Ukraynanın özünü qanuni şəkildə müdafiə etmək hüququ var və ölkə hüdudlarından kənara da gücünü yönəldə bilər. Sozcu.az xəbər verir ki, bu sözləri Böyük Britaniya xarici işlər naziri Ceyms Kleverli “Skay Nyus”a deyib. O, Moskvaya dron hücumu ilə bağlı olayları şərh etməkdən imtina edib və bildirib ki, Ukraynanın qanuni müdafiə hüququ var.

Mayın 30-da səhər saatlarında ukraynalılar Moskvaya döyüş dronları ilə kütləvi hava zərbələri endirib. Müxtəlif mənbələrin məlumatına görə, hücumda 10-dan 30-a qədər dron iştirak edib. Moskva meri Sobyaninin sözlərinə görə, bir neçə yaşayış binasına ziyan dəyib, bir neçə nəfər yaralanıb. Moskva vilayətindəki obyektlər də hücuma məruz qalıb. Rusiya Müdafiə Nazirliyi dronların əksəriyyətinin məhv edildiyi haqqında məlumat yayıb. Bu, Rusiyanın Ukraynaya qarşı təcavüzünün başlanğıcından etibarən Moskvaya ilk kütləvi hücumdur. Dünən Ukrayna kəşfiyyatının rəhbəri Kiril Budanov Rusiyanın son günlər Kiyevə endirdiyi kütləvi hava zərbələrinə görə peşman olacağı barədə xəbərdarlıq edib. Göründüyü qədər, Moskvaya bugünki hücum hələ ilk qaranquşdur. 02B Müsavat başqanı Arif Hacılı Moskvanın bombalanmasını şərh edib.   “Putinin rus xalqı qarşısında “böyük xidməti” olaraq 82 il sonra Moskva yenidən bombalandı. Putin və ona dəstək verənlər hələ Rusiyanın başına gələcək çox bəlaların şahidi olacaqlar” – deyə Müsavat başqanı özünün feysbuk səhifəsində yazıb.(Basta)

İran-Azərbaycan sərhədində əməliyyat keçirilib, saxlanılanlar var. Bu barədə Sozcu.az-a Dövlət Sərhəd Xidmətinin (DSX) Mətbuat Mərkəzindən məlumat verilib. Bildirilib ki, may ayının 28-də saat 04 radələrində DSX-nin Sərhəd Qoşunlarının “Horadiz” sərhəd dəstəsinin əməkdaşları tərəfindən Beyləqan rayonunun 1-ci Şahsevən kəndi yaxınlığında yerləşən sərhəd zastavasının xidməti ərazisində İrandan narkotik vasitələri qaçaqmalçılıq yolu ilə gətirmək məqsədilə Azərbaycandan İran istiqamətinə dövlət sərhədini pozmağa cəhd göstərən Beyləqan rayonu 1-ci Şahsevən kənd sakinləri - Quliyev İbrahim Teymur oğlu və Əhmədov Ceyhun Rza oğlu saxlanılmış, üzərlərinə baxış keçirilən zaman snayper silahları üçün nəzərdə tutulan 1 ədəd universal termal nişangahı aşkar edilərək götürülüb. Bundan başqa, may ayının 29-da saat 03:50-də “Horadiz” sərhəd dəstəsinin əməkdaşları tərəfindən Beyləqan rayonunun 2-ci Şahsevən kəndi yaxınlığında yerləşən sərhəd zastavasının xidməti ərazisində, narkotik vasitələri qanunsuz olaraq İrandan Azərbaycan istiqamətinə gətirmək məqsədilə dövlət sərhədini pozan Tərtər rayon sakini Tanrıverdiyev Kamil Firuddin oğlu və Samux rayon sakini İbrahimli Ramiz Akif oğlu saxlanılıb. Saxlanılan şəxslərin üzərlərinə baxış keçirilən zaman ümumi çəkisi 9 kiloqram 842 qram narkotik vasitə (9 kiloqram 812 qram marixuana və 30 qram tiryək) aşkar olunaraq götürülüb. Qeyd olunan faktlar üzrə əməliyyаt-istintaq tədbirləri dаvаm еtdirilir.

"Türkiyədə 2 ildən sonra yenidən seçki keçiriləcək". Sozcu.az xəbər verir ki, bunu İYİ Partiyadan qopmuş ultra-sağçı Zəfər Partiyasının sədri Ümit Özdağ "Halk TV"nin efirində qonaq olarkən deyib. "Bu seçkilərin 2 il üçün olduğunu düşünürəm. Hökumət 5 il davam gətirməyəcək. Bələdiyyə seçkilərindən sonra yenidən ümumi seçkilər üçün təqvim başlayacaq", - o bildirib. Özdağ 2024-cü ilin əvvəllərində baş tutacaq bələdiyyə seçkilərindən də danışıb. "Milliyyətçi liqadan söhbət gedir. Məsələn, yerli seçkilərdə X bir namizədi biz, İYİ Partiya və MHP hansısa vilayətdə eyni namizədi dəstəkləyə bilərik. Bir az çətin olar, bilmirəm, amma ola bilər. Eyni şey MHP ilə də ola bilər", - Özdağ əlavə edib.

Mayın 30-da Azərbaycan Respublikasının Prezidenti İlham Əliyevin İsrail Dövlətinin Prezidenti İshaq Hersoq ilə təkbətək görüşü başlayıb. Sozcu.az xəbər verir ki, bu barədə Prezidentin mətbuat xidməti məlumat yayıb.

“Elxan oğlundan sonra ayağa qalxa bilmədi. Hər gün qəbiristanlığa gedirdi. Yüksək səviyyədə əməliyyat olundu. Biz onun sağalacağına ümid edirdik. Amma o, elə oğlunun adını çəkib, “Samir”, – deyirdi. Axırda getdi Samirin yanına…”. Sozcu.az xəbər verir ki, bu sözləri Baku.ws-ə açıqlamasında hazırda Elxan Qasımovun vida mərasimində iştirak edən Xalq artisti Rasim Balayev deyib. Aktyor bu gün həm də yaxın dostunu itirdiyini bildirib. Rasim Balayev Elxan Qasımovun Azərbaycan incəsənəti və mədəniyyəti üçün önəmli fiqur olduğunu da vurğulayıb. Məlumat üçün bildirək ki, bu ilin mayında 78 yaşlı Elxan Qasımovun səhhətində problemlər yaranıb. O, bir müddət əvvəl qarın aortası anevrizması diaqnozu ilə reanimasiyaya yerləşdirilmişdi. Əməkdar artist bədii, sənədli filmlərin, “Mozalan” süjetlərinin müəllifidir. Elxan Qasımov bu gün Xırdalan qəbiristanlığında dəfn olunacaq.

Azərbaycanda kənd təsərrüfatı məhsullarının qiyməti yenidən müzakirə mövzusu olub. Xüsusilə, mövsüm meyvələri və tərəvəzlərin bazarda baha qiymətə satılması narazılıq doğurub. Bəzi meyvələrin mövsümü başa çatsa da, qiyməti baha olduğu üçün hələ də ondan dadmayan insanlar var.  Bəs rayonlarda vəziyyət necədir? Bakı bazarlarında “od qiyməti”nə satılan kənd təsərrüfatı məhsulları tarlada, bağda, bostanda hansı qiymətə müştərilərə təklif olunur?  Kəndli min bir əziyyətlə yetişdirdiyi məhsuldan yetərincə qazanc götürə bilirmi?  Yenisabah.az problemi araşdırarkən bir o qədər də xoş olmayan mənzərə ilə qarşılaşıb. Məlum olub ki, paytaxt bazarlarında, o cümlədən, Gəncə, Sumqayıt və digər böyük şəhərlərdə alıcılara xeyli baha qiymətə təklif olunan meyvə-tərəvəz heç də kəndliyə bol qazanc gətirmir. Kəndlinin min bir araya-ərsəyə gətirdiyi məhsuldan ən çox faydalanan aradakı işbazlar, dəllallar olur.  Apardığımız araşdırmalar nəticəsində məlum olub ki, ötən gün Bakıda 1 kiloqramı alıcılara 4 manata təklif olunan göycə alçası Göyçay bazarında müştərilərə 50 qəpikdən təqdim olunur. Fermer S.Məmmədov Göyçayda ezamiyyətdə olan müxbirimizə deyib ki, onlar il ərzində çəkdikləri əziyyətin bəhrəsini görə bilmirlər. Onun sözlərinə görə, əziyyət çəkən, tər tökən onlar olsa da, məhsulun xeyrini aradakı işbazlar görür:  “İndi ucuz işçi qüvvəsi tapmaq çətindir. Fəhlə alçanın bir kiloqramını 30 qəpiyə dərir. Bağdan, hətta bazardan göycə alçasının 1 kiloqramını bizdən 50 qəpiyə alırlar. Qablaşdırma, yeşik və nəqliyyat xərcini də üstünə gələndə hər kiloqram alçadan bizə cəmi 10 qəpik qalır. Bu isə heç suvarmaya çəkilən xərci belə ödəmir”.  Müsahibimiz deyib ki, yeganə çıxış yolu iritutumlu soyuducular yaratmaq və onları ucuz qiymətə fermerlərə kirayə verməkdir. O, Kənd Təsərrüfatı Nazirliyini fermerlərin əlində qalan tonlarla məhsulu almağa səsləyib:  “Hamımız borcun içində batırıq. Belə getsə, baltanı əlimə alıb bağdakı alça ağaclarının hamısını kəsəcəyəm”.  Qeyd edək ki, digər kənd təsərrüfatı məhsullarının qiymətində də kəskin ucuzlaşma müşahidə edilir. Hazırda Cəlilabadda kartofun 1 kiloqramı 20, xiyarın bir kiloqramı isə 10 qəpiyə müştərilərə təklif olunur. Xaçmazda pomidorun 1 kiloqramı 40-50 qəpiyə, gilas isə 1 manata satılır. Kənd təsərrüfatı məhsullarının yerlərdə ucuz qiymətə satılması fermerlərin ciddi narazılığına səbəb olur. 

Artıq yeni aya qədəm qoyuruq. Bəs, iyun ayı astrologiya baxımından bürclərə nə gətirir? Yayın ilk ayında ulduz falınız sizə nə deyir? Astroloqların araşdırmalarına istinadən bu sualların cavabını təqdim edirik: Qoç İyunun birinci yarısında səyahət, təhsil, hüquq, xaricə dair qərarlar verə bilərsiniz. Sadalanan məsələlərlə bağlı proseslər sona çatacaq. Nəticə gözlədiyinizdən daha yaxşı ola bilər. Sevgidə, uşaqlarda, bayramlarda, əyləncələrdə şanslı olduğunuz bir dövrdə olacaqsınız. Karyera həyatınızda bəzi problemlər yarana bilər. Buğa Dəyərli buğa, iyunun ilk on beş günü maliyyə, borclar, vergilər, ödənişlər və miras məsələlərində nəticə verə bilər. Yeni ev ala, investisiyalar yatıra bilərsiniz. Ev, ailə və daşınmaz əmlak məsələlərində uğurlar sizinlə olacaq. Dəyişiklik baş verə bilər. Əkizlər Sevimli əkizlər, iyunun birinci yarısında tərəfdaş, evlilik, ortaqlıq haqqında qərar qəbul etmə prosesinə girə bilərsiniz. Bu dövrdə ünsiyyətdə sərt dildən istifadə tövsiyə olunmur. Əgər söhbət yaxın ətrafınız, təhsil və səyahətlərdən gedirsə, şans sizinlə olmağa başlayacaq. Əgər subaysınızsa, yeni sevgi ön plana çıxa bilər. Xərçəng Hörmətli xərçəng, iyunun birinci yarısında iş həyatınız, işçiləriniz və ya sağlamlığınızla bağlı bəzi proseslər sona çatacaq. Qətiyyətli münasibət göstərə bilərsiniz. Pul məsələsində diqqətli olmaq məsləhətdir. Xarici səfərlərdə, təhsildə, səyahətdə və hüquqi məsələlərdə xəyal qırıqlığı və uğursuzluqlar ön plana çıxa bilər. Şir Hörmətli şir, iyun ayına tam ayın enerjisi ilə başlayırıq. Tam ay enerjisi ilə qaranlıq məsələlər görünəcək. Sevgi, uşaqlar, bayramlar, hobbiniz ön plana çıxa bilər. Bu məsələlərlə bağlı qərarlar qəbul edə bilərsiniz. Enerjiniz yüksək olacaq. Xərcləriniz arta bilər. Qız Hörmətli qız, iyunun ilk on beş günündə eviniz, ailəniz, karyera həyatınızla bağlı sonluqlar və dəyişikliklər ola bilər. Qərar verməkdə çətinlik çəkə bilərsiniz. Gizli sevgilər gündəminizə gələ bilər. Tərəfdaş və ya tərəfdaşlarla məyusluq yarana bilər. Tərəzi Hörmətli tərəzi, iyunun ilk on beş günündə ailə, təhsil, səyahət, yerdəyişmə məsələləri gündəminizə gələ bilər. İş həyatınızda bəzi problemlərlə qarşılaşa bilərsiniz. Sosial dairəniz genişlənə, yeni insanlar həyatınıza qoşula bilər. Sevgi üçün şans sizinlə olacaq. Əqrəb Hörmətli əqrəb, iyunun birinci yarısında pul, qazanc, maliyyə məsələləri ilə əlaqədar qərar mərhələsinə girə bilərsiniz. Xərcləriniz hobbilər, şans oyunları, birja, bayramlar səbəbindən çox arta bilər. Pul itkiləri baş verə bilər. Karyera həyatınızda yaxşı bir dövrə qədəm qoyacaqsınız. Uğurlar sizinlə olacaq. Oxatan Hörmətli oxatan, iyunun birinci yarısında fiziki dəyişiklik gözlənilir. Ortaqlıq-evlilik münasibətləriylə bağlı qərarlar verə bilərsiniz. Ailə və ev məsələlərində qərarsızsınız. Bəzi xəyal qırıqlıqları gerçəkləşə bilər. Xaricdə, səyahətdə, təhsildə və hüquqda şans sizinlə olacaq. Çox səyahət edə bilərsiniz. Əgər təksənsə, sevgi səni səyahət, təhsil, hüquq sahələrində tapa bilər. Oğlaq Hörmətli oğlaq, iyunun birinci yarısında ruhani işlərlə məşğul ola bilərsiniz. Ünsiyyət və səyahətlə bağlı problemlər gündəminizə gələ bilər. Maliyyə məsələlərində diqqətli olmağı məsləhət görürəm. Maliyyə baxımından şanslar sizinlə olmağa başlayacaq. Əgər təksənsə, sevgi üçün yaxşı irəliləyişlər baş verə bilər. Dolça Hörmətli dolça, siz iyun ayının ən şanslısısınız. İlk on beş gündə sosiallaşa bilərsiniz. İcma-birliklərdə ön plana çıxa bilərsiniz. Sosial həyatınızla əlaqədar xərcləriniz arta bilər. Sevgi, evlilik və digər tərəfdaşlıqlarda şans sizinlə olacaq. Balıq Hörmətli balıqlar, iyunun birinci yarısında karyera və iş həyatınızla bağlı mühüm qərarlar verə bilərsiniz. Bəzi xəyal qırıqlıqları gerçəkləşə bilər. Məsuliyyətləriniz arta bilər. İş həyatınızda və ya sağlamlığınızda şans sizinlə olacaq./Azxeber.com

Dövlət büdcəsindən maliyyələşən qurumlarda çalışan şəxslərin yaş məhdudiyyətinin 65 yaşdan 70 yaşa qədər qaldırılması təklif edilib. Bu təkliflə Milli Məclisin Əmək və sosial siyasət komitəsinin sədri Musa Quliyev çıxış edib. O qeyd edib ki, əgər razılıq olsa Əmək Məcəlləsinə dəyişiklik layihəsi hazırlanaraq parlamentin payız sessiyasında müzakirəyə təqdim edilə bilər./Report

Bir neçə gün öncə Türkiyədə saxlanılan azərbaycanlı reper Asya Əlizadə (Alizaude) başına gələnlər barədə açıqlama verib. Sozcu.az Olay-a istinadən xəbər verir ki, sənətçi bu barədə instaqramda yazıb: “Tantunilərim, öncəliklə sizi çox sevdiyimi bilməyinizi istəyirəm. Nə olsa da, həmişə sizinlə olacağam. 25 mayda çox sevimli və şirin polislər məni evimdə nəzarətə götürdülər. Haqqımda hüquqi proses başladıldı. Öncə prokurorluqda ifadə verdim. Hakim günahsız olduğumu anlayıb, azadlığa buraxdı. Sonra isə polis şöbəsində 2 gün keçirdim. Silivriyə apardılar. Orada günahsız yerə 3 gün saxlanıldım. Orada qadınları uşaqları ilə iyrənc vəziyyətdə saxlayırlar. Hamı da onlar haqda xəbərsizdir. Jurnalistlər, mənim mahnı sözlərimlə bağlı xəbərlər yazmaq, Rusiyadakı anama, atama yanlış xəbərlər ötürmək əvəzinə Silivridəki vəziyyətdən yazsanız, əla olar. Türkiyədən heç yerə getməyəcəyəm. Mən pis bir iş görməmişəm. Haqqımda çıxan xəbərlərə inanmayın”. Qeyd edək ki, Asyanın mahnılarında və kliplərində narkotik təbliğatı apardığı üçün saxlanıldığı bildirilmişdi.

Ukrayna müharibənin 461-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 207 440 hərbçi, 3802 ədəd tank, 7469 ədəd zirehli döyüş maşını, 3445 ədəd artilleriya sistemi, 575 ədəd RYAS (reaktiv yaylım atəş sistemi), 332 hava hücumundan müdafiə sistemi, 313 ədəd hərbi təyyarə, 298 ədəd helikopter, 6219 ədəd avtomobil texnikası, 3092 ədəd PUA, 1107 qanadlı raket, 18 gəmi/qayıq, 454 xüsusi avadanlıq itirib.

Pensiya yaşı kişilərə 62, qadınlar üçün 59 yaş həddi müəyyənləşsin. Sozcu.az xəbər verir ki, bunu Milli Məclisin bugünki plenar iclasında deputat Tahir Kərimli deyib. O qeyd edib ki, pensiya yaşı mütləq aşağı salınmalıdır: “Amma pensiyaya çıxmağı vətəndaşın özünün seçiminə buraxmaq lazımdır. Bir çox ölkədə pensiyaya çıxmaq üçün yaş həddi bizdən aşağıdır. Ona görə də bu məsələyə bir qədər diqqətlə yanaşmalıyıq”.

ABŞ Ukraynaya ATACMS uzaqmənzilli raketləri ötürmək məsələsini hələ də nəzərdən keçirir. Sozcu.az xəbər verir ki, bu sözləri ABŞ Prezidenti Co Bayden deyib. Bayden Rusiyanın Kiyevə hava hücumlarının artmasını şərh edərkən bunların sürpriz olmadığını bildirib: “Buna görə də biz Ukraynanı ehtiyacı olan hər şeylə təmin etməyə davam etməliyik”.

Azərbaycan Mərkəzi Bankının bu günə olan rəsmi valyuta məzənnələrinə əsasən, ABŞ dollarının məzənnəsi dəyişməyərək 1,7000 manat olub. Sozcu.az xəbər verir ki, avronun məzənnəsi 0,3 % azalaraq 1,8199 manat, Rusiya rublunun məzənnəsi isə dəyişməyərək 0,0212 manat təşkil edib. Valyuta Məzənnə 1 ABŞ dolları 1,7000 1 Avro 1,8199 1 Rusiya rublu 0,0212 1 Avstraliya dolları 1,1080 1 Argentina pesosu 0,0071 1 Belarus rublu 0,6735 1 Braziliya rialı 0,3388 1 BƏƏ dirhəmi 0,4629 1 Cənubi Afrika randı 0,0863 100 Cənubi Koreya vonu 0,1286 1 Çexiya kronu 0,0768 100 Çili pesosu 0,2110 1 Çin yuanı 0,2397 1 Danimarka kronu 0,2443 1 Gürcü larisi 0,6576 1 Honq Konq dolları 0,2170 1 Hindistan rupisi 0,0206 1 İngilis funt sterlinqi 2,1004 100 İndoneziya rupiası 0,0114 100 İran rialı 0,0040 1 İsveç kronu 0,1569 1 İsveçrə frankı 1,8800 1 İsrail şekeli 0,4556 1 Kanada dolları 1,2503 1 Küveyt dinarı 5,5261 1 Qazaxıstan tengəsi 0,0038 1 Qırğız somu 0,0194 100 Livan funtu 0,0113 1 Malayziya rinqqiti 0,3686 1 Meksika pesosu 0,0966 1 Moldova leyi 0,0955 1 Misir funtu 0,0550 1 Norveç kronu 0,1528 100 Özbək somu 0,0149 1 Polşa zlotası 0,4028 1 Sinqapur dolları 1,2554 1 Səudiyyə Ərəbistanı rialı 0,4533 1 SDR (BVF-nin xüsusi borcalma hüquqları) 2,2638 1 Türk lirəsi 0,0841 1 Tayvan dolları 0,0556 1 Tacik somonisi 0,1561 1 Yeni türkmən manatı 0,4857 1 Ukrayna qrivnası 0,0460 100 Yapon yeni 1,2113 1 Yeni Zelandiya dolları 1,0269 Qızıl (1 unsiya) 3294,8975 Gümüş (1 unsiya) 39,2047 Platin (1 unsiya) 1754,7910 Palladium (1 unsiya) 2438,0550

Bakıda kafedə dava düşüb, ər-arvad və gənc oğlan bıçaqlanıb. Hadisə mayın 28-də Binəqədi rayonu, M.Rəsulzadə qəsəbəsi, Z.Qəmbərov küçəsi, döngə 1-də yerləşən adsız kafedə qeydə alınıb. Belə ki, kafedə müştəri qismində olan Ağacabədi rayon sakini, 1998-ci il təvəllüdlü Quliyev Elxan Elşən oğlu aralarında baş vermiş mübahisə zamanı digər masada əyləşən Cəbrayıl rayon sakini, 1972-ci il təvəllüdlü Səfərov Səməndər Zəxara oğluna, həyat yoldaşı, Q.Səfərovana və S.Səfərovun bacısı oğlu, 2003-cü il təvəllüdlü Məmmədli İlkin Elşən oğluna bıçaq xəsarətləri yetirib. Faktla bağlı Binəqədi Rayon Polis İdarəsində Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə cinayət işi başlanılıb, E.Quliyev şübhəli şəxs qismində saxlanılıb.

Bakıda 15 yaşlı qız itkin düşüb. “Report”un xəbərinə görə, hadisə mayın 27-də paytaxtın Binəqədi rayonu, Binəqədi qəsəbəsində qeydə alınıb. Belə ki, 2008-ci il təvəllüdlü Aişən Zaur qızı Abbaslı evdən naməlum istiqamətə gedib və bir daha geri qayıtmayıb. Faktla bağlı Binəqədi Rayon Polis İdarəsinin 43-cü Polis Bölməsində araşdırma aparılır. Analoji hadisə Gəncə şəhəri, Ü.Hacıbəyov küçəsində də qeydə alınıb. Şəhər sakini, 2007-ci il təvəllüdlü Aytən Mustafa qızı Orucova yaşadığı evdən çıxaraq naməlum istiqamətə gedib və bir daha geri qayıtmayıb. Faktla bağlı Gəncə Şəhər Baş Polis İdarəsinin 2-ci Polis Şöbəsində araşdırma aparılır.

Türkiyənin Samsun şəhərində axşam saatlarında təsirli olan dolu və leysan həyatı iflic edib. Vezirköprü rayonunda leysan nəticəsində meydana gələn sel səbəbindən avtomobillər yollarda qalıb, evləri, iş yerlərini su basıb. Yerli sosial şəbəkələrdə sel sularının bir avtomobili aparmasının görüntüləri yayılıb. Daşqın nəticəsində bir çox əkin sahələri, körpülər zədələnib.

Mayın 29-u saat 19:00-dan mayın 30-u saat 03:55-dək Ordumuzun mövqeləri ümumilikdə 19 dəfə fasilələrlə atəşə tutulub. Bununla bağlı Azərbaycan Müdafiə Nazirliyi məlumat yayıb.  Bunlardan 4-ü Ermənistan silahlı qüvvələrinin bölmələrinin İstisu, Tovuzqala rayonunun Çinarlı və Aygepar, Basarkeçər rayonunun Zərkənd yaşayış məntəqələri istiqamətlərində yerləşən mövqelərindən Azərbaycan Ordusunun Tovuz rayonunun Əsrik Cırdaxan və Əlibəyli, Kəlbəcər rayonunun Dəmirçidam və İstisu yaşayış məntəqələri istiqamətlərində yerləşən mövqelərini atıcı silahlardan atəşə tutması ilə baş verib. Digər 15 insident isə Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvləri tərəfindən Ordumuzun Ağdam, Şuşa və Kəlbəcər rayonları istiqamətlərində yerləşən mövqelərinin atəşə tutulması ilə qeydə alınıb. Bölmələrimiz tərəfindən qeyd olunan bütün istiqamətlərdə adekvat cavab tədbirləri görülüb.

İsrail Dövlətinin Prezidenti İsxak Hersoq mayın 30-da Azərbaycan Respublikasına rəsmi səfərə gəlib. Sozcu.az xəbər verir ki, hər iki ölkənin Dövlət bayraqlarının dalğalandığı Heydər Əliyev Beynəlxalq Aeroportunda ali qonağın şərəfinə fəxri qarovul dəstəsi düzülüb. İsrail Prezidenti İsxak Hersoqu və xanımı Mixal Hersoqu Azərbaycanın Baş nazirinin birinci müavini Yaqub Eyyubov, xarici işlər nazirinin müavini Fariz Rzayev və digər rəsmi şəxslər qarşılayıblar. 08:34 İsrail Prezidenti İsxak Hersoq Azərbaycana səfərə yola düşüb. Moderator.az xəbər verir ki, İsrail Prezidenti bu barədə “Twitter” hesabında yazıb. O, bunun mühüm dövlət səfəri olduğunu qeyd edib. İsxak Hersoq səmimi dəvətə görə Azərbaycan Prezidenti İlham Əliyevə təşəkkür edib. “Azərbaycan mühüm ölkədir və əminəm ki, mənim səfərim əməkdaşlığın dərinləşməsinə yol açacaq. Biz ümumi yeni imkanları və çağırışları da bölüşürük”, - deyə İsrail Prezidenti qeyd edib.

Ədliyyə Nazirliyinin Penitensiar xidmətin əməliyyat aparatının həyata keçirdiyi əməliyyat-axtarış tədbirləri nəticəsində Bakı istintaq təcridxanasına narkotik və psixotrop maddələrin keçirilməsi cəhdinin qarşısı alınıb. Bu barədə Sozcu.az-a xidmətin ictimaiyyətlə əlaqələr şöbəsindən məlumat verilib. Bildirilib ki, Cinayət Məcəlləsinin 234.4.3-cü maddəsi ilə təqsirli bilinərək həbs edilmiş şəxs Rasim Arif oğlu Əsgərova sovqat gətirmiş qohumu - Gəncə şəhər sakini Jalə Məhərrəm qızı Kazımovanın əşyalarına və üzərinə baxış keçirilən zaman sellofan paketin alt hissəsində xüsusi üsulla gizlədilmiş ümumi çəkisi 4,633 qram olan psixotrop maddə - metamfetamin, ümumi çəkisi 3,419 qram olan narkotik maddə - heroin, ümumi çəkisi 0,44 qram olan narkotik maddə - marixuana, əynindəki şalvarın bel hissəsində xüsusi üsulla gizlədilmiş 2 ədəd tibbi şpritsin içərisində ümumi çəkisi 0,5 ml olan heroin məhlulu aşkar olunub. Faktla bağlı araşdırma aparılır.

Milli Məclisin yaz sessiyası üçün növbəti plenar iclası başlayıb. Sozcu.az xəbər verir ki, Sahibə Qafarovanın sədrliyi ilə keçirilən iclasın gündəliyinə 28 məsələnin müzakirəsi daxil edilib. Həmin məsələlər aşağıdakılardır: 1. “Azərbaycan Respublikası Milli Məclisinin parlamentlərarası əlaqələr üzrə işçi qruplarının rəhbərlərinin seçilməsi haqqında” Milli Məclisin qərarında dəyişikliklər edilməsi barədə Milli Məclisin qərar layihəsi 2. “Türk İnvestisiya Fondunun yaradılması haqqında” Sazişin təsdiq edilməsi barədə qanun layihəsi 3. “Minatəmizləmə sahəsində xidmətlərə görə” medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” qanunda dəyişiklik edilməsi barədə qanun layihəsi (üçüncü oxunuş) 4. “İctimai iştirakçılıq haqqında” qanunda dəyişiklik edilməsi barədə qanun layihəsi (üçüncü oxunuş) 5. “Dövlət qulluğu haqqında” qanunda dəyişiklik edilməsi barədə qanun layihəsi (üçüncü oxunuş) 6. “Yetkinlik yaşına çatmayanların baxımsızlığının və hüquq pozuntularının profilaktikası haqqında” qanunda dəyişiklik edilməsi barədə qanun layihəsi (üçüncü oxunuş) 7. Ailə Məcəlləsində dəyişiklik edilməsi haqqında qanun layihəsi (üçüncü oxunuş) 8. Mülki Məcəllədə dəyişiklik edilməsi haqqında qanun layihəsi (üçüncü oxunuş) 9. “Sosial müavinətlər haqqında” qanunda dəyişiklik edilməsi barədə qanun layihəsi (üçüncü oxunuş) 10. “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” qanunda dəyişiklik edilməsi barədə qanun layihəsi (üçüncü oxunuş) 11. “Yaşayış yeri və olduğu yer üzrə qeydiyyat haqqında” qanunda dəyişiklik edilməsi barədə qanun layihəsi (üçüncü oxunuş) 12. “Sosial xidmət haqqında” qanunda dəyişiklik edilməsi barədə qanun layihəsi (üçüncü oxunuş) 13. “Bələdiyyə torpaqlarının idarə edilməsi haqqında” qanunda dəyişiklik edilməsi barədə qanun layihəsi (üçüncü oxunuş) 14. Azərbaycan Respublikasının 2002-ci il 15 mart tarixli 274-IIQ nömrəli Qanunu ilə təsdiq edilmiş “Bələdiyyə torpaqlarının ayrılmasına dair sənədlərin hazırlanması və razılaşdırılması qaydaları haqqında Əsasnamə”də dəyişiklik edilməsi barədə qanun layihəsi (üçüncü oxunuş) Ətraflı 15. “Daşınmaz əmlakın dövlət reyestri haqqında” qanunda dəyişiklik edilməsi barədə qanun layihəsi (üçüncü oxunuş) 16. “Azərbaycan Respublikasının Şəhərsalma və Tikinti Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında” qanunda dəyişiklik edilməsi barədə qanun layihəsi (üçüncü oxunuş) 17. Şəhərsalma və Tikinti Məcəlləsində dəyişiklik edilməsi haqqında qanun layihəsi (üçüncü oxunuş) 18. İnzibati Xətalar Məcəlləsində dəyişiklik edilməsi haqqında qanun layihəsi (üçüncü oxunuş) 19. Cinayət Məcəlləsində dəyişiklik edilməsi haqqında qanun layihəsi (üçüncü oxunuş) 20. “Elektroenergetika haqqında” qanunda dəyişiklik edilməsi barədə qanun layihəsi (üçüncü oxunuş) 21. “Qaz təchizatı haqqında” qanunda dəyişiklik edilməsi barədə qanun layihəsi (üçüncü oxunuş) 22. “Su təchizatı və tullantı suları haqqında” qanunda dəyişiklik edilməsi barədə qanun layihəsi (üçüncü oxunuş) 23. “Kosmik fəaliyyət haqqında” qanun layihəsi (birinci oxunuş) 24. Vergi Məcəlləsində dəyişiklik edilməsi haqqında qanun layihəsi (birinci oxunuş) 25. “Gömrük tarifi haqqında” qanunda dəyişiklik edilməsi barədə qanun layihəsi (birinci oxunuş) 26. “Kəşfiyyat və əks-kəşfiyyat fəaliyyəti haqqında” qanunda dəyişiklik edilməsi barədə qanun layihəsi (birinci oxunuş) 27. “Hərbi vəzifə və hərbi xidmət haqqında” qanunda dəyişiklik edilməsi barədə qanun layihəsi (birinci oxunuş) 28. Mülki Məcəllədə dəyişiklik edilməsi haqqında qanun layihəsi (birinci oxunuş)

“Son illər Azərbaycanın istehlak bazarında saxta məhsulların satışı ilə bağlı bəzi məlumatlar əldə edirik. Hətta ofisimizdə bunlardan bir neçəsinin nümunəsi də var”.  Bu sözləri Bizim.Media-ya açıqlamasında Azad İstehlakçılar Birliyinin sədri Eyyub Hüseynov deyib.  O bildirib ki, Ukraynada müharibə getdiyi üçün hazırda Azərbaycana duz idxal olunmur. Bununla belə, müsahibimiz qeyd edib ki, bazarda Ukraynadan gətirildiyi iddia edilən duzların satışına da rast gəlinir:  “Onun üzərində guya Ukraynada istehsal olunduğu, markalandığı və yodlaşdırıldığı barədə məlumatlar əks olunub. Əslində isə elə deyil və daha çox İran duzuna oxşayır. Bu da onu göstərir ki, İran ölkəmizə “Ukrayna məhsulu” adı ilə saxta duz idxal edir. Ofisdə başqa bir istehsalçıya məxsus duz da var. İstehsalçı naməlum mənbədən gətirdiyi duzu “yodlaşdırılmış məhsul” kimi satışa çıxarır, amma tərkibində 1 faiz də olsun yod yoxdur.  Bazarda yerli duz göllərindən yığılmış və üzərinə “Yodludur” sözü yazılmış, əslində yod olmayan digər duz məhsullarının da satışı təşkil olunur. Bundan başqa, şampunlar, İrandan gətirilmiş, üzərində Azərbaycan dilində məlumatlar olmayan və tərkibində təhlükəli maddələr olan yuyucu vasitələr və digər naməlum məhsullar satılır”.  Qeyd edək ki, son vaxtlar mətbuatda və sosial şəbəkələrdə saxta düyü məhsullarının satılması ilə bağlı məlumatlar və videogörüntülər dolaşmaqdadır.  Bu məlumatları təkzib edən Eyyub Hüseynov Azərbaycanda süni düyü məhsullarının satılmadığını və ölkəyə belə bir məhsulun daxil olmadığını bildirib: “Dünyada belə bir texnologiyadan istifadə olunur, amma ölkəmizdə buna icazə verilmir. Bizdə hər düyünün öz dəmləmə xüsusiyyətləri var. Əgər düyü düzgün dəm almırsa, o dəqiqə bunu bəzi dövlət qurumlarınınn boynuna yıxırlar ki, gətirdiyiniz məhsullar keyfiyyətsiz, yaxud da saxtadır. Kim belə bir halla qarşılaşırsa və aldığı düyü sünidirsə, ofisimizə yaxınlaşsın. Əgər bizim laboratoriyada məhsulun saxta olduğunu görsək, həmin şəxsə 100 manat verəcəyəm. Yaxşı olardı ki, əhali az təmizlənmiş düyü məhsullarına üstünlük versin. Parıldayan və cilalanmış düyünün qidalılığı az olduğu üçün almasınlar. Nisbətən sarı və yerli düyü yaxşı məhsul sayılır”. Bütün qida məhsullarının Azərbaycan Qida Təhlükəsizliyi Agentliyinin (AQTA) nəzarəti altında satışa çıxarıldığını deyən AİB sədri bildirib ki, xaricdən ölkəyə heç bir məhsul daxil olmur:  “Saxta məhsul ona deyirlər ki, hansısa şirkətin nişanı ilə başqa məhsulu satışa çıxarırlar. Bu da saxta məhsul adlanır. AQTA yalnız məhsulların təhlükəsizliyinə cavabdehlik daşıyır. Ölkədə məhsulun keyfiyyətinə məsul olan dövlət orqanı isə hələ də yoxdur”.  Onun sözlərinə görə, rəhbəri olduğu quruma Ukraynadan və Rusiyadan gətirilən ət məhsullarının tərkibi və keyfiyyəti ilə bağlı istehlakçılardan çoxlu suallar daxil olur:  “Məlumdur ki, ölkə əhalisinin çoxu xaricdən gətirilən ət məhsullarına üstünlük verirlər ki, bununla da çox böyük səhvə yol verirlər. Yerli ət məhsulları isə daha ekoloji təmiz və istehlaka yararlıdır. Yaxşı olardı ki, istehlakçılar ət alarkən üzərindəki etiketlərə və nişanlara etibar etməsinlər”.  Belə bir sual yaranır: Əgər AQTA istehlak bazarına nəzarət edirsə, o zaman belə məhsullar hansı yollarla satışa çıxarılır?  Bu məhsulların kənardan gətirilmədiyini söyləyən ekspertin sözlərinə görə, onlar ölkə daxilində, hətta Bakıda hazırlanırlar: “Düz deyirsiniz, gərək AQTA bu məsələyə də nəzarət etsin, amma təəssüf ki, qurumun nəzarətindən yayınan belə hallar da baş verir”. 

V ixtisas qrupu üzrə ali təhsil müəssisələrinin və tam (11 illik) orta təhsil bazasında orta ixtisas təhsili müəssisələrinin xüsusi qabiliyyət tələb edən ixtisasları üzrə qabiliyyət imtahanlarında iştirak etmək istəyən abituriyentlərin və subbakalavrların elektron qeydiyyatı başa çatır. Bu barədə Sozcu.az-a Dövlət İmtahan Mərkəzindən məlumat verilib. Teatr, kino və xoreoqrafiya sənəti, musiqi sənəti və təsviri sənət istiqamətlərinin komissiyaları üzrə qeydiyyat bu gün saat 23:59-dək davam edəcək. Abituriyentlər (subbakalavrlar) müvafiq keçidə daxil olub qeydiyyatdan keçə bilərlər. Bədən tərbiyəsi və idman istiqaməti, həmçinin ümumi (9 illik) orta təhsil bazasında orta ixtisas təhsili müəssisələrinin xüsusi qabiliyyət tələb edən ixtisasları üzrə qeydiyyat isə 5 iyun saat 23:59-da bitəcək. Musiqi sənəti istiqamətinin qabiliyyət imtahan komissiyaları üzrə göstərilən tarixə qədər qeydiyyatdan keçməyən və ya nəzəriyyə fənləri imtahanlarında iştirak edib müsbət qiymət almayan abituriyentlər digər komissiyaların ixtisas imtahanlarında iştirak etmək üçün aparılacaq növbəti qeydiyyat mərhələsinə buraxılmayacaqlar. Seçilən əlavə komissiyaların nəzəriyyə fənləri abituriyentin imtahan verdiyi nəzəriyyə fənlərinə uyğun olmalıdır.

"Qarabağ" Azərbaycan Premyer Liqasında 2022/2023 mövsümünün qalibi olub. Bu, "köhlən atlar"ın tarixində 10-cu çempionluğudur. Ağdam təmsilçisinin futbolçusu Bəhlul Mustafazadə mükafatlandırma mərasimindən sonra fikirlərini bölüşüb. 26 yaşlı müdafiəçi "Report"a müsahibəsində UEFA Çempionlar Liqasındakı hədəflərindən də bəhs edib. - Növbəti dəfə Premyer Liqada qalib oldunuz. Təəssüratlarınız necədir? - Bu, mənim ikinci çempionluğumdur. Belə qələbələr məsuliyyətimizi daha da artırır. Növbəti ildə ən azı eyni nəticəni təkrarlamağa çalışacağıq. Çox ağır mövsüm keçirdiyimizi düşünürəm. Hər üç cəbhədə mübarizə apardıq. Məncə, avrokuboklarda çox yaxşı təsir bağışladıq. Qarşıdakı mövsümdə bunu davam etdirmək istəyirik. - Qısa müddətdən sonra avrokuboklarda yeni mövsüm başlayacaq. Qarşınıza UEFA Çempionlar Liqasının qrup mərhələsinə düşmək hədəfi qoyulubmu? - Bu turnirdə oynayırıqsa, minimum hədəfimiz qrup mərhələsinə vəsiqə qazanmaq olmalıdır. Amma rəhbərlikdən komandaya bu barədə hər hansı söz deyilməyib. Lakin biz futbolçular olaraq maksimum nəticə qazanmağa çalışacağıq. - Ramil Şeydayev, Filip Ozobiç kimi futbolçular "Qarabağ"ı tərk edir. Sizcə, onların yerini doldurmaq mümkün olacaq? - Hər ikisi uzun müddət burada çıxış ediblər. Sözsüz ki, onların yoxluğu hiss ediləcək. Amma "Qarabağ" elə bir komandadır ki, burada əsas olan sistemdir. Klub tarixində bu kimi hallar dəfələrlə təkrarlanıb. Kimlərsə gedib, digər oyunçular gəliblər və heç də pis təsir bağışlamayıblar. Yeni belə olacağını düşünürəm. - Öz çıxışınız barədə nə deyə bilərsiniz? Artıq sizi "Qarabağ"ın əsas müdafiəçisi hesab etmək olarmı? - Əlbəttə ki, xeyr. Bura elə bir klubdur ki, konkret olaraq nəsə demək çox çətindir. Üzərimə düşən hər oyunda yaxşı performans göstərmək və öz üzərimdə çalışmaqdır. - Son olaraq milli komanda haqqında danışmağınızı istərdik. İyunun 17-də AVRO-2024-ün seçmə mərhələsində Estoniyanı qəbul edəcəksiniz. İlk iki məğlubiyyətdən sonra bu görüşdə nəyə ümid etmək olar? - Rəqibi doğma meydanda məğlub edə bilərik. Yığmanın tərkibində olmadığımız üçün Estoniya seçməsini analiz etməmişik. Məncə, bu qarşılaşmada əsas məqsədimiz qalib gəlmək olacaq.