09:28 Fevralın 20-si saat 9:00-a olan faktiki hava açıqlanıb. Milli Hidrometeorologiya Xidmətindən Sozcu.az-a verilən məlumata görə, əsasən ölkə ərazisində yağıntılı və küləkli hava şəraiti müşahidə olunur. Bakıda və Abşeron yarımadasında sulu qar, dağlıq və dağətəyi rayonlara isə qar yağır. Yağan qarın hündürlüyü Qrızda, Qax (Sarıbaş) 12, Şahdağda 11, Gədəbəydə 8, Şəki, Balakəndə 4, Zaqatalada 3, Şuşa, Xankəndi, Tovuz, Şamaxı, Qobustan, Altıağac, Qusar, Xaçmaz, Quba, Xaltan, Şabran, Qəbələ,Yardımlı, Ağstafa, Daşkəsəndə 1 sm-dir. Düşən yağıntının miqdarı Sabirabadda 6, Lənkəranda 5, Biləsuvar 4, Oğuz, Göyçay, Astara, Şahbuzda 2, Naxçıvan, Naftalan, İsmayıllı, Tərtər, Yevlax, Kürdəmir, Zərdab, Beyləqan, İmişli, Cəlilabad, Şirvan, Şəmkir, Tovuz, Neftçala, Lerik, Ağdam, Bakıda və Abşeron yarımadasında 1 mm-dək olub. Şimal-qərb küləyi əsir. Narıncı xəbərdarlığa uyğun olaraq küləyin sürəti arabir Bakıda və Abşeron yarımadasında 26 m/s, sarı xəbərdarlığa uyğun olaraq Neftçalada isə küləyin sürəti 20 m/s-yə çatıb. Neft Daşları stansiyasının məlumatına əsasən dənizdə dalğanın hündürlüyü 3 metrdir. Sumqayıt, Daşkəsən, Gədəbəy, Göygöl, Naftalan, Şəmkir, Balakən, Qax(Sarıbaş), Şəki, Qəbələ, Şamaxı, Qobustan, Qrız, Göyçay, Qusar, Lerikdə duman müşahidə olunub. Görünüş məsafəsi 50-500 metrədək məhdudlaşıb. Havanın minimal temperaturu Bakıda və Abşeron yarımadasında 2, Aran rayonlarında 5 dərəcəyədək isti, Naxçıvan MR-da 5, dağlıq rayonlarda isə 13 dərəcəyədək şaxta qeydə alınıb. *** Fevralın 20-si saat 12:00-a olan məlumata əsasən, ölkə ərazisində küləkli və yağıntılı hava şəraiti davam edir. Bu barədə Milli Hidrometeorologiya Xidmətindən məlumat verilib. Bildirilib ki, Şuşa, Xankəndi, Kəlbəcər, Laçın, Daşkəsən, Gədəbəy, Göygöl, Gəncə, Tovuz, Qazax, Ağstafa, Balakən, Qax, Zaqatala, Şəki, Qəbələ, Şamaxı, Qobustan, Altıağac, Quba, Qusar, Xaltan, Şahdağ, Şabran, Yardımlı, Lerikdə qar yağır. Bakıda və Abşeron yarımadasında isə arabir sulu qar müşahidə olunur. Naxçıvan, Şahbuz, Naftalan, Oğuz, İsmayıllı, Füzuli, Xocalı, Tərtər, Bərdə, Yevlax, Göyçay, Zərdab, Beyləqan, İmişli, Kürdəmir, Sabirabad, Biləsuvar, Lənkəran, Astarada yağış yağır. Narıncı xəbərdarlığa uyğun olaraq Bakıda və Abşeron yarımadasında şimal-qərb küləyi əsir. Küləyin maksimal sürəti 25 m/s-dir. Dənizdə dalğanın hündürlüyü 3.5 metrdir. Havanın minimal temperaturu Bakıda və Abşeron yarımadasında 2, Aran rayonlarında 5, Naxçıvan MR-da 4 dərəcəyədək isti, dağlıq rayonlarda 12 dərəcəyədək şaxta qeydə alınıb.

Mərkəzi icra hakimiyyəti orqanlarının Nümunəvi Əsasnaməsinin yeni layihəsi hazırlanacaq. Sozcu.az-ın məlumatına görə, Prezident İlham Əliyev bununla bağlı Fərman imzalayıb. Fərmana əsasən, Nazirlər Kabineti mərkəzi icra hakimiyyəti orqanlarının Nümunəvi Əsasnaməsinin yeni layihəsini hazırlayıb üç ay müddətində Azərbaycan Respublikasının Prezidentinə təqdim etməlidir.

Masallı sakini ehtiyatsızlıqdan odlu silahdan açılan atəş nəticəsində ölüb. Sozcu.az xəbər verir ki, hadisə Qarğalıq kəndində baş verib. Kənd sakini Ayxan Əzizov qonşusunun evində odlu silahla ehtiyatsız davranıb və silahdan açılan atəş nəticəsində ölüb. Ayxan Əzizov Azərbaycan Ordusunun giziri, şəhid Elvin Əzizovun oğludur. 

2023-cü ilin yanvar ayından keçmiş məcburi köçkünlər üçün tikilmiş və istifadəsiz mənzillərin onlayn satışına başlanılıb. Mənzillər Bakının Ramana, Ümid, Kürdəxanı qəsəbələrində, Abşeron və Samux rayonlarında yerləşir. Onlar qiymət və satış şərtləri baxımından bazardakı digər əmlaka nisbətən xeyli ucuz olsa da, bu mənzillərə tələbat olduqca aşağıdır. Hazırda Qaradağ rayonundakı Ümid qəsəbəsindəki kompleksdə 44 ədədi üç otaqlı, 14 ədədi dördotaqlı olmaqla, ümumən 58 mənzil, Abşeron rayonundakı kompleksdə 821 ədədi üçotaqlı, 197 ədədi dördotaqlı olmaqla, ümumən 1018 mənzil, Ramana qəsəbəsindəki kompleksdə 102 ədəd dördotaqlı, Samux rayonunda yerləşən kompleksdə isə 16 ədəd dördotaqlı mənzil satışdadır. Mövzu ilə bağlı "Yeni Sabah"a danışan əmlak məsələləri üzrə ekspert Ramil Qasımzadə bildirib ki, sözügedən binalar infrastruktur və təmir keyfiyyəti baxımından xeyli aşağıdır: “Məcburi köçkünlərin tərk etdiyi şəhərciklərdə satışa təqdim olunan mənzillərin təxminən yarısı satılıb. Amma Əmək və Əhalinin Sosial Müdafiə Nazirliyi bu mənzillərin satış qiymətiləndirilməsini nədənsə yerli qiymətləndiricilərə deyil, xarici təşkilatlara tapşırıb. Xarici şirkətlər yerli bazarı bilmir və onların təyin etdiyi qiymətlər alıcılara sərf etmir. İstər Qaradağdakı, istərsə də Ramanada yerləşən məcburi köçkün şəhərcikləri infrastruktur, tikinti keyfiyyəti baxımından olduqca aşağıdır. Bununla bağlı orada yaşayan sakinlər dəfələrlə irad bildirib”.  Ekspert qeyd edib ki, həmin mənzillərin təmir xərci də xeyli çoxdur: “Hətta o mənzillərin öz qiyməti qədər təmir xərcləri lazımdır. Divarların əyriliyi, materialların keyfiyyətsizliyi və təmirin davamsızlığı alıcılar üçün gələcəkdə problemə çevrilir. Sadalanan səbəblərə görə vətəndaşlar belə mənzilləri almaq yerinə fərdi yaşayış evi almağı üstün tutur. Məsələn, Ramana ərazisində həmin mənzillər üçün təklif olunan qiymətə elə həmin qəsəbədən fərdi evi almaq daha sərfəlidir. Hətta demək olar ki, daha ucuzdur”.

Hədə-qorxu ilə tələb etmədə təqsirləndirilən Fuad Muradov, Ramil Paşşanov və Gülnar Hacıyevanın cinayət işi üzrə məhkəmə prosesi davam etdirilib. Sozcu.az APA-ya istinadən xəbər verir ki, bu gün Gəncə Ağır Cinayətlər Məhkəməsində hakim Dadaş İmanovun sədrliyi ilə keçirilən məhkəmə iclasında hökm oxunub. Hökmə əsasən, F. Muradov 6 il 6 ay, Ramil Paşşanov 5 il 6 ay müddətinə azadlıqdan məhrum olunub. Gülnar Hacıyevaya 5 il cəza müəyyən edilib, azyaşlı övladının olmasını nəzərə alaraq, cəza şərti sayılıb və o, məhkəmə zalından azadlığa buraxılıb. Xatırladaq ki, F. Muradov 2023-cü ilin oktyabr ayında saxlanılıb. Nərimanov rayon Məhkəməsinin qərarı ilə onun barəsində həbs qətimkan tədbiri seçilib. Ona və digər təqsirləndirilən şəxslərə qarşı Cinayət Məcəlləsinin 182.2.1, 182.2.2 və 182.2.4-cü maddələri (Hədə-qorxu ilə tələb etmə) ilə ittiham elan olunub. Cinayət işi üzrə 7 nəfər zərərçəkmiş qismində tanınıb. Qeyd edək ki, Fuad Muradov "Qazaxlı Alik" ləqəbi ilə tanınan Qarabağ müharibəsi veteranı Arif Muradovun oğludur.

Talassemiyalı uşaqlar, digər xəstələr üçün toplanmış vəsaiti dələduzluq yolu ilə ələ keçirməkdə təqsirləndirilən Nuridə Seyidova, Aynur Bayramova və Aysel Məmmədovanın cinayət işi üzrə məhkəmənin növbəti prosesi keçirilib. Sozcu.az xəbər verir ki, bu gün Bakı Ağır Cinayətlər Məhkəməsində hakim Azad Məcidovun sədrliyi ilə keçirilən prosesdə daha 7 nəfər zərərçəkmiş qismində tanınıb. Zərərçəkən Tural Nəsmiyev vəsatət verərək cərrah-transplantoloq Mircəlal Kazıminin, Talassemiya Mərkəzinin baş həkimi Xuraman Cəfərovanın, Talassemiya Mərkəzinin direktoru vəzifəsində çalışmış Valeh Hüseynovun məhkəməyə çağırılaraq dindirilməsini, bununla yanaşı, təqsirləndirilən şəxslər arasında olan danışıqlar, Vatsap tətbiqi üzərində olan mesajlaşmalar və danışıqların məhkəməyə təqdim olunmasını istəyib. Dövlət ittihamçısı, zərərçəkən şəxslər, müdafiə tərəfi və təqsirləndirilənlər buna etiraz etməyib. Hakim zərərçəkmişlərlərin ifadələrindən sonra adıçəkilən şəxslərin məhkəməyə çağırılacaqlarını bildirib. Daha sonra məhkəmə təqsirləndirilən şəxslərin 2022-ci aprel ayından- 2023-cü il fevral ayınadək olan müddətdə anten məlumatları, zəngləri, mesaj mətnlərinin məhkəməyə təqdim edilməsi barədə olan vəsatəti təmin edib. Prosesdə zərərçəkənlər ifadə verib. Məhkəmə prosesi fevralın 26-da davam etdiriləcək. Qeyd edək ki, talassemiya xəstələrinin valideynlərinə qarşı dələduzluq edilməsi ilə bağlı daxili işlər orqanlarına məlumat daxil olub. Məlumat əsasında cinayət işi başlanılıb. Müəyyən edilib ki, Nuridə Seyidova Aysel Məmmədova və Aynur Bayramova ilə əlbir olaraq 36 nəfər talassemiya xəstəsinin valideynlərinin etibarından sui-istifadə edərək həmin şəxslərin övladlarını Türkiyədə müalicə etdirmək adı ilə 980 min manatlarını mənimsəyib. Əvvəlcə Nuridə Seyidova həbs olunub. Daha sonra məhkəmə proseslərində Aynur Bayramova və Aysel Məmmədova barəsində həbs qətimkan tədbiri seçilib. Təqsirləndirilən şəxslərə qarşı Cinayət Məcəlləsinin 178.3.2-ci (dələduzluq, külli miqdarda ziyan vurmaqla) maddəsi ilə ittiham irəli sürülüb.

Vladimir Zelenski Ukraynada müharibə başa çatdıqda və ölkənin təhlükəsizliyi üçün müvafiq təminatlar olduqda prezident postunu tərk etməyə hazır olduğunu bildirib. Sozcu.az xəbər verir ki, Zelenski bunu Almaniyanın ARD telekanalındakı tok-şouda deyib. “Ukraynada sülh naminə hər şeyə hazıram. Uzun və davamlı sülh üçün. Bir insan kimi, bir vətəndaş kimi, bir ata kimi... Mən heç nədən yapışmıram. Mən Ukraynanın prezidentiyəm, çünki insanların 73 faizi mənə səs verib və bu gün mən Ukrayna prezidentiyəm, çünki ölkəmdəki əksəriyyət məni dəstəkləyir”, – o, "sülh müqaviləsinin imzalanması tələbi “yalnız Zelenski olmadan” olarsa, vəzifəsini tərk etməyə hazırdımı" sualına cavabında deyib. Prezident qeyd edib ki, o, ölkəni müdafiə edən insanlar kimi Ukraynanın vətənpərvəridir. Və təbii ki, Rusiya ondan xilas olmaq istəyir. Bəlkə də müharibənin əvvəlində cəhd etdikləri kimi fiziki yox, siyasi cəhətdən. “Və bu olduqca başa düşüləndir. Mən Putin üçün çox əlverişsiz adamam”, - dövlət başçısı bildirib. O xatırladıb ki, Parisdə Normandiya dördlüyünün sammitində (2019-cu ilin dekabrında) Putinlə çox gənc və təcrübəsiz vaxtında tanış olub. “Biz uzun müddət danışdıq, razılaşdıq və hətta qışqırdıq. Danışıqlar 6 saat fasiləsiz keçdi. Aydındır ki, bu gün daha çox təcrübəm var və... mənim üçün heç də asan deyil. Ona görə də Rusiya məndən yaxa qurtarmaq istəyir”, - deyə Zelenski bildirib. Eyni zamanda o qeyd edib: “Sabah Ukrayna Aİ və NATO-ya daxil olarsa, Rusiya qoşunları geri çəkilsə və bizim təhlükəsizlik zəmanətimiz olsa, prezidentlik postu mənə daha lazım olmayacaq. Amma bunlar baş verənə qədər mən ölkəmi müdafiə edəcəm”. Zelenski avtoritar idarəçilik ittihamlarını rədd edib və deyib ki, o, “müharibə zamanı prezidentin etməli olduğu işi” edir. Dövlət başçısı özünü “ən liberal insanlardan biri” adlandırıb və ölkələrində müharibələr gedən zaman digər liderlərin atdığı addımları xatırladıb. “Kiminsə xoşuna gəlsə də, gəlməsə də, müharibə həmişə müəyyən azadlıqların məhdudlaşdırılmasını tələb edir”, - o deyib.

Ermənistanın baş naziri Nikol Paşinyan milli təhlükəsizlik strategiyasının nəzərdən keçirilməsi üçün komissiyanın yaradılması haqqında fərman imzalayıb. Sozcu.az xəbər verir ki, komissiyaya Təhlükəsizlik Şurasının katibi Armen Qriqoryan rəhbərlik edəcək. Onun tərkibinə nazir müavinləri və təhlükəsizlik orqanlarının rəhbərləri, parlamentin müdafiə və xarici əlaqələr komissiyalarının rəhbərləri də daxil olacaq. Milli təhlükəsizlik strategiyasındakı dəyişikliyi yanvarın 28-də Paşinyan bəyan edib. Xatırladaq ki, yeni milli təhlükəsizlik strategiyası 2020-ci ildə qəbul edilib. Sənəddə ermənilərin öz ölkələrinin fəxri vətəndaşları, Üçüncü Ermənistan Respublikasını quran və qondarma “Artsaxı azad edən”  xalqın varisləri olduğu vurğulanır. Sənədə görə, Ermənistan “Artsax erməniləri”nin təhlükəsizliyinin və azadlığının təminatçısı kimi bütün dünyada ermənilərin maraqlarını təmsil edir. Gözlənilir ki, yeni milli təhlükəsizlik strategiyasında qondarma “Artsax”a aid bəndlər çıxarılacaq.

ABŞ döyüş başlığı olmayan “Minuteman III” qitələrarası ballistik raketinin sınaq buraxılışını həyata keçirib. Sozcu.az xəbər verir ki, bu barədə sınağın keçirildiyi BŞ Kosmik Qüvvələrinin “Vandenberq” bazasından məlumat yayılıb. “Döyüş başlığı olmayan “Minuteman III” qitələrarası ballistik raketi sınaq çərçivəsində 19 fevral 2025-ci il saat 1:00-da (Bakı vaxtı ilə 13:26) buraxılıb”, - qeyd olunur. Vurğulanıb ki, sınaq buraxılışı Vaşinqtonun hər hansı dünya hadisələrinə reaksiyası deyil.

Fevralın 20-21-də Bakıda və Abşeron yarımadasında, eyni zamanda bəzi bölgələrdə gözlənilən küləkli hava şəraiti ilə bağlı sarı və narıncı xəbərdarlıq verib. Sozcu.az xəbər verir ki, bu barədə Milli Hidrometeorologiya Xidməti məlumat yayıb. Bildirilib ki, Bakıda və Abşeron yarımadasında, eyni zamanda Neftçala və Qobustanda şimal-qərb küləyi əsəcək, narıncı xəbərdarlığa uyğun olaraq küləyin sürəti 20.8-28.4 m/san təşkil edəcək. Naxçıvan MR, Salyan, Hacıqabul, Xaçmaz, Şabran, Siyəzən, Xızı, Quba, Qusar, Ağstafa, Qazax, Tovuz, Şəmkir, Gəncə, Gədəbəy, Daşkəsən, Göygöl, Naftalan, Goranboy, Samux, Mingəçevir, Balakən, Zaqatala, Qax, Şəki, Kəlbəcər, Laçın, Zəngilan, Lənkəran, Astara, Masallı, Lerik, Yardımlı, Cəlilabad, Biləsuvarda isə qərb küləyi əsəcək, sarı xəbərdarlığa uyğun olaraq küləyin sürəti 13.9-20.7 m/san təşkil edəcək.

Azərbaycanda doğum səviyyəsi son illərdə kəskin azalıb. Ədliyyə Nazirliyinin rayon (şəhər) qeydiyyat şöbələrinin məlumatına görə, 2024-cü ildə ölkədə cəmi 102 min 310 doğulan körpə qeydə alınıb. Halbuki, 2019-cu ildə bu göstərici 141 min 179 nəfər olub. Yəni, son 5 il ərzində doğum sayı 38 min 869 nəfər azalıb. Statistikaya nəzər saldıqd azalma tendensiyasının ardıcıl davam etdiyini görmək mümkündür. 2020-ci ildə 126 min 571, 2021-ci ildə 112 min 284, 2022-ci ildə 122 min 846, 2023-cü ildə isə 112 min 620 körpə dünyaya gəlib. Mütəxəssislər hesab edirlər ki, bu azalma Azərbaycanda demoqrafik problemlərin yaranmasına səbəb ola bilər. Ekspertlərin fikrincə, doğum səviyyəsinin azalmasının bir neçə əsas səbəbi var. İlk növbədə, ailə planlaşdırması və sosial-iqtisadi çətinliklər gənc ailələrin az uşaq dünyaya gətirməsinə təsir edir. Bundan əlavə, şəhərləşmə və karyera hədəfləri də ailə qurmaq və uşaq sahibi olmaq qərarlarına təsir edən mühüm amillərdən biridir. Bakı Dövlət Univertsitetinin Sosial elmlər və psixologiya fakültəsinin Sosial iş kafedrasının müdiri Üzeyir Şəfiyev Modern.az-a açıqlamasında bildirib ki, təbii artımdakı ləngimənin səbəbi cəmiyyətdə, insanların düşüncəsində tranformasiya baş verməsidir. "Sovet dövrünə qədərki və sovet dövrü cəmiyyəti ilə bugünkü Azərbaycan cəmiyyətində çoxlu fərqlər var. Həmin dövrlərdə çoxuşaqlı ailələr trend idi. SSRİ dövründə demoqrafik təşviq siyasəti də həyata keçirilirdi. Hətta Qəhrəman ana adı yaradılmışdı. Ancaq Azərbaycan müstəqillik əldə etdikdən, insanlar xaricə getməyə başladıqdan sonra cəmiyyətdə düşüncə dəyişdi. Belə bir düşüncə formalaşdı ki, çox uşaq yerinə keyfiyyətli böyüdülən az uşaq olması daha yaxşıdır. Ona görə də çoxuşaqlı ailə trendi yavaş-yavaş arxa plana keçməyə başladı". Sosioloq qeyd edib ki, əhalinin təhsil səviyyəsi artdıqca çoxuşaqlı ailələrin sayı azalır: “İnsanlar artıq 1,2 ən yaxşı halda 3 uşağa üsünlük verirlər. Bu yaxınlarda parlamentdə çoxuşaqlı ailədə uşaq sayının 5-dən 3-ə endirilməsi bağlı yanaşma düzgündür. Belə olsa, güma edirəm ki, Azərbaycanda 3 uşaqlı ailələrin sayı arta bilər. Bu zaman təbii artımda da artım müşahidə edilə bilər. Son 22 ilin statistikasını təhlil edəndə görürük ki, təbii artımda ləngimə müşahidə olunur. Əhalinin artımı təqribən 26.44% artıb amma ahılların sayı 99.4% artıb. 2023-cü ildə əhalinin təbii artımı əvvəlki ilə nisbətən 15% aşağı düşüb. Bu əhalinin ailə planlaşmasında olan dəyişiklərlə bağlıdır. İnsanlar indi daha çox eqoist, bəncil həyat yaşayırlar. Onlar uşaq məsuliyyəti götürmək yeni özlərinin eqoist həyatını sürdürmək istəyirlər”. Müsahibimiz sonda qeyd edib ki, Cənubi Qafqaz ölkələri arasında Azərbaycan təbii artım baxımından irəlidədir. "Ancaq tədbirlər görülməsə, orta perspektivdə təbii artımda daha da ləngimə ola bilər. Təbii artımın aşağı düşməsi eyni zamanda orta perspektivdə əmək bazarına və səfərbərliyə də təsir edə bilər. Təbii artım aşağı düşərsə, mexaniki artımla əhali sayı arta bilər. Bu da yaxşı nəticə verməz, çünki Avropa mexaniki artım hesabına miqrant ekspansiyası ilə qarşılaşıb. Əgər demoqrafik siyasət dəstəklənməsə bənzər vəziyyət Azərbaycanda da ola bilər. Güman edirəm ki, bu tədbirlər görülərsə, doğum sayında artım olar, Azərbaycan əhalisinin qocalması probleminin qarşısının alınması alınar. Bildiyiniz kimi, yeni doğulanlar azaldıqca, qocaların sayı artır. Bu da əhalinin qocalmasına gətirib çıxarır. Məsələn ahılların sayı əhali içərisində 8%-dən yuxarıdırsa, bu qocalma sindromu ola bilər. Güman edirəm ki, Azərbaycanda bu sahədə tədbirlər sayəsində doğum sayı artacaq və əhalinin qocalmasının qarşısı alınacaq”.

ABŞ Prezidenti Donald Trampın Ukrayna üzrə xüsusi nümayəndəsi Keyt Kelloq Kiyevə səfər edib. Sozcu.az xəbər verir ki, bu barədə "Reuters" məlumat yayıb. Kiyevdə onu ABŞ-ın Ukraynadakı səfiri Bridcet Brink qarşılayıb. Kelloq qeyd edib ki, səfər zamanı o, Ukrayna üçün təhlükəsizlik təminatlarını müzakirə edəcək, sonra isə danışıqların məzmununu ABŞ prezidenti Donald Trampa çatdıracaq. Keyt Kelloqun Ukrayna prezidenti Volodimir Zelenski, Ukrayna Silahlı Qüvvələrinin Ali Baş Komandanı Aleksandr Sırski və müdafiə naziri Rustem Umerovla görüşü gözlənilir.

Roma Papası ölüm ayağındadır. Sozcu.az xəbər verir ki, bu barədə "Politico" nəşri yazıb. Nəşr qeyd edir ki, 88 yaşlı pontifikin vəziyyəti getdikcə ağırlaşır. Fransisin şiddətli ağrıları var və o, bu dəfə sağ qala bilməyəcəyinə əmin olduğunu bildirib.

Ermənistan Müdafiə Nazirliyinin N saylı hərbi hissəsinin yeməkxanasında yanğın baş verib. Sozcu.az xəbər verir ki, bu barədə Ermənistan MN məlumat yayıb. Bildirilib ki, yanğının baş vermə şəraiti, eləcə də dəymiş maddi ziyanın həcmi müəyyənləşdirilir. Erməni mediası isə yeməkxananın bərbad vəziyyətdə olduğunu, yanğının qarşısını almağın mümkünsüzlüyünü yazıb və qeyd edilib ki, yanğın tikilini külə çevirib.

Ukrayna ilə bağlı danışıqlarda Rusiya liderinə etibar etmək olmaz. Sozcu.az xəbər verir ki, bunu Respublikaçılar Partiyasından olan senator Rocer Uiker CNN-in Konqresdəki müxbiri Manu Racuya açıqlamasında deyib. “Putin edam olunmasa belə, ömrünün sonuna qədər həbsdə qalmalı olan hərbi cinayətkardır. Vladimir Putin beynəlxalq hüququn bütün normalarını pozub. O, mühakimə olunmalı və həbs edilməlidir”, - Uiker bildirib. Qeyd edək ki, Rocer Uiker ABŞ Senatının Silahlı Qüvvələr Komitəsinin sədridir.

Ukraynaya konkret təhlükəsizlik təminatları lazımdır. Sozcu.az xəbər verir ki, bu barədə Ukrayna Prezidenti Volodimir Zelenski CNN Türk-ə müsahibəsində bildirib. “Müzakirə masasında Putin əgər müharibəyə dönmək istərsə, onu dayandıracaq insanlar olmalıdır. Bizə sözlə deyil, real və konkret təhlükəsizlik təminatlarını verə bilənlər olmalıdır. Belə bir dialoqa biz hazırıq. Diplomatiyanın nə olduğunu bilirik. Əlbəttə, Putinlə danışmağı o qədər də xoşlamıram. Biz düşmənik və düşmənçiliyimiz davam edir. Ancaq biz bu müharibəni bitirmək üçün hər şeyi edəcəyik. Hər şey tərəfdaşlar arasında açıq bir kommunikasiya ilə olmalıdır. Biz şahmat oynaya bilmərik. Çünki şahmatda hər bir addımınız bəzən onlarla, bəzən yüzlərlə, bəzən isə minlərlə insanın ölümünə səbəb olur”, - Zelenski vurğulayıb. Ukrayna Prezidenti ABŞ-nin Rusiya ilə ikitərəfli əlaqələrinə də münasibət bildirib: “Mən bunu bəyənsəm də, bəyənməsəm də, bu, onların ikitərəfli əməkdaşlığıdır və ABŞ-nin öz qərarıdır. Yoxsa, əlbəttə, onların Putini siyasi izolyasiyadan çıxardıqlarını müşahidə edirik, amma yenə deyirəm ki, bu onların qərarıdır. Ancaq nə vaxt ki, “Bizim müharibənin başa çatmasına dair planlarımız bunlardır” deyildiyində, bu, bizdə suallar yaradır. Biz müzakirə masasının harasındayıq? Müharibə Ukraynada gedir. Putin ukraynalıları öldürür, amerikalıları, ya da avropalıları yox. Elə buna görə də biz açıq şəkildə bildiririk ki, siz nə istəsəniz müzakirə edə bilərsiniz, amma bizsiz Ukraynanı müzakirə etsəniz, qəbul etməyəcəyik. Məncə, bu, olduqca ədalətlidir”. Müharibəni bitirmək üçün həm Ukraynanın, həm də Rusiyanın danışıqlar masası arxasında olmasına diqqət çəkən Zelenski danışıqlarda təkcə Avropa İttifaqının deyil, Avropa qitəsinin də təmsil olunmasının vacibliyini bildirib.

Ötən il nəqliyyat vasitələrinin sərxoş vəziyyətdə idarə olunması səbəbindən ölümlə və ya bədən xəsarəti alınması ilə nəticələnən 19 hadisə baş verib. Sozcu.az xəbər verir ki, bu barədə Dövlət Statistika Komitəsinin məlumatında deyilir. Nəticədə 10 nəfər həlak olub, 15 nəfər yaralanıb. Hadisələrin 16-sı minik avtomobillərinin sürücüləri tərəfindən törədilib.

Fevralın 20-də gözlənilən hava şəraiti açıqlanıb. Sozcu.az xəbər verir ki, sabah Bakıda və Abşeron yarımadasında hava şəraitinin arabir yağıntılı olacağı, səhərdən bəzi yerlərdə sulu qara, axşam isə qara keçəcəyi gözlənilir. Yarımadanın ayrı-ayrı yerlərində intensivləşəcəyi ehtimalı var. Şimal-qərb küləyinin arabir güclənəcəyi gözlənilir. Havanın temperaturu gecə 1-3° isti, gündüz 4°-dək isti olacaq. Atmosfer təzyiqi normadan yüksək 766 mm civə sütunu olacaq. Nisbi rütubət 70-80 % olacaq. Azərbaycanın rayonlarında bəzi yerlərdə arabir yağıntılı olacağı, sulu qar, qar yağacağı gözlənilir. Ayrı-ayrı yerlərdə intensiv olacağı ehtimalı var. Bəzi yerlərdə arabir duman. Qərb küləyi gündüz ayrı-ayrı yerlərdə arabir güclənəcək. Havanın temperaturu gecə 0-4° isti, gündüz 4-8° isti, dağlarda gecə 7-12° şaxta, gündüz 2-6° şaxta olacaq. Bəzi yerlərdə yolların buz bağlama ehtimalı var.

Şəhid Ülfət Kərimovun anası Fatma Kərimova vəfat edib. Sozcu.az xəbər verir ki, o, bu gün dünyasını dəyişib. Qeyd edək ki, kəşfiyyatçı kimi xidmət edən Ülfət Kərimov, 1993-cü ilin mart ayının 27-də Kəlbəcər rayonunun Ağdaban kəndi istiqamətində yerli əhalinin kəndi tərk edə bilməsi üçün ermənilərlə qeyri-bərabər döyüşüb. İnsanların sağ-salamat kəndi tərk etməsinə nail olsa da, özü Aşıq Şəmşirin məzarı yaxınlığında döyüşən zaman şəhid olub.Oxu.az)

Şəmkir Regional Qaz İstismar İdarəsinin Şəmkir Xidmət Sahəsinin Kargüzarlıq və inzibati təsərrüfat xidmətinin 8-ci dərəcəli texniki işcisi, 1982-ci il təvəllüdlü, Şəmkir şəhər sakini Mirzəyeva Sona Qurban qızı əsassız olaraq öz işindən azad edilib. 2006-ci ildən bu vəzifədə çalışan Sona Mirzəyeva öz işində illərdi qüsursuz çalışıb və çalışdığı idarədə uzun illərdi hörmət qazanıb. İdarə rəhbərliyi ani və əsassız olaraq illərdi qüsursuz çalışan Sona Mirzəyevanı işindən azad edib. O bildirir ki, işindən azad olunması qanunvericiliyin tələblərinə və Əmək məcələsinə ziddir. İşdən azad olunma ilə bağlı verilmiş izah İdarə rəhbərliyinin özbaşnalığıdır. O bildirir ki, mən hər zaman öz işimdə məsuliyyətli olmuşam və orada çalışan hər bir kəsdən soruşa bilərlər ki, mən öz işimdə nə qədər məsuliyyətli və düzgün çalışmışam. Sona Mirzəyeva işinə bərpa olunmasını və pozulmuş əmək hüquqlarının təmin olunmasını tələb edir.  Sözcü.az

Rusiya və ABŞ ikitərəfli təmasları davam etdirmək üçün Moskva və Vaşinqtondakı səfirliklərindəki diplomatik personalın əvvəlki sayını bərpa etmək barədə razılığa gəlib. Sozcu.az xəbər verir ki, bunu ABŞ dövlət katibi Marko Rubio Ər-Riyadda Rusiya xarici işlər naziri Sergey Lavrovla danışıqlardan sonra deyib. “Bu əlaqələri davam etdirə bilmək üçün normal fəaliyyət göstərə bilən diplomatik nümayəndəliklərin fəal işləməsinə ehtiyacımız olacaq”, - o bildirib.

Şəmkirdə oğurluq etdiyi evdə yanğın törədən şəxs saxlanılıb. Sozcu.az Oxu.az-a istinadən xəbər verir ki, Şəmkir Rayon Polis Şöbəsinin əməkdaşlarının keçirdikləri müvafiq tədbirlər nəticəsində qohumunun evindən 9 600 manat pul oğurladıqdan sonra evdə yanğın törətməkdə şübhəli bilinən 23 yaşlı E.Sadıqov saxlanılıb. Faktla bağlı araşdırma aparılır.

"Ukraynada sülh yalnız güc yolu ilə gələcək..." Avropa İttifaqı Ukrayna üçün hərbi texnika alınmasına yönəlmiş 700 milyard avro məbləğində yardım paketi hazırlayır. Sozcu.az xəbər verir ki, bu barədə Almaniya xarici işlər naziri Annalena Berbok "Berliner Zeitung" nəşrinə bəyan edib. "Biz daha əvvəllər belə miqyasda olmayan böyük bir paketi işə salacağıq", - Berbok Münhen görüşü çərçivəsində bəyan edib. Milyardlarla avro dəyərində yeni yardım paketi COVID-19 pandemiyası zamanı tətbiq olunan birgə borclanma mexanizmi vasitəsilə maliyyələşdirilə bilər. "Avro və ya pandemiya böhranı zamanı olduğu kimi, indi Avropada təhlükəsizliyi təmin etmək üçün maliyyə paketi mövcuddur. Bu, yaxın gələcəkdə baş verəcək", - diplomat izah edib. O, vurğulayıb ki, Ukraynada sülh yalnız güc yolu ilə mümkün olacaq: "Bu məqsədlə Ukrayna üçün sərt və uzunmüddətli təhlükəsizlik zəmanətləri, güclü NATO bloku və Ukraynanın Avropa İttifaqına üzvlüyü üzrə danışıqlarda irəliləyiş lazımdır", - nazir vurğulayıb.  "Biz, avropalılar və almanlar olaraq hərbi, humanitar və maliyyə dəstəyi göstərərək Ukraynanın yanındayıq. Rusiya işğalı başlayandan bəri biz, avropalılar, ümumilikdə Ukraynaya 134 milyard avrodan çox yardım etmişik, təkcə Almaniya isə təxminən 44 milyard avro ayırıb", - Berbok qeyd edib. Xatırladaq ki, Almaniyada fevralın 23-də seçkilər keçiriləcək. Seçkilərdə ən çox dəstəyi- 29 faizi Xristian Demokratlar və Xristian Sosial İttifaqı alyansı toplaya bilər. Alyansa Fridrix Mers rəhbərlik edir. İkinci yerdə 21 faizlə ifrat sağçı "Almaniya üçün Alternativ" (AfD) partiyası qərarlaşıb. Üçlüyə 16 faizlə Olaf Şoltsun rəhbərlik etdiyi Sosial Demokrat Partiyası tamamlayır. Yaşıllar Partiyası isə 16%-lə dördüncü sıradadır. Ukraynaya yardım – son xəbərlər Bundan öncə prezident Vladimir Zelenski bildirib ki, ABŞ-ın dəstəyi olmadan Ukraynanın müharibə şəraitində sağ qalma şansı azdır. "Yəqin ki, bu, çox çətin olacaq. Və əlbəttə ki, hər çətin vəziyyətdə bir şans var. Ancaq ABŞ-ın dəstəyi olmadan sağ qalmaq üçün çox az şansımız olacaq", - o, vurğulayıb.

Ukraynadakı münaqişənin həlli üçün bütün tərəflər güzəştə getməlidir. Sozcu.az xəbər verir ki, bunu ABŞ dövlət katibi Marko Rubio deyib.