Rusiya hakimiyyəti Ukrayna ilə müharibədə getdikcə daha çox köhnə texnikadan istifadə etməyə başlayır. Moskva döyüş bölgəsində İkinci Dünya Müharibəsindən sonra istehsal edilən tankları yerləşdirir. Məlumata görə, Rusiya tank ehtiyatlarını köhnə nəsil texnika ilə doldurmağa çalışır. Ölkə müharibədə getdikcə daha öncəki tank modellərinə arxalanır. “Onlar T-80 və T-90-larla müharibəyə başladılar, sonra T-72-lərə keçdilər. İndi isə biz ilk T-55-lərin döyüşə girmək üçün təmirdən çıxdığını və artilleriya ilə də eyni vəziyyətin olduğunu görürük”, - deyə məlumatda bildirilir. Xatırladaq ki, T-90 tankı ilk dəfə 1992-ci ildə, T-80 tankı 1976-cı ildə, T-72 1972-ci ildə, T-55 isə 1948-ci ildə İkinci Dünya Müharibəsindən sonra istifadəyə verilib. Mənbə: CNN

Ukraynanın işğal altındakı Xerson və Luqansk vilayətlərinə səfər edən şəxs Rusiya Prezidenti Vladimir Putin yox, onun oxşarlarından biri olub. Sozcu.az xəbər verir ki, bu qənaətə Ukrayna Milli Təhlükəsizlik və Müdafiə Şurasının (MTMŞ) katibi Aleksey Danilov deyib. “Birincisi, Putin orada olmayıb. Bu, açıq-aydın məlum şeydir. Gerçək Putinlə ünsiyyətə girmək üçün azı 10-14 gün karantində keçirməlisiniz. Putin orada olmayıb. Adi oxşarı olub. Onların sayı bir deyil”, - o qeyd edib.

Ukrayna əsgərləri Rusiya qoşunlarına güclü zərbələr endirib, mühüm hədəfləri vurublar. Sozcu.az xəbər verir ki, bu barədə Ukrayna Silahlı Qüvvələrinin Baş Qərargahının məlumatında bildirilib. Qərargahın məlumatına görə, raket qoşunları və artilleriyaçılar rusların iki sursat anbarını və hərbi texnika və canlı qüvvəsinin cəmləşdiyi ərazini vurub.

Azərbaycan Respublikasının Prezidenti İlham Əliyev aprelin 19-da ABŞ Dövlət katibinin Avropa və Avrasiya məsələləri üzrə köməkçisinin müavini Erika Olsonu qəbul edib. Sozcu.az xəbər verir ki, görüşdə Ermənistanla Azərbaycan arasında münasibətlərin normallaşdırılması və sülh müqaviləsi üzrə danışıqlarla bağlı fikir mübadiləsi aparıldı. Dövlətimizin başçısı qeyd etdi ki, 44 günlük Vətən müharibəsinin başa çatmasından sonra Ermənistanla sülh müqaviləsinin imzalanması məhz Azərbaycanın təşəbbüsüdür və bu xüsusda sülh müqaviləsinin əsasını təşkil edəcək 5 prinsip ölkəmiz tərəfindən təklif olunub. Erika Olson vurğuladı ki, ABŞ regional sülh gündəliyini və Ermənistanla Azərbaycan arasında sülh müqaviləsinin tezliklə imzalanmasını dəstəkləyir. Bu əsnada ABŞ Dövlət katibi Antoni Blinkenin rolu xüsusi qeyd olundu. Söhbət zamanı regional məsələlər, Azərbaycan ilə ABŞ arasında ikitərəfli siyasi əlaqələr, o cümlədən enerji, bərpaolunan enerji və digər sahələrdə əməkdaşlıq məsələlərinə dair fikir mübadiləsi aparıldı.

Arif Hacılı: "Quru sərhədlərin bağlı saxlanmasının nə pandemiya, nə də təhlükəsizliklə heç bir əlaqəsi yoxdur".  "Quru sərhədləri aviaşirkətlərin, xarici ticarətlə məşğul olan vəzifəli oliqarxların  monipolist maraqları, onların daha da varlanması naminə bağlı saxlanılır.  Çünki quru sərhədləri hakim zümrə üçün həmişə açıqdır. Hər gün bu sərhədlərdən yüzlərlə, bəlkə də minlərlə maşın keçir.  Azərbaycanda olan bütün qapılar kimi, quru sərhədlərin qapıları da yalnız zillət işində yaşamağa məhkum edilən xalqın üzünə bağlıdır".

"Əks-hücum Ukraynanın bütün ərazilərinin azad edilməsi və düşmənin dayandırılması kimi strateji məqsədi özündə ehtiva edir..." "Ukrayna komandanlığının bir neçə hücum planları var və onlar düşmənin vəziyyəti və müdafiə qüvvələrimizin imkanlarından asılıdır..." Ukrayna komandanlığının bir neçə hücum planları var, onlar düşmənin vəziyyəti və Ukrayna müdafiəçilərinin imkanları barəsində informasiyadan asılıdır. Sozcu.az xəbər verir ki, bu barədə Ukrayna müdafiə nazirinin müavini Anna Malyar telemarafonun efirində məlumat verib. Məlumatı "unian.net" nəşri yayıb. Əkshücum əməliyyatları artıq aparılır, Ukrayna Silahlı Qüvvələri Ukrayna ərazilərinin tam azad edilməsinə hazırlaşır. Onun sözlərinə görə, əkshücum Ukraynanın bütün ərazilərinin azad edilməsi və düşmənin dayandırılması kimi strateji məqsədi özündə ehtiva edir. Ona görə də "əkshücum haqqında dar çərçivədə danışmaq korrekt deyil". "Əkshücuma texnika, insanlar və ehtiyat hazırlığı daxildir. Bu A, B, C müəyyən taktiki planlaşdırma deməkdir və bir fəaliyyət variantı ola bilməz", - o, deyib. Nazir müavini məlumat verib ki, Ukrayna komandanlığının bir neçə hücum planları var və onlar düşmənin vəziyyəti və Müdafiə Qüvvələrinin qabiliyyəti və imkanları haqqında informasiyadan asılıdır. "Anlamaq gərəkdir ki, Silahlı Qüvvələr dar istiqamətdə nəsə bir şey hazırlamır. USQ daima, hər gün ərazilərimizin tam azad edilməsinə hazırlaşır və bu, təkcə əkshücum deyil, böyük tədbirlər kompleksidir", - Malyar əlavə edib. O, qeyd edib ki, bu gün döyüş meydanında baş verənləri də əkshücum adlandırmaq olar. "Vurğulanır ki, nəsə baş verəcək, əslində isə bütün bunlar baş verməkdədir. Əkshücum əməliyyatları indi də baş verir", - o, izah edib. USQ-nin əkshücumu-son xəbərlər KİV-lərdə USQ-nin əkshücumu barədə şayiələr artıb. Rəsmən yalnız ümumi bəyanatlar səsləndirilir və anonslar verilir. Milli Təhlükəsizlik və Müfadiə Şurası qeyd edir ki, USQ-nin əkshücumu barədə qərar son məqamda qəbul ediləcək. Eyni zamanda, baş nazir Denis Şmıqal deyib ki, USQ işğal altında olan ərazilərin azad edilməsi üçün əkshücuma yayda başlaya bilər. "The Washington Post" nəşri Pentaqonun "sızan" sənədlərinə istinadən məlumat verib ki, qoşunların, döyüş sursatlarının və texnikanın toplanması ona gətirib çıxara bilər ki, hərbçilər gözlənilən əkshücumun ilkin məqsədlərindən "xeyli geri qala bilər". ABŞ müdafiə naziri Lloyd Ostin hesab edir ki, hazırda Ukraynanın əkshücum zamanı uğur qazanması üçün kifayət qədər imkanları var.

Sumqayıt Məhkəmə Kompleksində “Tərtər işi”ndəki işgəncələrə görə bir qrup hərbi qulluqçunun məhkəməsi davam edir. Bu iş Bakı Hərbi Məhkəməsinin icraatında olsa da, Sumqayıt Məhkəmə Kompleksində keçirilir. Səbəb Bakı Hərbi Məhkəməsində məhkəmə zallarının geniş olmamasıdır. Sozcu.az xəbər verir ki, hazırda prosesdə zərərçəkənlər ifadə verir. Prosesə Bakı Hərbi Məhkəməsinin sədr əvəzi Zeynal Ağayev sədrlik edir. Məhkəmə iclası başlayan kimi zərərçəkmiş Bəhruz Novruzovun anası Aygün Novruzova məhkəmədə oğlunu təmsil etmək üçün etibarnamə təqdim edib. Ana 5 il əvvəl oğluna verilən işgəncələrdən psixi durumunun yerində olmadığını deyib: “İşgəncələr vaxtı oğlumu şikəst ediblər. 5 il keçib, 5 il ərzində oğlum 20 dəfə Gəncədəki və Bakıdakı ruhi xəstəxanalarda müalicə alıb. Hələ də müalicələri davam edir. Ona görə də oğlumu hər yerdə mən təmsil edirəm”. Məhkəmə etibarnaməni qəbul edib və hakim izahat verməsi üçün Aygün Novruzovanı tribunaya dəvət edib. A.Novruzova sözə oğlunun peşəkar tankçı olmasından başlayıb: “10 il tankçı kimi hərbidə xidmət edib. Ölkədəki tank yarışlarının qalibi olub. Aprel döyüşlərində iştirak edib. Ana əlindəki fotoları uzaqdan hakimə göstərməklə hakimə - belə bir oğulu görün nə günə qoyublar, kalyaskadadır deyib. Hakim: - Danışın. Oğlunuzun başına nə gəlib? Aygün Novruzova: - 2017-ci ilin may ayının 3-də tutub əl-qolunu, gözünü bağlayıb aparıblar Hikmət Həsənovun yanına. Hikmət Həsənov da deyib ki, boynuna al, sən erməniyə getmisən. Oğlum da deyib, cənab general, mən satqınlıq etməmişəm. Hikmət Həsənov da orda olan maskalılara deyib, aparın bunu, ağlı başına gəlsin. Oğluma o qədər işgəncə veriblər... Bədəninə o qədər tok veriblər ki, gözləri pırtdayıb, həqəsindən çıxıb, biz 5 ildir müalicə etdiririk, pul tökürük, gözlərini yerinə oturda bilmirik”. Aygün Novruzovanın tələbi oğlunun müalicəsi ilə bağlı olub: - Evimizi də satıb, ölkədaxili müalicələrə xərcləmişik. 5 ildir ki, yollarda qalmışam. Şikəst elədikləri oğluma tək baxıram. Oğlum işgəncələr nəticəsində 95 kilodan 45 kiloya düşmüşdü. Onun demək olar ki, ölüsünü bu vəziyyətdə Tərtər məhkəməsinə xərəkdə aparıblar, 4 ay həbs sanksiyası veriblər. Sənədinə yazıblar ki, guya hündürlükdən yıxılıb, xəsarətlər də ondandır. 10 ay türmədə qaldı. Hakim özü də görürdü ki, məsələ hündürlükdən yıxılmaq deyil, ancaq göz yumurdu. Aldığı işgəncələrdən psixikası pozulub. 5 ildə 20 dəfə müalicə alıb, Bakıda, Gəncədə ruhi xəstəxanalarda yatıb, hələ də müalicə alır. Tələb edirəm ki, onu bu günə qoyanlar sağaldıb, özümə qaytarsınlar. Türkiyədə müalicəsi var, ancaq aparmağa pulumuz yoxdur. Xərcini çəksinlər, aparsınlar, müalicə etdirsinlər. Zərərçəkmişin nümayəndəsi deyib ki, oğluna dəymiş maddi və mənəvi zərərə görə Nəsimi rayon Məhkəməsində iddia qaldırıblar. Məhkəmə 20 min manat təzminat kəsib: - Nəsimi məhkəməsi 20 min manat kompensasisya kəsdi. Maliyyə Nazirliyi apellyasiya şikayəti verdi, Bakı Apellyasiya Məhkəməsinin hakimi oğlumu kalyaskada gördü, ağlamaq tutdu. Nəsimi rayon Məhkəməsinin qərarını qüvvədə saxladı. Ancaq Maliyyə Nazirliyi götürüb Ali Məhkəməyə kassasiya şikayəti verdi. Hakim: - Siz məhkəmə çıxışları başlananadək məhkəməyə mülki iddia təqdim edə bilərsiz. Sonra hakim Bəhruz Novruzovun ibtidai istintaqa verdiyi ifadəsini elan edib. Bəhruz Novruzov öz ifadəsində yazıb ki, siqareti bədənində söndürüblər, kauçuku əridib ayaqlarına töküblər, bədənini toka veriblər, başına dəsmal bağlayb, suda boğublar, dizlərinə hər iki tərəfdən dəmir parçası soxublar. İşgəncələr Hikmət Həsənovun yanında verilib. Sonra zərərçəkən Rəfael Emçiyev ifadə verib. Deyib ki, onun və hərbçi yoldaşlarının əl-qolunu, gözlərini bağlayaraq hərbi hissə komandiri Vüsal Ələsgərovun yanına aparıblar. Qarşısında bizi diz çökdürdülər. Vüsal Ələsgərov ondan “neytralda nə gəzirdin” deyə, soruşub. O isə neytral zonada olmadığını deyib. Bundan sonra işgəncələr başlayıb: - Məni “çaynı” deyilən otağa aprdılar. Rəşid Niftəliyev (təqsirləndirilənlərdən biri) yanıma gəldi, dedi, nə olubsa, aç de ki, sənə kömək edə bilək. Mənsə bildirdim ki, axı heç nə olmayıb, nəyi açım deyim? Ondan sonra dəhşətli işgəncələr başladı. Orda hamıya işgəncəni “Dəniz pişikləri” verirdi. Üzlərində maska vardı. Zərərçəkən üzünü şüşə qəfəsdə əyləşən Vüsal Ələsgərova tutub: - Burda deyirsən ki, əmr yerinə yetirmisən. Mən də sənə deyirəm ki, sənə əmr vermişdilər ki, araşdırasan, daha deməmişdilər ki, adamlara işgəncə verəsən. Hikmət Həsənov da işgəncə yerindəydi, hərbi prokuror Xanlar Vəliyev gəldi, şəxsən mənə dedi ki, boynuna al ki, sən vətən xainisən. Sənədlərə qol çək. İşini yüngülləşdirərik, sənə rüşvət ittihamı ilə 2 il iş verərik, 2 ildən sonra azadlığa çıxarsan. Dedim, axı vətən xaini olar uzağı 100- 200 nəfər. 1000-2000 nəfər vətən xaini olar? Vəkillər zərərçəkənə suallar verəndə məlum olub ki, o və hərbçi yoldaşları əl-qolu bağlı aparılmamışdan bir müddət əvvəl başqa tabora gedib-qayıdıblarmış: - Vüsal Ələsgərov bizi hardasa 1 ay əvvəl başqa tabora göndərmişdi. Turan İbrahimlinin olduğu tabora... Təxminən 10 gün orda qaldıq, sonra bizi geri – öz taborumuza qaytardılar. Sonra da xəbər çıxdı ki, getdiyimiz həmin taborda hadisə baş verib, bütün taboru yığıb aparıblar, işgəncə verirlər. Həmin tabora gedib-qayıtmışdıq deyə, bildik ki, bizi də gəlib aparacaqlar. Elə də oldu. Zərərçəkən ifadəsində onu da deyib ki, Mingəçevirdəki N saylı hərbi hissədə işgəncələr veriləndən sonra ona və işgəncə görmüş başqa hərbçilərə bir kağıza qol çəkdiriblər ki, 5 il ölkədən çıxmaq, müayinə üçün harasa müraciət etmək olmaz. O, hakimin “tələbiniz nədir” sualına “daha yüksək rütbəli şəxslərin cəzalandırılmasını tələb edirəm”, - deyə cavab verib. Sonra zərərçəkən Faiq Əhmədov ifadə verib. O, N saylı hərbi hissənin tağım komandiri olub. Deyib ki, Goranda təlimdə olarkən ona məzuniyyətə çıxdığı bildirilib. O da silahını təhvil verib: - Silahı təhvil verib “UAZ”a mindim. Gördüm ki, arxada maskalılar oturub. Gördüm ki, yol da dəyişdi, başqa yerə sürürlər. Bir az getmişdik ki, maşını saxlayıb, məni yerə atdılar, təpiklədilər, əl-qolumu bağladılar. Qərargahın qabağına apardılar. Dedilər, Hikmət Həsənov gələcək, ona cavab verəcəksən. Sonra Hikmət Həsənov da gəldi, dedi, vətənə xəyanət eləmisən. Mən vəkil tələb etdim. Dedi, aparın bunu, başa salın, ağlı başına gəlsin. Məni içəri aparanda insanların ah-naləsini eşidirdim. Orda Mehman Hüseynovu gördüm. (İşgəncələrdən dünyasını dəyişmiş manqa başçısı Mehman Hüseynov nəzərdə tutulur – E.M). Deyəsən ona butulka edirdilər, çünki “ay ana, öldüm” deyib, bağırırdı. Faiq Əhmədov deyib ki, ona işgəncə verib, hərbçi yoldaşı Sultan Zeydullayevin üzünə durğuzublar. Sultan Zeydullayevə də işgəncə verib, onun üzünə durğuzublar: - Deyirdilər ki, ikiniz birlikdə erməniyə getmisiz. Zərərçəkən ifadə verərkən məhkəmə salonundakı başqa zərərçəkən Bariz Cəfərov yerindən qışqırdı: - Bu adam and içdi ki, düz danışacaq, amma səhv danışdı. Mən də daxil, çox adamın üzünə durub. Kazımov Süleyman bu adamın üzündən işgəncələrdən öldü. Faiq Əhmədov: - Süleymanı orda görmüşəm, çox işgəncə verilmişdi, ancaq mən onun üzünə durmamışam. Bariz Cəfərov: - Bu adam bizim üzümüzə durub, ona görə Süleyman ölüb. İndi gəlib bizimlə burda, bizim yanımızada oturub. Necə olur ki, mən də zərərçəkən sayılıram, o da. Faiq Əhmədov: - Orada hamı bir-birinin üzünə dururdu. Elə işgəncələr verirdilər ki, dözmək olmurdu. Mən xoşluqla heç kimin üzünə durmamışam. Heç kim xoşluqla bir-birinin üzünə durmayıb. Amma DTX-də yazdıranda demişəm ki, o ifadələr nə yolla alınıb. Mənim də üzümə duran çox olub. Faiq Əhmədov ifadəsinin sonunda deyib ki, işgəncə verənlərə Hikmət Həsənov əmr verib, işçgəncələrdə müstəntiqlər də olub. Onların da məsuliyyətə cəlb olunmasını tələb edib. O, bununla bağlı məhkəməyə vəsatət də verib. Hakimsə deyib ki, indiki mərhələdə vəsatətə baxıla bilməz: - Vəsatəti rədd etmirik, ancaq baxılmasını təxirə salırıq. Sizin vəsatətdə göstərdiklərinizə münasibət bildirmək üçün gərək əvvəlcə bütün ifadələr alınsın. Sonra Bariz Cəfərov zərərçəkən kimi ifadə vermək üçün tribunaya dəvət olundu. O, tribunaya yaxınlaşsa da, ifadə vemək istəmədi: - Mən 6 ildir ki, əziyyət çəkirəm. Verilmiş işgəncələrin izi hələ də bədənimdədir. Bura gəlməmişdən sizi də (hakimi) araşdırdım. Siz də Tərtərdə müstəntiq işləmisiz, sizə də inanmıram. Heç kimə inamım qalmayıb. Hakim: - Siz düz araşdırmamısız. Mən bircə gün də müstəntiq işləməmişəm. Bir az da təmkinli olun, bura məhkəmədir. Bariz Cəfərov: - Mən bu adamları tanımıram. Maşıyevgilin işi gəlib bura. Onda çağırarsız, gəlib ifadə verərəm. Mənə onlar işgəncə verib. Hakim: - Siz bu iş üzrə də zərərçəkmiş kimi tanınmısız, ifadə vermisiz. İndi buyurun, burda da ifadə verin. Bariz Cəfərov: - Mən indi də xidmətdəyəm. Burda ad çəkə bilmərəm. Kim zəmanət verir ki, burdan çıxanda maşınla üstümdən keçməyəcəklər? Hakim: - Narahat olmayın, məhkəmədir, danışın. Bariz Cəfərov: - Nə danışım? Əhmədov Faiq üzümə dayanıb. Ona görə işgəncələr görmüşəm. İndi gəlib mənimlə eyni cərgədə zərərçəkən kimi oturub. 2017-ci ildə həmlə taborunun komandiri olmuşam. Eşitmişdik ki, belə bir məsələ var, əsgər və zabitlərə işgəncə verilir. Qiyas Abbasov zəng eləyib, hərbi hissəyə çağırdı. Orda da tutub gözümü, əl-qolumu bağladılar, işgəncələr verdilər, guya xəyanət eləmişəm. İşgəncələrdən sağlamlığımı itirmişəm, 6 ay arabada, 9 ay yataqda olmuşam. İndi də xidmətdəyəm. Mənimlə bağlı yuxarı təqdimat gedir, ancaq yazırlar ki, məqsədəuyğun deyil. Hansını deyim?.. Maraqlı ifadələrdən biri Yusif Əsədovun idi. Çünki “Tərtər işgəncələri” adlı səhifə onun olduğu bölükdən açılıb. Zərərçəkən özü də bu barədə danışıb: - Bilirsiniz ki, hər şey bizim bölükdən başlayıb. Mənim tabeliyimdə olan əsgər Turan İbrahimli aprelin 28-də gecə saat 12-də silahı da götürüb döyüş postunu tərk eləmişdi. Mən həmin vaxt istirahət edirdim. Xəbər verdilər ki, əsgər yoxdur. Axtarışa başladıq, qərargaha xəbər verdik. Onu minalanmış ərazinin yaxınlığından tapdıq. Soruşduq ki, niyə o tərəfə keçmək istəyirdin? Gah dedi, leytenant yoldaşımızın intiqamını almaq istəyirdim, gah dedi, başımdan vurdular, məni havayla apardılar o tərəfə... Sabahı gün mənə hərbi hissədən zəng gəldi, dedilər ki, əsgər İbrahimlini guya incitmişəm. Sonra da onun üçün məzuniyyət kağızı yazmağımı tapşırdılar. Sabahı gün Mehman Hüseynovun manqasına gəlib axtarış apardılar, onları yığıb apardılar. Sonra gəlib bizim taboru da mənimlə birlikdə döyüş postundan aşağı düşürtdülər. Məni qırmızı maşında aparırdılar. Yarı yolda düşürüb, “UAZ”a mindirdilər. Bizi köhnə briqdaya apardılar. İçəri girən kimi Mehmanın manqasını gördük. Onun manqasındakı əsgərlərin hamısını çılpaq soyundurmuşdular. Sonra həkimlər bizi də müayinə etdilər. Hərbi polisin rəisi, hərbi prokuror, general Hikmət Həsənov - hamısı orada idi. Hikmət Həsənov mənə dedi ki, xainsən. Məni təpiklədi. Mehmana o qədər işgəncə verilmişdi ki, demək olar, ölmüşdü. Hikmət Həsənov Mübariz Rzayevə tapşırdı ki, apar bunu. Mübariz Rzayev məni aparanda Mehman yerdə işgəncələrdən hərəkətsiz vəziyyətdə qalmışdı. Dedim, Mehmanı niyə bu günə qoyublar? Mübariz Rzayev dedi, darıxma, səni də o günə qoyacaqlar. Məni maskalılara verdi, işgəncələr başladı, başıma dəsmal keçirdib, suda boğdular, toka verdilər. Qonşu otaqda Babək Əliyevə işgəncə verilirdi. Səsi gəlirdi. Babək milli qəhrəman Mübariz İbrahimovun xalası oğludur. Babəkə deyirdilər ki, denən erməniyə keçmisən. Denən vətən xainisən. Mübariz də sənin kimi vətən xaini olub. Babək Əliyev də zərərçəkəndir və məhkəmə zalında idi. Ayağa qalxaraq deyilənləri təsdiq etdi. Ancaq həm də dedi ki, zərərçəkən Yusif Əsədova görə işgəncəyə məruz qalıb. Yusif Əsədov belə cavab verib: - Orada hamı kimə görəsə işgəncəyə məruz qalıb, bir-birinin üzünə durub. Mən 18 ay həbsdə olmuşam. Məqsədim yalan danışmaq olsaydı, orada da deyərdim. Vəkil Əhməd Fərhadov Yusif Əsədova işgəncələrlə bağlı suallar verib. Əhməd Fərhadov vaxtilə Yusif Əsədovun vəkili olub, hazırda isə təqsirləndirilənlərdən birinin vəkilidir. O, Yusif Əsədova bəzi məsələlərdə yalan danışdığını deyəndə Yusif Əsədov belə cavab verib: “Siz o vaxt mənim vəkilim idiz, hər şeyi də yaxşı bilirsiz. İşgəncə izləri hələ də bədənimdə qalıb, açıb göstərə də bilərəm. Hakim üzünü vəkilə tutur: - Fərhadov, sizin hərəkətiniz etik deyil. Vaxtilə bu adamın vəkili olmusunuz, nəyə lazımdır ki, o vaxt müvəkkilinizlə bağlı olanları indi burda ona qarşı deyirsiniz? Hakim Yusif Əsədova sual etdi: - Siz kiminsə üzünə durmusunuz? Yusif Əsədov: - Allahverdiyev Elmarın üzünə durmuşam, ikimizə də işgəncə verilib, bir-birimizin üzünə durmuşuq, guya erməniyə getmişik. Hakim: - Tələbiniz, şikayətiniz var? Yusif Əsədov: - Bəli. Tələbim odur ki, bizə işgəncə verənlər burda - əli ilə şüşə qəfəsi göstərir - otursun, əməllərinə görə cavab versinlər. Sonra zərərçəkən Bəhruz Novruzovun nümayəndəsi olan anası Aygün Novruzova ayağa qalxaraq təqsirləndirilən şəxs Rüstəm Ələsgərova sual verib: - Oğlum sənin adını çəkir. Bilmək istəyirəm ki, sənə kim göstəriş vermişdi ki, oğluma işgəncə verəsən? Rüstəm Ələsgərov: - Sizin oğlunuzla məni 2018-ci ilin yanvarında üzləşdirdilər, məlum oldu ki, onun məndən şikayəti əsassızdır. Burada artıq yeddinci məhkəmə iclası keçirilir, hələ heç bir zərərçəkmiş deməyib ki, mən ona işgəncə vermişəm. İşgəncələrdən dünyasını dəyişmiş Elçin Quliyevin hüquqi varisi (anası) Validə Əhmədova: - Fərzəliyə də işgəncə vermisən. Rüstəm Ələsgərov: - Fərzəli burada ifadə verəndə də dedi ki, guya onu döymüşəm. Onu da ehtimalla dedi, dəqiqliklə demədi. Üzünü hakimə tutub deyir: - Ümumiyyətlə, mən işgəncə verilən binanın mühafizəsində olmuşam, içəri girməyə icazəm, səlahiyyətim olmayıb. Ancaq boynuma ölüm işləri qoyublar. Guya mən 5 gün ərzində 100 adama işgəncə vermişəm. Mən nəyəm bəyəm, Remboyam?.. Proses boyunca 115 nəfər zərərçəkmiş dindirilib. Məhkəmə iclası bundan sonra təxirə salınıb.musavat.com

Martın 12-də keçirilmiş buraxılış imtahanınının nəticələri açıqlanıb. Sozcu.az xəbər verir ki, bu barədə abituriyentlər SMS bildiriş alıblar. İmtahanda iştirak edən 11-ci sinif şagirdləri verilmiş keçidə daxil olaraq iş nömrəsi (8 rəqəmli şagird kodu) və şəxsiyyəti təsdiq edən sənədin nömrəsindən (və ya FİN kodundan) istifadə etməklə öz imtahan nəticələri, cavab vərəqinin qrafik təsviri, qapalı tipli tapşırıqların doğru cavabları, həmçinin hər bir ətraflı yazılı cavab tələb edən açıq tipli tapşırıq üzrə qiymətləndirmə meyarları (tapşırığın ehtimal olunan doğru cavabları, həlli və qiymətləndirmə şkalası) ilə tanış ola bilərlər. İmtahan iştirakçıları iş nömrələrini buradan öyrənə bilərlər. Şagirdlər imtahan nəticələri haqqında məlumatı (hər fənn üzrə ümumi balı), həmçinin mobil operatorlar (Azercell, Bakcell, Nar, Naxtel) vasitəsilə “iş nömrəsi”ni (8 rəqəmli şagird kodunu) 7727 nömrəsinə göndərməklə də öyrənə bilərlər. Yazı işlərinin (açıq tipli tapşırıqların cavabları) yoxlanılması prosesi onlayn şəkildə həyata keçirilib. Belə ki, hər marker yoxlama prosesinə öz evindən qoşularaq proqramın onun kompüterinə təsadüfi göndərdiyi işləri yoxlayıb. Qeyd edək ki, onlayn (evdən) yoxlama prosesində üztanıma texnologiyası tətbiq edilib və yoxlama prosesinin bütün tələblərinə (meyarların təkmilləşdirilməsi, işlərin şifrələnməsi, markerlərin hər tapşırıq üzrə yoxlamadan əvvəl kalibrləmədə iştirak etməsi, yoxlama ərzində "seeding" (markerlərə sayıqlığı itirməmək üçün əvvəlcədən hazırlanan və kalibrə edilən sualların mütəmadi olaraq göndərilməsi) prosesinin tətbiqi, işlərin markerlərə proqram tərəfindən təsadüfi göndərilməsi, imtahan protokollarının araşdırılması və s.) əməl olunub. Yazı işlərinin onlayn (evdən) yoxlanılması üçün proqram təminatı Dövlət İmtahan Mərkəzinin mütəxəssisləri tərəfindən hazırlanıb. Qeyd edək ki, buraxılış imtahanında şagirdlərə tədris dili fənnindən 10 yazılı cavab tələb edən açıq və 20 qapalı, riyaziyyat fənnindən 7 yazılı cavab tələb edən açıq, 5 kodlaşdırılan açıq, 13 qapalı, xarici dil fənnindən 7 yazılı cavab tələb edən açıq və 23 qapalı tipli tapşırıq olmaqla ümumilikdə 85 tapşırıq təqdim olunur. Bu mərhələdə fənlərinin hər biri üzrə toplanıla biləcək maksimal bal 100 olmaqla, ümumilikdə 300 baldır. Balların hesablanması qaydası ilə linkdəki faylda tanış ola bilərsiniz. Bu imtahanlarda iştirakı nəzərdə tutulan 50823 nəfərdən 485 nəfər imtahana gəlməyib. İmtahan qaydalarını pozduğu üçün 19 nəfərin nəticəsi ləğv olunub. İmtahan iştirakçıları arasında 4 nəfər 297.5 bal toplamaqla ən yüksək nəticəni göstərib.Yüksək bal toplayanlardan 2 nəfər Bakı şəhər Nəsimi rayon texniki-humanitar liseyinin, 1 nəfər Səbail rayon 160 №-li klassik gimnaziyasının, 1 nəfər Sabunçu rayon 169 №-li orta məktəbinin məzunudur. İmtahan nəticələri ilə bağlı müraciətlərə baxılması üçün DİM tərəfindən 3 may tarixindən etibarən onlayn ("Zoom" proqramı və ya telefon əlaqəsi vasitəsilə) apellyasiya prosesi təşkil ediləcək. Apellyasiya komissiyasına müraciət etmək istəyənlər 26-28 aprel tarixlərində DİM-in saytında yerləşdiriləcək elektron ərizəni doldurmaqla qeydiyyatdan keçə bilərlər. Göstərilən müddət ərzində qeydiyyatdan keçməyənlər sonradan apellyasiya üçün müraciət edə bilməyəcəklər. Elektron ərizədə haqqında müraciət edilən tapşırığın nömrəsi seçilməli, onunla bağlı müraciətin məzmunu yazılmalı və meyarın hansı bəndinə uyğun hesab edildiyi göstərilməlidir. Elektron ərizədə müraciətin məzmunu qeyd olunmadığı halda ərizə qəbul edilmir, həmin müraciət araşdırılmır və onun üçün apellyasiya təşkil olunmur. Apellyasiya müzakirəsində şagirdin iştirakı vacibdir. Şagird ilə yanaşı valideynlərindən biri müzakirədə iştirak edə bilər. Bir şagirdin ərizəsi (müraciəti) üzrə ən çox 15 dəqiqə müzakirə aparıla bilər. Ayrılan vaxt bitdikdə, kənar şəxs müzakirəyə qoşulduqda və ya etik davranış qaydaları pozulduqda müzakirə prosesi dayandırılır. Apellyasiya komissiyasına müraciət etməmişdən əvvəl şagirdlər DİM-in saytında, imtahan nəticələri ilə bağlı səhifədə öz nəticələri, cavab vərəqinin qrafik təsviri, hər bir açıq tipli tapşırıq üzrə qiymətləndirmə meyarları ilə, həmçinin https://dim.gov.az/news/10763/ linki vasitəsilə tapşırıqların şərti və izahlarla tanış olmalıdırlar. Ötən imtahanların təcrübəsi göstərir ki, apellyasiya üçün ərizə yazanların təqribən 15%-i ümumiyyətlə tapşırığa cavab verməyib və ya öz cavabı ilə mümkün doğru cavabları, qiymətləndirmə şkalasını müqayisə edib tanış olmadan komissiyaya müraciət ediblər. Abituriyentlərin nəzərinə çatdırırıq ki, bu tip müraciətlərə baxılmayacaq.

Dığ (Tex) kəndinin sakinlərinə silah verilməməsi ilə bağlı yayılan məlumatlar yalandır. Sozcu.az xəbər verir ki, bunu hakim Mülki Müqavilə Partiyasından olan deputat Armen Xaçatryan deyib. Erməni deputat bildirib ki, müdafiənin təşkili ilə bağlı problem yarananda kəndin özünün strateji planı, döyüş şəraitində əhalinin davranış qaydaları olmalıdır. Xaçatryan əminliklə bildirib ki, bu məsələdə Dığ kəndi Ermənistanda hər kəsdən daha hazırlıqlıdır. “Kənddə silah anbarı var və hər bir silahın üzərində də onun kimə veriləcəyi yazılıb. Kəndlilərə silah verilməyib, amma lazım olanda onlar bilirlər ki, silahı hardan götürmək olar. Dığ bütün kəndlərə nümunə olmalıdır”, - erməni deputat bildirib.axar

“Ermənistanda saxlanılan iki Azərbaycan əsgərinin Bakıya qaytarılması müzakirə olunmur”. Sozcu.az xəbər verir ki, bunu erməni mediasına müsahibəsində “Vətəndaş müqaviləsi” fraksiyasından olan deputat Armen Xaçatryan deyib. O, Ermənistan ərazisində saxlanılan Azərbaycan əsgərlərinin Bakıya qaytarılması ehtimalını istisna edib. Xaçatryan Azərbaycan hərbçilərinin ermənilərlə dəyişdirilməsi məsələsinə toxunub. O, azərbaycanlıların Ermənistan ərazisində olduqları zaman törətdikləri iddia edilən “cinayətlər”dən danışıb.konkret

Bakıda keçiriləcək “Azərbaycan Qran Pri” ("Formula 1") yarışı ilə əlaqədar 24-30 aprel tarixlərində 6, 132-134, 1, 7, 8, 160 nömrəli ümumitəhsil müəssisələrində tədris onlayn təşkil olunacaq. Sozcu.az xəbər verir ki, bu barədə Report-a Elm və Təhsil Nazirliyinin İctimaiyyətlə əlaqələr sektorunun müdiri Cəsarət Valehov məlumat verib. O bildirib ki, bu barədə məktəb rəhbərliyinə və valideynlərə məlumat verilib. Qeyd edək ki, Azərbaycan Qran Prisi 28-30 apreldə gerçəkləşəcək.

Mingəçevirdə 10 yaşlı qız uşağı alçadan zəhərlənərək ölüb. Sozcu.az xəbər verir ki, hadisə Bahar küçəsində yerləşən fərdi təsərrüfatlardan birində baş verib. 2013-cü il təvəllüdlü Lalə Quluzadə həyətlərində yetişən alçadan zəhərlənib. Onun həyatını xilas etmək mümkün olmayıb. İlkin məlumata görə, qızın atası bütün təsərrüfatı zərərvericilərdən qorumaq üçün dərmanlayıbmış, qız isə bilmədən birbaşa ağacdan dərdiyi alçaları yeyib. Faktla bağlı araşdırma aparılır.

Aprelin 17-də Beyləqan rayonunun Birinci Şahsevən kəndi ərazisində Baş Mil kanalına düşən minik avtomobilində olan 1 nəfərin axtarışları başa çatıb. Fövqəladə Hallar Nazirliyindən Sozcu.az-a verilən məlumata görə, Kiçikhəcmli Gəmilərə Nəzarət və Sularda Xilasetmə Dövlət Xidmətinin "Muğan" və "Aran" dalğıc-axtarış qrupları tərəfindən həyata keçirilən əməliyyat nəticəsində axtarışı aparılan şəxsin meyiti (avtomobilin batdığı yerdən təqribən 200 m aralıda) aşkar edilərək kanaldan çıxarılıb və aidiyyəti üzrə təhvil verilib. Qeyd edək ki, kanala düşən şəxs 1988-ci il təvəllüdlü Sahil Təbriz oğlu Ağayevdir. Onun hərbçi olduğu bildirilir.

Paytaxtın Sabunçu rayonunun Zabrat qəsəbəsində yerləşən qəbiristanlıqların birində naməlum şəxslər tərəfindən bir neçə qəbir daşının dağıdılması ilə bağlı araşdırma aparılır. Bu barədə Daxili İşlər Nazirliyinin mətbuat xidmətindən məlumat verilib. Faktla bağlı Sabunçu Rayon Polis İdarəsinin İstintaq şöbəsində Cinayət Məcəlləsinin 245-ci (qəbir üzərində təhqiredici hərəkət) cinayət işi açılıb. Əməli törədən şəxsin, yaxud şəxslərin müəyyən edilib istintaqa cəlb edilməsi istiqamətində tədbirlər görülür. Tədbirlərinin nəticəsi ilə bağlı məlumat veriləcək.

Ataşehirdə gecə saatlarında bir qrup şəxs Cümhuriyyət Xalq Partiyasının Seçki Mərkəzinə hücum edib. Sozcu.az xəbər verir ki, bu barədə "DHA" məlumat yayıb. Məlumata görə, pəncərələrə sprey boya ilə yazı yazan hücumçular ofisin qarşısında asılmış bayraqları kəsiblər.  Daha sonra tapança ilə havaya atəş açaraq qaçıblar.  Məsələ ilə bağlı açıqlama verən İstanbul Valiliyi şübhəlilərin tutulması üçün müvafiq tədbirlər görüldüyünü bildirib.

Əmək və Əhalinin Sosial Müdafiəsi Nazirliyinin tabeliyində fəaliyyət göstərən “Dövlət Sosial Müdafiə Fondu”nun (DSMF) elan etdiyi tender müsabiqəsinin qalibi məlum olub. Sozcu.az Yeniavaz.com-a istinadən xəbər verir ki, DSMF-nin Sosial Sığorta və Fərdi Uçot üzrə Mərkəzi Filialı üçün ofis sahəsinin icarəyə götürülməsi ilə bağlı tenderin qalibi Bakı Avrasiya Universiteti (VÖEN – 1500008331) olub. DSMF Bakı Avrasiya Universitetinə məxsus 3 000 kv. metr qeyri-yaşayış sahəsini 9 ay müddətinə icarəyə götürür və icrə haqqı olaraq 472 min 590 manat (ayda 52 min 510 manat) ödəyəcək. Məlumat üçün qeyd edək ki, Bakı Avrasiya Universiteti 21.05.2003-cü il tarixində dövlət qeydiyyatına alınıb. Nizamnamə kapitalı 422 000 manat olan Universitetinin hüquqi ünvanı Nərimanov rayonu, Həsən Əliyev, ev 135A-da yerləşir. Bakı Avrasiya Universitetinin qanuni təmsilçisi (rektor) Hüseynli Nazim Ziyad oğludur. Onu da bildirək ki, Bakı Avrasiya Universiteti 1992-ci ildə təsis olunan Ali Diplomatiya Kollecinin bazası əsasında yaradılıb. Qeyd edək ki, Əmək və Əhalinin Sosial Müdafiəsi Nazirliyinə tabe olan qurumların bir çoxu ofis sahələrini icarəyə götürürlər. Aşağıdakı siyahıda icarəyə götürülən ofis sahələrinin bəziləri yer alıb: – Əmək və Əhalinin Sosial Müdafiəsi Nazirliyinin tabeliyində Dayanıqlı və Operativ Sosial Təminat (DOST) Agentliyinin “DOST Rəqəmsal İnnovasiyalar Mərkəzi” MMC üçün inzibati bina sahəsinin icarəyə götürülməsi ilə bağlı tenderin qalibi Səfərova Sahibə Paşa qızı olub. DOST Sahibə Səfərovaya məxsus qeyri yaşayış sahəsini 17 ay müddətinə icarəyə götürəcək və icrə haqqı olaraq 969 min 999 manat 94 qəpik (ayda 57 min 58 manat) ödəyəcək. – Əmək və Əhalinin Sosial Müdafiəsi Nazirliyinin tabeliyində fəaliyyət göstərən “DOST İş Mərkəzi” MMC üçün ofis sahəsinin icarəyə götürülməsi ilə bağlı tenderin qalibi Əşrəf Səxavət oğlu Səfərov (VÖEN – 2004596032) olub. DOST Əşrəf Səfərova məxsus 2 750 kv. metr qeyri-yaşayış sahəsini 12 ay müddətinə icarəyə götürür və icrə haqqı olaraq 426 min 855 manat (ayda 35 min 571 manat) ödəyəcək. – Bu ilin yanvar ayında Dövlət Əmək Müfəttişliyi Bakı şəhər İdarəsi üçün inzibati bina sahəsinin icarəyə götürülməsi ilə bağlı tenderin qalibi Fəridə Hüseynalı qızı Orucova (VÖEN – 1400576242) olub. Dövlət Əmək Müfəttişliyi Xidməti F. Orucovaya məxsus 980 kv. metr qeyri-yaşayış sahəsini 12 ay müddətinə icarəyə götürür. Əmək Müfəttişliyi Xidməti icarə haqqı olaraq F. Orucovaya 163 min 548 manat 96 qəpik (ayda 13 min 629 manat) ödəyəcək. – Ötən ilin noyabr ayının son günlərində DSMF Sosial Ödənişlərin Təyinatı üzrə Mərkəzi Filialı üçün ofis sahəsinin icarəyə götürülməsi ilə bağlı tender müsabiqəsi keçirib. Müsabiqənin qalibi Bayramov Amil Qinyaz oğlu (VÖEN – 1003009142) olub. DSMF Bayramov Amilə məxsus 3000 kv. metr qeyri-yaşayış sahəsini 9 ay müddətinə icarəyə götürür. DSMF icarə haqqı olaraq A. Bayramova 445 min 500 manat (ayda 49 min 500 manat) ödəyəcək. – Noyabr ayının əvvəlində isə DSMF-nin Maliyyə və Mühasibatlıq üzrə Mərkəzi Filialı üçün ofis sahəsinin icarəyə götürülməsilə bağlı tender müsabiqəsi həyata keçirilib. Müsabiqənin qalibi Hüseynova Almaz Hacı qızı (VÖEN – 1307950442) olub. DSMF Hüseynova Almaza məxsus 2200 kv. metr qeyri-yaşayış sahəsini 9 ay müddətinə icarəyə götürüb və 240 min 702 manat ödəyəcək. – Oktyabr ayında Nazirliyin tabeliyində olan Dövlət Tibbi-Sosial Ekspertiza və Reabilitasiya Agentliyi üçün ofis sahəsinin icarəyə götürülməsi ilə bağlı tender müsabiqəsi həyata keçirilib. Müsabiqənin qalibi Emil Vidadi oğlu Orucov (VÖEN – 1604117012) olub. Nazirlik Emil Vidadi oğlu Orucova məxsus 2000 kv. metr qeyri-yaşayış sahəsini 12 ay müddətinə icarəyə götürüb və 318 min 622 manat 7 qəpik ödəyəcək. – Ötən ilin iyul ayında Nazirliyin tabeliyində olan Dövlət Məşğulluq Agentliyi üçün ofis sahəsinin icarəyə götürülməsi ilə bağlı tender müsabiqəsi həyata keçirilib. Müsabiqənin qalibi “Macaz Construction” MMC (VÖEN – 1302101451) olub. Nazirlik 2300 kv. metr qeyri-yaşayış sahəsini 6 ay müddətinə icarəyə götürüb və 743 min 853 manat 12 qəpik ödəyəcək. Qeyd edək ki, “Macaz Construction” MMC-nin Alternativ və Bərpa Olunan Enerji Mənbələri üzrə Dövlət Agentliyinin sabiq rəhbəri Akim Bədəlovun ailə üzvlərinə məxsus olduğu bildirilir. – Ötən ilin may ayında Nazirliyin tabeliyində olan DOST İş Mərkəzi üçün ofis sahəsinin icarəyə götürülməsi ilə bağlı tender müsabiqəsi həyata keçirilib. Müsabiqənin qalibi Əşrəf Səxavət oğlu Səfərov (VÖEN – 2004596032) olub. Nazirlik Əşrəf Səxavət oğlu Səfərova məxsus 2750 kv. metr qeyri-yaşayış sahəsini 6 ay müddətinə icarəyə götürüb və 213 min 432 manat ödəyəcək. – Bunlardan başqa ötən ilin yanvar ayında Nazirliyin tabeliyində olan Sosial Xidmətlər Agentliyi üçün ofis sahəsinin və anbarın icarəsi məqsədilə “Çinar Park” MMC (VÖEN – 1500764231) ilə 566 min 592 manatlıq müqavilə imzalanıb. – Əvvəlki illərdə Nazirliyin tabeliyində olan DSMF Maddi-Məişət Şəraitinin Müayinəsi üzrə Mərkəzi Filialı üçün 3000 kv. metr ofis sahəsini icarəyə götürüb və Həsənova Qaze Həsən qızına (VÖEN – 1600110362) 12 ay üçün 556 min 200 manat ödəyib. – Dövlət Məşğulluq Agentliyi 8 saylı Ərazi Məşğulluq Mərkəzi Filialı üçün 235 kv. metr ofis sahəsini icarəyə götürüb və Şirinov Faiq Nizami oğluna (VÖEN – 1306883522) 36 ay üçün 90 min manat ödəyib. – DSMF Xüsusi Şərtlərlə Təyinat üzrə Mərkəzi Filialı üçün 1900 kv. metr ofis sahəsini icarəyə götürüb və Kərimov İlqar İsmayıl oğluna (VÖEN – 1505343002) 12 ay üçün 167 min 808 manat ödəyib. – DSMF Məhkəmə Mübahisələri ilə iş üzrə Mərkəzi Filialı üçün 1000 kv. metr ofis sahəsini icarəyə götürüb və “Çinar Park” MMC (VÖEN – 1500764231) 12 ay üçün 148 min 680 manat ödəyib. – DSMF Sosial Sığorta və Fərdi Uçot üzrə Mərkəzi Filialı üçün 3000 kv. metr ofis sahəsini icarəyə götürüb və Bakı Avrasiya Universitetinə (VÖEN – 1500008331) 12 ay üçün 630 min manat ödəyib.

Dövlət Məşğulluq Xidməti aztəminatlı ailələrin məşğulluğunun təmin edilməsi məqsədilə alınan heyvanların sayını və qiymətini açıqlamır. Sozcu.az xəbər verir ki, hazırda aztəminatlı ailələrin məşğulluğunun təmin edilməsi üzrə həyata keçirilən əsas tədbirlərdən biri ailələrin mal-qara və digər kənd təsərrüfatı aktivləri ilə təmin edilməsidir. Bu məqsədlə Məşğulluq Xidməti davamlı olaraq tenderlər keçirir və böyük vəsaitlər sərf edərək inək, qoyun, keçi, təkə, arı aləsi və digər aktivlər alır. Bu heyvanların əksəriyyəti ölkəyə xaricdən idxal edilir. Sonuncu belə tenderin qalibi “Agro Best” QSC  (VÖEN: 1405235391) olub. Həmin şirkət Məşğulluq Xidmətinə 73 milyon 575 min manatlıq idxal inək, idxal qoyun, idxal qoç, keçi, təkə, arı ailəsi və digər mallar satacaq. Tenderin dövlət vəsaitləri hesabına keçirilməsinə baxmayaraq Məşğulluq xidməti bu vəsaitlə alınan heyvanların sayını və qiymətini açıqlamaqdan imtina edib. FED.az-ın bunnula bağlı sorğularına cavab olaraq Xidmət bu məlumatları açıqlanmayacağını bildirib. Eyni qayda ilə Xidmətin əvvəlki tenderlərlə aldığı aktivlərin də sayı və qiyməti ictimaiyyətdən gizli saxlanılır. “Agro Best” QSC 20.08.2020-ci ildə dövlət qeydiyyatına alınıb. Şirkətin nizamnamə kapitalı 2010 manatdır. Qanuni təmsilçisi Nahid Ələkbərov Kamil oğludur. Hüquqi ünvanı Az1007, Bakı şəhəri. Nəsimi rayonu, Feyzulla Qasımzadə ev 1, m 48. Qeyd edək ki, Məşğulluq Xidməti ölkədə rəsmi qeydiyyatdan keçmiş işsizlərin sayını, onların rayon və şəhərlər üzrə bölgüsünü, işsizlik müavinəti alanların sayını/bölgüsünü və verilən müavinətin məbləğini də ictimaiyyətdən gizli saxlayır.

Gündə bir stəkan qaragilə qan təzyiqini aşağı salıb, beyin funksiyasını yaxşılaşdıra bilər. Sozcu.az AZƏRTAC-a istinadla bildirir ki, bununla bağlı tədqiqat "American Journal of Clinical Nutrition" jurnalında dərc olunub. Araşdırmaya görə, qaragilədə olan polifenolların istehlakı damar və beyin funksiyasının yaxşılaşması ilə əlaqələndirilir. Qaragilənin sağlamlığa necə təsir edə biləcəyini daha yaxşı anlamaq üçün tədqiqatçılar sınaq keçiriblər. Araşdırmaya 65-80 yaş aralığında 61 sağlam kişi və qadın daxil edilib. İştirakçılar 12 həftə ərzində təxminən 178 qram təzə qaragilə ekvivalenti olan 26 qram qurudulmuş yabanı qaragilə tozundan hazırlanan içki içiblər. Nəhayət, qaragilə yeyənlərin digərlərinə nisbətən daha aşağı qan təzyiqi ilə yanaşı, müvafiq tapşırıqlarda yaddaş və diqqətinin də artması müşahidə edilib. Tədqiqatçılar qeyd edib ki, araşdırmanın nəticələrinə görə yabanı qaragilədə olan polifenollar yaşlı insanlarda ürək-damar xəstəlikləri riskini azalda bilər.

Bakıda bütün köhnə binalar söküləcək və hər birinin yerində yeni binalar tikiləcək. Sozcu.az xəbər verir ki, bunu Azərbaycan Milli Elmlər Akademiyası (AMEA) nəzdində Respublika Seysmoloji Xidmət Mərkəzinin rəhbəri Qurban Yetirmişli bu gün keçirilən mətbuat konfransında deyib. Onun sözlərinə görə, həmin binalar tikilən zaman hər birinə dayanaqlılıq üçün 30-40 il zəmanət verilib: “Artıq onların sökülməsi üçün zaman yetişib. Bundan başqa, məndə qədimi binalarda isə bərkitmə və möhkəmləndirmə işləri aparılacağı barədə məlumatlar var”.

İranın Azərbaycanla sərhədə xüsusi radar sistemləri yerləşdirib. Sozcu.az xəbər verir ki, bu barədə SEPAH-ın Qüds qanadına bağlı Teleqram” kanalı yazb. “İran ölkənin şimal-qərbində bir sıra çoxməqsədli mərhələli radarlar yerləşdirib”, - Teleqram kanalında qeyd edilib.

"Mənim qədər pul qazanan var?! Ruzili xanımam". Sozcu.az Axşam-a istinadla xəbər verir ki,bu sözləri müğənni Şəbnəm Tovuzlu "Həmin Zaur" verilişində deyib. Sənətçi şou-biznesdə ən çox pul qazanan ifaçı olduğunu iddia edib: "Yetərli işim var. Məkan açmışam, evlər almışam. Halal qazanıram. Əziyyət çəkirəm, 7-8 saat hündürdabanda oxuyuram. Xalqın puludur, sevilirəm və toylara dəvət alıram. Dörd evim var. Mənim kimi qazanan xanıma bu qədər ev azdır. Əgər əlibərk olsaydım, daha çox ev alardım". 

Bu gün BQXK nümayəndələri Ermənistanda əsir götürülən Azərbaycan Ordusunun əsgərlərinə baş çəkiblər. İrəvanda keçirilən görüş zamanı hərbçilərə ailələri ilə Qızıl Xaç Məktubu vasitəsilə əlaqə yaratmaq imkanı verilib.  "Mandatına uyğun olaraq, BQXK başçəkmələr zamanı saxlanılan şəxslərlə rəftarı və saxlanma şəraitini qiymətləndirir, onların ailələri ilə əlaqələrini bərpa etmək və ya davam etdirmək üçün şərait yaradır. BQXK-nin prosedurlarına uyğun olaraq, başçəkmələrlə bağlı müşahidələr və tövsiyələr yalnız saxlayan tərəflə paylaşılır", - BQXK-nin yaydığı məlumatda deyilir. Modern.az-ın əməkdaşı əsir hərbçilərin ailələri ilə əlaqə saxlayaraq, BQXK tərəfindən onlara hansı məlumatların çatdırıldığını öyrənməyə çalışıb. Əsgər Hüseyn Axundovun anası Şəlalə Axundova bildirib ki, hələlik oğlundan məktub almayıb: “Mənə oğlumla görüşdüklərini bildirdilər. Hüseyn məktub yazıb, amma onun məktubu hələ bizə verilməyib. Əsirlərin vəziyyəti ilə bağlı yaxın zamanda məlumat verəcəklərini qeyd etdilər. Oğluma görə çox narahatam". Əsgər Aqşin Bəbirovun anası Dürdanə Bəbirova yazılan məktuba inanmadığını söyləyib: “Nümayəndə heyəti oğlumla görüşüb. Dedilər ki, yaxın günlərdə sizə oğlunuzla bağlı məlumat verəcəyik, amma onların sağlıq durumu haqda heç nə demədilər. Aqşinin bizə məktub yazdığını bildirdilər. Mən məktuba inanmıram. Şərait yaradılsın, oğlumla görüntülü danışım. Bunun üçün bir çox yerə müraciət etmişəm". atırladaq ki, Naxçıvanda xidmətdə olan 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu itkin düşüblər. Bu yaxınlarda onların yolu azaraq Ermənistan ərazisinə keçdiyi məlum olub. Hər iki əsgərimiz Ermənistanda əsir götürülüb və onlara qarşı saxta ittihamlarla cinayət işi açılıb. 

5, 11 mart tarixlərində (11 illik) keçirilmiş orta təhsil səviyəsi üzrə buraxılış imtahanlarından sonra məktəblərdə şagirdlərin dərsə davamiyyəti zəifləyib. Söhbət təbii ki, 11-ci siniflərdə oxuyan şagirdlərdən gedir.  Müəllimlər arasında belə bir narazılıq müşahidə olunur ki, buraxılış imtahanı verən şagirdlər imtahandan sonra məktəbə maraq göstərmir. Tədris ilinin bitməsinə bir aydan artıq müddət qaldığı halda, şagirdlər dərsə etinasız yanaşırlar. Əldə etdiyimiz məlumata görə, məktəb rəhbərlərinə 11-cilərin dərsə davamiyyətinin yaxşılaşdırılması üçün tapşırıq verilib. Axı hələ dərs ili iyunun 14-də yekunlaşacaq. Bəs şagirdlərin bu davranışına qarşı hansı işlər görülməlidir? Mövzu ilə bağlı təhsil eksperti Sona Əliyeva AzEdu.az-a açıqlamasında imtahan verən şagirdin artıq məqsədinə çatdığını düşünür: "Bu onunla əlaqədardır ki, Azərbaycan təhsil sistemi imtahan mərkəzlidir. Müəllimin də, şagirdlərin də əsas qayğısı imtahanlarla bağlıdır. Bu baxımdan qarşıya qoyulan məqsədə çatdıqlarını düşünərək, daha sonra məktəbə maraq göstərmirlər. Halbuki, əsas məqsəd təhsil almaq olmalıdır". S.Əliyeva bildirib ki, qiymətləndirmə sadəcə bir ölçü sistemidir, insanın həyatdakı uğurlarının əsası həyat məqsədləri olmamlıdır: "Şagirdlərin buraxılış imtahanı verdikdən sonra məktəbə biganəlik nümayiş etdirməsi, tədris ilinin sonuna yaxınlaşdıqca dərslərinə etinasız yanaşması təhsil sistemi üçün ciddi problemdir. Bu davranış şagirdlərdə öyrənmək həvəsinin azaldığını, dərslərdən sıxıldığını və məktəblə bağlı mənfi təcrübəyə, düşüncəyə malik olduğunu göstərir.  Şagirdlərlə ünsiyyəti yaxşılaşdırmaq, yekun imtahanlardan sonra təkrar mövzulara yer vermək, imtahan nəticələrini birlikdə müzakirə etmək, müxtəlif fəaliyyətlər təşkil etmək lazımdır. Bunlar imtahan vermiş şagirdlərin məktəbə olan biganəliyinin qarşısını ala bilər". 

19 aprel 2023-cü il tarixində Bakıda keçirilən Azərbaycan-İsrail Birgə Komissiyasının 3-cü iclası çərçivəsində "Azərbaycan Respublikası Hökuməti ilə İsrail Dövləti Hökuməti arasında ətraf mühitin mühafizəsi sahəsində əməkdaşlıq haqqında Saziş" imzalanıb.  Sazişi Azərbaycan tərəfdən ekologiya və təbii sərvətlər naziri Muxtar Babayev, İsrail tərəfdən isə xarici işlər naziri Eli Kohen imzalayıb. Sazişdə ətraf mühitə təsirlərin qiymətləndirilməsi, biomüxtəlifliyin qorunması, xüsusi mühafizə olunan təbiət ərazilərinin idarə olunması, tullantı sularının təmizlənməsi standartları, suyun düzgün idarə edilməsinin ekoloji aspektləri, hava keyfiyyətinin monitorinqi sahəsində əməkdaşlıq məsələləri nəzərdə tutulub. Sazişin imzalanması iki ölkə arasında ətraf mühitin mühafizəsi sahəsində əməkdaşlığın genişləndirilməsinə, bu sahədə hüquqi bazanın möhkəmləndirilməsinə və yeni əlaqələrin yaradılmasına öz müsbət töhfəsini verəcək.