“Çox şükürlər olsun ki, 44 günlük savaş və son təmizləmə əməliyyatı nəticəsində də şəhid və qazilərimizin canı-qanı hesabına Qarabağın dağlıq hissəsi və ətraf rayonlarımızın, demək olar ki, hər metrini hərbi baxımdan nəzarətə götürdük. Ruben Vardanyan, Bako Saakyan, Arkadi Qukasyan, Araik Arutyunyan və s. kimi separatçı liderləri dövlət qurumlarımız yaxalayıb Bakıya gətirdi və hazırda zindandadırlar. Lakin əvvəlki söhbətimizdə, dediyim kimi, təəssüf ki, Samvel Babayan, Vitali Balasanyan, Samvel Şahramanyan kimi bəzi separatçı general və məmurlar hansısa yolla Ermənistana keçə bildilər”. Sozcu.az xəbər verir ki, bunu Qarabağdakı son lokal hərbi əməliyyatlar zamanı bələdçi və döyüşçü kimi, nəhayət, 31 il sonra öz doğma yurduna – Şuşa rayonunun Malıbəyli kəndinə gedib çıxa bilmiş tanınmış Qarabağ qazisi, ehtiyatda olan kəşfiyyatçı zabit Azay Kərimov söyləyib. “Dediyim baxımdan bu gün Azərbaycan ordusunun, xüsusən Ermənistanla sərhəd rayonlardakı Milli Ordu və Dövlət Sərhəd Xidməti hərbçilərinin üzərinə böyük məsuliyyət düşür. Çünki Qarabağda hələ də orda-burda meşələrdə, dağlarda, dərələrdə gizlənən separatçılar, terrorçular bu dəqiqə Ermənistana keçməyə yol-riz axtarırlar. Onlar artıq qapısı bağlı anbarda qalmış siçovul kimi qaçmağa dəlmə-deşik arayır. Və həmin separatçıların çoxu son 30-35 ildə həm keçmiş Dağlıq Qarabağla, həm də Ermənistanla həmsərhəd olan rayonlarımızın hər qarışına, hər dağına, hər təpəsinə, hər qayasına, hər daşına, hər cığırına yaxşı bələddirlər. Xüsusən də Kəlbəcər, Laçın əraziləri relyef baxımıdan çox mürəkkəb, tamamilə dağlıq, meşəlik olduğundan erməni separatçı və yaraqlıları üçün o ərazilərdən Ermənistana keçmək bir növ daha asandır. Bu baxımdan dağ, meşə və dərələrimizdə güclü axtarış tədbirləri ilə yanaşı, sərhədlərimizdə də hər dağ keçidinin, hər meşəliyin, hər kolluğun başında 4-5 əsgər dayanmalıdır. Sərhədlərimizi elə möhkəmləndirməliyik ki, daha heç bir nəfər separatçı, yaraqlı da Ermənistana keçə bilməsin. Ehtiyac yaranarsa, ehtiyatda olan qüvvələrimiz də cəlb olunmalıdır. Təki sərhədlərimiz daha etibarlı qorunsun və Qarabağda qalan separatçı rejim tör-töküntülərinin canlarını ədalətli cəzamızdan qurtarmaqlarına imkan verməyək”, – deyə davamında kəşfiyyatçı zabit vurğulayıb./Moderator.az

"İsraildə və Ukraynada baş verənlər dünyada düşünüldüyündən çox böyük təhlükədir və yeni dünya savaşına rəvac verə bilər..." "Rusiya həm İsraildə, həm Suriyada, həm də Ukraynada terrorçu qruplaşmalara dəstək verir..." "Rusiya Yaxın Şərqdə müharibənin qızışdırılmasında maraqlıdır..." Ukrayna prezidenti Vladimir Zelenski əmin edib ki, Rusiya "bu və ya digər dərəcədə" HƏMAS-ın İsraildə apardığı əməliyyatları dəstəkləyir. Sozcu.az xəbər verir ki, Zelenski Moskvanın Fələstin terrorçularına yardımı haqqında Fransanın "France 2" telekanalına müsahibəsində bəyan edib. "Bizim xüsusi xidmət orqanları üçün bu, aydındır. Bizdə olan sübutlar bizə Rusiyanın müəyyən terrorçu əməliyyatların aparılmasına kömək etdiyini güman etməyə əsas verir", - Ukrayna prezidenti uzah edib. Onun sözlərinə görə, Rusiyanın terrorçu qruplaşmalara dəstək verməsi ilk dəfə deyil, bunu o, həm İsraildə, həm Suriyada, həm də Ukraynada edib. Rusiyanın HƏMAS-a ilk kömək edənlərdən biri olduğu barədə Zelenski oktyabrın 10-da Rumıniyanın paytaxtı Buxarestə səfəri zamanı bəyan edib. "HƏMAS-ın arxasında kim dayanır? Düşünürəm ki, cavab kifayət qədər sadədir, bunu edən onu dəstəkləyəndir. Biz görürük ki, bu dəstək açıq-aşkardır, silahla dəstəkdir. Bu ki, bir gündə deyil, uzun müddətdir baş verir", - Ukrayna prezidenti Rumıniya lideri Klaus Yohannislə birgə mətbuat konfransında qeyd edib. Zelenski qeyd edib ki, Ukrayna kimi Rumıniya da İsrailə terrorçu hücumu prinsipial olaraq pisləyir. "Bu, çox vacib və lazımlıdır ki, bütün dünya məhz belə prinsipial münasibət bildirsin, terroru və terrorçu hücumlara kömək edənləri və kömək edə bilənləri pisləsin.  Yaxın Şərqdə zorakılığın yayılmasına, Rusiya və ya kimsəyə qarşıdurmanı qızışdırmağa yol vermək olmaz, regionda aparılan və, nəhayət, çoxdan gözlənilən sakitlik gətirəcək və terror təhlükəsindən qoruyacaq bütün fəaliyyətin nəticələrini qoruyub saxlamaq lazımdır", - Zelenski vurğulayıb. Xatırladaq ki, Zelenski dünən axşam videomüraciətində deyib ki, Ukrayna kəşfiyyatı və diplomatları ilə İsraildə və onun ətrafında, habelə bütövlükdə Yaxın Şərqdə vəziyyətlə bağlı müşavirə keçirib. O, qeyd edib ki, "əldə olan çox dəqiq məlumata görə, Rusiya Yaxın Şərqdə müharibənin qızışdırılmasında maraqlıdır". "Məqsəd yeni ağrı və əzab mənbəyinin dünyada birliyi zəiflətməsi, parçalanma və ziddiyyətlərin artırılması, bununla da Avropada azadlığın məhv edilməsinə kömək etməkdir. Biz rusiyalı təbliğatçıların bu hadisələrə necə sevindiyini görürük. Biz Moskvanın İran dostlarının tamamilə açıq şəkildə İsrailə hücum edənlərə çiyinlərini irəliyə verdiyini görürük", - Ukrayna prezidenti qeyd edib. O, vurğulayıb ki, İsraildə və Ukraynada baş verənlər dünyada düşünüldüyündən də çox böyük təhlükədir. Axı, keçmişdə dünya savaşları məhz lokal təcavüzlərdən qızışaraq törədilib.

Bu günə qədər Qarabağ təkcə Azərbaycan deyil, böyük bir coğrafiyada hər bir türkün davası olmuşdur. Sozcu.az xəbər verir ki, bu sözləri türkiyənin İYİ Partiyasının başqanı Maral Akşənər qrup toplantısındakı çıxışında deyib. “Nə mutlu bizə ki, biz bu davanın sona çatdığını görə bildik. Şübhəsiz ki, Qarabağ bizim üçün bir həsrət, türklüyün qovşağı, hüquq və azadlıq mübarizəsinin adıdır. Eyni zamanda, Qarabağ bizim üçün, bölgəmizdə sülh və əmin-amanlığı təmin etmək üçün mədəniyyət və ticarət körpüsüdür ki, onu tez bir zamanda sabitləşdirmək lazımdır. Təxminən 30 il əvvəl Azərbaycan ərazisinin 20 faizini təşkil edən Qarabağ işğal edilmiş, 1 milyondan çox bacı-qardaşımız öz yurd-yuvasından köç etmək məcburiyyətində qalmışdı. Heç vaxt unutmuram, Azərbaycanın böyük şairi Bəxtiyar Vahabzadə onları “Didərgin” adlandırırdı. Yəni öz yerindən, yurdundan köçə məcbur olan qardaşlarımız. Vahabzadə onların çəkdiyi əziyyəti şeirində belə təsvir etmişdi: “Başına haranın külünü töksün, Sinəsi əzabdan dağ-dağ didərgin. Təzə vətənində qərib, çəkingən, Köhnə vətənindən qaçaq didərgin”. İllərlə davam edən bu böyük mübarizə, bu böyük iztirab İkinci Qarabağ müharibəsində Can Azərbaycanımızın qələbəsi ilə başa çatdı. 10 noyabr 2020-ci ildə atəşkəs anlaşması ilə bərabər, Qarabağ yenidən azadlığına qovuşdu. Ancaq buna baxmayaraq, geridə qalan 2 illik dönəmdə anlaşmanın heç bir maddəsinə əməl olunmadı. Azərbaycanın ərazi bütövlüyünə məhəl qoyulmamağa çalışıldı. Bu səbəbdən 19 sentyabrda Azərbaycan Ordusu Xankəndi və ətrafına yönəlik bir antiterror əməliyyatı gerçəkləşdirərək, konstitusional haqlarını təmin etdi. Beləcə artıq “Dağlıq Qarabağ” anlayışı tarixə qarışmış oldu. Dəyərli millət vəkilləri, indi bizim regionun sülhü və sabitliyi üçün çox mühüm imkanımız var. Bu fürsət yaxşı qiymətləndirilərsə, Azərbaycan ilə Türkiyə arasında birbaşa və fasiləsiz nəqliyyat təmin ediləcək və beləliklə, türk dünyasının inteqrasiyası üçün tarixi bir addım atılacaq. Bundan əlavə, Zəngəzur dəhlizinin açılması və onun Orta Dəhlizə qoşulması; O, bütün region ölkələrinin, o cümlədən Ermənistanın iqtisadiyyatına böyük töhfələr verəcək. Xaoş və münaqişə əvəzinə bölgədə sülh və sabitlik hakim olacaq. Buna nail olmaq mümkün olsa, Türkiyə ilə Ermənistan arasında normallaşma prosesinin də sağlam nəticəyə çatacağını rahatlıqla deyə bilərik. Lakin unutmaq olmaz ki, bu imkanlar həm də təhlükələr gətirir. Biz imkan verə bilmərik ki, Azərbaycanın ərazi bütövlüyünü təmin etməsi və regionda yaranan bu potensial qarşısında yeni terror ocağı meydana çıxsın. Çünki son zamanlarda kiçik yaşlı uşaqlara silah təlimi verərək, terroru təşviq etməklə Qarabağda daimi sabitliyin qarşısını almaq üçün terror təşkilatının əsaslarının qoyulduğunu görə bilərik. Qarabağda Azərbaycana qarşı varlığını göstərə bilməyən Ermənistan ASALA-ya əsaslanan VOMA adlı təşkilatla asimmetrik müharibəyə hazırlaşır. Mərdcə döyüşdən qaçanlar öldürmək üçün xain yollar axtarırlar. Ermənistan hökumətlərinin uzun illərdir PKK-ya maddi-texniki və insan resursları dəstəyi verdiyini zatən bilirik. Türk və Türkiyə düşmənçiliyi əsasında başlayan bu birliyin VOMA-PKK ortaqlığı ilə davam etməsi də təbii ki, mümkündür. Buna görə də sərhədlərimizdəki boşluqları dərhal aradan qaldırmalı, sərhədlərimizi terrorçuların keçidinə qarşı daha möhkəm qorumalıyıq. Bu terror quruluşunu diplomatik yollarla aradan qaldırmaq üçün biz bütün məlumat və sənədləri beynəlxalq ictimaiyyətə çatdırmalı, Ermənistana terrora sərmayə qoymağın qaçılmaz nəticələrini izah etməli və bununla da onun növbəti tarixi səhvə yol verməsinin qarşısını almalıyıq. Başda Ermənistan hökuməti olmaqla hər kəs bir həqiqəti çox yaxşı bilməlidir: Qarabağ türkdür! Qarabağ türklərindir! Qarabağ Azərbaycanındır! Heç bir terror növü bu həqiqəti dəyişdirə bilməyəcək! Buna görə də bölgədə bir an öncə barış və sabitliyin bərqərar olmasını arzulayır, can azərbaycanlı qardaşlarımıza sevgi və məhəbbətimizi çatdırıram. Əziz dava arxadaşlarım, təəssüf ki, coğrafiyamızda yaranmış və yaradılmış terror təşkilatlarının ortaq nöqtəsi türk düçməni olmalarıdır. Bu gün bizim üçün PKK, YPG, İŞİD nədirsə, Qarabağı hədəf alacaq yeni bir terror təşkilatı da onların qanlı əksi olacaqdır. Ancaq hər kəs bilməlidir ki Azərbaycana yönəlik bu və buna bənzər gedişlər qarşısında türk milləti tək yumruq olacaq və polad yumruğunu terrorun təpəsinə endirəcəkdir. ASALA ilə yoxladılar, başarmadılar, PKK/YPG ilə yoxladılar, başarmadılar. Hizbullah ilə yoxladılar, başarmadılar. İŞİD ilə yoxladılar, başarmadılar. FETÖ ilə yoxladılar, başarmadılar. Nə hikmətdirsə, bütün terror təşkilatlarının hədəfində türk milləti var. Bəziləri ulu dinimizi alət edib millət anlayışına qarşı müharibə elan edirlər. Bəzi insanlar etnik mənsubiyyətdən istifadə edərək millət anlayışına müharibə elan edirlər. Amma onların hamısının ortaq cəhəti türk millətinə, türk dövlətinə və Atatürkə qarşı allergiyalarıdır…” – Aşkənər bildirib.

Türkiyə Prezidenti Rəcəb Tayyib Ərdoğan Fələstinin radikal HƏMAS hərəkatının nümayəndələri ilə danışıqlar aparıb. Sozcu.az xəbər verir ki, bu barədə “Habertürk” telekanalı mənbələrə istinadən məlumat yayıb. Danışıqlarda qruplaşmanın saxladığı girovların azad edilməsi məsələsi müzakirə olunub. Mənbənin sözlərinə görə, görüş Ankarada baş tutub. Türkiyə rəsmiləri bu danışıqlarla bağlı rəsmi şərh yaymayıb.

Bu gün ərazilərin quldur dəstələrindən təmizlənməsi prosesi gedir. Sozcu.az xəbər verir ki, bu barədə Prezident İlham Əliyev oktyabrın 11-də MDB-yə üzv dövlətlərin təhlükəsizlik və xüsusi xidmət orqanları rəhbərləri Şurasının 53-cü iclasının iştirakçılarını qəbul edərkən bildirib. "Bizdə olan məlumatlara görə, hələ ərazimizdə gizlənməyə davam edən müəyyən qruplar mövcuddur. Sentyabrın 20-dən sonra Qarabağda hərbi təxribatlar törədildi. Ərazi kifayət qədər böyükdür, dağlıqdır, meşəlikdir, buna görə də bizə ərazini quldur birləşmələrindən tamamilə təmizləmək üçün vaxt lazım olacaq. Bax, prinsip etibarilə, məsələnin tarixçəsi bundan ibarətdir”, - Prezident deyib.

İsraildə iqtidar və müxalifət milli birlik hökumətinin yaradılması barədə razılığa gəliblər. Sozcu.az xəbər verir ki, bu barədə "13-cü kanal" məlumat yayıb. Milli birlik hökumətinin tərkibinə Baş nazir Benyamin Netanyahu, müdafiə naziri Yoav Qallant və keçmiş müdafiə naziri Benni Qantzın adı daxil edilib.

Biz İsrail ərazisində dinc əhalinin öldürülməsinə qarşıyıq, Qəzzada dinc əhalinin öldürülməsini də qətiyyən qəbul etmirik. Sozcu.az xəbər verir ki, bunu Türkiyə Prezidenti Rəcəb Tayyib Ərdoğan deyib. “Bir şəhərin suyunu, işığını kəsib, ibadət yerlərini, məktəblərini yıxaraq, dinc əhalinin yaşadığı binaların dağıdılması kimi utancverici şəkildə hərəkətlər münaqişə deyil, qətliamdır. Mülki insanların öldürülməsi dövlətin yox, örgütün (təşkilat – red.) refleksi ola bilər. İsrail dövlət kimi yox, örgüt kimi darvanırsa, unutmamalıdır ki, ona təşkilat kimi davranılmağa başlayacaqlar. Bu faciələrin davam etməsinə nə region, nə də dünya dözə bilər”, - Ərdoğan bildirib.

İsrailə hücum zamanı HƏMAS yaraqlıları Fələstinin hüquqları uğrunda mübarizə aparan bir çox fəalı, eləcə də Fələstinə rəğbət bəsləyənləri də öldürüblər. Sozcu.az xəbər verir ki, bu barədə “Nyu York Tayms” məlumat yayıb. “Qəzza sərhədinin İsrail tərəfində sülh təşəbbüslərini və Fələstin hüquqlarını dəstəkləyən bir neçə kibbutzim sakini yaşayır. Bu sakinlərin çoxu şənbə günü HƏMAS hücumundan sonra itkin düşənlər və ya öldürülənlər arasında yer alıb. Yaraqlıların hücumundan sonra 74 yaşlı Vivian Silver itkin hesab edilir və çox güman ki, girov götürülüb. Kanadada anadan olan Silver 2014-cü ildə Qəzza müharibəsindən sonra İsrail-Fələstin münaqişəsinin siyasi həllini təşviq etmək üçün yaradılan kütləvi hərəkat-“Women Wage Peace”in liderlərindən biri idi. Fələstin tərəfdarı olan başqa bir sülh fəalı Kaim Katsmanın əvvəlcə girov götürüldüyü güman edilirdi, lakin sonra o, evində öldürülmüş vəziyyətdə tapılıb. O, bu yaxınlarda Sietldəki Vaşinqton Universitetində fəlsəfə doktoru dərəcəsini bitirmişdi. Şənbə günü hücumda daha iki sülh fəalı - Bilgə və Ceykob İnon da öldürülüblər”, - məlumatda deyilir.

İsrailin bombardmanları nəticəsində 260 min nəfər Qəzza zolağındakı evlərini tərk etmək məcburiyyətində qalıb. Sozcu.az xəbər verir ki, bu barədə BMT-dən məlumat verilib. “Hesablamalara görə, 263 934 nəfər Qəzzada məcburi köçkündür. Onların sayının artacağı istisna olunmur”, - məlumatda qeyd olunub. Jurnalistlərin Müdafiəsi Komitəsinin məlumatında qeyd olunub ki, HƏMAS-ın hücumlarından bəri Qəzza sektorunda 7 jurnalist öldürülüb. Məlumata görə, daha 2 jurnalist yaralanıb, 2-si isə HƏMAS tərəfindən girov götürülüb. Qeyd edək ki, 7 oktyabrda HƏMAS "İslami-Cihad"la birgə İsrailə qarşı "Əqsa tufanı" əməliyyatına başlayıb. Nəticədə çoxsaylı insan ölüb və yaralanıb. İsrail ordusu isə HƏMAS-ın Qəzzadakı mövqelərinə zərbələr endirir.

ABŞ-ın Ukraynaya, eləcə də İsrailə və Hind-Sakit okean regionundakı müttəfiqlərinə dəstək vermək üçün kifayət qədər qüvvəsi var. Sozcu.az xəbər verir ki, bu sözləri ABŞ Prezidentinin milli təhlükəsizlik üzrə müşaviri Ceyk Sallivan brifinqdə bildirib. O əlavə edib ki, ABŞ eyni vaxtda hər bir istiqamətdə iş aparmaq niyyətindədir.

Vətən müharibəsi şəhidi Elnur Cəfərovun atası vəfat edib. Sozcu.az xəbər verir ki, şəhidin atası Cəmiyyət Cəfərov ötən gün dünyasını dəyişib. O, Füzuli rayonunda dəfn edilib. Qeyd edək ki,1998-ci il təvəllüdlü Elnur Cəfərov müddətdən artıq hərbi qulluqçu kimi xidmət edib və 2020-ci ilin 3 oktyabrında Füzuli uğurnda gedən döyüşlərdə şəhid olub. O, ölümündən sonra “İgidliyə görə”, “Vətən uğrunda” və “Füzulinin azad olunmasına görə” medalları ilə təltif edilib.

“Belə yerdə “Dovşana qaç, tazıya tut deyir” məsəli yerinə düşür...” Rusiyanın Ermənistandakı səfiri Sergey Kopırkinin başçılıq etdiyi Rusiya nümayəndə heyəti  Qarabağın dağlıq hissəsindən olan məcburi köçkünlərin ehtiyaclarını qiymətləndirmək, “Sünik” (Zəngəzur) qubernatoru Robert Qukasyan və yerli hakimiyyət orqanlarının digər nümayəndələri ilə təhlükəsizlik, sosial məsuliyyətli biznes, konsulluğun açılması və bir sıra digərləri də daxil olmaqla regionun bir sıra məsələlərin müzakirə etmək üçün “Sünik” vilayətinə səfər edib.  Moderator.az xəbər verir ki, “Aysor” nəşrinin yaydığı məlumata görə, Sergey Kopırkin erməni jurnalistlərə müsahibəsində səfərin nəticələrindən danışıb və prioritet vəzifələrlə bağlı sualları cavablandırıb. “Rusiya Ermənistana həm dövlət, həm də bir sıra ictimai təşkilatlar vasitəsilə əhəmiyyətli yardım paketi hazırlayır”-deyən  səfir qeyd edib ki, görüş zamanı tərəflər “Dağlıq Qarabağın erməni əhalisinin başına gələn faciə” fonunda “Sünik” bölgəsinin problemlərini müzakirə ediblər. Yerli hakimiyyət orqanları “məcburi” köçkünlərin problemlərinin həllinə diqqət yetirir. Rusiyalı diplomatın sözlərinə görə, yerli rəhbərlik nəhəng və səmərəli iş görür. “Rusiya üçün indi Ermənistanda və Sünik bölgəsində baş verənlər çox önəmlidir, Ermənistan və erməni xalqı, o cümlədən Dağlıq Qarabağ erməniləri bizim üçün önəmlidir, onlar yad deyillər. Biz çox sıx bağlıyıq. Biz bu insanların yaşadığı durumu və ağrıları özümüzünkü kimi qəbul edirik. Kim nə deyirsə desin, Rusiya bütün bunlara laqeyd deyil. O, öz əməlləri ilə göstərdi, göstərir və göstərəcək ki, bu, çox mühüm ölkə və xalqdır və onunla əsrlər boyu əlaqələr qurduğu və gələcəkdə də qurmaq niyyətindədir”, - deyə Kreml emissarı vurğulayıb. Kopırkin əmin edib ki, Rusiya Federasiyasının rəhbərliyi “Sünik” bölgəsinin problemlərinə böyük diqqət yetirir və ilk növbədə humanitar xarakterli məsələlərə diqqət yetirərək, onların həllinə kömək etməyə hazırdır. Bu baxımdan diplomat “Rossotrudniçestvo”-nun  Qarabağdan köçkmüş ermənilərin prioritet ehtiyaclarına cavabını müsbət qiymətləndirib. P.S. Belə yerdə “Dovşana qaç, tazıya tut deyir” məsəli yerinə düşür...

Separatçı rejimin “rəhbər”i Samvel Şahramanyanın İrəvanda müşavirə keçirməsi və digər məsələlərlə yanaşı, Ermənistan hakimiyyətinə qarşı tənqidlər səsləndirməsi, eləcə də mübarizənin davam etdiriləcəyindən danışması Ermənistanın siyasi rəhbərliyini qəzəbləndirib.  Sozcu.az xəbər verir ki, bu barədə “Hraparak” məlumat yayıb.  Qəzet yazır ki, Nikol Paşinyan S. Şahramanyanın bu çıxışından sonra Qarabağdan Ermənistana köçən sıravi erməniləri sosial yardımdan məhrum etməklə onlardan qisas almaq qərarına gəlib:  “Bu gün Paşinyan iqtidarı tərəfindən “Artsax”ın sürgündəki “hakimiyyət”inə təzyiqlər başlayıb. Hakimiyyət sosial yardımları kəsməklə “Artsax” ermənilərini hədələyib. Hətta bəzi məlumatlara görə, Baş nazir Nikol Paşinyan Samvel Şahramanyanın sərt tənqidlərindən sonra Ermənistana gələn Qarabağ ermənilərinin sentyabr ayı üçün nəzərdə tutulan sosial yardımlarının ödənilməməsi əmrini verib”.  KİV onu da əlavə edib ki, İrəvan separatçıların maliyyələşdirilməsini dayandırmağa qərar verib. Belə ki, Ermənistan hakimiyyəti İrəvandakı qondarma “Artsaxın nümayəndəliyi”ni və “Artsaxın Operativ Qərargahı”nı da ləğv etmək qərarına gəlib.  Məlumata görə, Paşinyanın İrəvana sığınan “Artsax liderləri”nə qarşı münasibətini daha da sərtləşdirmək niyyətindədir. Baş nazirin özünə yeni problemlər yaratmamaq üçün separatçı “lider”lərlə bağlı kifayət qədər sərt qərarlar qəbul etməsi gözlənilir. Hətta bu sıraya onların üçüncü ölkəyə göndərilməsi də daxildir.  Qeyd edək ki, başda Samvel Şahramanyan olmaqla, Vitali Balasanyan, Samvel Babayan, Karen Sarkisyan və digər separatçıların İrəvana sığındığına dair məlumatlar var. 

Türkiyə prezidentinin bəyanatında Ermənistanın vədindən söhbət gedir. Qeyd edək ki, Ermənistan Türkiyə və Azərbaycanın işlətdiyi terminologiya çərçivəsində heç kimə vədlər verməyib. Burada bir nüans var, bu terminologiyanı necə qəbul etməyimiz çox vacibdir, çünki Ermənistanda və bütövlükdə ictimaiyyət olaraq bunu Ermənistan üçün müəyyən ərazi tələbi və eksterritorial dəhliz kimi qəbul edirik. Sozcu.az xəbər verir ki, bu sözləri Baş nazir Nikol Paşinyan Ermənistanın “Birinci Kanal”ına müsahibəsində Türkiyə lideri Ərdoğanın Zəngəzur dəhlizi ilə bağlı Ermənistanın vədi məsələsi haqda çıxışını şərh edərkən deyib. “Deməli, biz heç kimə belə terminologiya və nəticə ilə heç bir vəd verməmişik. Ermənistan və Türkiyə nümayəndələri arasında danışıqlar gedəndə biz dedik ki, sizin işlətdiyiniz “dəhliz” terminologiyası bizim üçün qəbuledilməzdir. Cavab verdilər: necə yəni qəbuledilməzdir, siz üçtərəfli bəyanat qəbul etdiniz! Cavab verdik ki, üçtərəfli bəyanatda belə bir şey yoxdur, açın, baxın, göstərin. Ümumilikdə qlobal dünyada “dəhliz” sözü kommunikasiya marşrutları üçün ümumi termin kimi istifadə olunur. Üçtərəfli bəyanatda isə məntiq bir qədər fərqlidir, belə ki, Laçın dəhlizi var ki, orada bəyanatın məntiqinə görə, müəyyən məzmunda eksterritoriallıq və ya üçüncü qüvvənin nəzarəti var. Bundan əlavə, Laçın dəhlizi sadəcə yol deyil, o, üçüncü tərəfin nəzarətində olan 5 kilometrlik ərazi zolağıdır”, - Paşinyan bildirib. Paşinyanın sözlərinə görə, Ermənistan regional kommunikasiyaların açılmasına hazır və bunda maraqlı olduğunu elan edir: “Biz Azərbaycan və Türkiyə üçün yollar açmağa hazırıqmı? Bəli, biz hazırıq və qeyd edildiyi kimi, bu, Ermənistanın suverenliyi və yurisdiksiyası əsasında, bərabərlik və qarşılıqlılıq prinsipi əsasında baş verməlidir. Bu o deməkdir ki, heç bir üçüncü qüvvə Ermənistan Respublikasının heç bir ərazisinə nəzarət etməməlidir. Ermənistan sərhədini keçərkən Ermənistan Respublikasının sərhəd və gömrük xidmətləri hərəkətə keçməlidir. Bizə deyirlər ki, üçtərəfli bəyanatda deyilir ki, təhlükəsizliyi Rusiya təmin etməlidir, amma mən deyirəm ki, belə bir şey yoxdur”. Paşinyan onu da vurğulayıb ki, dəmir yolunun Meğridən keçməsi heç bir etiraz doğurmur: “Çünki başqa yerdə dəmir yolumuz yoxdur. İcevanda, Razdanda, Qazaxda dəmir yolu var, orada çox böyük problem var, Axartsin kəndində (Dilican yaxınlığı – red.) sürüşmə var, onu aradan qaldırmaq üçün ilkin hesablamalara görə, 500 milyon dollar lazımdır və böyük sual budur ki, aradan qaldırılacaq, ya yox? Amma Meğri dəmir yolunun bərpası ilə bağlı heç bir problemimiz yoxdur, əksinə, biz bunda maraqlıyıq, çünki bu, Ermənistanın blokadasının götürülməsi və ümumilikdə sülh deməkdir”. Paşinyanın sözlərinə görə, beynəlxalq ekspertlər həm avtomobil, həm də dəmir yolunun eyni yerdən keçməsini qeyri-real adlandırırlar, lakin bu, texniki məsələdir: “Yolların açılması Ermənistan, Azərbaycan və Türkiyə üçün faydalıdır. Bəli, bu, regionda ciddi sülh qovşağına çevrilə bilər və biz deyirik ki, bu qeyri-müəyyənliklər aradan qaldırılarsa, burada da problem olmayacaq”. Zəruri olaraq xatırladaq ki, 10 noyabr 2020-ci il bəyanatının 9-cu bəndində göstərilir: “Ermənistan Respublikası vətəndaşların, nəqliyyat vasitələrinin və yüklərin hər iki istiqamətdə maneəsiz (!!!) hərəkətinin təşkili məqsədilə Azərbaycan Respublikasının qərb rayonları və Naxçıvan Muxtar Respublikası arasında nəqliyyat əlaqəsinin təhlükəsizliyinə zəmanət verir. Nəqliyyat əlaqəsi üzrə nəzarəti Rusiyanın Federal Təhlükəsizlik Xidmətinin sərhəd xidmətinin orqanları həyata keçirir. Tərəflərin razılığı əsasında Naxçıvan Muxtar Respublikası ilə Azərbaycanın qərb rayonlarını birləşdirən yeni nəqliyyat kommunikasiyalarının inşası təmin ediləcək”. Nəqliyyat əlaqəsinə nəzarəti Rusiya FTX-nin edəcəyi və hərəkətin maneəsiz (gömrük və vergi yoxlaması olmadan) olması ilə bağlı dəqiq və aydın izah var.

Pensiyaların oktyabrın 13-də tam ödənilərək yekunlaşdırılması nəzərdə tutulub. Sozcu.az xəbər verir ki, bu barədə Dövlət Sosial Müdafiə Fondu məlumat yayıb. Həmin gün güzəştli şərtlərlə pensiya hüququna malik şəxslərin də pensiyaları ödəniləcək.

İsrailin rəsmi səhifəsi İranın ali dini lideri Əli Xameneiyə cavab verib. Sozcu.az xəbər verir ki, bu barədə X sosial şəbəkəsində paylaşım edilib. “Klaviatura arxasında gizləndiyiniz zaman cəsarətli olmaq asandır. Siz və HƏMAS dostlarınız çox tezliklə barbar hərəkətlərinizdən peşman olacaqsınız”, - paylaşımda qeyd edilib. Qeyd edək ki, Xamenei ötən gün “Sionist rejimə hücum planlaşdıranların əllərindən öpürük” demişdi.

Ukrayna Rusiyanın hücum cəhdlərinə baxmayaraq, addımbaaddım irəliləməyə davam edir. Sozcu.az xəbər verir ki, bunu Ukrayna Prezidenti Valdimir Zelenski deyib. “Rusiya əks-hücuma keçməyə çalışır, amma uğursuzdur. Biz də istədiyimiz və ya gözlədiyimiz kimi elə sürətli irəliləmirik”, - Zelenski bildirib.

Oktyabrın 16-da Təbrizin Tərbiyət Mədəniyyət Mərkəzində “Leyli və Məcnun” tamaşası səhnəyə qoyulacaq. Kult.az xəbər verir ki, bu barədə Təbrizin yerli mediası məlumat yayıb. Bildirilib ki, tamaşanın səhnəyə çıxarılmasına bir həftə qalmış biletlərin hamısı satılıb. Yaqub Sədiq Camalinin rejissoru olduğu tamaşanın böyük maraq doğurmasının səbəbi səhnə əsərinin Azərbaycan dilində olması ilə əlaqələndirilir.

HƏMAS-ın hücumu nəticəsində ölən İsrail vətəndaşlarının sayı 1008 nəfərə çatıb. Sozcu.az xəbər verir ki, bu barədə İsrailin ABŞ-dakı səfirliyi məlumat yayıb. Hücum nəticəsində yaralananların sayının isə 3418 nəfərə çatdığı qeyd olunub. *** HƏMAS-ın hücumu nəticəsində ölənlərin sayı 1200 nəfərə qalxıb. Bu barədə ABŞ Prezidenti Co Bayden çıxışında bildirib. Onun sözlərinə görə, ölənlərdən 14 nəfəri ABŞ vətəndaşıdır. Qeyd edək ki, İsrail 7 oktyabrda HƏMAS-ın kütləvi hücumu ilə başlayan müharibədə ordunun indiyə qədər 123 hərbçi itirdiyini açıqlayıb.

ABŞ-ın Cənubi Qafqazda Azərbaycan və Ermənistan münasibətləri ilə bağlı yeganə məqsədi davamlı sülh və sabitliyin təmin edilməsidir. Sozcu.az xəbər verir ki, bunu ABŞ Dövlət Departamentinin mətbuat katibi Metyu Miller bildirib. O qeyd edib ki, Qarabağ əhalisinin humanitar ehtiyaclarının və hüquqlarının təmin edilməsi vacibdir.

Bu gün ABŞ Ukraynaya yeni hərbi yardım paketini açıqlayacaq. Sozcu.az xəbər verir ki, bu barədə Amerikanın Səsi məlumat yayıb. Qeyd olunur ki, yeni yardım paketinin ümumi dəyəri 200 milyon dollara yaxındır: “Paketə "AİM-9 Sidewinder" raketləri, HİMARS üçün artilleriya sursatları, TOV tank əleyhinə raketlər, həmçinin 155 mm və 105 mm mərmilər daxildir”.

“Rusiya sülhməramlılarının Dağlıq Qarabağda qalıb-qalmaması məsələsi təkcə bizdən asılı deyil. Çünki biz bilirik ki, Rusiya bu mövzuda Azərbaycanla müəyyən müzakirələr aparır”. Sozcu.az xəbər verir ki, bunu Ermənistanın Baş naziri Nikol Paşinyan yerli İctimai TV-yə müsahibəsində deyib. “Paralel olaraq bizimlə də müzakirələr davam edir. Bu məsələdə konkret fikir bildirə bilmərəm. Sülhməramlıların Qarabağdan çıxacaqları halda Ermənistana gəlməsinə dair söyləntilər məntiqsizdir. Elə olacağı təqdirdə onlar Rusiyaya qayıtmalıdırlar. O ki qaldı, Gümrüdəki Rusiya hərbi bazasına, onun Ermənistanda olmasının səbəbləri hər kəsə aydındır. Bu səbəblər hələ də keçərlidir və biz onların çıxarılması ilə bağlı heç bir məsələ qaldırmırıq”, – Baş nazir bildirib.

ABŞ Hərbi Dəniz Qüvvələrinin təyyarədaşıyan gəmisi “Gerald Ford” Aralıq dənizinin şərqinə çatıb. Sozcu.az xəbər verir ki, bu barədə ABŞ Silahlı Qüvvələrinin Mərkəzi Komandanlığı (CENTCOM) məlumat yayıb. Qeyd edək ki, ABŞ administrasiyası Yaxın Şərqdə vəziyyətin kəskinləşməsi fonunda regiona əlavə hərbi qüvvələr göndərir.

“Hazırda nə Azərbaycan, nə də bizim tərəfimizdən sərhədə qoşun yığılmır”. Sozcu.az xəbər verir ki, bunu Ermənistanın Baş naziri Nikol Paşinyan yerli İctimai TV-yə müsahibəsində bildirib. “Ötən gün ərzində sərhəddə sadəcə bir güllə açılıb. Bu eskalasiya vəziyyətinin demək olar ki, 0 olduğu mənasına gəlir. Sərhəddə heç bir gərginlik yoxdur. Lakin müasir dünyada hər an hər şey ola, bir neçə saata qoşunların yeri dəyişə bilər. Lakin Azərbaycanla məsələləri həll etsək, müharibənin mənası qalmayacaq”,- Paşinyan deyib.