Oktyabrın 1-dən qüvvəyə minən yeni qaydalara əsasən, Azərbaycanda icazəsiz tikilən obyektlərin su təchizatı və kanalizasiya şəbəkəsinə, elektrik şəbəkəsinə və qaz şəbəkəsinə qanunsuz qoşulması ilə bağlı cəzalar sərtləşdirilir. Eyni zamanda, Cinayət Məcəlləsinə edilən dəyişikliyə əsasən, tələblərin pozulmasına görə təbii qaz, su, kanalizasiya, elektrik və ya istilik enerjisi təchizatı müəssisələrinin vəzifəli şəxslərinin məsuliyyəti də nəzərdə tutulur. Bəs kommunal istiqamətdə edilən ciddi dəyişiklik fərdi yaşayış evlərinin də qiymətlərinə təsir edəcəkmi? Mövzu ilə bağlı Yenisabah.az-ın suallarını cavablandıran əmlak məsələləri üzrə ekspert Elnur Fərzəliyev bu dəyişikliyin qiymətlərə də təsir edəcəyini bildirib: “Yeni qərar həm çıxarışlı torpaq sahələrinin, həm də çıxarışlı həyət evlərinin qiymətini artıracaq. Digər tərəfdən çıxarışı olmayan torpaq sahələrinin və tikilməkdə olan həyət evlərinin qiymətlərində kəskin enmələr olacaq. Çünki torpaq sahəsi alan adam orada nə isə tikmək istəyir, evi tikdikdən sonra həmin adam kommunikasiya xətləri çəkə bilməyəcəksə, təbii ki, orada heç kim yaşamaq istəməyəcək, istəsə belə yaşaya bilməyəcək. Bu qiymətlərə ciddi şəkildə təsirini göstərəcək”. Ekspertin sözlərinə görə, çıxarışsız evlərə çıxarışların verilərsə, bu, dövlətin də böyük gəlir əldə etməsinə səbəb olacaq: “Təbii ki, bu addım çıxarışsız həyət evlərinin sayının azalması üçün atılıb. Çünki yüz minlərlə çıxarış ala bilməyən fərdi yaşayış evləri var. Amma həm də buna alternativ addımlar atılmalı idi. Düşünürəm ki, çıxarışı olmayan evlərin çıxarışla təmin olunmasına başlanmalı və paralel olaraq digər istiqamətdə işlər görülməli idi. Hələ ki, tikintilərin dayandırılması ilə bağlı bu cür addım atılıb deyə düşünürəm. Yəqin ki, bu addım effektiv olar.  Amma istənilən halda, çıxarışı olmayan həyət evlərinə çıxarışların verilməsi yalnız vətəndaşların hüquqlarının qorunub tanınması deyil, bu həm də dövlətin bu sahədən böyük gəlirlər əldə etməsinə səbəb olacaq. Çünki bu sahədə olan boşluqlara görə - çıxarışların olmamasına görə dövlət ciddi şəkildə itkilərə məruz qalıb.  Çıxarışı olan həyət evləri əmlak vergisi, torpaq vergisi ödəyir, sığortalanır, alqı-satqı zamanı hər kvadratına görə vergi ödənir və s. Amma çıxarış olmadığı halda dövlət bu gəlirlərdən məhrum olur. Bu baxımdan işlər paralel aparılsaydı, daha yaxşı olardı.  Nəticə olaraq, yeni qərar çıxarışlı həyət evlərinin qiymətini artıracaq, çıxarışı olmayanların qiyməti isə aşağı düşəcək”.

"Gözümün qarşısında iki qadının meyitini yandırdılar". Bu fikir qanunsuz erməni silahlı birləşmələrinin tərkibində Xocalı rayonunun Meşəli kəndində azərbaycanlılara qarşı soyqırımı törətməkdə təqsirləndirilən Vaqif Xaçatryanın noyabrın 1-də keçirilən məhkəmə prosesində zərərçəkmiş Əli Mehrəliyevin ifadəsində əksini tapıb. O, ifadəsində qeyd edib ki, kəndə hücum zamanı atası və dayısı oğlu güllələnərək öldürülüb: "Kəndin bir neçə sakininin qətlə yetirilməsinin şahidi olmuşam. Gözümün qarşısında qətlə yetirdikləri iki qadının meyitini yandırdılar. Atamın meyitini dəfn etdikdən sonra çox əziyyətli günlər yaşadıq. Kənddən çıxanda əliyalın idik". Zərərçəkmiş Sədaqət İsmayılova isə istintaqa verdiyi ifadəsində deyib ki, Qarabağ müharibəsi başlayanda həyat yoldaşı Tahir könüllü şəkildə döyüşlərə qatılıb: "Mənə zəng edib dedilər ki, yoldaşın şəhid olub. Daha sonra məlum oldu ki, Tahir Meşəli soyqırımı zamanı öldürülüb. Həmin gün ermənilər evlərimizə od vurub yandırmışdılar". Qeyd edək ki, hər iki zərərçəkmiş üzrlü səbəbdən məhkəmə prosesində iştirak edə bilmədiklərinə görə onların ifadələri elan olunub. /Report/

Pakistan Azərbaycan xalqı ilə qardaşlıq əlaqələri nümayiş etdirərək, Ermənistanı bu günə qədər ölkə kimi tanımır. Sozcu.az xəbər verir ki, bunu Pakistan Silahlı Qüvvələrinin Quru Qoşunları komandanı Asim Muniri noyabrın 1-də Bakıda Azərbaycan Prezidenti İlham Əliyevin qəbulunda olan zaman deyib. Asim Munir İkinci Qarabağ müharibəsində əldə olunan Qələbə və bu ilin sentyabrında həyata keçirilən antiterror tədbirlərində Azərbaycanın qazandığı uğurlar münasibətilə təbriklərini çatdırdı, bunun Pakistanda böyük sevinclə qarşılandığını qeyd etdi. Qonaq Asim Munir Cəmmu və Kəşmir məsələsində ölkəmizin dəstəyinə görə minnətdarlığını bildirdi.

Ağsu rayonunun ülgüc kəndində yaşayan Qarabağ qazisi Babayev Rabil Kamal oğlu intihar edib.  Sozcu.az xəbər verir ki, Ağsu rayonunun Ülgüc kənd sakini 44 günlük Vətən savaşının qazisi Babayev Rabil Kamal oğlu oktyabr ayının 30 - da, təxminən saat 07:08 radələrində həyətlərində olan ağacdan özünü asaraq intihar edib. Ailə üzvləri hadisədən axşam 19:00 radələrində xəbər tutublar.  Qazinin döyüş yoldaşlarının verdiyi məlumata görə, Rabil Babayevin sosial durumu çox ağır olub. Dəfələrlə işlə təmin olunması üçün aidiyyəti qurumlara müraciət etsə də, qazinin sosial problemi həllini tapmayıb. Sonunda süründürməçilikdən bezən qazi canına qəsd edib. 

Vaqif Xaçatryanın dəstəsi qayınatanın evimin altında diri diri yandırdı. News24.az-ın məlumatına görə, bunu Yasamal rayon məhkəməsində Xocalı rayonunun Meşəli kəndində azərbaycanlılara qarşı soyqırım törətməkdə təqsirləndirilən Vaqif Xaçatryanın cinayət işi üzrə məhkəmə prosesində zərərçəkmiş Əli Behbudov deyib. O bildirib ki, Aramis, Armais, Vaqif və qardaşı Qürgen Meşəli kəndinə hücum edən dəstəyə başçılıq edib: "Həmin adamlar evimizi yandırdı, maşınımı güllələdi. Mikrafonla çıxırdılar ki, kənddən çıxın. Yolumuz Badara kəndindən keçirdi. Yolumuzu kəsdilər, bizi qoymadılar o yoldan istifadə edək. Bizə həm dostluq, həm düşmənçilik edirdilər. Əvvəlcə onlar özlərini bizim evin adamı kimi hesab edirdi, gəlib gedirdilər, sonradan qənim kəsildilər. İndi burda məhkəmə qarşısındadır deyə, boynuna almır. Mən də onun yerinə olsam, boynuma almaram". Zərərçəkmiş bildirib ki, hadisədən bir həftə əvvəl azərbaycanlıların silahlarını yığıblar.  Qeyd edək ki, Meşəli soyqırımı ilə bağlı beynəlxalq axtarışda olan Ermənistan vətəndaşı Xaçatryan Vaqif Çerkezoviç bu ilin iyulunda Laçın sərhəd-keçid məntəqəsində saxlanılıb. Onun üzv olduğu cinayətkar dəstə dekabr ayında Xocalı rayonunun Meşəli kəndində 25 nəfər azərbaycanlını öldürüb, 14 nəfərə xəsarət yetirib, 358 nəfər azərbaycanlını isə qanuni yaşadıqları yerdən didərgin salıblar. Ona qarşı Cinayət Məcəlləsinin 103-cü (Soyqırımı-hər hansı milli, etnik, irqi və ya dini qrupu, bir qrup kimi bütövlükdə və ya qismən məhv etmək məqsədilə qrup üzvlərini öldürmə, qrup üzvlərinin sağlamlığına ağır zərər vurma və ya onların əqli qabiliyyətinə ciddi zərər vurma) və 107-ci (Əhalini deportasiya etmə və ya məcburi köçürmə-əhalini qanuni yerləşdiyi yerlərdən başqa ölkəyə qovma və ya digər məcburi hərəkətlərlə didərgin salma) maddələri ilə ittiham elan olunub, barəsində həbs qətimkan tədbiri seçilib. Cinayət işi üzrə 59 nəfər zərərçəkmiş qismində tanınıb.

“Levon Mnatsakanyanın Bakıda öldürülməsi ilə bağlı xəbərləri təkzib edirəm”. Sozcu.az Ermənistan KİV-nə istinadən xəbər verir ki, bunu erməni hərbi əsirlərin Avropa İnsan Haqları Məhkəməsindəki nümayəndəsi Siranuş Saakyan deyib. Xatırladaq ki, bir neçə gündür ki, Ermənistanən bəzi KİV-ləri özünü buraxmış qondarma “Artsaxın keçmiş müdafiə naziri” Levon Mnatsakanyanın Bakıda işgəncələrə məruz qalaraq öldüyü barədə xəbər tirajlayır. Xəbərin mənbəyi kimi isə ehtiyatda olan polkovnik Volodya Hovhannisyana istinad olunur. Erməni hərbi əsirlərin Avropa İnsan Haqları Məhkəməsindəki nümayəndəsi Siranuş Saakyan onu da bildirib ki, Levon Mnatsakanyanın Bakıda işgəncələrə məruz qalması barədə də əllərində heç bir fakt yoxdur. Azərbaycanda inidyə kimi nə qədər erməni əsirinin öldüyü barədə suala Saakyan konkret cavab verməyib. Qeyd edək ki, 1965-ci il təvəllüdlü Levon Mnatsakanyan sentyabrın 29-da “Laçın” sərhəd-buraxılış məntəqəsində saxlanılıb. Bu barədə Azərbaycan Respublikasının Dövlət Sərhəd Xidməti (DSX) məlumat yayıb. Saxlanılan şəxs Bakı şəhərinə gətirilib və barəsində müvafiq qərar qəbul edilməsi üçün aidiyyəti dövlət orqanlarına təhvil verilib. L.Mnatsakanyan general-leytenant hərbi rütbəsi daşıyır. O, 2015-ci ildən 2018-ci ilin dekabr ayına kimi Qarabağ separatçılarının "müdafiə naziri" olub. Mnatsakanyan 1965-ci il sentyabrın 14-də Azərbaycan SSR-in Əsgəran rayonunda anadan olub. 80-ci illərin sonunda Dağlıq Qarabağda separatçı hərəkat baş qaldırdıqdan sonra L.Mnatsakanyan bölük komandiri kimi Azərbaycan torpaqlarına təcavüzdə iştirak edib.  Sonra qondarma “Dağlıq Qarabağ ordu”sunda müxtəlif vəzifələrdə çalışıb. 2003-cü ildə ona general-mayor rütbəsi verilib. Daha sonra Mnatsakanyan 1 il ərzində Rusiya Baş Qərargah Akademiyasında təhsil alıb. 2005-ci ildə Qarabağa qayıdaraq separatçı ordunun “müdafiə nazirinin müavini", 2007-ci ildə isə “baş qərargah rəisi” təyin olunub. 5 il sonra - 2012-ci ildə Ermənistan prezidentinin fərmanı ilə Ermənistan Silahlı Qüvvələrinin baş qərargah rəisinin müavini vəzifəsinə aparılıb. 2015-ci ildə qondarma “Dağlıq Qarabağ respublikası"nın başçısı Bako Saakyan ona general-leytenant rütbəsi verib və separatçıların "müdafiə naziri" təyin edib. Mnatsakanyan 2018-ci ilin dekabr ayına qondarma “Dağlıq Qarabağ respublikasının ordusu"na rəhbərlik edib.modern)

Azərbaycan Respublikasının Prezidenti İlham Əliyev noyabrın 1-də Pakistan Silahlı Qüvvələrinin Quru Qoşunları komandanı Asim Muniri qəbul edib. Sozcu.az xəbər verir ki, bu barədə məlumatı Azərbaycan Prezidentinin Mətbuat Xidməti yayıb.

Bakı şəhər Nəsimi rayonunda qonşular arasında dava-dalaş olub. Sozcu.az xəbər verir ki, oktyabrın 30-u saat 23 radələrində 1969-cu il təvəllüdlü Səttərov Sayruz Hidayət oğlu mübahisə nəticəsində qonşuları - Ağadadaş Qurbanov küçəsi 21 ünvanında kirayədə yaşayan 1959-cu il təvəllüdlü Çabanova Marina Yevgenyevna və 1987-ci il təvəllüdlü qızı Vəliyeva Nərminə Mayis qızının sifət nahiyəsinə yumruqla zərbələr endirib. Zərbələrin təsirindən M.Çabanova huşunu itirib. O, oktyabrın 31-i saat 09 radələrində ayılıb və qızını yataq otağında döşəmənin üzərində ölmüş vəziyyətdə aşkar edib. Faktla bağlı cinayət işi başlanıb, Sayruz Səttərov şübhəli şəxs kimi tutulub.qafqazinfo)

Ermənistanın Baş naziri Nikol Paşinyan Rusiyaya qarşı demarşlar etməyə davam edir.  Sozcu.az Ermənistan KİV-lərinə istinadla xəbər verir ki, Baş nazir 9 noyabr 2020-ci il üçtərəfli bəyannaməsində yolların açılmasını müəyyən edən 9-cu maddəni ləğv edəcəklərini bildirib.  KİV yazır ki, erməni nazir uzun müddətdir ki, bununla bağlı açıq-aşkar eyhamlar vurur, fikirlərini komanda üzvlərinə çatdırmağa çalışır:  “Amma dünən, 2024-cü ilin büdcə layihəsinin müzakirəsi zamanı o, bunu demək olar ki, açıq mətnlə söylədi və bildirdi ki, Milli Təhlükəsizlik Xidmətində xüsusi bölmə yaradılacaq və onun vəzifəsi rabitənin təhlükəsizliyini təmin etmək olacaq.  “İndi biz Milli Təhlükəsizlik Xidmətinin tərkibində xüsusi bölmənin yaradılması prosesindəyik, onun məqsədi rabitənin təhlükəsizliyini təmin etmək olacaq. Bununla yanaşı, respublika ərazisindən insanların, yüklərin, malların və nəqliyyat vasitələrinin keçməsi üçün patrul polisini işə cəlb etdik”.  Xatırladaq ki, həmin sənədin 9-cu maddəsində “kommunikasiyalara nəzarət Rusiya FSB-nin sərhəd xidməti orqanları tərəfindən həyata keçirilməlidir” bəndi yer alsa da, rəsmi İrəvan həmin sənədin müvafiq maddəsini ləğv etməklə Moskvaya meydan oxumağa başlayıb. 

Onların məqsədi bizim kəndi məhv etmək idi və başda duran da Vaqif Xaçatryanın rəhbərlik etdiyi dəstə idi. Sozcu.az xəbər verir ki, bunu qanunsuz erməni silahlı birləşmələrinin tərkibində Xocalı rayonunun Meşəli kəndində azərbaycanlılara qarşı soyqırımı törətməkdə təqsirləndirilən Vaqif Xaçatryanın noyabrın 1-də keçirilən məhkəmə prosesində zərərçəkmiş Salman Rəhimov deyib. O vurğulayıb ki, erməni silahlıları gecə vaxtı, insanlar yatdığı yerdə Meşəliyə hücum ediblər: "Hadisə vaxtı mən və bacım ayağımızdan, çiynimizdən güllə yarası aldıq. Səsucaldıcı ilə hamımızı çölə çıxarıb, gülləbaran etdilər. Kəndimiz minaatanlardan, avtomat və pulemyotlardan atəşə tutulurdu. Nənəm baş nahiyəsindən güllə yarası almışdı. Bu hadisələrdə daha çox Badara kəndinin sakinləri iştirak edirdilər. Bütün kəndi mühasirəyə alıb məhv etmək istəyirdilər. Hücum edənlərin başında elə Vaqif Xaçatryan dayanırdı. Daha sonra Valeriy, Armais, Ermes adında olan erməni hərbçilərin dəstəsi qəddarlıq edib. Məhkəmədən Vaqifin ən ağır cəza almasını tələb edirəm".

Orxan Hacılının qanunsuz saxlanmasına münasibət barədə:  Bu işin məhkəmə perspektivi yoxdur. Bu gün Orxanı polis şöbəsində saxlayanlar da bunu yaxşı bilir. Çünki, istənilən halda, qəzanın baş verməsinin səbəbkarı Orxan deyil. İqtidar yandaşlarının paylaşdığı videokadrlarda bunu hamı görüb.  Bu halda, iqtidarın bu davranışının motivi nədir? Dünəndən baxıram, cəbhə funksionerləri də bu qanunsuz saxlanmanı pisləyən açıqlamalar verir. İqtidarın bu işdə düzgün hərəkət etdiyini iddia edən heç bir açıqlamaya hələlik rast gəlməmişəm. Bu işin beynəlxalq aləmdə də iqtidar üçün müəyyən neqativ nəticələri olacaq. Belə olduğu halda, müxalifətin rejimə boyun əyməyən hissəsinin birliyinə, ölkədə ədalət hissini itirməyən insanların etirazına, beynəlxalq aləmdə nüfuzuna xələl gətirən bu addımın atılması iqtidarın nəyinə lazımdır? Razılaşaq ki, bu hansısa müstəntiqin, yaxud polis rəisinin təşəbbüsü ilə olan hadisə deyil. Orxan Hacılı barədə qəbul edilən qərarın arxasında mövcud rejim durur. İqtidardakılar bu qədər axmaqdılarmı ki, nümayişkaranə şəkildə bu cür rüsvayçı qərar qəbul edirlər. Belə deyil. Nə etdiklərini, bu qanunsuzluğa yol verməklə cəmiyyətə hansı mesajı verdiklərini çox yaxşı bilirlər. Beləliklə, Qarabağ uğrunda gedən müharibələrdə gerçək müxalifətin sağlam mövqeyinə baxmayaraq, rejim hesab edir ki, bu 1993-cü ildən bu yana şərti olaraq "AXCP - Musavat" cütlüyünə qarşı davam edən soyuq vətəndaş müharibəsinə son qoymaq üçün kifayət deyil. İqtidarın məntiqinə görə, AXCP və Musavat konkret olaraq İlham Əliyevə biət etdiyini bəyan etməyincə onlara qarşı "bizimlə olmayanlar bizə qarşıdır" prinsipinə əsaslanan bolşevik metodlarından istifadə olunacaq. Son otuz il ərzində iqtidar ölkədə irticaya qarşı müqavimət göstərə biləcək qüvvələri daim təzyiq altında saxlamaqla onları faktiki qanundan kənar elan etmək və bu yolla cəmiyyətdə xof yaratmaq siyasətini həyata keçirib. Orxan Hacılıya qarşı yol verilən qanunsuzluq da məhz bu məqsədlə törədilir. Bu arada özlərini daim müstəqil sayan, onları şərti olaraq "avtobus müxalifəti" adlandıranlara etiraz edən partiya sədrlərinə də müraciət etmək istəyirəm. Orxan Hacılıya qarşı yol verilən qanunsuz əməllərin yuxarıda qeyd etdiyim motivləri sizlərə məlum deyilmi? Yığışın bir açıqlama verin, ortaya ortaq mövqe qoyun. Əgər bu hadisədə iqtidarın hərəkəti düzgündürsə, birgə açıqlama verin ki, hər şey qanun çərçivəsindədir, antimilli müxalifət iqtidara böhtan atır və sairə. Yoxsa, sizlər yalnız prezident aparatından göstəriş olanda birgə bəyanata imza atırsız?  Orxan üçün isə qətiyyən narahat olmağa dəyməz. Kişinin başına iş gələr. Onun bu sınaqdan daha mətin, daha mübariz, daha güclü çıxacağına əminəm. Düzdür, birinci dəfə deyil, amma yenə də, qəzan mübarək olsun, Orxan! Vaqif Hacıbəyli, hüquqşünas 

İsrail qırıcıları Qəzzada Cəbaliyə qaçqın düşərgəsinə zərbələr endirib. Sozcu.az Türkiyə mediasına istinadən xəbər verir ki, hücumlar nəticəsində azı 100 nəfər həlak olub. Məlumata görə, dinc sakinlərin yaşadığı binalara 6 zərbə endirilib. *** Qaçqın düşərgəsinə zərbə nəticəsində ölən və yaralananların sayı 400-ə çatıb. Bu barədə Qəzza Daxili İşlər Nazirliyinin məlumatında deyilir. Ölənlərin əksəriyyəti qadın və uşaqdır.

Ukraynanın şərqində və cənubunda vəziyyət çətin olaraq qalır, ruslar Ukrayna ordusunun mövqelərinə basqın etməyə cəhd edib. Sozcu.az xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb. Məlumata görə, Kupyansk istiqamətində düşmən Xarkov vilayətinin Sinkovka, İvanovka və Luqansk vilayətinin Nadejda ərazilərində uğursuz hücum əməliyyatları həyata keçirib. Burada əsgərlərimiz 10-dan çox hücumu dəf edib. Düşmən Xarkov vilayətinin Pesçanı, Novoserqiyevka və Çerneşçina rayonlarına hava zərbələri endirib. Baxmut istiqamətində işğalçılar Donetsk vilayətinin Kleşçievka və Andreyevka yaxınlığında itirilmiş mövqelərini bərpa etməyə uğursuz cəhd ediblər və Donetsk vilayətinin cənubunda uğursuz hücum əməliyyatları həyata keçiriblər. Vurğulanıb ki, ruslar Donetsk vilayətinin Konstantinovka yaxınlığında da hava zərbəsi endirib.

Ermənistanda 7-ci sinif üçün nəzərdə tutulan “Ermənistan tarixi” dərsliyində Qarabağ Azərbaycan ərazisi kimi göstərilib. Sozcu.az “Armenia Today”a istinadən xəbər verir ki, kitabdakı xəritələrdən birində Qarabağ Azərbaycanın bir hissəsi kimi təqdim olunub. Qeyd edək ki, dərsliyin müəllifi Smbat Hovhannisyandır. Sözügedən xəritə dərsliyin 80-ci səhifəsində yerləşdirilib.konkret)

Qarabağ məsələsi hələ qapanmayıb. Musavat.com erməni mediasına istinadən xəbər verir ki, bu sözlər Ermənistan parlamentinin hakim “Vətəndaş sazişi” fraksiyasından olan deputatı Akop Aslanyan tərəfindən səslənib. O, yerli mətbuata müsahibəsində “Qarabağ münaqişəsini həll olunmuş adlandıran” Rusiyanın xarici işlər naziri Sergey Lavrova etiraz edib. “Qoy Lavrovlar getsinlər dəfnə yarpaqlarını (rusça лавро́вый лист-dəfnə yarpağı) qurutsunlar. Ən böyük rolu o oynadığına görə, ümumiyyətlə, Rusiya faktorundan danışmayaq. Lavrovlar və Zaxarovalar öz işləri ilə məşğul olsunlar” - deyə deputat Akop Aslanyan bildirib. Erməni siyasətçi “çoxəsrlik erməni-rus dostluğunun mövcud olmadığını” sözlərinə əlavə edib.

İsrail tərəfi Qəzzada Cəbaliyə qaçqın düşərgəsinə zərbə endirdiyini etiraf edib. Sozcu.az xəbər verir ki, İsrail ordusunun nümayəndəsi Riçard Heçt HƏMAS komandirini zərərsizləşdirmək məqsədilə düşərgəyə zərbə endirildiyini açıqlayıb. O, olayda dinc sakinlərin ölməsini sadəcə “müharibə faciəsi” adlandırıb: “HƏMAS komandiri dinc sakinlərin arxasında gizlənirdi”. Qeyd edək ki, sözügedən düşərgəyə zərbə nəticəsində azı 400 dinc sakin ölüb və yaralanıb.

Ermənistan mediası Qarabağda məhv edilən erməni separatçıların qandallanaraq Bakıya gətirilməsi ilə bağlı yeni iddialar irəli sürüb. Sozcu.az Publika.az-a istinadən xəbər verir ki, keçmiş separatçı “rəhbərlər” Araik Arutyunyan, Bako Saakyan və Arkadi Qukasyanın helikopterlə Ermənistana aparılması üçün Bakı ilə danışıqlar aparılıb. “Hraparak” nəşri yazır ki, Azərbaycan buna qəti şəkildə razı olmayıb: “Laçın sərhəd-keçid məntəqəsindən keçmək istəyən (qondarma) “milli təhlükəsizlik naziri” Ararat Melkumyan və “daxili işlər naziri” Karen Sərkisyan saxlanılıb. Bildiriblər ki, keçmiş "liderlər” təslim olacaqları təqdirdə onlar buraxılacaq. Bundan xəbər tutan keçmiş “liderlər” gizləndikləri yerdən çıxıb, bundan sonra digərlərinin keçidinə icazə verilib”. Separatçıların silahlı dəstələrinin “komandiri” olmuş Levon Mnatsakanyan isə Laçın postundan keçmək istəyərkən saxlanılıb. Nəşr iddia edir ki, Azərbaycan sərhədçiləri Mnatsakanyanı saxladıqda ondan “Qarabağ Azərbaycandır” deməsini istəyiblər. Erməni mediası onun bunu deməkdən imtina etdiyini iddia edir, lakin bəzi mənbələr Mnatsakanyanın “Qarabağ Azərbaycandır” dediyini bildirirlər. Separatçı “liderlərin” qandallanaraq Bakıya gətirilməsinin ermənilər üzərində ciddi ruh düşkünlüyü yaradıb. Çünki onlar “qəhrəman” elan edilmişdi və həmişə düşünürdülər ki, işğal davam edəcək. Azərbaycan torpaqlarını işğaldan azad edəndən sonra erməni separatizmini tarixin zibilliyinə göndərdi və separatçıları qandallayaraq, “erməni xülyalarını” məhv etdi.

Baş Prokurorluq və Daxili İşlər Nazirliyi Coratda 2 nəfərin öldürülməsi, 4 nəfərə xəsarət yetirilməsi barədə birgə məlumat yayıb. Pravda.az-ın məlumatına görə, açıqlamada deyilir ki, oktyabrın 28-də Sumqayıt şəhərinin Corat qəsəbəsi ərazisində yerləşən fərdi yaşayış evlərindən birində odlu silahdan açılan atəş nəticəsində 2 nəfərin ölməsi və 4 nəfərin xəsarət alması faktı ilə bağlı Sumqayıt şəhər prokurorluğunda Cinayət Məcəlləsinin müvafiq maddələri ilə cinayət işi başlanaraq istintaq aparılır. Prokurorluq və Daxili işlər orqanlarının əməkdaşları tərəfindən keçirilən təxirəsalınmaz tədbirlər nəticəsində əvvəllər məhkum edilmiş 1987-ci il təvəllüdlü Müşfiq Tağıyevin qonşusu Anar Fərəcovdan qisas almaq məqsədilə sonuncunun ailəsinin yaşadığı həyətə gələrək evin divarlarına benzin töküb yandırması və özünün hazırladığı partlayıcı qurğunu partlatdıqdan sonra odlu silahdan atəş açaraq evdən çıxan Dağbəyi Fərəcov və Susana Karakaşı qəsdən öldürməsi, Tərlan Fərəcova və Serkan Karakaşı, eləcə də onlara köməyə gələn qonşuları Etibar Sarıyev və Mehman Sarıyevi qəsdən öldürməyə cəhd etməsinə əsaslı şübhələr müəyyən edilib. Keçirilmiş tədbirlərlə cinayətin törədilməsində istifadə edilən “İJ-18” markalı tüfəng, patronlar, barıt, benzin və digər əşyalar saxlandıqları yerlərdən aşkar edilərək götürülüb. İstintaq-əməliyyat tədbirləri nəticəsində şübhəli şəxs qismində saxlanılan Müşfiq Tağıyev Cinayət Məcəlləsinin 120.2.4, 120.2.7 (xüsusi amansızlıqla və ümumi təhlükəli üsulla iki şəxsi öldürmə) 29, 120.2.3, 29, 120.2.4, 29, 120.2.7 (xüsusi amansızlıqla və ümumi təhlükəli üsulla ictimai borcunu yerinə yetirən iki şəxsi öldürməyə cəhd), 29, 186.2.1, 29, 186.2.2 (külli miqdarda ziyan vurmaqla yandırmaqla və partlatmaqla əmlakı qəsdən məhv etməyə cəhd) və 229.1-ci (qanunsuz olaraq partlayıcı qurğuları hazırlama) maddələri ilə təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib. Hazırda ibtidai istintaq davam edir. "Media nümayəndələri və sosial şəbəkə istifadəçilərindən qanunvericiliyinin tələblərinə riayət edilməsi və istintaq orqanı ilə dəqiqləşdirilməmiş məlumatların paylaşılmaması bir daha xahiş olunur", birgə məlumatda deyilir.

“Pensiya yaşının azaldılması bu gün gündəmdə deyildir və yəqin ki, gələcək də də aktual olmayacaq. Dünyada hələ bir ölkə yoxdur ki, göstərəsiniz, pensiya yaşı azaldılsın”. Bunu Modern.az-a müsahibəsində Milli Məclisin Əmək və sosial siyasət komitəsinin sədri Musa Quliyev bildirib. O, pensiya yaşının artırılacağını istina etməyib. Komitə sədri bildirib ki, pensiya yaşının artırılması bütün dünyada müşahidə olunur: “Ümumiyyətlə, insan ömrü uzanır. Azərbaycanda orta ömür 2021-ci ildə bir qədər azaldı. Bu da həm COVID, həm də Vətən müharibəsində gənc insanların dünyasını dəyişməsi ilə bağlı idi. Nəticələr orta ömür uzunluğuna öz təsirini göstərdi", - Musa Quliyev vurğulayıb. Komitə sədri qeyd edib ki, Azərbaycanda orta ömür kifayət qədər dinamik şəkildə artır. "2040, bəlkə də 2045-ci  ildə bizim orta ömür 80 yaşa gəlib çatacaqdır. Buna görə də pensiya yaşı məsələsi bir günlük, bir illik, ya da beş illik layihə deyil. Ən azı 30 illik dövrü əhatə edir. Biz 30 ilə uyğun olaraq əmək bazarını, sığorta sistemini, Pensiya Sığorta Fondunun imkanlarını, insanların yaşını nəzərə almalı və buna uyğun da bir qiymət götürməliyik”. Qeyd edək ki, hazırda Azərbaycanda kişilərin pensiya yaşı 65, qadınlarınkı isə 63.5-dir. Qadınların pensiya yaşı tədricən - 2027-ci ilədək 65-ə çatdırılacaq.

Azərbaycanda gələn il də minimum əməkhaqqının 345 manat olması nəzərdə tutulur. Bu, Hesablama Palatasının “2024-cü ilin dövlət büdcəsi haqqında” qanun layihəsinə rəyində əksini tapıb. Hazırda da ölkədə minimum əməkhaqqı 345 manatdır. Bəs bu məbləğ vətəndaşlara kifayət edirmi?  Məsələ ilə bağlı iqtisadçı-ekspert Rəşad Həsənov Yenisabah.az-a danışıb. O, hazırkı qiymət artımı fonunda bu məbləğin çox aşağı olduğunu bildirib: “345 manat çox aşağı əməkhaqqı səviyyəsidir. Hazırki şərtlər daxilində, xüsusilə son 2 ildə kəskin şəkildə qiymət artımı baş verdikdən sonra bu məbləğ çox azdır. Hazırki dövrlə 2020-ci ili müqayisə etdikdə indi xərclərin 30% çox olduğu müşahidə edilir.  Həssas sosial qruplar aspektindən bu göstərici daha sərtdir. Çünki onlar daha çox gündəlik tələbat, əraz məhsulları istehlakçısıdırlar ki, bu məhsulların da qiyməti daha kəskin şəkildə artıb.  Ölkədə əhalinin əhəmiyyətli bir qismi minimum əməkhaqqı ilə çalışır. Bu şəxslərin sayı təxminən, 400-500 mindir. Bu, böyük göstəricidir”.  Ekspert bildirib ki, sözügedən qərar hələ ki, müzakirə  mərhələsindədir. O, hökumətin minimum aylıq əməkhaqqını 2024-cü il üçün artıracağı qənaətində olduğunu qeyd edib:  “İndiki halda 2024-cü il üçün minimum aylıq əməkhaqqı miqdarı eyni qaldı demək olmaz, çünki hələlik sənəd müzakirə mərhələsindədir. Düşünürəm ki, bu mərhələdə hər hansı təkliflər ortaya çıxacaq və həmin təkliflərə əsasən müəyyən dəyişikliklər ediləcək. Ötən il də əməkhaqqı miqdarı eyni qalacaqdı, amma yanvar ayında hökumət reallığı gördü və daha adekvat addımlar atdı və minimum əməkhaqqı səviyyəsi artırıldı. Ümidlər hələ tam olaraq tükənməyib.  Bu prosesdə hökumətin əsas funksiyalarından biri tarazlığın tapılması və əhalinin az gəlirli sosial qruplarının müdafiə olunmasıdır. Bu baxımdan düşünürəm ki, növbəti bir neçə ay ərzində daha rasional qərarın qəbul edilməsini müşahidə etmiş olacağıq”. 

Yəmən rəsmi olaraq İsrailə müharibə elan edib. Sozcu.az xəbər verir ki, bu barədə Yəmən Silahlı Qüvvələrinin rəsmi nümayəndəsi, general Yəhya Sariye Anu məlumat verib.

“İsrailin Baş naziri Benyamin Netanyahu ilə ordu arasında gərginlik var, ölkədə çevrilişin olacağı ehtimal edilir”. Sozcu.az xəbər verir ki, bu barədə Ankaradakı Rusiya Araşdırmaları Mərkəzi məlumat yayıb. Bildirilir ki, bəzi analitiklər Netanyahunun xalqla ordunu qarşı-qarşıya gətirmək üçün HƏMAS-la əməkdaşlıq edir: “Baş nazir tez-tez əsgərlərlə foto çəkdirib paylaşsa da, müdafiə naziri Qallanta yaxın hərbçilərin Netanyahuya qəzəbli olduqları deyilir. ABŞ-ın dəstəklədiyi müdafiə naziri Yoav Qallant isə Netanyahuya müxalif rəqib kimi tanınır. Baş nazir HƏMAS-ın hücumuna hazırlıqsız yaxalandıqları, buna görə hər kəsin cavab verməli olacağını bildirib. Qallant isə onun “hər kəs” dedikdə ordu komandirlərini nəzərdə tutduğunu söyləyib”. Mərkəzin iddiasına görə, Qallant və keçmiş nazir Benni Qantz birləşərək Netanyahunu devirmək, HƏMAS-ın hücumlarına görə bütün məsuliyyəti onun üzərinə atmaq istəyirlər: “HƏMAS-ın hücumlarından 17 gün öncə Netanyahu və Qallant arasında ciddi mübahisə yaşandı və bu günlər ərzində onlar görüşmədilər. Beləliklə, HƏMAS hücumlarının əslində İsrail ordusu, kəşfiyyat və siyasi qruplar tərəfindən qəsdən təşkil edildiyi, hətta bunun üçün HƏMAS-a yardım olunduğuna dair iddialar getdikcə güclənir. Müxalif qüvvələr bununla İsraildəki hakimiyyət mübarizəsində qalib gəlməyi planlaşdırırlar”. Qeyd edək ki, həmçinin ordunun hazırda Baş nazirin əmrlərindən kənar hərəkət etdiyi iddia olunur.Globalinfo.az)

Livandakı Hizbullah təşkilatının ilk baş katibi və qurucusu Şeyx Sübhi Tüfeylinin İranla bağlı sözləri dünya gündəmində ciddi müzakirələrə səbəb olub. Sozcu.az Globalinfo.az-a istinadən xəbər verir ki, Tüfeyli Qəzzada baş verənlərə görə İranı ittiham edib. O, Tehranı Vaşinqtonla gizli əməkdaşlıqda günahlandırıb və Xameneini ittiham edərək, “O adam Məhəmməd peyğəmbərin və İmam Əlinin düşmənidir. Əhli-beytlə heç bir əlaqəsi olmayan şiəlik yaradır” - deyib.

Ermənistan prezidenti Vaaqn Xaçaturyan sabah Zəngəzura üç günlük səfərə gedəcək. Sozcu.az xəbər verir ki, bu barədə “Hraparak”  məlumat yayıb. “Məlumata görə, o, regionun bütün əsas icmalarına baş çəkəcək, regional hakimiyyət nümayəndələri və icma liderləri ilə görüşəcək. Region rəhbərliyinə bildirilib ki, prezident Zəngəzurun problemləri ilə tanış olmaq istəyir. Bununla belə, ölkənin siyasi rəhbərliyinin Zəngəzura “maraqları” son vaxtlar əhali arasında gərginliyə səbəb olub. Şənbə günü isə Paşinyan Zəngəzurda olub, patrul zabitlərinə baş çəkib”, – nəşr qeyd edir.