2024-cü ildə narkotik istifadəçisi kimi qeydiyyata alınanların sayı açıqlanıb. Sozcu.az xəbər verir ki, bu, Dövlət Statistika Komitəsinin nəşr etdirdiyi "Azərbaycanda hüquqpozmalar" məcmuəsində öz əksini tapıb. Ötən il 4967 nəfər narkomaniyadan ilk dəfə xəstələnən şəxs kimi qeydiyyata alınıb.  Bu say 2023-cü ildə 3796, 2020-ci ildə 2723 nəfər təşkil edib.

Rusiya diktatoru Putinin atası aqressiyadan əziyyət çəkib və gəncliyində gələcək həyat yoldaşının gözünü yaba ilə çıxarıb. Bundan sonra Vladimir(böyük)  qurbanı ilə evlənmək məcburiyyətində qalıb, əks halda həbsxanaya düşəcəkdi. Sozcu.az "TSN"-ə istinadla xəbər verir ki, bunu tarixçi-publisist Konstantin Skorkin və rusiyalı jurnalist Dmitri Nizovtsev “Facebook”da jurnalistlər Roman Badanin və Mixail Rubinin “Çarın özü” kitabından bir fraqmentə istinadla yazıblar. Skorkin diktator Putinin lovğalanaraq guya atasını sərxoş halda görmədiyini və ondan bircə dəfə də olsun söyüş eşitmədiyini söylədiyini xatırladıb. "Ola bilsin ki, gənc Volodya həqiqətən ailədə zorakılıqdan və nalayiq sözlərdən qorunub. Lakin oxucular Putinin anasının gəncliyindən təkgözlü olmasını da xatırlamalıdırlar, çünki gələcək Rusiya liderinin atası qəzəb içində onun digər gözünü yaba ilə çıxarıb", - Skorkin yazır. Belə ki, 2002-ci ildə  “Moskovski Komsomolets” qəzetindəkibir  məqalədə təxminən 1928-ci ildə Tver vilayətinin kəndlərindən birində Vladimirin(ata) dostları ilə qonşu kənddən bir qızın yanına gəldiyi faciəli axşam haqqında məlumat verir. "Amma Volodka (Putinin atası) tək deyil, dostları ilə gəlmişdi. Marusya (Putinin anası) onları içəri buraxmaq istəməyib və onlar hasarın yanındakı yabaları götürərək darvazanı sındırmağa başlayıblar. O, qorxub, evdən qaçıb və hasara sığınıb. Bu zaman Volodka (Putinin atası) yaba ilə hasarın həmin yerinə zərbə vurub və yabanın ucu düz Marusyanın gözünə batıb. Qısası Volodka təsadüfən qızın gözünü kor edib. Dərhal onu xəstəxanaya aparıb. Orada Marusyanın gözünü çıxarmağa məcbur olublar”, - deyə 2002-ci ildə Putinin həmkəndlisi,  kənd sovetinin keçmiş sədri Anfisa Kormilitsına xatırlayıb. Onun sözlərinə görə, bu hadisədən sonra qızın qohumları Putinin atasını onunla evlənməyə məcbur ediblər. "O vaxtlar bir qız üçün biabırçılıq idi: qüsurlu qadınla kim evlənəcəkdi! Ona görə də Marusyanın anası Volodkanı hədələyib: ərə getməsən, səni məhkəməyə verəcəm. Odur ki, evləniblər! Marusya o zaman şüşə gözündən çox utanırdı, danışanda heç kəsin birbaşa üzünə baxmırdı, başını yana əyirdi. Sonra Volodka Leninqradda zavodda işə düzəlib və Marusya ilə oraya köçüblər”, - Putinlərin həmkəndlisi diktatorun valideynləri haqqında bunları danışıb.. Ailənin tarixçəsi gözəldir: evə hücum, darvazanın sökülməsi,  çıxarılmış göz, məcburi evlilik (Marusyadan soruşan olubmu?). Daha bunlara nə əlavə edəsən?", -deyə jurnalist Nizovtsev qeyd edib.

İran Vaşinqtonda Azərbaycan, Ermənistan və ABŞ arasında imzalanan üçtərəfli bəyannaməyə etiraz olaraq, Naxçıvandan Bakıya yük daşıyan sürücülərə təzyiqlərini gücləndirib. Sozcu.az xəbər verir ki, bu barədə "Azad İran" Teleqram kanalı məlumat yayıb. Bildirilib ki, Naxçıvandan yola düşən sürücülər günlərlə ac-susuz, çöllük ərazidə toz-torpaq içində gözlədildikdən sonra Azərbaycana buraxılırlar. "Burada nə yemək var, nə də su. Bir şey almaq üçün kilometrlə yolu piyada getmək lazımdır. Burada heç tualet də yoxdur. Bizimlə heyvan kimi davranırlar", - deyə, sürücülərdən biri bildirib. Sürücülər vurğulayıblar ki, İran rəsmiləri onlara, "xoşunuza gəlmirsə, gedin "Tramp marşrutu"ndan istifadə edin" deyirlər. Xatırladaq ki, avqustun 8-də imzalanan bəyannamədə Azərbaycanın əsas hissəsi ilə Naxçıvan arasında "Tramp marşrutu"nun yaradılması nəzərdə tutulur. Bu yol ABŞ şirkətinin nəzarəti altında olacaq. Tehran isə bu təşəbbüsə qarşı sərt mövqe sərgiləyib.

Rusiyanın Volqoqrad şəhərində “Lukoyl” şirkətinə məxsus neft emalı zavoduna dron hücumu edilib. Sozcu.az xəbər verir ki, bu barədə Rusiya Teleqram kanalları məlumat yayıb. Məlumata görə, zərbələr zamanı zavodun ərazisində partlayış və yanğınlar baş verib, neft məhsullarının əraziyə axması qeydə alınıb. Hazırda zavodun ərazisində yanğınlar davam edir.

Ötən il 19 nəfər cəzaçəkmə müəssisələrindən qaçıb. Sozcu.az xəbər verir ki, bu barədə Dövlət Statistika Komitəsinin nəşr etdiyi "Azərbaycanda hüquqpozmalar" məcmuəsində məlumat yayıb. Bildirilib ki, bu, 2023-cü ilə nisbətən 10 nəfər azdır.

Türkiyə Suriyadakı vəziyyəti yaxından izləyir və YPG gözlənilən nəticəni əldə etməyəcək. Sozcu.az xəbər verir ki, bunu Türkiyə xarici işlər naziri Hakan Fidan Suriya xarici işlər naziri Əsəd Həsən Şeybani ilə görüşü zamanı deyib. “YPG Suriyada oyunu pozur. Bu sistemə inteqrasiya olunmur və müsbət atmosferə zərər verir. YPG zaman qazanmağa çalışır. Onların gözləntiləri baş tutmayacaq və istədikləri nəticələri əldə edə bilməyəcəklər. YPG-nin Suriyadakı hiyləsini görürük. Biz görürük ki, Türkiyədən, İraqdan, İrandan, Avropadan gələn təşkilat üzvləri Suriyanı tərk etməyiblər”, - Fidan bildirib.

Ukrayna müharibənin nizamlanması çərçivəsində 5 tələb irəli sürüb. Sozcu.az xəbər verir ki, bu barədə “Politiko” nəşri məlumat yayıb. Nəşr Ukraynanın tələblərini dərc edib: - Daimi atəşkəs. Ərazi məsələlərinin müzakirəsi yalnız Rusiya atəşkəslə razılaşdıqdan və ona əməl etdikdən sonra mümkündür. - Rusiyanın vurduğu ziyan 500 milyard dollardan 1 trilyon dollara qədərdir. Ukrayna Moskvanın törətdiyi cinayətlərə görə kompensasiya ödəməsində israrlıdır. - Təhlükəsizlik zəmanəti: Ukrayna NATO və AB üzvlüyünü Rusiyanın növbəti hücumunu dayandırmağın yeganə uzunmüddətli yolu kimi görür. - Uşaqların və hərbi əsirlərin qaytarılması. Ruslar 20 min ukraynalı uşağı qaçırıb, minlərlə hərbçi hələ də əsirdir. - Rusiyaya qarşı sanksiyaların saxlanılması.

ABŞ Prezidenti Donald Trampın cümə günü Alyaskada Vladimir Putinlə görüşəcəyini təsdiqləməsindən sonra Ukrayna Prezidenti Vladimir Zelenski Vaşinqtona təsir etmək üçün tərəfdaş ölkələrlə intensiv əlaqələrə başlayıb. Sozcu.az xəbər verir ki, bu barədə “Avronyus” məlumat yayıb. Məlumatda bildirilir ki, Zelenski Kiyevin əsas prinsiplərindən birinin pozulmaması - “Ukraynasız Ukrayna haqqında heç nə ola bilməz” prinsipinin qorunması üçün dəstək axtarır. Vladimir Zelenski də bu gün Berlinə səfəri ərəfəsində qeyd edib ki, bu məqsədlə dünyanın müxtəlif ölkələrindən tərəfdaşlarla otuzdan çox danışıq və məsləhətləşmə aparılıb: “Bu müharibə başa çatmalıdır. Ədalətli sülh naminə Rusiyaya təzyiq göstərilməlidir. Ukraynanın və tərəfdaşlarımızın təcrübəsi Rusiyanın aldatmasının qarşısını almaq üçün istifadə olunmalıdır”.

İran beynəlxalq ictimaiyyətlə nüvə danışıqlarını bərpa etməsə, Fransa, Böyük Britaniya və Almaniya bu ölkəyə yenidən sanksiyalar tətbiq etməyə hazırdır. Sozcu.az xəbər verir ki, bu barədə “Faynənşl Tayms” məlumat yayıb. Məlumata görə, Fransa xarici işlər naziri Jan Noel Barro, Almaniya xarici işlər naziri Yohann Vadeful və Böyük Britaniya xarici işlər naziri Devid Lemmi BMT Baş katibi Antonio Quterreşə məktub ünvanlayıblar: “Biz açıq şəkildə bildirmişik ki, əgər İran 2025-ci ilin avqust ayının sonunadək diplomatik həll yoluna gəlmək istəməsə və ya mümkün uzadılma fürsətindən istifadə etməsə, sanksiyaların avtomatik olaraq bərpa olunması mexanizmi işə salınacaq”.

Heç şübhəsiz Azərbaycan-Ermənistan münasibətlərinin normallaşması eyni zamanda ATƏT-in Minsk qrupunun işinə son qoyub. Sozcu.az xəbər verir ki, bunu Türkiyə Böyük Millət Məclisinin sədri Numan Qurtulmuş Gürcüstan Prezidenti Mixail Kavelaşvili ilə keçirdiyi görüşdə deyib. Onun sözlərinə görə, 33 il ərzində fəaliyyət göstərməyən, prosesi izləyən və yalnız bir neçə tövsiyə ilə çıxış edən ATƏT-in Minsk qrupunun qeyri-funksionallığı indi tam şəkildə sənədləşdirilib və çox güman ki, tarixi hadisələrdən biri olaraq qalacaq.

12:35 Prezident İlham Əliyev Azərbaycan Respublikası Prezidentinin 2018-ci il 31 may tarixli 97 nömrəli Fərmanı ilə təsdiq edilmiş “İcbari Tibbi Sığorta üzrə Dövlət Agentliyinin investisiya əməliyyatlarının aparılması Qaydası”nda dəyişiklik edilməsi haqqında fərman imzalayıb. Sozcu.az fərmanın mətnini təqdim edir: Azərbaycan Respublikası Prezidentinin 2018-ci il 31 may tarixli 97 nömrəli Fərmanı (Azərbaycan Respublikasının Qanunvericilik Toplusu, 2018, № 5, maddə 965 (Cild I) ilə təsdiq edilmiş “İcbari Tibbi Sığorta üzrə Dövlət Agentliyinin investisiya əməliyyatlarının aparılması Qaydası”nda aşağıdakı dəyişikliklər edilsin: 1. 4.2-ci bənddə “3.3.1-ci və 3.3.2-ci yarımbəndləri” sözləri “3.3.2-ci yarımbəndi” sözləri ilə əvəz edilsin. 2. 5.3-cü bənddə “50” rəqəmləri “5” rəqəmi ilə əvəz edilsin. *** Prezident İlham Əliyev “Xüsusi icra məmurları haqqında” Azərbaycan Respublikasının 2025-ci il 14 iyul tarixli 248-VIIQ nömrəli Qanununun tətbiqi və bununla əlaqədar Azərbaycan Respublikası Prezidentinin bəzi fərmanlarında və Sərəncamında dəyişiklik edilməsi barədə fərman imzalayıb. Fərmanda deyilir: 1. Müəyyən edilsin ki: 1.1. “Xüsusi icra məmurları haqqında” Azərbaycan Respublikası Qanununun 5.1.7-ci, 6.7.3-cü, 6.7.8-ci və 6.8-ci maddələrində, 6.11-ci maddəsinin birinci cümləsində, 6.12-ci maddəsində, 8.1-ci maddəsinin dördüncü cümləsində, 8.2-ci maddəsində, 9.1-ci maddəsinin ikinci və üçüncü cümlələrində, 9.2-ci maddəsinin birinci cümləsində, 10.1-ci maddəsinin ikinci cümləsində, 10.2-ci maddəsində, 11.1-ci maddəsinin birinci və ikinci cümlələrində, 11.2-ci maddəsində, 12-ci maddəsinin ikinci cümləsində, 13.1-ci maddəsində, 13.3-cü maddəsinin birinci və üçüncü cümlələrində, 13.4-cü maddəsində, 13.5-ci maddəsinin birinci və ikinci cümlələrində, 14.1-ci maddəsində, 15.1-ci maddəsinin birinci və üçüncü cümlələrində, 15.2-ci maddəsinin dördüncü cümləsində, 15.3-cü maddəsinin birinci və üçüncü cümlələrində, 15.8-ci və 16.2-ci maddələrinin birinci cümlələrində, 16.4-cü, 17.1-ci və 17.2-ci maddələrində, 18.1-ci maddəsinin ikinci cümləsində, 18.2-ci maddəsinin birinci cümləsində, 18.3-cü maddəsinin ikinci cümləsində, 20.1-ci maddəsinin üçüncü və doqquzuncu cümlələrində, 20.2-ci maddəsinin üçüncü cümləsində, 21.1.9-cu və 23.1.11-ci maddələrində, 25.1-ci maddəsinin dördüncü cümləsində, 25.2-ci, 25.8-ci, 26.2-ci və 27-ci maddələrində, 28-ci maddəsinin adında, 28.1-ci maddəsinin birinci cümləsində, 28.2.2-ci, 28.7-ci, 28.10-cu (hər iki halda), 28.11-ci, 31.2.3-cü və 31.2.17-ci maddələrində, 32.1-ci maddəsinin ikinci, dördüncü və beşinci cümlələrində, 32.2-ci maddəsinin birinci cümləsində, 32.6-cı maddəsinin ikinci cümləsində, 33.3-cü və 34.4-cü maddələrinin birinci cümlələrində, 35.4-cü maddəsində, 36.2-ci maddəsinin ikinci cümləsində, 36.3-cü maddəsinin birinci abzasının birinci cümləsində, 36.5-ci maddəsində, 38.1-ci maddəsinin ikinci cümləsində, 38.2–38.4-cü və 38.6-cı maddələrində nəzərdə tutulmuş müvafiq icra hakimiyyəti orqanının səlahiyyətlərini Azərbaycan Respublikasının Prezidenti həyata keçirir; 1.2. həmin Qanunun 8.1-ci maddəsinin dördüncü cümləsində, 10.1-ci maddəsinin ikinci cümləsində, 13.4-cü maddəsində, 15.8-ci maddəsinin birinci cümləsində, 18.3-cü maddəsinin ikinci cümləsində, 25.2-ci, 25.8-ci, 26.2-ci, 28.10-cu (ikinci halda) və 36.5-ci maddələrində “orqan (qurum)” dedikdə Azərbaycan Respublikasının Nazirlər Kabineti nəzərdə tutulur; 1.3. həmin Qanunun 5.1.7-ci, 6.7.3-cü, 6.7.8-ci və 6.8-ci maddələrində, 6.11-ci maddəsinin birinci cümləsində, 6.12-ci və 8.2-ci maddələrində, 9.1-ci maddəsinin ikinci və üçüncü cümlələrində, 9.2-ci maddəsinin birinci cümləsində, 10.2-ci maddəsində, 11.1-ci maddəsinin birinci və ikinci cümlələrində, 11.2-ci maddəsində, 12-ci maddəsinin ikinci cümləsində, 13.1-ci maddəsində, 13.3-cü maddəsinin birinci və üçüncü cümlələrində, 13.5-ci maddəsinin birinci və ikinci cümlələrində, 14.1-ci maddəsində, 15.1-ci maddəsinin birinci və üçüncü cümlələrində, 15.2-ci maddəsinin dördüncü cümləsində, 15.3-cü maddəsinin birinci və üçüncü cümlələrində, 16.2-ci maddəsinin birinci cümləsində, 16.4-cü, 17.1-ci və 17.2-ci maddələrində, 18.1-ci maddəsinin ikinci cümləsində, 18.2-ci maddəsinin birinci cümləsində, 20.1-ci maddəsinin üçüncü və doqquzuncu cümlələrində, 20.2-ci maddəsinin üçüncü cümləsində, 21.1.9-cu və 23.1.11-ci maddələrində, 25.1-ci maddəsinin dördüncü cümləsində, 27-ci maddəsində, 28-ci maddəsinin adında, 28.1-ci maddəsinin birinci cümləsində, 28.2.2-ci, 28.7-ci, 28.10-cu (birinci halda), 28.11-ci, 31.2.3-cü və 31.2.17-ci maddələrində, 32.1-ci maddəsinin ikinci, dördüncü və beşinci cümlələrində, 32.2-ci maddəsinin birinci cümləsində, 32.6-cı maddəsinin ikinci cümləsində, 33.3-cü və 34.4-cü maddələrinin birinci cümlələrində, 35.4-cü maddəsində, 36.2-ci maddəsinin ikinci cümləsində, 36.3-cü maddəsinin birinci abzasının birinci cümləsində, 38.1-ci maddəsinin ikinci cümləsində, 38.2–38.4-cü və 38.6-cı maddələrində “orqan (qurum)” dedikdə Azərbaycan Respublikasının Ədliyyə Nazirliyi nəzərdə tutulur. 2. Azərbaycan Respublikasının Nazirlər Kabineti: 2.1. “Xüsusi icra məmurları haqqında” Azərbaycan Respublikası Qanununun pozulmasına görə məsuliyyət növlərini müəyyən edən qanun layihəsini üç ay müddətində hazırlayıb Azərbaycan Respublikasının Prezidentinə təqdim etsin; 2.2. aşağıdakı normativ hüquqi aktları müəyyən edib Azərbaycan Respublikasının Prezidentinə məlumat versin: 2.2.1. üç ay müddətində: 2.2.1.1. həmin Qanunun 8.1-ci maddəsinin dördüncü cümləsinə və 10.1-ci maddəsinin ikinci cümləsinə uyğun olaraq, xüsusi icra məmuru olmaq istəyən şəxslər üçün müsabiqənin, habelə ilkin icbari hazırlığın və stajın keçirilməsi qaydalarını; 2.2.1.2. həmin Qanunun 25.2-ci, 25.8-ci və 26.2-ci maddələrinə uyğun olaraq, xüsusi icra məmurunun standart haqqının və əlavə icra haqqının hesablanması meyarlarını və hədlərini, habelə standart haqq üzrə avansın məbləğini; 2.2.2. dörd ay müddətində: 2.2.2.1. həmin Qanunun 13.4-cü maddəsinə uyğun olaraq, Xüsusi İcra Məmurları Reyestrinin aparılması qaydalarını; 2.2.2.2. həmin Qanunun 15.8-ci maddəsinin birinci cümləsinə və 18.3-cü maddəsinin ikinci cümləsinə uyğun olaraq, xüsusi icra məmurunun vahid geyim formasının və nişanının, habelə xüsusi icra məmurunun köməkçisinin nişanının təsvirlərini; 2.2.2.3. həmin Qanunun 28.10-cu maddəsinə uyğun olaraq, xüsusi icra məmurlarının fəaliyyətinə Azərbaycan Respublikasının Ədliyyə Nazirliyi tərəfindən nəzarətin həyata keçirilməsi qaydasını; 2.2.2.4. həmin Qanunun 36.5-ci maddəsinə uyğun olaraq, müvəqqəti fəaliyyət göstərən xüsusi icra məmurlarının xidmət haqqının ödənilməsi qaydasını; 2.3. həmin Qanundan irəli gələn digər məsələləri həll etsin. 3. Azərbaycan Respublikasının Ədliyyə Nazirliyi: 3.1. aşağıdakı normativ hüquqi aktları müəyyən edib Azərbaycan Respublikasının Prezidentinə məlumat versin: 3.1.1. üç ay müddətində: 3.1.1.1. “Xüsusi icra məmurları haqqında” Azərbaycan Respublikası Qanununun 8.2-ci maddəsinə uyğun olaraq, xüsusi icra məmuru vəzifəsi üçün müsabiqənin elan edilməsi, müraciətlərin qəbulu və onlara baxılma qaydasını; 3.1.1.2. həmin Qanunun 9.2-ci maddəsinin birinci cümləsinə uyğun olaraq, Xüsusi İcra Məmurlarının Müsabiqə Komissiyasının tərkibini və əsasnaməsini; 3.1.1.3. həmin Qanunun 11.1-ci maddəsinin ikinci cümləsinə uyğun olaraq, xüsusi icra məmuru şəhadətnaməsinin və xüsusi icra məmurunun xidməti vəsiqəsinin formalarını; 3.1.1.4. həmin Qanunun 13.5-ci maddəsinin ikinci cümləsinə uyğun olaraq, xüsusi icra məmurunun şəxsi işinin aparılması qaydasını; 3.1.1.5. həmin Qanunun 15.3-cü maddəsinin birinci cümləsinə uyğun olaraq, xüsusi icra məmurunun şəxsi möhürünün, təsdiq qeydi ştamplarının və blanklarının nümunələrini; 3.1.1.6. həmin Qanunun 20.2-ci maddəsinin üçüncü cümləsinə uyğun olaraq, icra sənədinin icra olunması barədə xüsusi icra məmuruna ünvanlanan ərizənin nümunəsini; 3.1.1.7. həmin Qanunun 32.1-ci maddəsinin ikinci cümləsinə uyğun olaraq, Xüsusi İcra Məmurlarının İntizam Komissiyasının tərkibini və əsasnaməsini; 3.1.2. altı ay müddətində: 3.1.2.1. həmin Qanunun 12-ci maddəsinin ikinci cümləsinə uyğun olaraq, xüsusi icra məmurlarının və onların köməkçilərinin ixtisasının və peşə hazırlığının artırılması məqsədilə təlimin keçirilməsi qaydalarını; 3.1.2.2. həmin Qanunun 15.2-ci maddəsinin dördüncü cümləsinə uyğun olaraq, xüsusi icra məmurunun ofisində iş qaydasını; 3.1.2.3. həmin Qanunun 17.1-ci maddəsinə uyğun olaraq, xüsusi icra məmurunun fəaliyyəti üzrə kargüzarlığın aparılması qaydalarını; 3.1.2.4. həmin Qanunun 20.1-ci maddəsinin doqquzuncu cümləsinə və 38.1-ci maddəsinin ikinci cümləsinə uyğun olaraq, xüsusi icra məmurunun icraata qəbul edə biləcəyi işlərin, o cümlədən onun razılığı ilə icraatına yönəldilə biləcək həmin Qanunun qüvvəyə minməsindən əvvəl verilən icra sənədlərinin sayının yuxarı hədlərini; 3.1.2.5. həmin Qanunun 38.2-ci maddəsinə uyğun olaraq, xüsusi icra sisteminin Azərbaycan Respublikasının inzibati ərazi vahidləri üzrə tətbiq edilmə mərhələlərini; 3.2. həmin Qanundan irəli gələn digər məsələlərin həlli üçün zəruri tədbirlər görsün. 4. “İcra məmurları haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2000-ci il 5 yanvar tarixli 246 nömrəli Fərmanının (Azərbaycan Respublikasının Qanunvericilik Toplusu, 2000, № 1, maddə 25 (Cild I); Azərbaycan Respublikası Prezidentinin 2025-ci il 16 iyul tarixli 445 nömrəli Fərmanı) adında, preambulasında və 2.1-ci bəndində “İcra” sözü “Dövlət icra” sözləri ilə əvəz edilsin. 5. Azərbaycan Respublikası Prezidentinin 2006-cı il 18 aprel tarixli 391 nömrəli Fərmanı (Azərbaycan Respublikasının Qanunvericilik Toplusu, 2006, № 4, maddə 323 (Cild I); 2024, № 1, maddə 31, № 3, maddə 257, № 5 (I kitab), maddələr 516, 518, № 9, maddə 999, № 12 (II kitab), maddə 1378; 2025, № 4 (I kitab), maddə 341; Azərbaycan Respublikası Prezidentinin 2025-ci il 1 iyul tarixli 429 nömrəli Fərmanı) ilə təsdiq edilmiş “Azərbaycan Respublikasının Ədliyyə Nazirliyi haqqında Əsasnamə”də aşağıdakı dəyişikliklər edilsin: 5.1. aşağıdakı məzmunda 8.15-3-cü və 8.15-4-cü bəndlər əlavə edilsin: “8.15-3. xüsusi icra məmuru şəhadətnaməsini verir; 8.15-4. Xüsusi İcra Məmurlarının Reyestrini aparır;”; 5.2. III hissə üzrə: 5.2.1. 9.22-ci bənd aşağıdakı redaksiyada verilsin: “9.22. məhkəmələrin və qanunla icrası icra məmurlarına həvalə edilmiş digər orqanların sənədlərinin dövlət icra məmurları tərəfindən icrasının təmin olunmasını təşkil etmək;”; 5.2.2. 9.23-cü və 9.25-ci (birinci halda) bəndlərə “icra” sözündən əvvəl “dövlət” sözü əlavə edilsin; 5.2.3. aşağıdakı məzmunda 9.33-2-ci və 9.33-3-cü bəndlər əlavə edilsin: “9.33-2. xüsusi icra məmurlarının fəaliyyətinə nəzarət etmək; 9.33-3. Xüsusi İcra Məmurlarının Reyestrini aparmaq və onun daim yenilənməsini təmin etmək;”; 5.3. aşağıdakı məzmunda 10.5-2-ci bənd əlavə edilsin: “10.5-2. xüsusi icra məmurlarına xüsusi icra məmuru şəhadətnaməsi vermək, qanunla müəyyən edilmiş hallarda həmin şəhadətnaməni ləğv edərək xüsusi icra məmurunun fəaliyyətinə xitam vermək;”. 6. “Məhkəmə qərarlarının icrası işinin təkmilləşdirilməsi və “Məhkəmə nəzarətçiləri və məhkəmə icraçıları haqqında”, “Məhkəmə qərarlarının icrası haqqında” Azərbaycan Respublikasının qanunlarına, Azərbaycan Respublikasının Cinayət Məcəlləsinə, İnzibati Xətalar Məcəlləsinə və Cəzaların İcrası Məcəlləsinə dəyişikliklər və əlavələr edilməsi barədə” Azərbaycan Respublikası Qanununun tətbiq edilməsi haqqında” Azərbaycan Respublikası Prezidentinin 2010-cu il 15 iyul tarixli 303 nömrəli Fərmanının (Azərbaycan Respublikasının Qanunvericilik Toplusu, 2010, № 7, maddə 622 (Cild I) 2.4-cü bəndinə birinci halda “icra” sözündən əvvəl “dövlət” sözü əlavə edilsin. 7. Azərbaycan Respublikası Prezidentinin 2012-ci il 6 iyun tarixli 648 nömrəli Fərmanı (Azərbaycan Respublikasının Qanunvericilik Toplusu, 2012, № 6, maddə 542 (Cild I); 2024, № 4, maddə 379, № 5 (I kitab), maddə 529; 2025, № 5, maddə 459) ilə təsdiq edilmiş “Yerli icra hakimiyyətləri haqqında Əsasnamə”nin 3.15.15-ci yarımbəndinə “icra” sözündən əvvəl “dövlət” sözü əlavə edilsin. 8. Azərbaycan Respublikası Prezidentinin 2017-ci il 3 may tarixli 1361 nömrəli Fərmanı (Azərbaycan Respublikasının Qanunvericilik Toplusu, 2017, № 5, maddə 765 (Cild I); 2024, № 4, maddə 381, № 6 (I kitab), maddə 649, № 7, maddələr 812, 814, 815, № 12 (I kitab), maddə 1294, (II kitab), maddə 1367; 2025, № 2, maddə 127, № 3, maddə 232, № 4 (I kitab), maddə 325, № 5, maddə 463, № 6, maddələr 541, 561) ilə təsdiq edilmiş “Rayon (şəhər) məhkəmələrinin və hərbi məhkəmələrin baxdığı inzibati xətalar haqqında işlər üzrə protokol tərtib etmək səlahiyyəti olan vəzifəli şəxslərin Siyahısı”nda aşağıdakı dəyişikliklər edilsin: 8.1. 56-cı hissəyə və 57.1-ci bəndə “icra məmurları” sözlərindən əvvəl “dövlət” sözü əlavə edilsin; 8.2. 58-ci hissəyə “Məcəllənin” sözündən əvvəl “Bu Siyahının 58-3-cü hissəsi nəzərə alınmaqla,” sözləri, “əlaqədar” sözündən sonra “dövlət” sözü əlavə edilsin; 8.3. 58-1-ci hissəyə hər iki halda “icra” sözündən əvvəl “dövlət” sözü əlavə edilsin; 8.4. aşağıdakı məzmunda 58-3-cü hissə əlavə edilsin: “58-3. Məcəllənin 528-ci maddəsində (xüsusi icra məmurlarının icraatında olan məhkəmə və qanunla icrası icra məmurlarına həvalə edilmiş digər orqanların sənədlərinin icrası ilə bağlı) nəzərdə tutulmuş inzibati xətalar haqqında işlər üzrə protokol – xüsusi icra məmuru.”. 9. “Penitensiar sahədə fəaliyyətin təkmilləşdirilməsi, cəza siyasətinin humanistləşdirilməsi və cəmiyyətdən təcridetmə ilə əlaqədar olmayan alternativ cəza və prosessual məcburiyyət tədbirlərinin tətbiqinin genişləndirilməsi barədə” Azərbaycan Respublikası Prezidentinin 2017-ci il 10 fevral tarixli 2668 nömrəli Sərəncamının (Azərbaycan Respublikasının Qanunvericilik Toplusu, 2017, № 2, maddə 245 (Cild I) 16-cı hissəsinə “olaraq” sözündən sonra “dövlət” sözü əlavə edilsin. 10. Bu Fərmanın 1-ci, 4–9-cu hissələri və 3.1.2.5-ci abzası 2026-cı il yanvarın 1-dən qüvvəyə minir.

Qusar rayonunda ana doğuşdan sonra ölüb. Sozcu.az xəbər verir ki, Qusar Rayon Mərkəzi Xəstəxanasının doğum şöbəsinə gətirilən rayonun Piral kənd sakini, 1994-cü il təvəllüdlü Yasəmən Ospatova qeysəriyyə əməliyyatından iki gün sonra ölüb. Yaxınları onun əməliyyatdan sonra komaya düşdüyünü, ötən gün xəstəxanada öldüyünü bildiriblər. Y.Ospatovanın avqustun 11-də dünyaya gətirdiyi körpənin (qız) vəziyyəti yaxşıdır, səhhətində heç bir problem yoxdur. Bu, onun ikinci hamiləliyi olub.

Saatlıda 52 yaşlı qadını elektrik cərəyanı vuraraq öldürüb. Sozcu.az APA-ya istinadən xəbər verir ki, hadisə Saatlının Qaranuru kəndində qeydə alınıb. Kənd sakini 1973-cü il təvəllüdlü Validə Abışovanı soyuducunu elektrik şəbəkəsinə qoşarkən cərəyan vurub. Faktla bağlı araşdırma aparılır.

Ötən gün Laçında qardaşı tərəfindən öldürülən Səfər Quliyev vəzifəli şəxs olub. Sozcu.az Teleqraf-a istinadən xəbər verir ki, 07.12.1967-ci il təvəllüdlü Səfər Əsgər oğlu Quliyev Mədəniyyət işçilərinin Həmkarlar İttifaqının Laçın rayon komitəsinin sədri vəzifəsində çalışırmış. Laçın rayonunun Qozlu kənd inzibati ərazi dairəsinin Fingə kəndində daimi qeydiyyatda olan S.Quliyev müvəqqəti olaraq Ağcabədi rayonunun Şərəfxanlı kəndində məskunlaşıbmış. Mərhum ailəli olub, 2 qızı və 2 oğlu var. Qeyd edək ki, Səfər Laçınlı kimi tanınan müğənni və iş adamı ötən gün qardaşı Ağcabədi rayonunun Taxta Körpü ərazisindəki 552 ailəlik qəsəbədə məskunlaşmış, 1973-cü il təvəllüdlü Xasay Əsgər oğlu Quliyev tərəfindən Laçın rayonunun Fingə kəndi ərazisində aralarında yaranmış mübahisə zəminində ov tüfəngi ilə öldürüb. S.Quliyevin nəşi yaşadığı Ağcabədi rayon Şərəfxanlı kəndinə gətirilib, dəfni üçün hazırlıq işləri görülür. Faktla bağlı araşdırma davam etdirilir.

"Müəllimlərin işə qəbulu (MİQ)  müsabiqəsində hər il mənasız və əsası olmayan müəyyən dəyişikliklər edilir. Amma bu il edilmiş dəyişikliyin birbaşa Emin Əmrullayevin cəmiyyətdə süni narazılıq yaratmaq kimi fəaliyyətində xüsusi bir irəliləyiş etdiyi il oldu".  Bu fikirləri Redaktor.az-a təhsil eksperti Elşən Qafarov müəllimlərin işə qəbulu imtahanlarından sonra səsləndirilən narazılıqlardan danışarkən bildirdi. "Hələ aprel-may aylarından bütün regional təhsil idarələri məktəblərdə olan bütün vakansiyaları Məktəbəqədər və Ümumi Təhsil üzrə Dövlət Agentliyinə təqdim ediblər. İyun ayında bu vakansiyalar bir də dəqiqləşdirilib. Son anda müəllimlərin işə qəbulu müsabiqəsi imtahan bitdikdən sonra müəllimlərin nəticələrin yüksək olduğunu görən Emin Əmrullayev çox absurd bir tapşırıq verib ki, bütün vakansiyalar çıxarılsın". Onun sözlərinə görə, regional təhsil idarələrinə tapşırıq verilib: "Çətinlik olanda siz boynunuza götürün ki, biz vakansiyaaları verməmişik. Halbuki, təkrar edirəm, aprel-may aylarında vakansiyalar Məktəbəqədər və Ümumi Təhsil üzrə Dövlət Agentliyinə təqdim edilib. Elektron qaydada bütün regional təhsil idarələrində, iyun ayında bir də dəqiqləşdirmə aparılıb.  Bilirsiniz, Təhsil İnstitunda direktor Elnur Əliyevdir, Emin Əmrullayevin ən yaxın dostu və iş ortağıdır. Emin Əmrullayevin göstərişi ilə vakansiyalar çıxarılıb. Ölkə üzrə Texnologiyadan elə mənim tanıdığım onlarla məktəbdə vakansiyalar var. Ölkə üzrə cəmi yeddi vakansiya verilib".

Avqustun 14-də gözlənilən hava şəraiti açıqlanıb. Milli Hidrometeorologiya Xidmətindən Sozcu.az -a verilən məlumata görə, sabah Bakıda və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi gözlənilir. Lakin gündüz bəzi şəhərətrafı ərazilərdə qısamüddətli az yağış yağacağı ehtimalı var. Şimal-şərq küləyi əsəcək. Havanın temperaturu gecə 22-25, gündüz 29-33 dərəcə isti olacaq. Atmosfer təzyiqi 763 mm civə sütunu, nisbi rütubət isə gecə 65-75 %, gündüz 40-45 % təşkil edəcək. Azərbaycanın bəzi rayonlarında arabir yağış yağacağı, şimşək çaxacağı gözlənilir. Ayrı-ayrı yerlərdə leysan xarakterli intensiv olacağı, dolu düşəcəyi ehtimalı var. Gecə və səhər bəzi dağlıq ərazilərdə duman olacaq. Şərq küləyi bəzi yerlərdə arabir güclənəcək. Havanın temperaturu gecə 20-24, gündüz 30-35, dağlarda gecə 12-17, gündüz 18-23 dərəcə isti olacaq.

Avqustun 12-də Sankt-Peterburqda MDB-yə üzv dövlətlərin Daxili İşlər Nazirləri Şurasının növbəti iclası keçirilib. Sozcu.az APA-ya istinadən xəbər verir ki, MDB ölkələrinin cinayətkarlıqla birgə mübarizə, habelə hüquq-mühafizə orqanlarının qarşılıqlı fəaliyyəti, qeyri-qanuni miqrasiya problemləri və onların həlli yolları, informasiya-kommunikasiya texnologiyalarından istifadə və digər məsələlərin müzakirə oldunduğu iclasda Azərbaycan Respublikasının daxili işlər naziri iştirak etməyib. Məlumata görə, Azərbaycan DİN şuranın iclasında iştirakdan imtina edib. Rusiya mediasının yaydığı məlumatlara görə, Rusiya Daxili İşlər naziri Vladimir Kolokoltsevin sədrliyi ilə keçirilən iclasda ölkələrin nümayəndə heyətlərinin rəhbərlərinin Böyük Vətən Müharibəsində Böyük Qələbənin 80 illiyinə həsr olunmuş anım tədbirlərində iştirak ediblər.

Avqustun 18-də İran Prezidenti Məsud Pezeşkian Ermənistana səfər edəcək. Sozcu.az xəbər verir ki, bu barədə erməni mediası məlumat yayıb. Məlumata görə, Pezeşkian Ermənistanda avqustun 21-nə kimi qalacaq. Onun İrəvan biznes forumunda iştirakı planlaşdırılır.

Rusiya "Azərbaycana qarşı çoxölçülü zərərvericilik" siyasətinə keçib. Sozcu.az Report-a istinadən xəbər verir ki, bunu "Strategiya XXI" Qlobalistika Mərkəzinin prezidenti Mixail Qonçar Rusiya hərbçilərinin Ukraynada Azərbaycan Dövlət Neft Şirkətinin (SOCAR) obyektlərinə endirdiyi zərbələri şərh edərkən bildirib. Onun fikrincə, Ukraynada SOCAR-ın obyektlərinə edilən hücumlar "acizlikdən doğan qisas" aksiyalarıdır. Qonçarın sözlərinə görə, Azərbaycan Avropa Birliyinin qaz bazarında iştirakını artırır və Moskva buna qarşı heç nə edə bilməyəcək. Bununla yanaşı, o vurğulayıb ki, bu gün Azərbaycan güclü mövqedədir və bunu hiss edir, çünki ölkənin enerji daşıyıcılarına maraq, o cümlədən ABŞ şirkətlərinin marağı yalnız və yalnız artır. "Bu gün onlar özlərini güclü mövqedə hiss edirlər. ABŞ-nin “Exxon Mobil” şirkəti Xəzər dənizində Azərbaycanın hələ işlənməmiş "Qarabağ" qaz yatağına maraq göstərir. Buna görə də düşünürəm ki, Azərbaycan zərbəyə davam gətirəcək", - politoloq vurğulayıb.

"Putinin taktikası peşəkar yalandır, Trampın vəziyyəti hərtərəfli bilməsi vacibdir..." ABŞ prezidenti Donald Tramp və Rusiya lideri Vladimir Putin yaxın günlərdə Alyaskada baş tutacaq sammitə hazırlaşır  Lakin onların əvvəlki şəxsi görüşləri göstərir ki, bu dialoqlar adətən Moskva üçün daha əlverişli nəticələr verir və Vaşinqtonun mövqeyində risklər yaradır. Sozcu.az xəbər verir ki, bu barədə "Financial Times" nəşri yazıb. Nəşr qeyd edir ki, keçmiş görüşlərin izi Tramp və Putinin münasibətləri qeyri-adi, bəzən isə ziddiyyətli məqamlarla yadda qalıb. İlk rəsmi görüş 2017-ci ilin iyulunda Hamburqda G20 sammitində baş tutub. O zaman Tramp danışıqlardan sonra tərcüməçisinin qeydlərini müsadirə edib və axşam  Putinə ABŞ nümayəndələri olmadan ayrıca görüş keçirib.  Bir il sonra Vyetnamda Tramp Putinin ABŞ seçkilərinə müdaxilə etmədiyi barədə bəyanatına açıq şəkildə razılıq verib. 2018-ci ildə Helsinkidə keçirilən sammitdə isə Tramp ABŞ xüsusi xidmətlərinin nəticələrinə şübhə ilə yanaşaraq, "Prezident Putin deyir ki, bu, Rusiya deyil. Mən bunun belə olmasının səbəbini görmürəm" deyib. Alyaska sammiti Trampın Ağ Evə qayıdışından sonra onların ilk şəxsi görüşü olacaq. Analitiklər xəbərdarlıq edir ki, bu danışıqlar daha çox Putinin xeyrinə işləyə bilər. "Rand Corporation"-dan Semyuel Çarap deyir: "Bir həftədən az müddətdə irəliləyişsiz vəziyyətdən müharibəni bitirəcək sammitə keçmək mümkün deyil. Amma Tramp öz cazibəsinə və inandırma bacarığına hədsiz inanır". "Peşəkar yalan" taktikası Fransanın sabiq prezidenti Fransua Olland 2015-ci il Minsk danışıqlarının iştirakçısı kimi Trampa xəbərdarlıq edir: "Putinin taktikası peşəkar yalandır. Trampın vəziyyəti hərtərəfli bilməsi vacibdir". Olland Putinin danışıqlar üslubunu belə təsvir edir: "O, saatlarla davam edən tarixi ekskurslarla başlayır, sonra isə "başqa bir görüş" və ya "vasitəçilik" təklif edərək, saxta irəliləyiş görüntüsü yaradır". Alman diplomatların sözlərinə görə, Putin detalları mükəmməl bilən, amma faktları daim manipulyasiya edən ən peşəkar danışıqlarçılardan biridir. Emosional Tramp Almaniyanın sabiq kansleri Angela Merkel isə xatirələrində yazır ki, Tramp detallı müzakirələrə meylli deyil: "Biz Tramp ilə iki fərqli səviyyədə danışırdıq: o - emosional, mən - faktiki". Sosioloq Kirill Roqov hesab edir ki, Putin Rusiyanın yay hücumlarının uğursuzluğu və neft ixracına təzyiq səbəbindən indi danışıqlara daha çox maraq göstərə bilər. Onun fikrincə, Putin Trampı Rusiyanın mövqeyinin gerçəkdən daha güclü olduğuna inandırmağa çalışacaq, Tramp isə əsasən razılaşmanı şəxsi qələbə kimi təqdim etməyə önəm verəcək. Alyaska sammitinin siyasi fonu Diplomatik dairələrdə Ukrayna prezidenti Vladimir Zelenskinin mövqeyinin yumşalmasından danışılır. Kiyev döyüşlərin dayandırılması qarşılığında Rusiya tərəfindən artıq işğal olunmuş ərazilərin - Luqansk, Donetsk, Zaporojye, Xerson və Krımın faktiki nəzarətinin tanınması variantını nəzərdən keçirməyə hazır ola bilər.

Son günlər qonşu ölkələrdə zəlzələ hadisələrinin sayı artıb. Azərbaycanda da kiçik zəlzələlərin baş verməsi vətəndaşlarda daha güclü sarsıntıların ola biləcəyi barədə suallar doğurur. Mövzu ilə bağlı ekoloq Fikrət Cəfərov Mətrbuat.az-a açıqlama verib. Fikrət Cəfərov bildirib ki, son zamanlar dünyada, o cümlədən qonşu ölkələrdə zəlzələlərin sayında artım müşahidə olunur. Üstəlik, vulkanların aktivləşməsi və güclü günəş partlayışları kimi təbii proseslər də seysmik fəaliyyətlərin artmasına təsir göstərə bilər:  "Alimlərin fikrincə, bu proseslər bir-biri ilə bağlıdır və zəlzələlərin davam edəcəyindən xəbər verir. Azərbaycanda isə seysmik fəallıq 8-9 ballıq zonaya daxildir ki, bu da güclü zəlzələ ehtimalının mövcud olduğunu göstərir. Qeyd etmək lazımdır ki, bir neçə gün əvvəl ölkəmizdə kiçik zəlzələlər də qeydə alınıb. Bu kiçik sarsıntılar isə gərginliyin müəyyən dərəcədə azaldığını göstərir və yaxın gələcəkdə güclü zəlzələlərin olmayacağına ümid yaradır". Ekoloqun sözlərinə görə, ölkədə ümumilikdə, zəlzələ riski mövcuddur, lakin hazırda ciddi təhlükə gözlənilmir. Mütəxəssislər və aidiyyəti qurumlar səylə bu prosesləri izləyir və vətəndaşları mütəmadi olaraq məlumatlandırırlar.

Ukrayna müharibənin 1266-cı günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 065 220 hərbçi, 11 098 ədəd tank, 23 119 ədəd zirehli döyüş maşını, 31 406 ədəd artilleriya sistemi, 1 464 ədəd RYAS (reaktiv yaylım atəş sistemi), 1 205 hava hücumundan müdafiə sistemi, 421 ədəd hərbi təyyarə, 340 ədəd helikopter, 58 219 ədəd avtomobil texnikası, 50 753 ədəd PUA, 3 556 qanadlı raket, 28 gəmi/kater, 1 sualtı qayıq, 3 937 xüsusi avadanlıq itirib.

Sosial şəbəkələrdə bu gündən etibarən bulvar ərazisində müvəqqəti məhdudiyyətlər tətbiq ediləcəyi ilə bağlı məlumatlar yayılıb. Sozcu.az-ın Operativ Media-ya istinadən məlumatına görə, bu barədə ölkədə fəaliyyət göstərən bəzi skuter tətbiqləri vətəndaşlara bildiriş göndərib. Məlumata görə, Formula 1 yarışları başlamazdan bir neçə gün əvvəl bulvar ərazisində müvəqqəti məhdudiyyətlər tətbiq olunur. Bu zaman isə Dənizkənarı Bulvar İdarəsi tərəfindən əhaliyə əvvəlcədən məlumat verilir. 

09:07 Kəlbəcər rayonunda yük avtomobilinin dərədən aşması nəticəsində bir nəfər ölüb. Sozcu.az xəbər verir ki, hadisə rayonun Qılınclı kəndində qeydə alınıb. İlkin məlumata görə, vəfat edən avtomobilin sürücüsü olub. Faktla bağlı araşdırma başlanılıb. *** Kəlbəcərdə yol-nəqliyyat hadisəsi nəticəsində ölən sürücünün kimliyi məlum olub. Məlumata görə, Kəlbəcərdə yük maşınının dərəyə aşması nəticəsində aldığı xəsarətdən ölən sürücü, 1967-ci il təvəllüdlü Söhrab Süleymanovdur. Faktla bağlı araşdırma aparılır.