Türk dünyası

"İsveçin NATO üzvlüyü Ankaranın tələblərini yerinə yetirmək istəməyən Stokholmun reallaşması mümkün olmayan arzusudur". Bunu Türkiyə Böyük Millət Məclisinin (TBMM) sədri Numan Kurtulmuş “Milliyet” qəzetinə müsahibəsində bildirib. O, Türkiyə, İsveç və Finlandiya arasında üçtərəfli sazişin mövcud olduğunu xatırladıb. "Onlar təxribatçı əməllərlə məşğul olacaqlar və sonra da NATO-ya üzv olmaq üçün razılıq verməyimizi istəyəcəklər? Üzr istəyirəm, Türkiyə öz sözünə cavabdeh ölkədir. Biz istəyirik ki, opponentlərimiz də öz sözlərinin üstündə dursunlar. Öhdəliklərini yerinə yetirməyən İsveç üçün NATO-ya üzvlüyü gözləmək - sadəcə həyata keçirilməsi mümkün olmayan arzudur", - deyə spiker bildirib. N.Kurtulmuş İsveçdə Quranın yandırılmasını da sərt tənqid edib. Onun sözlərinə görə, məhkəmənin faşist və islamofob nümayişçilərə dəstək verməsi şübhəsiz ki, zərərlidir: "Bunlar qəbuledilməzdir. Ağızlarını açanda Avropanın yüksək dəyərlərindən, müxtəlif mədəni dəyərlərin birgə mövcudluğundan bəhs edirlər. Onlar bir tərəfdən demokratiyadan, digər tərəfdən inanclara hörmətdən danışırlar. Amma təxribatçı, anti-İslam və anti-insan hərəkətlərə heç cür halda haqq qazandırıla bilməz. Onu qanadlarının altına alıb müdafiəyə qalxırlar. Bunu anlamaq mümkün deyil. Bunlar bəzi dairələrin İslam dünyasına qarşı qərəzli düşmənçiliyini qızışdırmaq üçün atılan addımlardır”.

Türkiyənin Eskişəhir şəhərində sərnişin avtobusu aşıb. Sozcu.az xəbər verir ki, hadisə nəticəsində 35 nəfər yaralanıb. Qəza yerinə polis, xilasedici və təcili tibbi yardım əməkdaşları cəlb edilib. Yaralılar yaxınlıqdakı xəstəxanaya aparılıb. Ölkədə daha bir ağır yol qəzası İzmir şəhərində qeydə alınıb. Minik maşını ilə mikroavtobusun toqquşması nəticəsində 5 nəfər ölüb, 21 nəfər yaralanıb. Hadisə yerinə xilasedicilər və təcili tibbi yardım əməkdaşları cəlb olunub. Məlumata görə, yaralılardan 5-nin durumu ağırdır.

"Azərbaycan türkü qardaşlarımzın hüzur və təhlükəsizliyi üçün fədakarlıqla xidmət edən Azərbaycan Silahlı Qüvvələri ilə tək yumruq, tək ürək olmağa davam edəcəyik". Bu barədə Türkiyə Milli Müdafiə Nazirliyinin tviter hesabında yazıb. Türkiyə Müdafiə Nazirliyi 26 iyun - ölkəmizin Silahlı Qüvvələr Günü münasibətilə Azərbaycanı təbrik edib: "Azərbaycan Silahlı Qüvvələrinin 105-ci ili mübarək olsun".

Türkiyənin Adana vilayətində yenidən zəlzələ qeydə alınıb. Sozcu.az xəbər verir ki, bu barədə AFAD-ın rəsmi tviter səhifəsində məlumat yayılıb. Bildirilib ki, vilayətin Saimbeyli rayonunda baş verən yeraltı təkan Rixter şkalası ilə 3.5 ballıq maqnituda ilə qiymətləndirilib. Ocağı yerin 7.8 kilometr dərinliyində yerləşən zəlzələdən sonra itki və dağıntılar barədə məlumat verilməyib.

Türkiyənin Milli İstehbarat Təşkilatı qırmızı kateqoriya ilə İnterpol tərəfindən də axtarışa verilən PKK/KCK terror təşkilatının “icraedici şurası”nın üzvü Əsəd Faraşin kod adlı Əbdürrəhman Çadırcını Suriyanın Qamışlı bölgəsində məhv edib. Sozcu.az xəbər verir ki, bununla bağlı ölkə mətbuatı məlumat yayıb. Terrorçunun əsasən Avropadakı fəaliyyətləri koordinasiya etdiyi bildirilir.

Türkiyə tatar türklərinin qədim vətəni Krım da daxil olmaqla, Ukraynanın müstəqilliyini, suverenliyini və ərazi bütövlüyünü təmin etmək əzmindədir. Sozcu.az xəbər verir ki, bunu Türkiyənin xarici işlər naziri Hakan Fidan deyib. “Türkiyə Ukraynanın yenidən qurulmasında aparıcı rol oynayan ölkələrdən biridir. Müharibə başlayandan bəri Ukraynadakı türk podratçılar ümumi dəyəri 3,2 milyard dollar olan 50 layihədə iştirak ediblər”, - o bildirib.

Türkiyədə yük maşını ilə sərnişin avtobusunun toqquşması nəticəsində 2 nəfər ölüb, 20 nəfər yaralanıb. Bu barədə Türkiyə mətbuatı məlumat yayıb. Bildirilib ki, hadisə Dənizli-Afyonkarahisar avtomobil yolunda baş verib. Qəza nəticəsində yük maşınının sürücüsü və sərnişini həyatını itirib.

Türkiyədə Mersin vilayətinin Tarsus rayonunda sərnişin avtobusu yük maşını ilə toqquşub. Sozcu.az xəbər verir ki, bu barədə TRT məlumat yayıb. Qəza nəticəsində 1 nəfər ölüb, 28 nəfər yaralanıb. Xəsarət alan TIR sürücüsü və avtobusda olan 27 sərnişin təcili tibbi yardım maşınları ilə ətrafdakı xəstəxanalara aparılıb.

Türkiyənin Qəhrəmanmaraş vilayətinin Göksün rayonunda 4 bal gücündə zəlzələ baş verib. Sozcu.az xəbər verir ki, bu barədə AFAD məlumat yayıb. Məlumata görə, zəlzələ yerin 7 kilometr dərinliyində qeydə alınıb. Tələfat və dağıntı barədə məlumat verilməyib.

İsveç PKK da daxil olmaqla bütün terror təşkilatlarını qınayır. Sozcu.az xəbər verir ki, bunu İsveçin xarici işlər naziri Tobias Billström jurnalistlərə açıqlamasında deyib. “Türkiyə ilə hədəfimiz eynidir: terrorla mübarizə aparmaq. Bunu memorandum çərçivəsində əl-ələ verib konstruktiv şəkildə edirik. İsveçin PKK ilə bağlı mövqeyi çox açıqdır. Bu səbəbdən biz NATO üzvü olmaq üçün memorandumda yazılanların və qərarların hamısını yerinə yetirmək istəyirik. İsveçdə qəbul edilən yeni qanun layihəsi ölkəmizlə Türkiyə, NATO və Avropa Birliyi (AB) üzvləri arasında terrorla mübarizə sahəsində əməkdaşlığı asanlaşdıracaq”, - XİN başçısı bildirib. Nazir eyni zamanda İsveçdə məskunlaşan terrorçuların Türkiyəyə ekstradisiya məsələsinə də aydınlıq gətirib: “İsveç AB-nin qanunvericiliyi çərçivəsində ekstradisiya həyata keçirir və ekstradisiya qərarları məhkəmə sistemi tərəfindən müstəqil şəkildə qəbul olunur”.

Türkiyə ordusu Suriyanın şimalında 16 PKK/YPG terrorçusunu zərərsizləşdirib. Sozcu.az xəbər verir ki, bu barədə Türkiyə Milli Müdafiə Nazirliyinin rəsmi tviter səhifəsində məlumat verilib. Bildirilib ki, Türk Silahlı Qüvvələri Suriyadakı Tel Rıfat və Münbiç məntəqələrində təsbit olunmuş terrorçu hədəfləri dağıdıb və nəticədə 16 terrorçu zərərsiz hala gətirilib. Bununla da bölgədə zərərsizləşdirilən terrorçuların sayı 57-yə yüksəlib. "Əsgər hücum həyata keçirən terrorçuların hinlərini başlarına yıxmağa davam edir", - deyə tvitdə qeyd olunub.

Türkiyənin İzmir şəhərinin Əliağa rayonunda 11 nəfər qidadan zəhərlənib. Sozcu.az “Haber Global”a istinadən xəbər verir ki, qısa müddət əvvəl istifadəyə verilən müəssisədə günün müxtəlif saatlarında toyuq əti və düyü yeyən 11 nəfər dünən axşam saatlarında qusma və ürəkbulanma şikayətləri ilə Əliağa Dövlət Xəstəxanasına müraciət edib. Tibbi müayinədən sonra onların müalicələrinə başlanılıb. Hadisə ilə bağlı təqiqat aparılır.