Son xəbərlər

Tanınmış jurnalist Elvin Basqallı Kürdəmirdə avtomobil qəzasına düşüb. Sozcu.az Report-a istinadla xəbər verir ki, hadisə Bakı-Qazax əsas magistral yolunun rayonun Atakişili kəndindən keçən hissəsində qeydə alınıb. Belə ki, sürücü Nicat Tarverdiyev "Hunday Santafe" markalı avtomobillə Bakı istiqamətində hərəkətdə olarkən idarəetməni itirib. Nəticədə avtomobil yoldan çıxaraq aşıb. Hadisə zamanı Elvin Tarverdiyev və ailə üzvləri avtomobildə olublar. Qəzada xəsarət alan olmasa da, avtomobilə ciddi ziyan dəyib. Hazırda fakt araşdırılır. Qeyd edək ki, tanınmış jurnalist Elvin Tarverdiyev (Basqallı) hazırda “Azəristiliktəchizat” ASC-nin mətbuat katibidir.

Qarlı hava şəraiti ilə bağlı Baş Dövlət Yol Polisi İdarəsi (BDYPİ) valideynlərə müraciət edib. BDYPİ-dən Sozcu.az-a  verilən xəbərə görə, müraciətdə deyilir: “Əziz valideynlər: – övladlarınızı yollarda nəzarətsiz qoymayın; – uşaqların avtomobil yollarında və ya yol kənarlarında qarla oynamalarına, eləcə də yollarda sürüşmələrinə icazə verməyin; – uşaqların əyləncələrini təhlükəsiz hesab olunan parklarda və yaşayış binalarının qarşısında salınan istirahət zonalarında təşkil edin. Nəzərə almaq lazımdır ki, belə havalarda tormuzlama zamanı avtomobillərin yolda sürüşmə ehtimalı yüksəkdir”.

Azərbaycan Hərbi Dəniz Qüvvələrinin komandanı, vitse-admiral Sübhan Bəkirov ehtiyata buraxılıb. Sozcu.az xəbər verir ki, bu barədə Pravda.az məlumat yayıb. Qeyd edək ki, Müdafiə Nazirliyinin məlumatına görə, “Hərbi xidmətkeçmə haqqında” Əsasnamənin müvafiq bəndinə əsasən həqiqi hərbi xidmətdə olmağın son yaş həddinə çatmış Azərbaycan Ordusunun bir neçə vəzifəli şəxsi ehtiyata və istefaya göndərilib. Bunların arasında Azərbaycan Milli Müdafiə Universitetinin rəisi Heydər Piriyev və Quru Qoşunların artıq sabiq komandanı general-leytenant Ənvər Əfəndiyev də var.

Böyük Britaniyanın xarici işlər naziri Devid Kemeron Qırmızı dənizdə husilərin hücumlarına son qoymaq üçün ölkəsinin nə lazımdırsa edəcəyini açıqlayıb. Sozcu.az xəbər verir ki, onun sözlərinə görə, Britaniyanın Yəməndəki hava hücumları İrana açıq siqnaldır. Qeyd edək ki, İranın dəstəklədiyi husilər İngiltərə və ABŞ-ın Yəməndəki hərbi bazalarına hava zərbələri endirməsindən sonra qisas təhlükəsi ilə üz-üzə qalıb.

General-leytenant Hikmət Mirzəyev müdafiə nazirinin müavini vəzifəsinə təyin edilib. Sozcu.az Yenisabah.az-a istinadən xəbər verir ki, general-leytenant Ənvər Əfəndiyev isə ehtiyata buraxılıb.

Bu gün AFFA-nın İcraiyyə Komitəsinin növbəti toplantısı baş tutmayıb. Toplantı yanvarın 11-də Gəncədə keçirilməli idi. Sozcu.az xəbər verir ki, federasiyanın rəsmi saytı iclasın təxirə salındığını açıqlayıb. Səbəblər barədə məlumat verilməyib. Publika.az-ın məlumatına görə, toplantı AFFA prezidenti Rövnəq Abdullayevə görə baş tutmayıb. Belə ki, Abdullayevin səhhəti qəfildən pisləşib və o, xəstəxanaya yerləşdirilib. Onun indi özəl klinikalardan birində həkim nəzarətində olduğu bildirilir.

Ermənistan Müdafiə Nazirliyinin N saylı hərbi hissəsinin əsgəri zabiti gülləyib.  Sozcu.az “Hraparak”a istinadla xəbər verir ki, hadisə Ermənistanın Azərbaycanla sərhəddə yerləşən Vardenis (Basarkeçər) şəhərində baş verib.  Qəzet yazır ki, əsgər xidməti silahı ilə poçt şöbəsində zabiti gülləyərək qətlə yetirib. Nəşrin mənbəsi iddia edir ki, hadisə korpus komandiri Qaregin Poqosyan evdə olarkən baş verib. Bildirilib ki, korpus komandiri tabeliyində olanlarla düzgün münasibətdə olub zabitlərlə əsgərlər arasında yaranmış mübahisəni həll etməyə çalışmadığına görə silahlı insident qeydə alınıb. Xatırladaq ki, Ermənistan Müdafiə Nazirliyinin mətbuat katibi Aram Torosyan hadisə ilə bağlı açıqlama vermək istəməyib. Nazirlikdən bildirilib ki, hazırda məsələ ilə bağlı araşdırma gedir və yaxın zamanda ictimaiyyətə bununla bağlı məlumat veriləcək. 

Rusiya qırıcıları bu gün Suriya və Türkiyə hava sərhədində təhlükəli manevrlər icra edib. Sozcu.az xəbər verir ki, bu barədə Teleqram kanallarında məlumat yayılıb. Qeyd olunur ki, Türkiyə tərəfinin xəbərdarlıqlarına rəğmən rus qırıcıları hava məkanından geri çəkilməyib. Türkiyə komandanlığının əmri ilə İdlib istiqamətində iki F-16 təyyarəsi havaya qaldırılıb. Məlumata görə, Suriyada dislokasiya edilən Rusiya hava hücumundan müdafiə qüvvələri Türkiyə qırıcılarına müdaxilə etməyib. Hava məkanı gərginliyindən sonra Moskva və Ankara arasında mövzu ilə bağlı təmaslar olub.

Rusiya Federasiyası Silahlı Qüvvələrinin Baş Qərargah rəisi Valeri Gerasimovun dünən Krıma edilən hücum nəticəsində öldürülməsi barədə məlumat yayılıb. Sozcu.az xəbər verir ki, bu barədə Ukrayna mətbuatı xəbər verib. Ukraynanın “Cənub” könüllü ordusunun sözçüsü Sergey Bratçuk bildirib ki, Gerasimovla bağlı məlumat alıb: “Orada kimin hədəfə alına biləcəyi ilə bağlı bir çox versiyalar var, hətta Gerasimovun soyadını da eşitmişəm. Bu, yaxşı xəbər olardı, amma məncə, doğru olma ehtimalı azdır, lakin Rusiya ordusunun həmin komanda məntəqəsində bir neçə yüksək rütbəli zabit və ya generalın öldürülməsi faktı realdır”. Qeyd edək ki, V.Gerasimovun ölümü ilə bağlı məlumat təsdiqlənməyib. Ukrayna Təhlükəsizlik Xidməti isə Gerasimovun mümkün ölümü ilə bağlı məlumatı şərh edə bilməyəcəklərini bildirib.

Ukrayna ordusu ilhaq olunmuş Krım yarımadasına və Rusiyanın digər şəhərlərinə pilotsuz uçuş aparatları (PUA) ilə zərbələr endirib. Sozcu.az xəbər verir ki, bu barədə Rusiya Müdafiə Nazirliyi məlumat yayıb. Bildirilib ki, təkcə Krım səmasında Ukraynanın 36 PUA-sı vurulub. Yarımadaya hücum zamanı ölən və dağıntı olub-olmadığı açıqlanmayıb. Rusiyanın Belqorod vilayətində isə 10 PUA zərərsizləşdirilib. Hücum nəticəsində dağıntılar əmələ gəlib, avtomobillər zədələnib, azı 2 nəfər yaralanıb. Daha bir PUA isə Novorossiysk vilayətində vurulub.

İranın Kirman şəhərində törədilən partlayışlar nəticəsində yaralananların sayı 211 nəfərə çatıb. APA xəbər verir ki, bu barədə Təsnim Agentliyi məlumat yayıb. *** 18.52 Qasım Süleymaninin Kermandakı məqbərəsi yaxınlığında baş verən partlayış nəticəsində yaralıların sayı 188-ə çatıb. APA xəbər verir ki, bu barədə Fars Agentliyi məlumat yayıb. Qeyd edilib ki, yaralıları daşımaq üçün Kermana təyyarə göndərilir. *** 18:11 İslam İnqilabı Keşikçiləri Korpusu (SEPAH) Qüds Qüvvələrinin keçmiş komandanı Qasım Süleymaninin Kermandakı məqbərəsinə aparan küçədə baş verən partlayış zamanı ölənlərin sayı 103-ə çatıb. APA RİA "Novosti"yə istinadən xəbər verir ki, yaralı sayı 141 nəfərdir. *** 17:15 İslam İnqilabı Keşikçiləri Korpusu (SEPAH) Qüds Qüvvələrinin keçmiş komandanı Qasım Süleymaninin Kermandakı məqbərəsinə aparan küçədə baş verən partlayış zamanı ölənlərin sayı 73-ə çatıb. APA Tasnim-ə istinadən xəbər verir ki, yaralı sayı 170-dən çoxdur. *** 17:01 İslam İnqilabı Keşikçiləri Korpusu (SEPAH) Qüds Qüvvələrinin keçmiş komandanı Qasım Süleymaninin Kermandakı məqbərəsinə aparan küçədə baş verən partlayış zamanı ölənlərin sayı 53-ə çatıb. APA Tasnim-ə istinadən xəbər verir ki, yaralı sayı 70-dan çoxdur. Ölən və yaralananlarının sayının artacağı ehtimal olunur. İran rəsmiləri hadisənin terror aktı olduğunu bəyan edib. *** 16:42 Qasım Süleymaninin Kermandakı məqbərəsi yaxınlığında baş verən partlayış nəticəsində qurbanların sayı 50-yə çatıb. APA RİA "Novosti"yə istindən xəbər verir ki, yerli hakimiyyət orqanları hadisəni terror aktı adlandırıblar. *** 16:28 Qasım Süleymaninin Kermandakı məqbərəsi yaxınlığında baş verən partlayış nəticəsində ən azı 20 nəfər ölüb, 15 nəfər yaralanıb. APA xəbər verir ki, bu barədə Tasnim məlumat yayıb. *** 16:13 Qasım Süleymaninin Kermandakı məqbərəsi yaxınlığında baş verən partlayış nəticəsində 15 nəfər yaralanıb. APA xəbər verir ki, bu barədə Kerman fövqəladə hallar rəisi bildirib. Kerman valiliyinin rəsmisi isə qeyd edib ki, hadisənin qaz partlayışı, yoxsa terror aktı olması hələ məlum deyil. Qeyd edək ki, bu gün Kerman şəhərində SEPAH-ın Qüds Qüvvələrinin keçmiş komandanı Qasım Süleymaninin dördüncü ildönümündə dəfn olunduğu qəbiristanlığın yaxınlığında iki partlayış baş verib. *** 15:53 İran İslam İnqilabı Keşikçiləri Korpusu (SEPAH) Qüds Qüvvələrinin keçmiş komandanı Qasım Süleymaninin Kermandakı məqbərəsinə aparan küçədə partlayış baş verib. APA İran mediasına istinadən xəbər verir ki, partlayışın səbəbi hələlik məlum deyil. Qeyd edək ki, insanlar bu gün Süleymaninin ABŞ-ın pilotsuz təyyarəsinin zərbəsi nəticəsində öldürülməsinin dördüncü ildönümünü qeyd etmək üçün toplaşıblar. “Tasnim”in məlumatına görə, isə hadisə yerinə çox sayda təcili tibbi yardım maşınları gəlib.

Şirvanda iki nəfər dəm qazından zəhərlənib. Sozcu.az xəbər verir ki, APA-nın Mil-Muğan bürosunun məlumatına görə, Şirvan sakinləri, 1982-ci il təvəllüdlü İlkin Ələsgər oğlu Ələkbərov və 1989-cu il təvəllüdlü Cəmilə Zakir qızı Dəmirova dəm qazından zəhərlənmə diaqnozu ilə Şirvan xəstəxanasına yerləşdiriliblər. Onlar süni tənəffüs aparatına qoşulublar.