Ukrayna müharibənin 669-cu günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 353 190 hərbçi, 5 858 ədəd tank, 10 888 ədəd zirehli döyüş maşını, 8 314 ədəd artilleriya sistemi, 932 ədəd RYAS (reaktiv yaylım atəş sistemi), 611 hava hücumundan müdafiə sistemi, 324 ədəd hərbi təyyarə, 327 ədəd helikopter, 11 022 ədəd avtomobil texnikası, 6404 ədəd PUA, 1 614 qanadlı raket, 22 gəmi/kater, 1 sualtı qayıq, 1 229 xüsusi avadanlıq itirib.

“Burada söhbət yalnız açıq terror aktlarından, qətllərdən getmir. Bu şəbəkə ölkəmizə xalqımıza qarşı sayı bilinməyən strateji xarakterli cinayətlər də törədib…”   Son bir neçə ildə ölkəmizdə bir sıra iri dövlətlərin, o cümlədən İranın, Fransanın, hətta ABŞ-ın kəşfiyyat-agentura şəbəkələrinin ifşası barədə informasiyaların tezliyi artıb. Görəsən, yaxın dövrdə Azərbaycanda, ümumiyyətlə, Güney Qafqazda, azı, 300 ilə yaxın dayaqlara malik olan və xalqımıza qarşı bəlkə də on minlərlə cinayətlər törətmiş və sözsüz ki, hazırda da buna davam edən Rusiya imperiyasının kəşfiyyat-agentura şəbəkəsinin ifşası haqda xəbərlər eşidəcəyikmi?.. Mövzu ilə bağlı Moderator.az-a açıqlamasında siyasi təhlükəsizlik məsələləri üzrə ekspert Ərəstun Oruclu bu fikirləri ifadə edib: “Digər iri dövlətlərinki ilə müqayisədə Rusiya kəşfiyyatı, Rusiya casus, agentura şəbəkəsi yüz illər boyu Azərbaycanda saysız-hesabsız cinayətlər törədib. Özü də burada söhbət yalnız açıq terror aktlarından, qətllərdən getmir. Bu şəbəkə ölkəmizə xalqımıza qarşı sayı bilinməyən strateji xarakterli cinayətlər də törədib.  Xalqın tarixini dəyişmək, saxtalaşdırmaq, onun dini, milli-mənəvi ənənələrini, mədəniyyətini, elmini gözdən salmaq, Azərbaycan xalqının və dövlətinin daxilində müxtəlif sabotajçı, özü də uzunmüddətli əməliyyatlar həyata keçirmək, ölkədə “5-ci kalon” yaratmaq və s. Bax, bütün bu işləri görmüş Rusiya kəşfiyyatının casuslarının, onun əməllərinin ifşa olunması üçün, ən başlıcası,  Azərbaycandakı keçmiş “KQB” arxivləri açılmalıdır.  Və bundan sonra həmin arxivlərdən çıxan agentura mənsublarının, casusların bu gün dövlət, hökumət qurumlarında hansı vəzifələrdə yerləşdirildiyi açkarlansın və həmin qurumlar onlardan təmizlənsin... Bundan başqa dövlətlə bağlı bir neçə digər şərtə də əməl olunmalıdır... Yalnız bu halda biz Rusiya casus şəbəkəsinin, özü də nəhəng bir casus şəbəkəsinin ifşasının şahidi olacağıq.  Və nəticədə Rusiya kəşfiyyat-agentura şəbəkəsi üzvlərinin törətdiyi cinayətlərin də, hamısının olmasa da, xeylisinin üstü açılacaq...”

ABŞ-ın CNN telekanalı İsrail əsgərləri ilə bağlı tükürpədən iddianı açıqlayıb. İddialar İsrail Müdafiə Qüvvələrinin (IDF) keçən həftə 8 günlük əməliyyat keçirdiyi Kamal Advan xəstəxanası ilə bağlıdır. Sozcu.az musavat.com-a istinadən xəbər verir ki, CNN-ə danışan xəstəxana işçiləri İsrail əsgərlərinin həyatını itirən fələstinlilərin cəsədlərinə hörmətsizlik etdiyini, əlil arabasındakı xəstənin İsrail hərbi itləri tərəfindən parçalandığını və çox sayda həkimin güllələndiyini iddia edir. CNN müxbiri hadisənin görüntülərinə baxdığını bildirib. Məlumata görə, İsrail əsgərləri xəstəxana bağçasında qazılan müvəqqəti kütləvi məzarlığı buldozerlə qazaraq fələstinlilərin cəsədlərini çıxarıblar. "İsrail əsgərləri səhər qəbirləri qazdılar, cəsədləri çıxardılar və sonra buldozerlərlə əzdilər. Mən əvvəllər heç vaxt belə bir şey görməmişdim" - xəstəxananın pediatriya xidmətlərinin direktoru Hossam Abu Safiya deyib.

Ukrayna prezidenti Volodimir Zelenski Xerson vilayətində Rusiyaya məxsus 3 döyüş təyyarəsinin vurulduğunu açıqlayıb. Sozcu.az xəbər verir ki, Ukrayna lideri buna görə hərbçilərə təşəkkür edib. "Ukraynanın cənubundakı Xerson vilayətimizin səmasında 3 Rusiya təyyarəsini vurduqlarına görə qırıcılarımıza minnətdaram. Bu, bizim Hərbi Hava Qüvvələrimizin, xüsusən də Odessa zenit-artilleriya briqadasının fəaliyyətinin nəticəsidir. Sağ olun, döyüşçülər. Hər bir rusiyalı qatil bizim cavabımızı alacaq və onların heç biri ədalətdən qaça bilməyəcək" - o bildirib. Bundan başqa, Hollandiyanın müdafiə naziri Kajsa Ollongren Ukraynaya 18 ədəd F-16 tipli döyüş təyyarəsi göndərməyə hazırlaşdıqlarını açıqlayıb.

“Televiziyaların mövqeyi bəllidir, gecə-gündüz pul qazanmaqla məşğuldurlar, gecə saat 2-də də reklam verirlər, reklam üstə bir-birlərini qırırlar.  Azərbaycan xalqı aldadılır. Başa düşdük, bəzilərinin böyüyü, abrı-həyası yoxdur, bəs gecə-gündüz onları təbliğ edən telekanallara nə deməli?!”  Bu sözləri Yenisabah.az-a danışan Xalq artisti Şeyx Əbdül Mahmudbəyov deyib.  Yerli telekanalları sərt şəkildə tənqid edən kinorejissor vəziyyətlə bağlı həyəcan təbili çalınmalı olduğunu deyib:  “Eyni adamlar gün ərzində müxtəlif kanallarda olur, oradan bura, burdan ora qaçırlar. Boş, mənasız, sözləri biabırçılıq olan mahnılar... Heç birinin ritmi, istedadı yoxdur, hamısı xaric oxuyurlar. Artıq meyxanaçılar müğənnilik etməyə başlayıblar. Onlara telekanallarda 3 saatlıq vaxt ayrılır”.  Ə.Mahmudbəyov yerli telekanallarda baş alıb gedən özbaşınalığa etirazını bildirib:  “Bir dəfə telekanalların birində dedim ki, bu adamları haradan tapıb çıxarırsınız? Özünüzün xüsusi axtarış qrupunuz var? Harada arvadını, uşağını atan, əxlaqını satan varsa, tapıb gətirirlər. Sanki telekanalın işçiləri Azərbaycanı qarış-qarış  gəzir ki, harada mənəviyyatsız, əxlaqsız, tərbiyəsiz, başıpozuq ailələri axtarıb tapırlar və efirə çıxarırlar. Dəhşətdir!  Televiziya dünyanın ən dəhşətli təbliğat silahıdır. Hamının evində, mətbəxində, maşınındadır”.  O, aidiyyəti qurumların telekanallara ciddi nəzarət etməli olduğunu vurğulayıb:  “Bu işlə əlaqədar strukturlara dəfələrlə müraciət etmişəm. Qardaşlar, artıq geriyə yol yoxdur, biabırçılıqdır. Efirə çıxan qadınların çoxunun yəqin ki, ailə tərbiyəsi, təhsili yoxdur, özləri bilər. Bu onların problemidir. Amma sən onları efirə çıxarırsansa, bu artıq böyük problemdir. Həmin verilişləri dayandırın! Rüsvayçılığı bitirin, artıq hər şey əldən gedir. Televiziya rəhbərlərinin məqsədi nədir? Qardaş, bizdən nə istəyirsiniz?! Gül kimi sənətkarlarımız, mədəniyyətimiz var, niyə onları təbliğ etmirsiniz?!  Abrımızı, ismətimizi qoruyun, nə olar ki?  Bunu qoruyun ki, sabah axirət dünyasına, babalarımızın, qeyrətli kişilərimizin yanına üzü ağ gedək. Bu adamların ucbatından gedib orada qınaq yiyəsi olmayaq. Hər şey ciddi nəzarətə götürülməlidir, həmin biabırçı verilişlər dayandırılmalıdır. O aparıcılar xalqa hesabat verməlidir ki. məqsədləri nədir və “debil”, xəstə insanları haradan axtarıb tapırlar”. 

Gədəbəy rayonu Slavyanka kənd sakini, 1956-cı il təvəllüdlü Nəzakət Ovçu Süleymanova qızı dəm qazından boğularaq ölüb. Sozcu.az xəbər verir ki, hadisə evin hamam otağında baş verib. Faktla bağlı araşdırma aparılır.

“Alen Simonyan sərhədlərin demarkasiya və delimitasiyası məsələsinin daha sonra da həll edilə biləcəyini istisna etməyib...” “Ermənistan parlamentinin sədri Alen Simonyan  jurnalistlərlə keçirdiyi brifinqdə Azərbaycan Prezidentinin köməkçisi Hikmət Hacıyevin Ermənistanla Azərbaycan arasında hazırlanan  sülh sazişi çərçivəsində sərhədlərin demarkasiya və delimitasiyası ilə bağlı fikrinə münasibət bildirib. Hikmət Hacıyev demişdi ki, sülh sənədində sərhədlərin müəyyənləşməsi ümumu sazişdən ayrıla və  buna daha sonrakı sürəcdə baxıla bilər”.  Bunu moderator.az-a açıqlamasında ermənişünas alim Qafaqr Çaxmaqlı söyləyib. “Alen Simonyan sərhədlərin demarkasiya və delimitasiyası məsələsinin daha sonra da həll edilə biləcəyini istisna etməyib. O, bunu belə izah edib ki,  sülh sazişini uzatmamaq üçün  həll olunması uzun müddət tələb edən həmin məsələya sonra da baxıla bilər. Misal olaraq Gürcüstanla Ermənistan arasında sərhədlərin təyin olunması çalışmalarının hələ də davam etməsini göstərib. Erməni spikerin bu fikri Ermənistanda ciddi narazılıqla qarşılanıb”, -davamında şərhçi belə deyib.    “Belə olan halda Ermənistanın baş nazirinin tez-tez səsləndirdiyi iki ölkənin ərazi bütövlüyü (Azərbaycanın 86,6 min kvadratkilometr, Ermənistanın 29, 8 min kvadratkilometr) çərçivəsində sülh sazişi hansı əraziləri əhatə edərək  imzalanacaq? Əgər ərazilərlə bağlı dəqiq bir razılaşma yoxdursa və Azərbaycanın dilindən 29,8 min kvadratkilometr ərazi ilə bağlı heç bir bəyanat olmayıbsa, demək, Paşinyanın səsləndirdiyi bu məsələ hələ həllini tapmayıb və Ermənistanın hazır olduğunu iddia etdiyi sənəddə bunun öz əksini tapmadığı da görünməkdədir. Sərhəd xətti hansı ərazilərdən keçir, orada Azərbaycanın 8 anklav kəndi və Ermənistanın zaman-zaman özünə birləşdirdiyi ərazilərin taleyi də həll edilməmişdir.  Belə çıxır ki, Ermənistanın yaxasını cırıb bir an öncə imzalamaq istədiyi sülh sazişi sənədi hazır deyil”, -deyən ermənişünas alim daha sonra erməni politoloqlarının Ermənistan spikerinin son bəyanatına verdiyi şərhləri də nümunə gətirir.  “Erməni siyasi şərhçi David Stepanyana görə, Alen  Simonyanın bəyanatı Ermənistanın yeni güzəştlərə gedəcəyinə işarədir.  Tərəflərin ərazi bütövlüyü tanınacaqsa, orada eyni rəqəmlər göstərilməməsi yeni problemlər yaradacaq və ortaya Azərbaycanın yeni tələbləri çıxacaq.  Erməni şərhçiyə görə Azərbaycanın tələbləri məlumdur. Bunlardan ən əsası: Azərbaycanın qərb rayonlarını Naxçıvanla birləşdirəcək  Zəngəzur dəhlizinin açılması və 10 noyabr 2020-ci il tarixli üçtərəfli bəyanatda yer alan maneəsiz keçidin əldə edilməsidir. Ermənistan bu reallığa qarşı hansı arqumentləri qoya bilər? Mövcud reallıqlar tələb edir ki, Ermənistan indiyə qədər olan və bundan sonra olacaq (o cümlədən imzalanacaq sülh anlaşmasına)  öhdəliklərə uysun. Yalnız o zaman bölgədə qalıcı sülhə nail olmaq mümkündür.  Helsinki Vətəndaş Assambleyasının Vanadzor şöbəsinin müdiri  Artur Sakunts deyir ki, belə bir durumda Ermənistan sülh sazişini imzalamamalıdır. O bildirir ki, biz həmişə qeyri- müəyyənlik içərisində oluruq və sülh sazişinin  məzmununu bilmədiyimizdən və bu sazişin  Ermənistana nə verəcəyini bilmədən onu imzalamağa tələsirik; əgər sərhədlər bəlli deyilsə, hansı sazişdən söhbət gedə bilər.   Hər gün yeni siyasi situasiyanın , bölgəmizdə yeni durumun formalaşdığı bir zamanda Ermənistanın sülh sazişinə gedəcəyi şübhə doğurur və indiyədək bu saziş Ermənistanın qeyri- kontruktivliyindən, bəhanələrindən dolayı imzalanmayıb. İndi də ehtimal ki, Ermənistan onu uzatmaq siyasətini aparacaqdır. Ermənistanda aparılan təhlillərdən bunu anlamaq çox da çətin deyil”, - deyə Qafar Çaxmaqlı diqqətə çatdırıb.

“Putinin son canlı brifinqindəki dedikləri, müdafiə naziri Şoyqunun, baş qərargah rəisi Gerasimovun isə  son günlər söylədikləri göstərir ki, bu oyunlar hələ bitməyib...” Allaha min şükürlər olsun ki, nəhayət, 36 il sonra təxminən 2 ay öncə üçrəngli bayrağımızı ucaltdığımız Xankəndində Azərbaycan rəhbərinin iştirakıyla “Qarabağ” futbol komandasının oyununu da keçirdik. Bəli, bu da Azərbaycan xalqı üçün tarixi, əlamətdar və rəmzi bir hadisədir... Fəqət, belə olaylar bizləri eyforiyaya qapdırıb arxayın salmamalı, bizə qarşı davam edən geo-siyasi, hərbi-siyasi oyunlara qarşı mübarizədən yayındırmamalıdır... Soruşa bilərsiz ki, daha nə oyun, torpaqlarımızı azad etdik, ərazi bütövlüyümüzü bərpa etdik... Bəli, ərazi bütövlüyümüzü bərpa etdik. Amma yüz illərlə “Böyük Ermənistan” xəstəliyi ilə yaşayan erməni güclərinin, onlardan Azərbaycana, Türkiyəyə qarşı alət kimi yararlanan Rusiya, İran, Fransa, ABŞ kimi nəhənglərin əks-gedişləri durdumu? Və hazırkı durumda həmin güclərdən bizə ən yaxını və təhlükəlisi Rusiyadır. Çünki üzdə müttəfiqlikdən, dostluqdan danışan həmin Rusiyanın hərbi qüvvələri hələ də Azərbaycan Respublikasının suveren ərazisində - Yuxarı Qarabağdadır. Çünki “sülhməramlı”ların hərəkətsizliyi şəraitində qısa müddətdə Qarabağdan köçmüş on minlərlə hayın ən azı yarısının qəlbində Azərbaycana qarşı kəskin nifrət var. Və Moskvanın 32 ildən çox məhz özünün himayəsi altında qondarılmış separatçı-terrorçu rejimin İrəvandakı tör-töküntüləri, xüsusən də 20 il Ermənistanda yenə də Moskvanın dəstəyi ilə hakimiyyətdə olmuş Köçəryan-Sərkisyan cütlüyünün başçılıq etdiyi Qarabağ klanından, revanşist qüvvələrdən və elə həmin ən azı on minlərlə Qarabağ köçkünündən Azərbaycana qarşı bu gün gizli, gələcəkdə açıq şəkildə istifadə etməsi və edəcəyi şübhəsizdir... Belə olan halda Rusiyanın Qarabağdakı oyunları bitdimi?.. Xeyr. Putinin son canlı brifinqindəki dedikləri, müdafiə naziri Şoyqunun, baş qərargah rəisi Gerasimovun isə  son günlər söylədikləri göstərir ki, bu oyunlar hələ bitməyib...  Dəfələrlə dediyimiz kimi, ermənilərin Qərbi Azərbaycana da,  Qarabağa da kütləvi köçürülməsi ilə, onlara dövlət qurulmasıyla da, muxtariyyət verilməsi ilə də, separatçı rejim qurulmasıyla da məhz Rusiya məşğul olub.  Və Ukraynaya son iki ildəki ədalətsiz, haqsız və amansız, faşistcəsinə təcavüzü də göstərir ki, Kreml qonşu ölkələrə, xüsusən də keçmiş sovet respublikalarına imperiya ambisiyalarından, o cümlədən keçmiş SSRİ ərazisi çərçivəsində yeni bir  İttifaq  dövləti qurmaq planlarından əl çəkməyib... Və görünən odur ki, Rusiya Azərbaycana qarşı oyunlarını nəinki artıq Şoyqunun “sülhməramlı” deyil, “hərbi kontingent” adlandırdığı qoşunları ilə, həm də özünün sovet dövründən bəri formalaşdırdığı “möhtəşəm” kəşfiyyat-agentura şəbəkəsi, ayrıca “KQB”-“FSB”-“QRU” korrupsiya şəbəkəsi, “5-ci kalonu” vasitəsilə də davam etdirəcək... Görünür, Kremlin ürəyindən keçir ki, dağılması məhz Qarabağdan başlamış Sovet imperiyasının bərpasına da məhz Qarabağdan başlasın... Fəqət, sözsüz ki, bu gün Rusiya ilə qonşu kimi münasibətləri qoruyub saxlayan  Azərbaycan da, qardaş(!) Türkiyə də  Putin rejiminin “SSRİ” xülyasının reallaşdırılmasında iştirak edə bilməz... Sultan Laçın

2023.12.22 23:36 Bu gün İraqın şimalında PKK terrorçularının hücumu nəticəsində Türkiyə ordusunun 3 hərbçisi şəhid olub, 4-ü isə yaralanıb. Sozcu.az xəbər verir ki, bu barədə Türkiyə Milli Müdafiə Nazirliyi məlumat yayıb. Hücumdan sonra aparılan əməliyyat nəticəsində 4 terrorçu məhv edilib. *** Türkiyə ordusunun PKK terrorçularının hücumu nəticəsində yaralanan 4 hərbçisindən 3-ü şəhid olub. Bu barədə Türkiyə Milli Müdafiə Nazirliyi məlumat yayıb. Bununla da şəhid hərbçilərin sayı 6-ya çatıb.

Şuşa yolunda ağır yol qəzası baş verib. Sozcu.az Report-a istinadən xəbər verir ki,hadisə betonqarışdıran avtomobilin idaretməni itirməsi nəticəsində baş verib. Yol qəzası nəticəsində, Biləsuvar rayon sakinləri, sürücü Rahil Ağayev yaralanıb, Elçin Nəzərov isə ölüb. Yaralı ağır vəziyyətdə xəstəxanaya yerləşdirilib. Faktla bağlı araşdırma aparılır.

Bakı-Sumqayıt yolunda ağır yol nəqliyyat hadisəsi baş verib. Sozcu.az Report-a istinadən xəbər verir ki, hadisə Xırdalan qəbirstanlığının qarşısındakı yolda baş verib. Belə ki, "Opel" markalı avtomobillə "Chevrolet" markalı avtomobil toqquşub. Nəticədə nəqliyyat vasitələrində olan 8 nəfər xəsarət alıb. Yaralılar xəstəxanaya çatdırılıb. Faktla bağlı araşdırma aparılır.

İraqın şimalında Türkiyə ordusuna qarşı hücum həyata keçirilib. Sozcu.az xəbər verir ki, bu barədə Türkiyənin Milli Müdafiə Nazirliyi məlumat yayıb  22 dekabr 2023-cü il tarixində İraqın şimalında PKK terrorçularının hücumu nəticəsində 3 türk əsgəri şəhid olub, 4-ü yaralanıb. Hücum nəticəsində 3 hərbçi şəhid olub, 4-ü yaralanıb.

Separatçıların qondarma rejiminin buraxılması haqqında fərmandan sonra Samvel Şahramanyan başqa bir fərman imzalayıb və Sarkis Qalstyanı öz “administrasiyası” rəhbərinin müavini təyin edib. Sozcu.az Publika.az-a istinadən xəbər verir ki, bunu “Azadlıq” radiosunun erməni xidmətinə Şahramanyanın “müşaviri” Vladimir Qriqoryan bildirib. Qriqoryan deyib ki, Qarabağda 20-30 nəfər, o cümlədən Sarkis Qalstyan da qalıb. Lakin Xankəndidə yaşayan və əvvəllər müxtəlif vəzifələrdə çalışan Qalstyanın hansı funksiyanı yerinə yetirməli olduğu aydın deyil.

Vətən müharibəsi iştirakçısı olan Fərid Kərimli vəfat edib. Sozcu.az xəbər verir ki, bu barədə sosial şəbəkədə onun yaxınları məlumat yayıb. Bildirilir ki, 1996-ci ildə Qazax rayonun Bala Çaylı kəndində anadan olan Fərid Vətən müharibəsindən sonra qan xərçəngi xəstəliyinə tutulub. Qeyd edilir ki, F.Kərimli “Füzulinin azad olunmasına görə” və “Xocavəndin azad olunmasına görə” medalları ilə təltif edilib.

“Rusiya ciddi hərbi səylərə baxmayaraq, Ukraynada öz hərbi məqsədlərinə nail ola bilmir”. Sozcu.az xəbər verir ki, bunu NATO baş katibi Yens Stoltenberq bildirib. O qeyd edib ki, Rusiya Prezidenti Vladimir Putinin əmri ilə başlayan işğalda məqsəd Ukraynanın NATO və Avropa İttifaqına inteqrasiyasının qarşısını almaq olub. O hesab edir ki, iki illik müharibədən sonra Ukrayna indi NATO və Aİ-yə həmişəkindən daha yaxındır. "Rusiya müharibəyə görə son dərəcə ağır bədəl ödəyir. Ölkə artıq yüzlərlə təyyarəsini, minlərlə tankını itirib, 300 mindən çox əsgər ölüb və ya yaralanıb. Bundan əlavə, müharibə nəticəsində inflyasiya artıb, həyat səviyyəsi aşağı düşüb. Əvvəlkindən daha çox təcrid olunub".  Stoltenberq hadisələrin inkişafını nəzərə alaraq müharibənin qısa vaxtda bitəcəyinə və martın 17-də keçiriləcək seçkidən sonra Putinin kursunu dəyişəcəyinə dair gözləntiyə də toxunub: “Bizdə Putinin öz məqsədlərini və siyasətini dəyişəcəyinə dair heç bir əlamət yoxdur. Daha çox ərazi işğal etməyə cəhd göstərməyə davam edəcək”. Onun fikrincə, bu o deməkdir ki, NATO və ona üzv olan 31 ölkə Ukraynanı qətiyyətlə dəstəkləməkdə davam etməlidir.

Pakistanın Ali Məhkəməsi “Rəsmi sirlər haqqında” qanunu pozmaqda ittiham edilərək həbsdə olan keçmiş baş nazir İmran Xan və keçmiş xarici işlər naziri Şah Mahmud Qureşinin zaminə buraxılmasını təsdiqləyib. Sozcu.az xarici mediaya istinadən xəbər verir ki, məhkəmə Pakistan Ədalət Uğrunda Hərəkat partiyasının liderlərinə hər biri 1 milyon Pakistan rupisi girov qoymaq barədə hökm çıxarıb. Qeyd edək ki, bu ilin oktyabr ayında Pakistanın Xüsusi Məhkəməsi Xan və Qureyşi Rəsmi Sirrlər Qanununu pozmaqda ittiham edib. Lakin pakistanlı siyasətçilər ittihamları qəbul etməyiblər. Noyabr ayında Pakistanın Ədalət Uğrunda Hərəkat Partiyası Ali Məhkəməyə müraciət edərək Xan və Qureşinin zaminə buraxılmasını istəyib. Avqustun 5-də Pakistanın keçmiş baş naziri Xan korrupsiya işi üzrə 3 il müddətinə azadlıqdan məhrum edilib. Avqustun 29-da Pakistan məhkəməsi Xanın üç illik həbs cəzasını təxirə salıb və onun girov müqabilində azadlığa buraxılmasına qərar verib. Lakin avqustun 30-da Xan yenidən “dövlət sirrini yaymaq” ittihamı ilə həbs olunub.

2017-ci ilin mayında Tərtərlə yanaşı, Beyləqanda da hərbçilərə qarşı kütləvi işgəncələrlə və nəticədə bir nəfər zabitin ölümü ilə bağlı, az qala, doqquz aydır sürən məhkəmə prosesi yekunlaşır. Yeniavaz.com “Azadlıq Radiosu”na istinadla xəbər verir ki, Beyləqandakı işgəncələrə görə mühakimə olunanlar dekabrın 21-də məhkəmədə son sözlərini deyiblər. Hakim önünə çıxarılmış beş nəfərin arasında general-mayor Bəkir Orucov da var. O, ötən ilin sentyabrında həbs olunarkən Müdafiə Nazirliyinin Şəxsi Heyət Baş İdarəsinin İdeoloji İş və Mənəvi-Psixoloji Təminat İdarəsinin rəisi vəzifəsini icra edirmiş. Beyləqanda bu hadisələr yaşananda isə korpusun qərargah rəisi olub. “Bizi qurban seçiblər” General məhkəmədəki son sözündə deyib ki, işgəncələrə göstəriş verənlər, nəzarət edənlər kənarda qalıb, onlar da “zəif bənd” kimi qurbanlıq seçiliblər. B.Orucov vurğulayıb ki, müdafiə nazirinin, Baş Qərargah rəisinin, korpus komandirinin səhvlərinə görə onları cəzalandırırlar. O, olub-bitənlərin Müdafiə Nazirliyi rəhbərliyinin nəzarəti altında, korpus komandiri Mais Bərxudarovun göstərişi ilə baş verdiyini söyləyib: “Xainlər siyahısını kim tərtib eləyib nazirliyə göndərmişdi? O adamları ora yığdırıb işgəncə verdirən kim olmuşdu? Bərxudarov belə zəif idi ki, mən onu idarə edirdim? Korpus komandirinin xəbəri və icazəsi olmasaydı, təhqiqatçı gəlib nəinki kiməsə işgəncə verə, heç içəri girə bilməzdi. Heç Rauf Kişiyev (Müdafiə Nazirliyi Hüquq İdarəsinin ovaxtkı rəisi-red.) gəlib orada kimisə həbs elətdirə bilməzdi. İndi kimin adamı, pulu var, hamısı vəzifədə, bizi qurban seçiblər”. B.Orucovun fikrincə, həmin ərəfədə gerçəkdən xəyanət olub, sadəcə konkret kimlərin xain olduğu düzgün müəyyənləşdirilməyib. Nəticədə Tərtər və Beyləqanda yüzlərlə hərbçiyə işgəncə verilib, 10 nəfərdən çox adam öldürülüb. General yaşananlara görə müdafiə naziri Zakir Həsənovu da günahlandırır: “Müdafiə Nazirliyində 140 milyonluq yeyinti aşkarlanır, nazir deyir ki, xəbərim yoxdur. Satınalmalardakı korrupsiya üzə çıxır, deyir ki, xəbərim yoxdur. Tərtər hadisələrindən xəbəri yoxdur. Bəs nədən xəbəri var?”. “Əmri verən Baş Qərargah rəisi, korpus komandiri” Təqsirləndirilən şəxslərdən Müdafiə Nazirliyi Hüquq İdarəsinin təhqiqatçısı olmuş, Beyləqan hadisələri ərəfəsində ora ezam edilən İntiqam Məmmədov son sözündə deyib ki, korpus komandiri Bərxudarov nazirliyə siyahı göndərmişdi. Orada adları çəkilən şəxslərin düşmənlə əməkdaşlıqda şübhəli bilindiyi iddia olunurdu: “İndi Mais Bərxudarov kənarda qalıb, mənə ittiham veriblər ki, guya ora düşmənlə əməkdaşlıqda şübhəli bilinənləri müəyyənləşdirməyə getmişəm. Yaxud da yazıblar ki, guya mən kimlərisə vəzifədən çıxartdırıb, əsassız və qanunsuz həbs eləmişəm. Əmri verən Baş Qərargah rəisi, korpus komandiri. Mən Nəcməddin Sadıxova, Mais Bərxudarova göstəriş verə bilərdim ki, filankəsi işdən çıxar? Bu qədər yalan olar?!”. İ.Məmmədov ovaxtkı Baş Qərargah rəisi N.Sadıxovla münasibətlərinin yaxşı olmadığını, qərəzli münasibətinə görə də onu əsassız cəzalandırıb iclasdan qovduğunu deyib: “Nəcməddin Sadıxovun ən zəhləsi gedən adamlardan biri mən olmuşam. Çarəsi olsaydı, başımı kəsərdi. Mən nazirlikdən əvvəl Beyləqanda təhqiqatçı işləmişəm. O dövrdə ön xətdə mina partlamışdı. Buna görə təhqiqatçı neyləsin? Məni iclasdan qovdu...”. “Belə çıxır ki, davam edir 37…” Özündən öncəki iki təqsirləndirilən kimi, Rahib Məmmədov da son sözündə bəraət istəyərək Beyləqandakı sorğu-suala cəmi 15 dəqiqə qatıldığını söyləyib. Bu prosesdə fəal iştirak edən, hətta zorakılığa yol verən təhqiqatçılar kənarda saxlanılıb, onu cəzalandırırlar: “Mən Yazıçılar Birliyinin üzvüyəm və üç roman, doqquz şeir kitabım var. Həm qələmimlə, həm də zabit kimi bu xalqa xidmət etmişəm. Mən şərəfimi satmadığıma görə cəzalandırılmışam. Belə çıxır ki, davam edir 37... Mən şərafət dustağıyam. Amma qalib ordunun məğlub zabiti olmaq istəmirəm”. Korpusda təlimatçı olmuş Ülvi Rəşidovun son sözü qısa olub. O da bəraət istəyib. Təqsirləndirilən şəxslərdən yalnız snayper bölüyünün komandiri Ziya Kazımovun son sözü qalıb. Məhkəmə iclasında onun durumu pisləşib, təcili tibbi yardım çağrılıb. Həkimlərin rəyi əsasında məhkəmə prosesi dekabrın 28-nədək ertələnib. Xatırlatma Məhkəmə istintaqı bir neçə aydır yekunlaşıb. Prokuror onlara 8 il 6 aydan 12 il 6 ayadək həbs cəzası istəyib. Ayyarım öncə vəkillər də müdafiə çıxışı etdiyindən yalnız təqsirləndirilən şəxslərin son sözləri qalıb. Prokuror təqsirləndirilən şəxslərdən general B.Orucov və Z.Kazımovun hər birinə 12 il 6 ay, Ü.Rəşidov və İ.Məmmədova 10 il 6 ay, R.Məmmədova isə 8 il 6 ay həbs cəzası verilməsini tələb edib. General-leytenant M.Bərxudarov isə ünvanına səslənən ittihamları qəbul etmir. O, general B.Orucovun məhkəmədə onun ünvanına səsləndirdiyi ittihamları bir müddət öncə belə cavablandırıb: “Bəkir Orucov nə danışıbsa, özü bilər. Amma nahaq danışıb, çünki dedikləri həqiqəti əks etdirmir. Nə danışırsa, danışsın. Mən indi telefonda nəsə danışa bilmərəm. Hər şeyə hüquqi qiymət verilir. Biz hüquqi ölkədə yaşayırıq...”.

Dekabrın 22-də özünü buraxmış qondarma “Artsax”ın sonuncu başçısı Samvel Şahramanyan İrəvanda separatçı rejimdə könüllülük əsasında “vəzifə” tutmaqda davam edən “rəhbərlərlə” görüşüb. Sozcu.az-ın məlumatına görə, bu barədə İrəvandakı “Artsax İnformasiya Qərargahı” məlumat yayıb. Görüşdə Qarabağdan köçmüş ermənilərin problemləri müzakirə edilib, onların həlli üçün tövsiyələr verilib. Şahramanyan işlərin 2024-cü ildə də davam etdirilməsinin zəruriliyini vurğulayıb, Xankəndidən qaçmış “mer” və rayon administrasiyalarının “rəhbərlərinə” erməni köçkünlərin problemlərinin inventarlaşdırılmasını davam etdirməyi və mütəmadi olaraq qondarma “hökumətə” təqdim etməyi tapşırıb. Maraqlıdır ki, Samvel Şahramanyan görüşdə verdiyi növbəti açıqlama ilə tüpürdüyünü yalayıb. Belə ki, o, özünün imzaladığı və geniş müzakirəyə səbəb olan 28 sentyabr sərəncamına istinad edərək vurğulayıb ki, qondarma “Artsax”ın hüquqi sahəsində “dövlət institutlarının” ləğvini nəzərdə tutan heç bir sənəd yoxdur. Xatırladaq ki, bu il sentyabrın 19-20-də Azərbaycan Ordusu Qarabağda antiterror tədbirləri keçirib. Nəticədə Qarabağdakı separatçıların yaratdıqları qondarma “Artsax” rejimi təslim olaraq üzünü buraxdığını elan edib. “Artsax”ın sonuncu başçısı Samvel Şahramanyan sentyabrın 28-də sərəncam imzalayıb. Orada deyilir: “2024-cü il yanvarın 1-dək “Artsax respublikası”nın tabeliyində olan bütün dövlət qurumları və təşkilatları ləğv edilsin və “Artsax respublikası”nın mövcudluğu dayandırılsın".modern)

NATO ölkələri öz qoşunlarını Ukraynaya göndərə bilər. Sozcu.az xəbər verir ki, bunu Gürcüstanın keçmiş prezidenti Mixail Saakaşvili deyib. “ABŞ və bir sıra Avropa ölkələri Ukrayna ərazisindəki münaqişəyə birbaşa daxil olmağa hazırlaşır. Üstəlik, bunlar təkcə hava əməliyyatları deyil, həm də quru qoşunlarının göndərilməsi nəzərdən keçirilir və hazırlanır. NATO müdaxilə etsə, münaqişə mümkün qədər tez başa çatacaq”, - Saakaşvili bildirib.

Qadınların əmək hüquqları genişləndirilir. Sozcu.az xəbər verir ki, bu barədə Milli Məclisin bu gün keçirilən iclasında müzakirəyə çıxarılan “Azərbaycan Respublikasının Əmək Məcəlləsində dəyişiklik edilməsi barədə Azərbaycan Respublikası qanununun layihəsində” qeyd olunub. Dəyişikliyə görə, hamilə, üç yaşına qədər uşağı olan və 18 yaşına qədər əlilliyi olan uşaqlara baxan qadınlar gecə növbələrində, bayram günlərində işləyə biləcək, ezamiyyəyə cəlb oluna biləcəklər. Onlar öz razılıqları əsasında işlərə cəlb oluna biləcəklər. Bu dəyişiklik qadınların əməkhaqlarının artmasına imkan verəcək. Qanun, eyni zamanda, 18 yaşına çatmamış işçilərə, eləcə də, 14 yaşına qədər uşağı tək böyüdən kişilərə də şamil olunur. Bundən əvvəl isə bu qeyd olunanlar qanunla qadağan idi. Belə ki, mövcud qanun görə, hamilə, üç yaşına qədər uşağı olan və 18 yaşına qədər əlilliyi olan uşaqlara baxan qadınlar gecə növbələrində, bayram günlərində işləməyə qadağa qoyulmuşdu. Həmçinin, ezamiyyəyə getmələrinə də icazə yox idi. Qeyd edək ki, qanun layihəsinə edilən dəyişikliyin əsas məqsədi ölkədə qadın və kişilər arasında əmək haqları arasında fərqi azaltmaqdır. Müzakirələrdən sonra qanun layihəsi səsverməyə qoyularaq üçüncü oxunuşda qəbul edilib.

Uşaqlara qarşı cinsi istismara görə məhkum olunmuş şəxslər pedaqoji fəaliyyətlə məşğul ola bilməyəcək. Sozcu.az xəbər verir ki, bu, Milli Məclisin bu gün keçirilən iclasında müzakirəyə çıxarılan “Ümumi təhsil haqqında” qanuna təklif edilən dəyişiklikdə əksini tapıb. Müzakirələrdən sonra qanun layihəsi səsverməyə çıxarılaraq üçüncü oxunuşda qəbul edilib.

Bakıda bulvar ərazisində gəzinti qayığı batıb. Fövqəladə Hallar Nazirliyindən Sozcu.az-a verilən məlumata görə, "112" qaynar xəttinə Bakıda bulvar ərazisində gəzinti qayığının batması ilə bağlı məlumat daxil olub. Dalğıc-axtarış xilasetmə əməkdaşları hadisə yerinə cəlb edilib. İlkin məlumata görə, batma təhlükəsində olan vətəndaşlar xilas olunub.

Ermənistan Ali Məhkəmə Şurasının keçmiş sədri Ruben Vardazaryan da özünü “revanşist” elan edib. Sozcu.az xəbər verir ki, Vardazaryan bunu Ermənistan KİV-nə açıqlamasında deyib. Vardazaryan arxiyepiskop Baqrat Qalstanyan, müdafiə nazirinin keçmiş müavini Artak Zakaryan və siyasi texnoloq Vigen Akopyandan sonra özünü “revanşist” elan edən 4-cü şəxsdir. O, Azərbaycanla sonuncu müharibənin nəticələrilə barışmadığını, məğlubiyyəti qəbul etmədiyini vurğulayıb. Vardazaryan qondarma “Artsax” Ermənistanın ayrılmaz hissəsi olmasını istədiyi barədə sərsəm açıqlama verib. “Bunu nəzərə alaraq özümü revanşist elan edirəm, - Vardazaryan müharibə tərəfdarı olduğunu bildirib.

Milli Məclisin bu gün keçirilən plenar iclasında “Hərbi qulluqçuların statusu haqqında”, “Hərbi xidmətkeçmə haqqında” Əsasnamə”nin təsdiq edilməsi barədə”, “Əmək pensiyaları haqqında” və “Hərbi vəzifə və hərbi xidmət haqqında” qanunlara dəyişiklik layihəsi üçüncü oxunuşda qəbul edilib. Sozcu.az xəbər verir ki, layihə hərbi qulluqçuların pensiya hüququ, təhsil almaq hüququ və xidmət keçmə müddətləri ilə bağlı dəyişiklikləri nəzərdə tutur. Azərbaycan ərazisində fəaliyyət göstərən bir çox ali təhsil müəssisələrində qiyabi təhsilin mövcud olmaması səbəbindən və Azərbaycan Respublikasının Silahlı Qüvvələrinin peşəkar, bilikli və bacarıqlı hərbi qulluqçularla komplektləşdirilməsi məqsədilə “Hərbi qulluqçuların statusu haqqında” Azərbaycan Respublikasının Qanununa müvafiq dəyişlikliyin edilməsi təklif olunur. Dəyişikliyə əsasən hərbi qulluqçular müvafiq icra hakimiyyəti orqanının rəsmiləşdirilmiş icazəsi olduqda mülki təhsil müəssisələrində təhsil ala biləcəklər. Bundan başqa, dövlət vəsaiti hesabına Azərbaycanda və xarici ölkələrdə ali təhsil almış və Azərbaycan Respublikasının Silahlı Qüvvələri üçün hazırlanmış zabitlərin əldə etdikləri peşəsi və bilikləri ilə Silahlı Qüvvələrə töhfə verməsinin və təcrübələrinin gənc zabitlərlə bölüşməsinin təmin edilməsi məqsədilə “Hərbi vəzifə və hərbi xidmət haqqında” qanuna və Azərbaycan Respublikasının 1997-ci il 3 oktyabr tarixli 377-IQ nömrəli Qanunu ilə təsdiq edilmiş “Hərbi xidmətkeçmə haqqında” Əsasnamədə dəyişikliklərin edilməsi təklif olunur. Belə ki, zabitlərin həqiqi hərbi xidmət dövründə Azərbaycanın və xarici ölkələrin ali təhsil müəssisələrində təhsilalma müddəti, eləcə də ixtisasartırma, kadrların yenidən hazırlanması, stajkeçmə və kadrların təkmilləşdirilməsi üzrə əlavə təhsil müddəti bir ildən çox olduqda öz arzusu ilə ehtiyata buraxılma üçün nəzərdə tutulmuş 10 il müddətinə daxil edilməyəcəkdir. Qadınların həqiqi hərbi xidmətdə olmalarının yaş hədləri ilə bağlı “Hərbi vəzifə və hərbi xidmət haqqında” Qanunla “Hərbi xidmətkeçmə haqqında” Əsasnamə arasında ziddiyyətin aradan qaldırılması, gender bərabərliyinin Silahlı Qüvvələrdə də təmin edilməsi məqsədilə qadınların həqiqi hərbi xidmətdə ehtiyatda olmalarının son yaş hədlərinin kişi cinsli hərbi qulluqçularla bərabərləşdirilməsi məqsədəuyğun hesab edilir. Deputat qeyd edib ki, qanun layihəsində müddətdən artıq həqiqi hərbi xidmət hərbi qulluqçuları, gizirlər və miçmanlar üçün dinc dövrdə həqiqi hərbi xidmətdə olmağın son yaş həddinin 45-dən 48-ə artırılması təklif olunur. Bu dəyişikliyin əsas məqsədi adıçəkilən hərbi qulluqçuların hərbi qulluqçu kimi pensiyaya çıxmaq üçün minimum xidmətkeçmə müddətində (25 təqvim ili ərzində) hərbi xidmətdə olmalarının təmin edilməsi, habelə onların təcrübəsindən daha səmərəli və uzun müddət yararlanmaqdır. Qanun layihəsində yuxarıda qeyd olunan dəyişikliklərlə yanaşı dövlət tərəfindən yetişdirilməsinə zaman və resurs sərf edilmiş hərbi qulluqçuların formalaşmış təcrübəsindən daha uzun müddət istifadə etmək məqsədilə hərbi qulluqçu kimi pensiyaya çıxmaq üçün minimum xidmətkeçmə tələbinin 20 təqvim ilindən 25 təqvim ilinə çatdırılması təklif olunur. Qeyd olunan dəyişiklik hərbi qulluqçuların pensiya təminatında hər hansı azalmanı istisna etməklə, bir sıra qurumların hərbi qulluqçularının pensiya təminatında artımı nəzərdə tutur. Belə ki, minimum xidmət müddətinin artırılması ilə yanaşı həmin dövrə görə qulluq stajına görə əlavənin faizinin də 50-dən 65-ə qaldırılması təklif edilib. Qanun layihəsinin 2024-cü il yanvarın 1-dən qüvvəyə minməsi nəzərdə tutulur. Bundan başqa, layihədə 20 təqvim ili hərbi xidmət müddətinin tamamlamasına ən çoxu 3 təqvim ili qalmış hərbi qulluqçulara, habelə qanun layihəsi qüvvəyə mindiyi tarixədək 20 təqvim ili və daha çox hərbi xidmət etmiş hərbi qulluqçular 25 təqvim ili hərbi xidmət müddətini tamamlayanadək hərbi xidmətdən buraxıldıqda, onlara da “Əmək pensiyaları haqqında” qanunun 2024-cü il yanvarın 1-dək qüvvədə olan normaları tətbiq ediləcəkdir. Bu normalar hərbi qulluqçuların qazanılmış hüquqlarından istifadəsinə hərtərəfli imkan verəcək.