“Ermənistan mətbuatı dərin təəssüf hissi ilə xəbər verir ki, Azərbaycan Silahlı Qüvvələrinin Laçın rayonuna yeridilməsi nəticəsində “Böyük və Kiçik Sünik Memorial”ı Azərbaycan tərəfinin nəzarətinə keçib”. Bu barədə hərbi ekspert Ədalət Verdiyev “facobook” hesabında paylaşım edərək məlumat verib. “Ermənilər son anda yalnız xaçkarı “memorial”dan yığışdıra biliblər. Qeyd edək ki, erməni ekspansionistlərinin terminologiyasında “kiçik Sünik” Azərbaycanın Qarabağ bölgəsi hesab edilirdi və memorial “Sünik və Arsax talelərinin birliyini” simvolizə edirdi. Nə isə. Fərarilərə keçmiş olmasın”, – ekspert bildirib.

Ukrayna ordusu Melitopoldakı lokomotiv deposunu vurub. Zərbənin HİMARS reaktiv yaylım atəş sistemləri vasitəsilə endirildiyi bildirilib. Xeyli sayda yaralı var.

"İlk hücumlar, ilk nailiyyətlər, ilk azad edilmiş ərazilər... Artıq 1 ildir ki, biz Kiyev vilayətindən işğalçıları qovmuşuq". Bunu Ukrayna prezidenti Volodimir Zelenski teleqram kanalında yazıb. "Ukrayna xalqı! Siz dövrümüzün ən böyük anti-bəşəri qüvvəsini dayandırdınız. Məna verən hər şeyi məhv etmək istəyən bir qüvvəni dayanmağa məcbur etdiniz. Və biz bütün torpaqlarımızı azad edəcəyik. Biz bütün şəhərlərimizə və kəndlərimizə Ukrayna bayrağını asacağıq. Biz Ukraynanı qorumaq üçün hər şeyi edəcəyik", - deyə o qeyd edib.

ABŞ Çin G7 tərəfdaşlarına qarşı iqtisadi təzyiq göstərəcəyi halda bu ölkələrin Pekinə qarşı birgə hərəkət etməsini istəyir. Sozcu.az xəbər verir ki, bu barədə “Nikkei Asia” məlumat yayıb. Məlumata görə, ABŞ hökuməti Konqreslə birlikdə tariflərin artırılması ilə bağlı qanun layihələrini müzakirə edir.

Rusiya cəmiyyəti mövcud deyil. Sozcu.az xəbər verir ki, bunu rusiyalı müxalifətçi jurnalist, sosioloq və Dövlət Dumasının keçmiş deputatı İqor Yakovenko bildirib. "Ayrı-ayrı Rusiya dövləti yaranmamışdan çox-çox əvvəl Rusiya əhalisini uzun müddət araşdırmış bir sosioloq, bir şəxs kimi rus cəmiyyətinin necə olduğunu bilmirəm. Rus cəmiyyəti mövcud deyil, öz daxilində güclü şəkildə parçalanmış, ayrıca atomlaşdırılmış bir əhali var, o, Rusiya tarixində heç vaxt subyekt kimi çıxış etməyib", - müxalifətçi deyib. Yakovenko vurğulayıb ki, Rusiyada hakimiyyət Moskva krallığının dövründən bəri seçkilər yolu ilə dəyişməyib.

Bu gün internet informasiya resurslarında məlumat yayılıb ki, İran dövləti Azərbaycanın bu ölkədəki səfirini Xarici İşlər Nazirliyinə çağırıb. Beləliklə, İran Azərbaycana nota verib. Əvvəlcə gəlin görək, nota nədir və necə göndərilir? Nota bir dövlətin başqa dövlətə siyasi məsələlər, əməkdaşlıq, razılaşma təklifləri, brifinqlər və bu kimi məsələlərlə bağlı göndərdiyi xarici siyasət məktubudur. Bir qayda olaraq, həftənin iş günləri göndərilir və həmin dövlətin nümayəndəsi, yəni səfir xarici siyasət idarəsinə çağırılır və bu məktub ona təqdim edilir. Nota prinsipial məsələlərlə bağlı göndərilir və ya özündə hər hansı vacib hadisə haqqında informasiyanı ehtiva edir. İranın diplomatik “nota” verməsi isə qeyd edilən halların heç birinə uyğun gəlmir. Bu gün həftənin iş günü deyil. Tehranda Azərbaycan səfiri yoxdur, səfirlik işləmir. İranlılar notanı haraya və necə göndəriblər? Notanın məzmununa baxaq. Azərbaycanın bəzi kütləvi informasiya vasitələri tərəfindən nalayiq və təhqiredici hərəkətlərin davam etməsi. Hər kəsə məlumdur ki, Azərbaycan mətbuatı ölkənin xarici siyasət istiqamətlərindən kənara çıxmır. Əgər hər hansı dövlət digər dövlətin ərazi bütövlüyü və suverenliyinə təhdid yaradırsa, təxribatçı qüvvələri maliyyələşdirirsə, media da bunu tapıb aşkara çıxarırsa, İran tərəfində bu "qabaqdangəlmişlik" haradan qaynaqlanır? Cənub qonşumuz kimdən və nəyin kompensasiyasını tələb edir? Ermənistanın təxribatına bu və ya digər şəkildə yardım etməsini işıqlandırmağımız ancaq onlara zərərli ola bilər. İran unutmasın ki, bu, Azərbaycanın dövlət təhlükəsizliyi məsələsidir. Dəqiq və vicdanlı yerli media da bunu mütləq dərc etməlidir. Bir sözlə, bu gün Azərbaycan mətbuatında Tehran rejimi ilə bağlı yazılanlar milyonlarla azərbaycanlının fikrinə uyğundur. Azərbaycanda Tehrandakı molla rejimindən fərqli olaraq mediada plüralizm hökm sürür. Nalayiq və təhqir dolu media deyərkən, özlərinin "Səhər TV" telekanalını unutmasınlar. Həqiqətə uyğun olmayan, böhran xarakterli məlumatlardan danışırıqsa, biz onlara nota verməliyik, onlar bizə yox./Report

Azərbaycan Ordusunun parlaq tarixi qələbələrindən olan şanlı aprel döyüşlərindən 7 il ötür. 2016-cı il aprelin 2-də Ermənistan silahlı qüvvələrinin təxribatlarına cavab olaraq Azərbaycan Ordusu sürətli əks-hücum əməliyyatı ilə düşməni ağır məğlubiyyətə uğradıb, Füzuli, Cəbrayıl və Ağdərə rayonlarının işğal altındakı ərazilərinin 2000 hektardan çox hissəsini azad edib. Həmçinin minlərlə hektar ərazi Azərbaycan Ordusunun tam nəzarətinə keçib. Azərbaycan Ordusu dördgünlük Aprel döyüşləri ilə 23 ildən sonra xalqımıza qələbə sevinci yaşadıb. Azərbaycan Silahlı Qüvvələrinin həyata keçirdiyi əks-həmlə əməliyyatının məqsədi Ermənistan silahlı qüvvələrinin təmas xəttindəki yaşayış məntəqələrinə törətdiyi təhlükəni aradan qaldırmaq idi. Belə ki, 2016-cı ilin martından başlayaraq, Ermənistan silahlı qüvvələrinin birləşmələri cəbhə boyu zonadakı yaşayış məntəqələrini daha sıx atəşə tutmağa başlamışdı. Vəziyyəti gərginləşdirmək məqsədilə erməni hərbi birləşmələri artilleriya qurğularından həm döyüş mövqelərini, həm də təmas xəttinə yaxın olan yaşayış məntəqələrini atəşə tuturdu. Düşmən aprelin 2-nə keçən gecə bütün mövqeləri, eyni zamanda, mülki əhalini atəşə tutub. Azərbaycan tərəfindən dərhal adekvat tədbirlərin görülməsi ilə bağlı qərar qəbul edilib və qəti cavab zərbələri endirilib. Düşmən müdafiəsinin ön xəttində və dərinliyində yerləşən koordinatlar müəyyənləşdirilib, Ermənistan ordusunun canlı qüvvəsi və hərbi texnikası məhv edilib. Aprel döyüşlərində cəbhənin ən gərgin istiqaməti Ağdərə-Tərtər-Ağdam və Füzuli istiqaməti olub. Azərbaycan Silahlı Qüvvələrinin bölmələri aprelin əvvəlində qısa müddətdə düşmənin öndə və dərinlikdə cəmləşən qüvvələrini müəyyənləşdirib və qəti zərbələrlə sıradan çıxarıb. Uğurlu əməliyyatlar nəticəsində Naftalan şəhərinə təhlükə yaradacaq Talış kəndi istiqamətindəki yüksəkliklər işğalçılardan təmizlənib. Həmçinin Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, geniş ərazini nəzarətdə saxlamaq imkanı verən olduqca strateji əhəmiyyətli Lələtəpə yüksəkliyi azad edilib. Azərbaycan Ordusunun qəti zərbələri nəticəsində düşmənin 30-dək tankı, 25-dən çox artilleriya qurğusu və digər zirehli texnikası məhv edilib, 320 hərbçisi öldürülüb, 500-dən artıq döyüşçüsü yaralanıb. Ağdərə-Suqovuşan istiqamətində yolların nəzarətdə saxlanılması təmin edilib. Aprel döyüşlərində illərlə yaradılan “məğlubedilməz erməni ordusu” mifi dağıdılıb və erməni xalqı işğalçılıq siyasətinin iflasa uğradığını dərk edib. Aprel qələbəsi əsgərlərimizin döyüş ruhunun, ordu ilə xalqın birliyinin təcəssümü olub. Uğurlu aprel əməliyyatından sonra Ermənistanın işğalçılıq siyasəti danılmaz faktlarla yenidən təsdiqlənib. Belə ki, döyüşlərdə ölənlərin əksəriyyətinin Ermənistan hərbi qulluqçuları olması, onların Ermənistan hökuməti tərəfindən mükafatlandırılması, yaralıların böyük bir hissəsinin Ermənistanın tibb müəssisələrində müalicə alması və dövlət tərəfindən “separatçı cəlladların” könüllü adı altında yenidən Qarabağa göndərilərək erməni ordusunun qoyub qaçdığı səngərlərə doldurulması cəhdi və s. faktlar buna əyani sübutdur. Ermənistan ordusunun təmas xəttində törətdikləri təxribatlar zamanı dinc əhali arasında da həlak olan və yaralananlar olub, yaşayış məntəqələrimizə böyük ziyan dəyib. Azərbaycan Respublikasının ərazi bütövlüyünün qorunub saxlanması, erməni işğalçılarının 2016-cı il aprelin 2-dən 5-dək qoşunların təmas xəttində törətdikləri silahlı təxribatların qarşısının alınması və düşmənin dinc əhaliyə hücumlarının dəf edilməsi zamanı göstərdikləri qəhrəmanlıq və igidliyə görə Azərbaycan hərbçilərinin xüsusi fərqlənən bir qrupu 2016-cı il aprelin 19-da Azərbaycan Respublikası Prezidentinin müvafiq sərəncamları ilə yüksək fəxri ada layiq görülüb, orden və medallarla təltif edilib. Vətən qarşısındakı xidmətlərinə görə təltif edilənlər arasında “Azərbaycanın Milli Qəhrəmanı” fəxri adına, “Azərbaycan Bayrağı” və “Vətənə xidmətə görə” ordenlərinə, “Vətən uğrunda”, “İgidliyə görə” və “Hərbi xidmətlərə görə” medallarına layiq görülənlər var. Uğurlu Aprel döyüşlərinin məntiqi davam olaraq, Azərbaycan Ordusu 2020-ci il sentyabrın 27-dən başlayaraq 44 gün ərzində torpaqlarımızı işğaldan azad edib, Ermənistan kapitulyasiya aktına imza artmaq məcburiyyətində qalıb.

Ermənistanın Baş naziri Nikol Paşinyanın həyat yoldaşı Anna Hakobyan şok açıqlama verib. Sozcu.az yerli KİV-ə istinadən bildirir ki, o, İkinci Qarabağ müharibəsində Ermənistan tərəfdən 11 min hərbçinin fərarlik etdiyini bildirib. Hakobyan bu barədə müharibə zamanı ölən erməni hərbi qulluqçu David Şahnazaryanın anadan olmasının 23-cü ildönümünə həsr olunmuş tədbirdə çıxış edərkən danışıb. O qeyd edib ki, 44 günlük müharibədə Ermənistan ordusunda fərarilərin sayı 11 min nəfər təşkil edib: "11 min fərarimiz var idi. 11 min hərbçi, könüllü, zabit...".modern

Ukrayna Prezidenti Volodimir Zelenski Federak Təhlükəsizlik Xidməti (FTX), Federal Mühafizə Xidməti, həmçinin Federasiya Şurası və Rusiya Maliyyə Nazirliyinə qarşı on il müddətinə sanksiya tətbiq edib. Müvafiq fərman Ukrayna Prezident Ofisinin saytında dərc olunub. Sənədə əsasən, sanksiyalar Rusiya Federasiyası Prezidentinin Xüsusi Proqramlar üzrə Baş İdarəsinə, Federal Maliyyə Monitorinqi Xidmətinə, RF Silahlı Qüvvələri Baş Qərargahının Baş İdarəsinin Xüsusi Texnologiyalar üzrə Baş Mərkəzinə və Baş Qərargahın Baş Hesablama Mərkəzinə qoyulub. Bundan başqa, Rusiya Federasiyası Müdafiə Nazirliyinin Dərin Sular Tədqiqatları Baş İdarəsi və Rusiya Müdafiə Nazirliyinin V.P. Çkalov adına Dövlət Uçuş-Sınaq Mərkəzi sanksiya siyahısına əlavə edilib. Hüquqi şəxslərə qarşı sanksiyalar tətbiq edilib və bunlara aktivlərin dondurulması, ticarət əməliyyatlarının dayandırılması, lisenziyaların ləğvi, ticarət müqavilələrinə, birgə layihə və proqramlara xitam verilməsi, texnologiya və əqli mülkiyyət hüquqlarının ötürülməsinə yasaq daxildir. Cəmi 14 məhdudlaşdırıcı tədbir işə salınıb.

Ukrayna BMT Baş Assambleyasının Rusiyanı təcavüz cinayətinə görə cəzalandırmaq üçün qətnamə qəbul edəcəyini gözləyir. Sozcu.az xəbər verir ki, bu barədə Ukrayna Prezident Ofisinin rəhbəri Andrey Yermak deyib. Yermakın sözlərinə görə, Ukrayna Rusiya rəhbərliyi üçün beynəlxalq xüsusi tribunalın yaradılmasını çox vacib hesab edir. O, həmçinin, martın sonunda Ukraynada ruslar tərəfindən 90 min hərbi cinayət qeydə alındığını vurğulayıb.

Ukrayna Prezidenti Vladimir Zelenski ilə fransalı həmkarı Emmanuel Makronla arasında telefon danışığı olub. Sozcu.az xəbər verir ki, bu barədə V.Zelenski Tvitterdə yazıb. O bildirib ki, telefon danışığı 1 saat davam edib. Telefon danışığı zamanı Ukrayna və Fransa arasında müdafiə sahəsində səmərəli qarşılıqlı əlaqələr müzakirə edilib. "Mən cəbhədəki vəziyyətlə bağlı ətraflı məlumat verdim. Biz Sülh Formulunun həyata keçirilməsi üçün gələcək addımlar, qarşıdan gələn beynəlxalq tədbirlərdə koordinasiyalı işləmək barədə də danışdıq”. Ukrayna lideri vurğulayıb.

Ukrayna Krım və Donbasa hücum edəcək. Sozcu.az xəbər verir ki, bu barədə “Tsarqrad” nəşri bildirib. Nəşr Ukrayna Daxili İşlər Nazirliyinin məlumatına istinad edib. Qeyd olunub ki, Kiyevin ruslara vəd etdiyi “şok yumruq” hazırdır. “Yeni Ukrayna bölmələrinin əsas vəzifələri yer və hava hədəflərinin məhv edilməsi, Rusiya piyada və döyüş təyyarələrinin hücuma məruz qalması olacaq”, - materialda vurğulanıb. Həmçinin bildirilib ki,  35 min ukraynalı könüllüdən yalnız on faizi sözügedən bölmələrə qəbul edilib. Xatırladaq ki, ötən günlərdə Kremlin sözçüsü Dmitri Peskov Kiyevin Krımın ələ keçirilməsi üçün hücum briqadaları yaratması ilə  bağlı məsələyə münasibət bildirərək yarımadanın təhlükəsizliyinin etibarlı şəkildə təmin edildiyini söyləmişdi./Sfera.az

Xəbər verdiyimiz kimi, martın 28-də yaşadığı yaşadığı evin qarşısında sui-qəsd cəhdinə məruz qalan Milli Məclisin deputatı Fazil Mustafanın bir neçə gündür ki, reabilitasiya prosesi gedir. News24.az-ın əməkdaşı deputatın səhhəti ilə maraqlanmaq üçün onunla əlaqə saxlamağa cəhd edib. Zəngə millət vəkilinin həyat yoldaşı Zülfiyyə Mustafa cavab verib. O, millət vəkilinin səhhəti barədə bunları deyib: “Şükür Allaha, indi yaxşıdır. Yaraları sağalır. Özünü yaxşı hiss edir. Amma həkimləri danışmağa icazə vermir”.

“Rusiyanın Ukraynada və beynəlxalq aləmdə düşdüyü müşkül durumu, eləcə də Ermənistanın Moskvaya xəyanətlərini nəzərə alaraq daha da qətiyyətli addımlar atmaq gərəkdir...” “Milli Ordumuzun son günlər həm Şuşa-Laçın və Xankəndinə gedən yollar ətrafında, həm də Laçın rayonunun sərhəd kəndləri olan Zabux və Cağazur kəndləri arasındakı ərazilərdə keçirdiyi əməliyyatlar alqışlanmalıdır. Yadınızdadırsa, ötən söhbətlərimizdə dəfələrlə demişdik ki, Şuşa, eləcə də Laçın şəhərlərinin təhlükəsizliklərinin tam təmin olunması üçün ətrafdakı bütün yaşayış məntəqələri, xüsusən də yüksəkliklər nəzarətə götürülməlidir. İndi çox şükürlər ki, bu istiqamətdə ordumuz uğurlu addımlar atmağa başlayıb”.  Bu fikirləri Moderator.az-a açıqlamasında sabiq müdafiə naziri, general-mayor Tacəddin Mehdiyev ifadə edib. “Sarıbaba, onun yaxınlığındakı 2054 yüksəkliyi həm Laçından Şuşaya gedən əsas avtomobil yoluna, həm də Turşsu qəsəbəsi istiqamətindən, yaxud Zarıslıdan Xankəndinə gedən ermənilər üçün “alternativ” silah-sursat daşıma marşrutu olan torpaq yollara nəzarət etmək üçün strateji əhəmiyyətə malikdirlər. Lakin bundan sonra Şuşa ətrafındakı digər yüksəklik və məntəqələri də tədricən nəzarətə götürmək vacibdir. Həmçinin  Gorus istiqamətində ermənilərin Qarabağa gedib-gəldiyi alternativ Laçın yoluna da nəzarət etmək baxımından Zabux və Cağazur yaxınlığındakı keçmiş sərhəd postlarımızın geri alınması da əhəmiyyətli uğurdur. Əbəs yerə deməyiblər ki, yüksəkliklər kimin əlindədirsə, qalibiyyət də onun tərəfindədir”- deyə davamında keçmiş nazir bildirib.  “Amma əldə edilən uğurlarla arxayınlaşmaq olmaz. Bundan sonra Azərbaycan dövlətinin qarşısında duran əsas vəzifələrdən biri, əvvəllər də vurğuladığımız kimi, Laçın yolunun başlanğıcında, yəni Həkəri çayının üstündəki körpü üzərindən keçən sərhəd ərazidə Rusiya “sülhməramlı”larının postunun yaxınlığında sərhəd, gömrük və s. nəzarət-buraxılış məntəqələrimizin qurulmasıdır. Yalnız bundan sonra deyə bilərik ki, biz Qarabağa gedib-gələn yola nəzarət edirik. Çünki ermənilər əgər sərhədimizdən “sülhməramlı”ların “nəzarəti”ndən  silah-sursat, yaxud canlı qüvvəni keçirə biləcəklərsə, onu nə yolla olursa-olsun, Qarabağa çatdırmağa çalışacaqlar. Biz tutduğumuz yüksəkliklərdən də bunun qarşısını tam şəkildə ala bilməyəcəyik. Düzdür, artıq 4 aya yaxındır ki, Laçın-Şuşa-Xankəndi yolunda fasiləsiz aksiya keçirən eko-fəallar da dolayısıyla həmin yoldan keçən yüklərə, sərnişinlərə nəzarət edirlər.  Ordumuz da, daxili qoşunlarımız da və s.həmin yola çox yaxındadırlar. Yəqin ki, ermənilər, yaxud ruslar risk edib oradan silah-sursat keçirməzlər. Amma əvəzində axı onların Xankəndinə gedən digər “alternativ” torpaq yolları, cığırları var.  Yəni bunlar məsələnin tam həlli deyil... Bir sözlə, bütün deyilənləri, eləcə də Rusiyanın Ukraynada və beynəlxalq aləmdə düşdüyü müşkül durumu və Ermənistanın Moskvaya xəyanətlərini nəzərə alaraq daha da qətiyyətli addımlar atmaqla, nə yolla olursa-olsun, Laçın yolundakı sərhəddə nəzarət-keçid postlarımızı qurmalıyıq. Ümidvaram ki, belə də olacaqdır və bütün baş verənlər bizi növbəti qələbələrə, həmçinin Xankəndi və digər ərazilərimizin tam yurisdiksiyamıza qaytarılmasına aparır”- deyə general-mayor vurğulayıb.

Rusiya ilə hərbi-texniki əməkdaşlıqdan vaz keçən Ermənistan müdafiə sahəsində özünə yeni tərəfdaşlar axtarışına çıxıb. Hindistanın simasında müasir silahların sabit tədarükçüsü tapmağa nail olan Ermənistan, görünür, başqa bir potensial tərəfdaş tapıb - bu yaxınlarda Yunanıstanla 2023-cü il üçün hərbi əməkdaşlıq proqramı imzalayıb. Milli.az Yunanıstanın Ermənistandakı səfirliyinin mesajına istinadən xəbər verir ki, bu proqrama on beşi Yunanıstanda, altısı isə Ermənistanda olmaqla iyirmi bir tədbir daxildir. Proqrama aşağıdakı maddələr daxildir: - Xüsusi təyinatlıların xüsusi əməliyyatlar üçün birgə hazırlığı; - Elektron müharibənin üsul və üsulları üzrə birgə təlim; - Sülhməramlı əməliyyatlar üzrə çoxmillətli təlim mərkəzində iştirak; - Hava Hücumundan Müdafiə sistemləri üzrə təcrübə mübadiləsi; - Kadr mübadiləsi və seminarlar; - Hərbi kəşfiyyatın müxtəlif sahələrinə xüsusi diqqət yetirilməklə, qarşılıqlı maraq doğuran məsələlər üzrə qərargah iclasları və danışıqlar. Yunanıstan səfirliyinin press-relizində qeyd edildiyi kimi, bu proqramın imzalanması "ölkələr arasında hərbi əlaqələri daha da gücləndirəcək və Yunanıstanın Ermənistandakı rolunu gücləndirəcək". Yunanıstan Ermənistanın Rusiyadan sonra ikinci ən böyük hərbi tərəfdaşı hesab olunur. Amma Ermənistan 44 günlük müharibədə məğlub olduqdan sonra bu tərəfdaşlıq yeni səviyyəyə qalxdı. Rusiya silahlarının keyfiyyətindən məyus olan və gözləri önündə geosiyasi kursunu dəyişən Ermənistan hakimiyyəti NATO-nun üzvü olan Yunanıstanla hərbi əməkdaşlığı dərinləşdirməyə göz dikib. Maraqlıdır ki, yunan Kipri də bu formata daxildir - 2021-ci ilin avqustunda Ermənistan, Yunanıstan və Yunan Kiprləri arasında üçtərəfli hərbi əməkdaşlıq proqramı imzalanıb. Məlum olduğu kimi, Yunanıstanın ABŞ-la ikitərəfli hərbi əlaqələrini gücləndirməsi həmişə Türkiyəyə qarşı yönəlmiş siyasət kimi qiymətləndirilib. Və son zamanlar Ankara ilə Afina arasında münasibətlər o həddə çatıb ki, tərəflər artıq bir-birini açıq şəkildə müharibə ilə hədələyiblər. Ancaq Türkiyədə baş verən zəlzələdən sonra bu gərginlik azaldı. Ermənistana gəlincə, Afina ilə hərbi əlaqələr qurmaqla paralel olaraq, digər NATO üzvü olan Fransa ilə də hərbi əməkdaşlığı genişləndirməyə çalışır. Lakin Fransadakı erməni lobbisi Yelisey sarayına Ermənistanı silahlandırmaq üçün çağırışlar etsə də, bu çağırışların Beşinci Respublika rəhbərliyi tərəfindən eşidildiyini təsdiqləyən faktlar yoxdur.

Ukrayna tərəfi Rusiya ordusunun itkilərinin yenilənmiş siyahısını təqdim edib. Bu barədə Ukrayna Silahlı Qüvvələrinin Baş Qərargahı məlumat yayıb. Qeyd olunub ki, keçən il fevralın 24-dən etibarən Rusiya tərəfi 173 990 nəfər canlı qüvvə itirib. Bildirilib ki, Rusiyanın digər döyüş itkiləri 3 616 tank, 6 981 zirehli maşın, 2 683 artilleriya sistemi, 527 reaktiv yaylım atəşi sistemi, 279 hava hücumundan müdafiə sistemi, 306 təyyarə, 291 helikopter, 2 248 PUA, 911 qanadlı raket, 18 gəmi/qayıq, 5 528 avtomobil texnikası və avtosistern, 296 xüsusi texnikadan ibarətdir.

“Nəqşicahan Holdinq”in 300-ə yaxın işçisi dörd aydır ki, maaş ala bilmir. Buna səbəb Naxçıvanda aparılan kadr islahatlarından sonra holdinqə daxil olan müəssisələrdə istehsalın tam dayanması, yaxud minimuma endirilməsidir”. Bunu “Gündəlik Naxçıvan“a holdinqdə çalışan işçilər bildiriblər. Şikayətçilər qeyd ediblər ki, rəhbərlik dekabr ayından bəri onlara evdə oturub gözləməyi məsləhət bilib. İşləmədikləri üçün maaş ala bilməyən fəhlələr, onsuz da, ağır olan sosial vəziyyətlərinin daha da çətinləşdiyini deyirlər. Holdinqdəki müəssisələrin birində çalışan Cahangir Vəliyev deyir ki, ailəsini dolandırmaq üçün bankdan kredit götürüb: “Dörd aya yaxındır ki, bizi havada saxlayıblar. Nə işlədib maaş verirlər, nə də işin olmayacağını deyirlər. Bizə “bu gün-sabah açılacaq” deyib ümid verirlər deyə başqa iş də axtara bilmirik. Son olaraq demişdilər ki, martın 15-də işlər başlayacaq. Mart ayı bitib, hələ də bir xəbər yoxdur. Onsuz da, başqa yerdə də iş tapmaq çətindir. Vəziyyətimiz həddindən artıq ağırlaşıb. Borca düşənimiz, banklardan kredit götürənimiz var. Evimizdə bayram da edə bilmədik. Ailəmizin, uşağımızın üzünə baxa bilmirik. Axı biz də insanıq. Bizim də övladlarımız var”. Digər şikayətçi Cavad Qasımov isə deyir ki, problemlə bağlı Naxçıvan MR Ali Məclisinə şikayət etsələr də nəticəsi olmayıb: “Vəzifədən kimin getməsində, kimin gəlməsində, yaxud şirkətin kimə məxsus olmasında biz 300 nəfərin heç bir günahı yoxdur. Faktiki olaraq 300 ailə pis vəziyyətə salınıb. Hamı borc içindədir. Borclular borclarını, banklar isə kreditlərini istəyirlər. İşçilər isə ailələrini dolandıra bilmirlər. Mən də kredit ödəyirəm, bilmirəm, nə edəm. Başqa iş də tapa bilmirəm. Ailəmə çörəkpulu tapa bilmirəm. Bank da bir tərəfdən problem yaradır. Dörd aydır, bizi aldadırlar. Deyirlər, pul ayrılmır. Pul ayrılmırsa, bəs rəhbərlikdə olan işçilər pulu haradan alırlar?”

Xalq artisti Mehriban Zəki müalicə aldığı xəstəxanadan evə buraxılıb. Bu barədə APA-ya aktrisanın sənət dostu Turan Uğur məlumat verib. Onun sözlərinə görə, Mehriban Zəkinin səhhətində problem yoxdur: “Artıq hər şey qaydasındadır. Özünü yaxşı hiss edir”. Xatırladaq ki, Xalq artisti Mehriban Zəki martın 22-si Abşeron rayonu Saray qəsəbəsində baş verən yol-nəqliyyat hadisəsi zamanı xəsarət alıb. Həmin qəza zamanı Əməkdar mədəniyyət işçisi Oqtay Əliyev vəfat edib, həyat yoldaşı, Əməkdar artist Dilarə Əliyeva da yüngül bədən xəsarətləri alıb.

Salyan Rayon Polis Şöbəsinin Dövlət Yol Polisi Bölməsinin əməkdaşları tərəfindən keçirilən tədbirlər zamanı narkotik vasitənin təsiri altında nəqliyyat vasitəsini idarə edən sürücü saxlanılıb. Daxili İşlər Nazirliyinin Mətbuat Xidmətinin Şirvan regional qrupundan verilən məlumata görə, Salyan rayonu ərazisində hərəkətdə olan "Toyota" markalı avtomobilin sürücüsünə qayda pozuntusuna yol verdiyi üçün saxla işarəsi verilib. Həmin nəqliyyat vasitəsini idarə edən Qurban Məlikovun narkotik vasitə qəbul etməsinə dair şübhələr olduğundan tibbi müayinədən keçirilib. Müayinənin nəticəsinə əsasən, Q.Məlikovun narkotik vasitə olan marixuana istifadə etdiyi məlum olub. Həmin şəxs barəsində toplanmış materiallar hüquqi qiymət verilməsi üçün Salyan Rayon Məhkəməsinə göndərilib.

“İnşallah, orada həmin postda şəhid olmuş oğullarımızın xatirə lövhəsi də qoyular. Qoy, ruhları şad olsun!..” Bu günlər Ermənistan hökuməti və meidası Azərbaycan ordusunun Laçın rayonu ilə sərhəddə - Zabux və Cağazur kəndləri arasındakı ərazidə qanuni sərhəd xəttimizin bərpasını bütün dünyaya bir təcavüz aktı kimi təqdim etməyə çalışır. Halbuki, 31 il öncə məhz bəhs edilən ərazilərdə Ermənistanın terrorçu dəstələri Rusiya ordusunun bilavasitə dəstəyi ilə  əsl işğal və qətliamla məşğul idi… …1992-ci il mayın 14-dən 15-ə keçən gecə  Ermənistan ordusu polkovnik Arif Paşanın komandanlıq etdiyi, lakin o vaxtkı Müdafiə Nazirliyinə yerləşmiş “QRU” agentlərinin - Şahin Musayevlərin hazırladığı əmrlə ləğv edilmiş Laçın alayının nəzarətində olan Cağazur kəndi yaxınlığındakı 31 saylı posta gözlənilmədən hücum etdi. Hücum nəticəsində  5 döyüşçümüz şəhid oldu:  Məmmədov Asif Xasay oģlu Ocaqverdiyev Mehman Isfəndiyar oģlu (Balakən) Musayev Mayıl Musa oģlu Hùseynov Əjdər Həsi oglu Zeynalov Xəqani Xankişi oglu (1958, Laçın) Allah hər birinə rəhmət eləsin!.. Cağazur kəndi yaxınlığındakı post uğrunda şəhid olmuş oğullarımızın siyahısını bizə  onlardan birinin - Asif Xasay oğlu Məmmədovun qardaşı Qalib Məmmədov çatdırıb. Qeyd edək ki,  Qərbi Azərbaycanın Göyçə torpağının oğlu “Göyçə” ləqəbli Asif Məmmədovun döyüş yolu və şəhid olması haqda hələ 2021-ci ilin mayında Moderator.az-da geniş material təqdim etmişdik. Digər 4 şəhidimiz haqda isə, təəssüf ki, hələlik geniş məlumat əldə edə bilməmişik. Onları tanıyanlardan bizimlə əlaqə saxlamalarını xahiş edirik. Əldə etdiyimiz məlumata görə, bu günlərdə keçirilən əməliyyat nəticəsində şanlı ordumuz bir güllə də atmadan Cağazur kəndi yaxınlığındakı keçmiş “31-ci post” ərazisini də tam  nəzarətə götürüb.  İnşallah, orada I Qarabağ savaşında həmin postda şəhid olmuş oğullarımızın xatirə lövhəsi də qoyular. Qoy, ruhları şad olsun!.. Allah cəmi şəhidlərimizə rəhmət eləsin!.. Sultan Laçın

Prezident İlham Əliyev Azərbaycan Respublikasının Vergi Məcəlləsində dəyişiklik edilməsi haqqında” Azərbaycan Respublikasının 2023-cü il 7 mart tarixli 838-VIQD nömrəli Qanununun tətbiqi və “Azərbaycan Respublikası Vergi Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə məsələləri haqqında” Azərbaycan Respublikası Qanununun və bu Qanunla təsdiq edilmiş Azərbaycan Respublikası Vergi Məcəlləsinin tətbiq edilməsi barədə” Azərbaycan Respublikası Prezidentinin 2000-ci il 30 avqust tarixli 393 nömrəli Fərmanında dəyişiklik edilməsi haqqında fərman imzalayıb. Sozcu.az fərmanın mətnini təqdim edir: 1. Müəyyən edilsin ki: 1.1. Azərbaycan Respublikası Vergi Məcəlləsinin 102.1.39-cu, 106.1.32-ci və 218-1.1.7-ci maddələrində nəzərdə tutulmuş müvafiq icra hakimiyyəti orqanının səlahiyyətlərini Azərbaycan Respublikasının Prezidenti həyata keçirir; 1.2. həmin Məcəllənin 102.1.39-cu, 106.1.32-ci və 218-1.1.7-ci maddələrində “orqan (qurum)” dedikdə Azərbaycan Respublikasının Medianın İnkişafı Agentliyi nəzərdə tutulur. 2. Azərbaycan Respublikasının Nazirlər Kabineti “Azərbaycan Respublikasının Vergi Məcəlləsində dəyişiklik edilməsi haqqında” Azərbaycan Respublikasının 2023-cü il 7 mart tarixli 838-VIQD nömrəli Qanunundan irəli gələn məsələləri həll etsin. 3. “Azərbaycan Respublikası Vergi Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə məsələləri haqqında” Azərbaycan Respublikası Qanununun və bu Qanunla təsdiq edilmiş Azərbaycan Respublikası Vergi Məcəlləsinin tətbiq edilməsi barədə” Azərbaycan Respublikası Prezidentinin 2000-ci il 30 avqust tarixli 393 nömrəli Fərmanında (Azərbaycan Respublikasının Qanunvericilik Toplusu, 2000, № 8 (III kitab), maddə 616; 2005, № 12, maddə 1099; 2006, № 5, maddə 400, № 12, maddə 1034; 2007, № 4, maddə 323, № 12, maddə 1225; 2008, № 11, maddə 972; 2009, № 3, maddə 163, № 4, maddə 226, № 10, maddə 780; 2010, № 7, maddə 610; 2011, № 7, maddə 631; 2013, № 7, maddə 805, № 11, maddə 1324; 2014, № 4, maddə 359, № 5, maddə 477, № 9, maddə 1027, № 10, maddə 1198, № 11, maddələr 1390, 1420; 2015, № 1, maddə 12, № 12, maddə 1454; 2016, № 2 (II kitab), maddələr 261, 265, № 3, maddə 450, № 5, maddə 882, № 6, maddələr 1023, 1024, 1042, 1065, № 7, maddə 1257, № 9, maddə 1464, № 11, maddə 1838, № 12, maddə 2089; 2017, № 5, maddələr 760, 811, 845, № 7, maddə 1344, № 8, maddə 1521; 2018, № 9, maddələr 1830, 1843, № 12 (I kitab), maddələr 2571, 2599; 2019, № 8, maddələr 1396, 1407; 2020, № 5, maddə 560, № 11, maddə 1356, № 12 (I kitab), maddə 1504; 2021, № 1, maddə 35, № 3, maddə 220, № 4, maddə 323, № 6 (I kitab), maddə 585, № 12, maddələr 1398, 1425; 2022, № 1, maddə 22, № 12, maddə 1456; Azərbaycan Respublikası Prezidentinin 2023-cü il 7 fevral tarixli 2027 nömrəli Fərmanı) aşağıdakı dəyişikliklər edilsin: 3.1. 1.1-ci bəndə “102.1.37-ci,” sözlərindən sonra “102.1.39-cu,” sözləri, “106.1.31-ci,” sözlərindən sonra “106.1.32-ci,” sözləri və “218-1.1.3-cü” sözlərindən sonra “, 218-1.1.7-ci” sözləri əlavə edilsin; 3.2. 1.12-1-ci bəndə “İcbari” sözündən sonra “Tibbi” sözü əlavə edilsin; 3.3. 1.50-ci bəndin sonunda nöqtə işarəsi nöqtəli vergül işarəsi ilə əvəz olunsun və aşağıdakı məzmunda 1.51-ci bənd əlavə edilsin: “1.51. həmin Məcəllənin 102.1.39-cu, 106.1.32-ci və 218-1.1.7-ci maddələrində “orqan (qurum)” dedikdə Azərbaycan Respublikasının Medianın İnkişafı Agentliyi nəzərdə tutulur.”. 4. Bu Fərman 2023-cü il yanvarın 1-dən tətbiq edilir.

Naxçıvan Şəhər Polis İdarəsinin əməkdaşlarının keçirdikləri növbəti əməliyyat tədbirləri nəticəsində Bakı-Naxçıvan sərnişin avtobusunun sürücüsü, İran vətəndaşı Arjmand Ramez Azim oğlunu narkotik vasitələrin təsiri altında avtobusu idarə etdiyi müəyyən edilib. Sozcu.az xəbər verir ki, saxlanılan İran vətəndaşı Azərbaycan Respublikası İnzibati Xətalar Məcəlləsinin 206-cı maddəsi ilə məsuliyyətə cəlb edilərək inzibati həbs edilib.

Ukrayna Polşadan zirehli döyüş maşınları alır. Sozcu.az xəbər verir ki, bunu Polşanın Baş naziri Mateuş Moravetski Tvitterdə yazıb. "Ukrayna ordusu Polşadan 100 ədəd "Rosomaks" zirehli transportyoru alacaq. Sözügedən texnikalar yüksək keyfiyyətli zirehli maşınlardır”, - baş nazir bildirib.

Bu gün Azərbaycanın Milli Qəhrəmanı Şükür Həmidovun doğum günüdür. Şükür Nəriman oğlu Həmidov 1 aprel 1975-ci ildə Qubadlı rayonunda doğulub. Atası Nəriman Həmidov ibtidai sinif müəllimi, anası Şərqiyyə Həmidova isə evdar qadındır. Şükür Həmidov 1982-ci ildə Qubadlı rayonunun Başarat kənd tam orta məktəbinin birinci sinfinə qəbul olub və 1990-cı ilə qədər orada təhsil alıb. 1990-cı illərin əvvəlində Birinci Qarabağ müharibəsi başlanan zaman sənədlərini Cəmşid Naxçıvanski adına Hərbi Liseyə verib. 1993-cü ildə oradan məzun olan Şükür Həmidov həmin il sənədlərini Bakı Ali Birləşmiş Komandalıq Məktəbinə verib və 1995-ci ildə oranı “Motoatıcı” ixtisası üzrə bitirib. 1995-ci ildə ali hərbi təhsilini başa vuran Şükür Həmidov Müdafiə Nazirliyinin əmrinə əsasən, Azərbaycan Silahlı Qüvvələrinin Naxçıvan MR ərazisində yerləşən hərbi hissələrinə göndərilib və 11 il orada xidmət edib. Şükür Həmidova Müdafiə Nazirliyinin 20 iyun 1997-ci il tarixli əmrinə əsasən, “leytenant”, 1999-cu ildə “baş leytenant”, 2002-ci ildə isə “kapitan” hərbi rütbəsi verilib. 2002-ci il sentyabrın 1-də Şükür Həmidov Şahbuz şəhərində “N” saylı hərbi hissədə Motoatıcı Tabor Komandirinin müavini vəzifəsinə təyin edilib. 2003-cü il sentyabrın 25-nə qədər bu vəzifədə xidmət edən Şükür Həmidov 2003-cü il sentyabrın 25-dən 2005-ci il iyulun 15-nə qədər Naxçıvan şəhərində “N” saylı hərbi hissədə Motoatıcı Taborun Qərargah rəisi vəzifəsində xidmət edib. 2005-ci il iyunun 30-da “mayor” hərbi rütbəsi almasından 15 gün sonra isə o, həmin hərbi hissədə Motoatıcı Taborun Komandiri vəzifəsinə təyin edilib. Azərbaycan Silahlı Qüvvələrinin Naxçıvan MR ərazisində yerləşən hərbi hissələrində 11 il qüsursuz xidmət edən Şükür Həmidov 2008-ci il iyunun 25-də Ağcabədi rayonunda “N” saylı hərbi hissədə 1-ci Taborun Komandiri vəzifəsində xidmət eləməyə başlayıb. 2009-cu il sentyabrın 10-na qədər bu vəzifədə xidmət edən Şükür Həmidov növbəti dörd il ərzində müxtəlif hərbi hissələrdə qərargah rəisi vəzifəsində xidmət edib. 2009-cu il sentyabrın 10-dan 2011-ci il iyunun 18-nə qədər Füzuli rayonunun Horadiz şəhərində “N” saylı hərbi hissədə komandirin müavini - qərargah rəisi vəzifəsində xidmət edən Şükür Həmidov qüsursuz xidmətinə görə 30 iyun 2010-cu ildə “polkovnik-leytenant” hərbi rütbəsi alıb. Daha sonra o, 2011-ci il iyunun 18-dən 2012-ci il fevralın 12-nə qədər Beyləqan rayonunda “N” saylı hərbi hissədə komandirin müavini - qərargah rəisi, 2012-ci il fevralın 12-dən 2013-cü il yanvarın 18-nə qədər isə Ağcabədi rayonunda “N” saylı hərbi hissədə komandirin müavini - qərargah rəisi vəzifəsində xidmət edib. 2016-cı il aprelin 1-dən 2-nə keçən gecədən başlayaraq Azərbaycan və Ermənistan silahlı qüvvələrinin bölmələri arasında cəbhənin Tərtər və Cəbrayıl-Füzuli istiqamətlərində şiddətli döyüşlər başlayıb. Tarixə Aprel döyüşləri kimi yazılan hərbi əməliyyatlar zamanı Şükür Həmidov Horadiz şəhərində “N” saylı hərbi hissənin komandiri idi. Cəbhənin Cəbrayıl rayonu istiqamətində gedən döyüşlərin idarə edilməsi məhz ona həvalə olunub. Gecə döyüşləri zamanı Cəbrayıl rayonunun Lələtəpə istiqamətində olan əlverişli mövqeləri, strateji nöqtələri, o cümlədən Lələtəpə zirvəsini Azərbaycan Ordusu işğaldan azad edib. Şükür Həmidov 2016-cı ilin 2-5 aprelində baş verən Aprel döyüşlərində Cəbrayıl rayonu istiqamətində yerləşən Lələtəpə strateji nöqtəsinin alınması zamanı xüsusilə fərqlənib, buna görə də Azərbaycan Prezidenti İlham Əliyevin 20 aprel 2016-cı il tarixli Sərəncamına əsasən, Azərbaycanın Milli Qəhrəmanı adına layiq görülüb. O, son 17 il ərzində sağlığında bu ada layiq görülən birinci şəxs olub. 2016-cı il mayın 10-da isə müdafiə naziri Zakir Həsənovun əmrinə əsasən, Şükür Həmidova vaxtından əvvəl növbəti “polkovnik” hərbi rütbəsi verilib. Hərbi rütbə ona mayın 10-da Lələtəpə istiqamətində səngərdə təqdim edilib. 2020-ci il sentyabrın 27-də Ermənistan silahlı qüvvələrinin bölmələri tərəfindən genişmiqyaslı təxribat törədilib və cəbhəboyu zonada yerləşən Azərbaycan Ordusunun mövqeləri və yaşayış məntəqələri iriçaplı silahlar, minaatanlar və müxtəlif çaplı artilleriya qurğularından intensiv atəşə tutulub. Ermənistan silahlı qüvvələrinin döyüş fəaliyyətinin qarşısını almaq məqsədilə Azərbaycan Silahlı Qüvvələrinin Komandanlığı tərəfindən cəbhəboyu zonada hücum əməliyyatlarının başlaması barədə qərar verilib. 2-ci Ordu Korpusunun komandir müavini olan Şükür Həmidov cənub istiqamətində aparılan döyüşləri idarə edənlərdən biri olub. Əvvəlcə o, Füzuli rayonu istiqamətində döyüşlərə qatılıb.  20 gün ərzində davam edən Arazboyu əməliyyatlar zamanı Cəbrayıl şəhəri və Cəbrayıl rayonunun Araz boyunca yerləşən yaşayış məntəqələrinin işğaldan azad edilməsi nəticəsində Azərbaycan Ordusunun bölmələri Zəngilan rayonuna hücum əməliyyatı hazırlayıblar. Oktyabrın 20-də 2-ci Ordu Korpusu və Dövlət Sərhəd Xidmətinin qatıldığı Zəngilan döyüşləri nəticəsində qısa müddət ərzində Havalı, Məmmədbəyli, Muğanlı, Şərifan, Zərnəli, həmçinin Zəngilan şəhəri işğaldan azad edilib. Zəngilanın azad edilməsindən sonra Azərbaycan Ordusunun bölmələri Qubadlı rayonu ərazisinə istiqamətləniblər. Oktyabrın 20-də Qubadlı rayonu istiqamətində 2-ci Ordu Korpusunun komandir müavini Şükür Həmidovun da şəxsən qatıldığı döyüşlər başlayıb. Bir gün sonra Azərbaycan Ordusunun bölmələri Qubadlı rayonunun 12-dən çox yaşayış məntəqəsinə daxil olmağa nail olublar. Şükür Həmidov son olaraq Qubadlı şəhərinin bir addımlığında yerləşən Mahmudlu istiqamətində döyüşüb. Oktyabrın 22-də səhər saatlarında 2-ci Ordu Korpusunun komandir müavini Şükür Həmidov Qubadlı rayonunun azadlığı uğrunda gedən döyüşlər zamanı Mahmudlu istiqamətində ön xətdə şəhid olub. O, II Fəxri Xiyabanda torpağa tapşırılıb. Dəfn mərasimi zamanı Azərbaycan Prezidenti İlham Əliyev telefon vasitəsilə Şükür Həmidovun atası Nəriman Həmidova dərin hüznlə başsağlığı verib. Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zaman igidliyin və mərdliyin nümayiş etdirilməsinə görə Azərbaycan Prezidenti İlham Əliyevin Sərəncamına əsasən, Şükür Həmidov ölümündən sonra “Zəfər” ordeni ilə təltif edilib. Azərbaycanın Füzuli rayonunun, Cəbrayıl rayonunun və Qubadlı rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Şükür Həmidov ölümündən sonra Azərbaycan Prezidentinin Sərəncamına əsasən, “Füzulinin azad olunmasına görə”, “Cəbrayılın azad olunmasına görə”, “Qubadlının azad olunmasına görə” medalları ilə təltif edilib.