"Barselona"nın yarımmüdafiəçisi İlkay Gündoğan klubu tərk edə bilər.  Sozcu.az xəbər verir ki, bu barədə AS nəşri məlumat yayıb. Kataloniya təmsilçisi onu La Liqada qeydiyyatdan keçirə bilməsə, türkəsilli almaniyalı yarəmmüdafiəçinin müqaviləni birtərəfli qaydada ləğv etməsi mümkündür. Bununla bağlı onun müqaviləsində bənd yer alıb. Futbolçu bu həftə "Barselona"nın heyətində heç bir rəsmi oyun keçirmədən klubu tərk edə bilər. Xatırladaq ki, Gündoğan bu yay Kataloniya təmsilçisi ilə 2025-ci ilin yayına kimi müqavilə imzalayıb. Müqavilənin daha 1 mövsüm uzadılması variantı var. Qeyd edək ki, "Barselona" La Liqada yeni mövsümün ilk oyununda avqustu 13-ü "Xetafe"nin qonağı olacaq.

Türkiyəli məşhur müğənni Tan Taşçı avtomobil qəzası keçirib.  Sozcu.az xəbər verir ki, qəza zamanı meneceri də yanında olub. Xəsarət alaraq xəstəxanaya çatdırılan müğənni və menecerinin həyati təhlükəsi olmasa da, xəstəxanada müalicələri davam edir.  Avtomobil yararsız hala düşüb.

Bakıda və Abşeron yarımadasında hava şəraitinin yağmursuz olacağı gözlənilir. Səhər bəzi yerlərdə zəif duman olacaq, mülayim cənub-şərq küləyi əsəcək. Sozcu.az xəbər verir ki, bu barədə Milli Hidrometeorologiya Xidmətindən məlumat verilib. Havanın temperaturu gecə 24-28° isti, gündüz 35-39°, bəzi yerlərdə 41-42° isti olacaq. Azərbaycanın rayonlarında hava əsasən yağmursuz olacaq. Lakin gündüz bəzi dağlıq ərazilərdə qısamüddətli az yağış yağacağı, şimşək çaxacağı, dolu düşəcəyi ehtimalı var. Gecə və səhər bəzi rayonlarda duman olacağı, şərq küləyi əsəcəyi bildirilir. Havanın temperaturu gecə 23-28° isti, gündüz 35-40°, bəzi yerlərdə 42-44° isti, dağlarda gecə 15-20° isti, gündüz 28-33° isti olacaq.

30 noyabr 2018-ci il tarixində "Azərbaycan Respublikasında mənzil fondunun özəlləşdirilməsi haqqında” Qanuna edilən dəyişikliyə əsasən, bu günə qədər mənzillərdən yığılan xidmət haqlarına tətbiq edilən vahid tarif ləğv edilib. Amma MİS-lər hələ də sovet dövründən qalmış sistemlə çalışaraq, fəaliyyətlərini mənzil idarəçiliyi ilə bağlı müxtəlif istiqamətlərdə davam etdirirlər. "JEK”lər "fəaliyyət”lərini genişləndirərək qanunsuz pul yığımına da başlayıb. 2022-ci il üçün mənzillərdən xidmət haqları yığan "JEK” əməkdaşları tariflərin artırıldığını elan ediblər. Bəs "Jek”lərin fəaliyyəti nə dərəcədə qanunidir? Məsələ ilə bağlı Referans.az-a danışan hüquqşünas Ramil Süleymanov bildirib ki, hər kəsin Mənzil Kommunal İstismar Sahəsi kimi tanıdığı "JEK”lərin fəaliyyəti qanunsuzdur: "Hər kəsin MİS kimi tanıdığı və JEK kimi bildiyi idarələr əslində 1959-cu ildə SSR-də yaradılıb. Bu idarələrin əsas məqsədi dövlətin balansında və mülkiyyətində olan vətəndaşlara verilmiş çoxmənzilli binaların idarə olunması, onun kommunal şəraitinin yaxşılaşdırılması və ya həmin əraziyə kommunal xidmətlərin göstərilməsi olub. Lakin dövlətimiz müstəqilliyini qazandıqdan sonra artıq bir özəlləşdirmə dalğası başladı və bunun nəticəsində vətəndaşlar sosial kirayə müqavilələri əsasında onlara məxsus olan orderli mənzilləri özlərinin mülkiyyətinə keçirə bildilər. 2009-cu ilə qədər Azərbaycan Respublikasının ərzisində Azərbaycan SSR-nin mənzil məcəlləsi qüvvədə idi. 2009-cu ildə isə həmin qanun ləğv olunub və Azərbaycan Respublikasının Mənzil Məcəlləsi qüvvəyə minib”. Hüquqşünasın sözlərinə görə, Azərbaycan Respublikasının Mənzil Fondunun özəlləşdirilməsi haqqında 1993-cü il qanununun 13-cü maddəsinə görə özəlləşdirilən mənzillərin vahid tarif əsasında xidmət göstərməsi və onlardan ödənişlərin yığılması "JEK"lərə həvalə olunub: "Amma 2018-ci ildə həmin qanundakı o müddəa ləğv olundu və maddədə göstərilən həmin hissə, yəni "JEK"lərə aid olan bənd ləğv olunub. Bununla da "JEK"lərin ən böyük səlahiyyəti itirilmiş hesab olunub. Səlahiyyəti itirilmiş bir idarənin də qanuni fəaliyyət göstərməsi, pul yığması əsassız və qanunsuzdur, çünki onların bu gün bununla bağlı qanuni əsası mövcud deyildir”. Ramil Süleymanov bildirib ki, Azərbaycan Respublikasının Mənzil Məcəlləsinin 141.1 maddəsinə əsasən çoxmənzilli binaların idarə edilməsi, habelə qaydaların pozulmaqla müqavilənin əksinə həyata keçirilməsi məsuliyyətə səbəb olur. Yəni bu birmənalı olaraq qanun pozuntusudur. Amma təəssüflər olsun ki, bu gün vətəndaşlarımızın böyük əksəriyyəti bundan xəbərsizdir. Onlar daha çox "JEK"lərə ailə tərkibi haqqında və ya yaşayış yerinə dair yaşayışla bağlı müraciət edirlər və müraciət etdikləri anda da "JEK"lər onlara yığılmış mənzil xidmətləri borcunun müəyyən bir qisminin ödənilməsi qarşısında arayışın verilə biləcəyini bildirir. Amma vətəndaşlar bilməlidir ki, həm ailə tərkibi haqqında arayışı, həm də yaşayış yerinə dair arayışı istənilən Asan Xidmət məntəqələrinə müraciət etməklə almaqları mümkündür. İndiki halda qanunsuz halda fəaliyyət göstərən "JEK"lərin ləğv olunmaqla onların işçi heyyətinin bələdiyyələrin tərkibinə verilməsi və vətəndaşların da həmin kommunal ödənişləri bələdiyyələrə ödəməsi daha məntiqli və qanunidir. Bununla bağlı qanunvericiliyə düzəliş olunmalıdır", deyə Ramil Süleymanov qeyd edib.

Lənkəran Ağır Cinayətlər Məhkəməsində Masallıda əmilərini qətlə yetirməkdə təqsirləndirilən qardaşlar - Ariz və Fəqan Səfərovların cinayət işi üzrə məhkəmə istintaqı yekunlaşıb. Hakim Cavid Səfərlinin sədrliyi ilə keçirilən prosesdə hökm oxunub. Məhkəmənin hökmü ilə Arizə 14 il, Fəqana isə 7 il 6 ay müddətinə azadlıqdan məhrumetmə cəzası təyin edilib. Şirvan Apellyasiya Məhkəməsi isə onların şikayətini təmin etməyib. Qeyd edək ki, 2022-ci il iyulun 31-i saat 7 radələrində Masallı rayon sakini, 1961-ci il təvəllüdlü İbadulla Səfərovun öldürülməsi barədə rayon prokurorluğuna məlumat daxil olub. Aparılan ilkin araşdırmalarla 1999-cu il təvəllüdlü Ariz Səfərov və qardaşı, 2004-cü il təvəllüdlü Fəqan Səfərovun şəxsi münasibətlər zəminində aralarında yaranan mübahisə zamanı taxta parçası və balta ilə əmiləri İbadulla Səfərova xəsarətlər yetirməklə onu qəsdən öldürmələrinə əsaslı şübhələr müəyyən edilib. Faktla bağlı Masallı Rayon Prokurorluğunda Cinayət Məcəlləsinin 120.1-ci (qəsdən adamöldürmə) maddəsi ilə cinayət işi başladılıb. Ariz və Fəqan Səfərovlar şübhəli şəxs qismində tutularaq istintaqa cəlb ediliblər.

Naxçıvan Muxtar Respublikasında ümumtəhsil məktəblərinin şagirdləri yeni tədris ilində əvvəlki illərdə istifadə olunan məktəbli geyim formasından istifadə edə biləcəklər. Sozcu.az xəbər verir ki, bu barədə Naxçıvan Muxtar Respublikası Təhsil Nazirliyinin mətbuat xidmətindən bildirilib. Məlumatda deyilir ki, məktəblərin açılmasına bir aydan artıq vaxt qalıb. Valideyinləri maraqlandıran əsas məsələlərdən biri də 2023-2024-cü tədris ilində övladlarının hansı məktəbli forması ilə təhsil ocaqlarına gedəcəkləridir: "Məlumat üçün bildirək ki, uzun illərdir ki, muxtar respublikanın ümumtəhsil məktəblərində vahid geyim formasından istifadə olunur. 2023-2024-cü tədris ilində də muxtar respublikanın ümumtəhsil məktəblərinin şagirdləri əvvəlki ildə istifadə olunan geyim formasından istifadə edə biləcəklər. Naxçıvan Muxtar Respublikası Təhsil, İqsadiyyat nazirlikləri və şəhər, rayon İcra Hakimiyyətləri ilə birgə keçirilən ənənəvi məktəbli yarmarkaları bu il də davam etdiriləcək. Yarmarkalarda digər məktəbli ləvazimatları ilə yanaşı, məktəbli formalarının satışı da həyata keçiriləcək. Bununla yanaşı, Azərbaycan Respublikası Nazirlər Kabinetinin 2022-ci il 17 mart tarixli “Dövlət ümumtəhsil müəssisələrində təhsilalanların geyim formalarının təsvirləri”nin təsdiq edilməsi haqqında Qərarına əsasən, ölkənin ümumtəhsil məktəblərində 4 cür geyim formasından istifadə olunacaq. Muxtar respublikanın ümumtəhsil məktəblərinin pedaqoji şurasının qərarına uyğun olaraq valideyinlər övladları üçün ölkə üzrə istifadə olunan məktəbli geyimlərindən də ala bilərlər. Bu, məcburi deyil və valideyinlərin öz arzusu ilə ola bilər. Cari il üçün hər iki geyim formasından istifadəyə ümumtəhsil məktəblərində icazə veriləcək. 2024-2025-ci tədris ilindən isə ölkə üzrə tətbiq olunan geyim formalarından istifadə məcburi olacaq".

Türkiyə Milli Kəşfiyyat İdarəsi (MİT) Suriyanın şimalında yeni əməliyyat keçirib. Bu barədə “TRT Haber” məlumat yayıb. Bildirilib ki, əməliyyat nəticəsində İŞİD terror qruplaşmasının 3 üzvü və xeyli sayda silah-sursat ələ keçirilib.

“Ermənistan hökumətinin tabeliyində olan güc strukturunun, polisin belə aksiyaların qarşısını alması göstərdi ki, elə həmin şounun arxasında da Rusiya dayanır...” “Rusiya hər iki tərəfdən və hətta deyərdim, üç tərəfdən vəziyyəti qarışdırmağa çalışır. Yəni Ermənistandan, Azərbaycanın daxilindən və Azərbaycan ərazisində yerləşən erməni icması vasitəsi ilə...” Bu fikri siyasi təhlükəsizlik məsələləri üzrə ekspert Ərəstun Oruclu Moderator.az əməkdaşının “Ermənistanla sərhədimizdə artıq iki həftədən çoxdur ki, davam edən Qarabağ ermənilərinə “humanitar yardım” şousuna Rusiya-Qərb, ABŞ qarşıdurması kontekstindən baxsaq, nə görərik?” sualını cavablandırarkən dilə gətirib. “İlk günlərdə bu yardım şousunun arxasında kimin dayandığı, hansı təşəbbüslərin göründüyü aydın deyildi. Amma elə avqustun 8-də də istər Qarabağ erməniləri, istərsə də Ermənistandakı şərti olaraq “miatsum” tərəfdarlarının təşkil etdiyi aksiyalar, səsləndirilən hədə-qorxular, Laçın dəhlizinə, Şuşaya və ümumiyyətlə, Azərbaycana doğru yürüş cəhdləri, o cümlədən də Paşinyan hökumətinin tabeliyində olan güc strukturunun, polisin belə aksiyaların qarşısını alması göstərdi ki, elə həmin şounun arxasında da Rusiya dayanır”- siyasi şərhçi belə deyib.  Analitik  açıqlamasında ABŞ-ın və bəzi Avropa ölkələrinin “humanitar yardım” şousu ilə bağlı Azərbaycanın tənqid edən bəyanatlar verməsinin səbəbini də izah edib. “Təbii ki, Qərb ölkələri həmin “humanitar yardım” şousu ilə bağlı müəyyən bəyanatlar verdilər, humanitar böhranı aradan qaldırmaq haqqında Azərbaycana müraciət etdilər, hətta tənqid də etdilər. Görünür, bu da səbəbsiz deyildi, səbəb də ondan ibarət idi ki, tərəfləri, bax, bu tipli aksiyalardan çəkinməyə məcbur etsinlər, yaxud sövq etsinlər və ya bunu tövsiyə etsinlər. Amma hər halda avqustun 8-də Ermənistanda baş verənlər, həmin bu humanitar yardım deyilən aksiya ilə, ona dəstək həyata keçirilməsi ilə bağlı Azərbaycana doğru yürüşlər etməyin kimi  təşəbbüsü olduğu açıq-aydın göstərdi. Əgər Ermənistan hökuməti o “humanitar yardım” şousuna dəstək aksiyasının, bununla bağlı Laçın sərhəd postuna doğru yürüş cəhdinin qarşısını alırsa, bu da açıq-aydın göstərir ki, bəhs edilən şou Paşinyanın başçılıq etdiyi Ermənistan hökumətinin təşkil etdiyi bir təxribat deyil. Ermənistan hökumətinin isə Azərbaycanla sülh, Qarabağ məsələsində partnyorları Qərb ölkələridir, Rusiya deyil. Deməli, Rusiya hər iki tərəfdən və hətta deyərdim, üç tərəfdən vəziyyəti qarışdırmağa çalışır. Yəni Ermənistandan, Azərbaycanın daxilindən və Azərbaycan ərazisində yerləşən erməni icması vasitəsi ilə...”- ekspert belə deyib. “Təsadüfi deyildi ki, son günlər Araik Arutyunyanın da ritorikası kəskinləşdi. O, Paşinyanı ittiham etməyə başladı. Düzdü, bu ilk dəfə deyil. Ancaq hər bir halda görünən budur ki, Kreml artıq total bir hücuma keçib. Və Rusiya XİN-in MDB departamentinin rəhbərinin “Azərbaycanla Ermənistan arasında tələsik hazırlanmış sülh sazişinin regiona davamlı sülh gətirməyəcək və hətta yeni münaqişələr üçün zəmin yarada biləcək” deməsi heç də sadəcə sözlər deyilmiş, bunun arxasında artıq konkret fəaliyyət dayanır və ya görünür”- deyə Ərəstun Oruclu vurğulayıb.

İranda Təhsil İşçiləri Həmkarlar İttifaqının üzvləri Lida İsmaili və Əlirza Himməti işdən qovulublar. Sozcu.az xəbər verir ki, bu barədə Təhsil İşçiləri Həmkarlar İttifaqı məlumat yayıb. Hər iki müəllimin Təhsil Nazirliyinin əməkdaşlarının inzibati xətalarına dair işlər üzrə apellyasiya şurasının qərarı ilə cəzalandırıldığı bildirilib. Onlar müəllimlərin hüquqlarını təmini ilə bağlı fəaliyyətləri, etiraz aksiyasında həbs edilən müəllim və tələbələrin azadlığını tələb etdikləri üçün işdən qovulublar. Qeyd edək ki, 2022-ci ilin sentyabr ayından İranda başlayan etiraz aksiyalarından sonra ictimai fəallıq göstərən, tələbələrin həbsinə etiraz edən onlarla müəllim işdən çıxarılıb. Müəllimlərin bir çoxuna qarşı “hökumətə qarşı təbliğat” ittihamı irəli sürülüb.

Ukrayna müharibənin 533-cü günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 252 200 hərbçi, 4278 ədəd tank, 8303 ədəd zirehli döyüş maşını, 5028 ədəd artilleriya sistemi, 711 ədəd RYAS (reaktiv yaylım atəş sistemi), 469 hava hücumundan müdafiə sistemi, 315 ədəd hərbi təyyarə, 313 ədəd helikopter, 7495 ədəd avtomobil texnikası, 4179 ədəd PUA, 1377 qanadlı raket, 18 gəmi/qayıq, 746 xüsusi avadanlıq itirib.

Nabranda ölümlə nəticələnən yol-nəqliyyat hadisəsi olub. Sozcu.az xəbər verir ki, hadisə rayonun Nabran kəndində qeydə alınıb. Belə ki, VAZ-2107 markalı minik avtomobilinin aşması nəticəsində hələlik şəxsiyyəti məlum olmayan bir nəfər hadisə yerində dünyasını dəyişib. 2000-ci il təvəllüdlü Tofiq Pərviz oğlu Allahverdiyev isə müxtəlif dərəcəli bədən xəsarətləri ilə xəstəxanaya aparılıb. Faktla bağlı araşdırma aparılır.

Dünya birjalarında neft bahalaşıb. Sozcu.az xəbər verir ki, hazırda “Brent” markalı neftin bir barreli 87,50 dollara, yüngül neftin bir barreli isə 84,36 dollara, "Azəri Layt" markalı Azərbaycan neftinin bir barreli isə 91,15 dollara satılır.

Kiyev Moskva ilə yalnız rus qoşunlarının Ukrayna ərazisindən çıxarılacağı danışıqlara hazırdır, lakin Putinlə deyil. Sozcu.az xəbər verir ki, bunu Ukrayna xarici işlər naziri Dmitri Kuleba deyib. “Məqsədə müharibə və diplomatiyanın birləşməsi yolu ilə nail olmaq olar. Ukrayna generalları Rusiya qüvvələrini geri çəkilməyə sövq etməli, Xarici İşlər Nazirliyi isə imkan daxilində dialoqla məşğul olmalıdır. Amma bizə aydındır ki, biz heç vaxt Putinlə Zelenskini bir masa arxasında görməyəcəyik”, - Kuleba bildirib.

Mutudərə döyüşü həqiqətən Gədəbəy uğrunda gedən döyüşlərin ən ağırı oldu. Birdən sul verilər ki,Dilqəm yazırsan ki,dayanmadan atəş açırdıq yazırsan. Bəs bu qədər mərmini, gülləni haradan alırdın? Cavabı çox sadədir : Gədəbəydə fövqaladə səlahiyyətli Səxavəddin Nəsibli adlı Gədəbəyli ziyalı şəxs var idi. Yəqin ki, Gədəbəylilər onu yaxşı tanıyarlar. Həmin Səxavəddin müəllim 4(Dörd) maşın sursatı vaxtında bizə çatdırdı. Əgər o sursatlar vaxtında olmasaydı,Gədəbəy də bəlkə qaçqın həyatı yaşayardı. Biz 07.08.1992-ci il tarixdə tərpənən nə varsa hamısını vurduq. Varlığa nə darlıq. PDM-lərin topları od kimi qızmışdı. İsgəndər və Sahib də dayanmadan çayın sahilindəki evlərdə gizlənən erməniləri QRAD atəşi ilə məhv edirdilər.Belə ki, ermənilər mülki evlərə doluşub bizə atəş açırdılar. Yuxarıda qeyd etdiyim kimi həm Krasnoselskidən gələn erməni və ruslar,həm də Başkənddən çıxan ermənilər Mutudərədə öz hərbçilərinə qoşularaq bizə qarşı döyüşürdülər. Həmin döyüşdə mənim ən çox çəkindiyim texnika PDM-2 idi. Belə ki,mən Ukraynada xidmət edəndə məhz PDM-2 rotasında xidmət etdiyimdən onun nəyə qadir oduğuna mükəmməl bələd idim. Bacarıqlı əllərdə PDM-2 sürətli,dəqiq,uzaq məsafəyə atışlarına görə tək başına çox işin öhdəsindən layiqincə gəlir. Bir sözlə PDM-1-in PDM-2-yə qarşı şansı həddən artıq azdır. Ona görə də Əfqanıstan müharibəsində Sovet qoşunları PDM-1-ləri PDM-2 ilə əvəzlədilər. Burada da eyni şey idi... Burada ermənilər PDM-2-dən atış edəndə açıq mövqeyə çıxır,10--15 saniyə gözləyir və sonra atırdılar.Bu onların böyük səhvi idi. Mən Ali Hərbi məktəbdə oxuyanda Atəş hazırlığı müəllimimiz Mayor Nikel bizə sual verən kimi fikirləşməyə vaxt vermədən bizdən cavabı dərhal tələb edirdi. Bizlərin narazılığına cavabı çox sadə idi: Yodaş Kursantlar, mən sizə istədiyiniz qədər vaxt verə bilərəm və siz bütün suallara cavab verə bilərsiniz. Amma döyüşdə DÜŞMƏN sizə bu VAXTI VERƏCƏKMİ? İndi ona nə qədər minnətdar idim,bunu tək ALLAH bilir. Odur ki,açıq mövqeyə çıxıb PDM-2 nin çıxışını gözlədim. Burada hər şeyi mənim onu birinci atəşlə vurub vurmayacağım həll edirdi. Yox əgər vura bilməsəm bu hər şeyin sonu oilacaqdı. O,görünər-görünməz mən atəş açdım. Mərmi qüllə və korpusun birləşdiyi yerdən dəydi. PDM-2-nin qülləsi sıradan çıxdı. O,artıq döyüşə tam yararsız hala düşdü və döyüş müydanınıl tərk etdərək getdi... Arada imkan tapıb 37 mm-lik topu da sıradan çıxarda bildim... Gecə saat 22.30 radələrində bizim sursatımız tükəndi. Bu zaman qaranlıq yerdən mənə qarşı alov çıxdığını gördüm və mən də dərhal həmin yerə atəş açdım. Qumbaraatan mərmisi PDM-in altında partladı.Mənim atdığım mərmi isə ermənilərin gizləndiyi yerə dəydi. 4--5 nəfər məşələ dönmüş adamın necə qamasını bir neçə saniyə müşahidə etdim. Onlar bir az qaçaraq yerə yıxıldılar(yandılar).Axmaqlar yanacaq çəninin arxasında gizləniblərmiş. Düşmən yavaş--yavaş irəliləməyə başladı. Mən artıq ancaq insan komuna atəş açırdım. Qrad da atəşi dayandırdı. Digər PDM-də olan Paşa gecə cihazından istifadə edə bilmədiyindən vəziyyət lap pisləşdi. Bu zaman əsgərlərdən biri:   -- Komandir ora bax,nə gəlir? Dedi.  Mən həmin yerə baxdım. Atəşin səngidiyini görən ermənilər irəlidə PDM-lər lə kəndin içinə doğru gəlirdilər. Mən məcburən GERİ ÇƏKİLİN əmrini vermək istəyirdim.Lakin bu zaman bir neçə əsgərin qucaqlarında PDM mərmiləri gətirdiklərini gördüm. Dayanmadan Qəlıpəli və ya Kumulyativ mərmi demədən,hansını verdilərsə onu da ermənilərə atdım. Düşmən yaxında olduğundan mərmilər hamısı hədəfə dəydi. Biz öz yerimizdə qaldıq. Həmin mərmiləri 861 saylı alayın sursat anbarı rəisi gizir Balayev Mübariz bizə çatdırdı. Yerimizdə qalmağımıza baxmayaraq vəziyyət son dərəcə gərgin idi. Bu zaman gecənin qaranlığını Qasımağalı tərəfdən gələn Tank səsi bürüdü. Bu nədir? Mühasirədir,yoxsa nə??? Hər ehtimala qarşı PDM-in topunu səs gələn yerə çevirdim... Gələnlər QAZAX TANKçıları idilər. Onların komandiri baş leytenant Salmanov Eldar öz tankçıları ilə vaxtında köməyimizə çatdılar. Tank səsini düşmən də duydu. Gecə səhərə qədər nisbi sakitlik yaşandı. Onu da qeyd edirəm ki, axşam saatlarında mən sol tərəfə baxanda düşmən texnikasının yerini mənə deyən qadının əlində avtomat düşmənə tərəf güllə atdığını gördüm. Belə XALQI HEÇ KİM MƏĞLUB EDƏ BİLMƏZ. Gecə vaxtı isə PDM-in gecə görmə cihazı ilə ermənilərin ay işığında öz meyitlərini maşınlarla yığıb apardıqlarını müşahidə etdim. Onlar bir neçə reys etdilər. Onlar meyitləri üst-üstə yığırdılar... Səhər tezdən saat 08 - 09 radələrində mən PDM-in motoruna yağ tökənə qədər İsgəndər və Paşa QRAD və PDM-lə kəndin içinə doğru hərəkət etdilər. Bu səhv hərəkət idi. Onları hər an vura bilərdilər. Odur ki, işimi yarımçıq qoyub tez onların arxası ilə getdim və zamanında çatdım. Düşmən PDM-i topunu aşağı salıb atışa hazırlaşırdı. Hərəkətdə ikən ona atəş açdım. Mərmi onun üstündən keçdi və PDM geri çəkildi. Geriyə baxdım və Gədəbəyin Kom.Batı Malbaxovun əlində TT markalı tapança ilə piyadaların önündə gəldiyini gördüm, Şəmkirdən olan Dəli Kür Praporşiklər rotası da onunla idi. Əsil real kino sənhəsi idi. Artıq tək deyilik,qələbə ovcumuzdadır...    ARDI VAR... Dilqəm Əliyev 

“Araik Arutunyanın dünən dünyaya təcili müraciət-xəbərdarlığı Azərbaycana müharibə elan etmək idi...” Azərbaycanın erməni-rus işğalı altında qalan ərazisində vəziyyət getdikcə gərginləşməyə doğru gedir. Laçın yoluna tətbiq edilən bəzi məhdudiyyətləri bəhanə gətirən separatçı rejim daxilə və xaricə yönəlik yeni siyasi xətt yürütməyə başlayıb. Daxildə qondarma parlamentin sədri istefaya gedəndən sonra onun yerinə “Daşnaksütyun” partiyasının üzvü David İşxanyan gətirilib. Ermənistanda müxalifətdə olan və baş nazir Paşinyan tərəfindən daşnakların xaricdə fəaliyyət göstərən bəzi üzvlərinə Ermənistana giriş qadağası tətbiq olunduğu bir vaxtda, Xankəndində daşnakın vəzifəyə gətirilməsi sadə siyasi gediş deyil. Bu o deməkdir ki, Ermənistanda hakimiyyət uğrunda mübarizə aparan daşnak bürosunun üzvü Xankəndində hakimiyyətə gətirilir və İrəvandan daha çox diaspora ilə işbirliyində olmağı məqsədəuyğun hesab etməklə, Qarabağ məsələsində Azərbaycana beynəlxalq təzyiq gücləndirilir. Bu, Rusiya tərəfindən idarə olunan separatçı rejimin yeni siyasi xəttidir və strateji hədəflərində dəyişiklik baş verdiyini göstərən əlamət kimi dəyərləndirilməlidir. Araik Arutunyanın BMT başda olmaqla dünyanın aparıcı siyasi qurumlarına, ABŞ, Fransa, Rusiya dövlət başçılarına son təcili müraciət-xəbərdarlığı, İrəvandan deyil, beynəlxalq qüvvələrdən kömək tələbini (bu istək deyil, tələbdir) yeni xəttin bariz nümunəsi hesab etmək olar. Araik müraciətində Ermənistana xəbər ünvanlayıb ki,  sizə elə də ehtiyacımız yoxdur, amma “Artsaxdan danışanda ağıllı olun”. Bu o deməkdir ki, Azərbaycanla Ermənistan arasında aparılan sülh danışıqlarının Xankəndi separatçıları üçün bir o qədər əhəmiyyəti yoxdur, hətta iki ölkə arasında sülh müqaviləsi imzalansa belə, onların “öz müqəddaratını təyin etmə” uğrunda mübarizəsi, daha doğrusu, müharibəsi davam edəcək...  Bu mübarizə-müharibə, əlbəttə, Azərbaycanla aparılacaq və Xankəndi separatçılarının lideri dünyaya son müraciət xəbərdarlığı ilə perspektivdə təkbaşına deyil, ünvanladığı tərəflərlə birgə olacağını nəzərdə tutur. Araik bildirir ki, bu tərəflərin önündə Rusiya Federasiyası dayanır, o sahədədir, başqa qüvvələr isə masadan Azərbaycana təzyiq göstərsin, sanksiyalar tətbiq etsin, Azərbaycan Avropa Şurası üzvüüyündən çıxarılsın. Bu müharibə elan etmək deyilsə, nədir?..  Araik erməni xislətinə sadiq qalaraq, müraciətdə 17 dəfə “genosid” ifadəsini işlədib. Hələ bir nəfərin burnu qanamadığı halda “sevimli genosid” ermənilərin şüarı olaraq qalır. Yer üzündə ermənilər qədər “məzlumluğu” ilə dilənçilik edən və bununla fəxr edən ikinci millət tapmaq mümkün deyil. Bu “yazıqlığ”ın arxasında hansı məkrin, qəddarlığın dayandığını biz də bilirik, dünya da, sadəcə dünya gücləri bu millətdən yeri gələndə təzyiq vasitəsi kimi istifadə ediblər, edirlər...  Dünən İrəvanda etiraz aksiyası keçirən “ Səlibçilər” dəstəsi belə bir bəyanat verib:” Laçın yoluna doğru gedirik, qoy, türklər bilsinlər ki, erməni xalqı oyanıb”. Soruşmaq lazımdır: “nə oldu, nə etdiniz də ayıldınız?”.  Məqsədiniz bəllidir: dəstəni “səlibçi”, “xaçdaşıyanlar” adlandımaqla Qarabağ problemini dinlərarası müstəviyə keçirmək və xristian dünyasını bizə qarşı qoymaqdır. Keçməz... Ermənilər son günlər “humanitar fəlakət” şousu altında gərgin situasiya yaradıb, Azərbaycanı beynəlxalq təzyiqin hədəfinə məruz qoymaq siyasətinə xüsusi önəm verməklə maraqlarını, konkret olaraq Laçın yolunun tamamilə açılmasını, ümumiyyətlə, nəzarət məntəqəsinin ləğvini tələb edirlər. Yuxarıda qeyd olunanlar bölgədə situasiyanı gərginləşdirir. Biz nə etməliyik?.. Xankəndindəki separatçı rejim məlum havadarlarının dəstəyilə bizə müharibə elan edib, dünyanı da bu müharibədə özünə müttəfiq etməyi planlaşdırır.  Deməli, bizim də hədəfimiz birbaşa Xankəndi olmalıdır. Bu ilin may ayından yenidən danışıqlara start veriləndə Azərbaycanı “danışıqlar burulğanına, labirintinə” salıb vaxtı uzatmaq siyasətinin başlandığını və bu uzadılan müddətdə ermənilərin hər cür təxribata, şantaja əl atacaqlarını qeyd etmişdim. İndi o rəngli şantaj təxribatın nümunəsini Araik dünən nümayiş etdirdi və yalnız bizi deyil, müraciət-xəbərdarlıq etdiyi ünvanları da unutmadı. “Siz başa düşürsünüzmü”, “siz dərk edirsinizmi”, “doğrudanmı siz narahat olmursunuz” və bu kimi etikadan uzaq ifadələrlə (Araikin aləmində bu təsiredici ifadə üslubudur) faktiki müraciət-xəbərdarlıq etdiklərini də şantaj edib. Rusiyanın idarə etdiyi separatçı rejimdən ayrı nə gözləmək olar? Ona görə də Rusiyanın rəsmiləri sülh danışıqları başlayanda “Qafqaz əsiri”nin Saaxovu kimi:” Yoox, tələsmək lazım deyil”məsləhətini verirlər...  Sülh danışıqları ilə paralel olaraq, təcili Azərbaycan Respublikasının işğal altında olan ərazilərinin azad edilməsinin siyasi və hərbi yolu gündəmə gətirilməli, qarşı tərəflərə vaxt verib xəbərdarlıq edilməlidir. Separatçılar dünyaya xəbərdarlıq müraciəti göndərə bilir, biz beynəlxalq hüquqa əsaslanan xəbərdarlığımızı edə bilmirik?! Uzaq keçmiş yox, ən yaxın tariximiz- 1988-ci ilin fevralın 13-dən 2020-ci ilin 27 sentyabrınadək - bizə dərs deyilmi? Erməni sərtlik görməsə, yola gələn məxluq deyil. Bir daha təkrar edirik: erməni silahlı qüvvələrinin ərazimizdən çıxarılmasının müddətini təyin edib xəbərdar etmək; keçmiş Dağlıq Qarabağ ərazisindən etnik təmizləməyə məruz qalmış Azərbaycan vətəndaşlarının doğma yurdlarına qayıdışı üçün zəruri siyasi-diplomatik addımları gecikmədən gündəmə gətirmək; Rusiya sülhməramlıları ilə təcili danışıqlar aparıb tərəfimizdən humanitar malların Ağdam yolundan çatdırılmasını həll etmək; düşmənin son müraciət xəbərdarlığına qarşı informasiya təbliğatını beynəlxalq ictimaiyyətə çatdırmaq...(moderator) İlham İsmayıl

ABŞ ukraynalı pilotların Amerika istehsalı olan Qərb tipli F-16 təyyarələrində təlim keçməsini dəstəkləyir. Sozcu.az "Ukrinform"a istinadla xəbər verir ki, bunu Pentaqonun mətbuat katibinin müavini Sabrina Sinq çərşənbə axşamı Ukrayna pilotlarının birinci qrupunun təlimlərə hazır olması ilə bağlı xəbəri şərh edərkən deyib. Onun sözlərinə görə, ABŞ prezidenti Co Bayden bunu mümkün etmək, həmçinin F-16-da ukraynalı pilotların təliminə dəstək vermək üçün "yaşıl işıq yandırıb”. "Bildiyiniz kimi, hazırlıqlara Danimarka və Hollandiya rəhbərlik edir", - ABŞ müdafiə sözçüsü əlavə edib. Sinq qeyd edib ki, hələlik Amerika tərəfdən qarşıdakı təlimin təfərrüatları ilə bağlı rəsmi açıqlama yoxdur.

Avqustun 8-də Qərbi Azərbaycan əyalətinin Çaldıran bölgəsində SEPAH zabiti Əmir Hüseyn Salehian naməlum şəxslər tərəfindən öldürülüb. Sozcu.az xəbər verir ki, bu barədə İRNA xəbər agentliyi məlumat yayıb. “Zabit vəzifə başında olduğu vaxt əks-inqilabçı qüvvələr tərəfindən qətlə yetirilib”, - məlumatda qeyd olunub.

Sozcu.az Kulis.az-a istinadən Xalq artisti Rasim Balayev haqqında maraqlı faktları təqdim edir. 1948-ci il avqustun 8-də Ağsu rayonunda anadan olan sənətkar 1969-cu ildə Azərbaycan Dövlət İncəsənət İnstitutunu bitirib. O, ilk dəfə Bakı kinostudiyasında “Ulduzlar sönmür” əsərində kiçik bir rolda çəkilib. Oynadığı “Nəsimi”, “Babək” və “Dədə Qorqud” filmlərindəki rollarda əsl tamaşaçı sevgisini qazanıb. “Azərbaycanfilm” kinostudiyasının nəzdində fəaliyyət göstərən kinoaktyor teatr studiyasında da çalışıb. Böyük və çətin rollardan əlavə Rasim Balayev kiçik rollarda da oynayıb. “Bu şirin söz, azadlıq”, “Sənin birinci saatın”, “Xoşbəxtlik səhnəsi”, “Mən hələ qayıdacağam”, “Birisigün gecəyarısı” kimi filmlərdə o, epizodik rollarda çəkilib. Xalq artisti "Özbəkfilm", "Mosfilm" və digər kinostudiyalarda filmlərə çəkilib. 1990-cı ildən 2013-cü ilə qədər Azərbaycan Kinematoqrafçılar İttifaqının katibi, 2022-ci il mayın 31-dən Azərbaycan Kinematoqrafçılar İttifaqının sədri kimi fəaliyyətə başlayıb. Rasim Balayevin kino sənətinə həsr etdiyi mənalı yaradıcılıq yolu neçə-neçə gənc aktyor nəsli üçün də əsl sənət məktəbidir. “Ən yaxşı kişi rolu”na görə nominasiyanın qalibi olaraq, ömür boyu bir aktyorun ala biləcəklərini Rasim Balayev yalnız Nəsimi roluna görə alıb. Həmin ərəfədə onun 25-26 yaşı vardı. Aktyor 31 yaşında isə Babək rolunu oynayıb. Görkəmli sənətkar Almaniyada, Türkiyədə, İranda, Tacikistanda, Osetiyada, çeçenlərin ilk kinosunda, Özbəkistanda, Moskvada, Gürcüstanda ekranlaşdırılan 70 filmdə sanballı rolları ifa edib. O, yalnız müsbət qəhrəman kimi sevilməyib, həm də cəmiyyətdəki mənfi tipləri tamaşaçının gözü qarşısında bütün çılpaqlığı ilə canlandırıb. Rasim Balayev 34 yaşında artıq Azərbaycanın Xalq artisti idi. Rasim Balayev onlarla əcnəbi filmin dublyajında da müxtəlif xarakterli obrazları səsləndirib. Rasim müəllimi 75 illiyi münasibətilə təbrik edir, ona cansağlığı arzulayırıq. *** Ailənin böyüyü Rasim boyca hündür olsa da, çəlimsizin biri idi, hətta kiçik bacı-qardaşları ondan böyük görünürdülər, amma bu uşağın oxumağa, öyrənməyə o qədər həvəsi vardı ki, beş yaşında artıq əlifbanı bilir, altı yaşında heç kimin köməyi olmadan kitab oxuyurdu. *** Ədəbiyyat müəlliminin sayəsində ədəbiyyata, incəsənətə marağı yaranır:  “Nədənsə, mənim şeir deməyim, əsərləri intonasiyalı oxumağım Nabat müəllimin xoşuna gəlirdi. Sinifdə dram əsərlərini rollara görə bölüşdürürdü. O vaxt radio-tamaşalar olurdu, onlara qulaq asırdım və bu da sinifdə rolumu yaxşı oynamağıma kömək edirdi”. Rayonda - xəstəxananın həyətində dostunun bir nəfərlə sözü çəpləşir. Dava başlayır. Rasim də, təbii ki, dostuna kömək etməyə çalışır və dava böyüyür. Onları tutub milis məntəqəsinə gətirirlər. Sovet milisi xuliqanlığa görə Rasimi həbs edir.  “100 gün Gəncə həbsxanasında yatdım. Həmin 100 gün mənə həyat dərsi oldu. Çox burnu yuxarı idim, həyat mənim üçün əyləncə idi elə bil. Həbsxana göstərdi ki, əslində, həyat nədir, necədir...” Rasim Balayev sevdiyi əmisi qızı ilə evlənmişdi. Bakıda bir erməninin evində kirayədə yaşayırdılar. Atasının ölüm xəbərindən sonra xəstəxanaya düşür. Həmin vaxt onun ikinci oğlu dünyaya gəlir. Rasim xəstəxanadan xəbər göndərir ki, oğlanın adını Asim qoyun, ölsəm, adının əvvəlinə “R” hərfini əlavə edərsiniz. Depressiya onu çox pis hala salmışdı. Rasim Balayevin ən yaxın dostlarından biri də Ramiz Əzizbəyli olub. Onların arasındakı dostluq münasibətləri zamanla şəxsi münasibətlərin pozulmasına, hətta düşmənçiliyə çevrilib. "Qızımı, Xədicə balamı o vaxt çox yaxın dostum Rasim Balayevin baldızı oğluna verdim. Amma alınmadı. Ayırdım. Hələ də ailə qurmayıb. Artıq neçə illərdir Rasimi danışdırmıram. Çox yaxın dost idik. Amma övladıma görə dostluğumuzun üstündən qara xətt çəkdim. Əvvəl peşmanlıq hissim olurdu, amma indi hiss edirəm ki, ondan qırıldığıma sevinirəm. Bu saat Rasim Balayev qapıdan içəri girsə, xoş gəldin deyərəm, süfrə açaram, amma ürəyimdəki də ürəyimdə qalar. Onu heç vaxt bağışlamayacam". ***  Ramiz Əzizbəylinin qızı Cəlalə Əzizbəyli isə atası haqqında danışarkən deyir: “Rasim əmi nə xəstə yatanda, nə də atam dünyasını dəyişəndə gəlmədi. Baxmayaraq ki, biz bir evli kimi olmuşuq. Sonradan soyuqluq yarandı. Görünür, onların da incidikləri məqamlar var. Amma Rasim əminin uşaqları atamı çox istəyirdilər, atam da onları əzizləyirdi. Çünki onun əlində böyümüşdülər. O, xəstə yatanda oğlanları bir neçə dəfə zəng vurmuşdu. Atam rəhmətə gedəndə də zəng vurub baş sağlığı vermişdilər”. İsa Hüseynovla Həsən Seyidbəyli Nəsimi roluna aktyor axtarırlarmış. Həsən Seyidbəyli Tədris Teatrında gördüyü oğlanı xatırlayır və tapşırır ki, ssenarini verin ona oxusun, sınağa gəlsin. Rasim ona xəstəxanada təqdim olunan ssenarini oxumadan qaytarır ki, mənim ömrümə az qalıb, sizi naümid etməyim. Rejissor Səhiyyə nazirinə zəng vurur. Xahişdən sonra Rasim yenidən müayinədən keçirilir və onu Mərdəkana - əsəb sanatoriyasına göndərirlər. *** 1973-cü ildə “Azərbaycanfilm”in Bədii Şurası Rasimin həyatı ilə bağlı çox önəmli bir qərar verir – onu Nəsimi roluna təsdiqləməklə həm də ölümün pəncəsindən qoparır. Rasim sevindiyindən uşaq kimi hönkür-hönkür ağlayırmış. “Nəsimi” filmi Rasim üçün uğurlu başlanğıc olur. Filmin ilk nümayişinin səhəri o, artıq bütün Sovet İttifaqında məşhur idi. Moskvada, kino festivalı vaxtı köşklərdə bir aktyorun şəkillərinin satıldığını görür. Şəkilləri Azərbaycandan gedən başqa sənətkarlar da görüb, Rasimə deyirlər ki, öz şəklindən birini də özün al. Rasim elə bilir, onunla zarafat eləyirlər, cavab verir ki, hə, mənə yaman oxşayır. Köşkə yaxınlaşıb şəkli alır və baxır ki, öz şəklidir, arxasında da haqqında məlumat yazılıb.

Sumqayıt Şəhər Məhkəməsində əmlakı qəsdən məhv etmə və ya zədələmədə təqsirləndirilən Mahir Quliyevin (şərti) cinayət işi üzrə məhkəmə istintaqı yekunlaşıb. Sozcu.az-ın əldə etdiyi məlumata görə, hakim Fikrət Əliyevin sədrliyi ilə keçirilən prosesdə hökm oxunub. Məhkəmənin hökmü ilə 3 il müddətinə azadlıqdan məhrumetmə cəzasına məhkum edilib. O, cəzasını ümumi rejimli cəzaçəkmə müəssisəsində çəkəcək. İttihama görə, hadisə 09 oktyabr 2022-ci il tarixdə, saat 01:30 radələrində Sumqayıt şəhəri, Qurd dərəsi bağları ərazisində qeydə alınıb. Belə ki, Mahir Quliyev atası Sahib Quliyevə (şərti)  məxsus kafe və bərbərxanadan ibarət olan qeyri-yaşayış obyektini içərisindəki əşyalarla birlikdə qəsdən yandırıb. Nəticədə o, zərərçəkmiş şəxsə ümumilikdə 5 786 manat maddi ziyan vuraraq atasının əmlakını qəsdən məhv edib.  Məhkəmə iclasında Mahir Quliyev özünü təqsirli bilib. O deyib ki, atası Sahib Quliyev ilə münasibətləri pisdir. Son zamanlar aralarında mübahisələr yaranmışdı. Səbəb isə atası 5 ilə əvvəl ona məxsus evi banka girov qoyaraq 30 000 ABŞ dolları pul götürməsi və həmin pulu ödəməməsi olub. Mahir Quliyev söyləyib ki, atası Sahib Quliyev həmin kreditin yalnız 16 000 manatını ödəyib. Bu səbəbdən də bankla Mahirin arasında mübahisə yaranıb. Daha sonra Sahib bankdan götürdüyü kredit ilə “Mersedes” markalı avtomaşın alıb. Aata ilə oğulun arasında söhbət zamanı Sahib ona təsərrüfat yaradacağını və onu da orada nəzarətçi qoyacağını deyib. Ancaq atası dediklərinin heç birini etməyib. Hadisədən bir gün əvvəl hər iki şəxs arasında mübahisə yaranıb. Mübahisə zamanı atası onu təhqir edərək kafedən qovub. O, kafeni yandıracağını bildirərək oradan çıxıb gedib. Daha sonra Mahir gecə saatlarında kafeyə bitişik olan bərbərxananı açaraq ora daxil olub və salfetka götürüb, obyektin içərisində olan əşyaları yığıb yandırıb. Bundan sonra o, kafeyə gedib və orada olan taxta stolları yığıb. Həmin stolları isə salfetka ilə yandırıb. Sonra digər otaqda da yanğın törədib. Mahir Quliyev əməlindən peşman olduğunu bildirib.pravda)

"Bizim ən böyük imtahanımız, şansımız bəlkə də uşaqlığımızdır. Çünki həyatımız o illərin kökləri, nəticələri, uğurlu və uğursuz səhifələri üzərində qurulur. Bu məqam isə çox vaxt özünü doğruldur. Uşaq ikən bol sevgiylə, nəvazişlə, doğru tərbiyəylə böyüyən, gözəl ailəylə müjdələnən insanlar adətən bu işığı davam etdirirlər". Axşam.az xəbər verir ki, bu sözləri aparıcı Azər Süleymanlı sosial şəbəkə hesabında yazıb. Oğlu ilə fotolarını yayımlayan Azər bunları əlavə edib: "Uşaqlığında sevgidən, diqqətdən, istilikdən məhrum olanlar, sığaldan, qucaqdan əskik qalanlar isə yaşa dolanda həyatın növbəti astanasında daha bir imtahan verirlər: ya həmin uşaqlıq travmaları üzərində şikəst talelərinə davam edir, həmin qaranlıqlarını qurduqları ailələrinə, eynən öz körpələrinə ötürür, ya da o ağrılardan, uşaqlıqlarının “buzlarından” dərs çıxarıb tam tərsinə, daha böyük məhəbbətə, sığala, qucağa çevrilirlər. Axı sevgisizliyin ağrısını, kasıblığını həm də ən yaxşı onlar bilirlər… Oğlum, layiq olduğun hər şeyi sənə verə bilirikmi, bilmirəm. Amma səni sevgidən əskik buraxmamaq üçün əlimdən gələni edirəm. Həyatın səni növbəti imtahanla sınağa çəkməsini istəmirəm. İnanıram, bilirəm ki, bir gün sən də öz balalarına sənə ən böyük yadigarımızı layiqincə ötürəcəksən… Səni sevirəm, səni sevirik, oğlum! Sən də həmişə sev, çox sev".

2023-cü ilin ilk yarısında hava nəqliyyat vasitələrinin sığortası üzrə ixtisaslaşan "İpək Yolu Sığorta" şirkətinin topladığı sığorta haqları 1,57 milyon manat təşkil edib. "Yeni Sabah"ın hesablamasına görə, bu ötən ilin eyni dövrü ilə müqayisədə 87,8% azdır. Başqa sözlə, son bir ildə sığorta şirkətinin yığımları üzrə itkiləri 11,34 milyon manat olub. 2022-ci ilin birinci yarısında "İpək Yolu Sığorta" 12,9 milyon manat sığorta haqqı toplaya bilmişdi.  Yığımların kəskin azalması fonunda sığorta şirkətinin ödənişlər cüzi azalıb. "İpək Yolu Sığorta"nın sığorta ödənişləri 2022-ci ilin ilk yarısı ilə müqayisədə bu ilin altı ayında 19,8% və ya 22 min manat azalaraq 90 min manata enib. 2022-ci ilin ilk yarısında bu rəqəm 112 min manat təşkil edib.  2022-ci ilin ilk yarısında "İpək Yolu Sığorta" topladığı hər 100 manatdan 0,9 manat ödənişə yönəldibsə, bu ilin eyni dövründə bu rəqəm 5,7 manat təşkil edib. Yəni, yığımlardakı kəskin azalma sığorta şirkətinin zərərliliyinə (ödəniş-yığım nisbəti) təsir göstərsə də, ümumilikdə zərərlilik hələ də çox aşağı olaraq qalır.  Xatırladaq ki, "İpək Yolu Sığorta" 1995-ci ildə yaradılıb. Onun nizamnamə kapitalı 14,77 milyon manatdır. Şirkətin səhmlərinin 96,53%-i “ASG Business Aviation” MMC-yə, 3,47 %-i isə "Azərbaycan Hava Yolları" QSC-yə məxsusdur.

“Rusiyanın Ukrayna ərazilərini işğal etməsini qəbul etmirik”. Bunu Türkiyə Böyük Millət Məclisinin (TBMM) sədri Numan Kurtulmuş Ankarada keçirilən XIV səfirlər konfransında çıxışı zamanı deyib. O bildirib ki, buna baxmayaraq, Türkiyə danışıqlar üçün qapını Rusiyanın üzünə bağlamır: "Türkiyə sülhün tərəfdarıdır".

Bakının Nərimanov rayonunda piyadanın xəsarət alması ilə nəticələnən yol-nəqliyyat hadisəsi baş verib. Ziya Bünyadov prospektində avtomobil yolu keçən 2003-cü il təvəllüdlü Rasim Mürvət Rasim oğlunu vurub. Yaralı xəstəxanaya çatdırılıb, müayinə zamanı ona qapalı kəllə-beyin travması diaqnozu qoyulub. Hadisənin təfərrüatı araşdırılır.

"Uşaqlıqda hər kəsin bir istəyi olur - böyümək. Amma böyüdükdən sonra hamı uşaqlığına dönmək istəyir, yaşaya bilmədiyi, bəyənmədiyi anları yenidən yaşamaq istəyir.  Zaman qurşağı fərqli insanlar yetişdirir, hər dövrün insanı fərqli olur. Məsələn, əvvəlin pionerləri ilə indinin şagirdlərini müqayisə etsək görərik ki, nəinki geyimlərində, hətta düşüncələrində də çox fərq var. Çünki zaman dəyişib. Gənclər çox fərqli olublar, onların həm düşüncələrində, həm görüntülərində, həm geyim tərzlərində fərq var". Bu sözləri Yenisabah.az-a psixoloq Gülnar Orucova deyib. Bu gün ölkəmizdə yeniyetmələrin yaşından çox böyük görünməsi, buna can atması barədə danışan psixoloq bunun səbəblərini açıqlayıb:  "Müxtəlif ailə tipləri var. Bu ailə tiplərində uşaqların hərəsi bir cür tərbiyə edilir. Hər uşaq öz evinin aynasıdır sözü boşuna deyil. Avtoritar ailə tiplərində uşaq ailəyə tabe olur, onlar nə istəyirsə, onu da edir. Onlar uşağı özünə o qədər tabe edir ki, həmin uşaq azad olacağı günü gözləyir, tez böyümək istəyir. Bu zaman da ortaya başqa problemlər çıxır, bəzən uşaqlar zamansız böyüyürlər, onlar özünü böyük göstərmək üçün bəzən zərərli vərdişlərə qurşanır, siqaret çəkir, qızlar fərqli geyimlərdən, kosmetikalardan istifadə etməyə başlayır, hansı ki, 18 yaşa qədər həmin kosmetikalar üz dərisi üçün uyğun deyil. Bu, dermatoloqlar tərəfindən də qəbul olunmur.  Ən əsası isə sosial şəbəkələrdə gördükləri onlara təsir edir. Xarici videolara baxaraq örnəyi onlardan götürürlər. Nədənsə bizdə Avropanın ancaq pis tərəfləri örnək götürülüb inkişaf etdirilir. Biz avropalaşmaq deyəndə elə bilirik ki, soyunmalıyıq, çılpaq şəkillər çəkdirməliyik, dodağımıza, burnumuza, qaşımıza müxtəlif pirsinqlər etdirməliyik, bütün bədənimizə döymə vurdurmalıyıq.  Valideyn nəzarəti hər zaman övladın üzərində olmalıdır. Övlad bunu kontrol kimi düşünməməlidir. Nəzarət hökmən olmalıdır. Bəzən mənim adını belə bilmədiyim sosial şəbəkəni 13 yaşlı yeniyetmə danışır.  Valideyn elə bilir ki, gedib pul qazanırsa, övladına lazım olanları alırsa, onun üçün hər şey etmiş sayılır. Bu belə deyil!" Onun sözlərinə görə, yeniyetmələrin yaşından böyük görünmək istəməsində əsas günahkar sosial şəbəkələr və orada gördükləridir: "Bu gün 5-6-cı sinifdə oxuyan qızlar elə geyimlər geyinirlər ki, adam dəhşətə gəlir. Qaşlarını nazik formada alırlar. Baxıb şoka düşürəm ki, görəsən, valideyn hara baxır? Valideyn özünü bu gün elə bir yerə qoyub ki, onun sözü eşidilmir, ondan yalnız hansısa tələblər edilir.  Burada əsas problem sosial şəbəkələrdir. İnsan nə görürsə, odur, beyin gördüyünü şəkilləndirir və onu əks etdirməyə başlayır. Bu baxımdan bugünkü yeniyetmələr gəncdən daha çox orta yaş təbəqəyə uyğun gəlirlər. Onların düşüncələri də fərqlidir. Bu gün yeniyetmələr belə olduğu üçün erkən nikahların, evdən qaçmaların sayı da artır. Buna əsas səbəb onların zamansız böyümələridir. Özlərini böyük kimi göstərib istədikləri insanla tanış olub danışırlar sonra da bu cür problemlərlə qarşılaşırlar.  Əgər valideyn övladın sevgi, diqqət, qayğı verməsə, uşaq özünü sanki böyümüş kimi göstərib o sevgini ətrafdakı hansısa əks cinsdə axtarmağa çalışır".