Xaçmazda qadını qətlə yetirərək izi itirməkdə təqsirləndirilən Fərman Dəmirovun cinayət işi üzrə istintaq başa çatıb. Modern.az-ın xəbərinə görə, cinayət işi baxılmaq üçün Sumqayıt Ağır Cinayətlər Məhkəməsinə göndərilib. Cinayət işi hakim Hafiz Əliyevin icratına verilib. İş üzrə məhkəmənin ilkin baxış iclası iyulun 31-nə təyin edilib. İttihama görə, Xaçmaz şəhər sakini Şirinbalayeva Mafizə Gülmalı qızının meyiti şəhərin Asif Cəbrayılov küçəsində fərdi yaşayış evlərinin birində tapılıb. Meyit müayinə olunmaq üçün Səhiyyə Nazirliyinin Məhkəmə – Tibbi Ekspertiza və Patoloji Anatomiya Birliyinin Xaçmaz rayon Şöbəsinə təhvil verilib. İlkin araşdırmalarla onun qətlə yetirildiyi müəyyən olunub. İş üzrə şübhəli şəxs qismində başqa şəxs saxlanılsa da, hadisəni törədən şəxs 6 ay sonra saxlanılıb. Məlum olub ki, qətl hadisəsini mərhumun evinin yaxınlığında tikintidə fəhlə işləyən Dəmirov Fərman Seyfulla oğlu törədib. O istintaqa təhvil verilib. 

Azərbaycanda böyük “əmlak amnistiyası” gözlənilir. Bununla bağlı yeni elektron portal hazırlanır və sistemin 2024-cü ilin sonuna qədər vətəndaşların istifadəsinə verilməsi nəzərdə tutulub.  İnsan sağlamlığına və fəaliyyətinə təhlükə törətməyən ərazilərdə tikilmiş mənzillər tədricən bu portal üzərindən rəsmiləşdiriləcək.  Xezerxeber.az-ın məlumatına görə, daşınmaz əmlak və inşaat üzrə ekspert Elnur Azadov bildirib ki, sənədsiz tikililərin böyük əksəriyyəti Bakı və bakıətrafı ərazilərdə yerləşir. Bu tikililərin təqribi sayı isə 450-500 min arasıdır. Bəzi tikili və ya torpaq sahələrinin sənədləşdirilməsi isə mümkün olmayacaq.  Ekspertin sözlərinə görə, bu proses bazarda ipoteka predmeti olan ucuz əmlakların sayını artıracaq. Bununla yanaşı həmin torpaq sahələri də sənədləşdiriləcək ki, vətəndaş onun üzərində qanuni tikinti apara bilsin.  Ekspert əlavə edib ki, aministiya təkcə fərdi yaşayış evləri və ya torpaq sahələrinə aid deyil. Həmçinin çoxmənzilli yaşayış binaları da var ki, hələ də çıxarışla təmin olunmayıb. Portal istifadəyə verildikdən sonra həmin mənzillərin də çıxarışla təmin olunması gözləniləndir. 

Macarıstan Baş naziri Viktor Orban Kiyevə səfər edib. Sozcu.az xəbər verir ki, bu barədə Orbanın mətbuat katibi Bertalan Havaşi məlumat yayıb. “Macarıstan Baş naziri Viktor Orban səhər Kiyevə yollanıb. Burada Ukrayna Prezidenti Vladimir Zelenski ilə danışıqlar aparacaq”, - Havaşi bildirib.

Tədqiqatçıların apardığı araşdırma zamanı mamontların təxminən 4 min il əvvəl "qeyri-genetik" səbəblərdən nəsli kəsildiyi məlum olub. Sozcu.az lent.az-a istinadən xəbər verir ki, bir sıra alim latınca adı "mammuthus primigenius" olan mamontların nəslinin kəsilməsinin səbəblərini araşdırıb. Araşdırma zamanı məlum olub ki, təxminən 10 min il əvvəl Vrangel adasında qapalı qalan və 4 min il əvvəl nəsli kəsilən mamontların nəslinin kəsilməsinin səbəbi heç də hər kəsin düşündüyü kimi qohumluq əlaqələri olmayıb. 21 mamontun genlərini kompüter vasitəsilə araşdıran tədqiqatçılar mamontların "qohumluq yolu ilə çoxaldığını" müəyyən ediblər. Tədqiqatçılardan biri Love Dalen, "Biz indi onların genetik səbəblərə görə nəslinin kəsilməsi fikrini rədd edə bilərik", - deyə açıqlama verib. O həmçinin deyib ki, tapıntılar mamontların təsadüfi bir hadisə nəticəsində yox olduqlarını göstərir. Əgər bu hadisə baş verməsəydi, mamontlar hələ də yaşayacaqdılar. Bu hadisənin nə olduğu barədə isə alimlərin hələ ki, dəqiq bir fikri yoxdur.

"Hər hansı bir böyrək xəstəliyi zamanı tibbi yardım mütləqdir, əks halda həyati təhlükəsi olan nəticələr yarana bilər". Sozcu.az oxu.az-a istinadən xəbər verir ki, bu barədə rusiyalı uroloq-androloq Stanislav Sosnovski xəbərdarlıq edib. Uroloqun sözlərinə görə, yuxusuzluq, daimi yorğunluq hissi, yaddaş problemləri, qaşınma və dərinin quruması da böyrəklə bağlı problemlərin olduğuna işarə edə bilər. "Əgər siz tez-tez tərləyirsinizsə, enerji çatışmazlığından əziyyət çəkirsinizsə və tez yorulursunuzsa, bu həmişə həkimə müraciət etmək üçün bir səbəbdir. Böyrək xəstəlikləri zamanı sadalanan əlamətlər ilk ortaya çıxanlar arasındadır", - deyə həkim bildirib. Böyrək xəstəliyi zamanı dəri problemləri bədəndəki mineralların və mikroelementlərin balansının pozulması səbəbindən başlayır. "Siz həmçinin qan hissi, metal dadı və ağız qoxusuna qarşı da diqqətli olmalısınız", - Sosnovski əlavə edib. Bundan əlavə, böyrək problemləri şişkinlik, nəfəs darlığı və qan təzyiqi problemlərinə, həmçinin bütün bədəndə narahatlıq və ağrıya səbəb ola bilər.

Hazırda Tehranın Evin həbsxanasında saxlanılan bir neçə milli fəal məhkəməyə çaöırılıb. Bu barədə Abbas Lisani adına fəaliyyət göstərən sosial media kanalı məlumat yayıb. Mürtəza Pərvin Coda, Baqir Hacızadə, Ayaz Seyfxah və Kamal Nuri adlı milli fəallara göndərilən çağırış məktubunda onların iyulun 3-də Tehran İnqilab Məhkəməsinin 15-ci bölməsində olmaları istənilib. Çağırış məktubunda bildirilib ki, bu onlara qarşı açılan məhkəmə işi ilə bağlı dinləmə iclasının keçirilməsi ilə bağlıdır. Bununla yanaşı başqa milli fəal Səid Minayi də, sosial mediada etdiyi paylaşımda çağırış məktubu aldığını və ondan iyulun 7-də İnqilab Məhkəməsinin 15-ci bölməsinə getməsinin tələb oldunduğunu yazıb. Qeyd edək ki, adı çəkilən fəallar və başqa bir neçə fəal fevral ayının 5,6 və 7-də Xiyav, Ərdəbil, Rəşt, Urmu, Təbriz, Tehran, Kərəc və Astara şəhərlərində həbs ediliblər. Təhlükəsizlik məmurları onların bəzilərinin evinə hücum edib, axtarış aparıb və onlara məxsus bir sıra avadanlıqları müsadirə edib.GünazTV

Əməkdar artist Ehtiram Hüseynov səhhətindən danışıb. Sozcu.az xəbər verir ki, "Xəzər axşamı" proqramına qonaq olan müğənni qolunda yaranan problemə görə məşqlər etdiyini deyib: "Həkimim tapşırıb ki, bekar qaldığımda əl hərəkətləri etmək lazımdır. Hər iki əlimin barmaqlarını qatlayıb, açmalıyam. Sol əlim sağa nisbətdə daha zəifdir". Qeyd edək ki, E.Hüseynov uzun müddətdir dağınıq skleroz xəstəliyindən əziyyət çəkir. 

İyulun 2-si saat 10:00-a olan məlumata görə əvvəlcədən xəbər verildiyi kimi, bəzi dağlıq və dağətəyi rayonlarda şimşək çaxır, arabir leysan xarakterli yağış yağır. Sozcu.az xəbər verir ki, bu barədə Milli Hidrometeorologiya Xidmətindən bildirilib. Qeyd olunub ki, düşən yağıntının miqdarı Gədəbəydə 33 mm, Daşkəsəndə 13 mm, Ordubad, Göygöldə 9 mm, Sədərəkdə 7 mm, Gəncə, Şərurda 6 mm, Tovuz, Şəmkir, Qax, Balakən, Zaqatala, İsmayıllı, Göyçay, Goranboy, Şəki, Xaltan, Kürdəmir, Lerik, Ceyrançöl, Naftalan, Şahbuz, Naxçıvan, Beyləqan, Mingəçevir, Yevlaxda 3 mm-dək olub. Öncədən xəbər verildiyi kimi, iyulun 1-də ölkənin bəzi bölgələrində sarı və narıncı xəbərdarlığa uyğun olaraq küləkli hava şəraiti müşahidə olunub. Narıncı xəbərdarlığa uyğun olaraq Culfada şərq küləyi əsib, arabir 23 m/s-dək güclənib. Sarı xəbərdarlığa uyğun olaraq isə küləyin sürəti Gəncə, Naxçıvanda 20 m/s, Naftalanda 18 m/s, Ağdam, Şəmkirdə 16 m/s-dək güclənib. Havanın maksimal temperaturu Bakıda və Abşeron yarımadasında, eləcə də Aran rayonlarında 33, Naxçıvan MR-da 31, dağlıq rayonlarda 23 dərəcəyədək isti olub. Bölgələrdə müşahidə olunan qeyri-sabit hava şəraiti iyulun 3-ü axşamadək davam edəcək.

Dünya birjalarında neft qiymətləri yenidən bahalaşıb. Sozcu.az xəbər verir ki, hazırda “Brent” markalı neftin bir barreli 86,81, yüngül neft isə 83,52 dollara satılır.

Ukrayna müharibənin 860-cı günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 545 090 hərbçi, 8 107 ədəd tank, 15 566 ədəd zirehli döyüş maşını, 14 655 ədəd artilleriya sistemi, 1 114 ədəd RYAS (reaktiv yaylım atəş sistemi), 874 hava hücumundan müdafiə sistemi, 360 ədəd hərbi təyyarə, 326 ədəd helikopter, 19 787 ədəd avtomobil texnikası, 11 641 ədəd PUA, 2 335 qanadlı raket, 28 gəmi/kater, 1 sualtı qayıq, 2 452 xüsusi avadanlıq itirib.

Portuqaliya millisinin kapitanı Kriştiano Ronaldo XXI əsrdə antirekorda imza atıb. Sozcu.az xəbər verir ki, bu barədə "Sofascore" nəşri məlumat yayıb. Bildirilib ki, bu, Almaniyada təşkil olunan Avropa çempionatının 1/8 final mərhələsinin Sloveniya ilə oyununda gerçəkləşib. Əlavə vaxtda (105-ci dəqiqə) penaltidən yararlana bilməyən 39 yaşlı hücumçu bir yığmanın heyətində üç turnirdə 11 metrlik cərimə zərbəsini yerinə yetirə bilməyən ilk avropalı futbolçu olub. O, Avro-2016-da Avstriya, DÇ-2018-də isə İran millisi ilə matçlarda penaltini qaçırıb. Qeyd edək ki, penaltilər seriyasında rəqibini 3:0 hesabı ilə üstələyən Portuqaliya millisi 1/4 finalda Fransanın rəqibi olub.

Hazırda Azərbaycanda heyvanlar arasında hər hansı kəskin, xüsusi təhlükəli infeksion xəstəlik mövcud deyil. Sozcu.az xəbər verir ki, bunu Report-a Azərbaycan Qida Təhlükəsizliyi Agentliyinin (AQTA) Heyvan sağlamlığı şöbəsinin müdiri, Respublikanın Baş Dövlət Baytarlıq Müfəttişi Qalib Əbdüləliyev deyib. Onun sözlərinə görə, Azərbaycan regional olaraq bir sıra xüsusi təhlükəli heyvan xəstəliklərinə görə endemik qeyri-sağlam zonada yerləşir: "Dövlətin dəstəyi ilə müəyyən qanunvericilik çərçivəsində xüsusi təhlükəli xəstəliklərə qarşı planlı tədbirlər həyata keçirilir. Tədbirlərin planlaşdırılması və onların icrasına nəzarəti AQTA, tətbiqi isə Kənd Təsərrüfatı Nazirliyi və onun aidiyyatı qurumları tərəfindən aparılır".

“Hələ ki, indiki durumda respublikaçılar daha mütəşəkkil, daha əzmkar görünürlər. Və bu da ABŞ və bütövlükdə dünya üçün yaxşı heç nə vəd etmir...” “Prezident Co Baydenlə son debatı zamanı Donald Trampın guya özünün həmin dövrdə  prezident olacağı halda aparacağı siyasət sayəsində Ukrayna ilə Rusiya arasında savaşa imkan verməyəcəyi, guya Putinin Ukraynaya hücumuna səbəbin ABŞ-ın Əfqanıstandan qoşunlarını çıxarmasının olması haqdakı, eləcə də ABŞ-dakı miqrant siyasəti və işsizliklə bağlı söylədiklərinə gəldikdə, əlbəttə, bunlar hamısı yalandır”. Bunu Moderator.az-a açıqlamasında  prezidentliyə mümkün namizəd Donald Trampın ABŞ-ın hazırkı prezidenti Co Baydenlə son debatı zamanı Ukrayna savaşı və ABŞ-dakı daxili siyasətlə bağlı söylədiklərini şərh edərkən siyasi təhlükəsizlik məsələləri üzrə ekspert Ərəstun Oruclu dilə gətirib. “Bilirsiz, Donald Tramp o siyasətçilərdəndir ki, utanmadan yalan danışır.  Və həmişə də yalan danışıbdı. Yaxşı yadımdadır ki, o, prezident olduğu dövrdə ABŞ mediası hesablamışdı ki, Tramp bir ildə 10 min dəfə yalan danışıb.  Bu isə Ginnesin Rekordlar Kitabına düşəcək bir səviyyədir. Ona görə də yalnız son debatların ardınca nəsə söyləmək çətindir. Lakin hələ ki, indiki durumda respublikaçılar daha mütəşəkkil, daha əzmkar görünürlər. Və bu da ABŞ və bütövlükdə dünya üçün yaxşı heç nə vəd etmir. Bu, mənim subyektiv fikrimdir. Şəxsən mən düşünmürəm ki, Trampın təkrar prezident seçilməsi nəinki ABŞ, planet üçün də hansısa bəhrələrini verə bilər. Ona görə hələ bir qədər gözləməliyik”, - deyə davamında ekspert diqqətə çatdırıb.

Ermənistan polisinə Gümrü şəhərində yerləşən Şirak hava limanına bomba qoyulması barədə məlumat daxil olub. Sozcu.az xəbər verir ki, bu barədə Ermənistan Daxili İşlər Nazirliyi xəbər yayıb. Qeyd edilib ki, hava limanının əməkdaşları təxliyə edilib, ərazidə istehkamçılar və polis işləyir, ərazi mühasirəyə alınıb.

2024-cü ilin iyun ayında ölkə ərazisində mürəkkəb sinoptik şərait müşahidə olunub. Ay ərzində xüsusilə dağlıq və dağətəyi rayonlarda qısamüddətli leysan xarakterli yağışlar yağıb və tez-tez təkrarlanıb. Sozcu.az xəbər verir ki, bunu Milli Hidrometeorologiya Xidmətinin rəisi Nazim Mahmudov bildirib. O qeyd edib ki, düşən yağıntının miqdarı əksər bölgələrdə normadan çox olub. Abşeron yarımadasında isə ay ərzində maksimal yağıntı iyunun 27-də qeydə alınıb, Sumqayıta 25 mm-ə qədər yağıntı düşüb. Son 10 ilin müşahidə məlumatlarına əsasən belə intensiv yağış 2011-ci ilin iyunun 9-da qeydə alınıb, Bakıya 14 mm, Sumqayıta isə 26 mm yağıntı düşüb. “Son dövrlər ölkə ərazisində ildırım-dolu prosesinin baş vermə intensivliyi artıb, həmçinin əhatə dairəsi genişlənib. Ötən ilin iyun ayında 43 dəfə dolu düşdüyü halda, bu ilin iyununda 59 dəfə dolu hadisəsi qeydə alınıb”. Xidmət rəisi qeyd edib ki, iyun ayı yüksək temperatur rejimi ilə də fərqlənib. Ay ərzində havanın temperaturu 28 gün normadan yüksək olub. Lakin ayın sonuna doğru soyuq atmosfer cəbhəsinin təsiri nəticəsində ötən günlərlə müqayisədə temperatur bir qədər enib və 2 gün normadan aşağı olub. İyun ayı ərzində havanın maksimal temperaturu Bakıda və Abşeron yarımadasında 38, Naxçıvan MR-da və Aran rayonlarında 40 dərəcəyədək yüksəlib. Orta aylıq temperatur 27.4 dərəcə isti təşkil edib ki, bu da iqlim normasından 4.4 dərəcə yüksək olsa da, rekord göstərici yenilənməyib. Belə ki, çoxillik müşahidə məlumatlarına əsasən ən isti hava 2021-ci ilin iyun ayında qeydə alınıb, havanın maksimal temperaturu Bakıda və Abşeron yarımadasında 41, bölgələrdə isə 43 dərəcəyədək yüksəlib. “İyun ayının ayrı-ayrı günlərdə küləkli hava şəraiti ilə bağlı rəng şkalasına uyğun olaraq xəbərdarlıqlar verilib. Bakıda və Abşeron yarımadasında iyun ayında sürəti 15 m/s-dən çox olan küləkli günlərin sayı 6 olub, şimal-qərb küləyinin maksimal sürəti 30 m/s-dək güclənib. Bölgələrdə isə 19 gün küləkli hava şəraiti müşahidə olunub, küləyin sürəti 15 m/s-dən çox olub, maksimal sürəti arabir 30 m/s-yə çatıb”.

Fotolar Şəmkir rayon Düzqışlaq kənd sakini Məmmədov Vüqar Əli oğlu tərəfindən göndərilib. Fotolardan göründüyü kimi elektrik dirəyi qəzalı vəziyyətdədir. Hər an vətəndaşlara təhlükə yarada bilər. Şikayətçi bildirir ki, qəzalı vəziyyətlə bağlı Azərişıq Açıq Səhmdar Cəmiyyətinin Şəmkir Elektirik Şəbəkəsini məlumatlandırıb. Çox təəssüf ki, nə vəziyyətlə maraqlanan olub, nədə ki, qəzalı vəziyyətlə bağlı tədbir görən. Sözcü.az

Son iki ay ərzində Qərbi Azərbaycan əyalətində iş qəzalarında ölən və yaralananların sayı açıqlanıb. Bu barədə "İlna" xəbər agentliyi məlumat yayıb. Məlumatda bildirilib ki, bu müddət ərzində 7 işçi həyatını itirib, 203 işçi isə yaralanıb. Əyalətin Tibbi Ekspertiza Mərkəzinin məlumatına görə, ölən və yaralananların əksəriyyəti tikinti sahəsində çalışanlardı və onlar hündürlükdən yıxıldıqlarına görə ölüb və yaralanıblar. Müstəqil həmkarlar ittifaqları və sinfi fəallar Tibbi Ekspertiza Mərkəzinin verdiyi rəqəmlərin həqiqəti əks etdirmədiyini deyirlər. Onların fikrincə, ölüm və yaralanma halları rəsmi statistikada göstəriləndən bir neçə dəfə çoxdur. Fəallar iş yerlərinin çoxunda, özəlliklə tikinti sahəsində təhlükəsizlik qaydalarının tətbiq edilməməsi və işçilərin qoruyucu geyim, avadanlıqlarla təmin olunmamalarını ölüm hallarının çoxalmasındakı əsas səbəblərdən biri kimi göstərirlər.

"Cavan Zeynallı, səni bundan sonra heç kim sevməyəcək. Hamı evini sevəcək. Özünə baxır. Dedim ki, yaxşı bir qulluqçu tap. Gördün o da yaxşı deyil, dəyiş". Sozcu.az xəbər verir ki, bu sözləri Əməkdar artist Kübra Əliyeva "Elgizlə izlə" verilişində deyib. Aktrisa Xalq artisti Cavan Zeynalının evlənmək istəyinə münasibət bildirib. K.Əliyeva deyib ki, xanımlar cazmenin yalnız evini istəyir. C.Zeynallı isə aktrisanın sözlərini təsdiqləyib: "Təmiz, düz söhbətdir. Mən cavan olanda qastrollara gedirdim. Orada mən özümə tək baxırdım, evlənməmişdim. O, mənə həyat verirdi. İndi şiri çıxarmışam, cavan qalmışam, yaxşı etmişəm. Mənim yaxşı psixoloq dostum var. Dedi ki, sən pianinoda ifa edəndə ağlayıram. Zən etdi ki, istəyirsən özünü düzəldəsən, 3 dəfə 15 dəqiqə sevimli mahnılarını ifa et. Tək ol. Bir ay keçdi, gördüm ki, gözlərim açıldı, ayaqlarım möhkəmləndi".

Bu gün futbol üzrə Amerika Kubokunda 3-cü turun 2 oyunu keçirilib. Sozcu.az xəbər verir ki, B qrupunda əvvəlcə Meksika Ekvadorla qarşılaşıb. Oyunda qalib müəyyənləşməyib - 0:0. Qrupun digər oyununda Venesuela Yamaykanı  böyük hesabla məğlub edib - 3:0. 49-cu dəqiqədə Eduard Bello hesabı açıb. Solomon Rondon 56-cı, Erik Ramirez isə 85-ci dəqiqədə fərqlənib.  B qrupunda Venesuela (9 xal) və Ekvador (4 xal) 1/4 finala vəsiqə əldə edib. Ekvador 1/4 finalda Argentinaya rəqib olub. Kanada isə bu mərhələdə Venesuela ilə qarşılaşacaq.

İyulun 1-də Bakının Binəqədi rayonu ərazisində 2004-cü il təvəllüdlü Təhminə Qasımovanın öldürülməsi barədə rayon prokurorluğuna məlumat daxil olub. Bu barədə Sozcu.az-a Binəqədi rayon Prokurorluğundan bildirilib. Araşdırmalarla 1997-ci il təvəllüdlü Təbriz Qasımovun rayonun Rəsulzadə qəsəbəsi ərazisində şəxsi münasibətlər zəminində bacısı Təhminə Qasımovanı boğaraq qəsdən öldürməsinə əsaslı şübhələr müəyyən edilib. Faktla bağlı Binəqədi rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanaraq ibtidai istintaq aparılır. Hadisədən sonra könüllü olaraq polisə təslim olan T.Qasımov prokurorluq tərəfindən şübhəli şəxs qismində tutulub.

Şabran rayonunda baş verən ağır yol qəzasında bir nəfər ölüb, üç nəfər yaralanıb. Sozcu.az-ın məlumatına görə, Bakı-Quba-Rusiya ilə dövlət sərhədi avtomobil yolunun Dəvəçi kəndindən keçən hissəsində "SHACMAN" markalı yük maşını ilə "Mercedes" markalı minik avtomobili toqquşub. Belə ki, hadisə nəticəsində Bakı şəhər sakinləri 1989-cu il təvəllüdlü Vəliyeva Pəri, 1995-ci il təvəllüdlü Seyidağa Səmədov və 1984-cü il təvəllüdlü İlqar Abdullayev müxtəlif dərəcəli bədən xəsarətləri alıblar. Yaralılar Şabran Rayon Mərkəzi Xəstəxanasına aparılıb. Qəza zamanı aldığı xəsarətlərdən ölən 1994-cü il təvəllüdlü Əmirli Vahid Seymur oğlunun meyiti müayinə olunmaq üçün Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinin yerli şöbəsinə təhvil verilib. Qəzaya düşənlərin Gömrük Komitəsinin əməkdaşları olduğu bildirilir. Faktla bağlı araşdırma aparılır.

Goranboyda 40 yaşlı Yardımlı sakini dünyasını dəyişib. Sozcu.az Unikal-a istinadla xəbər verir ki, hadisə Safıkürd kəndində keçirilən toy mərasimində baş verib. 1984-cü il təvəllüdlü Yardımlı sakini Pərviz Əliqulu oğlu Şərbətovun toy məclisində vəziyyəti qəfil pisləşib və o ölüb. Məlumata görə, ürəktutmasından ölən şəxs hərbçidir. Faktla bağlı araşdırma aparılır.

Sumqayıtda yeniyetmələrin mübahisəsi qanla nəticələnib.  Sozcu.az xəbər verir ki, hadisə "Ceyranabatan bağları" adlanan ərazidə qeydə alınıb.  Sumqayıt şəhər sakini, 2009-cu il təvəllüdlü Qasımov Elgün Vüsal oğlu, münaqişə zəminində, eyni təvəllüdlü İsmayılov Əli Faiq oğluna və 2007-ci il təvəllüdlü Manıyev Rasif Sabit oğluna bıçaqla xəsarətlər yetirib.  Fakt araşdırılır. 

İmişli rayonu ərazisində baş verən yol-nəqliyyat hadisəsində ata ölüb, övladı isə yaralanıb. Sozcu.az xəbər verir ki, hadisə İmişli şəhər Mikayıl Müşfiq küçəsində qeydə alınıb. Xəlil Akif oğlu Quliyevin idarə etdiyi "Mersedes" markalı minik avtomobili hasara çırpılıb və aşıb. Hadisə nəticəsində sürücü ölüb, avtomobildə olan 6 yaşlı oğlu Akif Quliyev isə xəsarət alaraq İmişli Rayon Mərkəzi Xəstəxanasına yerləşdirilib. Faktla bağlı araşdırma aparılır.