "bənövşəyi" xəttin, 4-ü isə "yaşıl" xəttin üzərində yerləşəcək: "Stansiyalar arasında tunellərin və keçid yollarının layihələndirilməsi işi aparılır". B.Məmmədov əlavə edib ki, yeni stansiyalar sayəsində Bakı-Sumqayıt-Xırdalan və digər istiqamətlərdən gələn sərnişinlər şəhər mərkəzinə daha rahat şəkildə çatacaqlar: "Yeni şəbəkə "Nizami", "Sahil" və "Xətai" stansiyalarında digər xətlərlə keçidi təmin etməklə sərnişin axınını xeyli optimallaşdıracaq. "Yaşıl" xətt üzərində yerləşəcək 4 yeni stansiya isə 8 Noyabr prospektindən Əhmədliyə qədər olan ərazilər və ətraf kəndlər üçün mühüm əhəmiyyət daşıyacaq. Layihə, həmçinin, xətlərin ayrılması baxımından da önəmlidir".Oxu.az

Bakının Yasamal rayonunda qətl hadisəsi törədilib. Sozcu.az Teleqraf-a istinadən xəbər verir ki, hadisə Rahib Tağıyev küçəsi ev 20-də baş verib. Belə ki, 1992-ci il təvəllüdlü Murad Əmirov atası Nizami Əmirova bir neçə bıçaq zərbəsi vurub. N.Əmirov hadisə yerində ölüb. M.Əmirovun özü də xəsarət alıb. O, Yasamal Rayon Polis İdarəsinin əməkdaşları tərəfindən saxlanılıb. Faktla bağlı cinayət işi başlanılıb, araşdırma aparılır.

Ürək xəstəliyi səbəbindən uzun müddətdir reanimasiyada olan DEM Partiyasından olan millət vəkili, TBMM sədr müavini Sırrı Süreyya Öndər vəfat edib. Sozcu.az xəbər verir ki, bu barədə Türkiyə mediası yazıb. Bildirilib ki, 62 yaşlı Öndər müalicəsinin 18-ci günündə çoxsaylı orqan çatışmazlığı səbəbindən dünyasını dəyişib.