Gündəm

Kür çayının Ağcabədi rayonu, Nəcəfqulubəyli kəndi ərazisindən keçən hissəsində batan 1993-cü il təvəllüdlü Süleymanlı Vaqif Tahir oğlunun meyiti Fövqəladə Hallar Nazirliyinin (FHN) qüvvələri tərəfindən sudan çıxarılıb və aidiyyəti üzrə təhvil verilib.  Bu barədə Sozcu.az-a FHN-dən bildirilib.  Qeyd edilir ki, 2018-ci il təvəllüdlü Süleymanlı Səma Vaqif qızının axtarışları davam etdirilir.  Əlavə məlumat veriləcək.  Qeyd dək ki, hadisə aprelin 12-də olub. V.Süleymanov ailəsi ilə birlikdə Kür çayının kənarına istirahətə gedib. Bu zaman onun 6 yaşlı qızı, 2018-ci il təvəllüdlü Səma Süleymanlı sürüşərək çaya düşüb. V.Süleymanov qızını xilas etmək üçün onun ardınca suya tullanıb. Nəticədə ata və qızı suda boğulub. 

Bakıda 2 nəfər dəm qazından zəhərlənərək ölüb. Sozcu.az xəbər verir ki, bu barədə Baş Prokurorluğun Mətbuat xidmətindən bildirilib. Qeyd olunub ki, aprelin 18-də paytaxtın Sabunçu rayonunun Ramana qəsəbəsi ərazində yerləşən evlərdən birində 2 nəfərin dəm qazından zəhərlənərək ölməsi faktı üzrə Sabunçu rayon prokurorluğunda araşdırma aparılır.

Cəlilabadda yol-nəqliyyat hadisəsi baş verib. Sozcu.az-ın verdiyi məlumata görə, hadisə köhnə Ələt-Astara magistralında, Cəlilabad rayonunun Alar kəndi ərazisində qeydə alınıb. "İsuzu" markalı yük avtomobili idarəetmədən çıxaraq aşıb. Qəza nəticəsində nəqliyyat vasitəsinə ziyan dəyib, xəsarət alan olmayıb. Faktla bağlı araşdırma aparılır.apa

Qonşusunu qətlə yetirməkdə təqsirləndirilən meyxanaçı Rəşad Əmirovun (Dağlı) cinayət işi üzrə məhkəmə araşdırması ötən ilin iyul ayında başa çatıb. Sozcu.az xəbər verir ki, Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən iclasda hökm oxunub. Hökmə əsasən, Rəşad Dağlı qəsdən adam öldürməkdə və soyuq silah saxlamaqda təqsirli bilinərək 9 il 6 ay müddətinə azadlıqdan məhrum edilib. Rəşad Dağlı tək adi bir meyxanaçını deyil, şer xəzinəsinə əvəzsiz tövhələr verə biləcək çox qiymətli şair-qəzəlxanımızı idi. Vətəndaşların kifayət qədər sevgisini və dərin hörmətini qazanan söz ustadının azadlığa çıxmasını istəyən kifayət qədər insan var. Yaxın vaxtlarda Azərbaycan Prezidentinin növbəti “əfv sərəncamını” verəcəyi gözlənilir. Prezident yanında Əfv Komissiyasının iclasları artıq başlasa da, əfv üçün müraciətlər davam edir. Bəs, görəsən, “əfv sərəncamı” ötən il həbs olunan meyxanaçı Rəşad Dağlıya şamil oluna bilər? Məsələ ilə bağlı danışan hüquqşünas Ramil Süleymanov bildirib ki, cəzadan və cinayət məsuliyyətindən azad etməyin bir neçə forması var: “Cəzadan və cinayət məsuliyyətindən azad etməyin əsas növləri amnistiya və əfvetmədir. Amnistiya aktı fərdi qaydada müəyyən edilməyən şəxslər barəsində, yəni kütləvi şəkildə Azərbaycan Respublikasının Milli Məclisi tərəfindən qəbul edilir. Bunun nəticəsində cinayət törətmiş şəxslər, cinayət məsuliyyətindən azad oluna bilər, onların cəzalarının müddəti azaldıla bilər və ya daha yüngül cəza növü ilə əvəz oluna bilər, o cümlədən həmin şəxslərin üzərindən məhkumluqları götürülə bilər”. Hüquqşünas qeyd edir ki, “əfvetmə” birbaşa fərdi qaydada təyin olunmuş şəxslər barəsində Azərbaycan Respublikasının Prezidenti tərəfindən verilən bir sənəddir. (Referans.az)

Xəbər verdiyimiz kimi, İmişlidə iki yeniyetməni elektrik cərəyanı vurub. Hər iki yeniyetmə hadisə yerində dünyasını dəyişib. Məlumata görə, hadisə İmişli şəhər N.Şirinov adına 5 saylı məktəb-liseydə baş verib. Məlumata görə, məktəbin ərazisində yerləşən birmərtəbəli binanın üstünə çıxarkən 2010-cu il təvəllüdlü İsbərov Amid Seyran oğlunu və 2010-cu il təvəllüdlü Məmmədov Farid Vahid oğlunu elektrik cərəyanı vurub. TƏBİB-dən bildirilib ki, 2010 və 2014-cü il təvəllüdlü 2 nəfərin (kişi cinsli) hadisə yerində ölüm faktı qeydə alınıb. Vəfat edən şagirdlərin 8-ci sinifdə oxuduqları bildirilir. Modern.az baş verən hadisə ilə bağlı ətraflı məlumat öyrənmək üçün Mil-Muğan Regional Təhsil İdarəsi ilə əlaqə saxlayıb.  İdarədən verilən məlumatda hadisəni bazar günü günorta satlarında baş verdiyini bildirib: “Məktəbin ərazisində əlavə tikili var, uşaqlar arxa tərəfdən həmin tikilinin üstünə çıxıblar", - məlumatda qeyd olunub. Bildirilib ki, vəfat edən şagirdlərdən biri - İsbərov Amid Seyran oğlu İmişli məktəbinin şagirdidir: "Digər yeniyetmə Qubadlı məktəbinin şagirdidir, Bakıdan qonaq gəlib. Hələki təfərrüatlı məlumat yoxdur.  Aidiyyatı üzrə araşdırma aparılır", Foto: Hadisənin baş verdiyi tikili Qurumdan qeyd olunub ki, hadisənin baş verdiyi tikinti məktəbin hasarına yaxın olan ərazidədir: "Uşaqların niyə orada olduğu müəmmalıdır. Ora elə yerdir ki, gərək, nərdivan qoyub çıxasan. Həmçinin ərazidə ağaclıq var. O ağaclıqdan necə keçiblər, niyə keçiblər, bilinmir”.

Bakıda 25 yaşlı qız dərman içərək ölüb. Sozcu.az xəbər verir ki, 1999-cu il təvəllüdlü, Xətai rayonu, M.Hadi küçəsində yaşayan Alışova Arzu Musa qızı yaşadığı mənzildə müxtəlif növ dərman həbləri qəbul edərək intihar edib. Araşdırma aparılır.

Xankəndi şəhəri ərazisindən xeyli sayda silah-sursat aşkarlanıb. Bu barədə Sozcu.az Daxili İşlər Nazirliyindən məlumat verilib. Qeyd olunub ki, polis əməkdaşlarının keçirdikləri tədbirlərlə aprelin 12-də Xankəndi şəhəri ərazisindən 9 ədəd müxtəlif markalı avtomat silahı, 3 tüfəng, 4 qumbara, 1 fişəng tapançası, 2 tüstüverici şaşka, 35 patron darağı, 880 ədəd müxtəlif çaplı patron, 1 süngü-bıçaq və digər sursatlar aşkar olunaraq götürülüb.

Ermənistanda hərbçilərin düşdüyü qəzada yaralananların sayı açıqlanıb. Sozcu.az xəbər verir ki, xəstəxanadan bildirilib ki, hadisə nəticəsində 20 nəfər yaralı var. Qeyd edək ki, avtomobil qəzasında 4 nəfər dünyasını dəyişib. *** 19:31 Ermənistan Silahlı Qüvvələrinə məxsus avtomobil qəzaya düşüb: Sozcu.az xəbər verir ki, bu barədə Ermənistan Müdafiə Nazirliyi məlumat yayıb. Bildirilir ki, aprelin 12-də saat 15:25 radələrində hərbi qulluqçuları daşıyan “Ural” markalı avtomobil yolun hərəkət hissəsindən çıxaraq dərəyə yuvarlanıb. İlkin məlumatlara görə, 4 nəfər ölüb, yaralılar var. Yerli mətbuat yazır ki, hadisə Meğridə baş verib. Ölən və yaralananlar arasında həm müqaviləli əsgərlər, həm də çağırışçılar var.

Aprelin 14-ü gündüz şimal və qərb rayonlarından başlayaraq 15-i gündüzədək bəzi yerlərdə hava şəraitinin arabir yağıntılı olacağı gözlənilir. Bu barədə Sozcu.az-a Milli Hidrometerologiya Xidmətindən məlumat verilib. Qeyd olunub ki, ayrı-ayrı yerlərdə (Qarabağ, Şərqi Zəngəzur, Naxçıvan MR, Balakən-Şəki, Quba-Qusar, Mərkəzi Aran) yağışın leysan xarakterli intensiv olacağı, şimşək çaxacağı, dolu düşəcəyi, dağlıq ərazilərdə qar yağacağı ehtimalı var. Çaylarda sululuğun artacağı, Böyük və Kiçik Qafqazın bəzi çaylarından qısamüddətli daşqın və sel keçəcəyi ehtimal olunur.

11:44 Beyləqanda fəhlə aparan avtobus aşıb, yaralılar var. Sozcu.az Trend-ə istinadən xəbər verir ki, Zəngilandan gələn "İsuzu" markalı avtobusun sürücüsü idarəetməni itirib. Nəticədə avtobus su kanalına aşıb. Qəza nəticəsində xəsarət alanlar var. Xəsarət alan şəxslər xəstəxanaya çatdırılıb. Daxili İşlər Nazirliyinin mətbuat xidmətinin Bərdə regional qrupunun baş inspektoru, polis kapitanı Aslan Qiyaslı faktı təsdiqləyib. Faktla bağlı Beyləqan RPŞ-da araşdırma aparılır. *** Bu gün saat 08:30 radələrində baş verən yol-nəqliyyat hadisəsi ilə əlaqədar xəsarət alan 20 nəfər Beyləqan Rayon Mərkəzi Xəstəxanasına hospitalizasiya olunublar. Bu barədə TƏBİB-dən məlumat verilib. Bildirilib ki, hospitalizasiya olunanlardan 18-i kişi, 2-i qadındır: "Onlardan 18-də bədənin müxtəlif nahiyələrin travması diaqnozu qeydə alınıb. 2 nəfərə zəruri tibbi yardım göstərilib və ambulator müalicə üçün evə buraxılıb".

SEPAH-a bağlı Teleqram kanalı (rus dilində) Təl-Əvivə 20 raket, "İsrailin Bakıdakı yuvalarına" isə 5 raket atmağa çağırış edib. Sozcu.az Musavat.com-a istinadən xəbər verir ki, bu kanal Azərbaycana özünün radikal münasibəti ilə fərqlənir. "Təl-Əvivə 20 raketin və İsrailin Bakıdakı yuvalarına 5 raketin buraxılması İran İslam Respublikasının bölgədə sağ qalması və müqavimət cəbhəsinin davamlı olması və dəstəyi üçün lazımdır", - deyə bildirilib. Göründüyü kimi, İran silahlı qüvvələrinin ən böyük qoşunu - ali dini liderə bağlı İslam İnqilabı Keşikçiləri Korpusu (SEPAH) açıq-aydın şəkildə ölkəmizin paytaxtını bombalamağa çağırır. Bütün bunların səbəbi isə Ermənistanın işğalına son verərərək, Qarabağın (müsəlman torpaqlarının) azad olunması, "xaçlı klubun" Güney Qafqazdakı ordusunu (artsax) bitirməmiz, düşmənin üzərində möhtəşəm zəfər qazanmamızdır. Bütün erməni təəssübkeşləri kimi, İran da bu gəlişmədən rahatsızdır.

Aprelin 7-də saat 17 radələrində rayon sakini, 1975-ci il təvəllüdlü Alidə Kazımovanın öldürülməsi barədə rayon prokurorluğuna məlumat daxil olub. Bu barədə Sozcu.az-a Goranboy rayon Prokurorluğundan bildirilib. Araşdırma zamanı 2005-ci il təvəllüdlü Şahin Əmrahovun rayonun Tatarlı kəndində yerləşən fərdi yaşayış evində aralarında yaranmış mübahisə zamanı bıçaqla xəsarətlər yetirərək anası Alidə Kazımovanı qəsdən öldürməsinə əsaslı şübhələr müəyyən edilib. Faktla bağlı Goranboy rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanıb. Ş.Əmrahov rayon prokurorluğunun qərarı əsasında şübhəli şəxs qismində tutulub. İbtidai istintaq davam etdirilir.