BMT qayıdışa dəstək VERƏCƏK

Bu gün BMT-nin Qaçqınlar üzrə Ali Komissarlığının Avropa Regional Bürosunun direktor müavini xanım Ancela Li Rosi və əməliyyatlar üzrə baş koordinator Filippo Rossinin Azərbaycana səfəri başa çatıb.

Sozcu.az xəbər verir ki, missiyanın məqsədi məcburi köçkünlərin və qaçqınların qayıdışının şərtlərini və perspektivlərini, eləcə də, Rusiya, Azərbaycan və Ermənistan arasında 2020-ci ilin noyabrında imzalanmış üçtərəfli bəyanatda BMT QAK üçün nəzərdə tutulan rolun konkret aspektlərini müzakirə etmək olub.

Məcburi köçkünlər və münaqişədən zərər görmüş əhali üçün həll yollarının müzakirəsi məqsədi ilə BMT QAK-ın nümayəndə heyəti Bakıda yüksək səviyyəli məmurlarla, o cümlədən, xarici işlər naziri Ceyhun Bayramovla, Prezidentin xarici işlər üzrə köməkçisi Hikmət Hacıyevlə, Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayevlə, Dövlət Miqrasiya Xidmətinin rəisi Vüsal Hüseynovla və xarici işlər nazirinin müavini Fariz Rzayevlə görüşüblər.

Ceyhun Bayramovla görüşdə BMT QAK-ın Avropa Bürosunun direktor müavini Ancela Li Rosi göstərdiyi səylərə görə Azərbaycan hökumətinə təşəkkürünü bildirib və vurğulayıb ki, BMT QAK öz səlahiyyətləri çərçivəsində qayıdış prosesinə dəstək verməyə hazırdır və növbəti həftə və aylarda fəaliyyətə başlamaq üçün addımlar atmağı səbrsizliklə gözləyir.

“Biz əminik ki, hökumət və BMT QAK qayıdışın təhlükəsiz və ləyaqətli olması məqsədi ilə dayanıqlı və əhatəli yanaşmanın təmin edilməsi üçün əməli fəaliyyətlərini davam etdirəcək”, – Li Rosi bildirib. Xarici İşlər naziri ilə görüşdə Birinci vitse-prezidentin köməkçisi Elçin Əmirbəyov da iştirak edib.

Yerlərdə şəraiti qiymətləndirmək məqsədi ilə nümayəndə heyəti Ağdam, Bərdə, Füzuli, Tərtər, Cəbrayıl və Zəngilan rayonlarına bir neçə əraziyə səfər ediblər. Münaqişədən ziyan çəkmiş ərazilərdə BMT QAK tərəfindən ən çox ehtiyacı olan insanlara nağd pul və zəruri yardım əşyalarının paylandığı Tərtər rayonunda nümayəndə heyəti bir qəsəbəyə baş çəkib və orada yaşayan ailələrlə görüşüb. Tərtərdə 2020-ci il münaqişəsinin də təsirinə məruz qalmış və 2021-ci ildə BMT QAK-dan yardım alan məcburi köçkün qadınlardan biri deyib ki, o və əri təhlükəsizlik baxımından şərait imkan verərsə mənsub olduqları əraziyə qayıda biləcəklərinə ümid bəsləyir. Bərdə və Ağdamda BMT QAK məcburi köçkünlər üçün hüquqi məsləhətlər verən və qayıdışla bağlı məsələlər daxil olmaqla müxtəlif mövzularda maarifləndirmə və məlumatlandırma sessiyaları keçirən tərəfdaşlarla görüşüb. Zəngilanda nümayəndə heyəti qayıdışın sınaqdan keçirilməsi üçün nəzərdə tutulan və bərpa işlərinin sürətlə davam etdiyi bir kəndə baş çəkib.

BMT QAK-ın nümayəndə heyəti Azərbaycan hökuməti ilə, eləcə də yerli hakimiyyət orqanları ilə uzun sürən faydalı əməkdaşlıq və tərəfdaşlığa görə minnətdarlıq ifadə edib.

BMT QAK ölkədə fəaliyyətə 1992-ci ilin dekabrından başlayıb və münaqişə nəticəsində məcburi köçkün düşmüş yüz minlərlə insana kömək etmək üçün genişmiqyaslı yardım əməliyyatları həyata keçirib.

Facebook Comments