Hadisə

Bu gün günorta saatlarında "Azərsilah" Müdafiə Sənayesi Holdinqi" QSC-nin strukturuna daxil olan "Sənayecihaz" Elmi-İstehsalat Müəssisəsinin Şirvan şəhərində yerləşən zavodlarından birində istehsalat qəzası baş verib. Sozcu.az xəbər verir ki, bu barədə Müdafiə Sənayesi Nazirliyinin saytında məlumat yerləşdirilib. Qeyd edilib ki, qəza nəticəsində müəssisənin əməkdaşı Adil Balaş oğlu İsmayılov həlak olub. Hazırda aidiyyəti qurumlar tərəfindən araşdırmalar aparılır.

Sabirabad rayonunda dəhşətli qətl hadisəsi olub. Sozcu.az xəbər verir ki, hadisə bu gün səhər saatlarında rayonun Qardaşkənd ərazisində baş verib. Belə ki, 1983-cü il təvəllüdlü Ülviyyə Xudaverdi qızı Məmmədova ov tüfəngindən açılan atəş nəticəsində qətlə yetirilib. Hadisədə mərhumun qardaşı, 1986-cı il təvəllüdlü Murtuz Xudaverdi oğlu Məmmədov şübhəli bilinir. Polis əməkdaşlarının keçirdikləri əməliyyatla M. Məmmədov saxlanılıb. Faktla bağlı araşdırma aparılır.

Ötən illərdən bağlı qalmış cinayət işlərinin üstünün açılması, o cümlədən itkin düşmüş şəxslərlə bağlı faktların araşdırılması məqsədilə prokurorluq orqanları tərəfindən aidiyyəti dövlət qurumları ilə birgə kompleks tədbirlər həyata keçirilir. Baş Prokurorluğun Mətbuat xidmətindən Sozcu.az-a verilən məlumata görə, həyata keçirilən tədbirlərin davamı olaraq, Cəlilabad rayon prokurorluğu və rayon polis şöbəsi əməkdaşlarının birgə fəaliyyəti nəticəsində 2016-cı ilin aprel ayında itkin düşmüş Cəlilabad rayonu, Göytəpə şəhər sakini, 1982-ci il təvəllüdlü Xəyalə Xəlilovanın qəsdən öldürülməsi müəyyən edilib. İstintaq və əməliyyat-axtarış tədbirləri nəticəsində 1997-ci il təvəllüdlü Elnur Eynullayevin aralarında yaranmış mübahisə zamanı Xəyalə Xəlilovanı döyməsi, daha sonra onu boğaraq qəsdən öldürməsi və cinayəti gizlətmək üçün basdırmasına əsaslı şübhələr müəyyən edilib. Xəyalə Xəlilovanın meyitinin basdırıldığı yer müəyyən olunaraq prokuror-kriminalistin və ekspertin iştirakı ilə çıxarılıb, aidiyyəti üzrə müayinənin aparılması üçün ekspertizaya təqdim edilib. Faktla bağlı Cəlilabad rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanıb. E.Eynullayev polis əməkdaşları tərəfindən saxlanılaraq istintaqa təhvil verilib və prokurorluq tərəfindən şübhəli şəxs qismində tutulub. Bağlı qalmış cinayət işləri, o cümlədən itkin düşmüş şəxslərin axtarışları daim diqqət mərkəzində saxlanılmaqla onların tapılması, cinayət əməlini törədən şəxslərin ifşa olunaraq məsuliyyətə cəlb olunması istiqamətində aidiyyəti dövlət qurumları tərəfindən mütəmadi olaraq birgə tədbirlər davam etdirilir.

Azərbaycanın tanınmış jurnalisti, "Avronyus" (Euronews) telekanalının müxbiri Türkiyədə yol-nəqliyyat hadisəsi nəticəsində faciəvi şəkildə həyatını itirib. Sozcu.az xəbər verir ki, bu barədə jurnalistin yaxınları məlumat verib. Emin İbrahimov Azərbaycan jurnalistikasının ən parlaq nümayəndələrindən biri olub. Onun "Avronyus" üçün hazırladığı reportajlar, ələlxüsus da, 2020-ci ilin Vətən müharibəsi günlərində çəkilən sujetləri obyektivliyi və dərin peşəkarlığına görə ona böyük nüfuz qazandırıb. (Mənbə: Trend)

Beyləqan rayonunun Qaradağlı kəndində qadın meyitinin qalıqları aşkarlanıb. Sozcu.az Oxu.az-a istinadla xəbər verir ki, vəhşi heyvanlar tərəfindən parçalanmış vəziyyətdə olan meyit qalıqlarının bir ay öncə itkin düşmüş Şücaət Müslüm qızı İsmayılovanın meyiti olduğu ehtimal edilir. Qalıqlar kənd ərazisindəki kolluqda aşkar edilib. Qalıqlar yığılaraq hüquq-mühafizə orqanları tərəfindən ekspertizaya təqdim edilib. Ekspertizadan sonra meyitin qalıqları ailəsinə təhvil verilib.

Çoban iti 83 yaşlı kişini boğaraq öldürüb. Hadisə Balakən rayonunun Mahamalar kəndində baş verib. Kənd sakini, 83 yaşlı Məhəmməd Qadalov oğlu Atayev çoban itin hücumuna məruz qalıb. İt kişinin üstünə hücum edərək onu öldürüb. Modern.az hadisə ilə bağlı bir sıra təfərrüatlar əldə edib. Məlumata görə, hadisə kənd ərazisində yerləşən meşəlik ərazidə baş verib. Məhəmməd Qadalovun həmin ərazidə pay torpağı olub və tez-tez ora gedirmiş. Mərhum ötən il də eyni ərazidə itlərin hücumuna məruz qalıb. Bu dəfə kişi itə müqavimət göstərə bilməyib. Çoban iti onu yerə yıxıb və boğaz nahiyəsindən dişləyib. Nəticədə Məhəmməd Atayev hadisə yerindəcə boğularaq ölüb.

Ağsu-Kürdəmir-Bəhrəmtəpə avtomobil yolunun İmişli rayonundan keçən hissəsində qəza olub. Sozcu.az xəbər verir ki, hadisə zamanı "Azsamand" markalı minik avtomobili aşıb. Qəza nəticəsində sərnişin Əbil Ədilli ölüb, sürücü isə yaralanıb. Faktla bağlı araşdırma aparılır.

Qubada kişi balta xəsarəti alıb. Sozcu.az-ın Report-a istinadən məlumatına görə, Çartəpə kəndində 34 yaşlı Kamran Rüstəmov yaşadığı evdə balta xəsarətləri alıb. K.Rüstəmov Quba rayon Mərkəzi Xəstəxanasına çatdırılıb və reanimasiya şöbəsinə yerləşdirilib. Ona xəsarət yetirməkdə, qohumu 43 yaşlı G.Nəcəfova şübhəli bilinir. Hadisənin torpaq sahəsi üstündə mübahisəyə görə, baş verdiyi bildirilir. DİN-in Mətbuat xidmətinin əməkdaşı Xəyal Talıbov bildirib ki, hadisəni törətməkdə şübhəli bilinən şəxs saxlanılıb. Faktla bağlı araşdırma aparılır.

Gəncə şəhərində 16 yaşlı yeniyetməni bıçaqlayan şəxs polis tərəfindən saxlanılıb. Sozcu.az xəbər verir ki, polis əməkdaşlarının keçirdikləri əməliyyat-axtarış tədbirləri nəticəsində E. Əliyevə kəsici-deşici alətlə xəsarət yetirməkdə şübhəli bilinən dostu A.Abbaszadə tutulub. Qeyd edək ki, hadisə Atatürk prospektində baş verib. 2009-cu il təvəllüdlü Elgün Əliyev bud hissəsindəki bıçaq yarası ilə xəstəxanaya çatdırılıb. Hakimlər yaranı dərhal tikib. Yaralının vəziyyətinin orta-ağır olduğu bildirilir. Hadisənin baş vermə səbəbləri araşdırılır.

Bərdədə iki nəfər dəm qazından zəhərlənərək həyatını itirib. Sozcu.az-ın Teleqraf-a istinadən xəbərinə görə, hadisə rayonun Tumaslı kəndində qeydə alınıb. Kənd sakini Aytən Əsgər qızı Fətəliyeva nəvəsi Sadiq Orxan oğlu Nəcəfovu çimizdirərkən hamamda dəm qazından zəhərləniblər. Hər iki şəxs dünyasını dəyişib. Meyitlər Məhkəmə Tibbi Ekspertiza və Patoloji Anatomiya Birliyinin Bərdə rayon şöbəsinə aparılıb və müayinədən sonra yaxınlarına təhvil verilib. Faktla bağlı araşdırma aparılır.

Qaxda 3 uşaq anasının meyti tapılıb. Sozcu.az xəbər verir ki, hadisə rayonun Şotavar kəndində baş verib. Belə ki, kənd sakini 1989-cu il təvəllüdlü Baxışova Züləccə Oruc qızının meyiti yaşadığı ünvanda aşkar edilib. Faktla baglı araşdırma aparılır.

Belarusun ən böyük neft emalı zavodu olan “Naftan”da yanğın baş verib. Sozcu.az xəbər verir ki, bu barədə Belarus Fövqəladə Hallar Nazirliyi məlumat yayıb. "Naftan ASC-nin ərazisindəki texnoloji blokda baş verən yanğın söndürülüb”, - məlumatda bildirilir. Hadisə nəticəsində xəsarət alan olmayıb. Yanğının hansı şəraitdə baş verməsi araşdırılır.