ABŞ Rusiya-Ukrayna münaqişəsinin sülh yolu ilə nizamlanmasında irəliləyişə nail olmaq üçün zəruri olacağı təqdirdə tərəddüd etmədən Rusiyaya qarşı yeni sanksiyalar tətbiq etməyə hazır olacaq. Sozcu.az “Bloomberg” agentliyinə istinadən xəbər verir ki, bunu ABŞ-nin Maliyyə Nazirliyinin rəhbəri Skott Bessent deyib. “Hazırkı administrasiya sanksiyaları saxladı və əgər bu, sülh danışıqlarına təsir göstərməyə kömək edərsə, heç bir şeydən çəkinməyəcək”, - o deyib. Nazir bildirib ki, ABŞ Prezidenti Donald Trampın göstərişi ilə dərhal, maksimum effekt əldə etmək üçün sanksiyalardan açıq və aqressiv şəkildə istifadə olunacaq”. Bessentin sözlərinə görə, ABŞ bununla belə məhdudlaşdırıcı tədbirlərin nəzərdə tutulan məqsədlərinə çatmasını təmin etmək üçün tətbiq olunan məhdudiyyətləri diqqətlə izləyəcək.

Türkiyənin Çorum şəhərində 35 yaşlı H.C. qəhvəxanaya silahlı basqın edib. Bu barədə “Report” yerli mətbuata istinadən xəbər verir. Məlumata görə, hadisə ötən gün yerli vaxtla saat 22:00 radələrində baş verib. Qeyd edilir ki, silahlı şəxsin ov tüfəngindən açdığı atəş nəticəsində 2-si ağır olmaqla 5 nəfər yaralanıb. Hadisə yerinə polis əməkdaşları, təcili tibbi yardım cəlb edilib. Yaralılar şəhərin ayrı-ayrı xəstəxanalarına çatdırılıb. Onlardan ikisinin vəziyyətinin ağır olduğu bildirilir. Polis silahlı hücumu həyata keçirən şəxsin saxlanılması üçün geniş miqyaslı əməliyyata başlayıb. Hadisə ilə bağlı araşdırma aparılır.

Rusiyanın Belqorod vilayətində hərbi və mülki avtobusların toqquşması nəticəsində 6 nəfər ölüb, daha 4 nəfər xəstəxanaya yerləşdirilib. Sozcu.az xəbər verir ki, bu barədə Rusiya KİV məlumat yayıb. Bildirilib ki, ölənlər arasında hərbçilər yoxdu. Bildirilib ki, hadisə yerində Dövlət Yol Hərəkəti Təhlükəsizliyi Müfəttişliyi və Fövqəladə Hallar Nazirliyinin əməkdaşları işləyir.

Ukrayna və Amerika nümayəndə heyətləri gələn həftə Səudiyyə Ərəbistanında görüşəcəklər. Sozcu.az xəbər verir ki, bu barədə Ukrayna Prezidenti Volodimir Zelenski sosial şəbəkə hesablarında məlumat verib. Dövlət başçısı qeyd edib ki, o martın 10-da Səudiyyə Ərəbistanına səfər edəcək, Krallığın vəliəhdi, Baş nazir Məhəmməd bin Salman bin Əbdüləziz Al Səudla görüşəcək.

Çilinin şimalındakı Antofaqasta bölgəsində 6,2 bal gücündə zəlzələ qeydə alınıb. Sozcu.az xəbər verir ki, bu barədə Avropa-Aralıq dənizi Seysmoloji Mərkəzi məlumat yayıb. Məlumata görə, təbii fəlakətin episentri 309 min nəfər əhalisi olan Antofaqasta şəhərindən 140 km şimal-şərqdə yerləşib. Episentr 93 km dərinlikdə yerləşib. Tələfat və dağıntılar barədə məlumat daxil olmayıb.

Tovuzda doğuşda körpə ölümü baş verib. Sozcu.az-ın məlumatına görə, hadisə Tovuz Rayon Mərkəzi Xəstəxanasının Doğum şöbəsində qeydə alınıb. Rayonun Yanıqlı kəndində yaşayan 23 yaşlı Səmayə Abbasova 41-42 həftəlik hamiləliklə doğum şöbəsinə yerlədirilib. Körpə doğuşda ölüb. Körpənin doğuş zamanı boğulmadan öldüyü bildirilir. Faktla bağlı araşdırma aparılır.

PKK terror təşkilatının silahı yerə qoyması qaçılmazdır. Bunu Modern.az-a açıqlamasında Türkiyənin Cümhuriyyət Xalq Partiyasının (CHP) sədr müavini Yankı Bağcıoğlu deyib. O söyləyib ki, poroses şəffaf aparılmalıdır. Sədr müavini qeyd edib ki, PKK terror təşkilatı Türkiyə Silahlı qüvvələri və təhlükəsizlik əməkdaşlarının uğurlu fəaliyyətləri ilə zərərsizləşdirilib və hərəkət edə bilməyəcəyi vəziyyətə salıb. "Silahın yerə qoyulması qaçılmazdır. Ancaq atəşkəs iki qanuni dövlət arasında baş tutur. Terror təşkilatı atəşkəs etməz, silahı yerə qoyar. Bu prosesin qəti olaraq şəffaf şəkildə Türkiyə Böyük Millət Məclisinin nəzarəti altında aparılmasını istəyir, tələb edirik. İctimai konsensus olmalıdır. Xüsusilə də, şəhid ailələri və qazilərimizin üzünə baaxa bilməyəcəyiizi heç bir prosesin içərisində olmayacağımızı elan edirik. Necə bir proses aparılacaqsa, şəhid və qazilərin həmin prosesin içərisində olmağını istəyirik", - Bağcıoğlu bildirib. Y.Bağcıoğlu vurğulayıb ki, Suriyada mövcud olan YPG/PYD-nin Türkiyəyə təhdid yaratmayacağı şəkildə zərərsizləşdirilməsi milli  təhlükəsizlik baxımınndan vacibdir: "YPG/PYD-yə yönəlik tədbirlərin alınmadıgı bir proses əvvəldən kadük halına gələcək. 102 ildir ki, cümhuriyyətin, dövlətin birliyi, ölkəsinin bütövlüyünün sığortası Cümhuriyyət Xalq Partiyasıdır. Konstitusiyanının dəyişilməsi təklif belə edilə bilməyən 4 maddədən əlavə digər kojnstitusiya maddələrinin dəyişməsinin əleyhinəyik".

2030-cu il müsəlman dünyasında nadir bir hadisə ilə yadda qalacaq. Sozcu.az xəbər verir ki, həmin il Ramazan ayı iki dəfə – yanvar və dekabr aylarında qeyd olunacaq. Bunun əsas səbəbi hicri təqvimin günəş təqvimindən daha qısa olmasıdır. Ay təqviminə əsaslanan hicri ili günəş ili ilə müqayisədə təxminən 10-11 gün daha qısadır. Nəticədə, Ramazan hər il bir qədər irəliləyir və təxminən hər 33 ildə bir dəfə eyni il ərzində iki dəfə yaşanır. 2030-cu ildə ilk Ramazan 5 yanvar - 3 fevral, ikinci Ramazan isə 26 dekabr - 24 yanvar 2031 tarixlərinə təsadüf edəcək. Bu o deməkdir ki, müsəlmanlar həmin il iki dəfə oruc tutacaq . İslam tarixində bu hadisə nadir hallarda baş verir və müsəlmanlar üçün xüsusi mənəvi əhəmiyyət daşıyır. Din xadimləri bu vəziyyətin müsəlmanlar üçün sınaq və savab qazanmaq üçün böyük fürsət olduğunu bildirirlər. İki dəfə oruc tutmaqla bağlı fərqli fikirlər mövcuddur. Bəzi insanlar bunu çətin sınaq kimi görsə də, bir çoxları üçün bu, mənəvi cəhətdən daha çox ibadət etmək imkanı yaradır.

Britaniya Ukrayna ilə yeni iqtisadi saziş imzalayıb. Bu müqaviləyə əsasən, Kiyev hava hücumundan müdafiə sistemləri üçün raketlər də daxil olmaqla, hərbi tədarük üçün 2 milyard dollar alacaq. Sozcu.az xəbər verir ki, bu barədə Böyük Britaniyanın Baş naziri Key Starmer bildirib. Ayrılan məbləğ 5000-dən çox hava hücumundan müdafiə raketinin alınması üçün kifayət edəcək, deyə Baş nazir Starmer ətraflı şəkildə bildirib. Müqavilə Böyük Britaniyanın da xeyrinə olacaq. Xüsusilə İngiltərənin müdafiə sənayesi sektorunda bu raketlərin istehsalı üçün yeni iş yerləri açılacaq.

Bu gün Avropa İttifaqına (Aİ) üzv ölkələrin dövlət və hökumət başçıları Brüsseldə xüsusi zirvə toplantısında bir araya gələcək. Sozcu.az xəbər verir ki, iclasın əsas müzakirə mövzularından biri Avropanın müdafiə siyasəti, digəri isə Ukraynaya dəstək məsələsidir. Aİ uzun müddətdir müdafiə sahəsində daha müstəqil və güclü olmağı hədəfləyir. Lakin indiyədək bu istiqamətdə ciddi addımlar atılmayıb. Zirvə çərçivəsində Avropa Komissiyasının rəhbəri Ursula von der Leyen tərəfindən təqdim edilən 800 milyard avroluq "Avropanı Yenidən Silahlandırma" paketi geniş müzakirə olunacaq. Bu paketin bir hissəsi olaraq 150 milyard avro məbləğində ortaq borclanma təklif edilir. Məqsəd hava və raket hücumlarından müdafiə, artilleriya sistemləri, raketlər, sursat və pilotsuz uçuş aparatlarına qarşı müdafiə sistemlərinin maliyyə yükünü azaltmaq və üzv ölkələr arasında koordinasiyanı artırmaqdır. AO 2022-ci ildən bəri Ukraynaya ABŞ-la birlikdə hərbi və iqtisadi dəstək verirdi. Lakin ABŞ-ın bu siyasəti dəyişdirməsi, hərbi yardım və kəşfiyyat məlumatlarının paylaşımını dayandırması Avropa liderlərini çətin vəziyyətə salıb. Brüsseldəki toplantıda liderlər yeni reallıqları dəyərləndirəcək və Ukraynaya uzunmüddətli hərbi və siyasi dəstək vermək üçün strategiyalar müəyyən edəcəklər. Eyni zamanda, müharibənin gələcək ssenariləri də müzakirə olunacaq: - Sülh danışıqlarının mümkünlüyü - Danışıqlar başlasa, atəşkəsin əldə olunma ehtimalı - Atəşkəsdən sonra Avropanın rolu və mümkün təhlükəsizlik zəmanətləri - Potensial sülh sazişindən sonra yaranacaq geosiyasi vəziyyət Bu məsələlər hələ tam aydın olmasa da, mövcud şərait onların müzakirəsini qaçılmaz edir. Aİ Ukrayna və müdafiə məsələləri ilə bağlı yeni yanaşma çərçivəsində Türkiyə ilə münasibətlərində də fərqli mövqe sərgiləyir. Zirvə sonrası Aİ Şurasının Prezidenti Antonio Costa, Avropa Komissiyasının rəhbəri Ursula von der Leyen və Aİ-nin Xarici Siyasət və Təhlükəsizlik üzrə Ali Nümayəndəsi Kaja Kallas Türkiyə, Böyük Britaniya, İslandiya və Norveçi videokonfrans vasitəsilə məlumatlandıracaq. Həmçinin, bu ölkələrin mövqeyi də dinləniləcək.

Polşanın Baş naziri Donald Tusk Rusiya ilə sərhəddə Avropa qoşunlarının mövcudluğunun artırılmasının nəzərdən keçirilməsini təklif edib. Sozcu.az xəbər verir ki, Tusk bu barədə AB-nin Brüsseldə keçirilən sammitindən əvvəl deyib. “Rusiya və Belarusla sərhədlərdə Avropa və NATO qoşunlarının mövcudluğunun artırılmasının zəruriliyindən də danışacağam”, - o bildirib.

Artıq 8 Mart – Beynəlxalq Qadınlar Gününə cəmi iki gün qalıb. Hər il olduğu kimi, bu il də məktəblərdə şagirdlərdən pul yığımı məsələsi geniş müzakirə olunur. Sosial şəbəkələrdə və valideynlər arasında bəzi təhsil ocaqlarında bayram münasibətilə məcburi pul yığılması ilə bağlı müxtəlif şikayətlər səslənir. Valideynlərdən bəziləri iddia edir ki, bununla bağlı məktəb rəhbərliyi tərəfindən təzyiqlə qarşılaşıblar. Elm və Təhsil Nazirliyi isə dəfələrlə belə halların yolverilməz olduğunu vurğulasa da, görünən odur ki, məsələnin tam qarşısını almaq hələ də mümkün olmayıb. Yenisabah.az xəbər verir ki, hazırda məktəblərdə başqa bir diqqətçəkən proses də gedir. Saytın etibarlı mənbədən əldə etdiyi məlumata görə, ölkə üzrə məktəb direktorlarının təxminən 70 faizi xəstəlik vərəqəsi (“bülleten”) açdıraraq işdən müvəqqəti uzaqlaşıb. Səbəb isə qarşıdakı yoxlamalardan yayınmaqdır. Mənbənin iddiasına görə, Məktəbəqədər və Ümumi Təhsil üzrə Dövlət Agentliyinin bəzi əməkdaşları yaxın münasibətləri olan məktəb direktorlarına bülletenə çıxmağı tövsiyə ediblər. Direktorların nəzərinə çatdırılıb ki, yaxın günlərdə ciddi yoxlamalar və kadr dəyişiklikləri gözlənilir, buna görə də bülletenə çıxmaq məsuliyyətdən yayınmaq üçün ən yaxşı üsuldur. Mənbə bildirir ki, artıq çox sayda məktəbdə bu hallar qeydə alınıb və prosesin daha geniş miqyasda davam etdiyi ehtimal edilir. Direktorların vəzifələrindən müvəqqəti uzaqlaşmalarına baxmayaraq, onlar məktəbləri onlayn idarə etməyə çalışırlar və əməkhaqqılarının kartlarına köçürülməsi davam edir. Bu vəziyyət isə məktəblərdə idarəçilik sistemində xaos yarada bilər. Məlumatda o da qeyd olunur ki, 8 martdan sonra Elm və Təhsil naziri Emin Əmrullayevin rəhbərliyi ilə məktəb direktorlarına qarşı “təmizləmə əməliyyatı” aparılacaq. Bunun nə formada həyata keçiriləcəyi və konkret hansı tədbirlərin görüləcəyi barədə ətraflı məlumat yoxdur. Lakin gözlənilən yoxlamaların məktəblərdə ciddi struktur dəyişikliklərinə və bəzi direktorların işdən uzaqlaşdırılmasına səbəb ola biləcəyi ehtimal edilir. Xatırladaq ki, bir neçə gün öncə Bakının Pirallahı rayonundakı 231 nömrəli tam orta məktəbin direktoru Lamiyə İlhamsoyun müəllimlərlə mübahisəsinin yer aldığı səs yazısı yayılıb. İddialara görə, direktor müəllimlərin ona ad günü üçün aldıqları 600 manatlıq hədiyyəni bəyənməyib və pedaqoji heyəti təhqir edib. Məsələ ilə bağlı Məktəbəqədər və Ümumi Təhsil üzrə Dövlət Agentliyi araşdırma aparıb və fəaliyyətində yol verdiyi nöqsanlara görə onu vəzifəsindən azad edib. Agentlik təhsil müəssisələrində neqativ halların yolverilməz olduğunu bəyan edib. Son zamanlar məktəb rəhbərləri ilə bağlı narazılıqların artması fonunda bu hadisə cəmiyyətdə geniş müzakirələrə səbəb olub.

2025-ci ilin hazırlıq planına əsasən, Səfərbərlik və Hərbi Xidmətə Çağırış üzrə Dövlət Xidməti ilə birgə tədbirlər çərçivəsində hərbi hissələrdə ehtiyatdan çağırılan bir qrup hərbi vəzifəlinin cəlb edildiyi növbəti təlim toplanışı başlayıb. Müdafiə Nazirliyindən Sozcu.az-a verilən məlumata görə, ehtiyatdan çağırılan hərbi vəzifəlilər müvafiq qeydiyyatdan və həkim müayinəsindən keçdikdən sonra hərbi geyim və digər təminat növləri ilə təmin olunurlar. Hərbi vəzifəlilərlə maarifləndirici söhbətlər aparılır, onlara təhlükəsizlik qaydaları çatdırılır, eləcə də sıra hazırlığı üzrə məşğələlər keçirilir. Toplanış çərçivəsində hərbi vəzifəlilərin döyüş hazırlığı səviyyəsinin artırılması, təlim sahəsində praktiki vərdişlərinin təkmilləşdirilməsi, eləcə də bilik və bacarıqlarının inkişaf etdirilməsi məqsədilə müxtəlif tapşırıqlar icra ediləcək.

Azərbaycan Xalq Cümhuriyyətinin (AXC) qurucu lideri Məhəmməd Əmin Rəsulzadəni rəhmət, sayğı və minnətdarlıqla yad edirik. O, siyasətçi və dövlət xadimi, jurnalist, yazıçı, azadlıq mücahidi və mütəfəkkirdir, türk dünyasının böyük oğludur. Sozcu.az xəbər verir ki, bunu Türkiyə Prezidenti Rəcəb Tayyib Ərdoğanın baş müşaviri Yalçın Topçu deyib. Türkiyə rəsmisi Rəsulzadənin bu sözlərindən sitat gətirib: “Türkəm və bu baxımdan özümü xoşbəxt hiss edirəm”. Yalçın Topçu daha sonra AXC lideri ilə bağlı bildirib: “Artıq onun “Sən bizimsən, bizimsən, durduqca bədəndə can, yaşa, yaşa, çox yaşa, ey şanlı Azərbaycan” və “Bir kərə yüksələn bayraq bir daha enməz” sözlərini yerinə yetirən can Azərbaycanın qəhrəman xalqı Qarabağı erməni işğalından azad edib. Böyük Atatürk 1918-ci il mayın 28-də ona göndərdiyi mesajında demişdi: “Mən səndən üç il əvvəl doğulmuşam. Ancaq türk dünyasında türk bayrağını sən qaldırdın və bu bayraq enməsin deyə, mən onu sənin əlindən alıb Türkiyə üzərində dalğalandırdım. “Bu bayraq enməz” demisən, enməyəcək”. Xatırladaq ki, bu gün Məhəmməd Əmin Rəsulzadənin vəfatından 70 il ötür.

Baku TV-nin "Qapqara" verilişinin buraxılışında tibb elmləri namizədi Rəşid Mahmudov maraqlı açıqlama verib. O, bildirib ki, kişilərin özlərini qadın kimi aparması xəstəlikdir: "Qadınlarda və kişilərdə estrogen və testosteron hormonları ifraz olunur. Bunlar həm qadınlarda, həm də kişilərdə mövcuddur. Qadınlarda estrogen çox, testosteron isə azdır. Lakin kişilərdə estrogen az, testosteron çoxdur. Kişilərin cinsi orqanında testosteronla yanaşı, estradiol da ifraz olunur. O, çoxalmağa başlayanda kişilər özlərini qadın kimi aparırlar. Bu isə xəstəlikdir. Ancaq həmin hormonun səviyyəsini aşağı salmaq mümkündür".

08:16 Gəncədə 41 yaşlı qadın və körpəsi doğuş zamanı ölüb. Sozcu.az xəbər verir ki, Gəncə şəhər sakini, 1984-cü il təvəllüdlü Z.Yusifova Gəncə şəhərində yerləşən xəstəxanaların birində doğuş zamanı keçinib. Faktla bağlı araşdırma aparılır. *** Gəncədə 41 yaşlı hamilə qadının ilkin ölüm səbəbi açıqlanıb. TƏBİB-dən bildirilib ki, bu gün səhər saat 05:00 radələrində 1984-cü il təvəllüdlü qadın ailə üzvləri tərəfindən Gəncə Şəhər Birləşmiş Xəstəxanasının nəzdində olan Abbas Səhhət adına xəstəxanaya aqonal vəziyyətdə hospitalizasiya olunub. Qeyd olunub ki, 30 həftəlik hamiləlik, dəqiqləşdirilməmiş tromboemboliya diaqnozları təyin edilən şəxsin reanimasiyon tədbirlərə baxmayaraq, ölüm faktı qeydə alınıb.

38 küçə və prospekt üzrə işıqforlara “yaşıl dalğa” əmri verilib. Bu barədə Sozcu.az-a Daxili İşlər Nazirliyi Nəqliyyatı İntelektual İdarəetmə Mərkəzindən məlumat verilib. Bildirilib ki, bir neçə gündür paytaxtın mərkəzi küçə və prospetlərində axşam saatlarında yaranan nəqliyyat sıxlığının müddəti və sıxlıq olan yolların sayı artıb. Müşahidələr göstərir ki, bu proses martın 3-dən başlayıb və davam edəcəyi ehtimal olunur. Təhlillər onu deməyə əsas verir ki, Ramazan ayı ilə əlaqədar bəzi vətəndaşlar şəxsi nəqliyyat vasitələrindən daha çox istifadəyə, xüsusilə də mərkəzi küçə və prospektlərdə yerləşən ictimai iaşə obyektlərində təşkil olunan iftar məclislərində iştirak etməyə üstünlük verirlər. Pik saatlarda yaranan nəqliyyat sıxlığının müddəti bu səbəbdən artmağa başlayır və nəticədə şəhərin digər yollarına da ( şəhərə giriş-çıxış yolları) təsir edir. Nəqliyyatı İntellektual İdarəetmə Mərkəzi tərəfindən hansı tədbirlər görülüb? Mərkəz tərəfindən nəqliyyat intensivliyini artırmaq məqsədilə 38 küçə və prospekt üzrə işıqforlara “yaşıl dalğa” əmri verilib. Zəruri tədbirlərin görülməsi üçün mütəmadi yol polisi əməkdaşları ilə informasiya mübadiləsi aparılıb. Nəqliyyat intensivliyini artırmaq məqsədilə bu küçə və prospektlərdə işıqforlara “yaşıl dalğa” əmri verilib: 1. S.Vurğun küçəsi; 2. A.Bakıxanov küçəsi; 3. M.Müşfiq küçəsi; 4. Mehdi Hüseyn küçəsi; 5. Ş.Bədəlbəyli küçəsi; 6. M.Füzuli küçəsi; 7. R.Behbudov küçəsi; 8. K.Rəhimov küçəsi; 9. 28 May küçəsi; 10. Ü.Hacıbəyli küçəsi; 11. Y.Səfərov küçəsi; 12. A.Cəlilov küçəsi; 13. Ak.Həsən Əliyev küçəsi; 14. Gülarə Qədirbəyova küçəsi; 15. İstiqlaliyyət küçəsi; 16. C.Hacıbəyli küçəsi; 17. Ə.Ağaoğlu küçəsi; 18. Vaqif küçəsi; 19. Ə.Dəmirçizadə küçəsi; 20. Nəsib bəy Yusifbəyli küçəsi; 21. Y.V.Çəmənzəminli küçəsi; 22. M.Araz küçəsi; 23. Nazim Hikmət küçəsi; 24. M.Mehdizadə küçəsi; 25. Nizami küçəsi; 26. Süleyman Rəhimov küçəsi; 27. Tbilisi prospekti; 28. 8 Noyabr prospekti;29. Q.Qarayev prospekti; 30. İnşaatçılar prospekti; 31. Neftçilər prospekti; 32. Z.Əliyeva prospekti; 33. Azadlıq prospekti; 34. Azərbaycan prospekti; 35. Xətai prospekti; 36. Atatürk prospekti; 37. Parlament prospekti; 38. F.Xoyski prospekti.

Rusiya İstintaq Komitəsinin Çebarkul qarnizonu üzrə hərbi idarəsinin müstəntiqləri Çelyabinsk vilayətinin Çebarkul şəhərinin ticarət pavilyonlarında reyd keçirib. Sozcu.az yerli KİV-ə istinadla bildirir ki, tədbir zamanı bir müddət əvvəl Rusiya pasportu alsa da, hərbi qeydiyyatdan keçməyən miqrantlar müəyyən edilib. Beş nəfər hərbi komissarlığa aparılıb. Onlara müqavilə üzrə xidmət şərtləri barədə də məlumat verilib. Qeyd edək ki, ötən ilin dekabrında Sankt-Peterburqda ərzaq anbarına basqından sonra 24 nəfər hərbi komissarlığa aparılıb. Tədbirlər zamanı əcnəbilər də daxil olmaqla 350-dən çox vətəndaş yoxlanılıb. Bundan əvvəl Yekaterinburqda, Koltsovo hava limanında hərbi müstəntiqlər bir müddət əvvəl Rusiya vətəndaşlığını almış miqrantlara qarşı reyd keçiriblər. Hərbi komissarlıqda qeydiyyatdan keçməyən hər kəsə çağırış vərəqəsi verilib.lent)

Naxçıvan şəhərinin bəzi kəndlərində içməli suyun verilişində fasilə yaranacaq. Sozcu.az bildirir ki, Naxçıvan şəhərinin Bulqan, Qaraçuq, Qaraxanbəyli kəndlərində təzyiqqırıcıda nizamlama işlərinin aparılması ilə əlaqədar bu ərazinin müəyyən ünvanlarına suyun verilməsi dayandırılacaq. Bu gün saat 10:00-dan başlayacaq təmir-bərpa işlərinin saat 12:00-da yekunlaşacağı planlaşdırılır. Təmir işləri bitdikdən sonra suyun əvvəlki rejimlə verilməsi təmin ediləcək.

DİM martın 9-da tam (11 illik) orta təhsil səviyyəsi üzrə buraxılış imtahanı keçirəcək. Sozcu.az xəbər verir ki, bu barədə DİM məlumat yayıb. Martın 9-da Dövlət İmtahan Mərkəzi tərəfindən Bakı şəhərinin Qaradağ, Binəqədi, Xətai, Suraxanı, Pirallahı, Yasamal, Abşeron (II hissə), Sumqayıt (II hissə), Naxçıvan MR, Gəncə (II hissə), Mingəçevir, Samux,Göygöl, Daşkəsən, Ağstafa, Qazax, Tovuz, Sabirabad, Saatlı, İmişli, Biləsuvar, Ucar, İsmayıllı, Ağsu, Zərdab, Masallı, Astara, Lerik, Ağcabədi, Beyləqan,Füzuli, Qax, Balakən, Zaqatala, Quba, Xızı, Qusar, Zəngilan (Ağalı kənd tam orta məktəbi), Cəbrayılda (M.Mehdizadə adına məktəb) tam (11 illik) orta təhsil səviyyəsi üzrə buraxılış imtahanı keçiriləcək. Martın 9-da Bakı şəhəri üzrə xüsusi məktəblərin (internat məktəbləri, cəzaçəkmə müəssisələrində yerləşən məktəblər), tədrisi gürcü dilində olan məktəblərin, H.Əliyev və C.Naxçıvanski adına hərbi liseylərinin şagirdləri də imtahan verirlər. İmtahan saat 11:00-da başlanır. İmtahanın başlanmasına 15 dəqiqə qalmış – saat 10:45-də buraxılış rejimi başa çatır. Bundan sonra gələn iştirakçılar imtahan binasına buraxılmır. İştirakçıların imtahan binasına rahat şəkildə daxil olması üçün binaya müxtəlif gəlmə vaxtları müəyyən edilib və imtahan iştirakçısının buraxılış vərəqəsində həmin vaxt göstərilib. Ona görə də imtahan binasına buraxılış vərəqəsində qeyd olunan vaxtda gəlmək lazımdır. Şagirdlər imtahana aşağıdakı sənədləri gətirməlidirlər: - İmtahana buraxılış vərəqəsi; - Şəxsiyyəti təsdiq edən sənədin əsli: a) Azərbaycan Respublikasının vətəndaşları (16 yaşı tamam olmayan iştirakçılar da daxil olmaqla) şəxsiyyət vəsiqəsini; b) əcnəbilər və vətəndaşlığı olmayan şəxslər Dövlət Miqrasiya Xidməti tərəfindən verilmiş icazə vəsiqələrini, qaçqın statusu almış xarici vətəndaşlar və onların ailə üzvləri isə qaçqın vəsiqələrini; - Şəxsiyyət vəsiqəsində şəkli olmayan iştirakçılar digər sənədlərlə yanaşı, təhsil müəssisəsi tərəfindən verilmiş və fotoşəkilləri yapışdırılmış arayışı (arayışa iştirakçının 3x4sm ölçülü şəkli yapışdırılır və şəkil möhürlə təsdiqlənir). Şagirdlər buraxılış imtahanı üçün təhsil müəssisəsi tərəfindən verilməli olan arayışı DİM-in saytından yükləyə bilərlər. İmtahan iştirakçıları “İmtahana buraxılış vərəqəsi”ni internet vasitəsilə DİM-in saytından fevralın 26-dan etibarən çap edib götürə bilirlər. Xatırladaq ki, imtahan keçirilən şəhər və rayonlarda ümumilikdə 255 imtahan binası, 4430 imtahan zalı ayrılıb. İmtahanların idarə olunmasına 255 ümumi imtahan rəhbəri, 721 imtahan rəhbəri, 5523 nəzarətçi, 773 buraxılışı rejimi əməkdaşı (mühafizə), 255 bina nümayəndəsi ayrılıb. Martın 9-da keçiriləcək imtahanda 58732 şagirdin iştirakı nəzərdə tutulur. İmtahanda 70 nəfər sağlamlıq imkanları məhdud (gözdən əlil, serebral iflic, eşitmə əngəlli və digər) şagird də iştirak edəcək. Bu abituriyentlərin rahat şəkildə imtahan verməsi üçün imtahan binalarında xüsusi zallar ayrılıb, orqanizmin funksiyalarının 81-100 faiz pozulmasına görə gözdən əlilliyi müəyyən edilmiş şəxslərə isə fərdi nəzarətçilər təyin edilib. Hərəkət məhdudiyyətli şagirdlərin bina və zala daxil olması və hərəkəti üçün də şərait yaradılıb. Bundan əlavə, sağlamlıq imkanları məhdud iştirakçılar üçün ayrılan nəzarətçilərlə xüsusi təlim keçirilib. Hazırda imtahanlarda iştirak edəcək nəzarətçilər, imtahan rəhbərləri, mühafizə əməkdaşları ilə təlim-seminarlar keçirilir. Bütün imtahan binalarına baxış keçirilib, imtahan zallarında abituriyentlərin rahat şəkildə imtahan verməsi üçün zəruri şərait yaradılıb. Təhlükəsizliyin təmin edilməsi məqsədilə imtahan mərkəzlərinə təkrar baxış da keçirilir və imtahan zalları, giriş-çıxış qapıları, binalar möhürlənməklə Daxili İşlər Nazirliyi Baş Mühafizə İdarəsinin əməkdaşlarının mühafizəsinə verilir.

ABŞ prezidenti Donald Tramp Vaşinqtonun meri Muriel Bouzerə evsizlərin çadırlarını şəhərdən yığışdırmağı əmr edib. Sozcu.az xəbər verir ki, bu haqda dövlət başçısı “Truth” sosial şəbəkəsində məlumat verib. “Biz Vaşinqton merinə xəbərdarlıq göndərmişik ki, o, evsizlərin şəhərdə qurduğu bütün düşərgələri, xüsusən də Dövlət Departamentinin binası və Ağ Evin yaxınlığındakı düşərgələri təmizləsin. Əgər o bunu edə bilməzsə, biz onun üçün bunu etməyə məcbur olacağıq! Vaşinqton, təmiz və təhlükəsiz olmalıdır! Biz böyük paytaxtımızı bir daha fəxr etmək istəyirik.", - Tramp yazıb.

ABŞ Ali Məhkəməsi ABŞ Prezidenti Donald Tramp administrasiyasının xarici tərəfdaşlara təxminən 2 milyard dollar yardım ödənişlərinin bərpasını ləğv etmək cəhdini təmin etməyib. Sozcu.az xəbər verir ki, bu barədə məhkəmə sənədlərində qeyd olunub. Bildirilib ki, Ali Məhkəmənin beş hakimi, o cümlədən sədr Con Roberts imtinaya səs verib, dörd hakim isə bunun əleyhinə çıxıb. Söhbət Dövlət Departamenti və ABŞ Beynəlxalq İnkişaf Agentliyi (USAID) xətti ilə artıq göstərilmiş xidmətlər və işlər üçün ödənişlərdən gedirdi. Xatırladaq ki, yanvarın 25-də “Politico” qəzeti dövlət katibi Marko Rubionun xarici yardım proqramlarının, demək olar, hamısının maliyyələşdirilməsini 90 gün müddətinə dərhal dayandırmağı tapşırdığını yazmışdı. Fevralın sonunda Kolumbiya Dairəsi Federal Məhkəməsi xarici dövlətlərə yardımın bərpasını iki gündən az müddətə təmin etməyi qərara almışdı, lakin Tramp administrasiyası bu qərarı ləğv etməyə cəhd göstərmişdi.

ABŞ hazırda Ukrayna ilə münasibətlərinin bütün aspektlərini yenidən dəyərləndirir. Sozcu.az xəbər verir ki, bu barədə ABŞ prezidentinin milli təhlükəsizlik üzrə müşaviri Mayk Uolts Ağ evdə jurnalistlərə bildirib. “Biz bir addım geri çəkildik və ara verdik və bu münasibətlərin bütün aspektlərini yenidən gözdən keçiririk”, – o, Vaşinqtonun Kiyevə kəşfiyyat məlumatlarının ötürülməsinin hələ də dayandırılıb-dayandırılmaması ilə bağlı suala cavab verərkən qeyd edib. Bununla yanaşı, Uolts ukraynalı həmkarı ilə daha öncə telefonla danışdığını və münaqişənin həlli ilə bağlı danışıqların keçiriləcəyi mümkün platforma və bu danışıqlardakı nümayəndə heyətlərinin tərkibi barədə müzakirə apardığını vurğulayıb: “Növbəti danışıqlar turunun yeri, nümayəndə heyətləri və danışıqların məzmunu ilə bağlı yaxşı müzakirələr aparırıq”. O, son bir sutkada bu sahədəki hadisələrin inkişafından nikbin olduğunu deyib: “Düşünürəm ki, çox yaxında hərəkətlilik görəcəyik”.

Rusiya bütün Avropa üçün təhdidə çevrilib. Sozcu.az xəbər verir ki, bu barədə Fransa Prezidenti Emmanuel Makron xalqa müraciətində söyləyib. Makron müraciətini “beynəlxalq vəziyyətlə” əlaqələndirib və fransızların buna “ədalətli şəkildə narahat olduqlarını” qeyd edib. O, ABŞ-nin “Ukraynadakı müharibə mövzusunda mövqeyini dəyişdiyini” və Avropa İttifaqı (Aİ) mallarına gömrük rüsumu tətbiq etməyi planlaşdırdığına diqqət çəkib. “Biz yeni bir eraya qədəm qoyuruq”, – Makron bildirib. O, Rusiyanın Ukraynadakı müharibəni “qlobal münaqişəyə” çevirdiyini və buna Şimali Koreya əsgərləri və İran hərbi texnikası istifadə edərək nail olduğunu qeyd edib. Həmçinin Rusiyanın hərbi potensialını artırdığını deyib. Makronun fikrincə, Avropa ABŞ-nin “bizim tərəfimizdə olmayacağına” hazır olmalıdır. “Kim Rusiyanın Ukraynada dayanacağına inanar? <…> Rusiya artıq Fransaya və Avropaya təhdidə çevrilib. <…> Mənim sizə izah etdiyim vəziyyət elədir və biz bununla məşğul olmalıyıq. Sülhə gedən yol Ukraynasız mümkün deyil. Sülh Ukraynanın təslim olması yolu ilə əldə edilə bilməz. Biz unutmamalıyıq ki, Rusiya 2014-cü ildə Ukraynaya hücum edib. Minskdə atəşkəsə razılaşmışdıq”, – deyə Makron xatırladıb. Makron Fransanın avropalı müttəfiqləri ilə işləmək marağında olduğunu açıqlayıb. Gələn həftə o, “möhkəm sülhün” yaradılmasında iştirak etmək istəyən dövlət başçılarını bir araya gətirəcək. Bu planı Fransa, Ukrayna və digər Avropa tərəfdaşları ilə birgə hazırladığını bildirib. “Ukraynada sülh tez və ya gec əldə olunsa da, Avropa dövlətləri özlərini daha yaxşı qorumaq imkanına malik olmalıdır. Müdafiəmizi gücləndirməliyik. Bu baxımdan, biz NATO-ya sadiq qalsaq da, müstəqilliyimizi gücləndirməliyik. Avropanın gələcəyinə Vaşinqtonda və Moskvada qərar verilməməlidir”, – Makron qeyd edib. Makron həmçinin “Avropa tərəfdaşlarımızla nüvə silahı ilə qorunma mövzusunda müzakirələrə başlamağı qərara aldığını” bildirib. “Hər nə olursa olsun, qərar hər zaman Prezidentin, Silahlı Qüvvələrin Baş Komandanının əlində olacaq”, – deyə dövlət başçısı deyib. “Biz Avropadakı ən effektiv orduya malikik <…> və nüvə cilovlaması imkanlarımız var. Bu bizi qonşularımızdan çox daha yaxşı qoruyur”, – deyə Fransa Prezidenti vurğulayıb.