Baxmut ətrafında vəziyyət ağır olsa da, nəzarət altındadır. Sozcu.az xəbər verir ki, bunu Ukrayna ordusunun Şərq qruplaşmasının nümayəndəsi Sergey Çerevatıy deyib. O bildirib ki, gün ərzində bu istiqamətdə 155 işğalçı öldürülüb, 200-dən çoxu isə yaralanıb: “Baxmut bu gün müharibənin episentridir. Yalnız şəhərin özü ərazisində düşmən bir gündə 21 atəş və 9 toqquşma həyata keçirib. Ümumilikdə, MLRS-dən düşmənə 131 atəş açılıb və 38 toqquşma baş verib”.

Türkiyənin Artvin vilayətinin Yusifeli rayonunda qar uçqunu baş verib. Sozcu.az xəbər verir ki, bu barədə TRT məlumat yayıb. Məlumata görə, uçqun zamanı 2 nəfər ölüb, 7 nəfər isə yaralanıb.

Xətai rayonu ərazisində yerləşən supermarketlərdən birində baş vermiş silahlı insident nəticəsində bir nəfər ölüb və iki nəfər yaralanıb. TƏBİB-dən "Report"a bildirilib ki, baş verən hadisə ilə əlaqədar Bakı Şəhəri Təcili və Təxirəsalınmaz Tibbi Yardım Stansiyasına 12:21 radələrində çağırış daxil olub.  Hadisə nəticəsində xəsarət alan 2 nəfər TƏBİB-in tabeliyindəki Sabunçu Tibb Mərkəzinə təxliyə edilib. Bildirilib ki, hazırda onlara zəruri tibbi xidmət göstərilir.  Qeyd edək ki, bir nəfər hadisə yerində dünyasını dəyişib. 13.31 Xətai rayonu ərazisində yerləşən supermarketlərdən birində baş vermiş silahlı insident nəticəsində bir nəfər ölüb. Daxili İşlər Nazirliyindən "Report"a bildirilib ki, ölən H.Rüfət Rahib oğlu polis əməkdaşı deyil. 13.08 Xətai rayonu ərazisində yerləşən supermarketlərdən birində baş vermiş silahlı insidentlə bağlı hazırda Baş Prokurorluğun İstintaq idarəsi, Kriminalistika şöbəsi və Xətai rayon prokurorluğunun əməkdaşları hadisə yerindədilər. Bu barədə "Report"a Baş Prokurorluqdan məlumat verilib. Bildirilib ki, qeyd olunan faktla bağlı prokurorluqda araşdırma aparılır. "İctimaiyyətə əlavə məlumatın verilməsi təmin ediləcəkdir" - məlumatda vurğulanıb. 12.44 Bakıda marketlərin birində silahlı atışma olub. “Report”un əldə etdiyi məlumata görə, hücumun inkassatorun maşınına olduğu bildirilir. Hadisə nəticəsində ölən və yaralananların olub-olmadığı dəqiqləşdirilir. Hazırda hüquq-mühafizə orqanlarının əməkdaşları hadisə yerində araşdırma aparır. Daxili İşlər Nazirliyindən bildirilib ki, Xətai rayonunda baş verən hadisə ilə bağlı əməliyyat qrupu hadisə yerinə cəlb edilib: “Araşdırma aparılır. Əməli törətməkdə şübhəli bilinən şəxsin, yaxud şəxslərin tutulması istiqamətində tədbirlər görülür. Əlavə məlumat veriləcəkdir”.

Bakıda 78 yaşlı kişini avtomobil vuraraq öldürüb. Sozcu.az xəbər verir ki, hadisə Binəqədi rayonu, Azadlıq prospektində qeydə alınıb. Hafiz Kamandarov idarə etdiyi "Fiat Doblo" markalı avtomobillə yolu keçən 1945-ci il təvəllüdlü Vaqif Ağayevi vurub. Piyada aldığı xəsarətlərdən ölüb. Faktla bağlı cinayət işi başlanılıb.

Avropa İttifaqı qışı yeraltı anbarlarda rekord qaz həcmləri göstəriciləri ilə başa vurub. Sozcu.az-ın məlumatına görə, bu barədə "Gas Infrastructure Europe" Assosiasiyasının (Avropanın qazın nəqli sistemləri operatorları assosiasiyası) məlumatlarında bildirilib. Məlumata görə, martın əvvəlinə görə anbarların doluluq səviyyəsi 60%-dən çox olub, bu da illik müqayisədə iki dəfə çoxdur. Belə ki, martın 1-nə Aİ-də qaz anbarlarının doluluq səviyyəsi 60,64% təşkil edib və anbarlarda olan qazın həcmi 66,1 mlrd. kubmetr olub.

“İkinci Qarabağ müharibəsi zamanı Gəncəyə edilən raket hücumları ermənilərin qeyri-insaniliyindən, onlarda başqa millətə qarşı nifrət hissinin nə qədər güclü olmasından xəbər verir”. Sozcu.az xəbər verir ki, bunu Kolumbiyanın milli televiziyasının jurnalisti Lauryen Kalderin deyib. "Mən heç vaxt raket hücumlarının bu qədər dağıntıya, bu qədər itkiyə səbəb olduğunu görməmişdim. Bunu təsəvvürümə belə gətirə bilməzdim", - o bildirib. Jurnalist ermənilərin gecə vaxtı şəhərə raket zərbəsi endirməsinin onlardakı böyük nifrətdən xəbər verdiyini bildirib və bundan çox məyus olduğunu söyləyib: "İlk dəfədir ki, belə bir şeylə rastlaşıram. Kolumbiyada bu barədə çox az adam bilir. Geri qayıdandan sonra tamaşaçılara gördüklərim haqqında çox şey danışacağam". Dünənki Ağdam səfəri ilə bağlı təəssüratlarını bölüşən jurnalist gördüklərindən şoka düşdüyünü söyləyib: "Nə qədər yol getsək də, dağıntılar bitmək bilmir. Bu, böyük təəssüf hissi doğurur".

2022-ci ilin yayında “Yuventus”dan “Roma”ya keçən Paulo Dibala sabiq klubunu məhkəməyə verə bilər. Turin klubunun argentinalı futbolçuya borcu var. Bu barədə oyunçunun özü bildirib. “Yuventus”dan sonuncu dəfə nə zaman maaş aldığını xatırlamadığını deyən 29 yaşlı forvard klubunu dəyişərkən bütün ödənişlərin edilməli olduğunu söyləyib. Ancaq “qoca sinyora”nın hələ də ona 3,7 milyon avro borcu var. Aprel ayından gec olmayaraq məbləğ tam ödənilməlidir. Əks halda, futbolçunun vəkilləri hüquqi prosedurlara baş vuracaq. Dibala bunu istəmədiyini ifadə edib. Qeyd edək ki, maliyyə maxinasiyalarında ittiham olunan “Yuventus”un A Seriyasında 15 xalı silinib. Mənbə: “La Gazzetta dello Sport”

Bakıda qətl törətməkdə təqsirləndirilən meyxanaçı Rəşad Əmirov (Dağlı) bu gün növbəti dəfə məhkəməyə gətirilib. Bu gün onun barəsində seçilmiş həbs-qətimkan tədbirinin uzadılması ilə bağlı istintaq orqanının təqdimatına baxılacaq. Xatırladaq ki, R.Dağlı ötən il noyabrın 9-da Bakının Qaradağ rayonu, Lökbatan qəsəbəsində 1979-cu il təvəllüdlü İsgəndər Mehdiyevi 14 bıçaq zərbəsi ilə qətlə yetirib. Qətli törədəndən sonra R.Dağlı könüllü olaraq polisə təslim olub və qətl hadisəsini törətdiyini etiraf edib. Qaradağ Rayon Məhkəməsinin qərarı ilə onun barəsində 4 aylıq həbs qətimkan tədbiri seçilib. Mənbə:trend.az

Simferopolda ruslar ukraynayönlü hərəkatın aktivləşməsindən qorxduqları üçün könüllü dəstələr yaradırlar. Sozcu.az xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb. Bildirilir ki, sözügedən könüllü dəstələrin tapşırıqlarından biri, xüsusən də gözətçi və təxribatçıları müəyyən etmək olacaq: “Məlumdur ki, müharibəyə görə Ukraynada hüquq-mühafizə orqanlarının əməkdaşlarının müəyyən çatışmazlığı var. Ona görə də şəhərə nəzarət etməkdən əlavə, müşahidəçilərin və təxribatçıların müəyyən edilməsi olmalıdır”.

Ukrayna rus təcavüzü üzrə məhkəməyə maksimum dəstək toplayıb. Sozcu.az xəbər verir ki, bunu Ukrayna Prezidenti Vladimir Zelenski deyib. "Biz hər şeyi edirik ki, Beynəlxalq Ədalət Məhkəməsi Rusiya cinayətkarlarını cəzalandırmağa nail olsun. Çalışırıq ki, milli hüquq-mühafizə orqanlarımız və məhkəmə qurumlarımız da bütün rus qatilləri və icraçıları üçün ədalətli hökmlər təmin etsinlər", - Zelenski qeyd edib.

Bu gün Azərbaycanda zəlzələ olub. Respublika Seysmoloji Xidmət Mərkəzindən Sozcu.az-a verilən məlumata görə, zəlzələ yerli vaxtla saat 10:40-da Şirvan stansiyasından 18 km şimal-qərbdə, Hacıqabul rayonunda qeydə alınıb. Qeyd olunub ki, zəlzələ hiss olunmayıb.

Mingəçevirdə 16 yaşlı gənc həmyerlisini bıçaqlayıb. Ötən gün saat 21:15 radələrində 2007-ci il təvəllüdlü şəhər sakini İsmayılov Yusif Sadiq oğlu A.Məmmədov küçəsində avtomobil yolunun kənarında şəxsi münasibətlər zəminində aralarında yaranmış mübahisə zamanı bıçaqla İsmayılov Səfər Yusif oğlunun kürək nahiyəsinə ümumilikdə 4 ədəd bədən xəsarətləri yetirib. Faktla bağlı cinayət işi başlanaraq istintaq aparılır.

Gəncədə ölümlə nəticələnən yol nəqliyyat hadisəsi baş verib. Bu barədə DİN-in Mətbuat Xidmətinin Gəncə regional qrupunun baş inspektoru polis kapitanı Eşqin Qasımov məlumat verib. Bilkdirilib ki, Samux rayon sakini Xəyal Yolçuyev idarə etdiyi VAZ 2107 markalı avtomobil ilə yolu keçmək istəyən piyada, 2002-ci il təvəllüdlü, Vətən Müharibəsi iştirakçısı, Şəhriyar Məmmədovu vurub və nəticədə piyada aldığı xəsarətdən hadisə yerində ölüb. Faktla bağlı araşdırmalar davam etdirilir

“Qadınlara qarşı bu münasibət nə vaxt dəyişəcək? Niyə kişilər hər istədiyini edəndə fahişə olmur, qadının kiminləsə münasibəti olanda, şəkilləri yayılanda həyatı məhv olur?” Bu sözləri sosial şəbəkə hesabında müğənni Nura Suri paylaşıb. O qeyd edib: “Bu, nə düşüncədir? Nə vaxta kimi qadınlar susacaq, başını aşağı salacaq, istəklərin deməkdən çəkinəcək? Kişilər özlərini qadınlardan üstün hesab edəcək, qadınlar bəyənilmək üçün dəridən qabıqdan çıxacaq, yaşlananda qadınları gənclərlə əvəzləyəcək qoca kişilər? Nə vaxtacan ǝrdə olmaq prioritet hesab olunacaq? Nə vaxta kimi qadınları beldən aşağı, namus və qeyrətlə əzəcəklər? Belə cəmiyyət kimə xeyir gətirir? Hamı kompleksli, hamı travmalı, psixiatrik xəstəxanadayıq sanki. İnsanlar o qədər cılızlaşır ki...”

Fövqəladə Hallar Nazirliyi bir sıra tibb müəssisələrinin rentgen müayinə fəaliyyətini dayandırıb. Bu barədə Nazirlikdən məlumat verilib. FHN-nin Nüvə və Radioloji Fəaliyyətin Tənzimlənməsi üzrə Dövlət Agentliyi səlahiyyətlərinə uyğun olaraq, ölkədə nüvə və radioloji təhlükəsizliyin təmin olunması məqsədilə zəruri tədbirlərin görülməsini davam etdirir. Bu çərçivədə, “Bakı Baş Səhiyyə Mərkəzi” Publik Hüquqi Şəxsin müraciəti əsasında Nüvə və Radioloji Fəaliyyətin Tənzimlənməsi üzrə Dövlət Agentliyi tərəfindən ionlaşdırıcı şüa mənbələri hesab edilən qurğuların mövcud olduğu tibb müəssisələrində nəzarət-yoxlama tədbirləri həyata keçirilib. Keçirilən tədbirlər nəticəsində Bakı şəhərində yerləşən 5 və 39 nömrəli Şəhər poliklinikalarında, 1 və 2 nömrəli Uşaq Stomatoloji poliklinikalarında, 1 nömrəli Tələbə Poliklinikasında və Müharibə Veteranları Respublika Xəstəxanasında radiasiya təhlükəsizliyi tələblərinə riayət edilmədən və “xüsusi icazə”si olmadan rentgen kabinetlərinin fəaliyyət göstərdiyi müəyyən edilib. Agentlik tərəfindən qanunvericiliyin tələblərinə uyğun olaraq görülmüş tədbirlər nəticəsində yuxarıda göstərilən tibb müəssisələrinin rentgen kabinetlərinin fəaliyyəti dayandırılıb. Qeyd olunanları nəzərə alaraq, Fövqəladə Hallar Nazirliyi bir daha əhaliyə müraciət edərək, təhlükəsizliyin təmin edilməsi məqsədilə rentgen və kompüter-tomoqrafiya müayinələri üçün yalnız “xüsusi icazə” əsasında fəaliyyət göstərən tibb müəssisələrinə müraciət olunmasını tövsiyə edir (həmin müəssisələrin siyahısı ilə bu ünvana daxil olmaqla tanış olmaq mümkündür – https://www.fhn.gov.az/index.php?aze/news/xeber/1/1/1/1000).

Xəbər verdiyimiz kimi, ötən gün Ankara Böyük şəhər Bələdiyyəsinin sədri Mansur Yavaş və İstanbul Böyük şəhər Bələdiyyəsinin sədri Əkrəm İmamoğlu Ankarada görüşüb. İYİ partiya sədri Meral Akşenerin zəngindən sonra baş tutan görüşün ardından hər iki siyasətçi Cümhuriyyət Xalq Partiyasının (CHP) sədri Kamal Kılıçdaroğlunu dəstəklədiklərini elan ediblər. Görüşdən sonra Ə. İmamoğlu sosial media hesabında Kılıçdaroğluna dəstəyini paylaşaraq onun millətin çətin günündə xalqın iradəsini təmsil edəcəyinə ümid etdiyini qeyd edib: “Millət İttifaqı xalqımızın çətin dönəmində üzərinə ağır bir məsuliyyət götürüb. İnanıram ki, millətimizə çarəsiz, ümidsiz günlərdə tək olmadıqlarını göstərəcəklər. CHP-nin öz övladı və Millət İttifaqının Bələdiyə başqanı olaraq millətimizin arzu etdiyi birlik içərisində, ittifaq masasında iradəmizi təmsil edən cənab Kılıçdaroğlunun və Millət İttifaqının daha da böyüyəcəyinə şübhəm yoxdur”. İmamoğludan sonra CHP sədri Kamal Kılıçdaroğluna dəstək Mənsur Yavaşdan da gəlib. Yavaş sosial media hesabından verdiyi açıqlamada bunları qeyd edib: “İndiyə qədər verdiyimiz açıqlamalarda partiyamızın sədri cənab Kılıçdaroğlunun iradəsinə zidd hərəkət etməyəcəyimizi bildirmişdik. Eyni yoldayıq. Ümidimiz Millət İttifaqının bütün maraqlı tərəflərlə yoluna davam etməsidir”. Xatırladaq ki, martın 2-si “altılı masa”da prezident seçkilərinə vahid namizədin müəyyən edilməsi ilə bağlı müzakirələr keçirilib. 5 partiya namizəd olaraq Cümhuriyyət Xalq Partiyasının (CHP) sədri Kamal Kılıçdaroğlunu təklif edib. Bu partiyalar Kılıçdaroğlunun namizədliyini dəstəkləsə də, İYİ partiya Ankara Böyük şəhər Bələdiyyəsinin sədri Mansur Yavaş və İstanbul Böyük şəhər Bələdiyyəsinin sədri Əkrəm İmamoğlunun namizədliyini irəli sürüb. Digər partiyalar həmin şəxslərin namizədliyini qəbul etməyib. Danışıqlardan narazı qalan M.Akşener partiyasının “altılı masa”nı tərk etdiyini açıqlayıb./Qafqazinfo

Azərbaycanın Qarabağ iqtisadi rayonunda faydalı qazıntı yataqlarının qanunsuz istismarına qarşı Xankəndi-Laçın yolunda keçirilən etiraz aksiyası 83 gündür davam edir. Sozcu.az xəbər verir ki, havanın qarlı və şaxtalı olmasına baxmayaraq, aksiya iştirakçıları ötən gecə boyu da yüksək fəallıq nümayiş etdiriblər. Təhlükəsizlik qaydalarına yüksək səviyyədə əməl olunan toplanış yerində gecə boyu da heç bir insident baş verməyib. Həmişə olduğu kimi, etirazçılar bu səhəri də Azərbaycan Dövlət Himninin səsləndirilməsi ilə açıblar. Onlar etirazlarını yüksək əhval-ruhiyyə ilə davam etdirirlər. Eyni zamanda ekofəallar yolun hər iki tərəfində, hərəkətə maneə törətmədən üzərində Azərbaycan, rus və ingilis dillərində yazılmış plakatlar qaldırıb, şüarlar səsləndirirlər. Aksiya iştirakçılarının tələbləri ilk gündən olduğu kimi, dəyişməz olaraq qalır. Etirazçılar aksiyanın keçirildiyi ilk gündən etibarən dünya ictimaiyyətini ekologiyanı qorumağa çağırırlar. Belə ki, ekofəallar və gənc könüllülər “Azərbaycan oyaqdır, sərvətinə dayaqdır!”, “Azərbaycan vahiddir, sərvətinə sahibdir!”, “Ekoloji cinayətə son!”, “Stop ekoterror!”, “Берегите природу!”, "Экоциду нет! Мониторингу да!" şüarlarını səsləndirirlər.

2022-ci ilin dekabrında Tvitterin gəliri 2021-ci ilin dekabr ayı ilə müqayisədə təxminən 40% azalıb. Sozcu.az xəbər verir ki, bu barədə “Voll Strit Jurnal” məlumat yayıb. Bildirilir ki, gəlirlərin aşağı düşməsi İlon Maskın platformanı aldıqdan sonra reklamçıların sosial şəbəkə ilə əməkdaşlıqdan imtina etməsindən sonra olub.

Adıyamanın Çelikhan rayonunda yerli vaxtla 08:27-də 4,4 bal gücündə zəlzələ baş verib. Sozcu.az xəbər verir ki, bu barədə AFAD məlumat yayıb. Zəlzələ 7 kilometr dərinlikdə qeydə alınıb.

Dünya birjalarında neft qiymətləri bahalaşmaqda davam edir. Sozcu.az xəbər verir ki, hazırda “Brent” markalı neftin bir barreli 85,83 dollara, yüngül neftin bir barreli isə 79,68 dollara təklif olunur.

Ukrayna müharibənin 374-cü günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 152 190 hərbçi, 3409 ədəd tank, 6683 ədəd zirehli döyüş maşını, 2414 ədəd artilleriya sistemi, 487 ədəd RYAS (reaktiv yaylım atəş sistemi), 247 hava hücumundan müdafiə sistemi, 302 ədəd hərbi təyyarə, 289 ədəd helikopter, 5289 ədəd avtomobil texnikası, 2 066 ədəd PUA, 873 qanadlı raket, 18 gəmi/qayıq, 230 xüsusi avadanlıq itirib.

Ötən gün vəfat edən ilahiyyatçı Hacı Şahin Həsənlinin dəfni ilə bağlı yardım edilməsinə dair əsassız məlumatlar yayılır. Sozcu.az xəbər verir ki, bu barədə din xadiminin sosial şəbəkə hesabı açıqlama yayaraq, iddiaları təkzib edib. "Əziz dostlar! Hacı Şahin Həsənlinin dəfni və ya digər məsələlərə yardım edilməsi bağlı yayılan məlumatlar həqiqətə uyğun deyil. Diqqətli olmağınızı xahiş edirik", - məlumatda deyilir.

Ötən gün ərzində ukraynalı hərbçilər rusların şəxsi heyəti və hərbi texnikasının cəmləşdiyi ərazilərə beş zərbə endirib. Sozcu.az xəbər verir ki, bu barədə Ukrayna Silahlı Qüvvələri Baş Qərargahı məlumat yayıb. Həmçinin, Baş Qərargah qeyd edib ki, raket qoşunlarının bölmələri və artilleriya bölmələri gün ərzində komanda məntəqəsini, düşmənin üç cəmləşdiyi ərazini, bir sursat anbarını, iki yanacaq anbarını və düşmənin elektron döyüş məntəqəsini vurub.

Ukrayna Avropa Birliyinə qoşulduqdan sonra Qərb Rusiyanın təcavüzünün qarşısını almağa kömək edəcək. Sozcu.az xəbər verir ki, bunu Latviya Prezidenti Egils Levits Lvovda Ukrayna Prezidenti Vladimir Zelenski ilə keçirdiyi mətbuat konfransında deyib. "Sülh formulu beynəlxalq hüquq normalarına əsaslanan və 1991-ci il sərhədləri daxilində Ukraynanın tam ərazi bütövlüyünü təmin edən davamlı sülhün yaradılmasına imkan verəcəkdir. Bunsuz sülh davamlı olmayacaq və bizə davamlı sülh lazımdır", - Levits qeyd edib.