Əmək və Əhalinin Sosial Müdafiəsi Nazirliyinin Kollegiyasının Qərarı ilə 2026-cı il üçün iş vaxtı norması və istehsalat təqvimi təsdiq edilib. Sozcu.az xəbər verir ki,həmin qərara əsasən sabah Azəraycanda iş günü deyil.Bu, 20 Yanvar Ümumxalq Hüzn Günü ilə əlaqədardır. 2026-cı il üçün iş vaxtı normasında qeyd edilir ki, Əmək Məcəlləsinə və Nazirlər Kabinetinin “2026-cı il üçün Novruz, Ramazan və Qurban bayramları günlərinin müəyyən edilməsi haqqında” 2025-ci il 2 dekabr tarixli 362 nömrəli Qərarına əsasən 2026-cı ildə aşağıdakı günlər iş günü hesab edilmir: 1, 2 yanvar – Yeni il bayramı; 20 Yanvar – Ümumxalq Hüzn Günü; 8 Mart – Qadınlar Günü; 20, 21, 22, 23, 24 mart – Novruz bayramı; 20, 21 mart -– Ramazan bayramı; 9 May -– Faşizm üzərində Qələbə günü; 27, 28 may – Qurban bayramı; 28 May – Müstəqillik Günü; 15 İyun – Azərbaycan xalqının Milli Qurtuluş Günü;

20 Yanvar - Ümumxalq Hüzn Günü ilə əlaqədar Bakı metrosu gücləndirilmiş iş rejimində fəaliyyət göstərəcək. Bu barədə Sozcu.az-a Bakı Metropoliteni QSC-dən bildirilib. Məlumata əsasən, anım tədbirinin keçiriləcəyi "20 Yanvar", eləcə də Şəhidlər xiyabanına ən yaxın ərazilərdə yerləşən "İçərişəhər" və "Elmlər Akademiyası" stansiyalarında xüsusi nəzarət tədbirləri tətbiq olunacaq. Qatarların hərəkət qrafiki dəyişdiriləcək, ehtiyat qatarlar xəttə buraxılmaq üçün hazır saxlanılacaq. Saat 12:00-da bütün metro stansiyalarında qatarların hərəkəti dayandırılacaq və şəhidlərimizin əziz xatirəsi 1 dəqiqəlik sükutla anılacaq.

Rusiyanın Novosibirsk vilayətində məhkəmə icraçıları üç gün ərzində ölkəyə giriş və ya qalma qaydalarını pozan 97 əcnəbini deportasiya edib. Sozcu.az xəbər verir ki, bu barədə Rusiya Federal Məhkəmə İcraçıları Xidmətinin region üzrə Baş İdarəsi məlumat yayıb. Məlumata görə, onların arasında Özbəkistan (41), Tacikistan (29), Qırğızıstan (16), Azərbaycan (7) və Qazaxıstan (4) vətəndaşı var. Qanuna görə, onlar beş il ərzində Rusiyaya qayıda bilməyəcəklər.

AB ABŞ Prezidenti Donald Trampın Qrenlandiya üzərində nəzarəti ələ keçirmək cəhdlərinin qarşısını almaq üçün Amerikaya qarşı sərt tədbirlərə, o cümlədən 93 milyard avroluq tariflərə hazırlaşır. Sozcu.az xəbər verir ki, bu barədə “Politiko” diplomatlara və rəsmilərə istinadən yanvarın 18-də Brüsseldə 27 AB ölkəsinin nümayəndələrinin təcili görüşündən sonra məlumat yayıb. “Üç saatlıq müzakirə zamanı diplomatlar gələn həftə Vaşinqtonla danışıqların həll yoluna gətirib çıxarmayacağı təqdirdə Trampa qarşı konkret variantlar hazırlamağın vacibliyini vurğulayıblar. Avropa Şurasının Prezidenti Antonio Koşta da bu həftə AB sammiti çağırmaq niyyətindədir. 93 milyard avro dəyərində cavab tarifləri də tətbiq oluna bilər. Alternativ olaraq, Amerika banklarının fəaliyyətini məhdudlaşdıracaq, patentləri etibarsız hala gətirəcək və ya proqram təminatından və yayımdan əldə edilən gəliri əngəlləyən bir anti-məcburiyyət alətindən istifadə etmək olar. AB-nin arsenalında diplomatik və iqtisadi tədbirlər də daxil olmaqla geniş seçim var və bunlardan bəziləri ictimai müzakirə mövzusu deyil”, - mənbə bildirib.

Yevlax Rayon İcra Hakimiyyətinin sabiq başçısı Qoca Səmədovun oğlu Zaur Səmədov həbs edilib. Sozcu.az Oxu.az-a istinadla xəbər verir ki, Z.Səmədov tanışını güllələməkdə təqsirləndirilərək saxlanılıb. Onun barəsində cinayət işi başlanılıb və Z.Səmədov barəsində Yevlax Rayon Məhkəməsinin qərarına əsasən üç ay həbs qətimkan tədbiri seçilib. Xatırladaq ki, Yevlax rayonun İsmayılabad kəndində Zaur Səmədov qeydiyyatda olan ov tüfəngindən xuliqanlıq niyyəti ilə 46 yaşlı tanışının ayaq nahiyəsinə atəş açaraq ona xəsarət yetirib. Qeyd edək ki, Yevlax Rayon İcra Hakimiyyətinin sabiq başçısı Q.Səmədov 2019-cu ildə həbs edilib. O, 2023-cü ildə xəstəliyi ilə əlaqədar vaxtından əvvəl şərti azadlığa buraxılıb və bir neçə aydan sonra vəfat edib.

Polkovnik-leytenant Sakit Niftiyev vəfat edib. Sozcu.az Oxu.a-a istinadla xəbər verir ki, görə, o, ürək çatışmazlığından dünyasını dəyişib. Xatırladaq ki, Sakit Niftiyev I Qarabağ müharibəsinin qazisi olub. O, müharibədən sonrakı illərdə orduda xidmət edib. Sonra isə ehtiyata buraxılıb.

Saat 11:00-a olan məlumata əsasən ölkə ərazisində yağıntılı hava şəraiti davam edir, bəzi yerlərdə sulu qar, qar yağır. Milli Hidrometeorologiya Xidmətindən Sozcu.az-a verilən məlumata görə, ayrı-ayrı yerlərdə intensiv xarakterlidir. Yağan qarın hündürlüyü Əlibəy (Zaqatala) və Lerikdə 39, Şahbuzda 35, Kəlbəcərdə 32, Sarıbaşda (Qax) 30, Laçın və Qubadlıda 23, Yardımlıda 20, Kişçayda (Şəki) 19, Xızıda 18, Xaltanda 16, Qrızda 15, Şuşada 13, Şamaxı, Qobustan və Lazada (Qusar) 12, Xınalıqda 10, Xankəndidə 9, Şahdağda 7, Qubada 6, İsmayıllı, Xocalıda 5, Ceyrançöl və Sədərəkdə 4, Füzulidə 3, Qəbələ və Gədəbəydə 1 sm-dir. Düşən yağıntının miqdarı Cəlilabadda 38, Astarada 37, Lənkəranda 32, Neftçala və Cəbrayılda 16, Beyləqan və Yevlaxda 14, Mingəçevirdə 13, Ağdam və Tərtərdə 12, İmişli və Zərdabda 10, Xaçmaz və Balakəndə 9, Bakıda və Abşeron yarımadasında, eyni zamananda Bərdədə 8, Oğuz və Naftalanda 7, Kürdəmir, Biləsuvar və Şərurda 6, Ağstafa, Şabran, Sabirabad və Gəncədə 5, Şəmkirdə 4, Goranboy, Tovuz və Göyçayda 3, Şəmkir və Şirvanda 2, Daşkəsən və Naxçıvanda 1 mm-dir. Bir sıra ərazilərdə qərb küləyi əsir, küləyin maksimal sürəti Neftçalada 20, Goranboyda 19, Naftalanda 18, Biləsuvarda 16 m/s-dək güclənir. Şərur, Gəncə, Zaqatala, Qax, Şamaxı, Qrız, Daşkəsən, Gədəbəy, Göygöl, Balakən, Şəki, Qusar, Göyçayda duman müşahidə olunur, görünüş məsafəsi 500 metrədək məhdudlaşır. Havanın minimal temperaturu Bakıda və Abşeron yarımadasında 2, Aran rayonlarında 3 dərəcəyədək isti, Naxçıvan MR-da 10, dağlıq rayonlarda 12 dərəcəyədək şaxta qeydə alınıb.

Yağan qar səbəbindən günorta saatlarında Bakı–Şamaxı–Yevlax avtomobil yolunun Ağsu aşırımından keçən hissəsində nəqliyyat vasitələrinin hərəkətində çətinliklər yaranıb. Sozcu.az xəbər verir ki, xüsusilə sərt döngəli və enişli hissələrdə bəzi nəqliyyat vasitələri yolda qalıb, yol-nəqliyyat qəzaları qeydə alınıb. Sürücülərə hava şəraitini nəzərə almaq tövsiyə edilib.

Donald Trampın Qrenlandiyanın ABŞ-a verilməsi barədə razılığa gəlmək üçün Avropa ölkələrinə əlavə ticarət tarifləri tətbiq etməklə bağlı təhdidləri şantajdır. Sozcu.az xəbər verir ki, bunu Niderlandın xarici işlər naziri vəzifəsini icra edən David van Viel deyib. “Bu, şantajdır və lazım deyil. Bu, nə NATO-ya, nə də Qrenlandiyanın özünə kömək etmir. Niderland Trampın bu addımından təəccüblənib. Tariflərin tətbiqini izah etmək praktik olaraq mümkün deyil. Müttəfiqlərin bir-birinə bu cür yanaşması lazımsızdır”, - Viel bildirib. Qeyd edək ki, ABŞ Prezidenti Donald Tramp Danimarka, Norveç, İsveç, Fransa, Almaniya, Birləşmiş Krallıq, Finlandiya və Niderlanda Qrenlandiyaya görə 1 fevraldan etibarən 10% tarif tətbiq ediləcəyini açıqlayıb.

Polis əməkdaşları tərəfindən narkotik vasitələrin satışı və qanunsuz dövriyyəsinə qarşı əməliyyatlar davam etdirilir. Bu barədə Sozcu.az-a DİN-in Mətbuat xidmətindən bildirilib. Məlumata görə, Sabunçu Rayon Polis İdarəsi 15-ci Polis Şöbəsinin əməkdaşları tərəfindən həyata keçirilən növbəti tədbir zamanı 32 yaşlı Şadman Zamanlı şübhəli şəxs qismində saxlanılıb. Ondan 9 kiloqram 955 qram narkotik vasitə marixuana aşkarlanaraq götürülüb. Saxlanılan şəxs ifadəsində narkotik vasitələri satış məqsədilə əldə etdiyini bildirib. Araşdırmalar davam etdirilir.

Paytaxtın Binəqədi rayonunda bir nəfər VAZ-21011 markalı nəqliyyat vasitəsinin qaçırıldığı barədə polisə məlumat verib. Bu barədə Sozcu.az-a DİN-in Mətbuat xidmətindən bildirilib. Polis əməkdaşlarının həyata keçirdikləri tədbirlərlə əməli törətməkdə şübhəli bilinən S.Sultanzadə saxlanılıb, avtomobil sahibinə qaytarılıb. Həmçinin rayon ərazisində motosiklet oğurlamaqda şübhəli bilinən İ.Cəfərov da polis əməkdaşları tərəfindən saxlanılıb. Araşdırmalar davam etdirilir.

ABŞ-ın blokadası Çin və Kubanın Venesuela neftinə çıxışını dayandırıb. Sozcu.az xəbər verir ki, bu barədə “Voll Strit Jurnal” məlumat yayıb. Nəşrin məlumatına görə, Nikolas Maduronun saxlanılmasından sonra Venesuelanı yalnız ABŞ-a istiqamət götürən neft dolu tankerlər tərk edə bilib. “3 yanvardan bəri Venesuelanın neft ixracı 75% azalıb. Növbəti 10 gün ərzində limanlardan çıxarılan az miqdarda neft ya ABŞ-a, ya da ölkə əhalisi və sənayesi üçün yanacaq istehsal etmək məqsədilə yerli neftayırma zavodlarında istifadə üçün nəzərdə tutulub. Nəticə etibarilə, Venesuela neft tədarükünün yavaşlaması Çinin dünyanın ən böyük neft alıcısı statusunu təhlükə altına qoyub. Ölkə Rusiya, İran və Venesueladan əhəmiyyətli dərəcədə endirimli qiymətlərlə neft alır”, - məlumatda bildirilib.

Suriya hökuməti Suriya Demokratik Qüvvələrinə (SDQ) 12 maddəlik plan təqdim edib. Sozcu.az xəbər verir ki, bu barədə “Əl-Məcəllə” məlumat yayıb. Planın maddələri belədir: 1. SDQ üzvləri Suriya ordusuna birləşmə və ya briqada kimi deyil, fərdi şəkildə qoşulur; 2. SDQ İraqla sərhəd-keçid məntəqələrini təhvil verir; 3. SDQ Türkiyə ilə sərhəd-keçid məntəqələrini təhvil verir; 4. SDQ ərəblərin çoxluq təşkil etdiyi Deyr əz-Zor və Rakka əyalətlərindən geri çəkilir; 5. Bütün neft və qaz obyektlərinin nəzarəti Suriya hökumətinə təhvil verilir; 6. Bəndlərin və su infrastrukturunun nəzarəti Suriya hökumətinə təhvil verilir; 7. Haseke əyalətində birgə idarəçilik yaradılır; 8. Məzlum Əbdi Haseke qubernatoru təyin edilir; 9. SDQ-yə hökumət vəzifələri (məsələn, müdafiə və ya daxili işlər nazirlərinin müavinləri) verilir; 10. SDQ-yə Suriya parlamentində iştiraka icazə verilir; 11. Prezident Əhməd əş-Şaranın son fərmanı ilə kürd hüquqlarının tanınması təsdiqlənir; 12. Bütün bəndlər müəyyən bir vaxt qrafikinə uyğun olaraq həyata keçirilir; Qeyd edək ki, Suriya ordusunun terror təşkilatı SDQ-yə qarşı əməliyyatları davam edir.

Pirqulu stansiyasından 12 km cənubda, Şamaxı-Ağsu sərhəddi (Ağsu) rayonunda zəlzələ qeydə alınıb. Sozcu.az xəbər verir ki, bu barədə AMEA nəzdində Respublika Seysmoloji Xidmət Mərkəzinin Zəlzələlərin tədqiqatı bürosu məlumat yayıb. Məlumata görə, zəlzələ ocağı 6 km dərinlikdə yerləşib. Zəlzələ episentrdə 4 bal, ətraf yaşayış məntəqələrində 3-4 bala qədər hiss olunub.

Mingəçevirdə fərdi təsərrüfatda baş verən yanğın faciə ilə nəticələnib. Sozcu.az xəbər verir ki, hadisə şəhərin Üzeyir Hacıbəyov küçəsində yerləşən fərdi yaşayış evində qeydə alınıb. 54 yaşlı İlqar Rüstəmovun yaşadığı evdə elektrik qızdırıcısının aşması nəticəsində yanğın baş verib. Yanğın yanğınsöndürənlər tərəfindən söndürülüb. Müxtəlif dərəcəli bədən xəsarətləri alan İlqar Rüstəmov xəstəxanaya çatdırılsa da, həkimlərin səylərinə baxmayaraq onun həyatını xilas etmək mümkün olmayıb. Faktla bağlı araşdırma aparılır.

Alp dağlarının Avstriya ərazisinə düşən hissəsində baş verən qar uçqunları nəticəsində beş nəfər həlak olub. Sozcu.az xəbər verir ki, Zalsburq yaxınlığındakı Ponqau rayonunda yerləşən Finsterkopf dağında (hündürlüyü 2 150 m) yeddi xizəkçidən ibarət qrup qarın altında qalıb. Onlardan dördü həlak olub, biri isə ağır xəsarətlərlə xəstəxanaya yerləşdirilib. Həmin gün Avstriyada qar uçqunu zamanı daha bir qadın da ölüb. Xilasedicilər turistlərdən işarəli xizək yollarını tərk etməmələrini xahiş ediblər, çünki faciələrin əksəriyyəti cığırdan kənarda hərəkət edən xizəkçilər arasında baş verir.

Şəmkirdə minik avtomobili ağaca çırpılıb, xəsarət alanlar var. Sozcu.az APA-ya istinadla xəbər verir ki, hadisə rayon ərazisində qeydə alınıb. Məlumata görə, hərəkətdə olan "Hunday Elantra" markalı minik avtomobili idarəetmədən çıxıb, yol kənarındakı ağaca çırpılıb. Qəza nəticəsində 1985-ci il təvəllüdü R.Süleymanov və 2001-ci il təvəllüdlü K.Məmmədov xəsarət alaraq xəstəxanaya yerləşdirilib. Həkimlərin səylərinə baxmayaraq, ağır xəsarət alan 1985-ci il təvəllüdlü R.Süleymanovun həyatını xilas etmək mümkün olmayıb. Digər xəsarət alan 2001-ci il təvəllüdlü K.Məmmədovun vəziyyəti ağır olaraq qalır. Faktla bağlı araşdırma aparılır.

Yanvarın 18-i saat 11:00-a olan məlumata əsasən ölkə ərazisinin əksər yerlərində yağıntılı hava şəraiti müşahidə olunur. Milli Hidrometeorologiya Xidmətindən Sozcu.az-a verilən xəbərə görə, dağlıq və dağətəyi rayonlarda qar yağır. Yağan qarın hündürlüyü Şahbuzda 40, Sarıbaşda (Qax) 27, Qubada 16, Kişçayda (Şəki) 15, Kəlbəcər və Qusarda 11, Şamaxıda 10, Laçın və Qubadlıda 9, Xızı və Şahdağda 8, Şuşada 5, Qobustanda 3, Qəbələ, Ceyrançöl, Gədəbəy, Xankəndi və Tovuzda 2, Gəncə, Şəmkir və Şabranda 1 sm-dir. Düşən yağıntının miqdarı Bakıda və Abşeron yarımadasında 11, Sabirabadda 6, Kürdəmirdə 4, Lerik və Ağdamda 3, Zərdab, Yevlax, Neftçala, Xaçmaz, Xaltan, Mingəçevir, Biləsuvarda 2, Göyçay, Cəlilabad, İmişli, Beyləqan, Tərtər, Naftalan, İsmayıllı, Bərdə, Balakən, Xocalı, Füzuli, Cəbrayıl, Yardımlı, Goranboyda 1 mm-dir. Daşkəsən, Gədəbəy, Göygöl, Qax, Şəmkir, Qobustan, Zaqatala, Quba, Xaltan, Qusar, Lerikdə duman müşahidə olunur, görünüş məsafəsi 200 metrədək məhdudlaşır. Havanın minimal temperaturu Bakıda və Abşeron yarımadasında 3, Aran rayonlarında 2 dərəcəyədək isti, Naxçıvan MR-da 11, dağlıq rayonlarda 9, yüksək dağlıq ərazilərdə 12 dərəcəyədək şaxta qeydə alınıb.

Tramp administrasiyası Qəzza Sülh Şurasında daimi yer üçün digər ölkələrdən ən azı 1 milyard dollar ödəmələrini istəyir. Sozcu.az xəbər verir ki, bu barədə “Blumberq” məlumat yayıb. “Tramp şuraya sədrlik edəcək, üzvlüyə nəzarət edəcək, qərarları təsdiqləyəcək və vəsaitlərə nəzarət edəcək. İlk ildə 1 milyard dollar töhfə verən ölkələr müddət məhdudiyyətlərindən azad olacaqlar”, - məlumatda bildirilib. Qeyd edək ki, Sülh Şurasında ABŞ Prezidentinin xüsusi nümayəndəsi Stiv Uitkoff, prezidentin kürəkəni Cared Kuşner, Böyük Britaniyanın keçmiş baş naziri (1997-2007) Toni Bleyer və digər önəmli şəxslər də yer alır.

Gürcüstanda Azərbaycan, Türkiyə, Banqladeş, Özbəkistan və Mərakeş vətəndaşları olan 14 nəfər əcnəbi saxlanılıb. Sozcu.az APA-ya istinadla xəbər verir ki, bu barədə Gürcüstanın Daxili İşlər Nazirliyindən (DİN) bildirilib. Həmin şəxslərin sığınacağın verilməsi prosedurunda nəzərdə tutulmuş şərtləri pozaraq bir neçə il ərzində qanuni əsas olmadan Gürcüstanda yaşadıqları müəyyənləşdirilib. Əcnəbilər Gürcüstanı könüllü şəkildə tərk etməni nəzərdə tutan qərarda göstərilən şərtlərdən istifadə etməyiblər və nəticədə DİN-nin Miqrasiya Departamenti onların saxlanılması barədə qərar verib. Qərarın icrası üçün saxlanılan şəxslər hazırda sonradan mənşə ölkələrinə qaytarılmaq məqsədilə Miqrasiya Departamentinin müvafiq mərkəzinə yerləşdiriliblər.

İranda baş vermiş etirazlar zamanı 50-dən çox məscid və 180 təcili yardım maşını yandırılıb. Sozcu.az xəbər verir ki, bu barədə İranın Rusiyadakı səfirliyi məlumat yayıb. Etirazların yalnız Təbrizdə 26 bank və 25 məscid yandırılması ilə nəticələndiyi, ölkə üzrə isə 53 məscidin hədəf alındığı bildirilib. Xatırladaq ki, İranda ötən ilin dekabrın 28-dən milli valyutanın devalvasiyası ilə bağlı kütləvi etirazlar başlayıb.

Yanvarın 18-19-da Bakıda və Abşeron yarımadasında, eyni zamanda əksər bölgələrdə gözlənilən küləkli hava şəraiti ilə bağlı sarı və narıncı xəbərdarlıq verilib. Bu barədə Sozcu.az-a Milli Hidrometeorologiya Xidmətindən məlumat verilib. Bildirilib ki, Gəncə, Naftalan, Samux, Goranboy, Daşkəsəndə narıncı xəbərdarlığa uyğun olaraq şimal-qərb küləyi əsəcək, küləyin sürəti 20.8-28.4 m/san-dək güclənəcək. Bakıda və Abşeron yarımadasında, Balakən, Zaqatala, Qax, Şəki, Qazax, Ağstafa, Tovuz, Şəmkir, Xızı, Qusar, Şabran, Xaçmaz, Quba, Siyəzən, Qobustan, Şamaxı,Salyan, Neftçala, Sabirabad, Saatlı, Şirvan, Hacıqabul, Mingəçevir, Tərtər, Yevlax, Bərdə, Kəlbəcər, Laçın, Füzuli, Zəngilan, Gədəbəy, Göygöl, Lənkəran, Masallı, Astara, Biləsuvar, Lerik, Yardımlı, Cəlilabadda isə sarı xəbərdarlığa uyğun olaraq şimal-qərb küləyi əsəcək, küləyin sürəti 13.9-20.7 m/san təşkil edəcək.

İndoneziyanın Cənubi Sulavesi əyalətində 7-si ekipaj üzvü olmaqla 10 nəfəri daşıyan təyyarə radarlardan itib. Sozcu.az xəbər verir ki, İndoneziya Hava Nəqliyyatı şirkətinə məxsus “ATR 42-500” təyyarəsindən gələn siqnal Cənubi Sulavesi əyalətinin Maros bölgəsində itib. Təyyarədə baş verən problemin mövcud hava şəraiti ilə bağlı olacağı ehtimal olunur. Axtarış-xilasetmə işlərinə başlanılıb.

Fövqəladə Hallar Nazirliyi (FHN) gözlənilən hava şəraiti ilə əlaqədar əhaliyə müraciət edib. Sozcu.az xəbər verir ki, nazirlik əhalini müvafiq təhlükəsizlik qaydalarına ciddi əməl etməyə çağırıb. Bildirilib ki, soyuq hava şəraiti qaz və elektrik qızdırıcı cihazlarından istifadənin xeyli artmasına səbəb olduğundan bu cihazlardan istifadə zamanı yanğın təhlükəsizliyi qaydalarına ciddi riayət edilməlidir. Nasaz, qeyri-standart və ya kustar üsulla hazırlanmış qızdırıcı cihazlardan istifadə edilməməli, elektrik şəbəkəsi həddindən artıq yüklənməməli, işlək vəziyyətdə olan qızdırıcı cihazlar nəzarətsiz qoyulmamalıdır. Eyni zamanda, xüsusilə dağlıq ərazilərdə vətəndaşlar şaxtalı və qarlı havada mümkün qədər yaşayış məntəqəsini tərk etməməli, belə bir zərurət yarandıqda hərəkət istiqaməti barədə yaxınlarını əvvəlcədən məlumatlandırmalı, avtomobilin texniki göstəricilərinin fəslə uyğunluğunu və kifayət qədər yanacaq ehtiyatını təmin etməlidirlər. Qar uçqunu ehtimalı olan yerlərdən, o cümlədən dik yamaclardan kənar gəzmək və günün qaranlıq vaxtına qalmadan yaşayış məntəqəsinə geri dönmək tövsiyə olunur. Bundan başqa, güclü külək zamanı yüngül konstruksiyalı və müvəqqəti tikililərdən, bina və reklam lövhələrindən uzaq durmaq, elektrik dirəyi və naqillərinin, hündür ağacların altında dayanmamaq tövsiyə olunur. Həmçinin, güclü küləyin baş verən yanğınların söndürülməsi ilə əlaqədar yaratdığı çətinlikləri nəzərə alaraq, küləkli hava şəraitində yanğın təhlükəsizliyi qaydalarına xüsusilə ciddi riayət edilməlidir. Qeyd edək ki, Milli Hidrometeorologiya Xidmətinin məlumatına görə, ölkə ərazisində yaxın günlər ərzində havanın yağıntılı olacağı, əsasən dağlıq və dağətəyi rayonlara qar yağacağı, ayrı-ayrı yerlərdə intensiv olacağı, temperaturun xeyli enəcəyi, bəzi yerlərdə arabir güclü külək əsəcəyi proqnozlaşdırılır.