Bakı Slavyan Universitetinin (BSU) əlavə və qiyabi təhsil şöbəsinin sabiq müdiri Dürdanə Əliyevanın cinayət işi üzrə məhkəmə yekunlaşmaq üzrədir. Sozcu.az APA-ya istinadən xəbər verir ki, Bakı Ağır Cinayətlər Məhkəməsində hakim Əli Məmmədovun sədrliyi ilə keçirilən iclasda dövlət ittihamçısı çıxış edib. Dövlət ittihamçısı təqsirləndirilən Dürdanə Əliyevanın 8 il müddətinə azadlıqdan məhrum edilməsini, eyni zamanda zərərçəkmişlərə dəyən ziyanın ödənilməsini istəyib. Proses sentyabrın 8-də davam etdiriləcək. Qeyd edək ki, Baş Prokuror yanında Korrupsiyaya qarşı Mübarizə Baş İdarəsində Bakı Slavyan Universitetinin əlavə və qiyabi təhsil şöbəsinin müdiri, dosent D.Əliyeva barəsində araşdırma aparılıb. D.Əliyevanın qanunsuz əməlləri törətməsi barədə çoxsaylı şikayətlər araşdırılıb. Onun barəsində Cinayət Məcəlləsinin 178.3.2 (dələduzluq külli miqdarda ziyan vurmaqla törədildikdə), 32.4, 312.2 (rüşvət verməyə təhrik etmə), 311.1 (rüşvət alma) maddələri ilə cinayət işi başlanılıb.

Vay o günə ki, yay ayında könlünə dönər düşə, ya da cibindəki pul dönər almağa çata. Belədirsə, dönərxanaya gedərkən yanınızda sərinkeş, ya da dəsmal aparmağı unutmayın. Çünki əks halda restoranlarda qaynar soba başında dönər hazırlayanların bol “tər”avətli dönərləri iştahınıza bir az duz qatacaq. Bu halla qarşılaşan xeyli sayda vətəndaşın sosial şəbəkələrdəki şikayətlərindən də aydın olur ki, sahibkarlar o öz işçilərini qızmar istidə kondisionersiz dönərxanada istismar edirlər. Yay aylarında çörək pulu qazanmaq üçün bu işə möhtac qalanların əziyyətini heç kim yerə vurmaq istəməz. Müzakirələr zamanı isə bildirilib ki, dönər hazırlayanların əlacları olsa, 1 saat belə isti soba başında, bu cür ağır şərtlərdə işləməzlər, lakin sahibkarlarla yanaşı, restoran əməkdaşları da işlərinə qarşı məsuliyyətli olmalıdırlar. Heç kim başqasının “alın təri”nə qarışmış dönəri yemək istəməz... Şikayətlər sırasında dönər hazırlayanların əlcəkdən istifadə etməmələri də gündəmə gətirilib. Bütün bu müzakirələrin fonunda isə ən çox Azərbaycan Qida Təhlükəsizliyi Agentliyi tənqid olunub. Məsələ ilə bağlı Pravda.az-a fikirlərini bölüşən Azad İstehlakçılar Birliyinin sədri Eyyub Hüseynov da deyib ki, dönərxanalar Azərbaycanda çox ciddi problemlərdən biridir.  Eyyub Hüseynov: “İcra Hakimiyyətinin göstərişi mağaza sahibinin hüququnun  pozulmasıdır” – VİDEO – Yeni Çağ Media “Azərbaycan Qida Təhlükəsizliyi Agentliyində 2 il İctimai Şuranın üzvü oldum. Dəfələrlə bu problemlərin həll edilməsi üçün məsələ qaldırdım, alternativləri də göstərdim. Lakin AQTA-nın rəhbərliyi “hə, hə” dedi, amma heç bir iş görmədi. Bəli, dönərxanalar insan tərinin, milçək yumurtalarının insanlara satıldığı bir yerdir. Burada dönərlərin keyfiyyəti məsələsi, əlbəttə, daim sual altındadır. Çox təəssüf ki, AQTA iş görəndə yalnız radikal, yəni “bağlama” işi görür. Biz biznes qurumlarının bağlanmasının qətiyyən tərəfdarı deyilik. İstehlakçıların seçim hüquqları mövcud olmalıdır. Sadəcə, gərək AQTA onların standartlara uyğunlaşdırılması üçün iş görsün, lazım olanda müəyyən dövlət vəsaitləri cəlb olunsun ki, onlar standartlara uyğun fəaliyyət göstərsinlər”, - sədr deyib. E.Hüseynov bildirib ki, tələbin təklifi üstələdiyi yerlər ənənəvi olmayan at, eşşək ətinin, murdar ətlərin satıldığı yerlərdir: “Dönərxanalar da belə yerlərdir. Dəfələrlə murdar olmuş heyvan ətlərini Bakıya gətirən şəbəkə ifşa olunub. Bu məsələdə ən uğurlu işi Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsi görür. Onlar təkcə cərimə edib buraxmırlar. Həbs də həyata keçirirlər. Lakin Azərbaycan məhkəmələri qısa müddətdə DİN-in həbs etdiyi insanlara bəraət verir, buraxır, onlar da yenidən bu işlə məşğul olurlar. Dönərxanalar konkret standartlara uyğun olmalıdır. Əslində dönərxanalara getsək, görəcəyik ki, çoxlu kağızlar asılıb. Guya bu dönər hansısa müəssisədən alınıb. Lakin heç kim sübut edə bilməz ki, orada hazırlanan dönər kağızı verən müəssisəyə aiddir, yoxsa yox. Bir kağız asırlar, istehlakçı tələb edəndə onu göstərirlər. Bu sahədə ciddi dönüş aparılmalıdır. Düşünürəm ki, insanların qısaömürlü olmasının, apteklərdə, həkimlərdə növbədə durmasının ciddi səbəblərindən biri məhz pis qidalanmağımızdır”. E.Hüseynovun sözlərinə görə, Azərbaycanda zəhərlənmələrin sayı gizlədilir: “Statistika, təxminən, ümumdünya göstəricisi ilə 700 dəfə az göstərilir. Ümumdünya göstəricisinə baxsaq, yer üzündə 1 il içində hər 10 adamdan biri zəhərlənir. Bu hesabla Azərbaycanda 1 ildə 1 milyona qədər zəhərlənmə qeydə alınmalıdır. Lakin biz AQTA-nın saytında baxsaq, görəcəyik ki, ortaya 700 dəfə gizlədilmiş bir rəqəm çıxır. Eləcə də zəhərlənmələrdən ölənlərin sayı. Təsadüfi deyil ki, Azərbaycan vətəndaşları Ümümdünya Səhiyyə Təşkilatının siyahısında uzunömürlülüyə görə 198 ölkə arasında 115-ci yerdədir, Banqladeşdən, Şri-Lankadan və digər 3-cü dünya ölkələrindən çox-çox geridə qalır. Dahi Hipokrat deyib ki, nə yeyiriksə, oyuq. Deməli, ömrümüz ona görə qısadır ki, çox təhlükəli mal yeyirik. Azərbaycan Qida Təhlükəsizliyi Agentliyi əgər öz varlığını sübut etmək istəyirsə, buyursun, Ümumdünya Səhiyyə Təşkilatının siyahısında lupa qoyub Azərbaycanın vəziyyətinə diqqətlə baxsın”.

Xalq artisti Röya Ayxan yeni fotoları ilə diqqət çəkib. Bizim.Media xəbər verir ki, Mərdəkandakı lüks villasında istirahət edən sənətçi hovuz kənarında başında qara şlyapa və əynində sarı rəngli çimərlik geyimində şəkillər çəkdirib. Röya fit və ideal bədən quruluşu eyni zamanda günəşlənmiş dəri rəngi ilə göz oxşayıb. Estrada ulduzu cazibədar fotolarını sosial şəbəkə hesabında izləyiciləri ilə bölüşüb. Qeyd edək ki, hər yay xarici ölkəyə tətilə gedən Röya Ayxan bu mövsüm istirahətini təxirə salıb. Buna səbəb müğənninin sentyabrın 1-2-3-də Konqres Mərkəzdə verəcəyi konsertlə əlaqədardır. Belə ki, Röya iyul ayından başlayaraq musiqili gecəsinin məşqlərinə başlayıb.

Qondarma rejimin “rəhbəri” Araik Arutyunyan və sabiq “dövlət naziri” Ruben Vardanyan arasında münasibətlər gərginləşməkdədir.  Sozcu.az “Hraparak”a istinadla xəbər verir ki, bu barədə R. Vardanyan videomüraciətində bildirib. “Siz ancaq pulun və vəzifənin hər şeyi idarə edə biləcəyinə inanırsınız. Araik, yanılırsınız. Həftənin əvvəlində istefa verəcəyinizi deyirdiniz. Deyirdiniz ki, artıq qərarınızı vermisiniz deyə, sizi istefaya inandırmağa ehtiyac yoxdur.  Başqalarına isə təzyiq altında olduğunuzu və vəzifədən getmək istəmədiyinizi dediniz. Siz hər dəfə fərqli insanlara fərqli şeylər deyirsiniz və bu qəbuledilməzdir. Siz bizim bir yumruqda birləşməyimizi istəmirsiniz. Siz “dövlət qurumları”nı məhv edirsiniz. Son 30 ildə fərqli insanların qurduğu “dövləti” məhv edirsiniz. Sizin bunu etməyə haqqınız yoxdur. Etdiklərinizə görə “Artsax xalqına” cavab verməli olacaqsınız. Mən onların yanında dayanacağam!” 

İstanbul meri Əkrəm İmamoğlu quraqlıq təhlükəsi ilə əlaqədar Türkiyə metropolunun sakinlərini suya qənaət etməyə çağırıb.  Sozcu.az xəbər verir ki, o, bu barədə sosial şəbəkələrdə yazıb:  “Bütün vətəndaşları su sərfiyyatı və qənaətlə bağlı daha diqqətli olmağa çağırıram. İstanbulun su anbarlarında su ehtiyatı normanın 32,38%-nə qədər azalıb ki, bu da son 9 ilin ən aşağı göstəricisidir”. Bələdiyyə sədrinin verdiyi hava proqnozlarına görə, bu həftə İstanbulda orta temperatur 30 dərəcəni keçəcək. Bundan əvvəl şəhər rəhbərliyi yerli su anbarlarında suyun iki aya kifayət edəcəyini açıqlamışdı. 

“Ətin qiymətinin artması gözlənilən idi və durduq yerdə olmadı. Çünki yemin qiymətinin artması son zamanlar ciddi şəkildə baş verdi. Eləcə də  hava şəraiti ilə əlaqəli otlaq sahələrin yanması və təbii otla qidalanmanın problemə çevrilməsi, habelə yemin bahalaşması və ölkədəki inflyasiya sahəsini götürsək, ət istehsalı ilə məşğul olan insanların məhsullarının qiymətini artırması gözlənilən idi. Çünki onlar əti satıb başqa məhsullar alırlar”. Bu sözləri Yenisabah.az-a açıqlamasında iqtisadçı ekspert Natiq Cəfərli deyib. O, Azərbaycanda ətin qiymətinin artmasının səbəblərini izah edib. Xatırladaq ki, hazırda mal ətinin bir kiloqramı 15-16 manata alıcılara təklif olunur. “Əgər rəsmi məlumatlara görə, ölkədə ikirəqəmli inflyasiyasıdırsa, onlar da məcburdurlar ki, satdıqları məhsulların qiymətində müəyyən artıma getsinlər. Burada alıcılıq qabiliyyətini də nəzərə almaq lazımdır. Qiymətlərin sürətlə qalxması baş verərsə, bu, əksinə, ət istehsalçılarına ziyan vura bilər. Çünki alıcılıq qabiliyyəti bunu qarşılamasa, onların satdıqları məhsulların həcmi azalacaq. Həcm azaldıqca da, onlar qiyməti artırsalar da, gəlirləri kəskin düşə bilər”, – o, əlavə edib. N. Cəfərli hesab edir ki, burada “qızıl orta”nı tapmaq və ət istehsalçılarının xərclərini nəzərə almaq lazımdır: “Çünki onların yem xərcləri çox artıb. Həmçinin də əhalinin alıcılıq qabiliyyəti də nəzərə alınmalıdır. Çünki alıcılıq qabiliyyəti inflyasiya ilə paralel belə sürətlə artmır. Ona görə də ət istehsalçıları elə bir nöqtədə qiymətləri tənzimləməyə çalışmalıdırlar ki, həm özlərinə ziyan olmasın, həm də satışı həyata keçirsinlər və insanlar o əti ala bilsinlər” Müsahibimizin fikrincə, əsasən, Yeni il bayramlarına doğru noyabrdan başlayaraq müəyyən artım həmişə olub: “Bizdə bayramlaröncəsi qiymət artımları olub. Çünki tələbatın artması qiymətlərə təsir göstərib. Çox güman ki, Yeni il qabağı qiymət artımını bir çox ərzaq məhsullarında, o cümlədən ətdə görə bilərik. Lakin bunun alıcılıq qabiliyyətini mütləq nəzərə almalıdırlar. Çünki bu, dövlət tərəfindən tənzimlənməməlidir və bunu normalda bazar tənzimləməlidir. Bazarda da insanların alıcılıq qabiliyyətini nəzərə alan iqtisadi baxış olmalıdır”. İqtisadçı söyləyib ki, hər bir insan istehsal etdiyi məhsulu daha baha satmaq istəyir: “Lakin daha baha satmaq o demək deyil ki, onun gəlirləri də artacaq. Burada başqa parametrlər də işin içinə girir. Ona görə də təəssüf edirəm ki, Yeni il qabağı növbəti qiymət artımını görə bilərik. Lakin bu qiymət artımı insanların ala biləcəyi səviyyədə olmalıdır. Əgər bundan çox olsa, bütün ət istehsalçıları ziyan görə bilərlər”.

Bu gün edilən PUA hücumu səbəbindən Moskvadakı “Vnukovo”, “Şeremetyevo”, “Domodedovo” və “Jukovski” hava limanlarının fəaliyyəti dayandırılıb. Sozcu.az xəbər verir ki, bu barədə “Rosaviasiya” məlumat yayıb. Məlumata görə, “Vnukovo”, “Şeremetyevo”, “Domodedovo” hava limanlarında 94 reys təxirə salınıb, 1 reys isə ləğv olunub. Qeyd edək ki, Ukraynada aparılan tammiqyaslı işğalçı müharibədən bəri Moskvanın bütün hava limanları ilk dəfədir eyni vaxtda bağlanır.

Avqustun 21-i saat 10:00-a olan məlumata görə ölkə ərazisində hava şəraiti əsasən yağmursuz keçib, lakin 20-də gündüz Lənkəran-Astara bölgəsinin bəzi yerlərində qısamüddətli yağış yağıb (1 mm-dək). Milli Hidrometeorologiya Xidmətindən verilən məlumata görə, havanın maksimal temperaturu Abşeron yarımadasında 36 dərəcəyədək, Naxçıvan MR-da və aran rayonlarında 37 dərəcəyədək, dağlıq rayonlarda isə 28 dərəcəyədək isti olub. Avqustun 21-23-də əksər rayonlarda hava şəraiti əsasən yağmursuz keçəcək, lakin gündüz bəzi dağlıq ərazilərdə qısamüddətli yağış yağacağı ehtımalı var. Cənub-şərq küləyi üstünlük təşkil edəcək.

Somalinin Rabitə və Texnologiya Nazirliyi yeni qərarları açıqlayıb. Sozcu.az lent.az-a istinadən bildirir ki, nazirliyin təşkilatçılığı ilə keçirilən "Rabitə, İnternet və Sosial Media Təhlükəsizliyi Konfransı"ndan sonra açıqlana qərara əsasən ölkədə "Tiktok", teleqram və "1XBET" qadağan edilib. Qeyd olunub ki, "Tiktok", teleqram və "1XBET" platformaları somalili gənclərin həyatına mənfi təsir göstərir və hətta ölümlərə səbəb olur. Vurğulanıb ki, platformalar insanların həyat tərzinə təsir edir və pis davranışların artmasına səbəb olur.

Qidayla daha çox maqnezium qəbulu ayaqlarda periferik arteriyaların daralmasının (PAD) inkişaf riskini azaldır. Sozcu.az oxu.az-a istinadən bildirir ki, bu barədə Çinin Şandunq Tibb Universitetinin alimləri apardıqları tədqiqatlardan sonra elan ediblər. Araşdırma "PLOS One" jurnalında dərc olunub. Qeyd edilir ki, PAD - ayaqlara qan axınının azalması ilə nəticələnir və özünü soyuq, mavi dəri, həmçinin hərəkətliliyin pozulması, xoralar şəklində göstərir. Alimlər 40 və daha yuxarı yaşda olan 6 000-ə yaxın insanda ayaq biləyi-brakial indeksini (ayaqda qan axınının vəziyyətini qiymətləndirməyə imkan verir) sınaqdan keçiriblər. Nəticədə 409 xəstəyə PAD diaqnozu qoyulub.  İştirakçılardan həmçinin son 24 saat ərzində yedikləri bütün qidaları xatırlamaları istənilib. Qeyd edilir ki, bu element buğda kəpəyi, kakao, qoz-fındıq, dəniz yosunu, avokado, kərəviz və brokolidə daha çox olur. Məlum olub ki, sağlam iştirakçılar gündəlik orta hesabla 288,30 mq, PAD olanlar isə gündəlik orta hesabla 244,89 mq maqnezium qəbul ediblər ki, bu da tövsiyə olunan normadan aşağıdır. Araşdırma zamanı mikroelement qəbulu (xüsusilə maqnezium) və PAD-ın inkişaf riskinin aşağı olması arasında əlaqə müəyyən olunub. Özü də bu siqaret çəkmə statusundan, milliyyətindən və yanaşı xəstəliklərdən asılı olmayıb. Alimlər izah edirlər ki, maqnezium damarların genişlənməsinə və arterial qan axınının artmasına kömək edir. O, həmçinin C-reaktiv zülal, şiş nekrozu faktoru-alfa (TNF-α) və interleykin-6 (IL-6) daxil olmaqla, iltihab faktorlarının səviyyəsini azaldır.  Nəhayət, maqnezium qan damarlarının divarlarında kalsiumun çökməsini azaldır.  Bütün bunlar PAD riskini azaltmağa kömək edir.

Avrokuboklarda 3-cü təsnifat mərhələsinin cavab oyunlarını stadionlardan izləyən azarkeşlərin sayı açıqlanıb. Sozcu.az xəbər verir ki, Avropa Liqasında "Qarabağ"ın səfərdə Finlandiya HİK-inə 2:1 hesabı ilə qalib gəldiyi matçı 7612 nəfər izləyib. Bu nəticə ilə sözügedən oyun siyahıda ikinci olub. Konfrans Liqasında "Neftçi"nin Türkiyədə "Beşiktaş"a 1:2 hesabı ilə uduzduğu matça 21890 nəfər stadiondan baxıb. Matç 3-cü olub. "Sabah"ın Serbiyada "Partizan"a 0:2 (pen: 4:5) hesabı ilə yenildiyi görüş isə 14225 nəfərlə səkkizinci sıradadır. 

Milli-mədəni fəal və sənətçi Məhəmmədrza Amani Nadarlının (Araz) Şərqi Azərbaycan əyalətinin Şəbüstər şəhərində məhkəməsi olub. Kult.az xəbər verir ki, bu barədə sosial media fəalları məlumat paylaşıblar. Məlumata görə, Azərbaycan rəqsi müəlliminə qarşı "İran İslam Respublikasına müxalif olan qrup və təşkilatların xeyrinə təbliğat" ittihamı irəli sürülüb. Qeyd edək ki, "Mişoc Qartalları" mədəniyyət dərnəyinin məsulu olan Məhəmmədrza Amani bundan əvvəl mayın 21-də həbs edilib. Ardınca iyunun 10-da girov qarşılığında müvəqqəti olaraq sərbəst buraxılıb. Onun barəsində son qərarın yaxın günlərdə elan ediləcəyi bildirilib.

Bu gün səhər saatlarında Moskvaya PUA hücumu olub. Sozcu.az xəbər verir ki, bu barədə Rusiya Müdafiə Nazirliyi məlumat yayıb. Məlumata görə, PUA hava hücumundan müdafiə sistemləri tərəfindən vurulub. PUA hücumuyla əlaqədar olaraq hava limanlarına məhdudiyyət qoyulub, uçuşlar digər şəhərlərə yönəldilib. Dağıntı və tələfat yoxdur.

Xəbər verdiyimiz kimi, Ukrayna ordusu avqustun 19-da Novqorod vilayətindəki “Soltsı” hərbi areodromuna zərbələr endirib. Sozcu.az xəbər verir ki, Rusiya Teleqram kanalları PUA-larla edilən hücum zamanı aerodromda olan iki ədəd Tu-22M3 strateji nüvə bombardmançısının məhv edildiyini yazıb. Məlumata görə, təyyarələrdən biri tamamilə məhv edilib, digərinin isə bir hissəsi sıradan çıxıb. Teleqram kanalları məhv edilən Tu-22M3-ün fotosunu da yayıb.

Özbəkistan Prezidenti Şövkət Mirziyayev Azərbaycan Prezidenti İlham Əliyevin dəvəti ilə avqustun 22-23-də ölkəyə dövlət səfəri edəcək. Sozcu.az xəbər verir ki, bu barədə Özbəkistan Prezidentinin saytında məlumat verilib.

Ukrayna müharibənin 544-cü günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 257 930 hərbçi, 4358 ədəd tank, 8449 ədəd zirehli döyüş maşını, 5264 ədəd artilleriya sistemi, 719 ədəd RYAS (reaktiv yaylım atəş sistemi), 489 hava hücumundan müdafiə sistemi, 315 ədəd hərbi təyyarə, 316 ədəd helikopter, 7692 ədəd avtomobil texnikası, 4309 ədəd PUA, 1406 qanadlı raket, 18 gəmi/qayıq, 794 xüsusi avadanlıq itirib.

Gəncə şəhərində ölümlə nəticələnən yol-nəqliyyat hadisəsi olub. Sozcu.az xəbər verir ki, Göygöl rayon sakini, 1998-ci il təvəllüdlü R.Cəfərov idarə etdiyi VAZ-2107 markalı avtomobillə Gəncə şəhərində hərəkətdə olan zaman idarəetməni itirərək avtomobili aşırıb. Nəticədə avtomobildə olan sərnişin, 2002-ci il təvəllüdlü Gəncə şəhər sakini Teymur Bayramov aldığı xəsarətlərdən ölüb. Faktla bağlı araşdırma aparılır.

Qərb Rusiyadakı siyasi rejimin dəyişdirilməsi üçün səy göstərmir. Sozcu.az xəbər verir, verir ki, bunu Almaniya kansleri Olaf Şolts deyib. “Kimin harada oturduğunu biz həll etmirik. Biz həmçinin Rusiyada rejim dəyişikliyi də planlaşdırmırıq. Amma Rusiya prezidenti qorxur ki, bu bizim plandır. Putin Avropa Birliyinin onun qonşusu olması faktı ilə yaşamalı olacaq. Açıq cəmiyyətlər, liberal demokratiyalar birliyi kimi azadlığın da virus olmadığına ümid edəcək”, - kansler bildirib.

Avqustun 21-i saat 06:20-dən 08:20-dək Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələri Azərbaycan Ordusunun Tərtər, Ağdam, Füzuli və Şuşa rayonları istiqamətlərində yerləşən mövqelərinin qarşısında uzunmüddətli fortifikasiya qurğularını quraşdırmağa cəhd göstəriblər. Bu barədə Sozcu.az-a Azərbaycan Müdafiə Nazirliyindən məlumat verilib. "Ordumuzun bölmələri tərəfindən görülən təxirəsalınmaz tədbirlər nəticəsində aparılan işlər dərhal dayandırılıb", - məlumatda deyilir.

Ağcabədidə kişi bıçaqlanıb, qonşusu şübhəli bilinir. Sozcu.az Report-a istinadən xəbər verir ki, hadisə avqustun 20-də Ağcabədi şəhəri, H.Aslanov küçəsində qeydə alınıb. Belə ki, rayon sakini Namiq Kazımovla qonşusu Ramil Hüseynov arasında şəxsi münasibətlər zəminində mübahisə yaranıb. Nəticədə N.Kazımov qonşusunun qarın nahiyəsinə bıçaqla bir zərbə endirib. Faktla bağlı araşdırma aparılır.

Avqustun 20-si saat 23:55-dən avqustun 21-i saat 06:10-dək Ermənistan silahlı qüvvələrinin bölmələri Basarkeçər rayonunun Göysu, Çəmbərək rayonunun Cil, Gorus rayonunun Brun yaşayış məntəqələri istiqamətlərində yerləşən mövqelərindən Azərbaycan Ordusunun Gədəbəy rayonunun Qalakənd və Novoivanovka, Laçın rayonunun Əhmədli yaşayış məntəqələri istiqamətlərində yerləşən mövqelərini atıcı silahlardan fasilələrlə atəşə tutub. Bu barədə Sozcu.az-a Müdafiə Nazirliyindən məlumat verilib. "Bölmələrimiz tərəfindən qeyd olunan bütün istiqamətlərdə cavab tədbirləri görülüb. Bundan başqa, avqustun 21-i saat 06:20-dən 08:20-dək Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələri Azərbaycan Ordusunun Tərtər, Ağdam, Füzuli və Şuşa rayonları istiqamətlərində yerləşən mövqelərinin qarşısında uzunmüddətli fortifikasiya qurğularını quraşdırmağa cəhd göstəriblər. Ordumuzun bölmələri tərəfindən görülən təxirəsalınmaz tədbirlər nəticəsində aparılan işlər dərhal dayandırılıb", - məlumatda qeyd olunub.

Türkiyədə 12 nəfərin ölümü ilə nəticələnən ağır yol qəzası baş verib. Sozcu.az xəbər verir ki, Sivasdan İstanbula doğru hərəkət edən sərnişin avtobusu qarşı yol çıxaraq dərəyə aşıb. Qəza nəticəsində 12 nəfər ölüb, 19 sərnişin yaralanıb. Yaralılar Yozqat və Sorgundakı xəstəxanalara yerləşdiriliblər.

Görkəmli Azərbaycan drijoru Niyazi Tağızadə 1912-ci il avqustun 20-də Tiflis şəhərində anadan olub.  Atası Zülfüqar Hacıbəyov Azərbaycanda musiqili teatrın banilərindən və dahi Azərbaycan bəstəkarı Üzeyir Hacıbəyovun qardaşı idi. Niyazi ilk musiqi təhsilini Y.A.Şefferlinq adına məktəbdə skripka sinifində oxumaqla alıb. Sonradan atası Zülfüqar Hacıbəyov və əmisi Üzeyir Hacıbəyovun tövsiyəsi ilə təhsilini 1925–1926-cı illərdə Moskvada Mixail Fabianoviç Qnessinin bəstəkarlıq sinifində davam etdirir. 1929–1930-cu illərdə isə Leninqrad (indiki Sankt-Peterburq) Mərkəzi Musiqi Texnikumunda bəstəkarlıq sinifində təhsil alır. Ancaq həmin şəhərin havası ona düşmədiyindən və darıxdığından bu təhsil ocağını bitirə bilməyib. Niyazi Z.Hacıbəylinin "Aşıq Qərib", Ü.Hacıbəylinin "Arşın mal alan" və s. əsərlərinin yeni redaksiyalarını hazırlamış, Azərbaycan xalq mahnılarını ("Xumar oldum", "Qaragilə", "Ay bəri bax", "Küçələrə su səpmişəm" və s.) simfonik orkestr üçün işləmiş, 1935-ci ildə "Rast" və "Şur" muğamlarını nota salmışdır. Niyazi 1934-cü ildə "Zaqatala süitası"nı yazmış, 1944-cü ildə ikihissəli "Qəhrəmanlıq" simfoniyası üzərində işini bitirmişdir. Azərbaycan musiqisində ilk simfonik əsərlərin müəlliflərindən olan Niyazi milli simfonizmin təşəkkülü və inkişafında əhəmiyyətli rol oynamışdır. Niyazinin 1942-ci ildə yazdığı "Xosrov və Şirin" operası musiqi dramaturgiyasının çoxplanlı olması, psixoloji gərginliyi, xor səhnələri və opera epizodlarının ifadəliliyi ilə fərqlənir. Onun 1949-cu ildə yazdığı "Rast" simfonik muğamı dramaturji bitkinliyi, güclü emosional təsiri, zəngin melodikası, xüsusilə harmonik dilinin əlvanlığı və ifadəliliyi ilə fərqlənir. "Rast" müəllifin idarəsi ilə bir çox xarici ölkələrdə səslənmiş, Çexiyada "Suprafon", ABŞ-də "Rikordi" musiqi şirkətləri tərəfindən qrammofon valına yazılmışdır. 1951–1952-ci illərdə Azərbaycan Dövlət Akademik Opera və Balet Teatrının dirijoru işləmiş Niyazi 1951 və 1952-ci illərdə SSRİ Dövlət mükafatına layiq görülmüşdür. Azərbaycan milli dirijorluq məktəbinin formalaşması Niyazinin adı ilə bağlıdır. Onun yozumunda milli bəstəkarların bir çox əsərləri, o cümlədən Ü.Hacıbəylinin "Koroğlu" operası dünya musiqisinin qızıl fonduna daxil olmuşdur. Niyazi M.Maqomayevin "Nərgiz", Q.Qarayev və C.Hacıyevin "Vətən", F.Əmirovun "Sevil", P.Çaykovskinin "Qaratoxmaq qadın", A.Borodinin "Knyaz İqor", J.Bizenin "Karmen", C.Puççininin "Bohema", B.Smetananın "Satılmış gəlin" operalarını, S.Hacıbəyovun "Gülşən", Q.Qarayevin "7 gözəl", "İldırımlı yollarla" baletlərini tamaşaya hazırlamışdır. 1959-cu ildə SSRİ xalq artisti adına layiq görülən Niyazi 1961-ci ildə S.M.Kirov adına Leninqrad Opera və Balet Teatrının baş dirijoru təyin olunmuşdur. SSRİ-nin ən məşhur teatrlarından birinə rəhbərlik etmək o dövrdə onun bir musiqiçi kimi böyük nüfuzundan xəbər verirdi. O burada A.Məlikovun "Məhəbbət əfsanəsi" baletinin ilk tamaşasını hazırlamışdır. Həmçinin P.Çaykovskinin "Yatmış gözəl" və S.Prokofyevin "Daş çiçək" baletlərinin yeni quruluşuna dirijorluq etmiş, həmin baletlərlə Parisin "Qrand-Opera", Londonun "Kovent-Qarden" teatrlarında qastrol tamaşaları vermiş və böyük uğur qazanmışdır. Müqavilə əsasında xarici ölkələrdə işləmək təklifi alan dirijor ona bir azərbaycanlı kimi doğma olan Türkiyəni seçmişdir. Niyazi P.Çaykovskinin "Yevgeni Onegin" və "Qaratoxmaq qadın", C.Verdinin "Aida" operalarına Ankara Opera və Balet Teatrında, türk bəstəkarı Ə.Sayqunun "Koroğlu" operasına İstanbulOpera Teatrında ilk quruluş vermiş, onun ilk tamaşasına və "Yunus İmrə" oratoriyasına dirijorluq etmişdir. İfaçılıq sənəti tanınmış sənətkarlar D.Şostakoviç. Ş.Q.Şarayev, K.Sekki, B.Tarcan, V.Dobiaş və b. tərəfindən yüksək qiymətləndirilən Niyazi Azərbaycana qayıdaraq Dövlət Akademik Opera və Balet Teatrının bədii rəhbəri və baş dirijoru təyin edilmişdir. Niyazinin "Konsert valsı" və s. simfonik əsərləri, fortepiano ilə orkestr üçün konserti klassik musiqi əsərləri hesab olunur. O, "Təbrizim", "Dağlar qızı", "Vətən haqqında mahnı", "Arzu" mahnılarının müəllifidir. Niyazi Ə. Haqverdiyevin "Dağılan tifaq", C.Cabbarlının "Almaz", S.Vurğunun "Vaqif, A. Korneyçukun "Polad qartal" dram tamaşalarına, həmçinin "Almaz", "Kəndlilər", "Fətəli xan" və s. kinofilmlərə yazılmış musiqilərin müəllifidir. Azərbaycan dirijorluq məktəbinin formalaşması və inkişafı onun adı ilə bağlıdır. Niyazi Azərbaycan dirijorluq məktəbinin banisidir. Q.Ropov, P.Ryazanov, L.Rudolfun bəstəkarlıq məşğələlərində iştirak edən Niyazi dirijorluq fəaliyyətinə 1934–35-ci illərdə başlayır. 1935-ci ildə ilk dəfə olaraq Azərbaycan xalq musiqisinin klassik nümunələrini — "Rast" və "Şur"u nota köçürür. 1937-ci ildə Mirzə Fətəli Axundzadə adına Opera və Balet teatrında dirijorluq vəzifəsinə dəvət olunur. 1938-ci ildə Moskva şəhərində keçirilən Azərbaycan incəsənəti ongünlüyündə Müslüm Maqomayev (bəstəkar)in "Nərgiz" operasına dirijorluq edir. Üzeyir Hacıbəyovun "Koroğlu", Qara Qarayevin və Cövdət Hacıyevin "Vətən", Fikrət Əmirovun "Sevil" operalarının, Arif Məlikovun "Məhəbbət əfsanəsi" baletinin dirijorluğunu da Niyazi etmişdir. 1946-cı ildə gənc dirijorların baxış müsabiqəsinin laureatı adını qazanır. 1949-cu ildə ən məşhur əsərini — "Rast" simfonik muğamını yazır. Böyük sənətkar müxtəlif vaxtlarda Azərbaycan SSR-in xalq artisti, SSRİ xalq artisti adlarına, Ü.Hacıbəyov adına Azərbaycan dövlət mükafatına, SSRİ dövlət mükafatına, "Çitra" baletinə görə Cəvahirləl Nehru adına beynəlxalq mükafata layiq görülmüşdür. Azərbaycan Dövlət Simfonik Orkestrinin bədii rəhbəri və dirijoru və Azərbaycan Dövlət Filarmoniyasının direktoru olmuşdur.  2 avqust 1984-cü ildə Bakı şəhərində vəfat etmişdir.  Məzarı Bakıda Fəxri Xiyabandadır.  Sözcü.az

Oğuz rayonunun Bayan kəndində 18 yaşlı qız vəfat edib. Sozcu.az Report-a istinadla xəbər verir ki, 2005-ci il təvəllüdlü Aydan Vidadi qızı Umarova yaşadığı evdə özünü pis hiss edib. O, Təcili Tibbi Yardım avtomobili ilə Şəki Rayon Mərkəzi Xəstəxanasına aparılarkən yolda keçinib. Qeyd edək ki, Aydan Umarova Bakı Mühəndislik Universitetinin birinci kurs tələbəsi olub.