Hadisə

Türkiyənin İzmir şəhərində 30 yaşlı qadın azyaşlı oğlunu dənizə atıb. Lent.az xarici mediaya istinadla xəbər verir ki, hadisə şahidləri cəld reaksiya verərək uşağı dənizdən çıxararaq həkimlərə təhvil veriblər. Həkimlər uşağı ağır vəziyyətdə xəstəxanaya çatdırıblar. Qadın hadisə yerində saxlanılıb. İlkin məlumatlara görə, onun psixi pozğunluğu var.

Dövət Sərhəd Xidmətinin hərbçisi ölüb. Sozcu.az xəbər verir ki, "Unikal"ın əldə etdiyi məlumata görə, hadisə Xaçmazın Qusarçay kəndi ərazisində baş verib. Avtomobil Şeydabəy Qəhrəmanovu vurub. O, hadisə nəticəsində həyatını itirib.

Şamaxıda 27 yaşlı qız dəm qazından boğulub. Sozcu.az xəbər verir ki, hadisə rayon ərazisində qeydə alınıb. Belə ki, şəhər sakini 1998-ci il təvəllüdlü Məmmədova Ləman İnqilab qızı yaşadığı evdə dəm qazından boğularaq ölüb. Onun meyiti aidiyyatı üzrə təhvil verilib. Hazırda faktla bağlı araşdırma aparılır.report)

Bakının Suraxanı rayonu, Hövsan qəsəbəsində yerləşən E.N.Qaranzadə adına 270 nömrəli tam orta məktəbin işçisinə hücum olub. Sozcu.az xəbər verir ki, kişi keçmiş həyat yoldaşının boğazını kəsib. Hadisə ilə bağlı Bakı Şəhər üzrə Təhsil İdarəsindən Teleqraf-a bildirilib ki, 270 nömrəli tam orta məktəbin xanım texniki işçisinə (müvafiq səbəbdən adı qeyd olunmur) fevralın 10-da məktəbin yaxınlığında keçmiş həyat yoldaşı kəsici alətlə xəsarət yetirib. Xilas olmaq üçün məktəbin həyətinə daxil olan texniki işçiyə orada ilkin tibbi yardım göstərilib. Məktəb rəhbərliyi tərəfindən dərhal təcili tibbi yardım xidmətinə və hüquq-mühafizə orqanlarına məlumat verilib. TƏBİB-dən bildirilib ki, təcili tibbi yardım briqadası tərəfindən 1974-cü il təvvəllüdlü şəxs boynun arxa hissəsinin kəsilmiş yarası diaqnozu ilə Sabunçu Tibb Mərkəzinə təxliyə olunub.

Ankaranın Keçiören rayonunda ana iki uşağını öldürüb, birini isə ağır yaralayıb. Sozcu.az Türkiyə mediasına istinadən xəbər verir ki, rayonun Ayvalı məhəlləsində yaşayan Serpil adlı qadın əsəb sarsıntısı keçirib və həmin an evdə olan 12, 10 və 7 yaşlı övladlarının biləklərini kəsib. Hadisə yerinə çox sayda polis və təcili tibbi yardım briqadası cəlb edilib. 10 və 7 yaşlarında olan iki uşağın hadisə yerində həyatını itirdiyi məlum olub. 12 yaşlı uşaq isə ağır yaralı halda xəstəxanaya çatdırılıb. Ana polis əməkdaşları tərəfindən saxlanılıb. Hadisə ilə bağlı araşdırma davam etdirir.

Bakıda maskalanıb oğurluq etməkdə şübhəli bilinən şəxs saxlanılıb. Bu barədə Sozcu.az-a Daxili İşlər Nazirliyindən məlumat verilib. Bildirilib ki, Suraxanı rayonu Qaraçuxur qəsəbəsində naməlum şəxslər gecə saatlarında qəsəbə sakinlərinin birinin mənzilinə daxil olaraq 150 manat nağd pul, 7550 manat dəyərində qızıl-zinət əşyaları, 10 ədəd qol saatı və fotoaparat oğurlayıblar. Suraxanı RPİ-nin 32-ci Polis Bölməsi əməkdaşlarının həyata keçirdikləri tədbirlərlə oğurluq əməlini törətməkdə şübhəli bilinənlər - axtarışda olan 35 yaşlı Vüqar Tapdıqzadə və 33 yaşlı Orxan Nəcəfov müəyyən olunaraq saxlanılıblar. Həmin şəxslər oğurluq zamanı mənzildə olan təhlükəsizlik kameralarına düşməmək üçün onun üzərini polietilen paketlə bağlayıblar və xüsusi hazırladıqları maskalardan istifadə ediblər. Faktla bağlı araşdırma aparılır.

Bakıda 1 yaşlı uşaq ölüb. Sozcu.az Lent.az-a istinadla xəbər verir ki, hadisə Xətai rayonu B.Süleymanov küçəsi 21-də yerləşən 14 saylı uşaq poliklinikasında qeydə alınıb. Bakı şəhər sakini Turqut Nuşirəvan oğlu Əliyev qəfil ölüb. Körpənin ölüm səbəbi araşdırılır.

Son günlər Egey dənizində müşahidə edilən seysmik aktivliklə əlaqədar Türkiyədə mütəxəssislərdən ibarət xüsusi nəzarət qrupu yaradılıb. Ölkənin İzmir, Aydın və Muğla bölgələrinə mümkün sunami və fövqəladə vəziyyətlərdə əhalini xəbərdar etmək üçün mobil siqnal sistemləri göndərilib, əlavə AFAD heyəti və texnika cəlb edilib. Bu vilayətlərdə sabahdan etibarən məlumatlandırma toplantıları keçiriləcək. Ölkədə SMS xəbərdarlıq sistemi tam hazır vəziyyətə gətirilib. Sunami erkən xəbərdarlıq sistemi xüsusi tətbiqə inteqrasiya edilib. Bütün bunlarla bağlı Türkiyə ilə Yunanıstan universitetləri və tədqiqat mərkəzləri arasında elmi məlumat mübadiləsi aparılır. Sozcu.az Azərtac-a istinadla xəbər verir ki, bu barədə Türkiyənin Daxili İşlər Nazirliyi və Fövqəladə Halların İdarə Olunması Agentliyinin (AFAD) son günlər Egey dənizindəki Santorini adasında müşahidə edilən seysmik aktivlik və mümkün risklərlə bağlı toplantısının nəticələrinə dair açıqlamasında məlumat verilib. Görüşdə Türkiyənin Hidrometeorologiya Baş İdarəsi, Qəndilli Rəsədxanası və Zəlzələ Araşdırma İnstitutunun alim-tədqiqatçıları iştirak ediblər. Bildirilib ki, bu il fevralın 7-dək Egey dənizinin Yunanıstanın Santorini adası ətrafında 3 baldan böyük 761 zəlzələ qeydə alınıb. Yeraltı təkanlar, ən şiddətlisi 5,2 bal gücündə olmaqla, əsasən Santorini adasının 25 km şimal-şərqində, dənizin 5-25 km dərinliyində baş verir. Bölgədəki aktivlik əsasən Kolumbo sualtı vulkanının yerləşdiyi ərazidə cəmlənib. Burada ən sonuncu vulkan püskürməsi 1950-ci ildə, bölgədəki ən böyük zəlzələ isə 1956-cı ildə 7,5 bal gücündə baş verib. Hazırkı seysmik aktivlik çox aşağı ehtimal da olsa vulkan püskürməsinə səbəb ola bilər. 2011-2012-ci illərdə bölgədə bənzər aktivlik müşahidə edilib və 14 ay davam edib. Lakin heç bir vulkan püskürməsi qeydə alınmayıb. Püskürmə baş verəcəyi təqdirdə havaya yayılan vulkanik kül və sunami təhlükəsi Türkiyəyə təsir göstərə bilər. İclasda Santorini adası və ətrafında artan seysmik aktivlik nəticəsində baş verə biləcək güclü zəlzələ, sunami və ya vulkan püskürməsinin Türkiyə sahilləri üçün yarada biləcəyi təhlükələr, buna qarşı görülən tədbirlər və hazırlıq planları geniş müzakirə edilib.

Gəncədə tibb müəssisəsində özünə xəsarət yetirən xəstə vəfat edib. Sozcu.az “Qafqazinfo”-ya istinadla xəbər verir ki, Gəncə Reabilitasiya Mərkəzində müalicə alan şəhər sakini M.Vəlixanov fevralın 5-də başını divara vurub. Nəticədə o, ağır xəsarət alıb. M.Vəlixanov fevralın 6-da aldığı xəsarətdən vəfat edib. Bildirilib ki, özünə xəsarət yetirən şəxs ruhi-əsəb xəstəliyindən əziyyət çəkib. Faktla bağlı araşdırma aparılır.

Ucarda məktəbli sinif yoldaşına ağır xəsarət yetirib. Sozcu.az APA-ya istinadən xəbər verir ki, hadisə rayonun Rəstəcə kəndində baş verib. Rəstəcə kənd tam orta məktəbin 9-cu sinif şagirdi, 2009-cu il təvəllüdlü M.H. ilə sinif yoldaşı Q.H. arasındakı mübahisə davaya çevrilib. Q.H. M.H.-yə bıçaqla xəsarətlər yetirib. Zərərçəkən Ucar Rayon Mərkəzi Xəstəxanasına yerləşdirilib. İlkin yardım göstərildikdən sonra M.H. Göyçay Rayon Xəstəxanasına aparılıb. Zərərçəkənin yaxınlarının sözlərinə görə, hadisə məktəbdə, sinif otağında baş verib.

Ağstafada üç nəfər dəm qazından zəhərlənib. Sozcu.az "Unikal"-a istinadla xəbər verir ki, hadisə Ağstafa şəhərinin mərkəzi küçələrinin birində qeydə alınıb. 3 nəfər dəm qazından zəhərlənmə diaqnozu ilə xəstəxanaya yerləşdiriliblər. Zəhərlənən şəxslərə ilkin tibbi yardım göstərilib, vəziyyətləri kafidir. Məlumata görə hər üç şəxs kirayə qaldıqları evdə dəm qazında zəhərlənib. Onların hərbiçi olduğu bildirilir. Fakt araşdırılır. *** Ağstafada dəm qazından zəhərlənən hərbiçilərin kimliyi məlum olub. "Unikal"ın məlumatına görə, zəhərlənlər Sumqayıt şəhər sakini 2004-cü il təvəllüdlü Rəfail Hacızadə, Cəlilabad rayon sakini 2002-ci il təvəllüdlü Ruslan Əliyev və Yardımlı rayon sakini 1995-ci il təvəllüdlü Saleh Abdullazadədir. Faktla bağlı araşdırma aparılır.

Goranboyda avtomobil piyadanı vuraraq öldürüb. Sozcu.az -ın məlumatına görə, hadisə rayonun Xan Qərvənd kəndində qeydə alınıb. "VAZ-2107" markalı avtomobil 1965-ci il təvəllüdlü Bayramov Mahir Yaqub oğlunu vurub. Piyada aldığı xəsarətdən hadisə yerində keçinib. Faktla bağlı araşdırma aparılır.