“Emin Əmrullayev ADA Universitetindəki çıxışında etiraf etdi ki, bu il işdən çıxarılan məktəb direktorlarının 20 faizi məhkəmə qərarı ilə vəzifəsinə bərpa olunub. Bu o deməkdir ki, təhsil nazirinin hər beş qərarından biri qanunaziddir və idarəetməsinin necə səriştəsiz olduğunun bir daha özü tərəfindən etirafıdır. Məhkəmənin vəzifəsi insanların pozulmuş əmək hüquqlarının bərpa edilməkdir. Bunu Emin Əmrullayev - ölkənin elm və təhsil naziri açıq şəkildə mətbuat qarşısında etiraf edir. Hələ bu, problemin kiçik bir hissəsidir. Ölkədə təhsil sistemində işdən çıxarılmalı, hətta məsuliyyətə cəlb olunmalı bir nəfər varsa, o da Emin Əmrullayevdir. Bu etiraf gələcəkdə məhkəmə proseslərində ona qarşı istifadə olunmalıdır”. Sozcu.az xəbər verir ki, bu sözləri Pravda.az-a açıqlamasında təhsil məsələləri üzrə ekspert Elşən Qafarov deyib. Ekspert bildirib ki, təhsil sahəsində tamamilə xaos, səriştəsizlik hökm sürür: “Hər dəfə deyirəm, Əmrullayev və səriştəsiz komandasının Azərbaycan təhsilinə vurduğu ziyanın aradan qaldırılması üçün on illərlə vaxt lazım olacaq. Açıq şəkildə etiraf edir ki, hər beş qərardan biri qanun pozuntusu ilə müşahidə olunur. Buna görə də Emin Əmrullayev çox hiyləgər metoda əl atıb, bütün təyin olunan vəzifələrə bir illik müddətli müqavilə ilə xitam verilir. Məktəb direktorlarını basqı altında saxlamaq, qanunsuz əmrləri, tapşırıqları yerinə yetirmək üçün müddətli müqavilə bağlanır. Kim elm və təhsil nazirinin qanundankənar tapşırıqlarını yerinə yetirmirsə, müddət başa çatdıqdan sonra əmək müqaviləsi davam etdirilmir. Bu isə Əmək Məcəlləsinə konkret olaraq ziddir. Elm və Təhsil Nazirliyi imtahan keçirən, ayrı-ayrı çox böyük milyonlarla vəsaiti özündə cəmləşdirən, boş, mənasız layihələrin həyata keçirilməsi, milyonlarla vəsaitin silinməsi ilə, mənasız, müəllimə heç bir faydası olmayan təlimlərin həyata keçirilməsi ilə müşayiət olunur. Bütün maliyyə fırıldaqlarının başında Emin Əmrullayev özü durur. Bu, reallıqdır. Təhsil sistemində ciddi kadr dəyişikliyi edilməlidir. Emin Əmrullayevin maliyyə fırıldaqları ilə ölkənin təhsil büdcəsini talayan dəstəsi təhsil sistemindən uzaqlaşdırılmalıdır. İkinci bir yolu yoxdur”.

Rusiya Ukraynada apardığı müharibənin uzanmasının ona istər qlobal geosiyasətdə, istərsə də resurs baxımından çox ağır zərbələr vurduğunu şübhəsiz ki, görür və anlayır.  Kiyev başda olmaqla, Ukraynanın müxtəlif şəhərlərinə raket-dron zərbələrinin intensivləşdirilməsi, eləcə də yay hücumu çərçivəsində yeni cəbhələr açılması (Sumı və Zaporojye istiqamətləri) müharibəni mümkün qədər tez yekunlaşdırmaq planının tərkib hissəsidir. Məqsəd Ukraynanın iradəsini qırmaq (o cümlədən, xalqı canından bezdirib, savaşı bitirmək yönündə Zelenski hökumətinə təzyiq göstərməsinə nail olmaq) və sonda Kiyevi təslimçi sülh imzalamağa vadar etməkdir.   Lakin planın icrası Moskvanın istədiyi kimi getmir. Ötən həftələrdə Rusiya ordusu Sumı istiqamətində 7-12 km dərinliyə qədər irəliləyə bilsə də, Ukrayna ordusu onların qarsısını kəsə bilib və son günlər işğalçıları Rusiya sərhədinə doğru qovur. Diktatorun Sumı vilayəti ərazisində “bufer zonası” yaratmaq barədə tapşırığını ordu icra edə bilmədi. Bu tapşırığın icrası üçün cəlb edilmiş qüvvələrin özəyini Putinin çox yüksək qiymət verdiyi 155-ci əlahiddə dəniz piyadaları briqadası təşkil edir(di). Lakin Ukrayna ordusu iyulun 2-də dəqiq raket zərbəsi ilə bu briqadanın komandan heyətini sıradan çıxartdı. Bu zərbə nəticəsində Rusiya Hərbi Dəniz Donanmasının komandan müavini, general-mayor Mixail Qudkovun və köməkçisi, 2-ci dərəcəli kapitan Nəriman Şıxəliyevin öldürüldüyü barədə daha öncə məlumat vermişdik. İndi məlum olub ki, həmin zərbə nəticəsində 155-ci briqadanın komandiri, polkovnik Sergey İlyin, briqadanın qərargah rəisi, polkovnik Leonid Başkardin, qoşunların idarəetməsi və rabitə təminatı üzrə qərargah rəisi, 2-ci dərəcəli kapitan Aleksandr Şipunov də ölüb. Təcrübəli komandirlərdən məhrum qalmış briqadanın Ukrayna ordusu tərəfindən utilizasiyası davam edir.  Zaporojye istiqamətindəki əməliyyat isə Ukrayna komandanlığını öz ehtiyatlarını müxtəlif istiqamətlərə səpələməyə məcbur etməyə yönəlmiş yayındırıcı həmlə idi. Burada da Ukrayna ordusu düşmənin komanda məntəqəsinə dəqiq raket zərbəsi endirib. Nəticədə 346-cı xüsusi təyinatlı əlahiddə briqadanın qərargah rəisi, Putinin “Rusiya qəhrəmanı” adını verdiyi mayor Aleksandr Volkov və daha 10 zabit öldürülüb.  Ukraynanın raket hücumundan müdafiəsi üçün NATO ölkələri əlavə addımlar atmağa hazırlaşır. Hazırda yeni “Patriot” sistemlərinin (3 kompleks) Ukraynaya tədarükü üçün Avropa və ABŞ arasında danışıqlar gedir. “Reuters”in məlumatına görə, Donald Tramp gələn həftə ilk dəfə olaraq prezident səlahiyyətləri çərçivəsində Ukraynaya əvəzsiz hərbi yardım ayırmağa hazırlaşır. Bundan başqa, ABŞ maliyyə naziri Bessent bildirib ki, prezident Tramp Ukraynanın bərpası üzrə İnvestisiya Fonduna rəhbərliyi öz üzərinə götürüb.   Bütün gövdəsi ilə Ukraynadakı girdaba daxil olmuş Rusiyanın digər qlobal və regional məsələlərə müdaxilə imkanlarının getdikcə məhdudlaşdığı göz önündədir. ABŞ, Britaniya və İsrail (anqlo-saksonlar və yəhudilər) müxtəlif regionlarda öz planlarını daha rahat icra etməyə başlayıb. Orta Şərqdə (Türkiyə də daxil) və Cənubi Qafqazda cərəyan edən proseslərin vahid mərkəzdən idarə olunduğunu söyləmək yəqin ki, yanlış olmaz. Şahin Cəfərli, politoloq

Keçmiş prezident Həsən Ruhanin başlatdığı dəyişiklik çağrısı İranda kütləviləşməyə başlayır. İranın 180 ictimai-siyasi xadimin Prezident Məsud Pezeşkiana müraciət ünvanlayaraq köklü dəyişikliklərə çağırması da bunun təsdiqidir. Həsən Ruhani bəzən ad çəkmədən, bəzən də birbaşa Seyyid Əli Xameneini hədəf alaraq ölkədə dəyişikliklərin qarşısının alınmasında Ali rəhbəri ittiham edir.  Elə bir vəziyyət yaranmağa başlayır ki, cəmiyyətin tələbi ilə elitanın istəyi üst-üstə düşməyə başlayır. Seyyid Əli Xameneinin başçılıq etdiyi azlıq dəyişikliklərə müqavimət göstərsə də, dəyişikliklər qaçınılmaz xarakter almağa başlayır.  Siyasi elitanın böyük bir hissəsi dəyişikliklərin tərəfdarı kimi çıxış etsə də, bu dəyişikliyin nələri əhatə etməsi ilə bağlı aydın fikir olmadığı hiss olunur. Bu Sovet İttifaqının son illərindəki vəziyyəti xatırladır. Sovet İttifaqında da cəmiyyət və elita dəyişikliyin zəririliyi qənaətinə gəlmişdi, ancaq bu dəyişikliyin nədən ibarət olmalı olduğunu aydın təsəvvür edə bilmədikləri üçün atılan addımlar yarımçıq, bəzən isə əks effektli olduğu üçün dövlət qısa müddətdə dağıldı.  Məhdud məlumatların doğurduğu qənaət ondan ibarətdir ki, dəyişikliklərin nələri əhatə etməsi ilə bağlı yalnız Prezident Məsud Pezeşkian aydın təsəvvürləri var. Qənaətlərim ondan ibarətdir ki, Məsud Pezeşkian Azərbaycan türklərinin ana dilində təhsil haqqının gerçəkləşməsinin təmin edilməsi ilə ölkəni tədricən iki dövlətli federasiyaya doğru aparmağa çalışır. İranın iki dövlətli federasiyaya çevrilməsi ideyasının İran xaricində də dəstəkçiləri çoxdur. Nüfuzlu ekspertlər və beyin mərkəzlərində belə hesab edirlər ki, farslar və Azərbaycan türkləri istisna olmaqla İranda yaşayan digər xalqların tarixi dövlətçilik ənənlərinin olmaması ilə yanaşı çağdaş milli dövlət quracaq səviyəyyə çatmayıblar. Buna görə də İranın iki dövlətli federasiyaya çevrilməsi yaranmış vəziyyətdən ən doğru çıxış yolu ola biləcəyini qeyd edirlər.  Digər tərəfdən İranın parçalanacağı halda Yaxın Şərqdə domino effekti verəcəyi, ən azı 8-10 dövlətin bütövlüyünün pozulacağına səbəb olacağı ehtimalı da İranın federallaşmasını ən doğru yol hesab edənlərin mövqelərini gücləndirir. Avropada qorxurlar ki, Yaxın Şərqdə dövlətlətin çöküşü nəhəng qaçqın ordusu yarada bilər. Aydın məsələdir ki, bölgəni bürüyəcək xaosdan xilas olmaq istəyənlər ilk olaraq Avropaya üz tutacaqlar. Suriya qaçqınlarının yaratdığı miqrant böhranına dözə bilməyən Avropa 8-10 dövlətdən gələ biləcək qaçqın ordusunu qəbul etmək iqtidarında deyil. Buna görə bir tərəfdən sərhədlərin gücləndirilməsi, miqrantlarla bağlı qanunvericiliyin sərtləşdirilməsi ilə yanaşı digər tərəfdən bölgə dövlətlərinin ərazi bütövlüyünün qorunub, saxlanılmasına çalışırlar. Avropanın Suriyadakı HTŞ hakimiyyətinə qarşı dözümlü yanaşılmasının səbəbi də budur. Ancaq Avropada və bütövlükdə dünyada mütəxəsilər yaxşı bilirlər ki, Yaxın Şərqin taleyi Suriyadan deyil, İrandan asılıdır. İran bölünsə Yaxın Şərqdə hökmən bir neçə ölkə bölünəcək. İranın taleyi də belə görünür ki, Məsud Pezeşkianın aydın və qətiyyətli siyasətindən asılıdır.  İranın federallaşmaısnın, mərkəzi Təbriz olmaqla Azərbaycan və mərkəzi İsfahan olmaqla fars dövlətinin yaranmasının xalqımızın maraqlarına nə qədər uyğun olmasına başqa yazıda aydınlıq gətirməyə çalışacağam. Xəqani Cəfərli, politoloq

Paylaşılan rəsmi cədvələ əsasən, 2025–2026-cı tədris ili üzrə müəllimlərin orta aylıq əməkhaqqı 965 manat olaraq göstərilir. Sertifikasiya prosesində yüksək nəticə göstərən müəllimlərə 35% əlavə verilməklə əməkhaqqı 1320 manata çatır, 10% əlavə alanlar üçün isə bu rəqəm 1010 manat təşkil edir. Sertifikasiyada iştirak etməyənlər isə 765 manat maaş alacaqlar. Burada diqqət çəkən əsas məsələ “orta əməkhaqqı” ilə real vəziyyət arasındakı uyğunsuzluq və stimullaşdırıcı modelin qeyri-kafi olmasıdır. Əvvəla, “orta əməkhaqqı” göstəricisi, yalnız sertifikasiya imtahanında yüksək nəticə göstərmiş müəllimlərin maaşlarının daxil edilməsi ilə süni şəkildə şişirdilmiş bir göstəricidir. Halbuki 2023 və 2024-cü illərdə keçirilən imtahanlarda yüksək nəticə göstərənlərin faizi əksər fənlər üzrə 20 faizdən aşağı olub. Bu isə o deməkdir ki, əslində müəllimlərin böyük əksəriyyəti bu 1320 manatlıq əməkhaqqını almır və statistik olaraq təqdim edilən “orta əməkhaqqı” real deyil. Bundan başqa, 35% və 10% artımın özü də kifayət qədər problematikdir. Əgər bu artımlar real əməkhaqqı artımını əvəzləyirsə, deməli, müəllim maaşları artmır, sadəcə əvvəlki məbləğlər üzərində “bonus” adı ilə fərqləndirmə aparılır. Halbuki inkişaf etmiş ölkələrdə müəllimlərin maaşı yalnız nəticəyə görə deyil, təcrübəyə, təhsilə, ixtisasdaxili inkişaf səviyyəsinə və fənn üzrə çətinlik amillərinə görə dəyişir. Misal üçün, Estoniyada müəllimlərin minimum aylıq əməkhaqqısı 1749 avrodur və bu məbləğ hökumət tərəfindən təhsil sektoruna investisiyanın bir hissəsi kimi görülür, şərtli bonus mexanizmi deyil. Azərbaycanda isə aşağı nəticə göstərən müəllim cəzalandırılır (maaş azalır), yüksək nəticə göstərən isə stimullaşdırılır, amma bu stimulların dayanıqlılığı, şəffaflığı və ədalətliliyi sual altındadır. Ən əsası, müəllimlərin bu qədər fərqlə maaş alması məktəbdaxili əməkdaşlığı zədələyir, kollektivdə gərginlik və rəqabət yaradır, təhsilin keyfiyyətini isə kompleks şəkildə artırmır. Orta əməkhaqqı statistikası isə yalnız kağız üzərində gözəldir, müəllimin süfrəsində yox. Təhsili düzəltmək istəyiriksə, müəllimi həqiqətən qiymətləndirməklə başlamalıyıq. Maaşla yox, dəyərlə. Kamran Əsədov, təhsil ekspeti

Zəngin məmləkətin ürək yandıran ağrıları... Zibillikdən çörək axtaran kasıb vətəndaşlar, yaxud, villada lüks həyat yaşayan məmurlar. Şair-jurnalist kimi XALQımın neçə illərdir ki, sosial-iqtisadi baxımdan çox ağrılı-acılı  dözülməz günlər içində, səfalətdə, min bir əzab-əziyyətdə zülümnən yaşamasına heç cürə susa bilmərəm.  Vətəndaş olaraq yəni bu ədalətsizliyi, bu haqsızlığı vicdanıma qəti sığışdıra bilmirəm. Bu, mümkün də deyil. Ölkədəki  bu qədər ədalətsizliyi, bu qədər haqsızlığı şair olan, jurnalist olan vicdanına necə sığışdıra bilər axı? Bu, mümkündürmü yəni?  Düşünürəm ki, SÖZ ADAMıyam, ŞAİRəm, JURNALİSTƏM. Deməli, haqqı yazmalıyam. ŞAİR də, JURNALİST də hər zaman haqqın, ədalətin tərəfdarı olmalıdır! Elə buna görə ədalətsizliyə, haqsızlığa vicdanım dözmür. Jurnalist XALQın danışan dili olmalıdır... Mənim fikrimcə, jurnalist həmişə haqqı dilə gətirməlidir, XALQın problemini qələmə almalıdır və mətbuatda işıqlandırmalıdır... Məncə, çox doğru, çox düzgün düşünürəm. Bu baxımdan şair-junalist kimi belə bir haqq yoldayam. Haqq yolumdan heç vaxt bir addım da dönmərəm. İnsan gərək təmiz-saf əqidənin sahibi olsun. Mən, jurnalist olaraq belə bir haqlı əqidəyə sahibəm. Bu, həm şair kimi, həm jurnalist kimi mənim amalımdı. Məni dar ağacından assalar da şair-jurnalist kimi hər zaman haqq sözümü deyəcəyəm  və haqqı-ədaləti yazacağam. Bir daha qeyd edirəm ki, söz adamı, qələm sahibi olaraq belə bir doğru, düzgün əqidənin sahibiyəm.  Neft-qaz ölkəsi AZƏRBAYCAN adlı milyonlar səltənəti olan məmləkətin ac-yalavac qalan, yavan çörəyə möhtac olmuş kasıbları, yoxsulları zibil qutularından hər gün dəmir toplayıb yığaraq qazandığı pula çörək alır, korrupsioner yüksək vəzifəli şəxsləri, məmurları isə bər-bəzəkli villalarda, təmtəraqlı, al-əlvan , göz oxşayan bəzəkli saraylarda ailə üzvlərilə, doğmalarıyla birgə lüks və komfortlu həyat yaşayıb xoşbəxt ömür sürürlər... Bu, necə haqq-ədalətdir axı? Cənablar, deyin, haqq-ədalət belə olurmu? Xalqın səfalətdə yaşaması ədalətlidirmi?  Xalqa ədalətsizlik, haqsızlıq etmək olarmı? Bu xoşagəlməz hal düzgündürmü sizcə? Şair-jurnalist kimi mənə çox təəccüblüdür ki, korrupsioner məmurlar və korrupsiya içində üzən, XALQa məxsus olan təbii sərvətlərdən gələn milyonlarla, milyardlarla maliyyə vəsaitini talayan vəzifəli şəxslər o təmtəraqlı villalarında, o möhtəşəm Şah sarayına bənzər saraylarında balınca necə baş qoyub rahat yata bilirlər? Cənab məmurlar, xahiş edirəm, şair-jurnalist kimi sizlərə ünvanladıgım bu ciddi sualları çox tez bir vaxtda cavablandırasınız... Əgər bilmirsinizsə, nəzərinizə çatdırıram ki, zəngin neft ölkəsi olan Azərbaycan adlı  məmləkətin vətəndaşları səfalət içində ac-yalavac yox, zənginlik içində xoşbəxt yaşamalıdır... Bu, birmənalı belə olmalıdır...  Axı özünüz də çox-çox yaxşı bilirsiniz ki, bu ölkənin sayız-hesabsız yeraltı-yerüstü tükənməz təbii sərvətləri var. Bəs hanı bu sərvətlərdən Azərbaycana gələn milyonlar, milyardlar? Görəsən kimlərin büdcəsinə, kimlərin cibinə dolur bu maliyə vəsaiti??? ZAVALLI XALQ... Sözün bitdiyi andı. P. S. Bu dünyadan heç nə aparmayacaqsız. Məmurlar, var-dövlətiniz, sərvətiniz inanın, bu dünyada qalacaq. Apara bilsəniz, 5 metr ağ kəfən apara bilərsiniz. Bunu qəti unutmayın. XATİRƏ ƏZİZ Rəhimli Şair-jurnalist

Suriyanın Hələb şəhərində hava limanı yaxınlığında hərbi qərargahda güclü partlayış baş verib. Sozcu.az Türkiyə mediasına istinadən xəbər verir ki, partlayış əhali arasında təşvişə səbəb olub. Olayla bağlı rəsmilər hələ ki, açıqlama verməyib.

Bakıda və Abşeron yarımadasında iyulun 12-də havanın yağmursuz olacağı gözlənilir. Milli Hidrometeorologiya Xidmətindən Sozcu.az-a verilən məlumata görə, şimal-qərb küləyi əsəcək, gündüz cənub-şərq küləyi ilə əvəz olunacaq. Havanın temperaturu gecə 21-25° isti, gündüz 33-38° isti olacaq. Atmosfer təzyiqi 759 mm civə sütunu olacaq. Nisbi rütubət gecə 60-70 %, gündüz 35-40 % olacaq. Azərbaycanın rayonlarında hava şəraiti əsasən yağmursuz olacaq. Lakin gündüz bəzi dağlıq ərazilərdə qısamüddətli az yağış yağacağı, şimşək çaxacağı ehtimalı var. Şərq küləyi əsəcək. Havanın temperaturugecə 20-25° isti, gündüz 35-39° isti, dağlarda gecə 10-15° isti, gündüz 20-25° isti olacaq.

Təbriz şəhərində yerləşən “Sahənd” sənaye kompleksində güclü partlayış baş verib. Sozcu.az xəbər verir ki, bu barədə “Tasnim Nyus” məlumat yayıb. Hadisə zamanı bir neçə nəfər xəsarət alıb, yaralılar xəstəxanaya yerləşdirilib. İlkin ehtimallara görə, partlayışa texniki nasazlıq səbəb olub, lakin rəsmi qurumlar araşdırmanın davam etdiyini bildiriblər.

Ermənistanda rus əsgəri özünü başından vurub. Sozcu.az Bakupost.az-a istinadla xəbər verir ki, iyulun 10-da başından güllə yarası alan əsgər Gümrü şəhərinin tibb mərkəzinə aparılıb. Zərərçəkmiş təcili əməliyyat olunub və hazırda reanimasiya şöbəsində komadadır. Həkimlər onun vəziyyətini son dərəcə ağır qiymətləndirirlər. İlkin məlumata görə, yaralı Ermənistanda yerləşən 102-ci Rusiya hərbi bazasının hərbçisidir. Onun Rusiya vətəndaşı Aleksey Q. (2002-ci il təvəllüdlü) olduğu müəyyən edilib. İntihara cəhd variantı nəzərdən keçirilir.

Tehranın Çitqar bölgəsində hündürmərtəbəli yaşayış binasında partlayış olub. Sozcu.az xəbər verir ki, bu haqda yerli media məlumat yayıb. Şahidlərin sözlərinə görə, partlayışa səbəb kiçik ölçülü pilotsuz uçan aparat zərbəsi olub. Tehran Fövqəladə Hallar Təşkilatı isə partlayışın qaz sızması nəticəsində baş verdiyini bildirib.

ABŞ vətəndaşları heç bir səbəbdən İrana səfər etməməlidir. Sozcu.az xəbər verir ki, bu haqda ABŞ Dövlət Departamenti xəbərdarlıq edib. “Biz vətəndaşlarımıza, xüsusən də ikili vətəndaşlığı olan şəxslərə İrana səfər etməməyi tövsiyə edirik”,- xəbərdarlıqda bildirilib.

Məktəbəqədər təhsil müəssisəsində çalışan 4977 müəllim diaqnostik qiymətləndirmədən 30-dan az bal toplayıb. Sozcu.az xəbər verir ki, 2024-cü ildə məktəbəqədər təhsil müəssisələrində çalışan 11 218 nəfər tərbiyəçi-müəllimin ilk dəfə diaqnostik qiymətləndirilməsi keçirilib. Müəllimlərdən sadəcə 1-i maksimum – 60 bal toplayıb. Digər göstəricilər isə aşağıdakı kimidir: 50 baldan yuxarı toplayanların sayı – 324 nəfər (2.9%) 46 baldan 51 bala qədər – 911 nəfər (8.1%) 41 baldan 46 bala qədər – 1380 nəfər (12.3%) 36 baldan 41 bala qədər – 1624 nəfər (14.5%) 30 baldan 36 bala qədər – 2002 nəfər (17.8%) 30 baldan aşağı toplayanların sayı – 4977 nəfər (44.4%)

Almaniya ABŞ-dan “Patriot” sistemlərini alaraq Ukraynaya göndərməyə hazırdır. Sozcu.az xəbər verir ki, bunu Almaniya Kansleri Fridrix Mertz Romada keçirilən Ukraynaya dəstək konfransında deyib. Mertz ötən həftə ABŞ Prezidenti Donald Trampla bu barədə danışdığını, lakin qəti qərar verilmədiyini bildirib.

“Azərbaycanda hərbi xidmət yaşı ilə bağlı uzun müddətdir müzakirələr aparılır. Artıq hərbi xidmət yaşının 18-dən 20-yə qaldırılmasının vaxtı çoxdan çatıb.” Bu fikirləri hərbi ekspert Üzeyir Cəfərov KONKRET.az-a açıqlamasında səsləndirib. Ekspertin fikrincə, 18 yaş məktəbli yaşına uyğun gəlir və bu dövrdə gənclər hələ həyat təcrübəsi qazanmamış olur: Toyuqlu pizza “Məktəbi yeni bitirən gənc ali təhsil ala bilmədikdə dərhal orduya göndərilir. Bu, olduqca ciddi rejimli bir mühitdir. Halbuki, həmin şəxslərə bir şans verilməlidir. Ola bilər ki, imtahanda uğur qazanmayıb və ya başqa səbəbdən ali təhsil ala bilməyib. Bu, o demək deyil ki, dərhal hərbi xidmətə aparılmalıdır”, – deyə ekspert bildirib. Üzeyir Cəfərov hesab edir ki, bu məsələdə Elm və Təhsil Nazirliyi güc strukturları ilə birgə çalışmalıdır: “Komandirlər hərbi xidmətə yeni gələn gənclərin yaşadığı çətinliklərlə üzləşir. Hərbi xidmətin 20 yaşdan başlaması insanın bir qədər də formalaşması baxımından daha məqsədəuyğundur. Təhsilini davam etdirmək istəyənlərə şərait yaradılmalıdır. Peşə təhsili müəssisələrinə də üstünlük verilməlidir. Əgər biri ali məktəbə daxil ola bilməyibsə, ən azından bir peşəyə yiyələnə bilər”. Ekspert bildirib ki, çağırış dövründə 18 yaşlı gənclərin əsgər gedərkən yaşadığı psixoloji sarsıntılar da nəzərə alınmalıdır: “Zar-zar ağlayan çağırışçılar görürük. Səhər rejimi, nizam-intizam, gigiyenik qaydalar, bunların hamısı böyük psixoloji gərginlik yaradır. Ona görə də bu yaşın 20-yə qaldırılması zəruridir”. Üzeyir Cəfərovun sözlərinə görə, inkişaf etmiş ölkələrdə bu cür yanaşma mövcuddur və Azərbaycanda da bu model tətbiq olunmalıdır. O, hərbi xidmət yaşının tez bir zamanda 18-dən 20-yə qaldırılmasının vacibliyini vurğulayıb”.

Rusiya Prezidenti Vladimir Putin Ukraynaya qarşı mübarizəni davam etdirməyi planlaşdırır. O, müharibədən çıxış yolları axtarmır. Sozcu.az xəbər verir ki, bu barədə Ukrayna Prezidenti Vladimir Zelenski deyib. "İlin ortasıdır və onun birinci yarısı bir neçə şeyi aydınlaşdırdı. İndi bütün tərəfdaşlara aydındır ki, Rusiya bütün sülh səylərinə mane olur. Və atəşkəslə bağlı bütün təklifləri, o cümlədən ABŞ-ın təklifini rədd edən Putindir. Rusiya nəinki cəbhəyə təzyiq edir, müharibəni genişləndirməyə çalışır, silah istehsalı üçün böyük resurs sərf edir”, - deyə Zelenski bildirib.

Böyük Britaniyanın Baş naziri Keyr Starmer və Fransa Prezidenti Emmanuel Makron arasında Londonda görüş baş tutub. Sozcu.az xarici mediaya istinadən xəbər verir ki, Londonda keçirilən görüşdə diplomatiya ilə yanaşı, Rusiyaya təzyiqlərin artırılmasının zəruriliyi müzakirə olunub. Starmer qeyd edib ki, Avropanın Ukraynada sülhməramlı qüvvələri yaratmaq planları bir neçə aylıq planlaşdırmadan sonra nəhayət formalaşıb. Makron isə atəşkəs razılaşması əldə olunarsa, onların həyata keçirilməyə hazır olduğunu vurğulayıb.

Kimya müəllimlərinin sertifikasiya prosesində heç bir qeyri-adi hal olmayıb. Sozcu.az xəbər verir ki, bu sözləri elm və təhsil naziri Emin Əmrullayev ADA Universitetində “Sertifikatlaşdırma 2025: peşəkar müəllim–keyfiyyətli təhsil” mövzusunda keçirilən tədbirdə deyib O bildirib ki, həmin suallara nəzər yetirilib:  “Küçədən keçən insanlar da sertifikasiya prosesinə etiraz edir. Sertifikasiya prosesində iştirak etməyən şəxslərin də etiraz etməsi düzgün deyil”. Nazir kimya fənnindən sertifikasiya imtahanında iştirak edən müəllimlərin narazılıqlarına belə reaksiya verib: "Biz imtahanlardan sonra testləri təhlil edirik. Bu o demək deyil ki, kimsə bərkdən qışqırsa, biz ondan qorxub imtahanı ləğv edəcəyik.  20 min müəllimi sertifikatlaşma etmişik. Onlardan 5-i imtahana telefon keçirmək istəyib. Biz telefonu alıb, onları imtahandan kənarlaşdırmışıq. Bu o demək deyil ki, sertifikatkaşma prosesi düzgün deyil. Kimya fənninə gəlincə isə, 350 nəfər yüksək bal toplayıb. Biz yavaş-yavaş T test şkalalarına keçirik. Bunu zamanla hamı öyrənəcək".

Azərbaycan Prezidenti İlham Əliyevin Ermənistan Baş naziri Nikol Paşinyanla təkbətək formatda görüşünə fasilə verilib. Sozcu.az xəbər verir ki, görüş fasilədən sonra davam edəcək.

7318 müəllimin işinə xitam verilib. Növbəti il bütün müəllimlər sertifikasiyadan keçmiş olacaq. Sozcu.az xəbər verir ki, bunu elm və təhsil naziri Emin Əmrullayev “Sertifikatlaşdırma 2025: peşəkar müəllim - keyfiyyətli təhsil" mövzusunda keçirilən tədbirdə deyib. O, prosesdən əvvəl yaranan narazılıqları xatırladıb: “Amma bu gün növbəti mərhələ uğurla yekunlaşır. Ötən il 31 852 nəfər ibtidai sinif üzrə sertifikasiyadan keçib”. “Ümumilikdə bugünə 7 318 müəllim uğursuz nəticə göstərib. 700 ə qədər müəllim birinci iştirakdan sonra uğursuzluqdan ikinci mərhələdə iştirak etməyib və özü işdən aurılıb. Biz başa düşürük ki, proses ağırdır, amma 30 suala cavab verməyğn müəllimin məktəbdə tədris aparması düzgün deyil. Sertifikatlaşıdırmada verilən suallar xüsusi çətin deyil. Mərhələli şəkildə müəllimlər standartlara cavab verən mütəxəssislər olsun”.

Qəzza zolağında yaşayan 50 mindən çox ana və körpə aclıq təhlükəsi ilə üz-üzədir. Bölgədə körpələr üçün nəzərdə tutulan mama və qida ehtiyatlarının tükənməsi səbəbindən ac uşaq sayının artması ciddi narahatlıq doğurur. Sozcu.az xarici mətbuata istinadən xəbər verir ki, beynəlxalq humanitar təşkilatlar və yerli yardım qurumları ərzaq çatışmazlığı və blokadalar nəticəsində ana və körpələrin qida təminatının kəskin şəkildə azaldığını bildirir. Bu, körpələrin sağlamlığının və həyatının təhlükə altında olduğunu göstərir. Humanitar kömək çağırışları gücləndirilsə də, bölgədə vəziyyət hələ də kritik olaraq qalır və beynəlxalq ictimaiyyətin dərhal müdaxiləsi zəruridir. Qida qıtlığı səbəbindən körpələr arasında zəiflik və xəstəlik hallarının artması müşahidə edilir. pizza sifarişi Beynəlxalq təşkilatlar Qəzza zolağında yaşayan insanların həyatını xilas etmək üçün qida və tibbi yardımın artırılmasını tələb edir. Eyni zamanda, bölgədə blokadaların yumuşaldılması və humanitar yardımın maneəsiz çatdırılması üçün siyasi addımların atılması çağırılır.

Hacıqabulda 55 yaşlı kişi bədbəxt hadisə nəticəsində ölüb. Sozcu.az xəbər verir ki, hadisə rayonun İkinci Udulu kəndində baş verib. Kənd sakini, 1970-ci il təvəllüdlü Yusif Əli oğlu Ağayev yaşadığı evin həyətyanı sahəsində yerləşən artezian quyusundan su götürmək istəyən zaman, nasosa qoşulmuş və gərginlik altında olan elektrik naqilinin izolyasiyasız hissəsinə toxunması nəticəsində cərəyan vurmasından hadisə yerində ölüb. Faktla bağlı Hacıqabul Rayon Prokurorluğunda araşdırma aparılır.

Yoxsul vətəndaşları taleyin ümidinə qalan, yavan çörəyə möhtac olan məmləkət... Milyonlar səltənətinin vətəndaşları nə üçün işsiz və ac-yalavac qalmalıdır öz yurdunda? Birbaşa mətləbə keçim. Gün kimi aydındır ki, Azərbaycanda neçə illərdir işsizlik tüğyan edir. Şəxsən mən, dövlətin aidiyyatı qurumlarında işsiz vətəndaş kimi rəsmi olaraq qediyyatdan keçmişəm. İşsizlik statusum var. Amma dövlət tərəfindən mənə işsizlik müavinəti verilmir. Niyə axı? Nə üçün belə olmalıdır ki? Qərbdə, Avropa ölkələrində işsiz vətəndaşlara dövlət tərəfindən müəyyən olunmuş sosial müavinət verilir. Yəni işsiz vətəndaşlar bu maliyyə hesabına sosial baxımdan həyatını  idarə etsin və yaşaya bilsin. Söz düşmükən, bir ciddi nüansı da demək istyirəm. Ali təhslliyəm. Bir neçə sahə üzrə təhsilim var. Amma neçə illərdi ki, işsizəm, işləmirəm. Çünki ölkədə iş yerləri yoxdur işləmək üçün. Bu yerdə sual olunur ki, işləməyən vətəndaşlar necə yaşamalıdır sosial-iqtisadi baxımdan?  İşsiz olduğu üçün pulsuz qalan vətəndaşlar ac-yalavac qalıb həyatı ilə vidalaşa bilər axı. Sizcə, yavan çörəyə möhtac olan ac insan uzun müddət necə yaşaya bilər sosial baxımdan? Məmurlar çox yaxşı bilir ki, bu, qəti şəkildə mümkün deyil. Cənab məmurlar, ölkə əhalisini yüksək rifah halında yaşatmaq lazımdır. Çünki bizlər milyonlar səltənəti, neft-qaz ölkəsi olan Azərbaycanın vətəndaşlarıyıq. Bukimi amilləri niyə nəzərə almırsınız ki?  Azərbaycanda həm bakalavr, həm də migistratura təhsili olan minlərlə gənclər iş tapa bilmədikləri üçün işsizdir. Çox böyük ürək yanğısıyla qeyd edim ki, bu gənclərin çoxusu məcburiyyət qarşısında ana dediyi öz doğma Vətənini tərk edib uzaq Avropa ölkələrinə üz tuturlar.  Yəni gənclər buna məcbur olur. Cənablar, sizcə, zəngin ölkəsi olan XALQı belə yaşatmaq lazımdırmı? Yaxşı bilirsiniz ki, bu ölkənin saysız-hesabsız təbii sərvətləri var. Bu sərvətlərdən ölkə büdcəsinə daxil olan yüsək məbləğdə maliyyə vəsaiti hara xərclənir, kimlərin cibini doldurur bəs? Ümumiyyətlə, ölkədə zavodlar, fabriklər açılmır, istehsalat sahələri yaradılmır, iri sənye müəssisələri tikilmir. Axı nə üçün, hansı səbəblərə görə yeni iş yerləri açmırsınız ki, işsiz vətəndaşlar da işlə təmin olunsun. Nədən belə laqeyd yanaşırsınız ölkə vətəndaşlarının həyatına?  Bəzi xəbər saytlarının yazdığını oxuyanda xəbərdar oluruq ki, qeyri-rəsmi məlumata görə Azərbaycanda 650 minə yaxın əmək qabiliyyətli işsiz olan vətəndaşlar var.  Bu isə ürəkaçan xəbər deyil amma. Hökumət üzvləri, eləcə də məmurlar, sizlər idarəçiliyi necə edirsiniz? Cənablar, necə düşünürsünüz, idarəçilik belə olurmu? Mənim kimi ali təhsilli minlərlə vətəndaşlar işsizdir. Hökumət isə 1 qara qəpik də olsa işsizlik müavinəti ödəmir ölkənin işsiz qalan vətəndaşlarına. Bu, nə dərəcədə düzgündür sizcə, vəzifəli şəxslər, məmurlar. Cənab Baş nazir və hökumət üzvləri, eləcə də Azərbaycan dövlətinin bu məsələlərlə bağlı aidiyyatı qurumlarının rəhbərləri.... İşlə təmin etmədiyiniz, ölkədə iş yerlərinin olmamasına görə iş tapa bilməyən minlərlə vətəndaşların həyatından, işsiz olanların ac-yalavac qalmasından, ürək yandıran sosial vəziyyətindən niyə xəbəriniz yoxdur? Nə üçün belə olmalıdır? Hökumət olaraq bu ciddi məsələlərdən xəbəriniz olmalıdır axı... Niyə xəbərsizsiniz əhalinin çox hissəsinin ağrılı-acılı, əzablı gün-güzaranından? Xəbəriniz olsaydı yəqin ki, XALQın əksər hissəsinin sosial durumu bu qədər acınacaqlı gündə olmazdı. Amma bukimi məsələlərə cavabdeh olsaz da təəssüflər ki, sizlər vətəndaşların ağır, çətin və dözülməz sosial durumundan xəbərsizsiniz. Çox-çox təəsüf olsun belə xoşagəlməz hallara.  Şair jurnalist kimi məni şox təəccübəndirir ki, hökumət üzvlərinin, həmçinin yüksək vəzifəli şəxslərin məmurların işinin adı nədir görəsən? Sizlər nə işlə məşğulsunuz bəs?  Hökumət olaraq ölkə vətəndaşlarının sosial-iqtisadi baxımdan necə yaşamasına və hər bir vətəndaşın öz ayaqları üstündə dura bilməsinə, firavan həyat yaşamasına  cavabdehsiniz. Cavabdehliyinizi bu formada yerinə yetirirsinizmi cənablar? P. S. Həzrəti Süleymana qalmayan dünyadı. P. S. Sərvət, pul-para bu dünyada qalacaq... XATİRƏ ƏZİZ Rəhimli Şair-jurnalist

Ermənistanda “Hayastan” fraksiyasının deputatı Artur Sərkisyan həbs edilib. Sozcu.az xəbər verir ki, bu barədə erməni mətbuatı məlumat yayıb. Məlumata görə, onun barəsində 2 aylıq həbs qətimkan tədbiri seçilib. Qeyd edək ki, bundan öncə prokurorluğun müraciəti ilə A.Sərkisyanın deputat toxunulmazlığı ləğv edilmişdi.

Mixail Boqdanov Rusiya xarici işlər nazirinin müavini, habelə Rusiya Prezidentinin Yaxın Şərq və Afrika ölkələri üzrə xüsusi nümayəndəsi vəzifələrindən azad edilib. Sozcu.az xəbər verir ki, bu barədə Rusiya Prezidenti Vladimir Putinin rəsmi hüquqi informasiya portalında yayımlanmış müvafiq fərmanlarında deyilir.