Son zamanlar onlayn alış-verişdə məhsul keyfiyyətinə dair etimad azalır. Sozcu.az xəbər verir ki, Temu adlı platformadan istifadəçinin aldığı “Wi-Fi” gücləndirici bu mövzuda diqqət çəkən nümunələrdən biri oldu. Müştəri məhsulu xaricdən tamamilə funksional bir cihaz kimi sifariş edir. Lakin içini açdıqda vəziyyətin tam əksi ortaya çıxıb. Cihazın içi boş idi və yalnız dekorativ antenalarla təchiz edilmişdi. Bu hadisə istifadəçilərin onlayn alış-veriş zamanı daha diqqətli olmalı olduqlarını bir daha gündəmə gətirir. İnsanlar xüsusilə naməlum və ya etibarsız satıcılardan elektronika kimi məhsullar alınarkən mütləq müsbət rəylərə və zəmanətə diqqət yetirilməlidir./milliaz

Bakıda 40 yaşlı qadın dəm qazının qurbanı olub. Sozcu.az-ın məlumatına görə, hadisə Suraxanı rayonunun Balaxanı qəsəbəsində baş verib. 1984-cü il təvəllüdlü Aygün Məmmədova qəsəbə ərazisində yaşadığı evin hamamında dəm qazından boğulub. Faktla bağlı araşdırma aparılır.

Nəsimi rayonu Həsən Əliyev küçəsində yerləşən “Avrasiya Hospital”da bədbəxt hadisə baş verib. Sozcu.az "Qafqazinfo"ya istinadən xəbər verir ki, hadisə dekabrın 15-nə keçən gecə saat 23 radələrində olub. Belə ki, xəstəxananın liftinin qırılması nəticəsində paytaxt sakini 1978-ci il təvəllüdlü Rəhman Əlisəfa oğlu Məmmədov xəsarət alıb. Ona tibbi yardım göstərilib. Faktla bağlı araşdırma aparılır.

Dekabrın 16-sı Mingəçevir şəhəri ərazisində bıçaqlanan 1998-ci il təvəllüdlü Bəxtiyar Həsənli xəsarətdən müalicə aldığı xəstəxanada ölüb. Sozcu.az xəbər verir ki, bu barədə şəhər prokurorluğu məlumat yayıb. Araşdırmalarla 1990-cı il təvəllüdlü Elvin Rüstəmovun dekabrın 15-i şəxsi münasibətlər zəminində aralarında yaranmış mübahisə zamanı qonşusu Bəxtiyar Həsənliyə bıçaqla xəsarət yetirməsi məlum olub. Faktla bağlı Mingəçevir şəhər prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsilə cinayət işi başlanıb. Elvin Rüstəmov iş üzrə şübhəli şəxs qismində tutulub. Hazırda ibtidai istintaq davam edir.

Soyuq havalarda evlərin açıq eyvanlarında yerləşən kombi donma təhlükəsi ilə üzləşir. Ehtiyat tədbirləri görülməzsə, kombi yararsız vəziyyətə düşür. Bəs soyuq havalarda, xüsusən də temperatur mənfi dərəcəyə düşdüyü zaman kombi və istilik sisteminin donmaması üçün hansı tədbirlər görülməlidir? Mövzu ilə bağlı "Yeni  Sabah"a danışan isitmə və soyutma sistemlərinə xidmət üzrə mütəxəssis Rəsul Allahverdiyev bildirib ki, vətəndaşlar aşağıda qeyd olunan nüanslara xüsusi diqqət etməlidir: “Kombinin donmaması üçün ilk növbədə, kombi sistemi çəkilən zaman, onu qapaılı bir yerə qoymaq lazımdır. Qapalı məkana yerdədirsə, işıq və qaz olmadığı zaman donmanı gecikdirə bilər. Hətta qaz-işıq varsa və hava şaxtalıdırsa, onda istilik kombinin partlamağının qarşısını alır. Deyək ki, kombi çöldədir və işlədirik. Belə olduqda isti və soyuq suyun giriş xətti donub partlaya bilər. Bunun qarşısını almaq üçün gecə soyuq suyun vintini bağlayıb, içəridə isti suyun kranını açırıq ki, həmin hissədə su qalmasın. İnsanlar bir müddət evdə olmadığı və kombini işlətmədiyi zaman kombinin altındakı vintləri bağlayıb və 4 bağlantını açıb, suyu təmiz boşaltmaq lazımdır. Ümumiyyətlə, istilik sistemində suyu təzyiqdə qoymamalıyıq. O təzyiqi də boşaldırıq ki, evdə yaşayış olmadığı zaman radiatorlar şaxta olanda güclü təzyiq altında qalıb partlamasın. Çöldə havanın temperaturu 0-ın altında olanda və işıq-qaz olmadığı zaman mütləq şəkildə biz kombinin altını boşaltmalıyıq. Yenə də 4 ədəd vinti bağlayır, kombinin altından sistemi açıb boşaldırıq. Sistem çəkilən vaxt kombinin girişinə əks-axın kranı qoymalıyıq. Bunu kranı qoymalıyıq ki, ən pis halda suyu boşalda bilməyəndə bunu açıb suyu boşalda bilək. Həmin vaxt soyuq suyun girişini bağlamalıyıq və içəridən sistemdəki suyu açıb boşaltmalıyıq”.  Mütəxəssis donma hallarına qarşı atapleniyalar üçün nəzərdə tutulan antifrizlərdən istifadə etməyi tövsiyə edib: “Bəzi kombilərdə donmaya qarşı xüsusi rejim olur. Kombi işləməsə belə, işıq-qaz olduğu zaman dərəcə +5-dən aşağı düşəndə öz daxilində işə düşür və qaz yanaraq öz daxilindəki suyu isidir. Bu donmaya qarşı rejim sayılır. Amma yenə də buna arxayın olmaq olmaz. Çalışıb ümumiyyətlə işlədilməyən kombinin içərisində və ümumi xəttə təzyiqli su saxlamamaq lazımdır. Hətta soyuq suyun özündə belə, ümumi xətti bağlayıb, vinti açıb mətbəxdə və hamamda suyun təzyiqini aşağı salmalıyıq. Bəzən xəttə antifriz də vurulur. Həmin antifriz ingibiter tərkibli olmalıdır. Yaşayış yerinin sahəsi və otaq dərəcəsinə görə antifriz vurulur. Deyək ki, su kütləsi nə qədərdisə, onun 20 faizi, bəzi yerlərdə 50 və 80 faizi antifriz olmalıdır. Amma çalışıb sırf atapleniya sistemi üçün olan antifriz istifadə etmək lazımdır. İstifadə miqdarı iləbağlı isə mühəndislərlə məsləhətləşmək lazımdır. Antifriz düzgün tökülmədikdə, radiatorları, dövriyə nasosunu, esenjoru sıradan çıxara bilər. Bunu seçərkən çalışıb ən keyfiyyətli və yaxşısını seçmək lazımdır. Kombinin göstəricilərində antifriz vurmaq var və bu da sırf atapleniya sistemi üçün nəzərdə tutulan antifrizlərlə edilməlidir”.

Şəkidə bir ailənin üç üzvü dəm qazından zəhərlənib. Sozcu.az APA-ya istinadla xəbər verir ki, dekabrın 15-dən 16-na keçən gecə Şəki şəhəri sakinləri - 1979-cu il təvəllüdlü Rasimə Rasim qızı Abdullayeva, 1995-ci il təvəllüdlü Murad Əmiraslan oğlu Abdullayev və 2022-ci il təvəllüdlü Fatimə Murad qızı Abdullayeva zəhərlənmə əlamətləri ilə Şəki Rayon Mərkəzi Xəstəxanasının (RMX) Təcili Tibbi Yardım şöbəsinə daxil olub. Onların dəm qazından zahərləndiyi məlum olub. Hər üç şəxs tibbi yardımdan sonra ambulator müalicə almaq şərti ilə evə buraxılıblar. Faktla bağlı araşdırma aparılır.

Havaların kəskin soyuması və enerji çatışmazlığı səbəbindən İranın 18 əyalətində məktəblər, universitetlər və bir sıra dövlət idarələrində tətil elan edilib. Sozcu.az xəbər verir ki, bu barədə yerli media məlumat yayıb. Bununla yanaşı, enerjiyə qənaət etmək üçün bir neçə əyalətdə də dövlət idarələrinin iş rejimi dəyişdirilib, iş saatları azaldılıb. Tətil elan edilən əyalətlər arasında Şərqi Azərbaycan, Qərbi Azərbaycan, Ərdəbil, Zəncan, Həmədan və Qəzvin əyalətləri də var.

Bakı şəhərinin Səbail rayonunda ümumi sahəsi 120 m² olan birmərtəbəli 5 otaqlı evin 3 otağının yanar konstruksiyaları və ev əşyaları 89 m² sahədə yanıb. Sozcu.az-ın Fövqəladə Hallar Nazirliyinin saytına istinadən verdiyi xəbərə görə, evin qalan hissəsi yanğından mühafizə olunub. Yanğın yanğından mühafizə bölmələri tərəfindən söndürülüb.

Atam müəllim idi. Aylıq məvacibi gündəlik çörəkpuluna güclə çatırdı. Ailədə üç uşaq idik. Böyük qardaşım, bacım və mən. Onlar ali məktəbdə oxuyurdular. Mən isə doqquzuncu sinifə gedirdim. Mənimlə eyni sinifdə İlqar adlı oğlan da oxuyurdu. İmkanlı ailədən idi. Amma çox sadə, gülərüz biri kimi tanınırdı. İlqar mənimlə dostluq edirdi. Amma onun atası həmişə dostluğumuza mane olmağa çalışırdı. Dəfələrlə İlqara - “Səviyyəli uşaqlarla dostluq et! Bundan sənə dost olmaz!“ demişdi. Yaxşı xatırlayıram, İlqarın ad günü idi. Bir qol saatı alıb, İlqargilə getdim. Qapının zəngini basdım. Tərslikdən qapını İlqarın atası açdı. Salam verib, içəri daxil olmaq istəsəm də, o, məni evlərinə buraxmayaraq-“İlqar sənin tayın deyil, get tayını tap!”- dedi. Bu hadisədən sonra İlqar dəfələrlə məndən üzr istəsə də ona yaxınlaşmayıb, həmişə ondan uzaq gəzməyə çalışdım. Aradan bir neçə ay keçmişdi. Yay tətilində ailəmə kömək etmək üçün yaxınlıqdakı şadlıq evlərindən birində ofisiant işləyirdim. Həmin günlərin birində gecədən xeyli keçmiş işdən evə gəlirdim. Maşın dayanacağının yanından keçərkən qulağıma inilti səsi gəldi. Qaçaraq səs gələn tərəfə gedəndə bir kişinin huşsuz vəziyyətdə yerdə inildədiyini gördüm. Adamın üzü-gözü qan içində sifəti tanınmırdı. Mən özümü itirməyərək təcili tibbi yardıma zəng vurub gördüklərimi danışdım və ünvanı dedim. Qısa vaxt ərzində təcili yardım maşını hadisə yerinə gəldi və xəstə ilə məni xəstəxanaya apardı. Dərhal əməliyyat otağına aparılan xəstənin yaxınları gələnə qədər mən də gözləmək qərarına gəldim. Əməliyyat otağından çıxan həkim xəstəyə təcili qan lazım olduğunu, lakin heç kimin qan qrupunun ona uyğun gəlmədiyini bildirdi. Mən dərhal şəxsiyyət vəsiqəmi həkimə təqdim edib mənim də qanımı yoxlamasını xahiş etdim. Həkim qan qrupumu müəyyənləşdirib təcili qan verməyimi istədi. Otağa keçib lazımi miqdarda qan verdim. Bir nəfər tanımadığım şəxs mənə yaxınlaşdı və müstəniq olduğunu bildirdi. İzahatım alındıqdan sonra sabah valideyinlərimlə polis şöbəsinə gəlməli olduğumu dedi. Evə səhərə yaxın gəldim. Qan verdiyimə görə başım gicəllənirdi. Özümü zorla çarpayının üstünə atdım və həmin an da, yuxuya getdim. Günorta anamın səsi məni oyatdı -“Gecə harada olmusan? Atanla səni polis şöbəsinə çağırırlar - dedi. Mən, gecə başıma gələnləri valideyinlərimə danışdım. Onlar mənim etdiklərimdən razı qaldılar. Mənə verdikləri tərbiyyəyə görə qürurlandıqlarını üzlərindən oxumaq olurdu. Yemək yeyəndən sonra atamla rayon polis şöbəsinə getdik. Bizi dünənki müstəntiq qarşıladı və sorğu-suala tutdu. Məndən gecə saat ikidə nə üçün küçədə olduğumu soruşdu. Mən isə işimdən gileylənib, toy qurtardıqdan sonra evə yollandığımı dedim. Müstəntiqin yerli-yersiz sualları bizi özümüzdən çıxartsa da səbrli olmağa çalışırdıq. İş o yerə çatmışdı ki, axşam etdiyim yaxşı əməlimə görə az qala peşman olacaqdım. Axı mən cinayət etməmişdim?! Kiminsə həyatını xilas etmişdim. Hiss olunurdu ki bizdən umacağı var. Uzun çək-çevirdən sonra müstəntiq bizi evə buraxaraq, “Çağıranda gələrsiniz”- dedi. Biz evə gəldik. Bir neçə gündən sonra həkimdən zəng gəldi. O məndən xəstəxanaya gəlməyimi xahiş elədi. Xəstəxanaya getdim. Həkim mənə-“Xilaskar, belə olmaz. Heç gəlib xəstənin halını soruşmursan. Xəstə öz xilaskarını görmək istəyir, palatada səni gözləyir”-dedi. Mən müstəntiqlə olan söhbətimizi ona danışdım. O isə mənə -“Narahat olma, Qurban müəllimə deyərəm yoluna qoyar.”-dedi. Ondan palatanın nömrəsini öyrənib xəstənin yanına tələsdim. Palataya daxil olanda çarpayıda başı və üzü sarıqlı bir nəfərin uzandığını gördüm. İlqarla anası da, palatada idilər. Mən İlqardan burada nə etdiklərini soruşmaq istədikdə çarpayıdakı şəxs xırıltılı səslə üstümə qışqıraraq: - Alə, sənə neçə dəfə demişəm, İlqardan uzaq dur?! Adama sözü neçə dəfə deyərlər?- dedi. Və mən başa düşdüm ki, “Qurban müəllim” İlqarın atası imiş. Mən onu gözümdə o qədər böyütdüm ki, alt dodağı yer süpürdü, üst dodağı göy. Sonra o birdən, əyilib Qanq çayından su ovuclayıb içdi. İstəyirdim ki, qışqırıb ona deyəm: - Qurban əmi, Qanq çayı zəhərlidir, içmə! Qurban əmi, bunu mənə coğrafiya müəllimim öyrədib. İnanmırsansa ondan soruş! Qanq çayında vəba var, içmə o sudan! Sonra qəfil xəyallarım sivişib Qurban əminin düz yatağının ayaq ucunda Gorgo kimi dayandı. O dili zəhərli ilanlarını bir-bir yuxudan oyadıb, Qurban əminin ayaqlarına salışdırdı. İlanlar Qurban əmini zəhərləyirdi. Deməli İlqarın atası yaxşı insanmış. Deməli bu lənətə gəlmiş Gorgonun ilanları Qurban əmini zəhərləyirlərmiş! Qurban əmi! Qurban əmi.i.i.i! Dilini dişlə Qurban əmi! Dilini dişinlə çərtməsən, vücudundan qan çıxmasa, bu zəhər səni tezliklə öldürəcək! Qurban əmi.i.i.i.i! İlahi! Gorgo gözlərini mənə zilləyib, mən qaçıb aradan çıxmalıyam! Tez geriyə çevrilib otaqdan çıxmaq istəyəndə, həkimlə toqquşdum! Ana, and olsun Allaha həkimlə toqquşmasaydım, özümə gəlməyəcəkdim.  - Az oxu, o yunan mifalogiyasını! - Axı burda yunan mifalogiyasının heç bir günahı yoxdur?! Günah Qurban əminin dilindədir... - Unut o adamı! - Bilirsən nə oldu? Həkim Qurban əmiyə dedi ki, sənin xilaskarın bax, bu oğlandır. Qurban əmi yumuşadı. Kövrəldi. Nəsə demək istədi, udğundu, deyəsən dilini uddu. İlqar da gəlib, düz yanımda dayandı. Atasına baxdı, baxdı, sonra heç nə demədi.  - Sonra nə oldu? Arvadı da heç nə demədi? - Heç nə olmadı, arvadı da heç nə demədi.  - Sən nəsə dedin? - İlqara baxıb gülümsədim, evə qayıtdım. Nəyə gülürsən ana? - Sənin təbəssümünə. - Təbəssüm və sevgi yoluxucudur.  - Zəhərli dil də... Əbil Həsən

Bakının Sabunçu rayonunda azyaşlının xəsarət alması ilə nəticələnən yol-nəqliyyat hadisəsi baş verib. Sozcu.az-ın məlumatına görə, iki avtomobilin toqquşması zamanı sərnişin, 2019-cu il təvəllüdlü A.Eyvazov xəsarət alıb. Yaralı təcili tibbi yardımın köməkliyi ilə xəstəxanaya çatdırılıb. Faktla bağlı araşdırma aparılır.

Qax rayonunda “Opel Astra” yanıb. Hadisə rayonun Turaclı kənd ərazisində baş verib. Sozcu.az Fövqəladə Hallar Nazirliyinin Qax rayon Dövlət Yanğından Mühafizə Hissəsinə istinadən bildirir ki, yanğınla bağlı məlumat daxil olan kimi hadisə yerinə texnika və canlı heyət göndərilib. Yanğın zamanı kənd sakin, 43 yaşlı Taleh Abbasova məxsus 99DX783 dövlət nömrə nişanlı “Opel Astra” markalı minik avtomobili tamamilə yanıb. Yanğınsündürənlər yaxınlıqdakı tikilini yanğından mühafizə ediblər.

Ukrayna müharibənin 1026-cı günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 762 440 hərbçi, 9 551 ədəd tank, 19 707 ədəd zirehli döyüş maşını, 21 128 ədəd artilleriya sistemi, 1 256 ədəd RYAS (reaktiv yaylım atəş sistemi), 1025 hava hücumundan müdafiə sistemi, 369 ədəd hərbi təyyarə, 329 ədəd helikopter, 31 398 ədəd avtomobil texnikası, 20 356 ədəd PUA, 2 863 qanadlı raket, 28 gəmi/kater, 1 sualtı qayıq, 3 648 xüsusi avadanlıq itirib.

Hazırda hərbi xidmət müddətinin 1 il 6 aydan 1 ilə endirilməsi bizdə müzakirə edilir. Sozcu.az xəbər verir ki, bunu Milli Məclisin Müdafiə, təhlükəsizlik və korrupsiya ilə mübarizə komitəsinin bu gün keçirilən iclasında Səfərbərlik və Hərbi Xidmətə Çağırış üzrə Dövlət Xidmətinin Həqiqi hərbi xidmətə çağırış baş idarəsinin rəisi Azər Babayev deyib. O bildirib ki, əsas məqsəd bütün sui-istifadə hallarının qarşısının alınmasıdır: “Çağırışın ancaq elektron qaydada olması nəzərdə tutulur. Bu da şəffaflığın təmin olunmasında mühüm əhəmiyyət kəsb edir. Ancaq hərbi xidmət müddətinin azaldılmasında başqa bir yol fikirləşirik. Burada ali təhsillilərlə orta təhsillilər fərqləndirilir. Ali və orta təhsillini fərqləndirmək düzgün deyil. Onların bərabərləşdirilməsi lazımdır. Konstitusiyada yazılıb ki, hər kəs hərbi xidmətdən keçməlidir, orada ali təhsil, orta təhsil fərqləndirilməyib. Amma biz buna hələ hazır deyilik. Bu layihə qəbul olunduqdan sonra o istiqamətdə təkliflərə baxa bilərik”.

Yaşın 35 yaşdan 30-a endirilməsi 2 övladı olan bir çox şəxsin hərbi xidmətdən azad olunmasına səbəb olacaq. Sozcu.az xəbər verir ki, bunu Milli Məclisin Müdafiə, təhlükəsizlik və korrupsiya ilə mübarizə komitəsinin bu gün keçirilən iclasında Səfərbərlik və Hərbi Xidmətə Çağırış üzrə Dövlət Xidmətinin Həqiqi hərbi xidmətə çağırış baş idarəsinin rəisi Azər Babayev deyib. Azər Babayev bildirib ki, qanun qəbul olunarsa, faktiki həmin kateqoriya insanlar çağırışdan azad olunacaqlar: “Amma ümumiyyətlə 2 uşağı olanların azad edilməsi heç Türkiyə təcrübəsində də yoxdur”.

Həbsxanadan kənarda daha çox şey edə bilsəm də, həbsxananın məni susdurmasına imkan verməyəcəyəm. Sozcu.az xəbər verir ki, bunu tibbi məzuniyyətdə olan Nobel Sülh Mükafatı laureatı və siyasi məhbus Nərgiz Məhəmmədi deyib. O, Nobel Komitəsinə verdiyi ilk müsahibədə bildirib ki, insan hüquqlarını və qadın hüquqlarını müdafiə etmək cinayət deyil. “Qadın hüquqlarına, insan hüquqlarına və azadlığına sadiqlik heç bir həbsxana divarı ilə məhdudlaşdırıla bilməz. Tehran rejimi məni susdura bilsə də, bu heç nəyi dəyişməyəcək. Ona görə ki, İran xalqı artıq üsyan edib”, - Məhəmmədi bildirib.

Məlum olduğu kimi, dekabrın 9-dan Bakı-Sumqayıt istiqamətində 594 nömrəli yeni ekspres avtobus marşrutu istifadəyə verilib. Avtobuslar "20 Yanvar" metrostansiyası yaxınlığından 8 dəqiqəlik intervalla yola düşür. Gediş haqqı isə 80 AZN-dir. Avtobusun dayanacaq məntəqələri “Sumqayıt Avtovağzalı”, “Bağça Şəhər” yaşayış kompleksi, Sumqayıt dairəsi, Ceyranbatan qəsəbəsi, “20 Yanvar” metrostansiyası olmaqla müəyyənləşdirilib. Yeni ekspres avtobus marşrutunun açılması ilə əlaqdəar mikroavtobusların 20 Yanvar-Sumqayıt istiqamətində hərəkəti məhdudlaşıb. Bu da Saray sakinləri, eləcə də bu qəsəbədən keçərək Sumqayıta gedən sakinlər üçün problemlər yaradır. Onlar bu barədə Bakupost.az -a açıqlamalarında bildiriblər. Sakinlər qeyd ediblər ki, Saray əhalisi təxminən 20.000 olan böyük qəsəbədir.: "Lakin bütün Bakıətrafı qəsəbələrə şəhərdən birbaşa avtobus marşrutu olsa da, Saraya ayrıca marşrut ayrılmır. Biz yollarda qalırıq. "20 Yanvar"dan Sumqayıta açılan yeni marşrut, eləcə də mikroavtobus və taksilər "Ceyranbatan yolu" ilə gedirlər. Biz Saraya gedib-gəlmək üçün yolalrda saatlarla gözləməli, vaxt itirməli oluruq. Takisilər də baha aparır". Məsələ ilə bağlı AYNA-nın mətbuat katibi Tural Orucov Bakupost.az -a açıqlamasında bildirdi ki, Saray istiqamətinə getmək üçün sərnuişinlər Bakı Beynəlxalq Avtovağzal Kompleksindən yola düçən avtobuslardan istifadə edə bilərlər: “Vətəndaşlar avtovağzaldan Saraya gedə bilərlər. Saray qəsəbəsindən keçməklə Sumqayıta 595 nömrəli ekspress avtobusları işləyir. Saraya yeni marşrutun açılmasına gəlincə, əgər gələcəkdə bu barədə hər hansı yenilik olarsa, ictimaiyyətə açıqlama verəcəyik”.

Milli Hidrometeorologiya Xidməti küləkli hava şəraiti ilə bağlı sarı və narıncı xəbərdarlıq velan edib. Sozcu.az xəbər verir ki, dekabrın 14-də Bakıda və Abşeron yarımadasında, eyni zamanda bəzi bölgələrdə gözlənilən küləkli hava şəraiti ilə bağlı sarı və narıncı xəbərdarlıq verib. Şuşa, Xankəndi, Xocavənd, Qubadlı, Ağdərə, Saatlı, Sabirabad, Qazax, Laçın, Cəbrayıl, Zəngilan, Füzuli, İmişli, Beyləqan, Salyan, Kürdəmir, Biləsuvar, Cəlilabad, Masallı, Lənkəran, Astara, Xaçmaz, Xızı, Siyəzən, Şabran, Quba, Göygöl, Gədəbəy, Şamaxı, Şirvanda sarı xəbərdarlığa uyğun olaraq fasilələrlə şimal-qərb küləyi əsəcək və küləyin sürəti 13.9-20.7 m/san təşkil edəcək. Bakıda və Abşeron yarımadasında, Naxçıvan MR, Kəlbəcər, Hacıqabul, Neftçala, Mingəçevir, Naftalan, Gəncə, Ağstafa, Ceyrançöl, Goranboy, Bərdə, Tərtər, Yevlax, Ağcabədi, Ağdam, Göyçay, Zərdab, Şəmkir, Daşkəsən, Tovuz, Samux, Şəki, Zaqatala, Oğuz, Qəbələ, Balakən, Qax, Qusar, İsmayıllı, Ağdaş, Ucar, Lerik, Yardımlı, Qobustanda isə narıncı xəbərdarlığa uyğun olaraq fasilələrlə şimal-qərb küləyinin əsəcəyi və küləyin sürətinin 20.8-28.4 m/san olacağı gözlənilir.

Ali Məhkəmədə Bakıda hədə-qorxu ilə tələb etmədə təqsirləndirilən iş adamı Kamal Akimovun barəsindəki qərardan verilən kassasiya şikayəti üzrə məhkəmə iclası başa çatıb. Sozcu.az Pravda.az-a istinadla xəbər verir ki, hakim İlqar Qılıcovun sədrliyi ilə keçirilən prosesdə qərar elan edilib. Qərara əsasən, şikayət təmin edilməyib. Qeyd edək ki, Azərbaycan Cüdo Veteranları Assosiasiyasının prezidenti Azər Əsgərovdan hədə-qorxu yolu ilə 500 min dollar almaqda ittiham olunan iş adamı K.Akimov Bakı Ağır Cinayətlər Məhkəməsinin hökmü ilə bəraət alıb. Prokuror ittiham nitqində Akimovun 11 il azadlıqdan məhrum edilməsini tələb etmişdi. Hökmdən narazı qalan dövlət ittihamçısı apellyasiya protesti verib. Bakı Apellyasiya Məhkəməsi protesti təmin etməyib. İttihama görə, Kamal Akimov Azər Əsgərovu özünə və ailəsinə zərər yetirməklə hədələyərək ondan 500 min dollar alıb. Ona qarşı Cinayət Məcəlləsinin 182.3.2 (hədə-qorxu ilə tələb etmə) maddəsi ilə ittiham olunub, barəsində həbslə bağlı olmayan qətimkan tədbiri seçilib. Təqsirləndirilən şəxs ifadəsində özünü təqsirli bilmədiyini, zərərçəkmişin onu şərlədiyini deyib. K.Akimovun dediyinə görə, A.Əsgərovun “Azimport” şirkəti 10 il əvvəl onun Səbail rayonunda yerləşən 146 kvadratmetrlik obyektini sökərək öz istifadəsinə götürüb. Xatırladaq ki, A.Akimovun Silahlı Qüvvələrin sabiq Baş qərargah rəisi general-polkovnik Nəcməddin Sadıqovun oğlu ilə biznes ortağı olduğu deyilir.

Bakıda şirkətdən 15 min manatdan artıq mənimsəmə olub. Sozcu.az DİN-ə istinadla xəbər verir ki, şirkət Binəqədi rayonu ərazisində fəaliyyət göstərir. Araşdırmalarla şirkətə məxsus soyuducuların satılaraq 15700 manat pulun mənimsənilməsi müəyyən edilib. Bu əməli törətməkdə şübhəli bilinən həmin şirkətdə ekspeditor işləyən 36 yaşlı C.Qubadov saxlanılıb. Araşdırma aparılır.

Rüşvət almaqda təqsirləndirilən Cəbrayıl Rayon Mərkəzi Xəstəxanasının direktoru Anar Zamanov və Beyləqan rayon Mərkəzi Xəstəxanasının həkim-nevroloqu Kifayət Hacıyevanın cinayət işi üzrə məhkəmə prosesi yekunlaşıb. Sozcu.az xəbər verir ki, Lənkəran Ağır Cinayətlər Məhkəməsində hakim Əli Əliyevin sədrliyi ilə keçirilən prosesdə hökm oxunub. Hökmə əsasən, hər iki təqsirləndirilən şəxs 8 il müddətinə azadlıqdan məhrum edilib. Onlar barəsində Cinayət Məcəlləsinin 70-ci (şərti) maddəsi tədbiq edilib. Hər biri barəsində 1 il sınaq müddəti seçilib və şərti cəza verilib. Qeyd edək ki, hər iki şəxsə Cinayət Məcəlləsinin 311-ci (rüşvət alma) maddəsi ilə ittiham verilib. İttihama görə, Cəbrayıl Rayon Mərkəzi Xəstəxanasının direktoru Anar Zamanov və Beyləqan rayon Mərkəzi Xəstəxanasının həkim-nevroloqu Kifayət Hacıyeva vətəndaşlardan rüşvət alaraq onlara əlillik dərəcələri veriblər.

ABŞ-da keçirilən prezident seçkilərində qalib gələn Donald Tramp İranda nüvə silahının yaradılmasının qarşısını almaq üçün Tehrana qarşı qabaqlayıcı hava zərbələri endirmək imkanını nəzərdən keçirir. Sozcu.az xəbər verir ki, bu barədə “Voll Strit Jurnal” mənbələrə istinadən məlumat yayıb. Mənbə bildirib ki, Tramp İsrailin Baş naziri Benyamin Netanyahu ilə son telefon danışığında prezidentlik dövründə İranın nüvə sıçrayışına nail ola biləcəyindən narahat olduğunu və belə bir nəticənin qarşısını almaq üçün variantlar axtardığını bildirib. Qeyd olunur ki, Trampla İran məsələsinin müzakirələrində iki variant nəzərdən keçirilib: “Onlardan biri Yaxın Şərqə daha çox Amerika qoşunu, təyyarə və gəmi göndərməklə hərbi təzyiqin artırılmasını nəzərdə tutur. ABŞ həmçinin İsrailə bunker dağıdan bombalar kimi qabaqcıl silahlar da sata bilər ki, bu da onun hücum gücünü artıracaq və İranın nüvə obyektlərini sıradan çıxarmağa imkan verəcək”.

Hərbi xidmətə çağırış müddətinin yuxarı həddi 35 yaşdan 30 yaşa endirilir. Sozcu.az xəbər verir ki, bu, “Hərbi vəzifə və hərbi xidmət haqqında” qanuna təklif edilən dəyişiklikdə əksini tapıb. Qüvvədə olan qanuna əsasən, çağırışçılar ilkin hərbi qeydiyyata alınmış və ya alınmalı olan müddətli həqiqi hərbi xidmət keçməmiş 18 yaşından 35 yaşınadək Azərbaycan Respublikasının kişi cinsli vətəndaşlarıdır. Dəyişikliyə əsasən, çağırışçılar ilkin hərbi qeydiyyata alınmış və ya alınmalı olan müddətli həqiqi hərbi xidmət keçməmiş 18 yaşından 30 yaşınadək Azərbaycan Respublikasının kişi cinsli vətəndaşları olacaq.

Birləşmiş Ştatların yeni seçilmiş Prezidenti Donald Tramp Ukrayna ordusunun ABŞ-nin verdiyi uzaqmənzilli raketlərlə Rusiyanın dərinliklərinə zərbələr endirməsinə qarşı çıxıb. Sozcu.az APA-ya istinadən bildirir ki, bu barədə o “TIME” jurnalına müsahibəsində danışıb. Tramp vurğulayıb ki, bu addım münaqişə ətrafında vəziyyətin daha da gərginləşməsinə səbəb olacaq. Yeni prezident Ukrayna lideri Vladimir Zelenskinin bu məsələdəki mövqeyini tənqid edib, eləcə də vəzifəsinin icrasında başladıqdan sonra Rusiya-Ukrayna müharibəsini necə başa çatdıracağı barədə fikirlərini bölüşüb: “Bu məqsədlə biz Ukraynaya dəstəkdən Rusiya əleyhinə vasitə kimi istifadə edəcəyik. Müharibənin dayandırılmasının yeganə yolu Ukraynadan dəstəyi əsirgəməməkdən keçir”.

“Xərçəngin müalicəsində bir çox effektiv üsul olduğu halda sağala biləcək xəstələri sağaltmırlar”. Bu sözləri Lent.az-a açıqlamasında onkoloq İbrahim Əsədli deyib. Qeyd edək ki, xərçəng xəstəliyindən ölüm halları günü-gündən artaraq ümumi bir hala çevrilib. Xəstəlik son vaxtlar gəncləri də caynaqları altına alıb. Bir vaxtlar “yaşlıların xəstəliyi” kimi tanınan xərçəng xəstəliyi indi daha çox gənclərdə görülür. Mütəxəssislərin fikrincə, xərçəng 50 yaşdan aşağı insanlar arasında əsl "epidemiya"dır. Bəs qrip kimi yayılan bu xəstəliyin səbəbi nədir? Niyə xərçəng “cavanlaşıb”? "BMJ Oncology" jurnalının məlumatına görə, 50 yaşlı qrupda xərçəng nisbəti 1990-2019-cu illər arasında iki dəfə artıb. Son otuz ildə xərçəngdən ölənlərin sayında təxminən 28 faiz artım müşahidə edilir.  Araşdırmalar göstərir ki, dünyada hər il təxminən 19,5 milyon insana xərçəng diaqnozu qoyulduğu halda, təxminən 10 milyon insan bu xəstəlikdən dünyasını dəyişir. 2050-ci ildə dünyada 35 milyondan çox yeni xərçəng xəstəsinin olacağı təxmin edilir ki, bu da indiki halların sayından 77 faiz çoxdur. Bəs xərçəng xəstəliyi niyə başını alıb gedir?  Onkoloq İbrahim Əsədli xərçəngin yaranmasında obyektiv və subyektiv olmaqla iki əsas səbəb irəli sürüb:  “Obyektiv səbəb xarici ekologiyanın pozulması və insanların həyat tərzinin dəyişilməsidir. Ətraf-mühitdə xeyli faktorlar var ki, insan sağlamlığına mənfi təsir göstərir. İnsanların həyat tərzindəki ən vacib amil olan hərəkət azalıb. Azhərəkətlilik xərçəngin obyektiv səbəblərindən biridir”. Subyektiv səbəblərə gəldikdə isə onkoloq əməkdaşımıza bildirib ki, son yüz ildə xərçəngin müalicəsində 500-dən çox effektli üsul olduğu təqdirdə onları rəsmi protokollara daxil etmirlər:  “Bir çox sağala biləcək xəstələri qəsdən sağaltmırlar. Bunun arxasında isə beynəlxalq imperialistlər dayanır. Onlar əhalini məhv edir”. Onu da deyək ki, xərçəngin bu artımının əsas səbəbləri arasında stress, tütün və spirt istehlakı, yanlış qidalanma, işlənmiş qidalar və sənayeləşmənin yaratdığı hava çirkliliyi də böyük rol oynayır. Ümumdünya Səhiyyə Təşkilatının (ÜST) məlumatına görə, ən çox rast gəlinən növlər ağciyər, qadınlarda döş, kolorektal, prostat və mədə xərçəngi olub. Qlobal məlumatlara görə, bütün yaş qruplarında adambaşına antibiotik istehlakı 2000-2015-ci illər arasında artıb. Bu kimi qlobal fəlakətlərin qarşısını almaq üçün alimlər bu məsələni daha dərindən araşdırmalıdır. Çünki dünya sağlamlıq böhranının astanasındadır.