Dekabrın 7-də Azərbaycan və Ermənistan arasında qarşılıqlı etimad tədbiri kimi hərbçilərin azad edilməsi barədə razılıq əldə olunub. Dekabrın 13-də Azərbaycan-Ermənistan sərhədinin Qazax rayonundan keçən hissəsində hərbi qulluqçuların qarşılıqlı şəkildə təhvil verilməsi həyata keçirilib. Nəticədə, Azərbaycan Ordusunun hərbi qulluqçuları-Hüseyn Axundov və Aqşin Bəbirov ölkəmizə təhvil verilib. Xatırladaq ki, bu ilin aprel ayında Naxçıvan Muxtar Respublikasının Şahbuz rayonunun Ermənistanla sərhədboyu ərazisində əlverişsiz hava şəraitində məhdud görmə səbəbindən Azərbaycan Ordusunun itkin düşmüş əsgərləri - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu Ermənistan tərəfindən əsir götürülmüşdü. Aqşin Bəbirov və Hüseyn Axundov həqiqi hərbi xidmətdə olarkən əsir düşüblər.  Maraqlıdır ki, hərbçilər yenidən hərbi xidmətə cəlb ediləcəkmi? Modern.az məsələni aydınlaşdırmaq üçün Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinə müraciət edib. Qurumun mətbuat katibi Pərviz Sədrəddinov bildirib ki, hərbçilərin əsirlikdə olduğu dövr də onların xidmətinə daxildir: “Hərbçi əsir düşdükdə həmin müddət ərzində onun xidmətini dondurmaq deyə bir məsələ yoxdur. Əsirlik müddəti də hərbçinin müddətli həqiqi hərbi xidmətinə daxildir”. Qeyd edək ki, bu müddəa "Hərbi vəzifə və hərbi xidmət haqqında" qanunda da nəzərdə tutulub. Qanunun 27-ci maddəsinə görə, düşmən tərəfinə könüllü keçmə hallarından başqa hərbçi əsirlikdə olarsa, həmin müddətə hərbi qulluqçular hərbi xidmət vəzifələrinin icrasında sayılırlar.

Vətən müharibəsi qazisi Orxan Quliyev vəfat edib. Sozcu.az iqtisadiyyat.az-a istinadən xəbər verir ki, 24 yaşlı qazi axşam saatlarında dünyasını dəyişib. O, bu gün torpağa tapşırılacaq. Qeyd edək ki, Sabirabad rayonunun Azadkənd kənd sakini Orxan Cümşüd oğlu Quliyev Vətən müharibəsində bir ayağını itirib. O, Ağdamda gedən döyüşlər zamanı ayağından qəlpə yarası alaraq Bakıda hospitala yerləşdirilib və əməliyyat olunub, amma sağalaraq 14 gündən sonra isə təkrar döyüşlərə qatılıb. Müharibədən sonra isə ayağındakı şiş səbəbilə yatağa məhkum olub. O, sağ baldırında olan şiş toxumasının böyüməsi səbəbindən bu ilin aprelin 18-də Sabirabad Rayon Mərkəzi Xəstəxanasından Milli Onkologiya Mərkəzinə göndəriş əsasında əməliyyat olunub və ayağı amputasiya edilib. Allah rəhmət eləsin!

"2024-cü ilin fəaliyyət planında məktəblərin optimallaşdırılması nəzərdə tutulub". Bunu APA-ya açıqlamasında Məktəbəqədər və Ümumtəhsil üzrə Dövlət Agentliyinin rəhbəri Eşqi Bağırov deyib. O bildirib ki, bura bəzi məktəblərin birləşdirilməsi, bəzilərinin ləğvi, bəzilərinin ümumi ortadan tam ortaya keçidi nəzərdə tutulur: "Bu il də bənzər addımlar atılıb. Bir neçə məktəbə ibtidai sinifdən qəbulu dayandırmışıq. Yalnız yuxarı siniflərdə qəbul aparılıb. Bu, xüsusən böyük qayıdışla əlaqədar məcburi köçkün məktəblərini əhatə edir".

Rusiyanın Su-25 qırıcısı özünün hava hücumundan müdafiə qüvvələri tərəfindən vurulub. Sozcu.az xəbər verir ki, bu barədə Ukrayna Hərbi Hava Qüvvələrinin komandanı Nikolay Oleşuk teleqramda bildirib. “Əminliklə deyə bilərəm ki, Rusiyanın Su-25 qırıcısını Ukraynanın HHM-i vurmayıb! Bu, Rusiya zenitçilərinin dəqiq və yüksək səviyyədə icra olunmuş işidir ki, buna görə bütün Ukrayna xalqından onlara təşəkkür düşür!”, – hərbçi qeyd edib.

Roma Papası Fransisk Təl-Əvivin Qəzzada terror taktikalarından istifadə etdiyi, o cümlədən İsrail hərbçilərinin kilsə binasına sığınan iki xristian qadını öldürməsi xəbərindən təəssüfləndiyini bildirib. Sozcu.az xəbər verir ki, bu barədə "Röyters" məlumat yayıb. "Qəzzadan çox ciddi və ağrılı xəbərlər almağa davam edirəm. Silahsız mülki şəxslər bomba və atışmaların hədəfindədir. Bu, hətta terrorçuların olmadığı, ailələrin, uşaqların, xəstələrin, əlillərin, rahibələrin olduğu kilsə kompleksində baş verib. Bəziləri deyəcək: "Bu, müharibədir, bu terrorizmdir". Bəli, bu müharibədir. Bu terrorizmdir",- o bildirib.

Zakarpatya vilayətinin məhkəməsi dekabrın 15-də Keretskovski kənd şurasının iclası zamanı üç qumbara partladan yerli deputat Sergey Batrinin barəsində həbs qətimkan tədbiri seçib. Sozcu.az xəbər verir ki, bu barədə Ujqorod rayon məhkəməsinin səhifəsində deyilir. “Keretskov kənd sovetinin hazırkı deputatı olan 54 yaşlı Ukrayna vətəndaşı barəsində girov imkanı olmadan həbs qətimkan tədbiri seçilib”, - deyə bildirilib. Məhkəmə qeyd edib ki, deputat və vəkilləri prokurorun şübhəlinin həbs olunması ilə bağlı vəsatətinə etiraz etməyiblər. Qeyd edək ki, dekabrın 15-də adıçəkilən deputat Kereçkov kənd şurasının iclasının keçirildiyi zala daxil olaraq özü ilə gətirdi 3 qumbaranı partladıb. Hadisə nəticəsində deputat da daxil olmaqla, 26 nəfər yaralanıb.

İsrail və HƏMAS hərəkatı Qəzza zolağında atəşkəsi bərpa etməyə hazırdır. Sozcu.az xəbər verir ki, bu barədə Misirin təhlükəsizlik orqanlarındakı mənbələrə istinadən “Reuters” agentliyi məlumat yayıb. Agentliyin məlumatına görə, danışıqların detalları ilə bağlı tərəflər arasında fikir ayrılıqları qalmaqdadır.

Almaniya silahlı qüvvələri Litvada daimi briqada yerləşdirəcək. Sozcu.az xəbər verir ki, bu barədə Almaniyanın DPA agentliyi məlumat yayıb. Bildirilir ki, briqada 2025-ci ildə fəaliyyətə başlayacaq. Birləşmənin ilkin komandanlığı 2024-cü ilin ikinci rübündə Litvada yerləşdiriləcək. Məlumata görə, 2024-cü ilin sonunadək birinci briqada komandirinin başçılıq etdiyi tam hüquqlu dislokasiya qrupu Litvaya gələcək. Almaniyanın müdafiə naziri Boris Pistorius Almaniyanın 2023-cü ilin iyununda Litva ərazisinə silahlı qüvvələr briqadası yerləşdirmək planlarını açıqlayıb. O, briqadaya 4 minə yaxın hərbçinin daxil olacağını bildirib.

Ukrayna Silahlı Qüvvələrinin baş komandanı Valeri Zalujnının kabinetində dinləmə cihazı tapılıb. Sozcu.az xəbər verir ki, bu barədə RBC-Ukrayna agentliyi hərbi dairələrdəki mənbələrə istinadən məlumat yayıb. Bildirilib ki, qurğu şənbə günü aşkar edilib. Dinləm cihazı naməlum tipli elementlərlə təchiz olunub, ona görə də onların quraşdırıcısı müəyyən edilməyib.

Milli Hidrometeorologiya Xidmətinin məlumatına görə, dekabrın 18-i gündüzədək ölkə ərazisində hava şəraitinin yağıntılı keçəcəyi, temperaturun xeyli enəcəyi və güclü külək əsəcəyi proqnozlaşdırılır. Sozcu.az xəbər verir ki, bununla bağlı Fövqəladə Hallar Nazirliyi əhaliyə müraciət edərək, müvafiq təhlükəsizlik qaydalarına riayət etməyə çağırır. Qeyd edilib ki, güclü külək zamanı yüngül konstruksiyalı və müvəqqəti tikililərdən, bina və reklam lövhələrindən uzaq durmaq, elektrik dirəyi və naqillərinin, hündür ağacların altında dayanmamaq tövsiyə olunur. Həmçinin, güclü küləyin baş verən yanğınların söndürülməsi ilə əlaqədar yaratdığı çətinlikləri nəzərə alaraq, küləkli hava şəraitində yanğın təhlükəsizliyi qaydalarına xüsusilə ciddi riayət edilməlidir. Bundan əlavə, soyuq və yağıntılı hava şəraiti qaz və elektrik qızdırıcı cihazlarından istifadənin xeyli artmasına səbəb olur. Bu zaman elektrik şəbəkəsinin həddindən artıq yüklənməsi, habelə nasaz, qeyri-standart və ya kustar üsulla hazırlanmış qaz və elektrik qızdırıcı cihazlarından istifadə, ehtiyatsızlıq yanğınla nəticələnə, həmçinin dəm qazı təhlükəsi yarada bilər. Odur ki, nasaz, qeyri-standart və ya kustar üsulla hazırlanmış qızdırıcı cihazlardan istifadə edilməməli, elektrik şəbəkəsi həddindən artıq yüklənməməli, işlək vəziyyətdə olan qızdırıcı cihazlar nəzarətsiz qoyulmamalı, bunların bilavasitə yaxınlığında yanar materiallar və asan alışan mayelər saxlamamalı, cihazlardan zavod istehsalçılarının təlimatlarına (tövsiyələrinə) uyğun istifadə edilməlidir: "Unutmayın: Qaydalara biganəlik – həyatımıza təhlükədir! Təhlükə zamanı 112-yə zəng edin!".

“Biz Qarabağı qaytara bilərik, lakin ağlımızda, qəlbimizdə, yaddaşımızda ondan imtina etsək, itkisi qaçılmaz olacaq”. Sozcu.az xəbər verir ki, bunu Ermənistanın Respublikaçılar Partiyasının vitse-prezidenti Armen Aşotyan deyib. Dünyanın, o cümlədən Ermənistanın Qarabağı Azərbaycan ərazisi kimi tanıması reallığını unudan Aşotyan iddia edib ki, guya “artsax” problemi qlobal siyasi əhəmiyyət kəsb edir: “Mənim üç maddəlik şərtim var. Birinci şərt “artsax”ın qaytarılmasını arzu, məqsəd, ümumxalq ideyası kimi qəbul etməkdir. İkinci şərt bu məqsədə çatmaq üçün kompleks səylər göstərmək, erməni potensialını tam üzə çıxarmaq və istiqamətləndirmək, dövləti gücləndirməkdir. Üçüncü şərt əlverişli beynəlxalq vəziyyət, geosiyasi iqlimin yaranmasıdır. Tarix sübut edir ki, bu da mümkündür. Mən öz yanaşmamı qısaca xülasə etsəm, “artsax”ı qaytarmaq üçün biz işləməli və əlverişli şəraitdə istəyimizi həyata keçirməyə hazır olmalıyıq. Bunun mümkün olduğunu yəhudilər sübut etdilər: təxminən 2000 ildən sonra Qüdsü geri aldılar. Mənim təsvir etdiyim alqoritmlə Paşinyan bir araya sığmır. Ona görə də ilk növbədə Ermənistanda hakimiyyətin dəyişdirilməsinə ehtiyac var”. Qeyd edək ki, A.Aşotyanın bu iddiası erməni müxalifətinin Nikol Paşinyanı qaralamaq cəhdindən başqa bir şey deyil. Ermənistan əhalisinin sürətlə azaldığı bir vaxtda hansısa “yəhudi düsturu”ndan danışan Aşotyan Qüdsün 2000 il sonra “qaytarılması”na işarə edir. Onun məntiqi ilə ermənilər Qarabağı 4023-cü ildə qaytara bilərlər. Lakin əhalisinin sürətlə azaldığı bir vaxtda ermənilərin o tarixə qədər varlığını davam etdirməsi mümkünsüz görünür.globalinfo)

“Bakıda artıq tıxacın günü, saatı yoxdur”. Sozcu.az xəbər verir ki, bu barədə iqtisadçı Rövşən Ağayev özünün sosial şəbəkə hesabında yazıb. O bildirib ki, tıxacların artmasının, həmçinin mühüm bir iqtisadi səbəb də var: “Bakı-Sumqayıt yolunda şənbə-bazar, hətta axşam saat 10-11 arası belə tıxac insanları boğur. Şəhərin mərkəzində də oxşar vəziyyətdir. Ağır tıxacın olmamalı olduğu günorta saatlarında belə küçələrdə fəlakət yaşanır. Bunun xaotik məskunlaşmadan və qeyri-effektiv ictimai nəqliyyatdan qaynaqlanan çox səbəbləri var və sahə mütəxəssisləri, blogerlər bunları zaman-zaman dilə gətirirlər. Amma güman ki, burada mühüm bir iqtisadi səbəb də var: paytaxtda normal iş şəraitinə, iş intizamına malik iş yerlərindən daha çox, insanları hüquqa uyğun normal məşğulluq şərtlərilə təmin etməyən iş yerləri üstünlük təşkil edir. Söhbət o iş yerlərindən gedir ki, qeyri-formaldır, iş saatları normadan artıqdır, səhərdən gecəyə kimi davam edir, yaxud layiqli əmək haqqı olmadığındına insanlar gün içində yarımçıq iş saatları ilə fərqli iş yerlərinin arasında ora-bura qaçır və s.”

Ukrayna müharibənin 662-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 346 070 hərbçi, 5 739 ədəd tank, 10 692 ədəd zirehli döyüş maşını, 8137 ədəd artilleriya sistemi, 923 ədəd RYAS (reaktiv yaylım atəş sistemi), 609 hava hücumundan müdafiə sistemi, 324 ədəd hərbi təyyarə, 324 ədəd helikopter, 10 766 ədəd avtomobil texnikası, 6278 ədəd PUA, 1 610 qanadlı raket, 22 gəmi/kater, 1 sualtı qayıq, 1 194 xüsusi avadanlıq itirib.

Amerikanın “Virciniya” sinfinə aid “Missuri” nüvə sualtı qayığı Cənubi Koreyanın Pusan şəhəri sahillərinə yan alıb. Sozcu.az xəbər verir ki, bu barədə Cənubi Koreya Müdafiə Nazirliyi məlumat yayıb. Qeyd edək ki, noyabrın 22-də ABŞ-ın “Los-Anceles” sinfinə aid “Santa Fe” nüvə sualtı qayığı Cənubi Koreyanın Ceju adasındakı hərbi dəniz bazasına çatmışdı.

Kiyev Ukrayna ərazilərinin işğaldan azad edilməsinin gedişatından məyusdur. Bu “prioritet” müvəqqəti olaraq rus qoşunlarının maksimum məhv edilməsinə dəyişdirilib. Sozcu.az xəbər verir ki, bu barədə Almaniyanın "Bild" nəşri Ukrayna Silahlı Qüvvələrinin zabitlərinə istinaddən bildirib. Nəşr Ukraynanın yeni “sərt” strategiya elan etdiyini bildirib: "Əsas məqsəd cəbhənin bu və ya digər hissəsində Ukraynanın xeyrinə maksimum müsbət məhvetmə əmsalına nail olmaqdır. Bu ssenari Ukrayna qoşunlarının qüvvələr balansında “qalibiyyəti” olmayan mövqelərdən geri çəkilə biləcəyini nəzərdə tutur".

“Qərb ölkələri Rusiyanın dondurulmuş aktivlərinə həbs qoyulması ilə bağlı danışıqları Ukraynanın xeyrinə aktivləşdirib”. Sozcu.az xəbər verir ki, bu barədə “Financial Times” məlumat yayıb. Bildirilir ki, son həftələrdə Birləşmiş Ştatlar şəxsi danışıqlarda müsadirə məsələlərində getdikcə daha iddialı mövqe tutaraq, G7-nin iclaslarında bunu beynəlxalq hüquqa uyğun olaraq həyata keçirməyin bir yolunun olduğunu bildirib: “Adının açıqlanmasını istəməyən bir məmurun sözlərinə görə, Vaşinqton hesab edir ki, aktivlərin müsadirəsi ilə bağlı qərar tez verilə bilər. Onun sözlərinə görə, bu məsələ G7 liderlərinin müharibənin ikinci ildönümünə təsadüf edən mümkün görüşündə müzakirə oluna bilər” Nəşr qeyd edir ki, müsadirə ideyası Aİ və ABŞ daxilində siyasi fikir ayrılıqları fonunda daha fəal müzakirə olunmağa başlayıb.

Müdafiə Nazirliyində 143 milyonluq mənimsəməyə görə ittiham olunanlardan dörd nəfərin növbəti məhkəmə prosesi keçirilib. “Qafqazinfo”nun məlumatına görə, cinayət işini Bakı Hərbi Məhkəməsində Fikrət Əliyevin sədrlik etdiyi hakimlər heyəti araşdırır.  Bu iş üzrə Müdafiə Nazirliyinin Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin Maliyyə idarəsinin rəisi olmuş Cəlal Kazımov, Quru Qoşunların Maliyyə idarəsinin sabiq rəisi Bayram Bayramov və Hərbi Dəniz Qüvvələrinin sabiq Maliyyə idarəsinin rəisi Vüsal Əlizadə müttəhim kürsüsündə əyləşiblər.  Müttəhimlərin hər biri 2 ilə yaxındır həbsdədir. Eyni cinayət əməlində təqsirləndirilən şəxslərdən bir neçəsinin işi başqa icraatda araşdırılır. İşdə ən çox adı keçən polkovnik Rafael Xələfov da daxil olmaqla bir neçə nəfərin işi ilə bağlı isə ibtidai araşdırma davam edir.  Budəfəki iclasda hərbi hissələrdə maliyyə xidməti rəisləri işləyən zabitlər şahid qismində ifadə veriblər. Şahidlər özləri də bu iş üzrə yeyintidə iştirak ediblər. 143 milyon hesablanmış dəymiş ziyanın müəyyən hissəsi onların ayağına yazılıb. Lakin istintaq orqanı onları təqsirləndirilən şəxs qismində cəlb etməyib, ziyanı ödəmələri üçün şans verib.  Hərbi mühasiblər hamısı, demək olar ki, eyniməzmunlu ifadə veriblər. Nazirliyin maliyyə idarəsindən hərbi hissələrə vəsait ayrılıb, həmin pulun da bir hissəsi özlərinin dediyi kimi bineyi-qədimdən mövcud olan qayda üzrə mənimsənilib. Şəxsi heyətin təminatı üçün ayrılan pullar necə bölünüb? “N” saylı hərbi hissənin maliyyə xidmətinin rəisi Elşən Salmanov deyir ki, nazirliyin maliyyə idarəsindən onlara ayrılan vəsaitdən hər dəfə 20 faiz hərbi korpusun maliyyə şöbəsinə, 30 faizi isə təftişə verilib. Yerdə qalan məbləğ isə şəxsi heyətin xərclərinə və əlavə xərclərə sərf olunub.  Generalın vəkili Rəşad Mirmehdizadənin - “əlavə xərclər nə idi, hara pul verirdiniz?” - sualına şahid: “Vermədiyimiz yer var idi ki? Elə hər yerə”, - cavabını verib. Şahidin özü tərəfindən işlədiyi dövrdə bir milyon manatdan çox mənimsəmə aşkar edilib. Dövlətə dəymiş ziyan kimi yazılmış həmin məbləğin 260 min manatını geri ödəyib. Onun özünə aid ziyanın böyük hissəsini ödəməməsi vəkil Mirmehdizadəni yenidən ayağa qaldırıb: “Bu cinayət iştirakçılıqla törədilib. Mənimsənilən məbləğ də hamıya aiddir. Nizami Məmmədov 12 milyon manat pul ödəyib oturub içəridə, elə adamlar var heç nə ödəməyiblər, amma çöldədirlər. Həmin ödənilməyən ziyana görə bu adamlar həbsdə qalıb. Buna bir aydınlıq gətirmək lazımdır”. Salmanov dəymiş ziyanı tam ödəməyə çalışdığını bildirib.  “O şeytanın yer üzündəki timsalıdır…” Şahid ifadəsi əsnasında Nəzarət və təftiş şöbəsinin müdiri olmuş polkovnik Rafael Xələfovun əməllərindən danışıb, onu ən böyük düşməni adlandırıb. Şahidin dedikləri generalın digər vəkili Faiq Hüseynovda sual yaradıb. Vəkil ondan Xələfovla nəyə görə münasibətinin olmadığını soruşub: “Rafael Xələfovla həm də şəxsi işlə bağlı çox pis münasibətdə olmuşuq. O, şeytanın yer üzündəki timsalıdır. Mənə çox pisliyi dəyib. Bir dəfə Nizami Məmmədovun qəbulunda oldum, dedim ki, bəs, bu Xələfov sizə mənim haqqımda səhv məruzələr edir”. General Məmmədov şahidin onun yanına gəlməsini təsdiqləyib. Deyib ki, şahid bir dəfə onun yanına gəlib, sonralar Rafael Xələfov gəlməsinə imkan verməyib. Növbəti şahid Kərəm Xəlilov ordu korpuslarından birinin maliyyə xidmətində, sonradan nazirliyin özündə işləyib. Onun vəzifə səlahiyyətlərinə daxil olan işlərdən biri hərbi hissələrdə yoxlamalar keçirmək, aşkar olunmuş qayda pozuntuları ilə bağlı şöbə rəisinə məruzə etmək olub. Onun dediyinə görə, bütün yoxlamalar barədə birbaşa Rafael Xələfova məruzə edib. Onun tapşırığı ilə hərbi hissələrdən toplanmış pulları da elə ona təhvil verib.  “Xələfov əvvəl ifadəsində deyib ki, bir dəfə hərbi hissələrdən birindən alınmış 190 min manat pulu siz də daxil olmaqla müfəttişlərlə bölüb. Amma sonradan üzləşmədə boynuna almayıb. Deyib ki, "revizor”larla bölməmişəm. Bu nə məsələ idi?” - deyə vəkil R.Mirmehdizadə soruşub. “Rafael üzləşmədə nəyi boynuna alırdı ki, bunu da alsın?” - deyə şahid cavab verib. Vəkil bu məqamda Rafael Xələfovun məhkəmədə iştirakının təmin edilməsi barədə yenidən vəsatət qaldırıb: “Ötən həftə mən bu barədə vəsatət verdim, amma təmin edilmədi. İndi görürük ki, ehtiyac var. Bütün şahidlər deyirlər ki, onları Rafael aldadıb. Xahiş edirəm, gəlib otursun burada, aydınlıq gətirsin”. Vəsatət generalın digər vəkilləri Faiq Hüseynov və Cahangir Cavadov tərəfindən müdafiə edilib. Sədrlik edən hakim vəsatəti təmin etməyib.  Müdafiə Nazirliyinin İşlər idarəsinin sabiq müdiri İlqar Məmmədov da iş üzrə şahid qismində ifadə verib. Şahid deyib ki, maliyyə idarəsi hər ayın sonu şəxsi heyətin sayına uyğun olaraq onlara vəsait köçürüb. İ.Məmmədovun sözlərinə görə, ümumi köçürmədən əlavə müəyyən vaxtlarda əlavə xərclər olub. Həmin xərclər də Nizami Məmmədov tərəfindən qarşılanıb: “Məsələn, elə olurdu ki, yuxarı rəhbərlikdən məlumat gəlirdi ki, qonaqlar gələcək. Onları qarşılamaq və hədiyyələr almaq üçün general Məmmədovdan xahiş etmişik əlavə pul ayırıb”. Baş qərargah rəisi göstərişlər verib… Hakim Fikrət Məmmədov şahiddən sabiq Baş qərargah rəisinin (Nəcməddin Sadıkov - red.) ona hansısa göstəriş verib-vermədiyini soruşub. Şahid Nizami Məmmədovun Baş qərargah rəisinin göstərişi ilə pul ayırdığını bildirib: “Rəsmi tapşırıq olurdu, general Məmmədov da yerinə yetirirdi. Elə olurdu ki, gecə ilə çağırırdı ki, rəhbərliyin tapşırığı var. Pul verirdi, həll edirdik”.  Müttəhim general şahidin ifadəsinə münasibət bildirərkən işlər idarəsi üçün qonaqların qarşılanması məqsədilə vəsait ayrılmadığını, öz hesabına həll etdiyini vurğulayıb.  İfadə verən digər şahidlər də bənzər danışıblar. Onlar da ifadələrində şəxsi heyətin ehtiyacları üçün ayrılan vəsaitlərin bir hissəsinin tabe olduqları korpusun maliyyə şöbəsinə, bir hissəsini təftişə verdiklərini, qalan pulun isə bir qismini özləri mənimsədiklərini etiraf ediblər. Onlar hadisə baş verən dövrdə əvvəllər də eyni qayda ilə işlədiklərini ifadə ediblər. “Lap qədimdən qayda belə olub”, - ifadə verən maliyyə xidməti rəislərindən biri belə deyib.  Maliyyə xidməti rəislərindən biri bu cür işləmələrini el məsəli ilə müqayisə edib: “Palaza bürün, ellə sürün”. Proses gələn cümə günü davam edəcək. Qeyd edək ki, 2022-ci ilin əvvəlində Dövlət Təhlükəsizliyi Xidməti Müdafiə Nazirliyində qanun pozuntuları ilə bağlı əməliyyat keçirib. Təqsirləndirilən şəxslərə qarşı Cinayət Məcəlləsinin 179.4-cü (xüsusilə külli miqdarda mənimsəmə) və 313-cü (vəzifə səlahiyyətlərini aşma) maddələri ilə ittiham verilib.

 "Kepka" qoymaq arxayınlıq, özünəgüvən əlamətidir. Sərginin adı da rəmzidir: "Kommunizmin ölümünün görüntüləri"..." Baş nazir Nikol Paşinyan və xanım Anna Akopyan Gümrüdə Sergey Merkurovun ev-muzeyində olub, burada rəssam Karen Ohanyanın “Kommunizmin ölümünün görüntüləri” adlı fərdi sərgisində nümayiş etdirilən nümunələrlə tanış olublar. Moderator.az xəbrə verir ki, bu haqda "Armenpress" məlumat yayıb. Rəssamın təşəbbüsü ilə oktyabrın 22-də açılan sərgi 2024-cü ilə qədər davam edəcək. Sərgidə İki janrın üstünlük təşkil etdiyi 12 əsər nümayiş etdirilir: mənzərə və natürmort.Karen Ohanyanın yeni silsilə əsərlərində bu iki ənənəvi janr gözlənilməz, yenilikçi və təsirli şərh alıb. O, əsərlərində kommunizmin ölümü və müharibələr haqda bəzən bilavasitə danışır, bəzən də təsirli təsviri simvollar, metaforalar yaradır. P.S. Xəbərdə əsas diqqəti cəlb edən sərgidəki rəsmlər yox, Paşinyanın yeni, orijinal geyimdə görüntüləridir. Ermənistan baş naziri, demək olar ki, ilk dəfədir, belə stildə baş geyimində- "kepka"da görünür... "Kepka" qoymaq arxayınlıq, özünəgüvən əlamətidir. Sərginin adı da rəmzidir: "Kommunizmin ölümünün görüntüləri"... Görünür, Paşinyan artıq saxta kommunizmin demokratiyanın hücumları altında məhv olduğunu, özünün də "kommunizm" şinelindən çıxmış Putin qarşısında qalib olacağını nümayiş etdirməyə çalışır...

Paytaxtın illərdir bitməyən “xəstəliyi” var. Söhbət Bakının kanalizasiya problemindən gedir.  Məhəmməd peyğəmbərin bu mövzuda dillər əzbəri olan bir hədisi var: “Təmizlik imandan gəlir...” Belə çıxır ki, biz dildə imanlıyıq, əməldə yox?  İllərdir ki, Bakıya üç-beş damcı yağış düşən kimi şəhər Venesiyanı xatırladır. Əksər qəsəbələrdə və Bakıətrafı ərazilərdə yağışlı havalarda hərəkət çətinləşir, gölməçələrin sayı artır.  Bəs problemin əsl səbəbi nədir? Bizim.media mövzu ilə bağlı ekspertlərin fikirlərini öyrənib. Nəqliyyat məsələləri üzrə ekspert Aslan Əsədovun fikrincə, Bakının kanalizasiya ilə bağlı problemi SSRİ dövründən bizə miras qalıb: “SSRİ-yə daxil olan digər böyük paytaxt şəhərlərinə baxsaq, görərik ki, ənənəvi problem hər bir ərazidə var. Bakı şəhərinin kanalizasiya problemi XIX-cu əsrin əvvəllərində yaradılmış sistemə əsaslanır. Bütün qoşulmalar bu sistem üzərindən aparılır.  İkinci Dünya müharibəsinin əvvəlində genişləndirilmiş sistem qurmaq ideyası var idi. Müharibə başladıqdan sonra bu ideya arxa plana keçdi. Daha sonra Bakı şəhərində metro çəkilişi, yeni xətlərin açılması ön plana keçdi, artıq sözügedən məsələ unuduldu”.  Ekspertin sözlərinə görə, böyük vəsaiti yağış sularının axıdılmasına yönəltmək iqtisadi cəhətdən səmərəli deyil: “İllər ərzində bu problem Bakıətrafı qəsəbələri əhatə etsə də, şəhərin mərkəzə yaxın ərazilərində və 1960-1970-ci illərdə salınmış küçə və prospektlərdə özünü qabarıq göstərir. Kanalizasiya sistemi olan ərazilər də yükü götürə bilmir. Çünki zəruri yük limiti var”.  Nəqliyyat sahəsi üzrə ekspert Rauf Ağamirzəyev isə əks fikirdədir:  “Bakının məişət kanalizasiyası sistemi tam şəhəri əhatə etmir. Yağış sularını idarəetmə sistemi isə 17-22 faiz şəhər ərazisini əhatə edir. Bütün küçə və prospektlərdə bu sistem yoxdur, ancaq olmalıdır. Yağış sularını idarəetmə sistemini əhatə edən küçə və prospektlər də məişət kanalizasiyasını təmin edir, yağış sularını yox...  Hər bir yolun hərəkət hissəsinə sahəsinə əsasən, orada yığılacaq suyun miqdarına uyğun bu sistem hesablanır. Amma bizdə son illərdə yolun hərəkət hissəsi genişləndirildiyi halda altındakı yağış sularını idarəetmə sistemi yenilənməyib və genişlənməyib. Bu da başqa bir fəsaddır.  Bu sistemin qurulması bahalı olsa da, vacibdir. Bunu etmək lazımdır, çünki gələcəkdə başqa bir fəsada yol aça bilər. Düşünürəm ki, investisiya cəlb edib, bu işləri icra etmək lazımdır”.

Ələt-Astara avtomobil yolunun Biləsuvar rayonundan keçən hissəsində ağır qəza baş verib. Sozcu.az Report-a istinadən xəbər verir ki, minik avtomobili yük avtomobilinə çırpılıb. İlkin məlumata görə, qəza nəticəsində 1 nəfər ölüb, 1 nəfər xəsarət alıb. Yaralı Biləsuvar Rayon Mərkəzi Xəstəxanasına çatdırılıb. Faktla bağlı araşdırma aparılır.

İki gün əvvəl Qaradağ rayonu Ümid qəsəbəsində yerləşən evdə yanğın törədən şəxs saxlanılıb. Sozcu.az xəbər verir ki, bu barədə Daxili İşlər Nazirliyi (DİN) məlumat yayıb. Bildirilib ki, evlərin birində baş vermiş yanğınla bağlı Qaradağ RPİ 38-ci Polis Bölməsinin əməkdaşları tərəfindən aparılan araşdırmalarla bu əməlin ev sahibinin 32 yaşlı oğlu tərəfindən törədilməsinə əsaslı şübhələr müəyyən olunub. O, polis əməkdaşları tərəfindən saxlanılıb. Araşdırma aparılır.

Rusiya ordusu gecə saatlarında Ukrayna ərazisinə İran PUA-ları (“Şahid”) ilə hücum edib. Bu barədə Ukrayna Hərbi Hava Qüvvələri məlumat yayıb. “Şahid” hücum dronları Ukraynaya Rusiya ərazisindən atılıb. Hava hücumunun dəf edilməsinə Ukrayna ordusunun qırıcıları, zenit-raket bölmələri və mobil atəş qrupları cəlb olunub. Əməliyyatlar nəticəsində 31 PUA-dan 30-u məhv edilib. “Şahid”lər Dnepropetrovsk, Kiyev, Vinnitsa, Çerniqov, Sumı, Poltava, Çerkassı, Xerson, Zaporoje, Nikolayev və Xmelnitski vilayətlərində vurulub. 

Ukrayna 2024-cü ildə yeni əks-hücum planlaşdırır. Sozcu.az “Welt”ə istinadla xəbər verir ki, bu barədə Kiyevdəki mənbələr danışıb. ABŞ Ukraynadan “Black Hawk” və “Apache” hücum helikopterləri, F-16 və F-18 döyüş təyyarələri, raket kompleksləri, “Abrams” tankları, PUA və sursatların daxil olduğu bir istək siyahısı alıb.

Dekabrın 16-da saat 07:05 radələrindən Ağdam rayonu, Birinci Dördyol qəsəbəsində baş verən qəza nəticəsində xəsarət alan Peşəkar Futbol Liqasının (PFL) 6 əməkdaşının son durumu açıqlanıb. TƏBİB-dən Sozcu.az-a bildirilib ki, xəsarət alanlar Bərdə Rayon Mərkəzi Xəstəxanasının Təcili tibbi yardım şöbəsinə yerləşdiriliblər. Müxtəlif növ bədən xəsarətləri alan şəxslərə zəruri tibbi xidmətlər göstərilib. Onlardan 2-nin vəziyyəti ağır, 2-nin vəziyyəti orta ağır, 2-nin vəziyyəti isə stabil qiymətləndirilir. Xəsarət alan şəxslər Bakıda yerləşən özəl tibb müəssisəsinə təxliyə olunublar.