Rusiyanın üç regionuna dron hücumu olub. Sozcu.az xəbər verir ki, bu barədə Oryol, Kursk və Belqorod regionlarının qubernatorları teleqramda bildiriblər. Qeyd olunub ki, martın 12-də Rusiyanın Oryol şəhərində neft bazasında güclü yanğın olub. Sosial şəbəkədə olayla bağlı şəkillər və videolar paylaşılır. Sözügedən regionun qubernatoru Andrey Klıçkova görə, şəhərə pilotsuz uçan aparat düşüb. “Yanacaq-enerji kompleksi obyekti hücuma uğrayıb. Təcili xidmətlər alovlanmanın lokallaşdırılması üçün yerlərdə işləyirlər”, – o yazıb. Qubernatorun sözlərinə görə, partlayış sonucunda heç kəs yaralanmayıb. Bununla belə, yerli teleqram kanallar bölgədə hava hücumundan müdafiə sistemlərinin işlədiyini, partlayış səslərinin eşidildiyini deyirlər. Kursk vilayətinə də dron hücumu olsa da, fəsadlar barədə hələlik bilgi verilməyib. Regionun qubernatoru Roman Starovoyt ikisi təyyarə tipli olan üç dronun səmada vurulduğunu açıqlayıb. Eyni zamanda, Belqorod vilayətinin qubernatoru Vyaçeslav Qladkov regiona dörd partlayıcı maddənin atıldığını söyləyib. Onun sözlərinə görə, dronların atışları elektrik xətlərini zədələyib, yeddi yaşayış məntəqəsi işıqsız qalıb. Yaralanan olmayıb.

Bu gün Azərbaycanda Yel çərşənbəsi qeyd olunur. Sozcu.az xəbər verir ki, xalq arasında “Külək oyadan çərşənbə”, “Küləkli çərşənbə” kimi tanınan Yel çərşənbəsi ilaxır çərşənbələrin üçüncüsüdür. İnama görə, Yel çərşənbəsində oyanan yel, külək oyanmış suyu, odu hərəkətə gətirir. Qeyd edək ki, İlaxır - Torpaq çərşənbəsi martın 19-da qeyd olunacaq. Azərbaycana yaz fəsli martın 20-si Bakı vaxtı ilə saat 07:06:21-də daxil olacaq. Martın 20-21-i Azərbaycanda Novruz bayramı qeyd olunur. Novruz tətili isə 26 marta qədər davam edəcək.

Ukrayna hazırda NATO üzvü deyil və hazırki mərhələdə fransız döyüşçülərinə ehtiyacı yoxdur. Sozcu.az xəbər verir ki, bu sözləri Ukrayna Prezidenti Vladimir Zelenski xarici jurnalistlərin suallarını cavablandırarkən deyib. “Ukrayna dayandıqca, Fransa ordusu öz ərazisində qala bilər. Əgər Rusiya hansısa NATO ölkəsi ilə münaqişəyə girərsə, sizin övladlarınız NATO ölkələrindən birinə göndərilə bilər, amma bu başqa məsələ olacaq”, - Zelenski qeyd edib.

ABŞ nüvə silahlarının müasirləşdirilməsinin davam etdirilməsi üçün 19,8 milyard dollar büdcə vəsaiti ayırmağı təklif edib. Sozcu.az xəbər verir ki, bu barədə ABŞ administrasiyasının 2025-ci maliyyə ili üçün büdcə layihəsində bildirilib. “Büdcə 2022-ci il Milli Müdafiə Strategiyasının prioritetləri nəzərə alınmaqla, silahlarla bağlı fəaliyyətlər üçün 19,8 milyard dollar nəzərdə tutur. Bu da 2021-ci illə müqayisədə 4,5 milyard dollar çoxdur”, - məlumatda deyilib. Qeyd edilib ki, büdcə müəllifləri nüvə qüvvələrinin müasirləşdirilməsi proqramlarına, o cümlədən əmrlərin verilməsi, nəzarət və rabitə üçün informasiya şəbəkələrinə diqqət yetirirlər.

Sosial şəbəkələrin Rusiya və Ukrayna seqmentində Rusiya Hava-Desant Qoşunlarının baş komandanı general-polkovnik Mixail Teplinski və rusiyalı hərbi jurnalist Yeqor Quzenkonun hərbi əməliyyatlar zamanı öldürülməsi ilə bağlı məlumatlar yayılmaqdadır. Sozcu.az xəbər verir ki, Ukrayna Müdafiə Nazirliyinin Baş Kəşfiyyat İdarəsinin nümayəndəsi Andrey Yusov sözügedən məlumatların dəqiqləşdirildiyini bildirib. Qeyd edək ki, Rusiya tərəfi də hər hansı rəsmi açıqlama verməyib.

Beynəlxalq Cinayət Məhkəməsinin (BCM) hakimləri Putinin həbsinə qərar verən Tomoko Akaneni məhkəmənin prezidenti seçiblər. Sozcu.az xəbər verir ki, bu barədə “İnsayder” məlumat yayıb. Hakim Rosario Salvatore Aitala birinci vitse-prezident, hakim Reyn Alapini-Qansu isə ikinci vitse-prezident olub. Rəyasət Heyətinin üzvləri üç il müddətinə seçilir və dərhal səlahiyyətlərinə başlayırlar. O, ədliyyə orqanları, müdafiə nümayəndələri və zərərçəkmişlər arasında dialoqun təşviqinə, eləcə də iştirakçı və hələ Roma Statutunu ratifikasiya etməmiş dövlətlərlə dialoqun gücləndirilməsinə diqqət yetirəcəyini vəd edib. Qeyd edək ki, Tomoko Akane 17 mart 2023-cü ildə Rusiya Prezidenti Vladimir Putin və Rusiyanın Uşaq Ombudsmanı Mariya Lvova-Belovanın həbsinə order verən hakimlərdən biridir.

Roma Papasının Ukrayna ilə bağlı növbəti qalmaqallı açıqlaması təkcə Ukraynada deyil, bir sıra Qərb ölkələrində və təşkilatlarda da böyük etirazla qarşılanıb. Məlum olduğu kimi, Papa Fransisk İsveçrə televiziyasına müsahibəsində deyib ki, Ukrayna “ağ bayraq cəsarəti”nə sahib olmalı və danışıqlara başlamalıdır. Sozcu.az xəbər verir ki, Roma Papasına etiraz edənlər arasında NATO-nun Baş katibi Yens Stoltenberq də var. Stoltenberq Fransiskin müsahibəsilə bağlı deyib: “Kapitulyasiya sülh deyil. Rusiya Prezidenti Vladimir Putin bu müharibəni başladı və bu gün də bitirə bilər. Ukraynanın isə belə bir imkanı yoxdur”. Baş katib həmçinin bütün müttəfiqləri Ukraynaya hərbi dəstəyi davam etdirməyə çağırıb: “Biz Prezident Putinə döyüş meydanında istədiyini ala bilməyəcəyini göstərmək üçün Ukraynanı gücləndirməyə davam etməliyik. Biz oturub Ukraynanın müstəqil ölkə kimi tanınacağı həll yolu ilə razılaşmalıyıq”.

Ədliyyə Nazirliyi Penitensiar Xidmətin Əməliyyat Aparatının əməliyyat-axtarış tədbirləri nəticəsində 15 saylı cəzaçəkmə müəssisəsinə psixotrop maddə keçirilməsinin qarşısı alınıb. Sozcu.az Oxu.az-a istinadən xəbər verir ki, bu barədə Ədliyyə Nazirliyi məlumat yayıb. Bildirilib ki, məhkum Əfləddin Xəyyam oğlu Seyfullazadə ilə qısamüddətli görüşə gəlmiş tanışı Ülviyyə Azər qızı Rzayevanın və azyaşlı Zəhra Fərid qızı Hümbətlinin əşyalarına və üzərlərinə baxış keçirilən zaman Z.Hümbətlinin şalvarının arxa cibində gizlədilmiş bükülüdə 0,812 qram metamfetamin aşkar olunub. Faktla bağlı araşdırma aparılır.

Bir ayə “Ey iman gətirənlər! Oruc tutmaq sizdən əvvəlkilərə fərz buyurulduğu kimi, sizə də fərz buyuruldu ki, bəlkə, pis əməllərdən çəkinəsiniz!” (əl-Bəqərə, 183) Bir hədis “Əgər qullar Ramazanın fəzîlətlərini bilsə idilər, bütün ilin Ramazan olmasını arzu edərdilər…” (Heysəmi) Bir dua “Allahım! Sənin rizan üçün oruc tutdum. Sənə inandım, Sənə güvəndim, Sənin verdiyin ruzi ilə orucumu açdım. Sabahkı oruca niyyət etdim. Allahım! Keçmiş və gələcək günahlarımı bağışla”. (Əbu Davud)

“Bu gün regional problematika məsələlərini ətraflı müzakirə etdik. Mən Kasım-Jomart Kemeleviçə Azərbaycan ilə Ermənistan arasında sülh danışıqları prosesi haqqında məlumat verdim”. Sozcu.az xəbər verir ki, bu sözləri Prezident İlham Əliyev Azərbaycan-Qazaxıstan Ali Dövlətlərarası Şuranın birinci iclasında deyib. “Ümidvar olduğumu bildirdim ki, bu proses sülh sazişinin imzalanması, tariximizin bu ağır və qara səhifəsinin çevrilməsi ilə başa çatacaq”, - dövlət başçısı deyib.

“Və biz unutmamalıyıq ki, 80 il bundan öncə Vatikan Almaniyadakı faşizmi, Hitleri dəstəkləmişdi. Və yeri gəlmişkən, həmin dövrdəki Roma papası XII Piyin Hitleri dəstəkləmək haqqındakı bullası(fərman) bu günə qədər də ləğv olunmayıb və qüvvədədir...” Roma papası Frensiskin Ukraynanı "ağ bayraq" qaldırmağa və demək olar ki, işğalçı Rusiya qarşısında təslim olmağa çağırış etməsini necə dəyərləndirmək olar? Nədən papa Qəzzada baş verənləri soyqırımı adlandırır, buna görə İsraili qınayır, amma 3-cü ildir Ukraynanı işğal edən, dinc  insanları öldürən Putini sərt qınamır, onu savaşı dayandırmağa çağırmır? Onları hansısa maraqlar birləşdirə bilər? Mövzu ilə bağlı Moderator.az-a açıqlamasında siyasi təhlükəsizlik məsələlər üzrə ekspert Ərəstun Oruclu bunları söyləyib: “Roma papasının Ukraynaya “ağ bayraq” qaldımaq çağırışı ilk baxışdan təəccüblü göründü. Lakin tarixi təcrübəyə baxsaq, bu, hec də təəccüblü deyil. Düzdü, dünya və Avropa siyasətçiləri, elə Ukrayna rəhbərliyinin özü papadan izahat istəyəndə onun mətbuat xidmətindən belə bir açıqlma gəldi ki, papa deməyib ki, Ukrayna “ağ bayraq” qaldırsın. Halbuki o deyibdi ki, Ukrayna torpaqları Rusiyaya güzəştə getsin. Bir sözlə, Vatikan çalışdı ki, Roma papasının ifadələrinin arxasından qaçsın və ona baş qa cür şərh versinlər. Görünür, tarixən Vatikanın həmişə zorakı, faşist tərəflərə meyli güclü olub. Və biz unutmamalıyıq ki, 80 il bundan öncə Vatikan Almaniyadakı faşizmi, Hitleri dəstəkləmişdi. Və yeri gəlmişkən, həmin dövrdəki Roma papası XII Piyin Hitleri dəstəkləmək haqqındakı bullası(fərman) bu günə qədər də ləğv olunmayıb və qüvvədədir. Çox qəribə bir tarixi məqamdır”.  Analitik Roma papasının Türkiyədəki qondarma “erməni soyqırımı”nı tanımasını da xatırladıb. “Vatikan Türkiyədə heç bir sənədi-sübutu və faktoloji bazası olmayan qondarma “erməni soyqırımı”nı tanıyır, İsrailə qarşı məlum mövqeni sərgiləyir, amma Rusiyanın Ukraynadakı faşizmə bərabər əməllərini papa qınamır. Bəs nədir bunun səbəbi? Yəqin ki, səbəb hansısa əlaqələrin olmasındadır. Mən istisna etmirəm ki, bu, Rusiya ilə Vatikanın müəyyən ortaq maliyyə maraqları ilə də bağlı ola bilər. Biz bilirik ki,  Putin müharibəyə hazırlaşdığı dövrdə Rusiyanın maliyyə resursları bir çox yerlərdə olduğu kimi, Vatikanın da hansısa maliyyə strukturlarında gizlədilib. Məsələn, Vatikan bankı nəzarətdən kənar olan bir qurumdur. Və faktiki olaraq həmin banka heç bir maliyyə institutunun nəzarəti yoxdur. Bundan başqa, Vatikanın Kremllə hansısa bilmədiyimiz spesifik əlaqələri də ola bilər. Amma hər bir halda Roma papasının belə bir biabırçı çağırış etməsi əslində elə Vatikanın adına layiqdir. Yəni Vatikanın tarixinə baxmaq lazlmdır. Vatikanın tarixi insanlıq tarixinin bir utanc parçasıdır. İnkvizisiya kimi biabırçı bir hadisəni, Varfolomey gecəsi kimi öz din qardaşları olan lütteranlara qarşı soyqırımını və s. törətmiş bir qurumdan başqa mövqe gözləmək bir qədər təəccüblü olardı. Ona görə əslində papanın bugünkü addımlarına da təəccüblənmək lazım deyil. Mən bunu həmin Roma katolik kilsəsi qondarma “erməni soyqırımı”nı tanıyanda da demişəm, bu gün də deyirəm: Vatikan dəyərlərdən başqa hər şeydir...”

Bakıda intihar hadisəsi baş verib. Lent.az-ın məlumatına görə, hadisə paytaxtın Xəzər rayonunda qeydə alınıb. Rayon sakini, 1984-cü il təvəllüdlü Elvin Cəbrayıl oğlu Məmmədov yaşadığı evin həyətindəki yarımtikilidə zəncirlə özünü asıb. Onun asılmış meyitini anası tapıb. Ana bu mənzərədən çox böyük stres keçirib. İntiharın səbəbi hələ məlum deyil.  Faktla bağlı Xəzər Rayon Prokurorluğunda araşdırma aparılır. 

“Rusiya-Ukrayna müharibəsinin bizim Ermənistanla sülh əldə etməyimizin perspektivi ilə o qədər də əlaqəsi yoxdur...” “Doğrudur, Rusiya qoşunlarının ərazimizdə qalması müstəqilliyimizə təhdid və təhlükədir. Ona görə də Azərbaycan artıq hazırlıq işlərini görür və Rusiya qoşunlarının ölkəmizin suveren ərazisindən çıxarılması üçün zəmin yaradır. Rusiya isə öz hərbi kontingentini ərazimizdə saxlamaq niyyətini gizlətmir. Amma böyük ehtimalla həmin hərbi birləşmə yaxın müddətlərdə Yuxarı  Qarabağı tərk etməli olacaq. Azərbaycan dövləti də bu məsələdə qərarlıdır” Bu fikirləri Moderator.az-a açıqlamasında Azad Vətən partiyasının sədri Akif Nağı “Rusiya qoşunlarının “sülhməramlı” adı altında hələ də Qarabağda - Azərbaycan ərazisində də qalması gələcəkdə dövlət müstəqilliyimiz üçün təhdid deyilmi?” sualını cavablandırarkən ifadə edib. “Necə hesab edirsiz, yaxın illərdə Rusiya Ukraynada hərbi-siyasi baxımdan tam məğlub olmasa, Azərbaycanla Ermənistan arasında sülh yaranmasına imkan verəcəkmi?” sualını isə partiya sədri belə cavablandırıb:  “Rusiya-Ukrayna müharibəsinin bizim Ermənistanla sülh əldə etməyimizin perspektivi ilə o qədər də əlaqəsi yoxdur. Biz sülh müqaviləsinin imzalanmasında maraqlıyıq. Ermənistan isə məğlub durumda olduğuna görə buna o qədər də həvəsli görünmür. Ona görə də sülh üçün Ermənistana kimsə tapşırıq verməlidir ki, o da, yerinə yetirsin, ya da biz yenə də güc amilini işə salmalıyıq. Ermənistanı sülhə gətirəcək başqa təsir variantı yoxdur. Onların başa düşdüyü iki dil var: ya tapşırıq, ya da yumruq...”

“Bakıda bu qədər taksiyə ehtiyac yoxdur”.  Sozcu.az xəbər verir ki, bunu deputat Vahid Əhmədov Milli Məclisdə keçirilən “Nəqliyyatın idarə edilməsində yeniliklər və çağırışlar” mövzusunda dinləmədə deyib.  “Bir neçə il əvvəl Bakıya "Prius"ları yığmağa başladılar. İndi şəhərin hər yeri o maşınlardandır. Şəhər onsuz da sıxlıqdır, taksilərdə bir tərəfdən şəhərdə sıxlıq yaradıb. Buna kimlər icazə vermişdi? Bundan əlavə, taksilərin xidmət keyfiyyəti də aşağıdır”.

Masallıda 26 yaşlı qadın və onun iki azyaşlı oğlu dəm qazından zəhərlənərək ölüb.  Sozcu.az xəbər verir ki, bu barədə Masallı rayon prokurorluğu məlumat yayıb.  Məlumatda hadisə bağlı cinayət işinin başlandığı bildirilib. Qeyd olunub ki, bu gün Masallı rayonu, Dadva-2 küçəsində yerləşən fərdi yaşayış evində üç nəfərin ölməsi barədə rayon prokurorluğuna məlumat daxil olub. Məlumata əsasən, araşdırma zamanı həmin evdə yaşayan 1998-ci il təvəllüdlü Aytac Əzimova və onun iki azyaşlı oğlunun dəm qazından zəhərlənərək ölmələri müəyyən olunub. Qeyd olunub ki, faktla bağlı Masallı rayon prokurorluğunda Cinayət Məcəlləsinin 314.3-cü (səhlənkarlıq, iki və daha çox şəxsin ölümünə səbəb olduqda) maddəsilə cinayət işləri başlanaraq ibtidai istintaq aparılır. 

Azərbaycan Dövlət Neft Şirkətinin (SOCAR) “Azəriqaz” İstehsalat Birliyinin (İB) sədri Ruslan Əliyev vəzifəsindən azad edilib.  Sozcu.az xəbər verir ki, “Azəriqaz” İstehsalat Birliyinin baş direktoru vəzifəsi sədrin müavini Azər Məmmədova həvalə edilib. “Azəriqaz” İB-nin mətbuat katibi Eldəniz Vəliyev məlumatı "oxu.az"a təsdiq edib. Qeyd edək ki, Ruslan Əliyev 2019-cu ildən bu vəzifəni icra edirdi. 

Rusiyadan olan analitiklər və siyasi ekspertlər NATO-nun Rusiya Federasiyasına mümkün təcavüzü ssenarisini nəzərdən keçirdikdən sonra  etiraf ediblər ki, Rusiya NATO-nun kütləvi raket zərbələri baş verəcəyi təqdirdə onları dəf etməyə hazır deyil. Sozcu.az xəbər verir ki, bu barədə Amerikanın “Business Insider” nəşri məlumat yayıb. Bundan əvvəl Rusiya KİV-ində “ehtimal olunan düşmənin” Rusiyanın mühüm obyektlərinə güclü raket zərbələri endirməsinin hipotetik ssenarisini araşdıran araşdırmalar meydana çıxıb. Sadə dillə desək, NATO qoşunları Rusiya terrorçularının Ukraynaya hücumunda istifadə etdikləri taktikadan istifadə edirlər. Və rusiyalı “ekspertlər” belə bir ssenarinin Rusiya üçün fəlakətlə nəticələnəcəyi ilə razılaşırlar. Araşdırmada qeyd edilir ki, NATO-nun tətbiq etdiyi kütləvi zərbələr strategiyası Rusiyanı cavab olaraq nüvə silahından istifadə etməyə məcbur edə bilər. Məqalənin sonunda müəlliflər Rusiya Aerokosmik Qüvvələrinin missiyalarını və avadanlıqlarını genişləndirməyi tövsiyə edirlər. Xüsusilə, rusiyalı mütəxəssislər daha təkmil pilotsuz uçuş aparatlarının və digər silah növlərinin (ehtimal ki, süni intellektdən istifadə etməklə) hazırlanmasını tələb edirlər. Rusiyalı analitiklərin məqaləsini şərh edən "Business Insider" onun peyda olmasını NATO ölkələrinin “Şimal reaksiyası 2024” adlı irimiqyaslı hərbi təlimlərə başlaması ilə əlaqələndirir. Norveç, İsveç və Finlandiyada keçirilən 11 günlük təlimdə 20 mindən çox hərbçi, 50 gəmi və 100 təyyarə iştirak edir. Bu hərbi manevrlər daha böyük “Steadfast Defender 24” təliminin bir hissəsi kimi keçirilir.

Bir müddət əvvəl Bakıdakı özəl klinikalardan birində liposaksiya (artıq piy toxumasının çıxarılması) əməliyyatı etdirmiş qadının pulları və qızılları evinə çağırdığı tibb bacısı tərəfindən oğurlanıb. Publika.az-ın əldə etdiyi məlumata görə, hadisə Abşeron rayonu Novxanı kəndindəki bağ evində baş verib. Belə ki, Çinarə Sultanova (soyadlar şərtidir) əməliyyatdan sonra gündəlik iynə vurdurmalı olduğu üçün əvvəldən tanıdığı Səidə adlı tibb bacısını evinə çağırıb. Tibb bacısı müəyyən məbləğ qarşılığında xidmət göstərməyə razılaşıb. Sonrakı gün Səidə Məmmədova müştərinin evinə gedib və orada Çinarənin tək olmasından istifadə edərək “Lidaza” və “Lidokain” adlı preparatları qarışdıraraq ona dozadan artıq miqdarda iynə vurub. Özünü pis hiss edən Çinarə Sultanova huşunu itirdikdən sonra Səidə evdə olan 3 500 dolları və 8 000 manata yaxın dəyəri olan qızıl-zinət əşyalarını götürərək qaçıb. O, evdən çıxarkən Çinarənin “Porsche” markalı avtomobilində olan bahalı əşyanı da götürüb. Hadisədən bir neçə saat sonra ev sahibi özünə gəlib, dərhal oğluna və qohumlarına məlumat verib. Onlar evdən pul və qızılların oğurlandığını görərək Səidəni axtarmağa başlayıblar. Səidə törətdiyi əməli qismən etiraf edərək, bunu borclarına görə etdiyini deyib. Bundan sonra Abşeron Rayon Polis İdarəsində Səidə Məmmədova barəsində cinayət işi açılıb. Həbs olunacağını görən qadın vurduğu zərəri qarşı tərəfə ödəyib. Bir neçə gün əvvəl keçirilən məhkəmə iclasında Çinarə Səidədən artıq şikayətçi olmadığını deyib. Abşeron Rayon Məhkəməsi Səidəni Cinayət Məcəlləsinin 177-ci maddəsi üzrə təqsirli bilib. O, 2 il müddətə azadlığın məhdudlaşdırılması cəzasına məhkum edilib və bədəninə elektron qolbaq taxılaraq polisin nəzarəti altında olmaqla sərbəst buraxılıb.

Fransa Prezidenti Emmanuel Makron Kiyevə səfər edəcək. Sozcu.az xəbər verir ki, bu barədə Zelenski "X" sosial şəbəkəsində fransalı həmkarı ilə telefon danışığının təfərrüatlarını açıqlayıb: "Makronla telefon danışığımız uzun sürdü. Biz hazırkı hərbi vəziyyəti və Ukraynaya dəstək üçün bu yaxınlarda keçirilən beynəlxalq Paris konfransını müzakirə etdik. Yaxın günlərdə Ukraynada keçiriləcək görüş barədə də fikir mübadiləsi apardıq".

“Əsir və girovların azad edilməsi ilə bağlı aparılan danışıqlar effektiv nəticə vermir”. Sozcu.az xəbər verir ki, bu barədə İsrailin Baş naziri Benyamin Netanyahu “Politico”ya müsahibəsində deyib. Netanyahu qeyd edib ki, bəzi ərəb ölkələrinin liderləri Qəzza zolağında əməliyyatın davam etdirilməsinə səssiz razılıq verirlər. Siyasətçi əlavə edib ki, Fələstinin radikal HƏMAS hərəkatı bütün israilli girovları azad etməsə, İsrail ordusunun Ramazan ayında Qəzzada atəşi dayandırmaq planı yoxdur.

Litvada Rusiya dövlət qeydiyyat nömrələrinə malik avtomobillərdən istifadəyə qoyulan qadağa qüvvəyə minib. Sozcu.az xəbər verir ki, istisnalar diplomatik korpusun nəqliyyat vasitələrinə, Kalininqrad vilayətinə və oradan tranzit keçən nəqliyyat vasitələrinə aiddir. Bütün digər belə avtomobillər ya Baltikyanı respublikanın ərazisini tərk edib, ya da sahibləri onları Litvada yenidən qeydiyyatdan keçirməli olublar. Gömrük idarəsinin məlumatına görə, martın 10-na Litvada 50-yə yaxın Rusiya dövlət nömrə nişanlı avtomobil qalıb. Belə ki, bu nəqliyyat vasitələri müsadirə ediləcək və onların sahibləri 200 avrodan 6 min avroya qədər cərimə ediləcək. Kalininqrad vilayətinə və oradan tranzit keçən avtomobillər isə Litvada 24 saat qala bilər.

ABŞ-da müsəlmanlara qarşı zorakılıq və nifrət artıb. Sozcu.az xəbər verir ki, bu barədə Amerika prezidenti Co Bayden bunu Ramazan ayının başlanması münasibəti ilə deyib. Onun sözlərinə görə, ABŞ-da islamafobiyaya yer yoxdur: “Biz evdə müsəlman amerikalılara qarşı dəhşətli nifrət və zorakılıq dalğasını görürük. Din azadlığı üzərində qurulan və müsəlman mühacirlər də daxil olmaqla immiqrantların töhfələri əsasında qurulan ABŞ-da islamafobiyaya yer yoxdur. Mənim Administrasiyam Amerikada müsəlmanlara, sikxlərə, cənubi asiyalılara və ərəb icmalarına qarşı nifrətin baş verdiyi yerdə İslamofobiya və əlaqəli qərəz və ayrı-seçkilik formaları ilə mübarizə üzrə ilk Milli Strategiya hazırlayır”.

Rusiya qatilləri Avropaya yalnız ona görə getmirlər ki, onları əllərində silah, mavi-sarı bayraq altında ukraynalılar dayandırırlar. Sozcu.az xəbər verir ki, bu sözləri Ukrayna Prezidenti Vladimir Zelenski Roma Papası Fransiskin Ukrayna ilə bağlı təklifinə cavabında deyib. “Ukraynada bir vaxtlar evlərin və kilsələrin çoxlu ağ divarları var idi, indi onlar rus mərmiləri tərəfindən yandırılır və dağıdılır. Və bu, müharibəyə son qoyulması üçün kimin dayanmalı olduğunu çox gözəl deyir”, - deyə dövlət başçısı bildirib. Qeyd edək ki, Roma Papası Fransisk Ukraynaya “ağ bayraq qaldırmağı və danışıqlar aparmağı” təklif edib.

Türkiyə lirəsi bu gün növbəti dəfə ucuzlaşaraq, tarixi minimumunu yeniləyib. Sozcu.az xəbər verir ki, qardaş ölkədə 1 dollar artıq 32 lirəyədir. Avro isə 35 lirəni keçib.