Ölkəmizin bütün ümumi təhsil müəssisələrində I siniflərdə dərsin müddəti hazırda 45 dəqiqədir. Bu norma Nazirlər Kabinetinin 2012-ci ildə qəbul etdiyi 171 nömrəli qərarla təsbit olunub. Modern.az “Azərbaycan müəllimi”nə istinadən xəbər verir ki, ibtidai siniflərdə dərs zamanı təlimə sərf olunan vaxt ümumi dərs müddətinin 80 faizindən çox ola bilməz. Bundan əlavə, günün ortasında 40 dəqiqədən artıq olmayan dinamik fasilə də nəzərdə tutulur. Elm və Təhsil Nazirliyindən bildirilib ki, hazırda bu normativlərin dəyişdirilməsi gündəmdə deyil. Təhsil İnstitutunun metodisti Səidə Dünyamalıyeva da təsdiqləyib ki, bütün siniflərdə dərs müddəti eynidir - 45 dəqiqə. Onun fikrincə, xüsusilə 1-ci sinif şagirdləri üçün bu, kifayət qədər uzun görünə bilər: “Əvvəlcə nəzərə almaq lazımdır ki, həmin uşaqlar məktəbəqədər hazırlıq qruplarına və ya bağçalara cəlb olunublarmı? Əgər bu təcrübələri varsa, artıq müəyyən qaydalara, vaxt və davranış rejiminə alışmış olurlar. Amma elə uşaqlar da var ki, birbaşa evdən məktəbə gəlirlər. Bu halda 45 dəqiqəlik dərs prosesi onlar üçün həm çox uzun, həm də psixoloji və fiziki cəhətdən ağır ola bilər”. S.Dünyamalıyeva əlavə edib ki, azyaşlı uşaqlar uzun müddət eyni fəaliyyətdə sıxılır, hərəkət etmək, oyun oynamaq istəyirlər. Ona görə də müəllim 45 dəqiqəlik dərsi elə qurmalıdır ki, şagird həm öyrənsin, həm əylənsin, həm də yenidən məktəbə gəlmək həvəsində olsun. Beynəlxalq təcrübə nə deyir? Dünyanın müxtəlif ölkələrində ibtidai siniflərdə dərs müddətləri müxtəlifdir və bu, pedaqoji yanaşmaların fərqliliyini göstərir. Məsələn, İtaliyada dərslər adətən 30-35 dəqiqə davam edir və bu qısa dərslər şagirdlər üçün daha çox fasilə imkanı yaradır. Finlandiyada isə 45 dəqiqədir və dərsdən sonra şagirdlərə 15 dəqiqəlik istirahət fasiləsi verilir.  Latviya təhsil sistemində I sinifdə dərslər 35 dəqiqə davam edir, yuxarı siniflərdə isə 40-45 dəqiqəyə qədər uzanır.  Türkiyədə ibtidai sinif şagirdləri 40 dəqiqəlik dərslərdə iştirak edir və dərslər arasında 10 dəqiqəlik fasilələr təşkil olunur. Sinqapurda dərslər 30-40 dəqiqə arasında dəyişir və burada oyun əsaslı öyrənmə metodları üstünlük təşkil edir.  İngiltərədə isə şagirdlər fəaliyyət blokları ilə öyrədilir; qısa, 15-20 dəqiqəlik bloklar fasilələrlə növbələşərək dərs prosesini maraqlı və cəlbedici edir.  Çin məktəblərində dərslərin müddəti adətən 40 dəqiqədir, bəzi bölgələrdə isə I sinifdə 35 dəqiqəyə qədər qısaldılır.  Yaponiyada isə ibtidai sinif şagirdləri 35 dəqiqəlik dərslərlə məşğul olurlar. Səhiyyə təşkilatlarının yanaşması Amerika Pediatriya Akademiyasının (AAP) tövsiyələrinə görə, uşaqların diqqət saxlama qabiliyyəti onların yaşına uyğun dəqiqələrlə ölçülür. Məsələn, 6 yaşlı uşaq 6-8 dəqiqə, 7 yaşlı uşaq isə 7-9 dəqiqə fasiləsiz diqqət göstərə bilir. Buna görə də dərslərin qısa bloklarla təşkili, ardınca isə fəaliyyət dəyişikliyi vacibdir. Ümumdünya Səhiyyə Təşkilatının sənədlərində isə qeyd olunur ki, 6-7 yaşlı uşaqlar ən geci 30-40 dəqiqədən bir ayağa qalxıb hərəkət etməlidirlər. Bu, həm fiziki, həm də zehni sağlamlıq baxımından zəruridir.  Təhsil psixoloqları da diqqət müddətini sadə düsturla izah edirlər: yaş vurulsun 2-5 dəqiqə. Yəni 7 yaşlı uşaq dərs prosesində maksimum 14-35 dəqiqə diqqətini qoruyaraq öyrənə bilir. Bu isə yalnız oxu-yazı ilə deyil, oyun, rəsmlə məşğuliyyət, qrup işi kimi fəaliyyətlərin növbələşməsi ilə mümkündür. Göründüyü kimi, bəzi ölkələrdə (Latviya, Yaponiya, İtaliya və s.) ibtidai siniflərdə dərs müddəti daha qısadır. Finlandiya və İngiltərə kimi ölkələr isə fasilələrin tezliyi və uşaqların aktivliyinə xüsusi diqqət yetirir. Azərbaycanda mövcud qaydalar dərsin 45 dəqiqədən az olmamasını tələb etsə də, beynəlxalq təcrübə sübut edir ki, dərsin keyfiyyətinə təkcə müddət yox, həm də onun təşkili, fasilələrin düzgün planlanması və uşaqların yaş xüsusiyyətlərinə uyğunlaşdırılması birbaşa təsir göstərir.

Qəbələ şəhərində iki minik avtomobilinin toqquşması ölümlə nəticələnib. Daxili İşlər Nazirliyinin mətbuat xidmətinin Şəki regional qrupundan Sozcu.az-a verilən məlumata görə, Qəbələ şəhəri ərazisində “VAZ-2106” və “Hunday” markalı avtomobillər toqquşub. Nəticədə “VAZ”ın sürücüsü 51 yaşlı İlham Abdurazakov hadisə yerində ölüb. Digər nəqliyyat vasitəsinin sürücüsü 31 yaşlı Aqil Bəhlulzadə və “VAZ”da olan sərnişinlər xəsarət alıblar. Yaralılar Qəbələ Rayon Mərkəzi Xəstəxanasına çatdırılıblar. Faktla bağlı cinayət işi başlanılıb, istintaq aparılır.

Ukraynaya ABŞ-dan silah almaq üçün ayda ən azı 1 milyard dollar lazımdır. Sozcu.az xəbər verir ki, bunu Ukrayna Prezidenti Vladimir Zelenski deyib. "Norveç bizə Amerika Birləşmiş Ştatlarından silah almağa imkan verən PURL proqramına qoşulub və bizim məqsədimiz bu proqramı hər ay ən azı bir milyard dollarla tamamlamaqdır", - o, Kiyevdə səfərdə olan Norveçin baş naziri Yonas Qar Störe ilə birgə mətbuat konfransında deyib.

Ağdərədə növbəti dəfə yanğın hadisəsi qeydə alınıb. Sozcu.az xəbər verir ki, rayonun Sırxavənd kəndi ərazisində yerləşən meşəlik ərazidə anidən yanğın başlayıb. Dərhal hadisə yerinə FHN-in Dövlət Yanğından Mühafizə Xidmətinin Ağdərə, Ağdam və Tərtər rayon Dövlət Yanğından Mühafizə hissəsinin yanğınsöndürən texnikası və canlı qüvvəsi cəlb olunub. Yanğınla mübarizəyə yanğınsöndürən helikopterlər və hüquq-mühafizə orqanlarının əməkdaşları cəlb edilib.

Ermənistanın Azərbaycana qarşı hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan Respublikasının vətəndaşları Arayik Harutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digərlərinin barəsində olan cinayət işləri üzrə açıq məhkəmə prosesinin baxış iclası avqustun 25-də davam etdirilib. Sozcu.az xəbər verir ki, Bakı Hərbi Məhkəməsində hakimlər Zeynal Ağayevin sədrliyi ilə, Camal Ramazanovdan və Anar Rzayevdən ibarət tərkibdə (ehtiyat hakim Günel Səmədova) keçirilən məhkəmə iclasında təqsirləndirilən şəxslərin hər biri bildikləri dildə tərcüməçi, həmçinin müdafiələri üçün vəkillərlə təmin olunub. İclasda təqsirləndirilən şəxslər, onların müdafiəçiləri, zərərçəkmiş şəxslərin bir qismi, onların hüquqi varisləri və nümayəndələri, həmçinin dövlət ittihamını müdafiə edən prokurorlar iştirak ediblər. Hakim Zeynal Ağayev prosesə ilk dəfə qatılan zərərçəkmiş şəxslərə məhkəmə heyətini, dövlət ittihamını müdafiə edən prokurorları, tərcüməçiləri və s. təqdim edib, habelə onların qanunvericiliklə nəzərdə tutulmuş hüquqlarını və vəzifələrini izah edib. Sonra zərərçəkmiş şəxslərin ifadələri dinlənilib. Zərərçəkmiş Sahib Əsgərov ifadəsində bildirib ki, Ermənistan silahlı qüvvələrinin hücumları nəticəsində 1993-cü ildə Kəlbəcərdən məcburi köçkün düşüb. Deyib ki, şəhərə hücumlar nəticəsində qohumlarından həyatını itirənlər və yaralananlar olub. O, Baş Prokurorluğun Dövlət ittihamının müdafiəsi üzrə idarəsinin şöbə rəisi Nəsir Bayramovun sualını cavablandıraraq vurğulayıb ki, Kəlbəcər sakinləri şəhəri tərk edərkən onlara çıxış üçün yol belə verilməyib. Zərərçəkən Kəlbəcərdə “Tunel” faciəsinin şahidi olduğunu da diqqətə çatdırıb. O, ifadəsində, həmçinin düşmən tərəfdən xaricdən gətirilmiş muzdlu döyüşçülərin də olduğunu bildirib. “Qəbiristanlıqlarımızı dağıdıb, mədəni tarixi-dini abidələrimizi öz adlarına çıxarıblar”, - deyə S.Əsgərov əlavə edib. Dövlət ittihamçısı Təranə Məmmədovanın sualını cavablandıran zərərçəkən Sabir Quliyev Şuşanın Göytala kəndinin sakini olduğunu, 1992-ci il mayın əvvəlində şəhərin Ermənistan silahlı qüvvələri tərəfindən işğal edildiyini və məcburi köçkün düşdüyünü vurğulayaraq söyləyib: “Əmim oğlanları Tahir və Rəfael Quliyevlər həlak oldular. Tahir Quliyevin meyiti hələ də tapılmayıb”. “Şuşanın işğalı zamanı qarşı tərəf dinc əhaliyə humanitar dəhliz vermədi. Laçından keçəndə isə Gorus tərəfdən artilleriya atəşinə məruz qaldıq. Orada yaşlı qadın həlak oldu”, - deyən zərərçəkən əlavə edib ki, torpaqlarımız işğaldan azad olunandan sonra atasının qəbrini ziyarət edəndə onun məzarının dağıdıldığını, bəzi başdaşlarının çıxarıldığını görüb. “Mülkümüzü, təsərrüfatımızı, var-dövlətimizi əlimizdən aldılar. Kəndlərimizi dağıdıblar, sakinlər evlərini belə tapa bilmirdilər. Torpaqlarımızı elə bir vəziyyətə salıblar ki...”, - deyə o diqqətə çatdırıb. Baş prokurorun böyük köməkçisi Vüsal Əliyevin sualını cavablandıran zərərçəkən Almaz Ağayeva bildirib ki, ailəsi ilə Xankəndi şəhərinin “5-ci paralel” küçəsindəki evdə yaşayıb. 1988-ci ilin sentyabrında təzyiqlərə dözməyərək Şuşaya köçüblər. “Mən Qarabağ İpək Kombinatında işləyirdim. Erməniləri gətirib Xankəndiyə doldururdular, azərbaycanlıları döyürdülər. Belə təzyiqlərə dözməyərək çox əzab-əziyyətlə meşədən keçib cığırlarla Şuşa şəhərinə gəldik. 1992-ci ildə isə Şuşadan da məcburi köçkün düşdük. Qonşum Zöhrə Quliyeva orada qətlə yetirildi. Atam da yaralanmışdı. Zirzəmidə qalırdıq. Artilleriyadan atəş açırdılar”, - deyə o hadisələri xatırlayıb. Zərərçəkən Sevda Həsənova ifadəsində 1993-cü il avqustunda Ermənistan silahlı qüvvələrinin hücumları nəticəsində Füzuli rayonundan məcburi köçkün düşdüyünü söyləyib. Dövlət ittihamçısı Fuad Musayevin sualını cavablandıran S.Həsənova deyib: “Mülki əhali ilə hərbçilər arasında heç bir fərq qoyulmurdu. Qonşumuzun həyətinə “qrad”la atəş açmışdılar, qızın bədəni parça-parça olmuşdu”. O vurğulayıb ki, torpaqlarımız işğaldan azad ediləndən sonra oraya qayıdanda qəbiristanlıqlarda məzarların dağıdıldığının şahidi olub. Baş prokurorun xüsusi tapşırıqlar üzrə köməkçisi Tuqay Rəhimlinin sualına cavabında zərərçəkən Araz Cəbrayılov 2023-cü il sentyabrın 19-da Xankəndi yaxınlığında meşədə pusquya salındıqlarını və açılan atəş nəticəsində yaralandığını bildirib. Zərərçəkən Nadir Məmmədov ifadəsində 1993-cü ilin oktyabrın sonlarında Ermənistan silahlı qüvvələrinin hücumları nəticəsində Zəngilandan məcburi köçkün düşdüyünü və yaralandığı söyləyib: “Mülki əhaliyə rayondan çıxmaq üçün heç bir humanitar dəhliz verilmədi, sakinlər atəşə tutulurdu. Araz çayından keçib xilas olmuşuq”. O, Ermənistan silahlı qüvvələri tərəfindən dağıdılmış evlərinin şəklini göstərərək qeyd edib ki, 1991-ci ildə tikdikləri evdə cəmi 2 il yaşaya biliblər. “Evlərimizə, məscidlərimizə, qəbiristanlıqlarımza vurulan zərərin ödənilməsini tələb edirik. Qəbiristanlıqlarımızda qəbirlərimiz də dağıdılıb”, - deyə o əlavə edib. Dövlət ittihamçısı Vüsal Abdullayevin suallarını cavablandıran zərərçəkən Nəriman Ələsgərov ifadəsində Ermənistan silahlı qüvvələrinin hücumu nəticəsində Zəngilandan məcburi köçkün düşdüyünü bildirib. Deyib ki, Zəngilanın işğalı zamanı poçtalyon vəzifəsində çalışan Bəhmən adlı şəxs artilleriya atəşi nəticəsində öz həyətində həlak olub. “Qısa müddət ərzində bir neçə kəndi işğal etdilər, əhali kəndlərdən ayaqyalın qaçmağa məcbur oldu. Vəli dayının ailəsini qətlə yetirdilər. İsmayıl dayını ruhi xəstə oğlu ilə birlikdə tanka bağlayaraq sürüyüb öldürdülər. Əhaliyə humanitar dəhliz verilməmişdi. Kəndləri işğal edən kimi yandırırdılar”, - deyə o vurğulayıb. Nəriman Ələsgərov Zəngilan işğaldan azad olunandan sonra oraya qayıdarkən kəndlərdə daşın-daş üstə qalmadığını, qəbiristanlıqların dağıdıldığını gördüyünü söyləyib. Zərərçəkənlər təqsirləndirilən şəxslərin, onların müdafiəçilərinin və zərərçəkmiş şəxslərin nümayəndələrinin suallarını da cavablandırıblar. Sonra məhkəmə iclasında təqsirləndirilən şəxs Arkadi Qukasyanın cinayət işi üzrə verdiyi ifadələr elan olunub. Məhkəmə prosesi avqustun 28-də davam etdiriləcək. Qeyd edək ki, Ermənistan dövlətinin, onun dövlət qurumlarının vəzifəli şəxslərinin, hərbi qüvvələrinin və qanunsuz silahlı birləşmələrin bilavasitə rəhbərliyi və iştirakı, şifahi-yazılı qaydada verdiyi tapşırıq, göstəriş və təlimatları, maddi, texniki, şəxsi heyətlə verdiyi dəstəyi, mərkəzi qaydada idarəçiliyi əsasında, eləcə də ciddi nəzarəti altında Azərbaycan ərazisində daxili və beynəlxalq hüquq normalarına zidd şəkildə, Azərbaycana hərbi təcavüz etmək məqsədilə yaradılmış, həmçinin Köçəryan Robert Sedraki, Sarkisyan Serj Azati, Manukyan Vazgen Mikaeli, Sarkisyan Vazgen Zaveni, Babayan Samvel Andraniki, Balasanyan Vitali Mikaeli, Balayan Zori Hayki, Ohanyan Seyran Muşeqi, Qaramyan Arşavir Surenoviç, Melkonyan Monte Çarlz və digərlərinin rəhbərliyi, bilavasitə və dolayı iştirakları ilə Ermənistan dövləti, o cümlədən sözügedən cinayətkar birlik tərəfindən aparılan təcavüzkar müharibənin gedişində törədilmiş çoxsaylı cinayət faktlarına dair cinayət işi üzrə 15 təqsirləndirilən şəxs ittiham edilir. Həmin şəxslər, yəni, Harutyunyan Arayik Vladimiri, Qukasyan Arkadi Arşaviri, Sahakyan Bako Sahaki, İşxanyan Davit Rubeni, Manukyan David Azatini, Babayan David Klimi, Mnatsakanyan Levon Henrikoviç, Beqlaryan Vasili İvani, Qazaryan Erik Roberti, Allahverdiyan Davit Nelsoni, Stepanyan Qurgen Homeri, Balayan Levon Romiki, Babayan Madat Arakeloviç, Martirosyan Qarik Qriqori, Paşayan Melikset Vladimiri Azərbaycan Respublikası Cinayət Məcəlləsinin 100 (təcavüzkar müharibəni planlaşdırma, hazırlama, başlama və aparma), 102 (beynəlxalq müdafiədən istifadə edən şəxslərə və ya təşkilatlara hücum etmə), 103 (soyqırımı), 105 (əhalini məhvetmə), 106 (köləlik), 107 (əhalini deportasiya etmə və ya məcburi köçürmə), 109 (təqib), 110 (insanları zorakılıqla yoxa çıxarma), 112 (beynəlxalq hüquq normalarına zidd azadlıqdan məhrumetmə), 113 (işgəncə), 114 (muzdluluq), 115 (müharibə qanunlarını və adətlərini pozma), 116 (silahlı münaqişə zamanı beynəlxalq humanitar hüquq normalarını pozma), 118 (hərbi soyğunçuluq), 120 (qəsdən adam öldürmə), 192 (qanunsuz sahibkarlıq), 214 (terrorçuluq), 214-1 (terrorçuluğu maliyyələşdirmə), 218 (cinayətkar birlik (təşkilat) yaratma), 228 (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 270-1 (aviasiya təhlükəsizliyinə təhdid yaradan əməllər), 277 (dövlət xadiminin və ya ictimai xadimin həyatına sui-qəsd etmə), 278 (hakimiyyəti zorla ələ keçirmə və onu zorla saxlama, dövlətin konstitusiya quruluşunu zorla dəyişdirmə), 279-cu (qanunvericiliklə nəzərdə tutulmayan silahlı birləşmələri və qrupları yaratma) və digər maddələri ilə ittiham olunurlar.

İngiltərənin Vayt adasında baş verən helikopter qəzası nəticəsində bir nəfər ağır xəsarət alıb. Sozcu.az xarici mediaya istinadən xəbər verir ki, yaralanan şəxs xəstəxanaya yerləşdirilib. Məlumata görə, helikopter tarlaya düşüb. Hadisə baş verən zaman helikopterdə dörd nəfər olub və onların hava yastıqları açılıb. Qəza yerinə təcili yardım və polis qüvvələri cəlb edilib, əraziyə gediş-gəliş məhdudlaşdırılıb.

Şimali Koreya lideri Kim Çen İnlə nə zamansa görüşəcəyimə ümid edirəm. Sozcu.az xəbər verir ki, bu sözləri ABŞ Prezidenti Donald Tramp Ağ Evdə çıxışı zamanı deyib. “Həqiqətən, mən onu bir gün görəcəyəm. Onunla görüşü gözləyirəm”, - deyə Ağ Ev rəhbəri bildirib.

Qəbələ Rayon Polis Şöbəsinin əməkdaşları tərəfindən narkotik tərkibli bitkilərin kultivasiyasına qarşı əməliyyat keçirilib. DİN-in Mətbuat Xidmətinin Şəki regional qrupundan Sozcu.az-a bildirilib ki, tədbirlərlə 50 yaşlı Nəcəf Alxasov saxlanılıb. Ona məxsus fındıq bağında kultivasiya edərək yetişdirdiyi 107 ədəd çətənə bitkisi aşkar olunub. N.Alxasov çətənə kollarını satış məqsədilə əkdiyini bildirib. Faktla bağlı cinayət işi başlanılıb, təqsirləndirilən şəxs barəsində məhkəmənin qərarı ilə həbs qətimkan tədbiri seçilib. İstintaq tədbirləri davam etdirilir.

Bu gün Bakıda və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi gözlənilir. Sozcu.az xəbər verir ki, bu barədə Milli Hidrometeorologiya Xidmətindən bildirilib. Səhər bəzi yerlərdə zəif duman olacaq. Cənub-şərq küləyi axşam arabir güclənən şimal-qərb küləyi ilə əvəz olunacaq. Havanın temperaturu gecə 20-24, gündüz 31-36 dərəcə isti olacaq. Atmosfer təzyiqi 756 mm civə sütunundan 759 mm civə sütununa yüksələcək. Nisbi rütubət gecə 70-80 %, gündüz 40-45 % təşkil edəcək. Azərbaycanın rayonlarında havanın əsasən yağmursuz keçəcəyi gözlənilir. Lakin gündüz bəzi şərq rayonlarına qısamüddətli leysan xarakterli yağış yağacağı, şimşək çaxacağı, dolu düşəcəyi ehtimalı var. Gecə və səhər bəzi dağlıq ərazilərdə duman olacaq. Mülayim şərq küləyi əsəcək. Havanın temperaturu gecə 19-24, gündüz 34-39, dağlarda gecə 13-18, gündüz 23-28 dərəcə isti olacaq.

“Sədərək” ticarət mərkəzi tərəfindən icarəyə verilmiş anbarda baş vermiş yanğın tam məhdudlaşdırılıb. Sozcu.az xəbər verir ki, bu barədə FHN-dən bildirilib. Qeyd edlib ki, bəzi tüstülənmə ocaqlarının söndürülməsi işləri aparılır. *** 09:00 Bakı şəhəri, Qaradağ rayonu ərazisində yerləşən “Sədərək” ticarət mərkəzi tərəfindən icarəyə verilmiş anbarda baş vermiş yanğın hələ də davam edir. Sozcu.az xəbər verir ki, yanğının söndürülməsi məqsədilə əraziyə Fövqəladə Hallar Nazirliyinin 10-larla xüsusi təyinatlı texnikası və 140 nəfərə yaxın şəxsi heyəti cəlb olunub. Ötən gün günorta saatlarından (11:50 radələrində) başlayan yanğının yayılmasının qarşısı alınıb, eyni zamanda yaxınlıqdakı yanacaqdoldurma məntəqəsinin və digər anbarların mühafizəsi təmin olunub. Hazırda yanğının tam söndürülməsi istiqamətində tədbirlər davam etdirilir.

Bakıda və Abşeron yarımadasında tozlu hava şəraiti müşahidə olunur, hazırda havada tozun miqdarı normadan 1.5 dəfə artıqdır. Milli Hidrometeorologiya Xidmətindən Sozcu.az -a verilən xəbərə görə, bunu Ətraf Mühitin Çirklənməsinin Monitorinq Qrupunun baş mühəndisi Rəna Allahverdiyeva bildirib. O qeyd edib ki, müşahidə olunan toz meteoroloji şəraitlə əlaqədar transsərhəd xarakterlidir, cənub-şərq istiqamətli hava axınları vasitəsilə ölkə ərazisinə daxil olub. "Tozlu hava şəraitinin meteoroloji vəziyyətdən asılı olaraq gün ərzində davam edəcəyi gözlənilir”, - o deyib.

Bakı şəhəri, Qaradağ rayonu ərazisində yerləşən “Sədərək” ticarət mərkəzi tərəfindən icarəyə verilmiş anbarda baş vermiş yanğın hələ də davam edir. Sozcu.az xəbər verir ki, yanğının söndürülməsi məqsədilə əraziyə Fövqəladə Hallar Nazirliyinin 10-larla xüsusi təyinatlı texnikası və 140 nəfərə yaxın şəxsi heyəti cəlb olunub. Hazırda yanğının tam söndürülməsi istiqamətində tədbirlər davam etdirilir.

Pentaqon artıq bir neçə aydır ki, Ukraynanın uzaq mənzilli raketlərdən istifadə edərək Rusiya ərazisinə zərbələr endirməsini bloklayır və bununla da Kiyevin Moskvanın işğalına qarşı mübarizədə güclü silahlardan istifadə imkanlarını məhdudlaşdırır. Sozcu.az xəbər verir ki, bu barədə “Voll Strit Jurnal” amerikalı rəsmilərin sözlərinə istinadən yazıb. Bildirilir ki, ABŞ Müdafiə Nazirliyində hələ ictimaiyyətə açıqlanmayan yüksək səviyyəli təsdiqləmə proseduru Ukraynanın yazın sonlarından bəri Amerika istehsalı olan uzaq mənzilli taktiki raket komplekslərini (ATACMS) Rusiya ərazisindəki hədəflərə qarşı işə salmasına imkan vermir. Qeyd olunur ki, Ukrayna ən azı bir dəfə ATACMS raketlərindən Rusiya ərazisindəki hədəfə qarşı istifadə etməyə cəhd göstərib, lakin rədd cavabı alıb. Nəşr yazır ki, Pentaqon hücumlara icazə verməkdən imtina edib, çünki Ağ Ev Moskvanı sülh danışıqlarına başlamağa inandırmağa çalışırdı. Vacib məqam odur ki, belə zərbələrə icazə vermək yalnız şəxsən müdafiə naziri Pit Heqsetin səlahiyyətindədir. Bu, həm ATACMS raketlərinə, həm də ABŞ-dan hədəf üzrə nişan alma məlumatı alan Britaniya-Fransa istehsalı “Storm Shadow” qanadlı raketlərinə aiddir.

Lənkəranda gənc qadın qətlə yetirilib. Hadisə Liman şəhəri ərazisində baş verib. Belə ki, 1991-ci il təvəllüdlü Əfsanə Əkbər qızı Lələzadə bədən və boyun nahiyələrinin çoxsaylı kəsilmiş-deşilmiş yaraları ilə Lənkəran Rayon Mərkəzi Xəstəxanasına gətirilib. Lakin xəstəxanadan həkiməqədər ölüm faktı qeydə alındığı bildirilib. Qətli törətməkdə Ə.Lələzadənin həyat yoldaşı şübhəli bilinir. Onun meyiti müayinə olunmaq üçün Məhkəmə Tibbi Ekspertiza və Patoloji Anatomiya Birliyinin Lənkəran Rayonlararası Zona Mərkəzinə təhvil verilib.  Qadını qətlə yetirməkdə şübhəli bilinən əri - 32 yaşlı Nicat Lələzadə polisə gedərək könüllü təslim olub. Hadisənin başvermə səbəbləri araşdırılır.Report)

Türkiyənin Qəhrəmanmaraş vilayətində 4 bal gücündə zəlzələ baş verib. Sozcu.az xəbər verir ki, bu barədə ölkənin Fəlakət və Fövqəladə Halların İdarəolunması İdarəsi (AFAD) məlumat yayıb. Məlumata görə, yeraltı təkanlar saat 05:59-da (Bakı vaxtı ilə 06:59) Elbistan rayonunda qeydə alınıb. Zəlzələnin 19,74 km dərinlikdə baş verdiyi bildirilib.

Ukrayna müharibənin 1278-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 076 070 hərbçi, 11 129 ədəd tank, 23 167 ədəd zirehli döyüş maşını, 31 898 ədəd artilleriya sistemi, 1 472 ədəd RYAS (reaktiv yaylım atəş sistemi), 1 211 hava hücumundan müdafiə sistemi, 422 ədəd hərbi təyyarə, 340 ədəd helikopter, 59 593 ədəd avtomobil texnikası, 53 056 ədəd PUA, 3 598 qanadlı raket, 28 gəmi/kater, 1 sualtı qayıq, 3 944 xüsusi avadanlıq itirib.

Kanada Baş naziri Mark Karni avqustun 24-ü Ukraynanın Müstəqillik Günü münasibətilə Kiyevə gəlib. Sozcu.az xəbər verir ki, bu barədə Karninin özünün X səhifəsində məlumat paylaşılıb. “Ukraynanın Müstəqillik Günündə, ölkə tarixinin bu kritik anında Kanada Ukraynada ədalətli və davamlı sülhə nail olmaq üçün dəstəyini və səylərini gücləndirir”, - Karni bildirib.

5 yaşlı Orucov Nihat Kənan oğlu autizm xəstəsidir. Nihatın anası Samirə Orucova bildirir ki, övladının müalicəsi üçün maddi imkanları çox məhduddur. Kütləvi informasiya vasitələrinə müraciət edən ana vətəndaşlarımız, xeyirxah insanların yardım əli uzadacağına inanır.  Lent.az-a müraciətində ana deyib ki, 5 yaşlı övladını özü tək böyüdür:  - Nihat doğulduqdan sonra ilk vaxtlar uşaqda qeyri-adilik hiss etmirdik. Düşünürdük ki, o da gec dil açan, gec danışan uşaqlar kimidir. Amma getdikcə davranışlarında qəribəliklər üzə çıxdı. Uşaqda nitq pozuntusu, qorxu, bəzən hədsiz aktivlik, bəzən də qavrama çətinliyi olduğu göründü. Həkimə apardım. Müayinələr zamanı məlum oldu ki, övladım autizm xəstəsidir. Həm də bu xəstəliyin ağır növü olan Kanner autizmi.   S.Orucova bildirib ki, tənha anadır, işləyir, amma aldığı əməkhaqqı ilə balalarının maddi ehtiyaclarını qarşılaya bilmir. Bir tərəfdən də Nihatın müalicə xərcləri vəziyyəti daha da ağırlaşdırır:  - Oğlum əziyyət çəkir, uzunmüddətli müalicə almalıdı, bir kurs müalicə isə 300 manatdır. Nihat yaşıdlarından geri qalır, heç nəyə reaksiya vermir. Nihatın əlilliyi bu günlərdə təsdiqlənib. İlkin olaraq 205 manat müavinət təyin edilib. Sonra bəlkə məbləğ artacaq. Ancaq müavinətlə  və mənim kiçik əməkhaqqımla uşağın müalicəsini davamlı təmin etmək mümkün deyil. Ona görə də xalqımıza, mərhəmətli insanlara üz tutub kömək istəyirəm. Kimin imkanı nəyə çatır, kömək etsin. S.Orucova bank kartı və əlaqə nömrəsini də yazıb:  Kapital Bank 5239.1517.3928.6964 kart anaya aiddir.  Orucova Samirə adınadır. Əlaqə nömrəsi: 070-525-62-03. 

Gümrüdəki Rusiya hərbi bazası yaxınlığında “Respublika Naminə” partiyasının təşkil etdiyi etiraz aksiyası başlayıb. Sozcu.az xəbər verir ki, bu barədə Ermənistan mediası məlumat yayıb. Aksiya iştirakçıları Rusiya hərbi bazasının Ermənistan ərazisindən çıxarılmasını tələb edirlər.

Bu il iki abituriyent - Orxan Abdulsəmədli və Sona Nurməmmədli qəbul imtahanında 700 bal toplayıblar. Sozcu.az xəbər verir ki, AzEdu.az ixtisas seçiminin nəticələri ilə bağlı hər iki tələbə ilə əlaqə saxlayıb, təəssüratlarını öyrənib. Orxan Abdulsəmədli Azərbaycan Tibb Universitetinin Müalicə işi (tədris ingilis dili üzrə) ixtisasına qəbul olub:  "Maksimum nəticə göstərdiyim üçün ali məktəbə qəbul olacağımı bilirdim. Yəni ixtisas seçiminin nəticələri mənə sürpriz olmadı. Ailə üzvlərimlə sevincimi bölüşdüm. Tələbə adını qazanmaq çox gözəl hissdir. Çox sevindim. Təhsilimi davam etdirib, peşəkar həkim olmaq istəyirəm". 700 bal toplayan digər tələbə Sona Nurməmmədli Azərbaycan Tibb Universitetinin (ATU) Tibb ixtisasına qəbul olduğunu bildirib: "Əslində, 9-cu sinifdən sonra valideynlərimin və müəllimlərimin dəstəyi ilə ixtisasımı müəyyənləşdirmişdim. Tibb ixtisası üzrə təhsil almaq qərarına gəldim. Həmçinin bu sahəyə özümün də böyük marağım var. 700 bal topladığımı öyrəndiyim an keçirdiyim sevinc hislərini dünən bir daha yaşadım. Həddən artıq çox sevindim. Ailə üzvlərim də təbii ki, çox sevindilər. İlk növbədə ali təhsilimi mükəmməl şəkildə almaq istəyirəm. Daha sonra rezidentura təhsilini isə xaricdə davam etdirməyi düşünürəm. Lakin bu barədə tam dəqiq qərar verməmişəm. Vətənimə layiqli, savadlı kadr olmaq istəyirəm. Abituriyentlərə tövsiyə edirəm ki, çətinliklərə baxmayaraq, heç vaxt məqsədlərindən dönməsinlər. Təbii ki, bu yol onlara çətin görünə bilər. Amma əsas odur ki, qarşılarında məqsədləri olsun. Mütləq sistemli şəkildə çalışsınlar. Həmçinin istirahətlərinə də vaxt ayırsınlar".

İranda son bir ayda azı 160 məhbus edam olunub. "Azad İran" "Telegram" kanalı bu barədə İran İnsan Haqları Müdafiəçiləri Qrupunun (HRANA) aylıq hesabatına istinadla xəbər verib. Bildirilib ki, edam olunanlardan üçünün hökmü ictimaiyyətin gözü qarşısında icra olunub.  Hesabatda bildirilib ki, bu müddətdə daha 16 nəfər ölümə məhkum edilib, İran Ali Məhkəməsi isə dörd məhbusun hökmünü qüvvədə saxlayıb. Qeyd olunub ki, ilin əvvəlindən bu günə qədər edam edilənlərin kimliyi bəlli olanların sayı 818 nəfərə çatıb, onlardan 21-i qadındır.

Ukrayna Prezidenti Volodimir Zelenski Niderland hökumətinin rəhbəri vəzifəsini icra edən Dik Shoof ilə telefon əlaqəsi saxlayıb. Sozcu.az xəbər verir ki, Ukrayna dövlət başçısı bu barədə rəsmi məlumatı “X” sosial şəbəkəsində paylaşıb. Zelenskinin sözlərinə görə, söhbət zamanı əsas müzakirə mövzusu Rusiya ilə bağlı vəziyyət olub. O bildirib ki, Moskva sülhə maraq göstərmir və mövcud durumu dəyişmək üçün beynəlxalq səviyyədə daha güclü təzyiqə ehtiyac var. Prezident həmçinin ən yüksək səviyyəli görüşlərin vacibliyini vurğulayıb.  Danışıqda Ukraynanın təhlükəsizlik təminatları məsələsi də gündəmə gətirilib. Zelenski qeyd edib ki, hazırda Kiyev ABŞ və Avropa tərəfdaşları ilə birlikdə bu istiqamətdə konkret mexanizmlər hazırlayır və yaxın günlərdə onların yekunlaşdırılması gözlənilir. “Biz Niderlandın bu prosesdə necə daha fəal iştirak edə biləcəyini və ölkəmizin müdafiəsinə əlavə dəstək verə biləcəyini müzakirə etdik”, – deyə Zelenski açıqlamasında bildirib. Prezident əlavə edib ki, tərəflər Ukraynanın müdafiə sənayesinə sərmayələr, birgə layihələrin reallaşdırılması və yaxın vaxtlarda baş tutacaq yeni görüşlər barədə də fikir mübadiləsi aparıblar./Musavat.com

Xəbər verdiyimiz kimi, ali məktəblərə ixtisas seçimlərinin nəticələri avqustun 22-də elan olunub. Sozcu.az xəbər verir ki, tarixçi alim Zaur Əliyev sosial şəbəkə hesabında tələbə adını qazananlar üçün bir neçə qızıl məsləhətlərini qeyd edib. "İllərin ali məktəb müəllimi kimi bundan sonrakı dövr üçün iki yol göstərim: 1) Təki ali məktəbi bitirim, diplom alım və ondan sonrası asandır; 2) Ali məktəbi bitirim, tələbə illərində əldə etdiyim şanslarla irəli, ancaq irəli gedim və 11+4 ildə mənə ailəmin qoyduğu kapitalı yüz qat, min qat əvəzini çıxım və xəyalımda olan işə və uğura nail olum... Birinci yol çox asandır. Dərsə gələcəksən, düşəcəksən əhatəyə, mən gəncəm öz həyatımı yaşayım, kafe, mollar, geyim keçim, gəzmək və sairələrə başın qarışacaq, dərslərdə zəif iştirak edəcəksən, müəllimlərin gözündən düşəcəksən, bir təhər imtahan və kollekium zamanı köçürmə edəcəksən, beynində heç nə qalmayacaq, amma yenə də bitirib ali məktəbi iş axtarmağa başlayacaqsan. Məcbur olub öz sahən üzrə deyil, ağır, yorucu və sizə uğur gətirə bilməyən işlərdə ömürünüzü başa vuracaqsınız.. İkinci yol isə daha asandır, sadəcə bunun üçün müəyyən şərtlər var ki, onlara əməl etmək lazımdır: 1) Yuxu rejimi çox önəmlidir. Buna diqqət etmək; 2) Müəllimlər verən mühazirələri oxumaq, onlarla bağlı qeydlər edib, qaranlıq qalan məsələni soruşmaq; 3) Dərs mövzusu ilə bağlı əlavə bədii və elmi kitablar oxumaq. Əlavə bilgi səni bir pillə yuxarıda saxlayacaq; 4) Universitetin ictimai həyatında iştirak etmək, bilik qruplarında və tələbə gənclər təşkilatında fəallıq göstərmək; 5) Debat klubların üzvü olmaq və yeni-yeni biliklər qazanmaq ; 6) Kitabxanalara qeydiyyatdan keçmək. Xüsusilə Axundov və Elmlər Akademiyası kitabxanaları; 7) Yemək rejimini qaydaya salmaq. Səhər ac durub dərsə gəlib, quru yeməklər ilə günü yola vermək olmaz. Normal qida rejimi önəmlidir. Belə olanda dərs zamanı fiziki gücün yerində olacaq; 8) Enerji və qazlı içkilərdən, o cümlədən zərərli vərdişlər olan spirtli içkilər və siqaretdən uzaq durmaq - Bu, sizi fiziki olaraq o qədər əldən salacaq ki, ikinci yol yox, birinci yola gedəcəksiniz; 9) Qrup olmağı öyrənin - "ay, bu belədir, o elədir" söhbəti etməyin. Qrup olun. Bir-birinizdən möhkəm yapışın, birgə qərarlar verin. Dekanlıq, müəllimlər üçün xəbər yox, birlik aparın. Bir-birinizin qədrini bilin. Siz bir olsanız, istədiyiniz hər şeyə nail olacaqsınız; 10) Xarici dil (dilləri) məsələsinə ciddi yanaşın. Xarici dil öyrənin - bu, çox önəmlidir. Kitablar oxuyun, filmlərə baxın, kurslara gedin...4 il qısa müddətdir, karyera isə uzun və ağır yoldur; 11) Valideyin və qohumlara çox arxayın olmayın. Elə müəllimlər var ki, prinsipləri o qədər böyükdür ki, dünya dağıla, heç kimə qulaq asmırlar. Onlar üçün bilik daha çox vacibdir. Ona görə daima hazırlıqlı olun; 12) Azərbaycanı çox, çox, çox sevin! Şəhidlər, qazilər, tarix və ədəbiyyat barədə bilikli olun. Ən azı öz rayon və şəhərinizin qəhrəmanlarını tanıyın. Bu bilik sizi bir anda uğurlu bir yola salacaq və müəllimlər və rəhbərlik sizə böyük hörmət edəcək; 13) Könüllük proqramlarına qoşulun; 14) Sevin və sevilin. Sevgi dünyanı xilas edəcək; 15) Ata-ananızın qədrini bilin, ailənizə bağlı olun, mütəmadi onlarla danışın, onlardan heç nə gizlətmək olmaz. Bizlər Sizləri gözləyirik. Hər zaman da yanınızdayıq. Müəllimlər yeni bir tələbə yox övladlar gözləyirlər. Çəkinmədən müəllimlərə valideyn gözü ilə baxın.. Sizləri çox sevirik və ona görə iki yoldan birini seçməli olsanız belə sizin yanınızda olacayıq",- o, əlavə edib.

Ukrayna müharibənin 1277-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 075 160 hərbçi, 11 129 ədəd tank, 23 164 ədəd zirehli döyüş maşını, 31 858 ədəd artilleriya sistemi, 1 472 ədəd RYAS (reaktiv yaylım atəş sistemi), 1 210 hava hücumundan müdafiə sistemi, 422 ədəd hərbi təyyarə, 340 ədəd helikopter, 59 512 ədəd avtomobil texnikası, 52 935 ədəd PUA, 3 598 qanadlı raket, 28 gəmi/kater, 1 sualtı qayıq, 3 944 xüsusi avadanlıq itirib.