Gündəm

Qış fəsli başlamasa da, Rusiyada havalar çox soyuq keçir. Hazırda Moskva son 145 ilin ən dəhşətli qışını yaşayır. Qonşu ölkədə hava şəraitinin bu dərəcədə kəskinləşməsi bizi də narahat edir. Hər kəsin ağlında bir sual var: Şimalda hökm sürən hava şəraitinin bizə hansı təsirləri olacaq? Sozcu.az xəbər verir ki, AMEA-nın Akademik H.Əliyev adına Coğrafiya İnstitutunun şöbə müdiri Ənvər Əliyev bununla bağlı “Yeni Sabah”a danışıb: Tanınmış alim məsələ ilə bağlı bir sıra məqamlara aydınlıq gətirib: “Şimal buzlu okeanından həm rütubətli, həm də quru-kontinental hava kütlələri bizim regiona daxil olub. Düşünürəm ki, cənub küləyinin hakim olduğu isti havalardan sonra hava şəraitinin dəyişməsi qeyri-adi hal deyil. Ona görə də havanın soyuması insanları narahat etməməlidir. Bunlar labüddür. Bakı şəhəri iqlim cəhətdən dünyanın ən oynaq şəhəridir. Cənubdan, şimaldan qərbdən, şərqdən gələn bütün hava axınlarının məskəni Bakıdır. Bütün amilləri nəzərə alaraq bildirmək istəyirəm ki, Bakı şəhərində havanın necə olması ilə bağlı öncədən məlumat vermək doğru olmaz. Qədim zamanlarda insanlar göy üzünə baxanda deyirdilər ki, sabah yağış yağacaq, ya da bir neçə gün sonra hava qarlı olacaq. Ancaq indi bu o qədər də real görünmür. Hətta bu il üçün ən sərt qış olacağı ilə bağlı xəbərlər də yayılmağa başlayıb. Mən bu haqda proqnoz verə bilmərəm. Ancaq bu haqda deyilənlərin çoxu yalandır. Rusiyada hakim olan soyuq hava axınlarının Azərbaycana təsiri gözləniləndir. Lakin daha dəqiq məlumatı sinoptiklər araşdırmalardan sonra bildirəcəklər. Çünki həmin axınların bizə hansı sürətlə gəldiyi, ölkə ərazisinə nə vaxt çatacağı hələ bilinmir”.

Ermənistanda əsir saxlanılan Azərbaycan Ordusunun hərbçisi Hüseyn Axundova ömürlük həbs cəzası verilib. Sozcu.az xəbər verir ki, Zəngəzur mis-molibden zavodunda mühafizəçini qətlə yetirməkdə təqsirləndirilən və 20 il müddətinə azadlıqdan məhrum edilən hərbçi Hüseyn Axundovun cəzası ağırlaşdırılaraq ömürlük həbslə əvəz edilib.

Husilərin Qırmızı dənizdə 3 gəmiyə hücumunda İranın əlinin olduğu barədə inkaredilməz faktlarımız var. Sozcu.az xəbər verir ki, bunu Ağ Evin milli təhlükəsizlik üzrə müşaviri Ceyk Sallivan deyib. “Husilərin gəmilərə hücumda istifadə etdikləri silah-sursatı İran təmin edib”, - Sallivan bildirib. Qeyd edək ki, dekabrın 3-də Qırmızı dənizdə bir neçə kommersiya gəmisinə PUA-larla hücum edilmişdi. Husilər gəmilərin İsrailə aid olduğunu bildirərək, hücumda məsuliyyəti öz üzərlərinə götürmüşdülər.

10 gün əvvəl kiloqramı 70-90 qəpiyə təklif olunan xiyar ötən şənbə və bazar günlərində 3-4 manata satılıb. Qısa zamanda rekrord səviyyədə qiymət artımı təbii ki, müəyyən suallar doğurur. Kəskin qiymət artımının səbəbləri? Məsələyə münasibət bildirən Liberal İqtisadçılar Mərkəzinin sədri Akif Nəsirli Bizim.Media-ya açıqlamasında bildirib ki, kəskin qiymət artımının bir sıra səbəbləri var: “Əsas səbəb odur ki, mövsümlə əlaqədar olaraq açıq havada məhsul yetişdirilməsi başa çatıb. Bunun nəticəsində, bazara daha az məhsul çıxarılıb. Tələb təklifi üstələdiyinə görə də qiymətlər artıb. Digər bir səbəb isə Yeni ilin yaxınlaşmasıdır. Bildiyimiz kimi, hər bayram yaxınlaşanda istehlak bazarında qiymət artımları baş verir. Bu dəfə işbazlar bir qədər tələsib. Başqa bir səbəbsə Yeni ilə görə xaricə məhsul ixracının artmasıdır. Bu səbəblərə görə bazarda məhsul qıtlığı yaranıb”.

"Azərbaycanda minatəmizləmə əməliyyatlarına xüsusi zirehli ekskavatorlar da cəlb edilib". Sozcu.az xəbər verir ki, bunu Azərbaycan Minatəmizləmə Agentliyinin (ANAMA) Maarifləndirmə, Beynəlxalq və İctimaiyyətlə Əlaqələr İdarəsinin müdir müavini Fərhad İsayev dekabrın 4-də Bakıda keçirilən “Azərbaycanda əlilliyi olan şəxslərin və mina qurbanlarının müdafiəsi" mövzusunda dəyirmi masada çıxışı zamanı deyib. Onun sözlərinə görə, minatəmizləmə əməliyyatlarına digər xüsusi texnikalar da cəlb olunub: “Bundan əlavə, Azərbaycan istehsalı olan texnikalar da bu prosesə töhfəsini verirlər”.

ABŞ 2024-cü ildə Hind və Sakit Okean regionunda orta mənzilli raketlər yerləşdirməyi planlaşdırır. Sozcu.az xəbər verir ki, bu barədə “Nikkei” nəşri məlumat yayıb. “Bu cür silahların Çinin qarşısını almaq üçün soyuq müharibədən sonra ilk dəfə regionda peyda olacağı gözlənilir. Söhbət “Standard Missile-6” və ya “Tomahavk” qanadlı raketlərindən gedir. Bu raketlərin uçuş məsafəsi 500-dən 2.7 min kilometrə qədərdir”, - məlumatda qeyd olunub.

Müdafiə Nazirliyinin mənimsəməyə görə tutulmuş Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin (HHQ) Maliyyə Xidmətinin sabiq rəisi, polkovnik Cəlal Kazımov, Quru Qoşunların maliyyə idarəsinin rəisi Bayram Bayramov və maliyyə idarəsinin zabiti Vüsal Əlizadənin cinayət işi üzrə məhkəmə prosesi keçirilib. Bakı Hərbi Məhkəməsində hakim Fikrət Əliyevin sədrliyi ilə baş tutan prosesdə Rəfail Xələfov ifadə verib. O bildirib ki, Müdafiə Nazirliyinin Maliyyə və Büdcə İdarəsinin nəzarət və təftiş şöbəsinin müdiri vəzifəsində işləyib, polkovnik rütbəsində olub. Prosesdə sədrlik edən hakim Fikrət Əliyev bildirib ki, Dövlət Təhlükəsizliyi Xidmətindən əldə olunan məlumata görə, Rəfail Xələfovun barəsində Cinayət Məcəlləsinin 179.4-cü (xüsusi ilə külli miqdarda mənimsəmə) və 313-cü (vəzifə saxtakarlığı) maddələri ilə ayrıca icraatda cinayət işi davam etdirilir. Hakim əlavə edib ki, Rəfail Xələfovun təqsirləndirilən şəxs qismində barəsində cinayət işi aparılır və bu səbəbdən o, bu məhkəmədə də təqsirləndirilən şəxsin hüquqlarından istifadə olunmaqla ifadə verir. Rəfail Xələfov ibtidai istintaqa verdiyi ifadələri təsdiqləyib. O qeyd edib ki, onun şöbəsi maliyyə məsələləri ilə bağlı hərbi hissələrdə təftişlər həyata keçirib: “2017-ci ilin sonundan 2021-ci il yanvarın 1-ə qədər qurumda mənimsəmələrə yol verilib. Maliyyə idarəsinə ayrılan pullar idarə, şöbə və hərbi hissələrə paylanılıb. Həmin vəsaitlərin 20 faizi maliyyələşdirmədə, 30 faizi isə təftiş vaxtı geri alınıb. Bu isə idarədə bir qayda olub. Bu qaydaları da idarə rəisi qoyub. Heç kimdə buna etiraz etməyib, hamı da buna razı olaraq işləyib. Məsələn, xərclərdən artıq 10 min manat pul ayrılıbsa, bunun 2 min manatını maliyyələşdirmə alırdı, 3 mini təftiş şöbəsi, 5 min manatı isə özlərinə qalırdı. Bütün bunlar Nizami Məmmədova məruzə edilirdi”. Sabiq şöbə rəisi qeyd edib ki, 2021-ci ildə N saylı hərbi hissədə təftiş zamanı 1 milyon 700 min manat yeyinti olması aşkar olunub: “Həmin təftişi Həsən Paşayev aparırdı. Təftişin sonunda 500 min manat pul alındı. Həmin pullar barədə də idarə rəisinə məruzə edildi və vəsait təhvil verildi. Daha sonra nazirliyin Təlim Tədris Mərkəzində 470 min manat yeyintiyə yol verilməsini müəyyən edib. Həmin təftişi aparan Teymur Teymurov tərəfindən 400 min manat mərkəzdən alınaraq mənə verildi. Həmin pulu gətirib idarə rəisinə təhvil vermişəm. Bundan başqa təftişlərdən başqa nazirliyin özünün inspeksiyaları hərbi hissələrə maliyyə şöbələrinə yoxlama aparırdı. Nizami Məmmədovun tapşırığı ilə gedib o məsələləri həll edirdim. Yoxlamalar zaman çıxan problemlərə görə pullar alınıb, məsələnin həlli üçün istifadə olunub”. Rəfail Xələfov deyib ki, Vətən müharibəsindən sonra pul almaq söhbətləri bitib: “İdarə rəisi hamını yığıb bu cür işləməyə son verdiklərini deyib. 2021-ci ilin yanvarın 1-dən bu məsələlərə son qoyulub”. O, prokurorun suallarını cavablandıran zaman dəymiş ziyandan 4 milyon 100 min manat ödədiyini deyib. Bu zaman digər təqsirləndirilən şəxslərdən Cəlal Kazımov replika ataraq, Rəfail Xələfovun 25 milyon manatdan çox pul mənimsədiyini deyib. Bundan sonra tərəflər arasında mübahisə düşüb, hakim hər iki şəxsə xəbərdarlıq edib. Sualları cavablandıran Rəfail Xələfov deyib ki, ildə 2 dəfə idarə rəisi tərəfindən xüsusi tapşırıqlar alıb: “Xüsusi tapşırıq olurdu, maliyyələşmə və bizim təftiş şöbəsi hərəyə 1 milyon 200 min manat pul toplayıb idarə rəisinə verirdik, onun həmən pulu kimə verməsindən xəbərim yoxdur”. Nizami Məmmədovun vəkili Rəşad Mirmehdizadənin suallarını cavablandıran təqsirləndirilən şəxs istintaq və məhkəmə dövründə verdiyi ifadələrin ziddiyyətli olmasını izah edə bilməyib. Vəkil “20 nəfərlə istintaq zamanı üzləşmən olub, sizə böyük məbləğlərdə pullar verilib, həmin pullarla bağlı rəhbərliyə məruzə etməmisiz” sualına Rəfail Xələfov belə cavab verib: “Bütün vəsaitlərlə bağlı Nizami Məmmədova məruzə etmişəm”. Vəkilin sualına cavab verən şəxs qeyd edib ki, ümumi dəymiş ziyan olan 143 milyon manat yeyintinin olmasına inanmır: “İş üzrə dediyim kimi yeyintilər olub, amma mənim fikrimcə zərər 143 milyon manat ola bilməz”. Təqsirləndirilən şəxslər – Cəlal Kazımov, Bayram Bayramov və Vüsal Əlizadə də Rəfail Xələfova pul verdiklərini deyiblər. Vüsal Əlizadə deyib ki, Rəfail Xələfova 10 min manat verib. Bu faktı etiraf edən Rəfail Xələfov deyib ki, hansısa bayramda Vüsal Əlizadə ona pul verib: “Vüsal Əlizadə pulu stolun üstünə qoydu. Mən də götürdüm. Bunu da idarə rəisinə məruzə etmədim. Bayramda, ad günlərində hədiyyələr verilirdi, bunun məruzə olunması üçün əsas yox idi. İstintaq dövründə həmin vəsaiti də etiraf etdim və ödədim”. Daha sonra Cəlal Kazımovla Rəfail Xələfov arasında mübahisə yaranıb. Cəlal Kazımov deyib ki, onun tərəfindən pullar Rəfail Xələfova verilsə də, Rəfail Xələfov bunu etiraf etməyib. Bu zaman Cəlal Kazımov onu ittiham edib: “Deyirsiz ki, gəlib etiraf etmirlər, at kimi üzə dururlar. Sizin özünüz də burada at kimi üzə durursuz. Bütün maliyyə xidmətləri rəislərinə tapşırıqları Nizami Məmmədov yox, Rəfail Xələfov verib. Bütün pullar ona verilib. Dəfələrdə aldığı pullardan rəisinin sonradan xəbəri olub. Bunu maliyyə xidmətlərin rəisləri istintaqda da, məhkəmədə də təsdiq edib. Rəfail Xələfov aşağıları da, yuxarıları da aldadıb. Aşağılardan çox pul alıb, yuxarılara az verib”. Rəfail Xələfov isə Cəlal Kazımovu yalan danışmaqda ittiham edib. Bildirib ki, Cəlal Kazımov baş qərargah rəisi Nəcməddin Sadıkovun otağına sərbəst girib-çıxanlardan biri olub: “Bəziləri at kimi üzümə durur. Nədir, bütün pulları mənimlə Nizami yeyib? Hamı burada pul qazanıb”. Daha sonra suallar cavab verən Rəfail Xələfov deyib ki, baş verənlərdən Baş Qərargah rəisinin xəbərinin olub-olmamasını bilməyib. İş üzrə məhkəmə dekabrın 8-də davam edəcək. Qeyd edək ki, 2022-ci ilin əvvəlində Dövlət Təhlükəsizliyi Xidməti Müdafiə Nazirliyində qanun pozuntuları ilə bağlı əməliyyat keçirib. Əməliyyat tədbirləri nəticəsində nazirliyin Maliyyə İdarəsinin rəisi general-mayor Nizami Məmmədov, Hərbi Hava Qüvvələrinin (HHQ) Maliyyə Xidmətinin sabiq rəisi polkovnik Cəlal Kazımov, Quru Qoşunların Maliyyə idarəsinin rəisi Bayram Bayramov, eyni idarənin zabiti Vüsal Əlizadə və cinayət işləri ayrıca icraata görülən digər zabitlər həbs ediliblər. Ümumi cinayət işi üzrə dövlətə dəyən zərər 143 milyon manatdır. İş üzrə dövlətə dəymiş ziyanın 40 milyon manat təşkil edən hissəsi ödənilib. (APA)

Dekabrın 3-də gözlənilən hava şəraiti açıqlanıb.  Milli Hidrometeorologiya Xidmətindən Sozcu.az-a verilən xəbərə görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Gecə və səhər bəzi yerlərdə duman, az çiskin. Mülayim cənub-qərb küləyi əsəcək. Havanın temperaturu gecə 6-9° isti, gündüz 17-22° isti olacaq. Azərbaycanın rayonlarında hava şəraiti əsasən yağmursuz keçəcək. Gecə və səhər bəzi rayonlarda duman. Mülayim qərb küləyi əsəcək. Havanın temperaturu gecə 5-10° isti, gündüz 18-23° isti, dağlarda gecə 2° şaxtadan 3°-dək isti, gündüz 7-12° isti olacaq. 

İsrail Müdafiə Qüvvələri (IDF) Qəzza sakinlərin təxliyəsi üçün Qəzza zolağının xəritəsini yeni məlumat dərc edib. Sozcu.az xəbər verir ki, IDF bu barədə "X" sosial media hesabında məlumat paylaşıb. Məlumata görə, sakinlərin ərazidən təhlükəsiz təxliyəsi üçün xəritədə Qəzza zolağının məhəllə və rayonlar üzrə bölgüsü əks olunub. İsrail Müdafiə Qüvvələri Qəzza sakinlərini İsrail hərbçilərinin göstərişlərinə riayət etməyə çağırıb. Qeyd edək ki, İsraillə HƏMAS arasında 24 noyabrdan müvəqqəti atəşkəs elan edilmişdi. Dekabrın 1-də İsrail Müdafiə Qüvvələri Qəzza zolağında hərbi əməliyyatlara yenidən başlayıb.

Qızılcaya görə Bakının Qaradağ rayonu ərazisində yerləşən 195 nömrəli tam orta məktəbin ibtidai siniflərində distant tədrisə keçilib. Sozcu.az xəbər verir ki, bu barədə Bakı Şəhəri üzrə Təhsil İdarəsi məlumat yayıb. Qeyd olunub ki, şagirdlər arasında qızılca xəstəliyinin aşkar olunması səbəbindən Qaradağ rayonu Gigiyena və Epidemiologiya Mərkəzinin qərarı əsasında 195 nömrəli tam orta məktəbin ibtidai siniflərində dərslər 14 gün müddətinə distant formada keçiriləcək. “Anoloji vəziyyət başqa heç bir məktəbdə müşahidə edilmir. İdarənin tabeliyində fəaliyyət göstərən ümumi təhsil müəssisələrində nəzarətin gücləndirilməsi və pedaqoji kollektivə şagirdlərin səhhətində müşahidə oluna biləcək hər hansı narahatlıq halları ilə bağlı daha diqqətli olmaları tövsiyə edilib. Məktəblərdə tibbi xidmət işi yerli poliklinikalar tərəfindən həyata keçirilir. Valideynlərə tövsiyə olunur ki, övladları mövsümi xəstəliklərə və virus infeksiyalarına yoluxduğu halda tam sağalanadək onların digər uşaqlarla yaxın təmasda olması məqsədəuyğun deyil”, - İdarənin məlumatında bildirilib.

Qarabağda özünü buraxmış keçmiş separatçı-terrorçu xuntanın keçmiş başçılarından olan Araik Arutyunyanın Bakıda müstəntiqlərə verdiyi iddia edilən ifadəsinin daha bir hissəsi yayılıb. Sozcu.az xəbər verir ki, bu barədə “Bez Tormozov” məlumat paylaşıb. İddia edilib ki, Araik özünü “həssas” aparır, hətta cəzasını çəkdikdən sonra Azərbaycan vətəndaşı kimi həyatını davam etdirmək niyyətində olduğunu bildirib. Qeyd edilib ki, o, hazırda İrəvanda olan üç qızı və həyat yoldaşını da Bakıya gətirmək arzusunu ifadə edib.axar)

Ermənistanın baş naziri Nikol Paşinyan ölkədə Qarabağ erməniləri ilə iş üzrə ayrıca idarənin yaradılmasından imtina edib. Sozcu.az xəbər verir ki, bunu özünü buraxmış qondarma rejimin keçmiş "TŞ katibi" və sabiq "müdafiə naziri" olmuş Samvel Babayan jurnalistlərə müsahibəsində deyib. Babayanın sözlərinə görə, Paşinyanın bu qərarının və imtinanın səbəbləri ona məlum deyil. O əlavə edib ki, Ermənistan baş naziri ilə bu məsələ ilə əlaqədar olaraq şəxsən əlaqə saxlamayıb. Xatırladaq ki, Babayan bu gün Ermənistan parlamentinin 44 günlük müharibəni araşdıran komissiyası tərəfindən dindirilib. Komissiyanın səlahiyyət müddəti 3 dekabrda başa çatacaq.