Redaktor seçimi

İranın Təbriz İslam Azad Universitetində təhsil alan bir qrup azərbaycanlı tələbənin təhlükəsizliyi ilə bağlı problem yaranıb.  Bununla bağlı “Qafqazinfo”ya tələbələrin valideynləri müraciət ediblər.  Onların iddiasına görə, azərbaycanlı tələbələr tez-tez maskalı şəxslərin hücumuna məruz qalır, döyülürlər. İki övladı sözügedən universitetin Stomatologiya fakültəsində təhsil alan Sevinc Babayeva deyir ki, artıq tələbələrlə əlaqə saxlamaqda da ciddi problemlə üzləşirlər: “Böyük oğlum Kamran Stomatologiya fakültəsinin 3-cü kursunda, kiçik oğlum Rəvan isə 1-ci kursunda təhsil alır. Əvvəllər belə problemimiz yox idi, Tehranda səfirliyimizə hücumdan sonra vəziyyət lap pisləşib. Uşaqlarımızı konsulluq da qeydiyyata almayıb. Əlaqə saxlaya bilmirik, çox pis vəziyyətdəyik. Oğlumun bir tələbə yoldaşına yolda hücum edib döyüblər, güclə əllərindən qaçıb qurtula bilib. Böyük oğlum iki ay əvvəl Təbrizə gedib, çünki imtahanları qalmışdı, onları verməli idi. Kiçik oğlum Bakıdadır, lakin o da getməlidir. Çünki getməsə, hərbi xidmətə çağırırlar. Halbuki uşaqlar neçə ildir zəhmət çəkib oxuyublar. İstəyirik ki, heç olmasa, onları Azərbaycanda özəl universitetlərə köçürsünlər”. Digər bir valideyn Natəvan Hüseynova da övladının təhlükəsizliyinin sual altında olduğunu deyir: “Oğlum Yusif Hüseynov 2019-cu ildə 2 nömrəli Bakı Tibb Kollecinin Ortopedik Stomotologiya ixtisasını bitirib. Bir il sonra isə Təbriz İslam Azad Universitetinin Stomatologiya fakültəsinə daxil olub. Lakin son vaxtlarda İranda baş verən proseslər oğlumun və onunla birlikdə təhsil alan tələbələrin təhlükəsizliyini sual altında qoyub. Bir azərbaycanlı tələbəmiz polis tərəfindən döyülüb. Eyni universitetdə oxuyan yuxarı kurs tələbəsi naməlum şəkildə universitetdə öldürülüb. Övladım baş verən hadisələrlə əlaqəli psixoloji sarsıntı keçirib. Bu da məni bir valideyin kimi narahat edir və onu Təbrizə buraxmaq istəmirəm. İstəyirəm ki, oğlumun təhsilini burada davam etdirməsinə köməklik olunsun”. Valideyn bildirir ki, tələbələrin vəziyyəti ilə əlaqadar dövlət qrumlarına müraciət ediblər. Lakin onların İranda universitetə attestatla qəbul olunmaları burada ali təhsil müəssisələrinə köçürülmələrinə maneə yaradır: “Müraciətimiz Təhsildə Keyfiyyət Təminatı Agentliyinə yönləndirilib. Bizə münasibətdən belə başa düşürük ki, övladlarımız attestatla universitetə qəbul olunublar deyə, burada 600 bal toplayan tələbələrlə oxumaq istəmələrini haqsızlıq hesab edirlər. Bilirik ki, bu gün Azərbaycan Tibb Universitetində Türkiyə, Rusiya, Gürcüstan, Ukrayna və İrandan attestatla gələn tələbələr təhsil alırlar. Həmçinin təbrizli tələbələrin heç biri Təbrizə qayıtmır, Azərbaycanda fəaliyyət göstərirlər. Azərbaycanda diplomunu tanıdıb həkimlik fəaliyəti göstərən yüzlərlə həkim var. Biz Təbrizi maddi cəhətdən büdcəmizə uyğun olduğu üçün seçmişdik. İndi isə İranda vəziyyət pisdir, uşaqlara pul göndərmək belə çətinləşib. Dövlətimizdən xahişimiz odur ki, uşaqlarımızın təhlükəsizliyinin təmin olunması və Azərbaycanda təhsillərinin davam etmələrinə köməklik göstərsinlər”. Daha bir tələbə Rauf Şərifovun valideyni Rübabə Şərifova isə oğlunun hələ ötən il Azərbaycanda universitetə köçürülmə üçün müraciət etdiyini, lakin rədd cavabı aldığını deyir: “Oğlum Gəncə Dövlət Universitetini bitirmişdi. Təbrizə gedib tibb sahəsində təhsil almaq istəyirdi. Lakin sonradan Azərbaycana köçürülmək istədi. Bütün aidiyyəti orqanlara müraciət etdik, müraciətimizi Elm və Təhsil Nazirliyinə yönləndirdilər. Lakin rədd cavabı aldıq. Hazırda uşaqlarımızın təhlükəsiliyinə görə çox narahatlıq keçiririk”.    Valideynlər sözügedən universitetdə tədrisin Azərbaycan dilində aparıldığını, lakin son hadisələrdən sonra isə dərslərin farsca keçildiyini deyirlər.  Problemlə bağlı Elm və Təhsil Nazirliyinə müraciət etdik. Nazirlikdən sorğumuza cavab olaraq bildirildi ki, tələbələrin köçürülməsi bu ilin yay tətili müddətində həyata keçiriləcək: “Bildiririk ki, respublika daxilində, eləcə də xarici ölkələrin ali və orta ixtisas təhsili müəssisələrindən (bir ixtisasdan və (və ya) təhsilalma formasından digərinə) tələbələrin köçürülməsi transfer.edu.az portalı vasitəsilə həyata keçirilir. Köçürülmə məsələlərinə 2022-2023-cü tədris ilinin yay tətili müddətində baxılması nəzərdə tutulur”. Məsələ ilə əlaqədar Azərbaycanın Xarici İşlər Nazirliyinə də sorğu ünvanlamışıq. 

Ermənistan xarici işlər naziri Ararat Mirzoyan ilə Portuqaliyanın xarici işlər naziri Joao Qomeş Kravinyo arasında telefon danışığı olub.  Sozcu.az “Armenpress”ə istinadla xəbər verir ki, bu barədə Ermənistan XİN məlumat yayıb. “Həmsöhbətlər Ermənistan-Portuqaliya ikitərəfli gündəliyinin məsələlərini müzakirə edərək, siyasi dialoqun dinamikasının qorunub saxlanmasında yüksək səviyyəli qarşılıqlı səfərlərin əhəmiyyətinə, eləcə də iki ölkə arasında ticarət, iqtisadiyyat və digər sahələrdə əməkdaşlığın inkişaf perspektivlərinə toxunublar”, – XİN-in bülletenində qeyd olunub. Həmçinin, bildirilib ki, regional təhlükəsizlik və sabitlik məsələləri müzakirə edilib. Mirzoyan Ermənistan və Azərbaycan arasında münasibətlərin tənzimlənməsi ilə bağlı son hadisələri portuqaliyalı vəzifədaşının diqqətinə çatdırıb.  Bundan başqa, tərəflər Laçın dəhlizi ətrafındakı vəziyyəti müzakirə ediblər. 

Müstəqil Həmkarlar Birliyinin sədr müavini Xəzər Teyyublu sosial hüquqları pozulmuş vətəndaşların, onların problemlərin operativ həll etmək üçün təşkilatın yaradılmış Qaynar həttinə gündə onlarla şikayətlər daxil olduğunu bildirib.  Vətəndaşlar  055 556  25 42 whats app vasitəsilə müraciət ərizələri, lazımı olan sənədləri göndərirlər. Xəzər Teyyublu müraciət etdiyi şikayətlərin düzgün olub-olmamasını araşdırandan sonra müvafiq dövlət təşkilatlara sorğuların göndərilməsini bildirib: “Belə ki, Cəlilabad şəhər Təbriz küçəsi ev 45\N, kirayə yaşayan İsmayılov Qamət Əcəb Əli oğlundan, Lənkəran şəhəri, Sahil 34 ünvanında qeydiyyatda olan, Bakıda kirayə yaşayan Həsənov Mirəli Həbibulla oğlundan, Bakı şəhəri, Lökbatan qəs., keç. 1595, ev 11, m. 90 yaşayan Ziyadov Sabir Zaman oğlundan, Bakı şəhəri, Səbayil r-nu, Y.Mürsəlov küş., dalan 1, ev 17A yaşayan Abdullayeva Fərqanə Akif qızından və Bakı şəhəri, Nizami r-nu, R.Rüstəmov küç., ev 34, m. 31 ünvanında yaşayan Məmmədov Eldar Şahmar oğlundan müraciətlərini alaraq araşdırmalara başlamışıq”. Xəzər Teyyblu sorğuların DİN, MİDA, Sosial Müdafiə Nazirliyinə, Elm və Təhsil Nazirliyinə göndərdiyini qeyd etdi.      

“Sərhəddə baş verənlər birmənalı olaraq Moskva tərəfindən təşkil olunmuş təxribatlardır. Çünki 3 gündən sonra, mayın 14-də Brüsseldə keçiriləcək görüş ilə yanaşı ayın 19-da Ararat Mirzoyan ilə Ceyhun Bayramov arasındakı görüşü əngəlləmək üçün Rusiya sərhəddə belə təxribatlar törədir”. Bu sözləri Yenisabah.az-a açıqlamasında ehtiyatda olan polkovnik Üzeyir Cəfərov deyib. O, bu gün səhər saatlarından başlayaraq, Ermənistan ordusunun Kəlbəcər-Basarkeçər istiqamətində dövlət sərhədi boyunca atəşkəsi pozması faktına münasibət bildirib. Polkovnikə görə, Ermənistanın hərbi-siyasi rəhbərliyi deyir ki, onlar bu təxribatların marağında deyil: “Onda sual olunur ki, əgər Ermənistan ordusuna kənardan təsir göstərilmə imkanı varsa, onda bunun adı nədir? Bu təxribatın sırf Moskva tərəfindən törədilməsinə əminəm. Ona görə ki, dünən Rusiya Xarici İşlər Nazirliyinin rəsmisi də görüşlə bağlı danışdı. Aydın məsələdir ki, Brüssel görüşündən əvvəl Kremlin “canfəşanlıq” etməsi, o cümlədən Qarabağdakı rus sülhməramlılarının komandanı general-polkovnik Aleksandr Lenstovun Bakıdan əliboş getməsi, eləcə də İlham Əliyevin Moskvadakı paradda iştirak etməməsi, habelə digər faktorlar Rusiyanı bu təxribatı törətməyə sövq etdirdi. Buna zərrə qədər şübhə etmirəm”. Ü. Cəfərov əmin edib ki, Nikol Paşinyanı gülünc vəziyyətə salmaq üçün Ermənistanın Moskvadakı ağaları bu təxribatı ona görə təşkil etdilər ki, erməni general Yuri Xaçaturovun oğlu Qriqori Xaçaturovun oğluna məhkəmə tərəfindən bəraət verildi: “Hansı ki, Xaçaturov da birbaşa Moskvaya bağlı olan şəxsdir. Ruslar həm Paşinyanı növbəti dəfə çıxılmaz vəziyyətə salmaq, həm Brüssel danışıqlarının baş tutmaması, həm də Moskva görüşünün reallaşdırılması üçün təşkil olunmuş təxribatdır”. “Təəssüflər olsun ki, hərbi qulluqçumuzun vəziyyəti çox kritikdir, başından ağır güllə yarası alıb. Ermənistan da artıq etiraf edir ki, itkiləri var və 3 nəfər yaralanıb. Mən kamikadze dronlarının olması məsələsinə inanmıram, çünki belə olsaydı, Azərbaycan Müdafiə Nazirliyi bu barədə məlumat yayardı. Amma ermənilər ağır silahlardan, minaatanlardan, pulemyotlardan istifadə edir. Ola bilsin ki, artilleriya zərbələri də var. Yaxın saatlarda biz vəziyyətlə bağlı dəqiq məlumat əldə edəndən sonra nə isə deyə bilərik”, – müsahibimiz fikirlərini tamamlayıb.

“Oğlum Hüseynin gəlişini səbirsizliklə gözləyirəm. Allah bizə səbir versin ki, övladlarımız əsirlikdən qayıdana qədər dözə bilək. Cənab Prezidentimiz İlham Əliyevdən, Mehriban xanım Əliyevadan övladlarımızı Vətənə qaytarmaqda kömək olmalarını xahiş edirik. Cənab İlham Əliyevə Prezident kimi yox, bir qardaşsız bacı kimi qardaşıma müraciət edirəm. Azərbaycan qadını kimi qardaşım İlham Əliyevdən xahiş edirəm ki, Hüseynlə Aqşini əzazil düşmənin, şərəfsiz ermənilərin əlində qoymasınlar. Biz bilmirik ki, hazırda uşaqlarımızla Ermənistanda necə rəftar edirlər, onları necə incidirlər. Acdırlar, toxdurlar, susuzdurlar, haraları yaralıdır? Onların yarası bizim ürəyimizin yarasıdır. Ombudsman Səbinə xanımdan məkutubumuza cavab gəlib. Aqşinin anası Dürdanə xanımla birgə uşaqlarımızın geri qaytarılmaları ilə bağlı müraciət etmişdik. Cavab gəlib ki, bu məsələ ilə məşğuldurlar. Hüseyn əsir düşdüyü gün bələdiyyə nümayəndəsi Mustafa müəllim bizə gəldi, yanında Abşeron Rayon İcra Hakimiyyətinin bir nəfər əməkdaşı da var idi. Qapıdan “Allah köməyiniz olsun” deyib, gediblər. Abşeronun icra başçısı mənə zəng edib deyib ki, gəlib sizə baş çəkəcəyik. İndiyə qədər yoxdur. Qapımızı açanlar ancaq bizim kimi kasıblar, şəhid anaları, qazilər, əlillər, qohum-əqrəbamızdır...” Bu sözləri Pravda.az-a müsahibəsində Ermənistanda əsirlikdə olan əsgər Hüseyn Axundovun anası Şəlalə Axundova deyib. O bildirib ki, Hüseynin döyülməsi ilə bağlı videoları gördüyü gündən bəri nə səbri, nə də yaşamağa həvəsi qalıb: “Onun döyülmə anını unuda bilmirəm, hər yerdə tez-tez qabağıma çıxır. Oğlumun çəkdiyi işgəncələri hiss edirəm. Bircə dua edirəm ki, yaşayım, balamın üzünü görüm, başqa heç nə. Sonuncu dəfə aprelin 4-ü danışmışıq. O, mənə həmişə “eşqim” deyirdi, hal-əhval tutdu. Dedi ki, ərizə verib MAXE olacağam. Bütün qonşular, müəllimlər şahiddir, Hüseyn əsgər gedəndə hamı ilə görüşüb demişdi ki, əsgərlikdən qayıtmayacağam, MAXE olacağam. Biz çox kasıb ailə olduğumuz üçün oğlum hərbidə qalıb işləmək istəyirdi. Deyirdi ki, yaxşı maaşım olsun, səni də yanıma aparacağam. Aprelin 7-də xəbər çıxdı ki, oğlum itkin düşüb. Hüseyndən məktub aldıq. Onun əl yazısını əzbər bilmirəm. Amma qızlarım, böyük oğlum da etiraz edirlər ki, bu, Hüseynin xətti deyil. Bizi çaşdıran yalnız bu söz oldu: “salam, ana, mənəm, Hüsü..." Biz ona “Hüsü” deyə müraciət edirik. Yəqin ki, kiməsə deyib onun yerinə yazıblar. Mən xəstə idim. Yazdığımız cavab məktubunu böyük oğlum apardı. Məktubda yazmışdı ki, “qardaş, mənəm, anam da yanımdadır, səni çox istəyirik, bütün Vətən səninlə Aqşinin yolunu gözləyir, hamı sizin üçün dualar edir, sağ salamat gəl...” Məktubun sonunda oğlum gülüş işarəsi qoydu ki, heç olmasa Hüseynin ürəyi bir az açılsın. Amma məktubumuza hələ də cavab gəlməyib. Allahın izni ilə məktuba cavab gəlməmiş, özü geri gələr. Ermənistan əsgərləri Azərbaycana əsir düşəndə televiziya kanallarımız susmur, onları çəkib tez-tez göstərirlər, Beynəlxalq Qırmızı Xaç Komitəsi ilə danışıqlar olur, dövlətimiz erməni əsirləri geri qaytarır. Cənab Prezidentimiz ürəyinin genişliyini göstərir, bütün əsirləri qaytarır... Bəs Ermənistan alçaqları niyə uşaqlarımızı qaytarmır? Hüseyn müharibə üçün, nə də kimisə öldürmək niyyəti ilə Ermənistan tərəfə keçməyib. Amma uşağıma nə qədər şər atırlar. Guya övladım kimisə öldürüb, terror edib. 13 ayın əsgəri gedib orada nə manevrlər edə bilər axı? Yazırlar ki, Axundov Hüseyn cinayət törədib. Uşaqlarımıza böhtan atırlar. Sistem köçürməklə məni ayaqda saxlayırlar. Yeyib-içmirəm. Bir ayın içində elə vəziyyətə düşmüşəm ki, görənlər məni tanımır. Balam orada acdır, necə mən burada ürəklə yemək yeyim? Artıq sistem köçürməkdən damarlarım dözmür. Ciyərim xəstədir, başımda şiş var, onkoloji xəstəyəm. Onsuz da nə qədər ömrüm qalıb, bilinmir. Balamın üzünü görmək istəyirəm”.

“Çünki bu cür paradlar ideoloji xətt üçün önəmlidir. İdeoloji xətt isə heç dəyişməyib. Keçmişdə - 100 il öncə, 150 il öncə nə olubsa, yenə də odur...” Bu gün – Ukraynanı işğal etməsi sayəsində 1 ildən çoxdur hərbi-siyasi bataqlıqda çabalamasına rəğmən Rusiyadakı Putin rejiminin Moskvada hərbi parad keçirməsi sual doğurur: növbəti illərdə də Kremlə, o cümlədən ayrıca Putinə belə parad keçirmək nəsib olacaqmı?.. Mövzu ilə bağlı Moderator.az-a açıqlamasında siyasi təhlükəsizlik üzrə ekspert Ərəstun Oruclu bunları söyləyib: “Rusiya dövləti hər zaman parad keçirəcək. Məsələ burasındadır ki, faşizm üzərində qələbədən artıq 80 ilə yaxın vaxt – 78 il keçir.Və Rusiyada bunu hələ də bayram edirlər. Halbuki, dünyada artıq bu şey unudulub gedib, insanlar, ölkələr daha çox gələcəyə baxır. Rusiya cəmiyyətini isə zorla məcbur edirlər ki, keçmişdə qalsın. Çünki onu idarə edənlərin marağında deyil ki, Rusiya irəli getsin, müasir texnoloji dünyaya qovuşsun və onun bir parçası olsun. O halda idarəetmə sistemi də, hüquq sistemi də, siyasi sistem də, yəni hər şey dəyişməlidir. Və o halda imperiya ambisiyalarını reallaşdırmaq üçün tamamilə fərqli meyarlar lazım olacaq: iqtisadi güc, elmi güc, texnoloji güc... Bu şeylərin isə yaxın zamanda olması mümkün deyil. Ona görə ki, məhz Putinin həmin çekist komandasının son 20-25 ildə yürütdüyü siyasət Rusiyanı o imkanlardan məhrum edib. İndi Rusiya təxminən XIX əsrin çarlarının dövrünü xatırladır. Bu gün rus insanına nə lazımdır? Araq və çörək... Kreml, Putin hökuməti həmin siyasəti yürüdür. Amma orada bir detal da var: “böyük Rusiya”, “qalib Rusiya”... Və təbii ki, bunların ayrılmaz atributları olan hərbi qələbə... Hamımız yaxşı bilirik ki, həmin qələbə də əsasən Sovet İttifaqının hesabına əldə olunub... Lakin orada başqa ölkələr də iştirak edib. Və yalnız Rusiyanın deyil, bütün keçmiş sovet xalqlarının canı-qanı hesabına baş tutub. Ancaq Rusiya onu yalnız özününkü hesab  edərək  bu gün də simvol kimi yararlanmaqda davam edir. Ona görə də Putin oldu-olmadı, belə paradlar hər zaman keçiriləcək Rusiyada... O Rusiyadakı belə paradlar ideoloji xətt üçün önəmlidir. İdeoloji xətt isə heç dəyişməyib. Keçmişdə - 100 il öncə, 150 il öncə nə olubsa, yenə də odur” -deyə analitik vurğulayıb.

Ermənistan və Azərbaycan bəzi məsələlərdə irəliləyiş əldə edib, lakin fundamental məsələlərdə deyil. Sozcu.az xəbər verir ki, bunu Ermənistan Təhlükəsizlik Şurasının katibi Armen Qriqoryan deyib. "Danışıqlarda məlum prinsip var - hər şey razılaşdırılmayana qədər heç nə razılaşdırılmır. Bu danışıqlara da belə yanaşmaq lazımdır. Bir daha qeyd etmək lazımdır ki, danışıqlar gedir", - Qriqoryan bildirib. O xatırladıb ki, Brüsseldə, ondan sonra Kişinyovda sammitin keçirilməsi planlaşdırılır: "Paşinyan və Əliyev görüşünə Fransa Prezidenti Emmanuel Makron və Almaniya kansleri Olaf Şolts da qatılacaq. Gəlin, yanaşmaların maksimum yaxınlaşması istiqamətini işləyək və irəli gedək. Gələcək sazişin dəqiq harada imzalanacağı - Moskvada, yoxsa Qərbdə, hələ ki, qərar verilməyib. Bu, irəliləyiş əldə oluna bilən yerdə ediləcək".

Ermənistan məhkəməsi əlverişsiz hava şəraitində məhdud görmə səbəbindən yolu azaraq Ermənistan tərəfə keçən və orada əsir saxlanılan Azərbaycan hərbçisi Aqşin Bəbirovu 11,5 il müddətinə azadlıqdan məhrum edib. Sozcu.az xəbər verir ki, məlumatı “Sputnik Armeniya” yayıb. A.Bəbirov “sərhədi qanunsuz keçmək, silah və sursat daşımaqda” ittiham olunub. Məlumata görə, Ermənistanda əsir saxlanılan digər azərbaycanlı əsgər Hüseyn Axundovun “cinayət işi üzrə istintaq” davam edir. Qeyd edək ki, Azərbaycan Ordusunun əsgərləri - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu aprelin 9-da Naxçıvan Muxtar Respublikasının Şahbuz rayonunun Ermənistanla sərhəd ərazisində əlverişsiz hava şəraitində məhdud görmə səbəbindən itkin düşüblər. Ermənistan Müdafiə Nazirliyi aprelin 13-də Azərbaycan əsgərlərinin Ermənistanda saxlandığını etiraf edib. Sosial şəbəkələrdə və Ermənistan mediasında ermənilərin əsir götürdükləri Azərbaycan hərbçisini döymələri, ona ağır işgəncə vermələri ilə bağlı görüntülər yayılıb. Əsir və itkin düşmüş, girov götürülmüş vətəndaşlarla əlaqədar Dövlət Komissiyası Azərbaycan Ordusunun itkin düşən iki əsgəri ilə bağlı beynəlxalq təşkilatlara müraciət edib

“Əslində, biz Qarabağın muxtariyyətinə can atırıq, lakin Azərbaycan razı deyil, elə danışıqların bütün mahiyyəti budur”. Sozcu.az xəbər verir ki, bu barədə Ermənistan parlamentinin “Şərəfim var” fraksiyasının katibi Tiqran Abramyan Facebook səhifəsində yazıb. “Son günlərdə Nikol Paşinyanın ən diqqətçəkən ifadəsi belə oldu: “İlham Əliyev Qarabağa geniş muxtariyyət verməyə hazır deyil”. “Paşinyan, faktiki bir il əvvəl Qarabağ məsələsində həddi aşağı salmağa məcbur olduğu fikrini ortaya qoydu. O, etiraf etdi ki, onun ifadələri Qarabağın öz müqəddəratını təyinetmə və ya müstəqillik hüququ ideyası kimi deyil, Azərbaycanın tərkibindəki muxtariyyət kimi başa düşülməlidir. Əslində, onlar Qarabağın muxtariyyətinə can atırlar, lakin Azərbaycan bununla razılaşmır. Danışıqların bütün mahiyyəti budur”, – deyə Abramyan bildirib.

Xəbər verdiyimiz kimi, Prezident İlham Əliyev əfv sərəncamı imzalayıb. Sozcu.az xəbər verir ki, sərəncama əsasən, həbsdə olan Vətəndaş və İnkişaf Partiyasının (VİP) sədri Əli Əliyev də əfv edilib.

Ukrayna rus işğalçıları ilə tam qələbəyə qədər mübarizə aparacaq. Sozcu.az xəbər verir ki, bunu Ukrayna Baş Kəşfiyyat İdarəsinin rəhbəri Kirill Budanov rusiyalı təbliğatçıların öldürülməsi ilə bağlı jurnalistlərin suallarını cavablandırarkən deyib. “Bu məsələni davam etdirməyin. Deyə biləcəyim budur ki, Ukraynanın tam qələbəsinə qədər dünyanın istənilən yerində rusları öldürürük və öldürəcəyik”, - Budanov bildirib. Qeyd edək ki, ötən gün Nijni Novqorodda rus yazar Zaxar Prilepinin avtomobili magistral yolda partladılıb. Onun sürücüsü ölüb, özü isə yaralanıb. Hərbi müxbir Maksim Fomin (Vladlen Tatarski) 3 apreldə öldürülmüşdü.

Komitə üzvünün sertifikasiya ilə bağlı təkliflərində müəyyən nüanslar nəzərə alınmalıdır. “Nə qədər ümidverici, təsəlli xarakterli rəsmi açıqlamalar verilsə belə, heç də hamı tərəfindən birmənalı qarşılanmayan setifikasiya həyacanı hələ də davam etməkdədir, baxmayaraq ki, artıq ilkin mərhələdən müəyyən vaxt keçib,  bir çox müəllimlərdə lazımi adaptasiya yaranıb.  Bu da təbiidir, çünki, yaşından və hazırlıq səviyyəsindən asılı olmayaraq, imtahan imtahandır, hər kəs üçün psixoloji gərginlik, mənəvi sıxıntı yarada biləcək bir sınaqdır.” Bu sözləri ümumtəhsil müəssisələrində 60 və daha yuxarı yaşda olan şəxslərin sertifikatlaşdırmada iştirakının könüllü olması, bu halda müəllimin məcburi deyil, yalnız öz istəyi ilə sertifikatlaşdırmada iştirak edə biləcəyi barədə  Milli Məclisin Əmək və sosial siyasət komitəsinin üzvü Vüqar Bayramovun “Əmək Məcəlləsi” və bir sıra müvafiq qanunlara təklif edilən dəyişikliklərin müzakirəsi zamanı verdiyi təklifə münasibət bildirərkən tanınmış təhsil mütəxəssisi Nadir İsrafilov deyib. Ekspertin sözlərinə görə sertifikasiya ilə bağlı ən çox narahat olan zümrə əsasən diplomu dövlət nümunəli olmayan müəllimlərdir ki, Diaqnostik Qiymətləndirmədən fərqli olaraq, bu dəfə  onlara də bu prosesə cəlb olunmaq şansı verilir. Artıq, bu müəllimlər üçün bu sahədə heç bir məhdudiyyət yoxdur. Nazirin də qeyd etdiyi kimi, “əlində hüquqi baxımdan saxta olmayan diplomu olan, lakin bilik və bacarığı yerində olmayan müəllimlər də var: "Belə hallar az deyil. Ona görə bizim indi fokuslandığımız məsələ daha çox tədrisi aparan təhsilverənin biliyinin olmasıdır. İndi bizim məntiqimiz ondan ibarətdir ki, müəllim sertifikasiyada iştirak edərək öz bilik və bacarığını sübut edə bilirsə, biz onu məktəbdə saxlayırıq".Göründüyü kimi bu məsələdə də elə də ciddi bir anlaşılmazlıq qalmayıb. O ki, qaldı komitə üzvünün təkliflərinə, onu deyə bilərəm ki,  təkcə sertifikasiya ilə deyil, ümumiyyətlə təhsilin istənilən probleminə yönəlik təklif keçərli olub-olmaması dərəcəsindən asılı olmayaraq, alqışlanmalı və təqdir olunmalıdır. Çünki, bu kimi təkliflər az-az hallarda verilir və verilən təkliflərin də heç də hamısı hər dəfə nəzərə alınmır. Bu mənada Millət vəkilinin “Təhsil sektorunun inkişafı ilə bağlı mütəmadi faydalı müzakirələrimizin aparıldığını və təkliflərimizə hər zaman diqqətlə yanaşdıqlarını nəzərə alaraq əminik ki, sertifikatlaşdırmanın təkmilləşdirilməsi ilə əlaqədar da səmərəli fikir mübadiləsi aparılacaq” kimi çağırışışını əlaqədar qurumlara bir mesaj kimi dəyərləndirmək olar. Zənnimcə Vüqar Bayramovun “Müəllimlərin əməyinin keyfiyyət kriteriyası üzrə qiymətləndirilməsi müsbət hal olsa da, belə meyarların sayının artırılmasına ehtiyac var”;”Sertifikatlaşdırma əməyin dəyərləndirilməsi üçün yeganə meyar olmamalıdır və əksər inkişaf etmiş ölkələrdə olduğu kimi, digər kriteriyalardan da istifadə olunmalıdır”;”Sertifikatlaşdırmada diferensial yanaşma daha məqsədəuyğun olardı, bu, müəllimlərin təşviqi baxımdan da vacibdir” kimi təklifləri  də mübahisə obyekti bilməz. Məsələyə məntiqlə yanaşsaq və nəzərə alsaq ki, “Qaydalar”a əsasən sertifikasiya hər 5 ildən bir keçirilir və Azərbaycan Respublikası Əmək Məcəlləsinə əsasən dövlət büdcəsindən maliyyələşən müəssisələrdə çalışmanın yaş həddi 65-dir, bu aralıqda yaşlı və kifayət qədər  təcrübəyə malik müəllimi narahat etməyə nə lüzum qalır?  Məsələ ondadır ki, həmin müəssisələrin 65 yaşına çatmış işçisinin orada çalışma müddəti müvafiq dövlət orqanının rəhbəri tərəfindən hər dəfə 1 ildən çox olmayaraq uzadıla bilər. Lakin məsələ ilə bağlı nüans ondan ibarətdir ki, buna baxmayaraq bəzi müəssisələrin təqaüd yaşına çatmış işçisinin çalışma müddəti yuxarıda qeyd olunan müddətdən artıq da uzadıla bilər. Bura elm, mədəniyyət, səhiyyə və təhsil sahələrinin inkişafında müvafiq icra hakimiyyəti orqanı tərəfindən müəyyən edilmiş xüsusi xidmətləri olmuş, dövlət büdcəsindən maliyyələşən müəssisələr daxildir.  Deməli, belə çıxır ki, müəllim həmin 5 illik müddəti daha 5 il artıq aşa bilər və köhnədən qalma ehtiyat bazası ilə daha iki beşillik müddətinə işləyə bilər. Belə müəllimlərimizin sayı o qədər də az deyil. Buna görə də bu halda yeganə çıxış yolu bu qəbildən olan müəllimləri işdə saxlamaqda, lakin sonrakı 5 illikdə əmək haqqlarına diferensial yanaşmada görülməlidir. Belə bir yanaşma, 60 yaşdan yuxarı olan şəxslərdə arxayınçılıq hissini aradan qaldırar, əksinə məsuliyyət hissini bir o qədər artırar.  Bir də ki, bu təkliflər reallaşarsa, könüllülük prinsipi mexanizminin nə dərəcədə işləyəcəyinə heç kəs təminat verə bilməz. Çünki, hansısa ağsaqqal və ağbirçək bir müəllimin 65-70  yaşında özünə əlavə bir iş açaraq, imtahana girməsi o qədər də real görünmür. Sertifikasiyanın nəticələrinə bel bağlamayanlar və özünü riskə atmaq istəməyənlər üçün isə ən optimal variant  Nazirin ümidverici təsəllisidir: “Məqsədimiz odur ki, sertifikasiyadan keçməyən müəllim şagirdlərə dərs deməsin, amma işdən də çıxmasın. Bunun öhdəsindən nə qədər gələ biləcəyimizi hesablayırıq". Göründüyü kimi, hələ ki, bir çoxları üçün ümid yeri hesablamaların nəticələrinə qalıb. Şekspirin sözü olmasın, çarəsizliyin yeganə dərmanı isə ümiddir...