Mövqe

Rusiya Dövlət Dumasına təqdim olunmuş qanun layihəsində postsovet ölkələrdə Rusiya təhsil sistemi və təhsil proqramları üzrə, həmçinin Rusiyada hazırlanmış müəllimlərin tədris etməsi ilə fəaliyyət göstərən məktəblərin açılması nəzərdə tutulur. Rusiya rəsmiləri bildiriblər ki, belə məktəblər artıq Qazaxıstanda açılıb, Tacikistanda və Qırğızıstanda artıq açılmasına hazırlıq gedir, növbəti məktəblərin isə Azərbaycanda və Ermənistanda açılması nəzərdə tutulur.  Təhsil eksperti Kamran Əsədov Qaynarinfo-ya açıqlamasında bildirib ki, Azərbaycan orta məktəblərində tədrisin Rusiya təhsil sistemi və təhsil proqramına uyğun keçirilməsi mümkün deyil:  "Azərbaycanda 4432 orta məktəb fəaliyyət göstərir. Onların da 340-da dərslər rus bölməsi üzrə keçirilir. Azərbaycan Konstitusiyası və "Təhsil haqqında" qanuna görə ölkə ərazisində istər rus, istərsə Azərbaycan dili bölməsi olsun, vahid tədris proqramından istifadə olunur. Yalnız təsisçilərin Pedoqoji Şurasının birbaşa qərarı əsasında tədris proqramının müəyyən faizi həmin ölkənin tədris proqramı əsasında keçirilə bilər. Məsələn, İstanbul Liseyi, Dəyanət Liseyində vəziyyət belədir. Onların ibtidai sinif proqramlarında həmçinin Türkiyənin tədris proqramı da tədris edilir. Amma əsas proqram Azərbaycanın proqramıdır. Hər hansı bir məktəbdə fərqli proqram üzrə tədris həyata keçirilsə, bu zaman onların biliklərinin yoxlanılması, qiymətləndirilməsi ölkəmizin vahid standartlarına uyğun olmayacaq. Azərbaycanda tamamilə rus təhsilinə keçməyə ehtiyac yoxdur. Bu, ölkəmizin qanunvericilik aktlarına ziddir”.  Həmsöhbətimiz Rusiyanın bu addımında siyasi məqsədlər olduğunu bildirir:  "Bu gün müasir dünyada yeni işğal metodlarından istifadə edirlər. Müasir dövrdə başqa dövlətləri işğal etmək istəyənlər onu özlərinin yüksək iqtisadiyyatı, təhsili və mədəniyyətilə işğal etməyə çalışırlar. Bu mənada Rusiyada yaxın qonşu ölkələrdə sözügedən məktəbləri açmaqla, gələcəkdə oranı bitirəcək şəxslərdən öz kadrları kimi istifadə etməyi düşünür. Bununla özləri kimi düşünən və yaxud onları müdafiə edəcək kontingentin formalaşdırılmasına çalışırlar. Azərbaycanda buna ehtiyac yoxdur. Azərbaycan öz təhsil sistemini qurub”. 

Türkiyəli müğənni Ebru Gündeş barəsində cinayət işi açıla bilər. Bunu Qaynarinfo-ya açıqlamasında vəkil Əkrəm Həsənov müğənni Ebru Gündeşin Azərbaycanda dəvət aldığı toydan 250 min dollar qazanc götürməsinin hüququ tərəflərini izah edərkən deyib. Vəkil bildirib ki, buna səbəb onun vergi ödənişindən yayınmasıdır: "Vergi borcunu ödəməməsinə görə vergi orqanları ona faiz və cərimələr hesablaya bilər. Vergi borcundan əlavə faiz və cərimələri də ödəməli  olacaq. Məhkəmə zamanı aşkar olunacaq ki, Ebru Gündeşin vergini ödəməməsində imkansızlıq deyil, məhz qərəz var. Müğənni bundan sonra deyə bilməz ki, pulum yoxdur”. Vəkil bütün şəxslərin vergilərini ödəməli olduğunu vurğulayıb. Qeyd edək ki, şəmkirli biznesmen oğlunun kiçik toy məclisinə türkiyəli müğənni Ebru Gündeşi gətirib. İddiaya görə, iş adamı müğənniyə 250 min manat qonarar ödəyib.

"AZAL Naxçıvana təyyarə məsələsi ilə bağlı illərdir açıqlama verir. Amma həll olunmur. Bunun səbəbi birbaşa korrupsiya ilə bağlıdır". Sozcu.az xəbər verir ki, bunu Milli Məclisin bu gün keçirilən iclasında deputat Fazil Mustafa deyib.  Deputat bildirib ki, Gürcüstandan İstanbula təyyarə ilə getmək 100, Bakıdan isə 700 manatdır: "Bunun üstündə pul tuturlar. Naxçıvana gedəndə 20 manat qazanırsan. Fikirləşir ki, reyslərin çoxunu başqa yerə yönəldim, 300-400 manat qazanım. Biz bu məsələni elə həll etməliyik ki, yoxsulluq içində yaşayan əhali sıxıntı çəkməsin".

2023-cü ilin fərdi tərəfdaşlıq üzrə əməkdaşlıq planına əsasən Bakıda NATO nümayəndələri ilə "Ekspert heyətinin işçi görüşü" keçirilib. Bu barədə Sozcu.az-a Müdafiə Nazirliyindən məlumat verilib. Azərbaycanda səfərdə olan NATO-nun Brunssum Birgə Qüvvələr Komandanlığının qərargah rəisinin müavini general-mayor Stefan Fiksin rəhbərlik etdiyi nümayəndə heyəti Müdafiə Nazirliyinin Beynəlxalq Hərbi Əməkdaşlıq İdarəsində olub. İdarədə keçirilən görüşdə polkovnik Mahir Bayramov Azərbaycan-NATO əlaqələrinin uğurlu inkişaf yolu və Azərbaycan Ordusunda aparılan uğurlu islahatlar, eləcə də Ordumuzun sülhməramlı əməliyyatlara verdiyi töhfədən danışıb. Azərbaycanın Alyansın etibarlı tərəfdaşı olduğunu bildirən general-mayor S.Fiks NATO proqramlarında hərbi qulluqçularımızın fəal iştirakının yüksək qiymətləndirildiyini qeyd edib. Ekspert heyətinin işçi görüşündə növbəti ilin fəaliyyətlər planı barədə ilkin razılıq əldə olunub.

Ermənistan Baş Qərargahının keçmiş rəhbəri Tiran Xaçatryan 44 günlük müharibə ilə bağlı komissiyadan dəvət almayıb. Sozcu.az xəbər verir ki, bu barədə "Joğovurd" qəzetinə onun özü məlumat verib. Bundan əvvəl komissiyanın rəhbəri Andranik Koçaryan bir neçə dəfə açıq şəkildə generalı görüşə gəlməyə və suallara cavab verməyə çağırıb. Xaçatryan bildirib ki, Koçaryanın katibi hətta ona zəng edib, yaşayış ünvanını da göstərib, lakin o, heç vaxt rəsmi dəvət almayıb. "Dəvət gəlsə belə, komissiyaya getməyəcəyəm", - deyə Xaçatryan əlavə edib.

"Bu gün bəşəriyyətin Rusiyanın boynuna doladığı ilgək bir az da tarıma çəkilib..." "Bu evtanaziyanın finalında Rusiya Federasiyası özünün "daha mövcud olmamasını" heç hiss etməyəcək..." Bəşəriyyətin Rusiyanın boynuna necə incəliklə ilgək doladığını dəyərləndirmək gərəkdir. Sozcu.az xəbər verir ki, bu barədə rusiyalı publisist Aleksandr Nevzorov "QORDON" internet nəşrindəki bloqunda yazıb. Putin ölkəsinə boğulmanın hər yeni mərhələsinə alışmaq imkanı yaradılır. Avropa humanistlərinin fikrincə, bu evtanaziyanın final mərhələsində Rusiya özünün "daha mövcud olmadığını" heç hiss etməyəcək. Rusiyanın tarixə gömülməsi onun üçün maksimal dərəcədə rahat baş verəcək. Ehtimal ki, bu, ona görə edilir ki, ölümdən öncə qurban tərpənməsin, səs-küylə aqoniya etməsin və raketləri ətrafa səpələməsin.  Gerçəkdə nə alınacağı bəlli deyil. Lakin, heç şübhəsiz, plan məhz belədir. Putin ölkəsi rüsvayçılığın bütün rekordlarını qazanıb. Heç bir hətta ən utancverici cəmahirriyətin alnına Rusiya kimi bu qədər damğa vurulmayıb.  Bu ölkə iyrənclik, namərdıik və vəhşilikdə mütləq çempiondur. Biz bilirik ki, bu şöhrət çələngləri dürüstlüklə əldə edilib. Bu gün ilgək bir az da tarıma çəkilib. İndi artıq ATƏT-in Parlament Assambleyası da Rusiyanı terrorçuluğa sponsorluq edən ölkə kimi tanıyıb. Müəllif: Aleksandr Nevzorov

Azərbaycan Ordusunun Ağdərə istiqamətini guya iriçaplı silahlardan istifadə etməklə atəşə tutması erməni dezinformasiya maşının növbəti və deqradasiyaya uğramış təkrar yalanıdır. Bu barədə Sozcu.az-a Müdafiə Nazirliyindən bildirilib. “Azərbaycan Ordusunun hədəfi heç vaxt mülki obyektlər olmayıb”, - məlumatda bildirilib.

Fövqəladə Hallar Nazirliyinin (FHN) Tibb Xidməti və Tibb Mərkəzində narazılıqlar höküm sürür. Qaynarinfo-nun əldə etdiyi məlumata görə, narazılıqların ilk səbəbi Tibb Xidməti və Tibb Mərkəzinin rəhbərlərinin fəaliyyətidir. Bildirək ki, FHN-nin Tibb Mərkəzi Tibb Xidmətinin tabeçiliyində fəaliyyət göstərir. Buna baxmayaraq, Tibb Mərkəzinin rəisi, polkovnik Xanım Sofiyeva özünü tam müstəqil qurumun rəhbəri kimi aparır. Tibb Xidməti və Tibb Mərkəzinin rəsmi dövlət tədbirləri də Xanım Sofiyevanın rəhbərliyi ilə keçirilir. 16 dekabr 2014-cü ildə fövqəladə hallar naziri, general-polkovnik Kəmaləddin Heydərovun iştirakı ilə paytaxtın Binəqədi rayonu, Biləcəri qəsəbəsində inşa olunmuş Tibb Xidmətinin Tibb Mərkəzinin yeni inzibati binasının açılışı edilsə də, hazırda bu müəssisənin fəaliyyəti iflic vəziyyətdədir. Nəticədə FHN-nin aşağı vəzifəli əməkdaşlarının sözügedən müəssisədə müalicə və müayinə olunmaları problemə çevirilib. Oraya müayinəyə gələn FHN işçilərinə başqa dövlət və özəl xəstəxanalara getmələri tövsiyyə edilir. Bu da ciddi nazrazılıqlara səbəb olur. Hazırda Tibb Mərkəzinin binası ilə FHN Bakı Regional Mərkəzinin binasının yerdəyişməsi prosesi gedir ki, bunun üçün külli miqdara maliyyə vəsaiti ayrılıb və bu iş Xanım Sofiyevaya tapşırılıb. Bakının "20 Yanvar” deyilən ərazisində yerləşən Bakı Regional Mərkəzinin binasında iki ilə yaxındır ki, yenidənqurma və təmir-bərpa işləri aparılır. Amma işlər bitmək bilmir. Hələ bu azmış kimi, onlarla şirkətə Tibb Mərkəzinin 100 min manatlarla borcu yaransa da, verilmir və iş məhkəmələrə kimi gedib çıxır. Nəticədə Biləcəri qəsəbəsində yerləşən Tibb Mərkəzində müalicə və müayinəyə gələn FHN işçiləri çıxılmaz vəziyətdə qalıblar. Onu da qeyd edək ki, sözügedən Tibb Mərkəzinin əksər tibbi avadanlıqları da yararsız hala düşüb. Xanım Sofiyevanın rəsmi olaraq tabe olduğu Tibb Xidmətinin rəisi, polkovnik Pərviz Vəliyev isə öz "işindədir". Belə ki, rəis anası Məhbubə Vəliyeva ilə dərman istehsalı və satışı ilə məşğul olur. Pərviz Vəliyevin anası hazırda "Gilan” şirkətində biyan kökü dərmanı istehsalının brend sahibidir. Qeyd edək ki, Tibb Xidmətinə məxsus dövlət nömrə nişanı "PF 065” olan avtomobil 11.000 AZN borc yarandığı üçün "Nurgun Motors" tərəfindən girov saxlanıb. Buna baxmayaraq, polkovnik rəhbəri olduğu qurumdan da pul qazanmağı unutmur.  Həmçinin qeyd edək ki, Tibb Xidmətində rəisin qohumları, dostları ilə bərabər, FHN generallarının yaxınları da çalışır. Pərviz Vəliyev yaxın dostunun oğlunu xidmətə təsərrüfat bölməsi üzrə rəis gətirib. Həmin şəxsə qanunsuz olaraq dövlət büdcəsi hesabına kirayə pulu ödəyir. Ümumi şöbədə çalışan Seyran Hacıyev Sumqayıt Regional Mərkəzinin sabiq rəisi, polkovnik Adil Hacıyevin oğludur.  FHN-nin Tibb Xidmətində ümumi şöbənin rəis müavini Sevinc Məmmədovanın qardaşı Bəhruz Məmmədov nazirlikdə Rəqəmsal Texnologiyalar və İnnovasiyaların İnkişafı Baş İdarəsinin rəisidir. Ümumi şöbənin rəisi Sevər Hacıyeva sabiq Yanğın Nəzarət Xidmətinin rəisi, general İsrail Əliyevin və general Sevda Şirinovanının yaxın qohumudur. Sevər Hacıyeva eyni zamanda nazir müavini Rəfail Mirzəyevin qızı Aida Mirzəyevanın rəfiqəsidir. Digər tərəfdən Pərviz Vəliyev anası Məhbubə Vəliyevanın iş yoldaşının qızını dərman şöbəsində işə qəbul etdirib. Dərman şöbəsinin digər işçisi nazir müavini, general Rəfail Mirzəyevin Fidan adlı bacısı qızıdır. Pərviz Vəliyev Xidmətin müalicə şöbəsinə isə nazir müavini Raqim Lətifovun bacısı qızı Könül Yaqubovanı rəis təyin edib. Bir müddət əvvəl qeyd etmişdik ki, Pərviz Vəliyev Bakının Binəqədi rayonunda evi, Badamdar, Maştağa qəsəbəsində, Mərdəkanda villaları, Qax rayonunda evi və fermasının olmasına baxmayaraq, dövlətdən kirayə pulu da alır. Bu xəbərdən sonra Pərviz Vəliyev sözügedən vəsaiti dövlət büdcəsinə qaytarmışdı. Amma əldə etdiyimiz məlumata görə, Pərviz Vəliyev kirayə pullarını özü üçün yenidən bərpa etdirib. Bütün bu işlərdə ona xidmətin maliyyə şöbəsinin rəisinin baş köməkçisi, Pərviz Vəliyevin yaxın dostu, eyni zamanda nazir müavini, general Raqim Lətifovun qohumu İlqar Əfəndiyev köməklik edir. FHN-nin nəzarət təftiş komissiyasının rəisi, "Tuz Qəşəm" ləqəbli Qəşəm Məmmədov da nədəsə Tibb Xidmətində kirayə pullarının qanunsuz olaraq verilməsinə göz yumur. Onu da qeyd edək ki, Qəşəm Məmmədovun qızı Dövlət Gömrük Komitəsində, oğlu isə 150 minlik avtomobillə dövlət qurumlarının birinə işə gedib-gəlir.

“Azərbaycanda zəlzələnin 20-25 ildən bir təkrarlanma məsələsi çox vaxt özünü doğrultmur. Keçən əsrin əvvəlində 1902-ci ildə Şamaxıda güclü zəlzələ oldu, maqnitudası 6,9-7 idi. Nə qədər insan tələfatı, dağıntılar oldu. Şükürlər olun ki, o vaxtdan bəri elə bir zəlzələ təkrarlanmayıb”. Sozcu.az xəbər verir ki, bunu Respublika Seysmoloji Xidmət Mərkəzinin direktoru Qurban Yetirmişli deyib. Q.Yetirmişlinin sözlərinə görə, Yerin daxilində gedən proseslər nəzəriyyə ilə çox vaxt uyğun gəlmir: “2012, 2015, 2017-ci ildə olan zələzələlər təkrarlanmadır? Bunun heç bir qanunauyğunluğu yoxdur. Axşam baş vermiş zəlzələ 10 saniyədən bir az artıq olub. Çox şaiyələr yayılır ki, Azərbaycanda zəlzələ gözlənilmir. Kim deyir ki gözlənilmir? Azərbaycan zəlzələ zonasıdır, zəlzələlər olacaq. Amma qısamüddətli proqnoz məsələsi yoxdur”.

9-cu və 11-ci sinif şagirdləri arasında nəinki tədris proqramını minimum mənimsəməyənlər, hətta oxuyub-yazmaqda çətinlik çəkənlər və ya ümumiyyətlə, oxuyub-yazmağı bacarmayanlar da aşkar olunub. Sozcu.az xəbər verir ki, bu barədə «Abituriyent» jurnalının 12-ci nömrəsində məlumat verilib. Qeyd edilib ki, 2022-ci ilin nəticələrinə görə, 9-cu sinif şagirdləri arasında 21 nəfər, 11-ci sinif şagirdləri arasında 2 nəfər oxuyub-yazmağı bacarmayıb. "Bu cür halların imtahan rəhbərlərinin əksəriyyətinin protokollarında qeyd olunmamasını nəzərə alsaq, yuxarıda göstərilən faktların, əslində, daha çox olduğunu ehtimal etmək olar. Rayonlar üzrə oxumağı və yazmağı bacarmayan 9-cu sinif şagirdlərinin sayı belədir: Masallı rayonunda 4 nəfər, Goranboy, Gədəbəy və Quba rayonlarının hərəsində 2 nəfər, Abşeron, Astara, Cəlilabad, Kəlbəcər, Lənkəran, Lerik, Saatlı, Xocalı, Yardımlı rayonlarının, Bakı, Mingəçevir şəhərlərinin hərəsində 1 nəfər. 11-ci sinif şagirdlərindən oxumağı və yazmağı bacarmayanlar isə Ağdam və Qobustan rayonlarından olub", - jurnalda qeyd olunub.

Hüquqşünas Əliabbas Yasavullu Ramiz Mehdiyevin kürəkəni, sabiq deputat İlham Əliyevlə bağlı iddialarla çıxış edib. Sozcu.az xəbər verir ki, Ə.Yasavullu feysbuk səhifəsində İ.Əliyevin ona məxsus Nizami rayonu ərazisindəki ("Neolit" restoranının yanında) torpaq sahəsini qeyri-qanuni yolla ələ keçirdiyini deyib. O, torpaq sahəsinin hazırda 18 milyon manata satışa çıxarıldığını əlavə edib və məsələ ilə bağlı prokurorluğa müraciət edildiyini, həmçinin Ramiz Mehdiyevdən kürəkəninin əməlinə müdaxilə etməsini xahiş etdiyini əlavə edib: “Bütün baş verənlərdən sonra belə, 23 iyun 2021-ci il tarixli teleqramla Ramiz Mehdiyevə müraciət edərək qızının həyat yoldaşı - İlham Əliyevlə aramızda olan torpaq mübahisəsinin sülh yolu ilə həllində köməklik göstərməsini və bununla əlaqədar məni şəxsən qəbul etməsini xahiş etdim. Lakin iki gün sonra mənə zəng edən şəxs özünü onun kürəkəni İlham kimi təqdim etdi. Onu narahat etdiyimə görə kəskin iradını bildirdi, torpağı "vicdanlı alıcı kimi" qanuni yollarla əldə etdiyini və məhkəmələrin bu barədə müvafiq qərarlarının olduğunu bildirsə də, dediklərinin tam yalan olduğunu ona göstərmək istəyimlə bağlı təklifimə “yox” cavabını verdi. Təhdidlə yanaşı, bir daha onu narahat etməməyimi tələb etdi". Ə.Yasavullu bildirib ki, həmin torpaq sahəsi məhkəmələrdə İlham Əliyev tərəfindən qayınatası Ramiz Mehdiyevin adından istifadə edilməklə qanunsuz yollarla mənimsənilib: "Mübahisə ictimailəşdirildikdən sonra Bakı Apellyasiya Məhkəməsinin müvafiq qərarı ilə torpaq sahəsi Ağayeva Kamilə Şirəli qızının adında saxlanılıb. Ramiz Mehdiyevin kürəkəni "məhkəmələr" vasitəsilə əmlakımızı əlimizdən alaraq 21 aprel 2007-ci il tarixdə anası - Əliyeva Elmira Hacıbala qızının adına sənədləşdirib. Həmin işlə bağlı kürəkən bizim geri çəkilməyəcəyimizdən əmin olduqdan sonra torpaq sahəsi adına olmuş Ağayeva Kamilə Şirəli qızını oğurlatdırıb, onu 3 gün saxlatdırdıqdan sonra notarius vasitəsilə əmlakından imtina barədə ərizə yazdırmağa nail olub. Onun bu kimi qanunsuz əməllərindən sonra belə, müvafiq məhkəmə qərarı ilə həmin torpaq sahəsinin mənim adıma keçirilməsinə və həmin qərarın da bu günə kimi qanuni qüvvəsində olmasına baxmayaraq, "Gilan" kiçik müəssisəsinin adını "Ruzu-A" MMC-yə dəyşdirməklə və həmin MMC-nin adına reyestrdən çıxarış almaqla yəqin düşünüblər ki, törətdikləri cinayətləri tam şəkildə ört-basdır etməyə nail olublar”. Hüquqşünas məsələ ilə bağlı hüquqi müstəvidə mübarizəni davam etdirəcəyini deyib.

Lənkəran Ağır Cinayətlər Məhkəməsində rüşvət alma və digər maddələrdə ittiham olunan Zamin Həsənov və Məmməd Əliyevin cinayət işi üzrə məhkəmə istintaqı başa çatıb. Sozcu.az Pravda.az-a istinadən xəbər verir ki, hakim Oruc Cəlilovun sədrliyi keçirilən prosesdə hökm oxunub. Məhkəmənin hökmü ilə hər iki şəxsə şərti cəza verilib. Hökmdən narazı qalan dövlət ittihamçısı apellyasiya protesti verib. Şirvan Apellyasiya Məhkəməsi birinci instansiya məhkəməsinin çıxardığı hökmü dəyişdirib. Belə ki, Zamin Həsənov 3 il 6 ay müddətinə azadlıqdan məhrum edilib. Onun barəsində seçilmiş polisin nəzarəti altına vermə qətimkan tədbiri ləğv edilib. Məhkum barəsində həbs qətimkan tədbiri seçilib və Zamin Həsənov dərhal məhkəmə zalında həbs olunub. Bundan başqa, Məmməd Əliyevin barəsindəki şərti cəza tətbiqinə dair müddəalar xaric edilib. Onun barəsində seçilmiş polisin nəzarəti altına vermə qətimkan tədbiri ləğv olunub. Məhkum barəsində həbs qətimkan tədbiri seçilib və dərhal məhkəmə zalında həbs edilib. Zamin Həsənov Lənkəran Şəhər Mənzil İstismar və Kommunal Müəssisələr İdarəsinin rəisi vəzifəsində işləyib. Məmməd Əliyev isə Lənkəran Rayon İcra Hakimiyyəti başçısının Vilvan kənd inzibati dairəsi üzrə icra nümayəndəsi olub. Sabiq rəisin barəsində Cinayət Məcəlləsinin 294.3, 308.1, 311.2, 313, 320.1 və 320.2-ci maddələri ilə, Məmməd Əliyevin barəsində isə 32.5, 311.2-ci maddəsi ilə ittiham irəli sürülüb.