“2020-ci ilin noyabr və dekabr aylarında Rusiya prezidenti Qarabağın Azərbaycanın tərkib hissəsi olduğunu bəyan edib”. Sozcu.az xəbər verir ki, bunu Ermənistanın Baş naziri Nikol Paşinyan ölkənin İctimai Televiziyasına müsahibəsində deyib. N.Paşinyan Putinin iddialarına cavab olaraq Moskva rəsmilərinin müharibədən sonra hər regiona səfərində sərhəddə gərginlik yaşandığını bildirib: “Vladimir Putinin Qarabağdan Rusiyanın deyil, Ermənistanın imtina etdiyinə dair bəyanatı 9 noyabr sənədi ilə ziddiyyət təşkil edir. Bizim Kollektiv Təhlükəsizlik Müqaviləsi Təşkilatı (KTMT) ilə ayrı, Rusiya ilə ayrı hüquqi bazamız var. 2021-ci ildə sərhəddə gərginlik yaşananda hər ikisinə müraciət etdik, lakin cavab almadıq. O zaman mən istefa verdim, parlament buraxıldı, seçki tarixi müəyyənləşdirildi. Həmin günlərdə Rusiyanın xarici işlər naziri Ermənistana səfər etdi, buradan Bakıya keçdi, daha sonra Moskvaya qayıtdı. Bir neçə gün sonra isə Zod istiqamətində gərginlik yaşandı. Çalışılırdı ki, İrəvan hakimiyyəti qarşıdurmaya fərqli reaksiya versin və təyin edilən seçkilər ləğv olunsun. Lakin bu istəkləri baş tutmadı. Onlar Ermənistan Respublikasının ləğvini istəyirdilər. Həmçinin daha sonra Qarabağda həyata keçirilən hərbi əməliyyatlara da rus sülhməramlıları reaksiya vermədi”. Nikol Paşinyan sonra bildirib: “2022-ci ilin oktyabrında biz Alma-Ata Bəyannaməsinə (1991-ci ildə qəbul edilib-red.) uyğun olaraq Azərbaycanla sülhə hazır olduğumuzu bildirdik. Bu, Ermənistan Respublikasının ərazi bütövlüyünü bir daha təsdiq etməyin yeganə yolu idi. KTMT deyirdi, müşahidəçilər gəlsin, biz qəbul edirdik, sonra rədd cavabı verilirdi. Ermənistan bu təşkilatın üzvüdür. Bizim ərazi bütövlüyümüz KTMT və Rusiya üçün qırmızı xətdir. Deyirik ki, bu xətt pozulub, deyirlər, yox, pozulmayıb. Bu kağız, bu qələm, çəkin o xətti,  görək haradan keçir. Cavab veririk ki, bizim fikrimizlə razı deyilsinizsə, siz çəkin, biz də haradan keçdiyini anlayaq. Deyirlər, yox, biz edə bilmərik. Bu o deməkdir ki, Ermənistanda onların heç bir qırmızı xətti yoxdur”.

Evin həbsxanasında saxlanılan güneyli siyasi məhbus və Nobel mükafatı laureatı Nərgiz Məhəmmədi bu gün keçirilməsi planlaşdırılan məhkəməyə getməkdən imtina edib. Sozcu.az xəbər verir ki, bu barədə onun adına olan sosial media kanalı məlumat yayıb. "İnqilab Məhkəməsi ölkənin gənclərinin qətliamı barədə qərarlar çıxardığı, məhkəmə hakimləri isə təhlükəsizlik mərkəzlərinin və hakimiyyətin sifarişlərini yerinə yetirdikləri üçün etibarsızdırlar", - məlumatda qeyd olunub. Qeyd edək ki, bu, hüquq müdafiəçisinin həbsxanadakı fəaliyyətləri ilə əlaqədar ona qarşı əlavə cinayət işlərinə görə keçirilən üçüncü məhkəmədir. Güney Azərbaycanın Zəncan şəhərində doğulan Nərgiz Məhəmmədi hazırda Tehranın Evin həbsxanasında saxlanılır. O, 10 il 8 ay həbs, 154 şallaq cəzasına məhkum edilib.

Sistan və Bəlucistan əyalətinin Zahidan şəhəri yaxınlığında SEPAH-ın hərbi avtomobili yol kənarında quraşdırılan mina ilə partladılıb. Sozcu.az xəbər verir ki, bu barədə Bəluc Fəallarının Kampaniyası məlumat yayıb. Bildirilib ki, partlayış nəticəsində bir SEPAH üzvü həlak olub, biri isə yaralanıb. Hücumun məsuliyyətini bəlucların “Ənsar ül-Fürqan” silahlı qruplaşması öz üzərinə götürüb.

Şirvanda 10 yaşlı məktəblinin avtomobil vuraraq ağır yaralayıb. Sozcu.az APA-ya istinadən xəbər verir ki, Şirvan sakini, 2013-cü il təvəllüdlü məktəbli məktəbdən çıxıb yolu keçərkən avtomobil vurub. Azyaşlı ağır xəsarətlərlə Şirvan xəstəxanasına yerləşdirilib. Faktla bağlı araşdırma aparılır.

Paşinyan Qarabağ separatçılarını Ermənistan dövlətçiliyinin altına qoyulmuş dinamit  hesab edir...” “İlin sonunda tamamilə ortadan qaldırılması nəzərdə tutulan qondarma qurumun “prezident aparatı”, “parlamenti”, “höküməti” və başqa qurumları artıq olmayacaq. Demək,  bu səhifə bağlanacaq. Amma onların yeni bir “oyunla” qarşımıza çıxacağı istisna edilmir” Ermənişünas alim Qafar Çaxmaqlı moderator.az-a açıqlamasında  3 ay öncə Qarabağda gorbagor(!) edilmiş separatçı-terrorçu rejimin İrəvana sığına bilmiş tör-töküntülərinin  hazırkı fəaliyyəti haqda danışarkən belə deyib. Şərhçinin fikirlərindən belə çıxır ki, hansısa beynəlxalq güclər separatçı-terrorçu rejimin Ermənistanda öz fəaliyətini davam etdirməsində maraqlıdır. “2024-cü il yanvarın 1-ə az qalıb. İndi Ermənistanda  Dağlıq Qarabağın separatçı qurumunun sonuncu rəhbəri Samvel Şahramanyanın sentyabrın 28-də separatçı qurumun bütün institutlarının ləğvi ilə bağlı imzaladığı sənəd daha çox müzakirə edilir.  İddia edənlər var ki, Şahramanyan bu sənədi basqı və təzyiq altında imzalayıb, Azərbaycan qarşısında müəyyən “öhdəliyi” olub və ona görə də azadlıqdadır, o biri “liderlər” kimi Bakı həbsxanalarında deyil. Şahramanyan deyilən bu şəxsin imzaladığı sənədlə bağlı  o fikir də səsləndirilir ki, İrəvana gələndən sonra o həmin sənəddən imtina edib, belə bir imza atmadığını deyib  və hətta Qarabağ erməniləri ilə görüşlərinin birində  Qarabağda olan separatçı institutların fəaliyyətini davam etdirdiyini bildirib. Və Azərbaycanın bu bölgəsi ilə bağlı Ermənistanda fəaliyyət göstərən 150  ictimai, siyasi, qeyri- hökümət və digər  təşkilatlarının dekabrın 9-da keçirilən toplantısında Qarabağa geri dönüşün təşkili haqda bəyanatın altına imza atıb”.  Həmin görüşdə qəbul olunan bəyanatda deyilir ki, Qarabağın səhifəsi hələ bağlanmayıb və Ermənistana gələn əhalinin beynəlxalq  haqları qalmaqdadır və onların geri dönüşü üçün təhlükəsizlik mexanizmləri yaradılmalıdır və onlar beynəlxalq güvənlik alaraq yenidən Qarabağa qayıtmalıdırlar”- deyə şərhçi bildirib.  “Ermənilərin guya  Azərbaycanın əhalini zorla  köç etdirməsi barədə fikirlərinin yalan olduğu hər an ortaya çıxır. Hamı bilir ki, onlara heç bir təzyiq edilməmişdir və özləri könüllü şəkildə Ermənistanın yolunu tutmuşlar.  Azərbaycan buna manemi olmalıydı?     Separatçı təşkilatların yarıgizli-yarıaçıq 9 dekabr görüşündən sonra  Ermənistan hakimiyyətin münasibətini  təhlil etsək, bu nəticəyə gələ bilərik ki,   Paşinyan və onun komandası Qarabağ separatçılarının  bu şəkildə  Ermənistanda fəaliyyətini məqbul hesab etmir və bunu Ermənistanın gələcəyinə təhlükə sayır, Ermənistan dövlətçiliyinin altına qoyulmuş iç dinamit  hesab edir”-  Qafar Çaxmaqlı açıqlamasının davamında belə deyib.    Azərbaycan rəhbərinin dəfələrlə vurğuladığı Ermənistanda revanşizmin qalması anlamında  bu, müəyyən əsaslar yaradır və  təşkilatların bir araya gəlib bəyanatlar verməsi Ermənistan – Azərbaycan sülh danışıqlarına mane olur. Paşinyan da əlavə başağrısı istəmir.  Bəziləri Qarabağ separatçılarının təşkilatlarının Ermənistandan çıxarılması və hansısa neytral ölkədə fəaliyyət göstərməsini təklif edirlər. Bütün bunlar göstərir ki, Qarabağ ermənilərinin bu şəkildə Ermənistanda qalması gələcəkdə ciddi və gərgin siyasi situasiya yarada bilər. İlin sonunda tamamilə ortadan qaldırılması nəzərdə tutulan qondarma qurumun “prezident aparatı”, “parlamenti”, “höküməti” və başqa qurumları artıq olmayacaq. Demək,  bu səhifə bağlanacaq. Amma onların yeni bir “oyunla” qarşımıza çıxacağı istisna edilmir”- deyə ermənişünas alim diqqətə çatdırıb.

“Mən ev və maşınların telekanallarda kimlərə hədiyyə olunduğunu bilmirəm, amma, qoy, olunsun. Çünki elə sənətkarlarımız var ki, onlar sözün əsl mənasında, sənətkardır. Ehtiyacı olanlar ev də vermək olar”. Bu sözləri Yenisabah.az-a açıqlamasında hərbi jurnalist Rey Kərimoğlu deyib. O, şou-biznes nümayəndələrinin bəzilərinə canlı efir zamanı maşın və mənzil hədiyyə edilməsinə münasibət bildirib. Sosial şəbəkələrdə istifadəçiləri bu kampaniyanın ehtiyacı olan insanlar, daha dəqiq desək, şəhid və qazi ailələri üçün tətbiq edilməli olduğunu bildirirlər. R. Kərimoğlu da eyni fikri bölüşüb: “Əslində, bunlar insanların səviyyə və əxlaq məsələsi ilə bağlıdır. Bəlkə də elə bir şey yoxdur və sadəcə müğənnilər şou yaradırlar. Lakin mən kifayət qədər iş adamı tanıyıram ki, istər birinci Qarabağ, istərsə də İkinci Qarabağ müharibəsinin şəhid və qazi ailələrinə maddi-mənəvi dəstəklərini göstərib. Elə iş adamları var ki, bu qəbildən olan şəxslərə, hətta 10-15 ev də verib”. Onun sözlərinə görə, belə hallar olub, sadəcə olaraq, həmin şəxslər bunu mətbuata təqdim etmək istəməyiblər: “Amma bəzi xəbərlər bu haqda mətbuatda gedib. İndiyə qədər dövlət haradasa 14.500 şəhid ailəsi, müharibə əlili və onlara bərabər tutulan şəxslərə pulsuz ev verib. Lakin onların sayı daha çoxdur, növbədə olanlar var. Eləsi də var ki, hazırda mənzil növbəsinə dura bilmir. Doğrudur, Sosial Müdafiə Nazirliyi ehtiyacı olanlara dəstək olur, amma, məncə, bu, yenə də azdır. Arzu edərdim ki, şou-biznes adamlarına ev verənlər o evlərdən birini də şəhid və qazi ailəsinə versinlər. Nəinki şəhid ailəsi, Qarabağ əlili və qazilər, elə vətəndaşlarımız da var ki, onlar bir tikə çörəyə möhtacdır, evi yoxdur, amma onlara verilmir deyə, ala bilmirlər. Fəxrlə danışdığımız Qarabağ müharibəsinin qəhrəman oğlanlarıdır onlar. Onların dəstəyə ciddi ehtiyacı var. Tövsiyə edərdik ki, bu tədbirləri şou-biznes əhlindən çox şəhid ailələrə, qazilərə və veteranlara yönəltsinlər. O cümlədən də sənətdə tər-tökmüş, əziyyət çəkmiş və can qoymuş sənətçilərimizə də dəstək olsunlar”.

Müsavat başqanı Arif Hacılının həbsdə olan oğlu azadlığa buraxılıb. Bu barədə Arif Hacılı özü sosial şəbəkədə məlumat verib. O bildirib ki, oğlu Orxan Hacılı bu gün azadlığa çıxıb.

Türkiyənin vitse-prezidenti Cevdet Yılmaz dekabrın 19-20-də Azərbaycanda səfərdə olacaq. Bu barədə Sozcu.az-a Türkiyənin Azərbaycandakı səfirliyindən məlumat verilib. C.Yılmazın səfər çərçivəsində bir sıra görüşlər keçirməsi gözlənilir.

COP29-un Azərbaycanda keçirilməsi əlamətdar hadisədir və çox böyük əhəmiyyət kəsb edir. Sozcu.az xəbər verir ki, bunu “Report”a müsahibəsində BMT Baş katibinin sözçüsü Stefan Dujarrik deyib. Onun sözlərinə görə, bunun BMT üçün də çox böyük əhəmiyyəti var. “Biz ötən həftələrdə Azərbaycanın Ermənistanla razılaşma əldə etməsini, əsirlərin mübadiləsinin şahidi olduq ki, bu da müəyyən mənada münasibətlərin normallaşması və gərginliyin azalmasına gətirib çıxardı və eyni zamanda Azərbaycanın səriştəli və aydın bir ölkə kimi COP29-a ev sahibliyi etmək üçün rəsmi namizəd olmasına imkan verdi”, - o deyib. Onun sözlərinə görə, Ermənistanın COP29-un ev sahibliyinə namizədlikdə Azərbaycanı dəstəkləməsi gərginliyin azalmasının əlamətidir. “İqlim dəyişikliyi hamımızın üzləşdiyi əsas qlobal problemdir. Qafqaz və Mərkəzi Asiya ölkələri də iqlim dəyişikliyindən əziyyət çəkib və əziyyət çəkməkdə davam edir. Ona görə də biz Azərbaycanın COP29-a sədrliyini çox səbirsizliklə gözləyirik. İqlim dəyişikliyi ilə mübarizə Baş katibin həqiqətən ürəkdən davam etdirdiyi mübarizədir və düşünürəm ki, heç bir dünya lideri bu məsələdə onun qədər daha açıq və tutarlı olmayıb. Baş katib bu mübarizəni davam etdirəcək və o növbəti dəfə Azərbaycan Prezidenti ilə əməkdaşlığı səbirsizliklə gözləyir. Bəli, heç şübhəsiz ki, Baş katib COP29-da Azərbaycanda olacaq və ümid edirəm ki, mən də onunla gedəcəm və Azərbaycanı görəcəm (gülür). Mən bunu səbirsizliklə gözləyirəm.

Dekabrın 7-də Azərbaycan və Ermənistan arasında qarşılıqlı etimad tədbiri kimi saxlanılan hərbçilərin azad edilməsi barədə razılıq əldə olundu. Dekabrın 13-də isə Azərbaycan-Ermənistan sərhədinin Qazax rayonu istiqamətində hərbi qulluqçuların qarşılıqlı şəkildə dəyişdirilməsi prosesi həyata keçirildi. Nəticədə Azərbaycan Ordusunun Ermənistanda saxlanılan hərbi qulluqçuları - Hüseyn Axundov və Aqşin Bəbirov ölkəmizə təhvil veridli. Xatırladaq ki, bu ilin aprel ayında Naxçıvan Muxtar Respublikasının Şahbuz rayonunun Ermənistanla sərhədboyu ərazisində əlverişsiz hava şəraitində məhdud görmə səbəbindən Azərbaycan Ordusunun itkin düşmüş əsgərləri - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu Ermənistan tərəfindən əsir götürülmüşdü. Məlum məsələdir ki, hərbçilərimiz əsirlikdə olanda müxtəlif işgəncələr görüb. Bəs indi onların sağlıq durumu necədir? Modern.az saytı bununla əlaqədar hərbçilərimizin valideynləri ilə əlaqə saxlayıb. Hüseyn Axundovun anası Şəlalə Axundova oğlunun sağlıq durumunun yaxşı olduğunu bildirib: "Maşallah hələ ki Hüseynin sağlamlıq vəziyyəti normaldır. Hökumət özü onun müayinə və müalicəsilə maraqlanır. Müayinələr davam edir. Proses tam yekunlaşdıqdan sonra dəqiq nəsə demək mümükün olacaq".  Aqşin Bəbirovun anası Dürdanə Bəbirova isə oğlunun psixoloji durumunun normal olmadığını söyləyib: "Oğlumu dövlət qurumları müalicə edəcək. Göndəriblər ki, get, kompüter tomoqrafiyası çəkdir, sənədini gətir. Aqşinin qabırğaları, ayaqları ağrıyır. Ümumiyyətlə, harasına əl vurursa, ağrıyır. KT-dən sonra dəqiq durumunun nə olduğu bilinəcək. Amma halı normal deyil. Sağlamlığı sıfırdır".

Dekabr ayının 19-da Dövlət Sərhəd Xidmətinin Sərhəd Qoşunlarının “Qubadlı” Əlahiddə Sərhəd Diviziyasının müddətli həqiqi hərbi xidmət hərbi qulluqçusu əsgər Xəyal Əzim oğlu Həsrətovun səhhəti qəfil pisləşib. Sozcu.az xəbər verir ki, bu barədə DSX-nin mətbuat xidməti məlumat yayıb. Hərbi qulluqçuya ilkin tibbi yardım göstərilərək dərhal xəstəxanaya təxliyyə edilməsinə baxmayaraq, onun həyatını xilas etmək mümkün olmayıb. Hazırda əsgər Xəyal Həsrətovun ölüm səbəbinin müəyyən edilməsi üzrə müvafiq tibbi ekspertizalar təyin edilib.

Bu gündən "Bolt" taksi şirkəti gediş haqqını 10 faiz bahalaşdırıb. Bu barədə "Bolt"taksi şirkətinin sürücüləri məlumat veriblər. Bildiriblər ki, iki gündür şirkətdən onlara gediş haqqında 10 faiz artımın olacağı barədə bildiriş xarakterli sms gəlib. Bu gündən isə qiymət artımı tətbiq edilib. "Bolt" taksi şirkətinin Zülfiqar adlı sürücüsü bildirib ki, gedişhaqqında bahalaşma yaxın məsafələrə tətbiq edilib. Sürücülərə isə uzaq məsafəyə gediş haqqının artırılması daha sərfəlidir. "Bolt" Azərbaycan şirkəti taksilərdə 10 faiz qiymət artımının olduğunu təsdiqləyib. Şirkətdən bildirlib ki, hal-hazırda 10 faiz qiymət artımı olub. Bu artım bütün sifarişlərə aiddir. Məlumat üçün bildirək ki, hazırda "Bolt" taksidə minimal gediş haqqı 2,50 AZN-dir. (Sputnik)

“Tofiq Yaqublunun həbsi və saxlanması bizi çox narahat edir”. Sozcu.az xəbər verir ki, bu barədə ABŞ-nin Azərbaycandakı səfirliyi sosial şəbəkə hesabında yazıb. “Biz Tofiq Yaqublunu və fundamental azadlıqlardan istifadə etdiklərinə görə həbsdə olanların hamısını azad etməyə çağırırıq”, - məlumatda deyilir. Qeyd edək ki, dekabrın 14-də Müsavat Partiyasının üzvü Tofiq Yaqublunun evində axtarış aparılıb və o saxlanılıb. Dekabrın 15-də isə Nərimanov Rayon Məhkəməsi T.Yaqublu barəsində 4 aylıq həbs qətimkan tədbiri seçib. Vəkili Aqil Layıc T. Yaqubluya qarşı dələduzluq və saxta sənəd hazırlanması ilə bağlı ittihamların irəli sürüldüyünü bildirib. 

Sosial şəbəkələrdə Bakıda daşınmaz əmlak ticarəti ilə məşğul olanların reklam etdikləri fərdi yaşayış evlərinin çoxunu məhz belə adlandırmaq olar. Ekspertlər deyirlər ki, daha çox makler evləri kimi tanınan bu evlərin sənədləşdirilməsi mümkün olmayacaq, çünki belə evlər ərazinin tikinti sıxlığı əmsalı qaydalarına zidd inşa edilir. Bir çox hallarda vətəndaşlar da çox kiçik sahədə evləri inşa edirlər. Sozcu.az xəbər verir ki, bu barədə ATV-yə danışan daşınmaz əmlak üzrə ekspert Nüsrət İbrahimovun sözlərinə görə, vətəndaşlar kiçik torpaq sahəsi alıb, onun üzərində fərdi yaşayış evləri inşa edirlər və sonra onun sənədləşmə prosesində problem yaşanır. O problemlər onunla bağlı olur ki, qonşu evlərlə məsafə saxlanılmır və həyətyanı sahəsi olmur. Ekspert deyir ki, tikinti obyektlərinin sahəsinin və həcminin hesablanması qaydaları Nazirlər Kabinetinin qərarına əsasən təsdiqlənib. Qaydalara görə, tikintinin həcmi və ölçülərinə müəyyən məhdudiyyət qoyulur. Qaydalara əməl etməyən şəxslər sənədləşmədə də çətinlik çəkəcəklər: torpaq sahəsini alsalar da, çıxarış əldə edə bilməyəcəklər. Qaydalara görə, torpaq sahəsinin 40 faizi qədər tikinti altı sahəyə icazə verilir. Tikintinin ümumi sahəsi isə torpağın 60 faizindən çox ola bilməz. Məsələn 2 sot, və ya 200 kv.m torpaqda neçə kv.m ev tikmək olar? “200 kv.m torpaq sahəsində 80 kvadratdan artıq tikinti altı sahə götürə bilmərik. Ümümi sahəsi isə, 200 kv.m torpaq sahəsinin 60 faizi 120 kv.m edir. 2 mərtəbə tikə bilərik və onun mərtəbələrinin də ümumi sahəsi 60 kvadratdan artıq olmamalıdır”, – deyə Nüsrət İbrahimov qaydaları izah edib. Ekspert onu da qeyd edir ki, kiçik torpaqda tikilən həyət evlərini sığortalamaq da imkansızdır, çünki sığorta şirkətləri tikinti normalarına cavab verməyən evləri sığortalamır. Buna səbəb isə tikinti zamanı qonşu evlərlə ara məsafəsinin saxlanılmamasıdır. Onun sözlərinə görə, əgər bir evdə yanğın baş verərsə, digər evlərə də keçə bilər. Bu baxımdan belə evləri sığortalamaq şirkətlər sərfəli deyil.

Biz Azərbaycanla artıq razılaşdırılmış üç prinsip əsasında sülh gündəliyinə sadiq qalırıq. Sozcu.az xəbər verir ki, bunu Ermənistan Baş naziri Nikol Paşinyan deyib. "Ümid edirik ki, son vaxtlar regionda və region ölkələrində baş verən hadisələr sülh prosesinin qəsdən ləngiməsinin baş verdiyini göstərmir", - Paşinyan qeyd edib.

Ukrayna Silahlı Qüvvələri Avdeyev rayonu istiqamətində Rusiya qoşunlarının doqquz, Tonenke, Pervomayski və Nevelski istiqamətlərində isə 13 hücumunu dəf edib. Sozcu.az xəbər verir ki, bu barədə Ukrayna SQ-nin Baş Qərargahının məlumatında deyilir. Bildirilib ki, gün ərzində 92 döyüş toqquşması baş verib: “Ukraynanın şərq və cənubunda vəziyyət ağır olaraq qalır”.

Türkiyənin Gümüşxanə şəhərinin Kelkit ilçəsində 4,1 bal gücündə zəlzələ baş verib. Sozcu.az xəbər verir ki, bu barədə Türkiyənin Fövqəladə Halların İdarəolunması Agentliyi (AFAD) məlumat yayıb. Zəlzələnin 15,68 km dərinlikdə meydana gəldiyi bildirilib. Bundan əlavə, Ərzincanın mərkəzində də 3,7 maqnitudalı təkanlar qeydə alınıb. Dağıntı və tələfat barədə məlumat yoxdur.

Qafqazda müsəlman qadınları cəhalət dənizində boğulmaqdadır. Ümumiyyətlə elm yox, maarifə həvəs yox, millətə xidmət heç yox. İşləri xalça toxumaq, corab hörmək, paltar tikmək, aşbazlıq, qulluqçuluq və yaxud işsiz-gücsüz yaşamaqdır. Evladlarını tərbiyə edə bilməzlər, işləri çığırmaq, bağırmaq, qarğış, söyüşdür. Nizam-intizam nədir bilməzlər, nəzakət nədir onuda bilməzlər, nəzafət(təmizlik) onu heç bilməzlər. Qafqazlı müsəlman qadınların bildikləri qızıl zinətlər, qumaş paltarlardı. Ayaqyalın gəzərlər, rütubətli, qaranlıq yerdə oturarlar. Buna görə xəstə olarlar. Bir çoxları baş ağrısına, bəziləri romatizmə düçar olarlar. Əcayib-qərayib bəlalara rast gəlirlər, qorxunc yaralar çıxarırlar. Gəncikən həyatları boşa gedər. Yeyib-içmək üsulunu bilməzlər, buna görə bənizləri saralmış, qaralmış halda olar, bəd rəng halına düşərlər. Yazıqların məişət və həyatları fəna olduğu halda bunlarına halına baxan yox, çarə axtaran yox. Bunların əhvalına hərkəsdən əvvəl özləri arasında yetişmiş nüfuzlu, məlumatlı, maarifli xanımlar qalmalıdır. Heyhat !... Belələrini tapmaq ikinci müşkül bir məsələdir. Bizdə elə xanımlar yoxda deyil. Rusca bildikləri halda öz dillərində yazmaq, oxumaq dursun, hətta elələri var ki, danışmağı bilməzlər. Adları da bütün əcnəbi adlar kimi. Bunlardan bir neçəsi Bakıdadır: Təbibə Batırşinadır ki, Bakıya gəldikdən sonra müsəlmanlar "Bahadır şahzadə" demişlər. Biri daha vardır ki, həqiqi adı olan Kəbə deyilməyə razı deyilmiş. Ana Tamara demək lazım gəlirmiş. Bir neçəsini də bilirəm ki, müəllimdirlər türkçə bilmirlər, müslimədir müsəlmanca bilmirlər. Bilmək də istəməzlər.   Öz aralarında söhbət edərkən rusca danışırlar. Türkçəyə rəğbət etmək istəmirlər, istəsə idilər bilərdilər, öyrənərdilər. Məramın əlindən bir şey qurtulmaq... İnsan hər istədiyinə nail ola bilər. "İstəyirəm, amma vaxtım yoxdur" boş sözlərdi. Hərgah bizim ziyalı, maarifli xanımlarımız bizim əhvalımıza yansa idilər, əvvəlcə öz ana dillərini öyrənməyə, oxuyub-yazmağa səy göstərərdilər. Ondan sonra bütün növ yaxşılıqları görə bilərdik. Yoxsa bu hal üzrə həm analar, həmdə bizlər davam edərsək qorxuram sonumuz fənadır. İşlər belə gedərsə bir tərəfdən millətimizin mədəni və maarifli olmasına bizim cahil, qafil, tərbiyəsiz bacılarımız maniyə olacaqlar, digər tərəfdən də maarifli xanımlarımız bu gün ki, halətləri, məişətləri, millət və şəriətə etinatsızlıqları, uzaqdan baxan atalarıda qız evladlarını məktəblərə verməməyə, tərbiyəli və maarifli analar yetişdirməməyə vadar edəcəkdir. O zaman vay halımıza... Aləmi Nisvan jurnalı 1906, Say 4, səh: 49-50 Təqdim etdi: Ceyhun Nəbi

Bu gün Müsavat Partiyasının başqanı Arif Hacılı ATƏT-in DTİHB (Demokratik Təsisatlar və İnsan Hüquqları Bürosu) müşahidə missiyasının nümayəndələri doktor Martina Barker Tsiqanikova və Qoran Petrov ilə görüşüb. Görüşdə Azərbaycanda fevralın 7-də keçiriləcək növbədənkənar prezident seçkiləri ərəfəsində ölkədəki durum müzakirə edilib. Arif Hacılı Müsavat Partiyasının seçkilərdə iştirakdan imtinasının səbəbləri barədə məlumat verib. Qeyd edək ki, Müsavat Partiyası Azərbaycan hakimiyyətini seçkiqabağı demokratik mühit yaratmağa, bütün siyasi məhbusları azad etməyə, sərbəst toplaşma, söz və ifadə azadlığınını təmin etməyə, seçki komissiyalarında iddiaçı tərəflərin təmsilçiliyinin təmin etməyə çağırsa da, bu çağırışlar cavabsız qalıb. Əksinə, növbədənkənar seçkilər təyin olunduqdan sonra ölkədə repressiyalar davam edib. Müsavat Partiyası bütün bunları, eləcə də Müsavat Partiyası strukturlarında aparılan müzakirələrin və ictimai sorğuların nəticələrini nəzərə alaraq, fevralın 7-nə təyin olunan növbədənkənar prezident seçkilərində iştirak etməmək haqqında qərar qəbul edib.

Cəlilabad rayon Xəlilli kənd tam orta məktəbində baş verən qanunsuzluqlarla bağlı vətəndaş müraciəti əsasında rayon prokurorluğunda araşdırma aparılıb. Cəlilabad rayon prokurorluğundan Sozcu.az-a bildirilib ki, araşdırma zamanı qeyd edilən təhsil müəssisəsində 2019-2023-cü illər ərzində tədris olunmayan dərs saatlarına görə əmək haqqı ödənilməsi və digər qanunsuz yollarla xeyli miqdarda dövlət vəsaitinin mənimsənilməsi və ya israf edilməsinə əsaslı şübhələr müəyyən edilib. Fakta görə Cəlilabad rayon prokrurorluğunda Cinayət Məcəlləsinin 179.2.3 və 179.2.4 (qulluq mövqeyindən istifadə etməklə və xeyli miqdarda ziyan vurmaqla mənimsəmə və ya israf etmə) maddələrilə cinayət işi başlanaraq istintaq aparılır.

Portuqaliya təmsilçisi “Braqa” UEFA Avropa Liqasının pley-off mərhələsindəki rəqibi “Qarabağ”la bağlı paylaşım edib. Sozcu.az xəbər verir ki, klub bu barədə rəsmi X hesabında bildirib. “Yolumuz Bakıya doğrudur, pley-offdakı rəqibimiz “Qarabağ”dır”, - paylaşımda bildirilib. UEFA Çempionlar Liqasında yer aldığı qrupda üçüncü yeri tutan portuqallarla ilk görüş 2024-cü il fevralın 15-də səfərdə gerçəkləşəcək. Ağdam təmsilçisi fevralın 22-də Bakıda cavab qarşılaşmasına çıxacaq.

Azərbaycanda 2023-ci ilin ən yaxşı futbol məşqçisinin adı məlum olub. Sozcu.az xəbər verir ki, Komanda.az saytının jurnalistlər arasında keçirdiyi ənənəvi sorğuda “Qarabağ”ın baş məşqçisi Qurban Qurbanov digər namizədləri böyük fərqlə qabaqlayaraq, birinci yeri tutub. Qurbanov 66 jurnalistin qatıldığı sorğuda 56 səs toplamaqla, 2023-ci ilin ən yaxşı məşqçisi seçilib. Bununla da, o, 13-cü dəfə Azərbaycanda ilin ən yaxşı məşqçisi adını qazanıb! Sorğuda iştirak edənlərdən 5-i “Sabah” klubunun baş məşqçisi Murad Musayevə, 3-ü “Qəbələ”nin çalışdırıcısı Elmar Baxşiyevə, 2-si isə “Zirə”nin “sükanı arxasında” olan Rəşad Sadıqova səs verib. Azərbaycan milli komandasının keçmiş çalışdırıcısı Canni De Byaziyə səs verən olmayıb. “Qarabağ” ötən mövsümdə Qurban Qurbanovun rəhbərliyi altında Azərbaycan Premyer Liqasında çempionluğu bayram edib. Ağdam təmsilçisi cari mövsümdə də Premyer Liqada lider mövqeyində qərarlaşıb. Bundan başqa, komanda Qurbanovun rəhbərliyi altında UEFA Çempionlar Liqasında, daha sonra Avropa Liqasının qrup mərhələsində mübarizə aparıb. “Köhlən atlar” Azərbaycan futbolu tarixində ilk dəfə olaraq bu mövsüm Avropa Liqasının pley-off mərhələsinə yüksəlib. İlin ən yaxşı məşqçisinin mükafatlandırma mərasimi Azərbaycanın ilk qanuni milli mərc saytı olan “ETOPAZ”ın sponsorluğu ilə və “Pelikan” İdman Fəaliyyətləri Klubunun maliyyə dəstəyi ilə dekabrın 19-da keçiriləcək. “Fairmont otel”in (“Üç alov qülləsi”) “Nizami Gəncəvi zalı”nda təşkil olunacaq tədbir saat 11:00-da başlayacaq. Kim kimə səs verib? İdman mediası Saleh Arslan (“Korner.az”) – Qurban Qurbanov Aydın Bağırov (“Qol.az”) – Qurban Qurbanov Mahir Rüstəmli (Futbol+) – Qurban Qurbanov Kamran Hacı (“Allsport.az”) – Qurban Qurbanov Əli Sahib (“Fanat.az”) – Qurban Qurbanov Ceyhun Əliyev (“Sport24.az”) – Qurban Qurbanov Kənan Məstəliyev (“Rekord.az”) – Qurban Qurbanov Səxavət Qurbanov (“İdmanxeber.az”) – Qurban Qurbanov Elçin Cəlilov (“Futbolpress.az”) – Qurban Qurbanov Rüfət Nadirli (“Sportarena.az”) – Qurban Qurbanov Mirələm Həsənli (“Sportlife.az”) – Qurban Qurbanov Elşən Məmmədov (“Sportnet.az”) – Qurban Qurbanov Vüsal Mahmudov (“Futbolinfo.az”) – Qurban Qurbanov Günay Xəlil (“Offsideplus.az”) – Qurban Qurbanov İxtiyar Əsgərov (“Matc.az”) – Qurban Qurbanov Mərdan Həsənov (“Newsport.az”) – Qurban Qurbanov Araz Əhmədov (“Sportfm.az”) – Qurban Qurbanov Vüqar Xeyrullayev (“Apasport.az”) – Qurban Qurbanov Natiq Muxtarlı (“Aut.az”) – Qurban Qurbanov Vüsal Məmmədzadə (“Sportline.az”) – Qurban Qurbanov Ruslan Mikayıllı (“Azerisport.com”) – Qurban Qurbanov İbrahim Cəfərov (“Futbolxeber.az”) – Qurban Qurbanov İlkin Vaqifoğlu (“Sportinfo.az”) – Murad Musayev Mirbağırağa Cəfərli (“Sportal.az”) – Qurban Qurbanov Əli Həyati (“Futbolmedia.az”) – Qurban Qurbanov Anar Cəfərsoy (“Supersport.az”) – Qurban Qurbanov Elvin Əhəd (“Mediasport.az”) – Elmar Baxşıyev Anar Şabanoğlu (“Sports.az”) – Qurban Qurbanov İlkin Vidadioğlu (“Sportmedia.az”) – Qurban Qurbanov Daşqın Əziz (Pressinq.az) – Qurban Qurbanov Komanda.az Rəşad Ergün – Qurban Qurbanov Pərviz Eltürk – Qurban Qurbanov Akif Əhmədov – Murad Musayev Nəzrin Kazımlı – Murad Musayev Vüsal Qəmbərov – Qurban Qurbanov Televiziya – Radio Şəmsəddin Abbasov (“CBC Sport”) – Qurban Qurbanov Gəray Qiyasov (“Real” TV) – Murad Musayev Azər İsmayıl (ARB TV) – Qurban Qurbanov Qulam Səfərli (“Xəzər” TV) – Qurban Qurbanov Sənan Şəfizadə (ATV) – Qurban Qurbanov Kənan Hakimov (“İctimai” TV) – Qurban Qurbanov Fərid Ramazanov (“İdman” TV) – Qurban Qurbanov Tural Xudiyev (“Space” TV ) – Qurban Qurbanov İlkin Baba (“Azərbaycan radiosu”) – Elmar Baxşıyev Cavid Neymətzadə (“Radio Space”) – Murad Musayev Mehri Qurban (Baku TV) – Rəşad Sadıqov İctimai-siyasi media İlham Quliyev (“Kaspi” qəzeti) – Qurban Qurbanov Elsevər Məmmədov (“Qafqazinfo.az”) – Qurban Qurbanov Kənan Həsənov (“Report.az”) – Qurban Qurbanov Ozal Məmmədov (“Sfera.az”) – Qurban Qurbanov İlqar Tağıyev (“525-ci qəzet”) – Qurban Qurbanov Elçin Cəfərov (“Azərbaycan” qəzeti) – Qurban Qurbanov Təranə Xudabaxşiyeva (“Ayna.az”) – Qurban Qurbanov Teymur Tuşiyev (“Sputnik Azərbaycan”) – Qurban Qurbanov Amal Abuşov (“Qaynarinfo.az”) – Qurban Qurbanov Heybət Məmmədov (Publika.az”) – Qurban Qurbanov Fidan İlqar (“Lent.az”) – Qurban Qurbanov Aytən Məmmədova (“Azadliq.info”) – Rəşad Sadıqov Əziz Elxanoğlu (“Turan”) – Qurban Qurbanov Anar Rəsullu (“Sozcu.az”) – Qurban Qurbanov Natiq Cavadlı (“Meydan” TV) – Qurban Qurbanov Zahid Nurəliyev (“Bakupost.az”) – Qurban Qurbanov Fərəc Aslanov (“Azeripress.az”) – Qurban Qurbanov Səxavət Məmmədov (“Yenicag.az”) – Qurban Qurbanov Ağa Dadaşzadə (“Operativ24.az”) – Elmar Baxşıyev Ceyhun Məmmədov (“Şərq qapısı” qəzeti) – Qurban Qurbanov

Lənkəranda qızılca xəstəliyindən ilk ölüm halı qeydə alınıb. Sozcu.az Report-a istinadən xəbər verir ki, rayonun Şirinsu qəsəbə sakini - 2020-ci il təvəllüdlü Uğur Elvin oğlu Abızadədə bir həftə əvvəl yüksək hərarət müşahidə olunub. O, ev şəraitində müalicə alıb. Lakin ötən gündən uşaqda yenidən hərarət yaranıb. Təcili tibbi yardım xidmətinə müraciət olunub. İlk tibbi yardımdan sonra uşağın xəstəxanada müəlicə olunmasının zəruriliyi valideynlərin diqqətinə çatdırılıb. Ailə üzvləri razılaşmayıb. Bir müddət sonra yenidən halı pisləşən azyaşlı yaxınları tərəfindən xəstəxanaya gətirilib. Lakin göstərilən tibbi yardımlara baxmayaraq, onun həyatını xilas etmək mümkün olmayıb. Ailənin digər 4 yaşlı övladı Yunus Elvin oğlu Abızadə də hərarət müşahidə olunduğundan Bakıya xəstəxanaların birinə göndərilib.

Məlum olduğu kimi, 2024-cü il üçün yaşayış minimumu ölkə üzrə 270 manat, əmək qabiliyyətli əhali üçün 287 manat, pensiyaçılar üçün 222 manat, uşaqlar üçün 235 manat məbləğində müəyyən edilib. Ölkədə yaşayış minimumunun hesablanma qaydaları sovet dövründən qalıb. Hesab edirəm ki, bu qaydalar dəyişdirilməlidir. Minimum istehlak səbətinin tərkibi isə yenidən təsdiq edilməlidir”. Bu fikirləri Bakupost.az -a iqtisadçı ekspert Natiq Cəfərli deyib. O bildirib ki, normal indikatorlarla hesablanma aparsalar, yaşayış minimumu indikindən azı 2 dəfə artıq olmalıdır. O zaman ölkədə minimum pensiya, minimum əmək haqqı da buna uyğun artırılmalıdır. Yeni hesablama qaydaları tətbiq edilsə, yaşayış minimumunun məbləği daha böyük olsa, yoxsulluq səviyyəsində ciddi artım ola bilər: “Nazirlər Kabineti mütəxəssislərdən ibarət komissiya təyin etməli və bu qərarı dəyişməlidir. Biz illərdir deyirik ki, komissiya təyin edilsin, parametrlərə baxılsın. Heç olmasa, Türkiyə təcrübəsi öyrənilsin. Türkiyədə olan yanaşma tətbiq olunsa, bizdə minimum istehlak səbəti ən azı 500 manat olmalıdır. Belə olarsa, minimum təqaüd və əmək haqqı ondan daha yüksək olmalıdır. Məhz bu səbəbdən Nazirlər Kabineti istehlak səbətini köhnə parametlərlə hesablayır”.