Son vaxtlar maşın bazarında nəzərəçarpacaq durğunluq müşahidə olunur. İkinci əl avtomobillərə olan maraq əvvəlki illərlə müqayisədə azalıb. Bəs bunun səbəbi yalnız yüksək qiymətlərdir, yoxsa alıcıların seçimlərinə təsir edən başqa amillər də var? Nəqliyyat məsələləri üzrə ekspert Eldar Bəşirov mövcud vəziyyətin səbəblərini “Yeni Sabah”a belə açıqlayıb: “Son aylarda avtomobil bazarında əsas tendensiya Çindən gətirilən yeni maşınların artmasıdır. Bu avtomobillər həm qiymət baxımından münasibdir, həm də müasir texnologiyalar və komfort imkanları ilə seçilir. Məhz buna görə də alıcıların çoxu artıq köhnə maşınlara deyil, təzə modellərə üstünlük verir. Əksinə, köhnə avtomobillərin qiymətləri bazarda hələ də yüksək olaraq qalır. Bu da alıcıları daha sərfəli və yeni modellərə yönəldir”. Ekspert bildirib ki, yeni ildə vəziyyət dəyişəcək: “İlin sonuna qədər xaricdən gətirilən elektromobillərə və bəzi avtomobil növlərinə tətbiq olunan vergi güzəştləri qiymətlərin nisbətən aşağı qalmasına şərait yaradıb. Lakin bu güzəştlərin yalnız ilin sonuna qədər qüvvədə olacağı açıqlanıb. Yeni ildən etibarən həmin imkanlar aradan qalxacaq”.

Ukraynanın keçmiş prezidenti Viktor Yuşşenko ölkənin 1991-ci il sərhədlərinə qayıtması ilə kifayətlənməyəcəyini bildirib və Ukraynanın Silahlı Qüvvələrini Moskvaya hücuma çağırıb. Sozcu.az xəbər verir ki, Yuşşenko bu barədə "Apostrof TV" "YouTube" kanalına müsahibəsində deyib. "Mən artıq elə yaşdayam ki, deyə bilərəm: mənim öz təsəvvürüm var və mənəvi cəhətdən, öz millətimin mənafeləri üçün hərəkət edə bilərəm. Kimsə deyir - gəlin Xutor-Mixaylovskiyə qədər irəliləyək.  Mən isə deyirəm - vəssalam? Siz ən böyük problemi övladlarınıza və nəvələrinizə buraxırsınız. Moskvaya hücum!" - deyə Yuşşenko bildirib./Oxu.az

Naxçıvanda avtobus qəzaya düşüb. Sozcu.az xəbər verir ki, hadisə Naxçıvan-Sədərək magistralının Kəngərli rayonu Xok kəndi ərazisindən keçən hissəsində baş verib. İlkin məlumata əsasən, avtobusun dərəyə aşması nəticəsində 15 sərnişin xəsarət alıb. Hadisə yerinə Naxçıvan Muxtar Respublikasının (MR) Daxili İşlər (DİN) və Fövqəladə Hallar (FHN) nazirliklərinin əməkdaşları cəlb olunublar.

Xəbər verdiyimiz kimi, SOCAR-ın İnvestisiyalar və Marketinq üzrə vitse-prezidentinin sabiq müavini Adnan Əhmədzadə Azərbaycanda həbs olunub. Bakı şəhəri Səbail Rayon Məhkəməsində keçirilən iclasda Adnan Əhmədzadə barəsində 4 ay müddətinə həbs qətimkan tədbiri seçilib. Dövlət Təhlükəsizliyi Xidmətində (DTX) aparılan cinayət işi çərçivəsində o, iqtisadi təhlükəsizliyə qarşı təxribat, vəzifə səlahiyyətlərindən sui-istifadə və xüsusilə külli miqdarda mənimsəmə əməllərində ittiham olunur. Məhkəmədə elan edilən ittihamda bildirilib ki, Adnan Əhmədzadənin fəaliyyəti dövlətin maliyyə maraqlarına ciddi ziyan vurmaqla yanaşı, həm də iqtisadi sabitliyi hədəfə alıb. Onun barəsində seçilən həbs qətimkan tədbiri istintaqın gedişi üçün zəruri addım kimi qiymətləndirilir. Adnan Əhmədzadənin həbsi ölkə qanunlarını kobud şəkildə pozaraq “Azeri Light” markalı nefti digər xam neft məhsulları ilə qarışdırmaqda ittiham olunması ilə bağlıdır. Bu əməl Azərbaycanın neft sənayesinin etibarlılığına və bazar şəffaflığına ciddi zərbə kimi qiymətləndirilir. Daha da sensasion iddiaya görə, Əhmədzadənin bu hərəkəti Rusiya kəşfiyyatı ilə birgə törətməsinə dair şübhələr mövcuddur. Mənbələr bildirir ki, bu hadisə ilə Azərbaycan dövlətinə həm maliyyə, həm də siyasi ziyan vurulması hədəflənib. Sozcu.az xəbər verir ki, tanınmış vəkil Əkrəm Həsənov Musavat.com-a deyib ki, ittihamlar təsdiqlənərsə, Adnan Əhmədzadəni ağır cəza gözləyir: “Xaricə kəmərlər vasitəsilə ötürülən Azərbaycan neftinin xlorid maddəsi ilə qarışdırılması çox ciddi bir cinayətdir. Bu cinayətin Rusiyanın törətdiyi barədə də məlumatlar dolaşırdı. İndi isə bu cinayətin SOCAR-da yüksək vəzifə tutmuş, Azərbaycan neftinin xaricdə satışını təşkil edən şəxs tərəfindən törədilməsi haqda çox gözlənilməz bir detal üzə çıxıb. Azərbaycanda dövlət məmurları, onların ətrafı tərəfindən oğurluq və sui-istifadə halları tez-tez baş verir. Bilirik ki, korrupsiya adiləşməsə də, yanaşma belə olur ki, əksəriyyət belədir və bu adamları yola verirlər. İndi isə Azərbaycan dövləti üçün ən strateji bir məhsula – neftə xlorid qatılması kimi bir cinayət ortalıqdadır. Bu, ölkənin strateji əhəmiyyətli bir məhsulunun sıradan çıxarılmasına, ölkənin etibarlı tərəfdaş kimi imicinin zədələnməsinə və nəticə etibarilə Azərbaycanın əsas gəlirlərini hədəf alan bir addımdır. Bu əməli törətmiş şəxs kimliyindən asılı olmayaraq çox ağır ittihamlarla üz-üzə qalacaq. Bu, sıradan bir cinayət deyil ki, ona bağışlasınlar. Belə bir əməli törətmiş şəxsi ömürlük cəza gözləyir”. Ə.Həsənov Adnan Əhmədzadənin Rusiyanın maraqları çərçivəsində belə bir addımı təkbaşına atmasının inandırıcı görünmədiyini bildirib: “Yəqin ki, neftin ötürüldüyü ölkələrdə də onunla əlbir olan şəxslər var. Yoxsa o, təkbaşına bu cinayəti törədə bilməz. Ehtimal edirəm ki, bu cinayətin arxasında daha böyük qüvvələr də var. Aydındır ki, Adnan Əhmədzadə nefti xaricə satsa da, neftin birbaşa kəmərlərə vurulması ilə məşğul olmur. Nəticə etibarilə onun neftə xlorid qatması da mümkün deyil. Mümkündürmü ki, Adnan Əhmədzadənin özü də bir qurbandır? Məsələn, indiki halda Rusiya xüsusi xidmət orqanları elə bir əməliyyat qura bilərlər ki, Əhmədzadə cinayətin təşkilatçısı kimi görünsün” – sualına Əkrəm Həsənov belə cavab verib: “Bəli, əlbəttə ki, baş vermiş cinayət 1 nəfərin əməli deyil, böyük bir cinayətkar dəstənin əməlidir. Doğrudur ki, Adnan Əhmədzadə nefti satsa da, birbaşa kəmərlərə vuran şəxs deyil. Ona görə də Adnan Əhmədzadə ilə yanaşı digər şəxslərin də məsuliyyət məsələsi həll edilməlidir. Başqa cür mümkün də deyil ki, Azərbaycan neftinə xlorid və ya digər maddə qatılsın və bunu aşağılarda kimsə özbaşına etsin. Burada mütəşəkkil qaydada törədilən cinayətin əlamətləri var. İstintaq yəqin ki, mütəşəkkil dəstənin bütün üzvlərini müəyyən edəcək”. “Adnan Əhmədzadənin həbsi xəbərinə qədər həyat tərzi haqda mətbuatda yazılanları nəzərə alsaq, onun milyonlar xərcləyib dünya şöhrətli futbolçuları ölkəyə gətirməsindən tutmuş özünün son dərəcə dəbdəbəli həyatını ortaya qoyan məlumatlar var. Aydındır ki, Adnan Əhmədzadə dəbdəbəli həyatını Azərbaycan neftinin satışından əldə etdiyi milyonlar hesabına təmin edir. Belə bir halda onun Azərbaycan neftinə haram qatmasının məntiqi nədir? Niyə belə bir şəxs gedib Rusiya xüsusi xidmət orqanlarının buyruqçusuna çevrilir?” – sualına isə Əkrəm Həsənov belə cavab verib: “Ötən il Adnan Əhmədzadə dünya şöhrətli futbolçuları Azərbaycana gətirəndə əksəriyyət onun kimliyi haqda məlumatlı oldu. Hamı da başa düşür ki, Adnan Əhmədzadənin sağa-sola xərclədiyi pulların mənbəyi haradır. Aydındır ki, Messi və digərlərinin Azərbaycana gətirilməsi 100-200 minə başa gəlmir. Amma bu işə pul xərcləmək də pulları küçəyə atmaq kimi bir şeydir. Azərbaycanda bu tip xeyli dələduz adam var. Amma insanlar onları xeyriyyəçi kimi tanıyır. Bilmir ki, xərclənən pullar şəxsin halal pulu deyil, kimlərinsə mənimsənilmiş haqqıdır. Ölkədə 1 milyon oğurlayıb 10 min xərcləməklə xeyriyyəçi, yaxşı oğlan, çörəkverən kişi statusu qazanan xeyli dələduz var. Bu addımlar böyük oğurluqları pərdələmək üçündür. Oğurladıqca da, iştah artır. Pul azaldıqca da, hər bir cinayətə qol qoymaqdan da çəkinmirlər. Belə adamların Rusiya ilə yanaşı Ermənistana da işləməsinə təəccüb etmərəm”. Əkrəm Həsənov deyib ki, Adnan Əhmədzadənin törətdiyi iddia olunan cinayəti 10 il öncə Azərbaycan Beynəlxalq Bankında törədilən cinayətlə müqayisə etmək olar: “Azərbaycan Beynəlxalq Bankı sistem xarakterli bir bank idi və günlərin birində məlum olmuşdu ki, bankdakı pulları bank rəhbərliyi yoxa çıxarıb. Devalvasiya zamanı üzə çıxan bu oğurluq dövlətin iqtisadi durumunu son dərəcədə ağırlaşdıran bir əməl idi. Ona görə də həbsə alınmış digər korrupsioner dövlət məmurlarını bir müddət sonra həbsdən azad etsələr də, Azərbaycan Beynəlxalq Bankının sabiq prezidentini azad etmirlər. Çünki Cahangir Hacıyev həddini aşmışdı, ölkə miqyaslı, ölkənin iqtisadi durumunun birdən-birə pisləşməsinə gətirib çıxaran əmələ yol vermiş, ölkəyə ziyan vurmuşdu. Bu adamların törətdikləri cinayətlər ölkə miqyaslı bir cinayətdir. Bu adamlar hansısa rayonun korrupsioner başçısı deyil ki, 3-5 milyon oğurlasınlar və tutulandan az sonra onları bağışlasınlar. Belə əməllərə görə Azərbaycan neftinin alıcıları sıradan çıxa bilər və bu, ölkəmiz üçün çox fəlakətli iqtisadi durumun yaranmasına gətirib çıxara bilər”. “Ortada olan iddialardan belə nəticə çıxır ki, Adnan Əhmədzadə Azərbaycan neftinə xlorid qatıb və atıb. Bu adama bir nəzarət olmayıb ki, belə bir əməli törədə bilib” – sualına Əkrəm Həsənovun cavabı belə oldu: “Azərbaycan Beynəlxalq Bankı Azərbaycanın 1 nömrəli bankı idi və bu gün də belədir. O zaman Samir Şərifov bankda Müşahidə Şurasının sədri idi. Birbaşa Azərbaycan Beynəlxalq Bankına nəzarət etməli vəzifəli şəxs idi. Amma real nəzarət etmirdi. Çünki oğru oğruya nəzarət etmir, düşünür ki, gedib desə ki, oğurluq edib, özünün oğurluqları da ortaya çıxacaq. Bu, adi korrupsiya münasibətləridir və Adnan Əhmədzadənin törətdiyi əməllər də davamlı korrupsiya münasibətlərinin nəticəsi olaraq törədilib. Yəqin ki, bütün suallara istintaqın sonunda aydınlıq gətiriləcək. İnanıram ki, ittihamlar təsdiqlənsə, Adnan Əhmədzadə müttəhimlər kürsüsündə tək olmayacaq”.

Vladimir Putin görüşə razı olmasa, ABŞ Rusiyaya qarşı sanksiyaları gücləndirməlidir. Sozcu.az xəbər verir ki, bunu Ukrayna Prezident Vladimir Zelenski deyib. “Liderlərin görüşü olmasa və ya məsələn, atəşkəs olmasa, sanksiyalar gözləyirik. Yəni bu, tərəflərin iradəsindən asılıdır. Biz bu fikri dəstəkləyirik. Bunu bilirsiniz, heç kimə sirr deyil. Müharibə davam edərsə və sülhə doğru hərəkətlər olmasa, sanksiyalar gözləyirik”, - Zelenski əlavə edib.

2021-ci il seçki kampaniyasının ilk günlərindən bu, mənim üçün bir nömrəli sual oldu: niyə bu analar, bizə qayğı göstərən analar bizim seçkiqabağı mitinqimizə gəlirlər - bəzən ev paltarında və aydın görünürdü ki, son anda qərar veriblər. Sozcu.az xəbər verir ki, bu sözləri Ermənistan Baş naziri Nikol Paşinyan Vətəndaş Müqaviləsi Partiyasının bu gün keçirilən qurultayındakı çıxışında deyib. O bildirib ki, onların gəlişi işartı idi, çünki onların deyəcək sözləri vardı: “Kampaniyanın ilk günlərindən anladım ki, mənim əsas vəzifəm onları dinləmək və bunu praktiki siyasətə çevirməkdir. Onlardan eşitdiklərim məni şoka saldı. Onlar yalnız iki şey dedilər: birincisi, 9 noyabr 2020-ci il tarixli sənədi imzaladığım və müharibəni bitirdiyim üçün mənə təşəkkür etdilər. Bu mənim üçün əsl şok idi. Erməni elitasının əhəmiyyətli bir hissəsi məni vətənə xəyanətdə ittiham edirdi, onlara süd verən analar isə eyni şeyə görə mənə təşəkkür etdilər. Bu analardan soruşdum: nəyə görə mənə təşəkkür edirsiniz? Onların cavabı konkret oldu: on minlərlə əsgərin həyatını xilas etdiyinə və müharibəni bitirdiyinə, Ermənistanı xilas etdiyinə görə. Bizə dedilər: sülhə doğru gedin, bizə sülh lazımdır, ancaq sülh. Başa düşdüm ki, bu, xalqın, o cümlədən kişilərin səsidir”.

Lənkəran rayonunda məktəbli bacı-qardaşın öldüyü yol qəzası ilə bağlı cinayət işi başlanılıb. Sozcu.az "Report"a istinadən xəbər verir ki, faktla bağlı Lənkəran rayon Polis Şöbəsində Cinayət Məcəlləsinin 263.3-cü ( yol istismar qaydalarını pozma, iki və daha çox şəxsin ölümünə səbəb olduqda) maddəsi ilə cinayət işi başlanılıb, müvafiq ekspertizalar təyin edilib. Qeyd edək ki, ötən gün Quluzadə Vurğun Asif oğlu Lənkəran-Lerik magistral avtomobil yolunun Lənkəran rayonu Şovu kəndi ərazisindən keçən hissəsində idarə etdiyi 10-SV-620 dövlət qeydiyyat nişanlı "Mercedes-Benz C230" markalı avtomobillə yol kənarında hərəkətdə olan piyadalar - 2017-ci il təvəllüdlü Əlizadə Günay Şamid qızı və 2014-cü il təvəllüdlü Əlizadə Ramid Şamid oğlunu vurub. Sonuncular xəstəxanaya aparılarkən yolda ölüblər.

Ölkənin bəzi ərazilərinə leysan yağır, güclü külək əsir. Sozcu.az xəbər verir ki, bu barədə Milli Hidrometeorologiya Xidmətindən bildirilib. Məlumata görə, sentyabrın 20-si saat 10:00-a olan məlumata əsasən, ölkə ərazisində qeyri-sabit, yağıntılı və küləkli hava şəraiti müşahidə olunur. Əksər yerlərdə leysan xarakterli intensiv yağış yağır, şimşək çaxır. Düşən yağıntının miqdarı Zaqatalada 49, Qusarda 41, Oğuzda 40, Daşkəsən, Balakəndə 37, Qubada 36, Qax (Sarıbaş), Xaltanda 32, Şəki, Gədəbəy, Qrızda 28, Tovuz, Xınalıqda 27, Göygöldə 23, Şamaxıda 22, Qəbələdə 21, Altıağac, Mingəçevirdə 20, Şəmkirdə 19, Gəncədə 18, Sədərəkdə 17, Şabranda 13, Goranboy, Bərdədə 11, Yevlax, Göyçay, Naftalanda 9, Şərur, Bakıda və Abşeron yarımadasında 8, Ağdam, Ağstafada 7, Tərtər, Şahbuzda 6, Qobustanda 5, Zərdab, Ceyrançöl, Sabirabad, Ordubadda 4, İmişli, Kürdəmir, Culfada 3, Ceyrançöl, Beyləqan, Lənkəranda 2, Biləsuvar, Astara, Qubadlı, Şuşa, Xankəndi, Xocalı, Füzuli, Lerikdə 1 mm-dək olub. Yüksək dağlıq ərazilərə - Şahdağ (14 sm), Gədəbəy, Daşkəsən (Qoşqardağ), Göygöl (Hacıkənd-Kəpəz Murovdağ), Kəlbəcər, Laçına qar yağıb. Bir sıra ərazilərdə şimal-qərb küləyi əsir, küləyin maksimal sürəti arabir Daşkəsəndə 28, Culfa, Xızıda 25, Bakıda və Abşeron yarımadasında, Mingəçevirdə 23, Naxçıvan, Naftalanda 22, Şərur, Sabirabadda 20, Qobustan, Goranboyda 19, Bərdə, Sədərək, Kürdəmirdə 18, Qusarda 17, Ağdam, Tərtərdə 16 m/s-dək güclənir. Göyçay, Lerik, Balakən, Qax (Sarıbaş), Zaqatala, Şəki, Qəbələ, Şamaxı, Qrız, Şahdağda duman müşahidə olunur. Dumanda görünüş 500 metrədək məhdudlaşır.

SOCAR İnvestisiya departamentinin sabiq rəhbər müavini Adnan Əhmədzadə Azərbaycanda həbs olunub. Sozcu.az xəbər verir ki, bu barədə Musavat.com məlumat yayıb. Bildirilib ki, məlumatı məsələdən xəbərdar olan bir neçə mənbə təsdiqləyib. Xəbərlərə görə, Əhmədzadənin həbsi ölkə qanunlarını kobud şəkildə pozaraq, “Azəri Layt” markalı nefti digər xam neft məhsulları ilə qarışdırmaqda ittiham olunması ilə bağlıdır. Bu əməl Azərbaycanın neft sənayesinin etibarlılığına və bazar şəffaflığına ciddi zərbə kimi qiymətləndirilir. Mənbələrin bildirdiyinə görə, bu həbslə yanaşı, hökumət Bakının beynəlxalq mövqeyini zəiflədə biləcək korrupsiya və fərdi sui-istifadə hallarına qarşı mübarizəni gücləndirmək niyyətindədir. Hadisə həm də Azərbaycanın enerji sektorunda aparılan təmizlənmə və şəffaflıq kampaniyasının bir hissəsi kimi təqdim olunur. Qeyd edək ki, Adnan Əhmədzadə uzun illər SOCAR-da rəhbər vəzifələrdə çalışıb, həm ölkə daxilində, həm də xaricdə böyük biznes şəbəkəsi ilə tanınıb. Onun həbsi Azərbaycan enerji sektorunda rezonans doğurub. Xatırladaq ki, iyul ayında məlum oldu ki, Azərbaycandan ixrac olunan xam neftin bir neçə partiyasında zərərli maddə olan xloridin aşkarlanıb. Rumıniya və İtaliyaya çatan neft partiyalarında aşkarlanan zərərli maddəyə görə bir müddət Ceyhan limanından neft ixracının dayandırıldığı iddia olunsa da, Bakı-Tiflis-Ceyhan neft kəmərinin operatoru olan BP-Azərbaycan şirkəti xəbəri təkzib etdi. Şirkətin açıqlamasından aydın oldu ki, zərərli maddə Ceyhan limanındakı bir neçə saxlama çənində aşkarlanıb. Həmin çənlərdəki neft yenidən təmizləndi, eyni zamanda digər çənlərin vasitəsilə ixrac davam etdirildi. Hadisədən bir neçə həftə sonra Rumıniya mətbuatı ölkənin hüquq-mühafizə orqanlarındakı mənbələrə istinadən Azərbaycan neftinə zərərli maddənin Rusiya tərəfindən məqsədyönlü şəkildə qatıldığına dair məlumat yaydı. Rusiya tərəfi bu məlumatla bağlı hər hansı açıqlama verməyib. Dünya mətbuatının yazdığına görə, məqsəd həm Azərbaycana böyük maddi zərər vurmaq, həm də onun tərəfdaş ölkələrlə münasibətlərinə xələl gətirmək olub. Qeyd edək ki, zərərli maddə aşkarlandıqdan sonra BTC kəməri ilə Qazaxıstan neftinin nəqli də dayandırılmışdı. Nəql ötən həftə bərpa olunub. A.Əhmədzadənin həbsi ilə bağlı irəli sürülən iddialar həbsin məhz bu hadisə ilə əlaqədar olması ehtimalını yaradır. Qeyd edək ki, A.Əhmədzadə 2024-cü ildə dünyaca məşhur futbolçular Lionel Messi və Ronaldinyonu Azərbaycana gətirməsi ilə geniş rezonansa səbəb olmuşdu.

Bir il 7 aydır ki, Ermənistan-Azərbaycan sərhədində heç bir əsgər ölməyib və yaralanmayıb. Sozcu.az xəbər verir ki, bunu Ermənistanın baş naziri Nikol Paşinyan hakim “Mülki Müqavilə” partiyasının qurultayında çıxışı zamanı bəyan edib. "Müstəqillik əldə etdikdən sonra elə bir dövrümüz olmayıb ki, bir il yeddi ay sərhəddə açılan atəş nəticəsində heç bir əsgərimiz həlak olmasın və yaralanmasın. Bu, sülhdür. Azərbaycanla sülh imzalanıb", - Paşinyan vurğulayıb. O, Ermənistanın tarixi məqam qarşısında dayandığını da bildirib: “Bu gün biz birlikdə Ermənistan Respublikasında gələcək əsrlər boyu həyatın əsas xüsusiyyətlərini müəyyən edəcək qərarlar qəbul edəcəyik”. Baş nazir bu nailiyyət münasibətilə hər kəsi təbrik edib.

İsti bir yay günü idi. Çimərlik adamla dolub-daşırdı. İnsanlar dalğalara qaçaraq sərinləməyə çalışırdılar. Uşaqlar qumdan qala tikir, gülüş səsləri sahili bürüyürdü. Bəzən bu şən səs-küyün arasından xilasedici qülləsindən gələn Yusifin səsi eşidilirdi. O, arabir səsgücləndirici ilə insanlara qadağan olunmuş ərazilərə girməməyi xatırladırdı. Birdən hamının diqqətini sahildən xeyli uzaqda boğulan bir adam cəlb etdi. Dalğalar onu gah üzüaşağı, gah üzüüstə çevirir, dənizin dərinliyinə aparmaq istəyirdi. O, ümidsizcə əllərini yelləyir, suyun üzündə qalmaq üçün çabalayırdı. Hər dəfə başını sudan çıxaranda sanki son nəfəsini alırdı. İnsanların baxışları xilasedicinin qülləsinə dikilmişdi. Hamı həyəcanla Yusifi köməyə çağırırdı. Ancaq Yusif sanki onları eşitmirdi — sakitcə durbinlə uzaqları müşahidə edir, arabir su içirdi. Bu laqeyd görkəm kütlənin qəzəbini artırır, bəziləri əsəbdən qışqırır, onu söyürdülər. Yusifin baxışları dənizdə ilişib qalmışdı. Durbinin arxasında sanki bu günün dənizini yox, keçmişin dalğalarını görürdü. Keçmişin yükündən qurtulmaq, o günü bir daha yaşayıb bu dəfə xilas edə bilmək üçün içində qəfil dərin bir istək yarandı. Bir anlıq yadına o dəhşətli gün düşdü – dənizin qara-boz rəngi, qorxunc qışqırıqlar, suyun üstündə köməyə uzanan əllər və sonra dərin sükut… Yusif arvadının dənizdə boğulduğu günü xatırladı. İndi də dənizdə boğulan adam artıq taqətdən düşmüşdü. Əlləri zəifləyir, bədəni yavaş-yavaş dərinliyə çəkilirdi. Elə bu anda Yusif qüllədən yerə hoppandı. Gözlərində qəribə bir ciddilik vardı. Mənə tərəf dönüb sakit, amma qətiyyətli səslə dedi: — Getdik. Motorlu qayığa minib sahildən uzaqlaşanda qışqırıq səsləri arxada qaldı. Qayıq gurultu ilə irəliləyir, dalğaları yarırdı. Boğulan adama yaxınlaşanda Yusif tərəddüd etmədən suya atıldı. Mən də onun ardınca tullandım. Dalğalar bizi sağa-sola itələsə də, adama çatdıq. Yusif onu belindən tutub suyun üzünə çıxardı, mən isə qolundan yapışdım. Onu güclə qayığa qaldırıb uzatdıq. Oğlanın bədəni ağır idi, sanki bütün dəniz içindəydi. Dodaqları göyərmişdi. Vaxt itirmədən ilk yardıma başladıq: sinəsini masaj edib, süni nəfəs verdik. Bir neçə dəqiqəlik gərgin mübarizədən sonra oğlan öskürüb suyu qusmağa başladı. Sahilə qayıtdıq. Təcili tibbi yardım maşını bizi sahildə gözləyirdi. Tibb işçiləri oğlanı xərəkdə maşına apardılar. Qısa yoxlamadan sonra onun həyatının xilas edildiyi təsdiqləndi. Bu xəbərindən sonra bir az əvvəl Yusifi təhqir edən insanlar onu alqışa tutdular. Hamının üzündə minnətdarlıq ifadəsi vardı. Oğlanın valideynləri göz yaşları içində Yusifin əllərini sıxaraq təşəkkür etdilər. Yusif isə sadəcə başını aşağı salıb sakitcə gülümsədi. Yenidən qülləsinə qalxdı. Çimərlikdə səs-küy yenidən başladı, amma hamı anlayırdı ki, o qüllədə oturan adam sadəcə bir nəzarətçi deyil — həyatların keşikçisidir. Yusif dənizə baxaraq dərin bir nəfəs aldı; dalğaların səsi bu dəfə ona keçmişi yox, xilas etdiyi yeni bir həyatı xatırladırdı. Əbil Həsən

İran hökumətinin yerli icraçıları sentyabrın 18-də Məhəmməd Hüseyn Behcət Təbrizinin (Şəhriyar) ildönümü münasibətilə keçirilməsi planlaşdırılan anım mərasiminə icazə verməyiblər. Sozcu.az xəbər verir ki, bu haqda Təbrizin "Azərəncümən" nəşri məlumat yayıb. Bildirilib ki, Şəhriyarın ata yurdu Xoşkənab kəndində keçirilməsi nəzərdə tutulan tədbir ləğv edilib, şairin ata evinin qapıları bağlanıb və qonaqların ziyarətininin qarşısı alınıb. Tədbir təşkilatçıları və mədəniyyət xadimlərinin tədbirin qarşısının alınmasının səbəbləri barədə əlaqədar dövlət qurumlarına ünvanladıqları müraciət cavabsız qalıb. Qeyd edək ki, bununla eyni vaxtda İranın müxtəlif şəhərləri ilə yanaşı Təbrizdə də “Fars dili və ədəbiyyatı günü” ilə bağlı təntənəli mərasimlər keçirilib. Xatırladaq ki, İran Ali Mədəni İnqilab Şurası 18 sentyabrı (27 şəhrivər) Şəhriyarın ölüm günü münasibətilə İranda "Fars dili və ədəbiyyatı günü" elan edib.

15:27 Avropa Komissiyası Rusiyaya qarşı yeni 19-cu sanksiyalar paketini təsdiqləyib. Sozcu.az xəbər verir ki, Avropa Komissiyasının lideri Ursula fon der Leyen 19-cu sanksiya paketinin əsas məqamlarını açıqlayıb. Yeni tədbirlər çərçivəsində: - Rusiyanın LNG idxalı AB bazarlarına qadağan ediləcək; - “Kölgə donanmasına” aid 118 gəmi sanksiya siyahısına əlavə olunacaq (ümumi 560 gəmi); - “Rosneft” və “Qazpromneft” şirkətləri tam əməliyyat qadağasına məruz qalacaq; - Üçüncü ölkələrdəki neftayırma, neft treyderləri və neft-kimya şirkətləri, o cümlədən Çindəki qurumlar da hədəf alınacaq; - Rusiya və üçüncü ölkələrin əlavə banklarına əməliyyat qadağası tətbiq edəcək; - Kripto platformaları və kriptovalyuta əməliyyatları sanksiyalara daxil ediləcək; - Xüsusi iqtisadi zonalardakı şirkətlərlə əməliyyatlar məhdudlaşdırılacaq; - Hərbi sahədə istifadə olunan texnologiyalara ixrac qadağaları gətiriləcək, 45 şirkət sanksiya siyahısına salınacaq.

“Havaların soyuması ilə əlaqədar hava-damcı üsulu ilə ötürülən virus infeksiyalarının yayılmasında artımlarım olması epidemioloji qanunauyğunluq olaraq hər il təkrarlanır. Hazırda, hələ ki, epidemioloji durum sabit olaraq qalır, keçən illə müqayisədə yoluxma sayında artımlar qeyd olunmur”. Sozcu.az xəbər verir ki, bunu Səhiyyə Nazirliyinin mütəxəssis-eksperti, infeksionist Təyyar Eyvazov deyib. O bildirib ki, sentyabr-oktyabr aylarında risk qruplarına daxil olan insanları birinci növbədə peyvənd olunmağı israrla tövsiyə edilir: “Əhali arasında respirator və ümumi əlamətlərlə müşayiət edilən hallar müxtəlif kəskin respirator viruslar tərəfindən törədilir. Bu tip infeksiyalar arasında daha çox fəsadlaşa bilən qrip infeksiyasıdır ki, buna qarşı sentyabr-oktyabr aylarında risk qruplarına daxil olan insanları birinci növbədə peyvənd olunmağı israrla tövsiyə edirik”. Təyyar Eyvazov qeyd edib ki, bundan başqa xəstələnmiş insanların aktiv aşkarı və kollektivdən müvəqqəti kənarlaşdırılması, otaqların tez-tez havalandırılması, qapalı məkanlarda toplaşmış insanlar arasında xəstələnmə halları olduqda maskadan istifadə, əl gigiyenasına riayət olunması, sağlam həyat tərzi, düzgün qidalanma və açıq havada fiziki aktivliyi gözləməklə immuniteti yüksək səviyyədə saxlamaq, habelə dəyişkən havalarda düzgün geyim seçimi etmək yoluxma hallarının azalması üçün önəm daşıyır. (Mənbə APA)

Çin lideri Si Szinpin və ABŞ Prezidenti Donald Tramp arasında telefon danışığı baş tutub. Sozcu.az xəbər verir ki, bu barədə Çinin yerli mətbuatı məlumat yayıb. Danışıqların təfərrüfatı hələlik məlum deyil.

Sentyabrın 21-i səhərədək ölkə ərazisində gözlənilən küləkli hava şəraiti ilə bağlı sarı və narıncı xəbərdarlıqlar verilib. Milli Hidrometeorologiya Xidmətindən Sozcu.az-a verilən məlumata görə, narıncı xəbərdarlığa uyğun olaraq Bakıda və Abşeron yarımadasında, eyni zamanda, Naxçıvan Muxtar Respublikası, Kəlbəcər, Gəncə, Naftalan, Goranboy, Qazax, Ağstafa, Şəmkir, Tovuz, Daşkəsən, Qusar, Xaçmaz, Şabran, Xızı, Siyəzən, Neftçala, Yevlax, Mingəçevir, Bərdə, Tərtər, Neftçala, Ağcabədidə şimal-qərb küləyi əsəcək, küləyin sürəti saniyədə 20.8-28.4 metrədək güclənəcək. Sarı xəbərdarlığa uyğun olaraq isə əksər rayonlarda fasilələrlə şimal-qərb küləyi əsəcək, küləyin sürəti saniyədə 13.9-20.7 metr təşkil edəcək.

ABŞ-nin yəhudi senatoru Berni Sanders İsrailin Qəzzada törətdiyi qətliamları ilk dəfə olaraq “soyqırımı” adlandırıb. Sozcu.az xəbər verir ki, İsrailin Qəzzada törətdiyi cinayətlərə qarşı çıxması ilə tanınan, lakin indiyədək “soyqırımı” ifadəsini işlətməkdən çəkinən senator ilk dəfə olaraq yazılı açıqlamasında mövqeyini dəyişib. ABŞ senatoru açıqlamasında təxminən 65 min fələstinlinin İsrail tərəfindən öldürüldüyünü, bunların ən azı 18 mininin uşaq olduğunu qeyd edib. “İki il ərzində İsrailin Baş naziri Benyamin Netanyahunun ifrat sağçı hökuməti Qəzzaya icazə verilən humanitar yardımın miqdarını ciddi şəkildə məhdudlaşdırıb və Birləşmiş Millətlər Təşkilatı, həmçinin digər yardım qrupları üçün hər cür maneə yaradıb”, - deyə Sanders bildirib. O, İsrail ordusunun xeyli sayda mətbuat nümayəndəsini qətlə yetirdiyini də vurğulayıb. “Niyyət aydındır. Nəticə qaçılmazdır: İsrail Qəzzada soyqırımı törədir”, - deyə Sanders əlavə edib. Müstəqil Vermont senatoru, həmçinin ABŞ Prezidenti Donald Tramp administrasiyasını İsrailin Baş naziri Binyamin Netanyahunun etnik təmizləmə siyasətini dəstəklədiyinə görə tənqid edib. Digər tərəfdən, Sanders Trampın qonşu ölkələrə könüllü Fələstin miqrasiyasını təşviq etdiyini qeyd edib.

Kiçik Donald Tramp ötən həftə İstanbulda Dolmabağça sarayında Türkiyə Prezidenti Rəcəb Tayyib Ərdoğanla görüşüb. Sozcu.az xəbər verir ki, bunu Türkiyənin Cümhuriyyət Xalq Partiyasının sədri Özgür Özəl deyib. “Middle East Eye” nəşri də ABŞ prezidentinin oğlunun Ərdoğanla görüşdüyünü bildirib. Kiçik Donald Trampın bir neçə iş adamı ilə birlikdə Türkiyəyə səfər etdiyi qeyd edilib.

Belçika parlamentinin Xarici siyasət komitəsi İran səfirini həbsdə olan Azərbaycan əsilli İran-İsveç vətəndaşı olan tədqiqatçı Əhmədrza Cəlalinin vəziyyəti ilə bağlı izahat vermək üçün parlamentə çağırıb. Sozcu.az xəbər verir ki, bu haqda Cəlalinin həyat yoldaşı Vida Mehranniya məlumat yayıb. “Parlament və komitə rəhbərləri bildiriblər ki, üç ay səssizlikdən, alimin harada saxlanılması barədə məlumatsızlıqdan sonra Əhmədrza Cəlali ilə bağlı narahatlıqlar həmişəkindən daha çox artıb”,- o bildirib. Xatırladaq ki, İsrail hərbi hava qüvvələri iyunun 23-də Tehranın Evin həbsxanasına zərbə endirdikdən sonra Əhmədrza Cəlali və çox sayda başqa məhbus digər həbsxanalara köçürülüb. O gündən bu yana azərbaycanlı alimin harada saxlanılması və sağlıq durumu ilə məlumat əldə etmək mümkün olmayıb. Qeyd edək ki, əslən Güney Azərbaycanın Sarab mahalından olan İsveç vətəndaşı Əhmədrza Cəlali 2016-cı ilin aprel ayında Tehran və Şiraz universitetlərinin dəvəti ilə elmi konfransa qatılmaq üçün İrana səfər etdikdən sonra həbs edilib. 2017-ci ilin sentyabr ayında Tehran İnqilab Məhkəməsi azərbaycanlı alimi “İsrailə casusluq” ittihamına görə edama məhkum edib və qərar İran Ali Məhkəməsi tərəfindən də təsdiq olunub.

XXI əsrin sonunda Rusiya əhalisi demək olar ki, yarıya qədər azalaraq 81 milyon nəfərə, miqrantlarsız isə 68 milyon nəfərə düşə bilər. Sozcu.az xəbər verir ki, bu barədə Rusiyanın “Daha dəqiq olsaq” layihəsinin araşdırmasında qeyd olunub. Məlumata görə, miqrasiya əhalinin azalmasının qarşısını alan əsas amil olaraq qalır. Bunsuz Moskva şəhəri və vilayəti 2,5 dəfə, Sankt-Peterburq isə iki dəfədən çox insan itirərdi. Qeyd olunub ki, 2100-cü ilə qədər rusların dörddə biri 65 yaşdan yuxarı olacaq və uşaqların nisbəti 13%-ə qədər azalacaq.

Lənkəranda avtomobil məktəbə gedən bacı-qardaşı vuraraq öldürüb. Sozcu.az Report-a istinadla xəbər verir ki, hadisə rayonun Şovu kəndində qeydə alınıb. Belə ki, "Mersedes" markalı avtomobil məktəbə gedən Gülay Əlizadə və onun qardaşı Ramid Əliyevi vurub. Hər iki məktəbli ağır vəziyyətdə Lənkəran Rayon Mərkəzi Xəstəxanasına çatdırılsa da, onların həyatını xilas etmək mümkün olmayıb. Meyitlər aidiyyəti üzrə təhvil verilib. Faktla bağlı araşdırma aparılır.

Rusiyada ictimai yerlərdə hicab və niqab taxmağı qadağan etmək lazımdır. Niqab taxan miqrantların ailələri Rusiyadan yenidən ölkəyə giriş imkanı olmadan çıxarılmalıdır. Sozcu.az xəbər verir ki, bunu Rusiya Dövlət Dumasının deputatı Aleksandr Boroday deyib. "Bu tədbir vətəndaşlar arasında məyusluq və qorxu səviyyəsini azaltmaq üçün lazımdır. Ölkəmizdə müsəlman paltarı geyinməyi qadağan edən qanun yoxdur. Amma ən azı niqablara qəti qadağa tətbiq etməyin vaxtı çatıb", - o bildirib.

Sentyabrın 18-də Ərdəbilə səfər edən İranın Azərbaycandakı səfiri Müctəba Dəmirçilu iki ölkə arasında sərhədlərin açılması və əməkdaşlığın genişləndirilməsi istiqamətində aparılan danışıqlarla bağlı açıqlama verib. Bu barədə "Azad İran" "Telegram" kanalı xəbər verir. Səfir bildirib ki, Ərdəbil əyalətinin rəsmiləri ilə keçirilən görüşlərdə iqtisadi əlaqələrin genişləndirilməsi, o cümlədən dəmiryolu, sərhəd bazarları və müştərək iqtisadi zonaların yaradılması kimi layihələr müzakirə olunub. Kənd təsərrüfatı məhsullarının ixracı, tranziti və daşınması da diqqət mərkəzində olub. "Ümid edirik ki, prezidentlər səviyyəsində razılaşdırılmış əməkdaşlıq davam etdiriləcək və Ərdəbil iki ölkə arasında dostluğun inkişafında daha aktiv rol oynayacaq", - deyə Dəmirçilu vurğulayıb. Danışıqlarda ən mühüm mövzulardan biri də iki ölkə arasında sərhəd-buraxılış məntəqələrinin fəaliyyətinin bərpası və iki ölkə arasında nəqliyyat axınının bərpasıdır. Səfir bu məsələnin hər iki xalq üçün böyük əhəmiyyət daşıdığını qeyd edib. "Sərhəd daşımaları və sərhədi keçmək üçün əlverişli şərait hər iki ölkənin vətəndaşlarının rifahı üçün vacibdir. Sərhədlərin açılması və hərəkətin sadələşdirilməsi İran və Azərbaycan arasında münasibətlərin normallaşmasına və daha da möhkəmlənməsinə səbəb olacaq", - deyə Müctəba Dəmirçilu qeyd edib.

Şagird sayı 500-ə qədər olan müəssisələrdə fəaliyyət göstərən direktorların MİQ, sertifikasiya və ya diaqnostik qiymətləndirilməsi 70 faiz və daha yüksəkdirsə, fəaliyyətlərini davam etdirə biləcəklər. Sozcu.az xəbər verir ki, bunu Məktəbəqədər və Ümumi Təhsil üzrə Dövlət Agentliyinin imtahan və qiymətləndirmə şöbəsinin müdiri Nurlan İsmayılbəyli deyib. “Şagird sayı 500-dən çox olan məktəblərdə isə direktorların göstəricisi 85 faizdən yuxarıdırsa, elə həmin məktəbdə direktor olaraq qalacaqlar. Onların hazırda idarəetmə prosesində çalışdığı nəzərə alınaraq yenidən qiymətləndirilməsi mütləq tələb olaraq göstərilməyəcək”, - o bildirib.