3-5 gündən bir mətbuatda bu cür xəbərlərə rast gəlirik: borcu olan 137 nəfər saxlanıldı; borcu olan 50 nəfər saxlanıldı; borcu olan daha 30 nəfər saxlanıldı və sair. Bu adamlar əsasən banklara, kredit təşkilatlarına borcu, aliment borcu, vergi və digər borcları olan, bu borcları ödəyə bilməyən sadə, imkansız, sıravi vətəndaşlardır. Yaxud, son zamanlar öz(!) meyvə-tərəvəzini xarici ölkələrə çıxarıb satan, lakin əldə etdiyi öz (!) pulunu ölkəyə qaytarmayan fermerlərin kütləvi həbsinə dair rəsmi məlumatlar yayılır. Qanunvericiliklə doğrudan da, həmin vəsaitlər rəsmiləşdirilməli və yalnız gömrük prosedurlarına uyğu şəkildə ölkədən çıxarılmalıdır. Fakt isə budur ki, bu pozuntunu bilərəkdən, yaxud bilmədən edən fermerlər kütləvi olaraq hətta bir neçə minlik meyvə-tərəvəzə görə istintaqa cəlb edilir, həbs olunur, cərimələnir və s. Demək istədiyimiz odur ki, maliyyə nizam-intizamına qəsdən, ya da bilmədən riayət etməyən, banka, alimentə, vergiyə borcunu ödəməkdə çətinlik çəkən vətəndaş “ayağını bir addım sağa-sola qoyan kimi” saxlanılır, həbs olunur, olanı-qalanı müsadirə edilir... Amma eyni münasibət nədənsə bir çox hallarda dövlət büdcəsini milyonlarla, on milyonlarla, yüz milyonlarla məbləğdə talayan, korrupsiya, rüşvətlə məşğul olan və hətta bu cinayət əməlləri istintaq, məhkəmə tərəfindən sübut olunan, üstəlik bunu özləri də etiraf edən sabiq məmurlara, nazirlərə göstərilmir. Məsələn, bir neçə gün əvvəl mətbuatda AMEA Prezidenti, akademik İsa Həbibbəylinin oğlu Səhhət Həbibbəylinin istintaqa ifadəsi dərc edildi. Məlum oldu ki, akademikin gömrük rəisi olan oğlu Naxçıvan MR Ali Məclisinin sədri Vasif Talıbova hər il 40 milyon dollara yaxın pul çatdırırmış. Hələ bu, boynuna aldığıdır: “2018-ci ildə mən sədr təyin olunanda aylıq 2 milyon 500 min dollar olmaqla, ilin sonuna qədər iki aya cəmi 5 milyon dollar çatdırdım. 2019-cu ildə də aylıq 2 milyon 500 min dollardan bir il üçün 30 milyon dollar vermişəm. 2020-ci ildə aylıq 2 milyon 800 min dollar oldu, illik cəmi 34 milyon dollar çatdırmışam. 2021-ci ildə isə aylıq təxminən 3 milyon 200 min dollardan olmaqla, bir il üçün 38 milyon 400 min dollar çatdırmışam. 2022-ci ildə artıq ayda 3 milyon 300 min idi. 10 ay ərzində 33 milyon yığılmışdı. Hamısı da çatdırılıb”. Bu, üst-üstə 100 milyonlarla dolların təkcə S.Həbibbəylinin sədrliyi dövründə - 3 ildə V.Talıbova ötürülməsi deməkdir. Əlbəttə ki, bundan akademikin oğluna da az pul çatmayıb. Talıbov isə 3 il yox, 1995-ci ildən 2022-ci ilə qədər – 27 il(!) Naxçıvan Ali Məclisinin sədri olub. Hələ bu, təkcə gömrükdən yığılanlardır. Üstəgəl büdcədən talananları, rüşvəti, hüquq-mühafizə orqanlarının yığdıqlarını və s. demirik. Amma yuxarıda qeyd edilən ifadələrə, etiraflara baxmayaraq, bu gün Vasif Talıbov da, Səhhət Həbibbəyli də azadlıqda, öz keflərindədir… Sabiq MTN başçısı Eldar Mahmudovun əsas fiqur olduğu “MTN işi”, sabiq Rabitə naziri Əli Abbasovun baş rolda olduğu “Rabitə işi”, eləcə də sabiq Mədəniyyət naziri Əbülfəs Qarayevin, sabiq XİN başçısı Elmar Məmmədyarovun nazirliklərindəki korupsiya faktları ilə bağlı aparılan istintaqlar, həbslər, bu rəhbər şəxslərə qarşı rəsmi ifadələr və s. sonda onunla nəticələndi ki, həmin bu qurumlarda kimlərsə həbs olundu, 3-5 il yatıb çıxdı, kimlərsə müxtəlif məlum yollarla canını həbsdən qurtardı, əsas rəhbər məmurlara isə “gözün üstə qaşın var” deyən olmadı. Həmin adamlar bu gün də öz “kefində-damağındadır”. Hələ bunlar rəhbərlik etdikləri qurumlarda pis-yaxşı araşdırma aparılanlar, cinayət faktları rəsmən üzə çıxarılanlardır. Bundan əlavə Ramiz Mehdiyev, Hacıbala Abutalıbov, “qaçqınkom” Əli Həsənov, Zakir Qaralov, Ziya Məmmədov, Əhməd Əhmədzadə, Etibar Pirverdiyev, Abid Şərifov və saydıqca sırası bitməyən milyonçu, hətta milyarder sabiq məmurlar var ki, nə barələrində istintaq aparılıb, nə fəaliyyəti yoxlanılıb, nə də varidatlarının mənbəyi soruşulub. Əvəzində, imkansızlıqdan banka, vergiyə, DSMF-ə borcu olanlar saxlanılır, sorğu-suala çəkilir, hər qəpikləri güdülür, işığa borcu olanın işığı, qaza borcu olanın qazı, suya borcu olanın suyu kəsilir… Qanun tələb edirsə, qoy kəsilsin. Amma bu qanun niyə əhalinin imkansız qisminə tətbiq edilməlidir, yüksək məmur təbəqəsi isə bundan yayınmalıdır? Bu nə ayrıseçkilikdir, nəyin siqnalı, ismarıcıdır? Bundan çoxları, o cümlədən bugünkü gənclik belə nəticə çıxarır ki, daha böyük, iri miqyaslı oğru olmalısan ki, həbs edilməyəsən, böyük oğrusansa azadlıqda və kefdə, xırda-para borcu olub, bunu ödəyə bilməyən balaca adamsansa həbsdə olmalısan! Əgər belə davam edəcəksə, yaxın gələcəkdə hüquqi dövlətə, ədalətə, məhkəmələrə, hüquq-mühafizə orqanlarına və s. inamın bərpası üfüqdə də görünməyəcək...“AzPolitika.info”

Ağsu rayonu S.Mikayılov adına tam orta məktəbin direktoru həbs edilib. Sozcu.az xəbər verir ki, direktor Fəxrəddin Həsənov məktəbdəki qanun pozuntuları ilə bağlı cinayət məsuliyyətinə cəlb edilib. Ağsu Rayon Prokurorluğunda F.Həsənova Cinayət Məcəlləsinin 311.3.3-cü (rüşvət alma-külli miqdarda törədildikdə) maddəsi ilə ittiham elan edilib, barəsində həbs qətimkan tədbiri seçilib. İş üzrə ilkin istintaq tamamlanıb. Toplanmış materiallar baxılması üçün məhkəməyə göndərilib.

Son üç ayda ruslar itirdiklərindən daha az adamı hərbi xidmətə çağırıb. Sozcu.az xəbər verir ki, bunu Ukrayna Quru Qoşunlarının Ehtiyat Şurasının sədri İvan Timoçko deyib. Onun sözlərinə görə, son aylarda rus qoşunu ayda 35-40 min hərbçi itirib, 30-35 min nəfəri səfərbər edib: "Onlar hələ də itkiləri bərpa etməyə çalışır və bu, tam uğurlu alınmır. Strateji və ya əməliyyat səviyyəsində həqiqətən effektiv olmaq üçün ruslar itirdiklərindən daha çoxunu orduya cəlb etməlidir".

Bakıda ahıl kişi və arvadı dəm qazından boğularaq ölüb. Sozcu.az xəbər verir ki, hadisə Suraxanı rayonunda baş verib. Qaraçuxur qəsəbəsində 1936-cı il təvəllüdlü İsax Səfərəliyeva və arvadı 1941-ci il təvəllüdlü Şeyda Səfərəliyeva evdə qaz sızmasından ölüb. Araşdırma aparılır.

Qəbələdə yeniyetmə kirayə yaşadığı evin hovuzunda boğularaq ölüb. Sozcu.az xəbər verir ki, hadisə Qəbələ rayonunun Vəndam qəsəbəsində baş verib. Məlumata görə, fevralın 1-də saat 22 radələrində Ağcabədi rayon sakini 2010-cu il təvəllüdlü Hüseyn Azər oğlu Hüseynov kirayədə yaşadığı evin hovuzunda boğulub.

Azərbaycan Respublikası ərazisində beynəlxalq terror təşkilatları ilə əlaqəli olan radikal dini-ekstremist qruplaşma üzvlərinin terror-təxribat əməllərinin müəyyən edilməsi və qanunazidd fəaliyyətlərinin qarşısının alınması istiqamətində Dövlət Təhlükəsizliyi Xidməti və Daxili İşlər Nazirliyinin əməkdaşları tərəfindən birgə kompleks tədbirlər görülmüşdür. Sozcu.az xəbər verir ki, bu barədə DTX məlumat yayıb. Həyata keçirilmiş əməliyyat-istintaq tədbirləri ilə əvvəllər “Meşə qardaşları" adlı terror qruplaşmasının fəaliyyətində iştirak etdiyinə görə məhkum olunmuş Qədir Hacıyevin Qusar rayon sakinləri - Kamran Kərimxanov, Ümüd Güləliyev, Valerik Adilov, Riyad Səfərəliyev, Rövşən Laçınov, Nazim Zəkiyev və qeyriləri ilə cinayət əlaqəsinə girməsi, onların birlikdə Qusar rayonu ərazisində terror aktları hazırlamaları, həmin rayonun Hil, Cibir və Yasab kəndlərini əhatə edən meşə massivində yeraltı sığınacaqlar yaratmaları, bu sığınacaqları silah-sursat, partlayıcı maddələr, texniki qurğular və digər zəruri ləvazimatlarla təchiz etmələri təsbit olunmuşdur. İlkin mərhələdə qruplaşma üzvü olan Əlipaşa Kamilovun yeri müəyyən edildikdən sonra istintaqa cəlb edilməsi məqsədilə keçirilmiş əməliyyat zamanı o, Qusar şəhərində gizləndiyi ünvanda xüsusi təyinatlı əməkdaşlara silahlı müqavimət göstərərək 2 ədəd “RGO-78” markalı əl qumbarası atmış, nəticədə xüsusi təyinatlılardan biri yaralanmış, Əlipaşa Kamilov isə zərərsizləşdirilmişdir. Davam etdirilən əməliyyat-axtarış və istintaq tədbirləri nəticəsində Cibir kəndi yaxınlığında yerləşən meşəlik ərazidə gizli şəkildə yaradılmış sığınacaqlar və saxlanc yerləri aşkar olunmuş, həmin yerlərdə gizlənən qanunsuz silahlı birləşmənin üzvləri - Qədir Hacıyev, Riyad Səfərəliyev, Valerik Adilov və Ümüd Güləliyev silahlı müqavimət göstərərək partlayıcı vasitələri işə salarkən məhv olmuşlar. Aşkar edilmiş sığınacaqlara keçirilən baxış zamanı oradan partlayıcı qurğuların hazırlanması üçün nəzərdə tutulan torf, aseton, detonatorlar, məsafədən idarə edilə bilən partlayıcı mexanizmlər, qəlpə qismində istifadə edilən armatur və qurğuşun hissələri, 2 ədəd “Kalaşnikov” avtomatı, 3 ədəd ov tüfəngi, patronlar və avtomat güllələri, eləcə də beynəlxalq səviyyədə terror təşkilat kimi tanınmış qanunsuz silahlı birləşmənin simvolu olan bayraq müəyyən edilərək götürülmüşdür. Həmçinin görülmüş təxirəsalınmaz tədbirlərlə terrorçu qruplaşmanın üzvlərindən olan Nazim Zəkiyevin Hil kəndinin yaxınlığında yerləşən fermada, Kamran Kərimxanov və Rövşən Laçınovun isə Hil kəndi ərazisində gizlənmələri müəyyənləşdirilmiş və onlar hüquq-mühafizə orqanlarının əməkdaşlarına qarşı silahlı müqavimət göstərərkən zərərsizləşdirilmişlər. Araşdırmalarla cinayətkar birliyə daxil olan şəxslərin dairəsi, təşkilatlanma forması, təchizatı, planları ilə bağlı detallar və dəlillər müəyyən edilmişdir. Qanunsuz olaraq amonium-nitrat, güclü yandırıcı xüsusiyyətə malik torf, detonatorlar və od ötürən qaytanlar əldə edib onlardan istifadə etməklə kustar üsulla partlayıcı qurğular hazırlayan və onları Qusar şəhərində yerləşən “Motel” adlı qonaq evində və onun yaxınlığındakı avtoyuma məntəqəsinin damında gizlədərək saxlayan Etibar Əhmədov qeyd olunan əməlləri davam etdirərkən həmin qurğuların partlaması nəticəsində xəsarət almışdır. Habelə Qusar rayon sakinləri olan Şərafəddin Mahmudov, Etibar Əhmədov və qeyrilərinin Azərbaycan Respublikasının qanunvericiliyi ilə nəzərdə tutulmayan silahlı birləşmənin fəaliyyətində iştiraklarına, o cümlədən bu silahlı birləşməni partlayıcı maddələrlə və digər ləvazimatlarla təchiz etmələrinə əsaslı şübhələr müəyyən edilmişdir. Qeyd olunan cinayətkar dəstənin üzvləri - Etibar Əhmədov, Rəhim Mirzəbəyov, David Rəşidov, Şərafəddin Mahmudov, Abugül Babayev və Elçin Əlirzayev Azərbaycan Respublikası Cinayət Məcəlləsinin 28,214.2.1, 28,214.2.3, 28,214.2.6-cı (cinayətkar birlik (cinayətkar təşkilat) halında odlu silahdan və silah qismində istifadə olunan predmetlərdən istifadə etməklə dini düşmənçilik, dini radikalizm və dini fanatizm zəminində terrorçuluğa hazırlıq) və digər maddələri ilə istintaqı aparılan cinayət işi üzrə təqsirləndirilən şəxs qismində məsuliyyətə cəlb edilərək, məhkəmənin qərarı ilə barələrində həbs qətimkan tədbiri seçilmişdir. Hazırda cinayət işləri üzrə istintaq-əməliyyat tədbirləri davam etdirilir.

Şərqi Azərbaycan əyalətinin Binab rayonunda iki fərqli yerdə baş verən ailə münaqişəsi zəminində 5 nəfər öldürülüb. Sozcu.az xəbər verir ki, bu barədə yerli media məlumat yayıb. Məlumata görə, Binab şəhərində 40 yaşlı ailə başçısı həyat yoldaşını, 15 yaşlı qızını və 11 yaşlı oğlunu qətlə yetirdikdən sonra inthar edib. Bununla eyni vaxtda Binabın başqa bölgəsində 33 yaşlı şəxs ov tüfəngindən atəş açaraq 35 yaşlı qardaşını öldürüb. Hər iki hadisənin ailə münaqişəsi zəminində baş verdiyi bildirilib.

18:34 “Tiflis Moll”da keçirilən aksiyada iştirakçılar Gürcüstan paytaxtından giriş-çıxışı qismən məhdudlaşdırıblar. Sozcu.az xəbər verir ki, bu barədə TASS məlumat yayıb. Bildirilib ki, aksiyaçılar ticarət mərkəzinin mərkəzi girişində cəmləşiblər, lakin sonradan yol boyu yürüş keçirmək qərarına gəliblər və nəticədə yol bağlanıb. Etirazçılarla polis arasında toqquşma yaşanmayıb. Aksiyada müxalifət nümayəndələri də iştirak edir. *** Gürcüstan polisi yeni parlament seçkiləri tələbi ilə keçirilən və minlərlə nümayişçinin iştirak etdiyi aksiyada Tiflisin kənarında magistral yolu bağladığı üçün bir neçə nümayişçini həbs edib. “Röyters”in məlumatına görə, həbs olunanlar arasında ölkənin ən böyük müxalifət partiyası olan Dəyişiklik Koalisiyasının lideri Nika Melia da var. Yerli mətbuat isə Tiflisin keçmiş meri Georgi Uqulavanın da həbs edildiyini yazıb.

ABŞ Prezidenti Donald Trampın Çin məhsullarına əlavə 10% rüsum tətbiq etməsi Vaşinqton və Pekin arasında danışıqları asanlaşdırmaq məqsədi daşıyır. Sozcu.az xəbər verir ki, bu barədə ABŞ-ın vitse-prezidenti Ceyms Devid Vens bildirib. "Bir tərəfdən rüsumlar Amerika iqtisadiyyatından istifadə edərək ölkəmizə narkotik göndərdiyinə görə Çin üçün cəzadır. Tariflərin məqsədinin bir hissəsi münasibətlərimizə daha çox tarazlıq gətirmək üçün prezidentə Çin Kommunist Partiyası ilə danışıqlar aparmağa imkan verməkdir",- o qeyd edib.

Şamaxıda bədbəxt hadisə baş verib. Sozcu.az xəbər verir ki, Şamaxının 1 saylı Çaylı kənd sakini 8 aylıq körpə Bəşirov Yusif Nurlan oğlu evdə oynayarkən peçin üzərində olan qaynar su üzərinə dağılıb. Hadisə nəticəsində ağır bədən yanıqları alan körpənin vəziyyətlərinin ağır olması səbəbindən Bakı şəhərində yerləşən xəstəxanalardan birinə çatdırılıb. Hazırda vəziyyətlərinin ağır olduğu bildirilir.

Hökumət rəsmiləri Çinin “DeepSeek” çat-botundan istifadə etməkdən çəkinməlidir. Sozcu.az xəbər verir ki, bu barədə Yaponiyanın rəqəmsallaşma və İKT siyasəti naziri Masaaki Taira deyib. “Problem ondadır ki, şəxsi məlumatlar lazımi şəkildə mühafizə olunacaq? Məlumatların qorunması ilə bağlı narahatlıqlar aradan qalxana qədər, hökumət rəsmiləri “DeepSeek”dən istifadə etməkdən çəkinməlidirlər və ya istifadə edirlərsə, bunu diqqətlə etməlidirlər”, - nazir bildirib. Qeyd edək ki, bir müddət öncə Pentaqonun əməkdaşlarının Çinin “DeepSeek” çat-botuna girişini əngəllədiyi ilə bağlı məlumat yayılmışdı.

Ukrayna müharibənin 1075-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 840 360 hərbçi, 9 908 ədəd tank, 20 667 ədəd zirehli döyüş maşını, 22 538 ədəd artilleriya sistemi, 1 267 ədəd RYAS (reaktiv yaylım atəş sistemi), 1050 hava hücumundan müdafiə sistemi, 369 ədəd hərbi təyyarə, 331 ədəd helikopter, 35 709 ədəd avtomobil texnikası, 23 793 ədəd PUA, 3054 qanadlı raket, 28 gəmi/kater, 1 sualtı qayıq, 3 729 xüsusi avadanlıq itirib.

Kanadanın baş naziri Castin Trüdo ABŞ Prezidenti Donald Trampın rüsum tətbiqinə cavab olaraq ölkəsinin 155 milyard dollarlıq ABŞ mallarına 25 faiz rüsum tətbiq edəcəyini açıqlayıb. Sozcu.az-ın məlumatına görə, hökumət başçısı bildirib ki, tarif paketinə 4 fevraldan etibarən 30 milyard dollarlıq mallara dərhal, 125 milyard dollarlıq məhsullara isə 21 gün ərzində əlavə rüsumlar daxildir. Baş nazir xalqı marketlərdən ABŞ məhsulları yerinə Kanada məhsulları almağa çağırıb. Eyni zamanda Meksika Prezidenti Klaudia Şeynbaum Trampın 25 faizlik rüsum qərarına cavab olaraq hökumətə Meksikanın maraqlarını müdafiə etmək üçün rüsum və qeyri-rüsum tədbirlərini özündə birləşdirən “B Planı”nı həyata keçirməyi tapşırdığını deyib. Rüsumlarla bağlı digər detallar açıqlanmayıb.

Ukrayna prezidenti Vladimir Zelenski deyib ki, Ukraynanın ABŞ-Rusiya arasındakı danışıqlardan kənarlaşdırılması “çox təhlükəlidir”. Sozcu.az xəbər verir ki, bu barədə Zelenski “Associated Press“ agentliyinə müsahibəsində deyib. O, ABŞ prezidenti Donald Trampın administrasiyasının artıq Rusiya ilə müharibəyə son qoymaq üçün “çox ciddi” danışıqlar apardığı barədə bəyanatını şərh edib: “Onların öz münasibətləri ola bilər, amma bizsiz Ukrayna haqqında danışmaq hamı üçün təhlükəlidir”. O, öz komandasının Tramp administrasiyası ilə əlaqə saxladığını, lakin bu müzakirələrin “ümumi səviyyədə” olduğunu söyləyib. Zelenski yaxın vaxtlarda daha ətraflı razılaşmaların hazırlanması üçün şəxsi görüşlərin keçiriləcəyinə inanır.

Ölkə ərazisində hava şəraiti əsasən yağmursuz keçib. Lakin Bakıda və Abşeron yarımadasında gecə saatlarında az çiskinli olub (0 mm). Sozcu.az xəbər verir ki, bu barədə Milli Hidrometerologiya Xidmətindən bildirilib. Qeyd olunub ki, Sumqayıt, Şəmkir, Xaltan, Yevlax, Sabirabad, Zərdab, İmişli, Cəfərxan, Neftçala, Lerikdə duman müşahidə olunub. Dumanda görünüş 50-500 metrədək məhdudlaşıb. Havanın minimal temperaturu Bakıda və Abşeron yarımadasında 7, Aran rayonlarında 4 dərəcəyədək isti, Naxçıvan MR-da və dağlıq rayonlarda 8, yüksək dağlıq ərazilərdə 10 dərəcəyədək şaxta qeydə alınıb.

Şənbə günü Sudanın Çevik Reaksiya Qüvvələrinin Omdurman şəhərindəki bazara hücumu nəticəsində azı 54 nəfər ölüb, 158 nəfər yaralanıb. Sozcu.az xəbər verir ki, bu barədə ölkənin Səhiyyə Nazirliyi məlumat yayıb. Çevik Reaksiya Qüvvələri isə bazara zərbə endirdiklərini təkzib edərək, Sudan ordusunun mülki şəxsləri atəşə tutduğunu iddia edib. Qeyd edək ki, Çevik Dəstək Qüvvələri üsyan qaldırıb və hərbi qüvvələrə qarşı uzun müddətdir mübarizə aparırlar.

Siyəzəndə baş vermiş avtobus qəzası nəticəsində yaralanan şəxsin kimliyi məlum olub. Sozcu.az APA -ya istinadla xəbər verir ki, onun Xaçmaz rayon sakini 72 yaşlı Nazim Kiçikbəyov olduğu bildirilir. N. Kiçikbəyov müvafiq tibbi yardımdan sonra evə buraxılıb. Xatırladaq ki, qəza Bakı-Quba Rusiya Federasiyası ilə dövlət sərhədi avtomobil yolunun Siyəzən rayonu ərazisindən keçən hissəsində baş verib. Hadisə zamanı avtobusda 51 sərnişin olub. Onlardan biri xəsarət alıb. O, təcili tibbi yardım avtomobili vasitəsilə xəstəxanaya aparılıb.

Türkiyədə iki avtomobil toqquşub, ölənlər və xəsarət alanlar var. Sozcu.az Türkiyə mediasına istinadən xəbər verir ki, hadisə Kırıkkale şəhərində baş verib. Ağır qəza nəticəsində iki nəfər ölüb, iki nəfər yaralanıb. Xəsarət alanlar xəstəxanaya yerləşdiriliblər.

2016-cı il təvəllüdlü Şamaxı rayon sakini Cəbrayıllı Maqsud vəfat edib.  Sozcu.az "Unikal"a istinadən xəbər verir ki, azyaşlı qidadan zəhərlənərək ölüb.  Məlumata görə, M.Cəbrayıllı xəstəxanaya çatdırılsa da, onun həyatını xilas etmək mümkün olmayıb. 

ABŞ Prezidenti Donald Tramp Somalidə İŞİD terror təşkilatının rəhbərlərindən birinin zərərsizləşdirilməsi barədə müvafiq göstəriş verib. Sozcu.az xəbər verir ki, bu barədə o, "Truth" sosial şəbəkəsində yazıb. “Bu səhər mən hərbçilərə İŞİD-in Somalidəki terrorçularının olduqları ərazilərə dəqiq hava zərbələri endirməyi əmr etdim”, - deyə dövlət başçısı bildirib. O, terrorçuların Somalidəki mağaralarda gizləndiyini qeyd edib. “Zərbələr nəticəsində onların yaşadıqları mağaralar dağıdılıb və dinc əhaliyə heç bir zərər vurmadan çoxlu terrorçu məhv edilib”, - deyə Tramp əlavə edib.

ABŞ ordusu bundan sonra Meksikanın narkotik kartellərinə qarşı xüsusi hərbi əməliyyatlar keçirə biləcək. Sozcu.az xəbər verir ki, bu barədə ABŞ-ın müdafiə naziri Pit Heqset məlumat yayıb. Onun sözlərinə görə, Amerika hərbçiləri belə səlahiyyətləri Donald Trampın narkotik kartellərini terror təşkilatı kimi tanıyan fərmanından sonra alıb. Pentaqon rəhbəri yaxın vaxtlarda qonşu dövlətin ərazisində hərbi əməliyyatların planlaşdırılıb-planlaşdırılmadığını dəqiqləşdirməyib. Qeyd edək ki, bundan öncə ABŞ ordusunun sabiq kəşfiyyatçısı Skott Ritter narkokartellərin terrorla cavab verəcəyini iddia etmişdi.

Tiflisdə Gürcüstan parlamentinin binası yaxınlığında hökumət əleyhinə növbəti etiraz aksiyası keçirilir. Sozcu.az xəbər verir ki, bu barədə TASS məlumat yayıb. Aksiya səbəbindən parlament binasının yerləşdiyi Rustaveli prospektində nəqliyyatın hərəkəti iflic olub. Eyni zamanda, aksiya Batumidə də keçirilir. Aksiyaçılar təkrar parlament seçkilərinin keçirilməsini və son iki ayda saxlanılan etirazçıların azadlığa buraxılmasını tələb edirlər.

Pakistanın Bəlucistan əyalətində hərbçi və separatçılar arasında silahlı toqquşma baş verib. Sozcu.az xəbər verir ki, bu barədə "Röyters" məlumat yayıb. Bildirilib ki, insident zamanı 18 hərbçi və 24 silahlı qruplaşma üzvü ölüb. Məlumata görə, silahlı toqquşma separatçıların yollarda qurduqları postların aradan qaldırılması zamanı baş verib. Qeyd edək ki, separatçıların hansı qruplaşmaya aid olduqları hələ ki bəlli deyil. Əlavə edək ki, Pakistanın Baş naziri Şahbaz Şərif toqquşmanı pisləyib.

Türkiyə mediası Xalqların Demokratiya Partiyasından (HDP) olan erməniəsilli millət vəkili Qaro Paylanın Azərbaycan əleyhinə bəyanatlarını tənqid edib. Sozcu.az Axar.az-a istinadən xəbər verir ki, “Yeni Akit” qəzeti “Hələ bu adam Türkiyənin çörəyini də yeyir” sərlövhəli məqaləsində deputatın Ermənistanın “3-5 il ərzində” Azərbaycana qarşı yeni təcavüzə hazırlaşması ilə bağlı sözlərinə diqqət çəkib. Nəşr Qaro Paylanın Ermənistanın Baş naziri Nikol Paşinyanla fotoşəklini paylaşıb, həmçinin onun erməni mətbuatına müsahibəsindən parçalara istinadla deputatın digərləri ilə yanaşı, İrəvanı “ABŞ və Fransanın güclü dəstəyini almağa” çağırdığını da qeyd edib. Məşhur xəbər resursu “Haber7.com” da Türkiyə millət vəkilinin qalmaqallı müsahibəsini oxuculara çatdırıb. Portal, həmçinin Qaro Paylanın mediada sözlərinin təhrif edilməsini əsas gətirərək Azərbaycana qarşı hücumlarını ört-basdır etməyə tələsdiyi müsahibədən sonra sosial şəbəkədəki paylaşımına da istinad edib.