Dünya

Tramp Administrasiyası Almaniyaya 3,5 milyard dollar dəyərində raket satışına icazə verib. Sozcu.az xəbər verir ki, bu barədə “Blumberq” məlumat yayıb. Bildirilib ki, Almaniya RTX şirkətinin istehsalı olan 173 ədəd “Standard Missile 6” (SM-6) və 577 ədəd “Standard Missile 2” (SM-2) raketləri ilə bağlı müvafiq avadanlıqları satın almaq üçün müraciət edib. ABŞ Müdafiə Təhlükəsizliyi Əməkdaşlığı Agentliyi (DSCA) açıqlamasında bildirib ki, sistemlər Almaniyaya cari və gələcək təhdidlərə cavab verməyə kömək edəcək. Həmçinin vurğulanıb ki, bu addım Berlinin ABŞ və digər müttəfiq ordularla əməkdaşlıq imkanlarını artıracaq. Nəşr yazır ki, daha əvvəl ABŞ rəsmiləri Brüsseldəki müttəfiqlərinə “güclü Avropanın Rusiyanı gələcək təcavüzlərdən çəkindirməli olduğunu bildirib. Qeyd olunub ki, müttəfiqlər iyun ayında müdafiə xərclərini ümumilikdə 5 faizə, “sərt müdafiə” adlandırılan xərcləri isə 3,5 faizə çatdırmaq barədə razılığa gəliblər.

Səudiyyə Ərəbistanı F-35 qırıcılarını almaq istəyir və mən də bu barədə fikirləşirəm. Sozcu.az xəbər verir ki, bunu ABŞ Prezidenti Donald Tramp jurnalistlərə açıqlamasında deyib. “Əslində, onlar bir neçə döyüş təyyarələri almaq istəyirlər”, - Tramp əlavə edib.

Noyabrın 14-də Rusiyanın Novorossisk şəhərindəki liman və neft infrastrukturuna raket və PUA-larla zərbələr endirilib. Sozcu.az xəbər verir ki, bunu Ukrayna Dezinformasiyaya Qarşı Mübarizə Mərkəzinin rəhbəri Andrey Kovalenko deyib. Onun sözlərinə görə, zərbələr nəticəsində Rusiyanın Qara dənizdəki ən böyük neft terminallarından birində yanğın baş verib. “Transneft” şirkətinin enerji infrastrukturundakı başlıca obyekti “Şesxaris” yükdaşıma kompleksi də vurulub.

Gürcüstanın keçmiş baş naziri, müxalif “Qaxariya naminə Gürcüstan” partiyasının lideri Giorgi Qaxariya barəsində qiyabi qaydada həbs qətimkan tədbiri seçilib. Sozcu.az xəbər verir ki, bu barədə Tiflis Şəhər Məhkəməsi qərar qəbul edib. Qiyabi həbs qərarı “Çorçana işi” üzrə qəbul edilib. Qərarla Gürcüstan Baş Prokurorluğunun vəsatəti təmin olunub.

Hesab edirəm ki, ədliyyə naziri və energetika naziri öz vəzifələrində qala bilməzlər. Bu, digər məsələlərlə yanaşı, etimad məsələsidir. İttihamlar varsa, onlara cavab verilməlidir. Onların vəzifədən uzaqlaşdırılması ilə bağlı qərar operativ qərardır. Sozcu.az xəbər verir ki, bu sözləri Ukrayna Prezidenti Vladimir Zelenski deyib. “Mən Ukraynanın baş nazirindən bu nazirlərin istefa ərizələrini təqdim etməsini xahiş etmişəm. Mən Ali Rada üzvlərindən xahiş edirəm ki, bu istefalar qanun çərçivəsində həll edilsin”, - o bildirib. Qeyd edək ki, bundan əvvəl ədliyyə naziri (və keçmiş energetika naziri) Qaluşenko Nazirlər Kabinetinin rəhbəri tərəfindən vəzifəsindən kənarlaşdırılıb. Ukraynanın energetika naziri Svetlana Qrinçuk isə istefa verdiyini sosial şəbəkədə elan edib. Qrinçuk 2025-ci ilin iyulundan bəri energetika naziri idi. Milli Antikorrupsiya Bürosu (NABU) Ukraynanın enerji sektorunda genişmiqyaslı rüşvət sxemi ilə bağlı apardığı araşdırmanın təfərrüatını açıqlayıb. Araşdırmada Ukrayna hökumətinin bir neçə keçmiş və indiki üzvünün, habelə Prezident Vladimir Zelenskinin yaxın dostu olduğu deyilən iş adamı Timur Mindıçın adı keçir.

Ukrayna Rusiyanın Stavropol diyarının Budyonnovsk şəhərində yerləşən “Stavrolen” neft-kimya zavoduna PUA-larla hücum edib. Sozcu.az xəbər verir ki, bu barədə Stavropol diyarının qubernatoru Vladimir Vladimirov məlumat yayıb. Məlumata görə, hücum nəticəsində zavodda yanğın baş verib. Rusiya isə hava hücumundan müdafiə qüvvələrinin Ukrayna PUA-larını dəf etdiyini bildirib.

Rusiyanın Saratov vilayətinə PUA hücumu edilib. Sozcu.az xəbər verir ki, bu barədə Rusiya mətbuatı məlumat yayıb. Məlumata görə, Ukrayna ordusu Saratovdakı neft emalı zavoduna zərbələr endirib. Nəticədə zavodun ərazisində yanğınlar baş verib. Saratov vilayətinin qubernatoru Roman Busargin hücum nəticəsində mülki infrastrukturun da ziyan gördüyünü bildirib.

Fransanın keçmiş prezidenti Nikola Sarkozi apelyasiya şikayətinə baxılana qədər Paris məhkəməsi tərəfindən şərti olaraq həbsdən azad edilib. Sozcu.az xəbər verir ki, France24 belə məlumat yayıb. O, 2007-ci il seçki kampaniyasını maliyyələşdirmək üçün Liviya diktatoru Müəmmər Qəzzafidən milyonlarla avro alınmasında - “Liviya işi” adlandırılan cinayətkar sövdələşmədə iştirak etməkdə təqsirli bilib. Bu yaxınlarda 5 il həbs cəzasına məhkum edildikdən sonra üç həftə təcridxanada qalıb. Sarkozi korrupsiya və seçki kampaniyasının qanunsuz maliyyələşdirilməsi də daxil olmaqla digər ittihamlardan bəraət alıb. Məhkəmə Fransanın keçmiş prezidentinin ölkəni tərk etməsinə icazə verilməyəcəyinə qərar verib. Apelyasiya dinləməsinin daha sonra keçiriləcəyi gözlənilir.

Ukrayna Prezidenti Vladimir Zelenski Rusiya rəsmilərinə və bir sıra nəşriyyatlara qarşı sanksiyalar tətbiq edib. Sozcu.az xəbər verir ki, bu barədə Ukrayna Prezident Administrasiyası məlumat yayıb. Bildirilib ki, ümumilikdə 8 şəxsə sanksiya qoyulub. Onların arasında Rusiya hökumət rəsmiləri, informasiya diversiyası ilə məşğul olan FTX əməkdaşı, Rusiya Baş Qərargahının İnformasiya Departamentinin nümayəndəsi və Rusiya Birbaşa İnvestisiya Fondunun rəhbəri, prezident Vladimir Putinin xüsusi nümayəndəsi Kirill Dmitriyev də var. Sanksiyalar çərçivəsində bu şəxslərin Ukraynaya girişinə qadağa qoyulur, onların Ukraynada ola biləcək əmlakları və aktivləri dondurulur və kommersiya fəaliyyətinə məhdudiyyətlər tətbiq olunur.

Rusiya ordusu cəbhənin əsas sahələrində heç bir irəliləyiş əldə etməyiblər və Sum bölgəsində böyük itkilər verirlər. Sozcu.az xəbər verir ki, bu barədə ABŞ-ın Müharibənin Öyrənilməsi İnstitutunun hesabatında qeyd olunub. Hesabata əsasən, ruslar Sum bölgəsinin şimalında hücum əməliyyatlarını davam etdiriblər, lakin irəliləyə bilməyiblər. “Ruslar Sum istiqamətində, Bezsalovka yaxınlığında fərariliyin yüksək səviyyəsi və lazımi təlim, rabitə və radio əlaqənin olmaması səbəbindən böyük itkilər verirlər”, - İnstitut rusiyalı hərbi müxbirlərə istinadla bildirib. Məlumata görə, Ukraynanın pilotsuz təyyarələrinin hücumları rusların təchizatını artırmasını çətinləşdirir.

Pentaqon bürokratiyası ABŞ üçün Çindən daha ciddi bir təhdidə çevrilib. Sozcu.az xəbər verir ki, bunu ABŞ-ın hərbi naziri Pit Heqset deyib. O, bürokratiyanı ABŞ-ın ən qorxunc düşməni adlandırıb: "Bu düşmən dünyanın mərkəzi planlaşdırmasının son istehkamlarından biridir. Beş illik planlaşdırma diktaturası ilə idarə olunur. Keçmiş Sovet İttifaqı kimi səslənə bilər, amma bu düşmən çoxdan yoxa çıxıb. Haqqında danışdığım düşmən evə daha yaxındır. Bu, Pentaqondakı bürokratiyadır". Onun sözlərinə görə, bu düşmən yeni ideyaları məhv edir və azad düşüncəni boğur ki, bu da nəticədə milli təhlükəsizliyə və hərbçilərin həyatına təhlükə yaradır.

İstanbul Cümhuriyyət Baş Prokurorluğu İsrailin baş naziri Benyamin Netanyahunun da daxil olduğu 37 nəfər barədə “soyqırım” ittihamı ilə həbs qərarı verib. Sozcu.az bu barədə TRT kanalına istinadən xəbər verir. Məlumata görə, qərar Qəzza zolağında həyata keçirilən hücumlar nəticəsində çoxsaylı mülki şəxsin, xüsusilə qadın və uşaqların həlak olması ilə bağlı aparılan istintaq çərçivəsində qəbul edilib. Prokurorluq sözügedən şəxslərin beynəlxalq hüquqa əsasən “müharibə cinayətləri” və “insanlığa qarşı cinayətlər” törətdiyini iddia edir. Hazırda Türkiyə tərəfindən beynəlxalq axtarış və hüquqi prosedurların başladılması istiqamətində addımlar atılır.