Siyasət

Müsavat Gənclər Təşkilatının Şura iclası keçirilib.  Sozcu.az xəbər verir ki, noyabrın 2-də Müsavat Gənclər Təşkilatının növbəti Şura iclası keçirilib. İclasda Müsavat Partiyasının başqan müavini Razim Əmiraslanlı da iştirak edib. O, gənclərlə səmimi müzakirə apararaq öz siyasi və təşkilati təcrübəsinə əsaslanan tövsiyələrini bölüşüb. Toplantıda təşkilati məsələlər müzakirə olunub, son bir həftə ərzində görülən işlər və gənclərin fəallığı qiymətləndirilib. Həmçinin partiya ilə bağlı bir sıra təkliflər səsləndirilib və bu istiqamətdə gələcək fəaliyyət planları müəyyənləşdirilib. İclas zamanı ölkədə və dünyada baş verən siyasi proseslər geniş şəkildə təhlil olunub, gənclərin bu proseslərə baxış bucağı müzakirə edilib. Sonda cari məsələlərə dair fikir mübadiləsi aparılıb və müvafiq qərarlar qəbul edilib.

16:37 Ermənistanın Baş naziri Nikol Paşinyan Yelisey Sarayında Fransa Prezidenti Emmanuel Makronla görüşüb. Sozcu.az xəbər verir ki, görüş N.Paşinyan 29–30 oktyabr tarixlərində Fransaya işgüzar səfəri çərçivəsində baş tutub. Qeyd edək ki, Paşinyan səfər çərçivəsində 8-ci Paris Sülh Konfransında iştirak edib. *** Makron Paşinyanı Azərbaycanla sülhün qurulması münasibətilə təbrik edib. Bu barədə Ermənistan mediası məlumat yayıb. E.Makron və N.Paşinyan TRIPP layihəsinin (Zəngəzur dəhlizinin Ermənistan ərazisindən keçəcək 42 kilometrlik hissəsi - red.) həyata keçirilməsinin təfərrüatlarını və Cənubi Qafqazda kommunikasiyaların açılması üçün görülən addımları müzakirə ediblər. Onlar həmçinin iqtisadiyyat, infrastruktur və humanitar layihələr sahəsində Ermənistan və Fransa arasında ikitərəfli münasibətləri, regional əhəmiyyət kəsb edən məsələləri, eləcə də Ermənistan-Avropa İttifaqı əməkdaşlığının gələcək inkişafını müzakirə ediblər.

Regional kommunikasiya o deməkdir ki, həm Ermənistan, həm də Azərbaycan daxili, ikitərəfli və beynəlxalq əlaqələr üçün bir-birinin ərazisindən istifadə etmək imkanı əldə edəcək və bu, ərazimizdən beynəlxalq tranzit üçün yeni bir marşrutun açılmasıdır. Sozcu.az xəbər verir ki, bunu Ermənistanın Baş naziri Nikol Paşinyan “Tramp yolu” layihəsi barədə deyib. “Dünyanın hazırda təchizat zənciri böhranı yaşadığını nəzərə alsaq, bu, həm beynəlxalq ticarət, həm də regionumuz üçün həqiqətən də fərq yarada bilər. Fars körfəzindən, Oman körfəzindən Qara dənizə qədər kommunikasiya kanalları açılacaq, Xəzər dənizi ilə Aralıq dənizi arasında yeni bir əlaqə yaranacaq, Ermənistan üçün yeni imkanlar yaradılacaq”, - o bildirib.

Azərbaycan bundan sonra da regionda davamlı sülhün təmin olunması, nəqliyyat layihəsinin, xüsusilə TRİPP xətti üzrə nəqliyyat bağlantılarının yaradılması istiqamətində səylərini davam etdirəcək. Sozcu.az xəbər verir ki, Azərbaycan Prezidenti İlham Əliyev oktyabrın 29-da Birləşmiş Ərəb Əmirlikləri (BƏƏ) Federal Milli Şurasının sədri Saqr Qobaşın rəhbərlik etdiyi nümayəndə heyətini qəbul edərkən deyib. Söhbət zamanı Azərbaycanla BƏƏ arasında münasibətlərin strateji tərəfdaşlıq səviyyəsində bütün istiqamətlər üzrə uğurla inkişaf etdiyi qeyd olunub. Bu xüsusda "Masdar" şirkətinin Azərbaycana bərpaolunan enerji sektoruna sərmayələrinə, SOCAR-ADNOC əməkdaşlığına, qarşılıqlı investisiyalara da toxunulub.

Azərbaycanın Yaponiyadakı fövqəladə və səlahiyyətli səfiri Gürsel Qüdrət oğlu İsmayılzadə vəzifəsindən geri çağırılıb. Sozcu.az xəbər verir ki, bununla bağlı Prezident İlham Əliyev Sərəncam imzalayıb. Həmçinin Prezidentin digər Sərəncamlarına əsasən, Məmməd Afiq oğlu Talıbov Azərbaycanın Meksika Birləşmiş Ştatlarında, eyni zamanda Honduras, Kolumbiya, Kosta Rika, Qvatemala, Panama və Peru Respublikalarındakı səfiri, Eldar Nadir oğlu Səlimov Azərbaycanın İordaniya Haşimilər Krallığındakı səfiri, Şahin Şakir oğlu Abdullayev Azərbaycanın Səudiyyə Ərəbistanı Krallığında, eyni zamanda Bəhreyn Krallığında fövqəladə və səlahiyyətli səfiri və Azərbaycan Respublikasının İslam Əməkdaşlıq Təşkilatı yanında daimi nümayəndəsi vəzifələrindən geri çağırılıb. Dövlət başçısının digər Sərəncamlarına əsasən, Fərid Yunis oğlu Talıbov Azərbaycanın Yaponiyada, Seymur Həbib oğlu Fətəliyev Azərbaycanın Meksikada, həmçinin Eldar Nadir oğlu Səlimov Azərbaycanın İraqda, Şahin Şakir oğlu Abdullayev isə Azərbaycanın İordaniya Haşimilər Krallığında fövqəladə və səlahiyyətli səfiri təyin edilib.

Rusiya Prezidenti Vladimir Putin Azərbaycan Prezidenti İlham Əliyevlə telefon danışığı aparıb. Sozcu.az xəbər verir ki, bu barədə Kremlin mətbuat xidməti məlumat yayıb. “Dövlət başçıları ticarət-iqtisadi əlaqələrin daha da inkişaf etdirilməsinə və birgə layihələrin həyata keçirilməsinə qarşılıqlı sadiqliklərini təsdiqləyib. Putin və Əliyev regional əməkdaşlığın və beynəlxalq vəziyyətin bir neçə aspektini müzakirə edib, eləcə də müxtəlif səviyyələrdə təmasları davam etdirmək barədə razılığa gəlib”, - məlumatda qeyd olunub.

Ermənistan və Azərbaycan artıq sülh müqaviləsini paraflayıb. Hər iki ölkə münasibətlərin tam normallaşdırılması üçün ciddi səylər göstərir. Sozcu.az armenpress-ə istinadla xəbər verir ki, bunu Ermənistanın xarici işlər naziri Ararat Mirzoyan Fransada 4-cü Feminist Diplomatiya Konfransı çərçivəsində keçirilən panel müzakirəsində bildirib. “Bəlkə də hamıya məlumdur ki, biz Azərbaycanla sülh bağlamışıq. Hazırda hər iki ölkə münasibətlərin tam normallaşdırılması üçün böyük səylər göstərir. Hökumətin rəsmi sazişlərin imzalanması və konkret həllərin hazırlanması istiqamətində apardığı işlərlə paralel olaraq, cəmiyyətlərin barışması üçün də böyük ehtiyac var”, - nazir qeyd edib.  O vurğulayıb ki, sülh prosesinin uğuru yalnız rəsmi razılaşmalardan deyil, həm də cəmiyyətlərin qarşılıqlı anlaşmasından asılıdır.

Estoniya Azərbaycanda səfirlik açacaq. Sozcu.az xəbər verir ki, bunu Estoniyanın xarici işlər naziri Marqus Tsaxna Azərbaycan xarici işlər naziri Ceyhun Bayramovla birgə mətbuat konfransında deyib. O qeyd edib ki, bu, ikitərəfli münasibətlərin inkişafı üçün önəmli addımdır: "Biz təmsilçiliyimizi artırmalıyıq".

Oktyabrın 21-22-də Ermənistan və Azərbaycan vətəndaş cəmiyyəti nümayəndələrinin görüşü keçiriləcək. Sozcu.az xəbər verir ki, bu barədə Ermənistan Təhlükəsizlik Siyasətinin Tədqiqatları Mərkəzi məlumat yayıb.  Görüşün İrəvanda keçirilməsi nəzərdə tutulub. Müzakirələr zamanı avqustun 8-də Vaşinqtonda keçirilən görüşdən sonra formalaşmış sülh gündəliyi, iki cəmiyyət arasında qarşılıqlı etimadın möhkəmləndirilməsi üzrə tədbirlər, Cənubi Qafqazda sabit iqtisadi əməkdaşlığın formalaşdırılmasının mümkün yolları, o cümlədən iki ölkənin vətəndaş cəmiyyəti nümayəndələri arasında birbaşa və uzunmüddətli əlaqələrin qurulması perspektivləri müzakirə olunacaq.

TRİPP layihəsi mütləq reallaşdırılacaq. Sozcu.az xəbər verir ki, bu sözləri Azərbaycan Prezidenti İlham Əliyev Qazaxıstan Prezidenti Qasım-Jomart Tokayevlə mətbuata bəyanatında deyib. "Bildiyiniz kimi, avqustda keçirilən Vaşinqton sammitinin nailiyyətlərindən biri TRİPP layihəsidir. Prezident Tramp layihəyə öz adını verib və bu, layihənin mütləq reallaşdırılacağından xəbər verir. Bununla da Orta Dəhlizin daha bir marşrutu açılır. Ənənəvi mövcud olanlara daha biri əlavə olunur – Zəngəzurdan ən yüksək müasir standartlarla 15 milyon ton yük dövriyyəsi. Beləliklə, Asiyadan Avropaya və əks istiqamətdə bizim ölkələrimizdən keçən yüklərin həcmi özlüyündə artım potensialına malikdir, amma həm də onların qəbulu və göndərilməsi üçün daha böyük potensial olacaq", - dövlət başçısı vurğulayıb.

Ramiz Mehdiyev Azərbaycan Respublikası Təhlükəzlik Şurasının üzvlüyündən azad edilib. Sozcu.az xəbər verir ki, bu barədə Azərbaycan Prezidenti İlham Əliyev bununla bağlı müvafiq Fərman imzalayıb. Qeyd edək ki, Bakı şəhəri Səbail Rayon Məhkəməsi oktyabrın 14-də R.Mehdiyev barədə cinayət işi üzrə qərar qəbul edib. Məhkəmə xüsusilə ağır cinayət əməllərinə görə cinayət məsuliyyətinə cəlb edilmiş Ramiz Mehdiyev barədə verilmiş vəsatəti təmin edərək 4 ay müddətinə ev dustaqlığı qətimkan tədbiri seçib.  Ramiz Mehdiyev Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunur. Xatırladaq ki, Ramiz Mehdiyev 1995–2019-cu illərdə Prezident Administrasiyasının rəhbəri, 2019–2022-ci illərdə isə AMEA-nın prezidenti olub.

Bu gün Xəzər dənizi, təəssüf ki, bir sıra ciddi ekoloji problemlərlə üz-üzədir. Ən aktual məsələlərdən biri həm ekoloji, həm də iqtisadi təhlükələr yaradan suyun səviyyəsinin sürətlə azalması, dayazlaşmadır. 2022-ci ildə keçirilən VI Xəzər Zirvə toplantısında mən Xəzər dənizində ekoloji tarazlığın pozulması məsələsini qaldırdım. Təəssüf ki, o vaxtdan bəri vəziyyət daha da pisləşib. Xəzər dənizində suyun səviyyəsi sürətlə azalır və səbəblər təkcə iqlim dəyişikliyi ilə məhdudlaşmır. Sozcu.az xəbər verir ki, bunu Azərbaycan Prezidenti İlham Əliyev Qazaxıstana dövlət səfəri ərəfəsində Kazinform Agentliyinə müsahibəsində deyib. “Hazırkı şəraitdə bütün Xəzəryanı ölkələr arasında sıx əməkdaşlıq qurmaq, fəal elmi məlumat mübadiləsi aparmaq və nəticələrin aradan qaldırılması üçün əlaqələndirilmiş tədbirlər hazırlamaq çox vacibdir. Xəzər dənizinin səviyyəsinin aşağı düşməsi və bununla bağlı ekoloji dəyişikliklər biomüxtəlifliyi və ekosistemin dayanıqlığını təhdid edir, təbiətin qorunması və ekoloji tarazlığın bərpası üçün əlaqələndirilmiş tədbirlər tələb edir”, - dövlət başçısı bildirib. Prezident qeyd edib ki, Azərbaycan, Qazaxıstan və digər Xəzəryanı ölkələr regional və beynəlxalq forumlarda Xəzər dənizinin mühafizəsi təşəbbüslərini fəal şəkildə təbliğ edə bilərlər və etməlidirlər: “Artan transmilli ekoloji risklər fonunda Xəzər artıq sadəcə su hövzəsi deyil və bizim ortaq məsuliyyətimizin və birgə fəaliyyətin zəruriliyinin simvoluna çevrilir”.