ABŞ Ukraynaya “Tomahavk” qanadlı raketlərini verməyi qərara alsa, onları idarə edənlər ukraynalılar deyil, amerikalılar olacaq. Sozcu.az xəbər verir ki, bu barədə “Faynənşl Tayms” nəşri məlumat yayıb. Qərb hərbi rəsmisinin sözlərinə görə, raketlər kifayət qədər qısa müddətdə, amerikalı podratçıların iştirakı ilə Ukraynaya göndərilə bilər. Onlar raketlərin istifadəsində köməklik göstərəcək, bu isə Vaşinqtona hədəflərə nəzarəti saxlamağa və ukraynalı hərbçilərin uzunmüddətli təlimini istisna etməyə imkan verəcək. Eyni zamanda, NATO dairələrində hesab edilir ki, Moskva bu addımı ABŞ-ın münaqişəyə birbaşa müdaxiləsi kimi qiymətləndirə bilər. Alyans rəsmilərindən biri bildirib ki, Rusiya nüvə şantajı elementləri ilə məsuliyyətsiz ritorika nümayiş etdirə və Ukraynaya daha genişmiqyaslı zərbələr endirə bilər. Bununla belə, ekspertlər hesab edirlər ki, bu qərar oyunun qaydalarını köklü şəkildə dəyişməyəcək və “Tomahavk” raketləri sadəcə Ukraynanın uzaqmənzilli PUA zərbələrinə əlavə kimi xidmət edəcək. Analitiklərin hesablamalarına görə, ABŞ bu raketləri Ukraynaya təhvil versə, onların atəş məsafəsinə Rusiyanın təxminən 1950 hərbi obyekti, o cümlədən 76 aviabazası daxil olacaq.

Bakının Yasamal rayonunda oktyabrın 16-sı səhər saatlarında silahlı insidentdə yaralananlardan birinin vəziyyəti stabil, digərininki isə orta ağırdır. Bu barədə Sozcu.az-a TƏBİB-dən məlumat verilib. Bildirilib ki, oktybarın 16-sı saat 07:00 radələrində xəsarət alması səbəbilə 1995-ci il təvəllüdlü iki nəfər (kişi) Kliniki Tibbi Mərkəzin Təcili və təxirəsalınmaz tibbi yardım şöbəsinə hospitalizasiya olunub. Onlardan birinə sol budun sınığı, digərinə isə sol budun kəsilmiş-deşilmiş yarası diaqnozu təyin edilib. Hazırda pasiyentlərin müalicəsi tibb müəssisəsinin Travmatologiya şöbəsində davam etdirilir. Onlardan birinin vəziyyəti stabil, digərinin vəziyyəti isə orta ağır olaraq qiymətləndirilir. Faktla bağlı hüquq-mühafizə orqanları araşdırma aparır, istintaq başladılıb.

Haqqında 4 aylıq ev dustaqlığı qətimkan tədbiri seçilən Prezident Administrasiyasının sabiq rəhbəri, akademik Ramiz Mehdiyevlə bağlı yeni xəbər var. Sozcu.az xəbər verir ki, Mehdiyevə yaxın çevrədən Modern.az-a daxil olan məlumata görə, media və sosial şəbəkələrin gündəmi olan akademikin halı dünən axşam saatlarında pisləşib. Hətta onun üstünə həkim çağırıblar. Həkim müayinəsi zamanı Mehdiyevin gərginlik və stress səbəbindən əsəb sisteminin pozulduğu, qan təzyiqinin həddindən artıq yüksəldiyi bildirilir. Verilən məlumata görə, 87 yaşlı R.Mehdiyevi qəzəbləndirən əsas məsələlərdən biri vaxtilə vəzifəyə irəli çəkdiyi, deputat mandatı verdiyi, mövqe bəxş etdiyi bəzi insanların indi onun əleyhinə mətbuatda danışmasıdır. Bu halın akademikin mənəvi durumuna ciddi təsir göstərdiyi xüsusi vurğulanır. Ramiz Mehdiyev vaxtilə yetişdirdiyi şəxslərin belə tezliklə onu inkar edəcəyini gözləmirmiş. Xatırladaq ki, Dövlət Təhlükəsizliyi Xidmətinin (DTX) Baş İstintaq İdarəsində Ramiz Mehdiyevə cinayət işi başladılıb. O, Cinayət Məcəlləsinin 274 (Dövlətə xəyanət), 278 (Hakimiyyəti zorla ələ keçirmə və ya onu zorla saxlama) və 193-1-ci (cinayət yolu ilə əldə edilmiş pul vəsaitlərinin leqallaşdırılması) maddələri ilə ittiham edilir. İstintaq onun yaşını nəzərə alaraq ibtidai istintaq müddətində ev dustaqlığı şəraitində saxlanılmasını uyğun hesab edib. Ramiz Mehdiyev 1995-2019-cu illərdə Prezident Administrasiyasının rəhbəri, 2019–2022-ci illərdə Milli Elmlər Akademiyasının prezidenti vəzifələrində işləyib. O, dövlət qulluğunun ən yüksək xüsusi rütbəsi olan həqiqi dövlət müşaviri statusuna malikdir. R.Mehdiyev hazırda Azərbaycan Respublikasının Təhlükəsizlik Şurasının üzvüdür. O, həm də hakim Yeni Azərbaycan Partiyasının Veteranlar Şurasında təmsil olunur.

Ölkədə 1 yaşadək uşaqlar arasında ölüm hallarının sayı və səbəbləri açıqlanıb. Sozcu.az xəbər verir ki, bu barədə Dövlət Statistika Komitəsi məlumat yayıb. Açıqlanan məlumata görə, 2024-cü ildə Azərbaycanda 1 yaşadək ölən uşaqların sayı 1 420 nəfər olub. Bu o deməkdir ki, doğulan hər 10 min körpədən 276-sı 1 yaşına çatmadan vəfat edib. Ölüm hallarının sayı oğlan uşaqları arasında daha çoxdur. Belə ki, 804 oğlan uşağı 1 yaşına çatmadan həyatını itirib. Nəticədə, diri doğulan hər 10 min oğlan uşağından 148-i 1 yaşına çatmadan ölüb. Qız uşaqları arasında isə bu göstərici 128 olub. Ötən il diri doğulan 616 qız uşağı 1 yaşına çatmadan həyatını itirib. Ölümün əsas səbəbləri arasında perinatal dövrdə (doğuş zamanı və doğulduqdan sonrakı ilk günlər) meydana çıxan hallar birinci yerdədir. Bildirilir ki, 735 uşaq bu səbəbdən həyatını itirib. Körpə ölümlərinə səbəb olan sonrakı əsas səbəblər tənəffüs sistemi xəstəlikləri (178 ölüm), anadangəlmə anomaliyalar (inkişaf qüsurları) və xromosom pozuntuları (101 ölüm), sinir sistemi xəstəlikləri (32 ölüm), həzm sistemi xəstəlikləri (10 ölüm) və bəzi infeksion xəstəliklər (47 ölüm) olub. Bunlardan başqa, il ərzində travmalar, zəhərlənmələr və xarici səbəblərin təsirindən 12, digər səbəblərdən isə 305 uşaq 1 yaşına çatmadan həyatını itirib.

“Prezident Administrasiyasının sabiq rəhbəri, Azərbaycan Milli Elmlər Akademiyasının keçmiş prezidenti, akademik Ramiz Mehdiyevin cinayət məsuliyyətinə cəlb olunması, barəsində ev dustaqlığı qətimkan tədbirinin seçilməsi haqda ilk xəbəri mən yaymışam. Ancaq bununla bağlı məlumatın mənə necə gəldiyini və mənbəni açıqlaya bilmərəm”. Bunu “Yeni Sabah”a açıqlamasında Vəkillər Kollegiyasının üzvü, vəkil Pərviz Məmmədov deyib. O bildirib ki, R.Mehdiyevin işində vəkil kimi iştirak etmir.  “Jurnalist olmadığım üçün həmin xəbərin mənə istinad olunmadan paylaşılmasına iradım yoxdur. Peşəkar jurnalist deyiləm ki, mənim xəbərimə istinad verilməsini tələb edim. Sosial şəbəkədə öz profilimdə paylaşdım. Əsas odur ki, vətəndaşlarımızın bu barədə məlumatı oldu. Sözügedən xəbəri paylaşan saytları təqib etməmişəm və bunun üçün kimin istinad verib-vermədiyindən xəbərdar deyiləm”, - vəkil vurğulayıb.  Qeyd edək ki, Bakı şəhəri Səbail Rayon Məhkəməsi Mehdiyev Ramiz Ənvər oğlu barədə cinayət işi üzrə qərar qəbul edib. Qərara əsasən məhkəmə xüsusilə ağır cinayət əməllərinə görə cinayət məsuliyyətinə cəlb edilən R.Mehdiyev barədə verilən vəsatəti təmin edərək, 4 ay müddətinə ev dustaqlığı qətimkan tədbiri seçib. R.Mehdiyev Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham edilir.

"ABŞ-ın köhnə, amma hələ də ölümcül raketləri Ukrayna savaşında oyun qaydalarını dəyişə bilər..." ABŞ prezidenti Donald Trampın Ukraynaya uzaqmənzilli "Tomahawk" qırıcı qanadlı raketlərinin verilməsi barədə istəklər və işarələr son günlərin əsas beynəlxalq gündəmi olub. Sozcu.az xəbər verir ki, bu barədə "The Times" nəşri yazıb. Nəşr qeyd edir ki, Trampın bu məsələni prezident Vladimir Zelenski ilə yaxın günlərdə müzakirə edəcəyi bildirilir. Həm Vaşinqtondakı görüş, həm də Trampın açıqlamaları dünya siyasətində gərginliyi artırıb.  "Tomahawk" nədir və nə üçün önəmlidir? "Tomahawk" ABŞ-ın uzaqmənzilli qanadlı raketlərindən biridir: onlar aşağı hündürlükdə uçub hədəfi dəqiq vura bilir, son modifikasiyalarda zirehə nüfuz edən başlıq və yüzlərlə kilometr mənzil əldə olunub. Bu raketlər dərin strateji zərbələr üçün uyğundur - komanda-mərkəzləri, yüksək dəyərli hərbi infrastrukturlar və mühüm sənaye obyektləri hədəf ola bilər. Buna görə də onların kütləvi çatdırılması qarşı tərəfin hava müdafiə şəbəkəsini "çəkməyə" məcbur edə və əməliyyat imkanlarını xeyli genişləndirə bilər. Təhdid, hədiyyə, yoxsa manevr? Tramp mətbuat qarşısında Zelenski ilə görüşdə "Tomahawk" mövzusunu müzakirə edəcəyini, ABŞ-in böyük ehtiyatı olduğunu bildirib və mövzunu həm təzyiq, həm də danışıqlar aləti kimi səciyyələndirib. Nüfuzlu nəşrlər yazır ki, Tramp bu vasitəni həm Putinə təzyiq vasitəsi kimi, həm də NATO və Avropa müttəfiqlərinə "hərəkətə keçin" siqnalı olaraq istifadə etmək istəyir. Bununla belə, rəsmi qərar verilincə nə qədər raketin təqdim olunacağı və hansı şərtlərlə veriləcəyi suallar açıq qalır.  Ukraynanın real imkanları: atəşə hazırdırmı? Məqalələr və ekspert rəyləri göstərir ki, "Tomahawk"ların istifadə olunması üçün yalnız raketlərin özü kifayət deyil, onların işə düşməsi üçün uyğun sistemlər, təhlükəsiz saxlanma və əməliyyat dəstəyi tələb olunur. Həmçinin bəziləri vurğulayır ki, Ukraynada dəniz və ya yerüstü müvafiq platformalar məhduddur. ABŞ-ın bəzi sistemləri (məsələn, "Typhon" tipli qurğular) və ya ABŞ əməliyyat dəstəyi lazım ola bilər ki, bu da Vaşinqtonun Rusiyaya daha yaxın qarşıdurmaya girməsi riski deməkdir.  Effektivlik üçün nə qədər raket lazımdır? Ukraynalı rəsmilər və ekspertlər hesab edir ki, simvolik sayda raket yetərli olmayacaq - əhəmiyyətli təsir üçün yüzlərlə raketin lazım olacağı vurğulanır. Məsələn, bəzi rəy sahibləri hesab edir ki, təsirli əməliyyatlar üçün ayda doza-doza, ümumilikdə isə iki yüzə yaxın raketdən danışmaq lazımdır. Daha məhdud say isə yalnız məhdud, simvolik təsir göstərə bilər. Bu isə maddi və logistika baxımından ciddi çağırışlar doğurur.  Moskva və digər reaksiyalar Kreml və Rusiyanın yaxın dairələri "Tomahawk" tədarükünün vəziyyəti "yeni mərhələ" sayacağı barədə xəbərdarlıq edir və mümkün eskalasiyanın gətirə biləcəyi təhlükələri qeyd edirlər. Həmçinin Belarus rəhbərliyi və bəzi rusiyapərəst rəsmilər belə tədarüklərin gərginliyi kəskin artıracağını və cavab tədbirlərinə yol aça biləcəyini bildiriblər. Bu tip xəbərdarlıqlar transatlantik siyasətdə risk hesablamalarını daha da mürəkkəbləşdirir.  Nə dəyişə bilər - strateji nəticələr - Müharibə dinamikası: Əgər böyük sayda "Tomahawk" Ukraynaya ötürülərsə, bu Rusiyanın dərin arxa zolaqlarına təzyiq tətbiq etməyə imkan verə və yerli hava müdafiəsini yoraraq taktiki üstünlük verə bilər. - Eskalasiya riski: Eyni zamanda belə bir addım Moskva ilə birbaşa qarşıdurma riskini artırar və Rusiyanın cavab reaksiyasını sərtləşdirə bilər. - Beynəlxalq koordinasiya: Trampın yanaşması NATO ölkələrini və Avropanı daha fəal maliyyələşdirici-tədarükçü roluna təhrik edə bilər, habelə, bu cür addımların miqyası ABŞ ehtiyatları, istehsal tempi və müttəfiq öhdəlikləri ilə məhdudlaşır. "Tomahawk"ların Ukraynaya verilməsi barədə debat təkcə raketlərdən ibarət deyil, bu, strateji seçim, logistika, beynəlxalq siyasət və eskalasiya riski ilə bağlı mürəkkəb siyasət paketidir. Hər bir addımın həm qısa müddətli döyüş meydanı təsiri, həm də uzun müddətli siyasi nəticələri var. Vaşinqtonun qərarı, həmçinin Avropa müttəfiqlərinin reaksiyası və Moskvanın cavab strategiyası bu məsələni gələcək həftələrin ən kritik geosiyasi mövzularından birinə çevirəcək.

Bakıda hündürmərtəbəli binadan yıxılan qız xəstəxanada keçinib. Sozcu.az Bakupost.az-a istinadla xəbər verir ki, hadisə jurnalistlərin 3-cü binasında ("Qazilərin binası" kimi tanınan binada) baş verib. Belə ki, Sabunçu rayonu, Bakıxanov qəsəbəsi sakini, 2000-ci il təvəllüdlü Əfsanə Mirzalı qızı Rəhimxanova binanın 13-cü mərtəbəsinin balkonundan yıxılıb. O, təcili xəstəxanaya çatdırılıb. Lakin həkimlərin səyi nəticə verməyib və Ə.Rəhimxanova aldığı ağır xəsarətlərdən keçinib. Qeyd olunur ki, hadisə baş verən gün Ə.Rəhimxanovanın doğum günü imiş. O, doğum günün qeyd etmək üçün həmin binada yaşayan rəfiqəsigilə qonaq gəlibmiş. Ə.Rəhimxanovanın binadan yıxıldığı, yoxsa intihar etdiyi ilə bağlı hüquq-mühafizə orqanları tərəfindən araşdırma aparılır.

İsrail ordusu 2023-cü ilin oktyabrında hərbi əməliyyata başlayandan bəri Qəzzada təxminən 70 min ton müxtəlif mərmi və bombalardan istifadə edib. Sozcu.az xəbər verir ki, bu barədə sursatların zərərsizləşdirilməsi və mina qurbanlarına yardım göstərməklə məşğul olan “Handicap İnternational” təşkilatının Qəzzada işləyən əməkdaşı məlumat verib. “Yerdə və binaların dağıntılarında qalan partlamamış hərbi sursatlar hazırda Qəzzanın demək olar ki, bütün ərazilərində öz evlərinə qayıdan fələstinlilər üçün böyük təhlükə yaradır”, - məlumatda qeyd olunub.

“Ramiz Mehdiyev işi ilə məşğul olan rəsmilərdən xahişim, onun ölməsinə, yaxud öldürülməsinə imkan verməyin”. Sozcu.az xəbər verir ki, bunu tanınmış hüquqşünas Aslan İsmayılov aidiyyəti dövlət qurumlarına müraciətində bildirib. “Vətənə xidmət edən minlərlə adamın həyatını cəhənnəmə çevirən bu şəxsə indi ancaq can sağlığı arzulayıram ki, o özü kimilərin, ona qulluq edənlərin hamısının adını deyə bilsin. İllərlə bu ölkənin  çörəyini yeyib ona düşmənçilik edənlərin hamısını xalq tanısın. İnanın ki, onların sırasında çoxlarının ağıllarına gətirmədiyi şəxslər olacaq. Vətən xainləri, bilin ki, bu dünyadan başqalarına yaşatdığınızı yaşamamış getdi yoxdur”.

Oktyabrın 16-sı Azərbaycanın şərq rayonlarından başlayaraq 18-i gündüzədək hava şəraitinin bəzi yerlərdə arabir yağıntılı olacağı, şimşək çaxacağı gözlənilir. Bu barədə Sozcu.az-a Milli Hidrometeorologiya Xidmətindən məlumat verilib. Ayrı-ayrı yerlərdə yağıntının leysan xarakterli intensiv olacağı, dolu düşəcəyi, 17-də yüksək dağlıq ərazilərdə sulu qara keçəcəyi ehtimal olunur. Yağıntılı hava şəraiti ilə əlaqədar çaylarda sululuğun artacağı, bəzi dağ çaylarından qısamüddətli daşqın və sel keçəcəyi gözlənilir.

Ermənistan hüquq-mühafizə orqanlarının əməkdaşları bu gün səhər saatlarında Erməni Apostol Kilsəsinin Araqatsotn yeparxiyasının altı din xadimini, o cümlədən yepiskop Mkrtç Proşyanı (bütün ermənilərin katolikosu II Qareginin qardaşı oğlu - red.) saxlayıb. Sozcu.az xəbər verir ki, bu barədə “Sputnik Ermənistan” məlumat yayıb. Məlumata görə, Saqmosavank monastırının keşişi Paren Arakelyan da saxlanılıb. Onlar İstintaq Komitəsinə aparılıb.

Başqırdıstanda yerləşən neft emalı zavodu oktyabr ayında dördüncü dəfə Ukrayna dronlarının hücumuna məruz qalıb. Sozcu.az xəbər verir ki, bu barədə Ukrayna mediası məlumat yayıb. İlkin məlumatlara görə, Ukrayna ilə sərhəddən təxminən 1400 kilometr aralıda yerləşən “Ufa” NEZ (“Başneft-UNPZ”) hücuma məruz qalıb.

Dövlətə xəyanət və çevriliş cəhdi çox ciddi məsələdir. Yəqin ki, qısa müddətdə ətraflı açıqlama veriləcək. Sozcu.az xəbər verir ki, bunu Globalinfo.az-a keçmiş təhsil naziri Misir Mərdanov Prezident Administrasiyasının sabiq rəhbəri Ramiz Mehdiyevin həbsi ilə bağlı danışarkən deyib. O, Ramiz Mehdiyevə yaxın şəxslərin də həbs olunmasını istisna etmir: “Başqa həbslər də gözləniləndir. Hər kəs onun kimlərlə yaxın əlaqəsinin olduğunu gözəl bilir. Mehdiyevin hansı addımlar atdığı, kimləri vəzifəyə təyin etdiyi, kimlərin arxasında durduğu, hansı şəxsləri dəstəklədiyi məlumdur. Fikrimcə, onlarla bağlı da müəyyən addımlar atılacaq. Yol verdiyi ədalətsizlikləri də hesablayacaqlar. Düşünürəm ki, vaxtilə onun dəstəyi ilə millətin genefonduna ziyan vuranlar məsuliyyətə cəlb oluna bilər. Onların da layiqli cəza almasının vaxtı çatıb. Bu qədər dözmək olmaz!” M.Mərdanov bildirib ki, Ramiz Mehdiyevin həbsi “Tərtər işi”nin açılmasına müəyyən qədər köməklik göstərə bilər: “Hər bir halda bu, başqa məsələ ilə əlaqədardır. Hazırda istintaq işləri gedir deyə, nəsə demək olmur”. Qeyd edək ki, Ramiz Mehdiyev Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunur. O, 1995–2019-cu illərdə Prezident Administrasiyasının rəhbəri olub. 2019–2022-ci illər arasında isə Azərbaycan Milli Elmlər Akademiyasının prezidenti vəzifəsini icra edib.

Sabirabad rayonunda ölümlə nəticələnən yol-nəqliyyat hadisəsi baş verib. Sozcu.az xəbər verir ki, hadisə rayonun Əsgərbəyli kəndi ərazisində qeydə alınıb. Belə ki, Hacı Gülağa oğlu Əbilov QAZ-3110 markalı avtomobili ilə hərəkətdə olarkən idarəetməni itirib və maşını yol kənarındakı beton dirəyə vurub. Nəticədə avtomobildə olan sərnişin, 1958-ci il təvəllüdlü Tofiq Hacıbala oğlu Ağammədov hadisə yerində ölüb. Faktla bağlı cinayət işi başlanıb.

“Kurtlar vadisi – Vətən” filmində bir səhnə var. Təyyarə ilə Amerikadan İstanbula çevriliş üçün gələn Fətullah Gülən xalqın dirənişini görüb planlarının pozulmasından sonra geri qayıtmağı əmr edir və orda bir cümlə işlədir: “Mənim adamlarıma deyin ki, aşkarlanmamaq üçün lazım olsa, məni söysünlər, özlərini qurban kimi göstərsinlər”. FETO Türkiyədə istədiyinə nail olmadı. Öldü. Bizim ölkədə də FETO obrazı Ramiz Mehdiyev idi. Sozcu.az xəbər verir ki, bu sözləri tanınmış alim Zaur Əliyev PA-nın sabiq rəhbəri Ramiz Mehdiyevin ev həbsinə məhkum edilməsi barədə qeyd edib. O bildirib ki, R.Mehdiyevin “yazdığı” kitablar belə onun özünə aid deyil, yüzlərlə alimin zəhmətidir, mövqeyindən istifadə edib hamısını öz adına çap etdirib: “Adam ölkədə Rusiyanın “bəlkə də qayıtdı o günlər” ideyasını yaşadan və yayan bir nömrəli adamı idi. Sprut idi. Zəhərli, qaranlıq bir obraz yaşayıb və öz qara zəhərini hər yerə yayan Sprut. Hətta cinayətkar Hacı Məmmədovun həbsdə olan zaman çəkdiyi rəsm də R.Mehdiyevə işarə vermişdi. Rusiyanın ölkəmizdəki adamı, ölkənin İkinci adamı! Özünü ölkənin sahibi sayırdı və minlərlə insan qorxu içərisində onun adını çəkə bilmirdi. Rusiyanın içimizdə saxladığı ən böyük təhlükədən biri həbs edildi. Lakin bu Sprutun başıdır və dünən gecədən izləyirəm, ona “Həqiqi filosof, dövlət quruculuğunu ölkədə hamıdan yaxşı bilən Ramiz Mehdiyev” deyənlər özlərini “qurban” kimi qələmə verirlər. Eynən FETO-nun tapşırığı kimi. Özlərini gizlətmək istəyirlər. Lakin indi süni intellekt və Quql əsridir və onlar öz təriflərini əsas səhifədən silsələr də, “keş” deyilən yaddaşda qalır. Yaddaşı isə nəinki internetdən, insanlardan silmək olmur. Sprutun 40 qolu və o qolların digər qolları təhlükə olaraq qalır. Rusiyanın yetişdirdiyi agentlər, xainlər, satqınlar və sənin hesabına bahalı həyat yaşayan şərəfsizlər. Ölkə Prezidenti çox ciddi addımlar atır. 1920-ci il təkrar edilməsin deyə, 28 aprel 28 Mayı əvəz etməsin deyə, Sprutun nəinki başı, bütün qol və ayaqları tamam kəsilməlidir. Hər bir cinayət bəlkə də bağışlana bilər, Dövlətə və Vətənə xəyanət yox! Təyyarəni sifariş verdin, özünə çox güvəndin, düşmənlə əlbir oldun, lakin onun enişinin də ağır nəticəsini gözləməli idin. Gecikmiş də olsa, bu xəyanətinin cavabını nəinki bu dünyada, o dünyada da verəcəksən. Növbə isə sənin qol-qanadın olanlardır ki, onlar da Azərbaycanın sağlam ayaq üstə durması üçün kəsilməlidir!”

BRİKS ölkələrinə tətbiq edilən gömrük rüsumları artıq öz təsirini göstərib. Sozcu.az xəbər verir ki, bunu ABŞ Prezidenti Donald Tramp deyib. “Dollarla bağlı çox güclü mövqeyim var, dollarla ticarət etmək istəyənlərin sayında istəməyənlərə nisbətən üstünlük var. BRİKS ölkələri “dollara hücum” siyasəti yürüdür. Dedim ki, kimsə BRİKS-də olmaq istəyirsə, bunun qəbahəti yoxdur, amma sizin ölkəyə qarşı tariflər tətbiq edəcəyik, hamı ordan getdi (BRİKS-dən - red.). Hamı BRİKS-i tərk edir”, - o bildirib.

Azərbaycan Respublikasının Strateji Obyektlərin Mühafizəsi Dövlət Agentliyi rəisinin birinci müavini İsmayıl Xəlil oğlu Hüseynov vəzifədən azad olunub. Sozcu.az Bakupost.az-a istinadla xəbər verir ki, o öz ərizəsi ilə işdən çıxarılıb. İsmayıl Hüseynov 1974-cü il noyabrın 16-da Naxçıvanda anadan olub. O, 2018–2023-cü illərdə Dövlət Gömrük Komitəsi sədrinin birinci müavini vəzifəsində çalışıb. Həmin dövrdə ona gömrük xidməti general-leytenantı ali rütbəsi verilib. 2023-cü ildən isə İsmayıl Hüseynov Strateji Obyektlərin Mühafizəsi Dövlət Agentliyində rəisin birinci müavini kimi fəaliyyət göstərirdi.

08:35 Abşeronda qətl hadisəsi baş verib. Sozcu.az Report-a istinadən xəbər verir ki, hadisə Xırdalan şəhəri ərazisində qeydə alınıb. 2005-ci il təvəllüdlü Elmir Axundov 2006-cı il təvəllüdlü Fərid Rəşad oğlu Məmmədov tərəfindən bıçaqlanıb. O, xəstəxanaya aparılarkən yolda keçinib. F.Məmmədov polis əməkdaşları tərəfindən saxlanılaraq, istintaqa təhvil verilib. Faktla bağlı Abşeron Rayon Prokurorluğunda araşdırma başlanıb. *** Abşeronda xəsarət almış şəxsin ölməsi faktı ilə bağlı cinayət işi başlanıb. Bu barədə Abşeron rayon Prokurorluğundan məlumat verilib. Bildirilib ki, oktyabrın 15-də saat 03 radələrində 2006-cı il təvəllüdlü Elmir Bədirovun almış olduğu xəsrətdən xəstəxanada ölməsi barədə rayon prokurorluğuna məlumat daxil olub. Araşdırma zamanı Abşeron rayonu, Xırdalan şəhəri ərazisində 2006-cı il təvəllüdlü Fərid Məmmədovun bıçaqla Elmir Bədirova ağır xəsarət yetirməsi və sonuncunun həmin xəsarətdən müalicə aldığı xəstəxanada ölməsinə əsaslı şübhələr müəyyən edilib. Faktla bağlı Abşeron rayon prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərəçəkmiş şəxsin ölümünə səbəb olduqda) maddəsi ilə cinayət işi başlanıb. Fərid Məmmədov rayon prokurorluğu tərəfindən şübhəli şəxs qismində tutulub. İbtidai istintaq davam etdirilir.

Ukrayna müharibənin 1330-cu günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 126 220 hərbçi, 11 259 ədəd tank, 23 347 ədəd zirehli döyüş maşını, 33 671 ədəd artilleriya sistemi, 1 520 ədəd RYAS (reaktiv yaylım atəş sistemi), 1 227 hava hücumundan müdafiə sistemi, 426 ədəd hərbi təyyarə, 346 ədəd helikopter, 64 329 ədəd avtomobil texnikası, 70 021 ədəd PUA, 3 859 qanadlı raket, 28 gəmi/kater, 1 sualtı qayıq, 3 977 xüsusi avadanlıq itirib.

Xəbər verdiyimiz kimi, AMEA-nın sabiq prezidenti, PA-nın sabiq rəhbəri, akademik Ramiz Mehdiyev barəsində həbs qətimkan tədbiri seçilib. Axar.az xəbər verir ki, R.Mehdiyev ittiham olunduğu maddələrlə təqsirli bilinərsə, iki dəfə ömürlük cəza ala bilər. Belə ki, o, CM-in 274, 278.1 və 193-1.2.3-cü maddələri ilə ittiham olunur. Maddə 278.1 — Dövlət hakimiyyətini ələ keçirməyə yönələn əməllər Azərbaycan Respublikasının Konstitusiyasına zidd olaraq hakimiyyətin zorla ələ keçirilməsinə, yaxud hakimiyyətin zorla saxlanılmasına, habelə dövlətin konstitusiya quruluşunun zorla dəyişdirilməsinə yönələn hərəkətlər; Cəza: on iki ildən iyirmi ilədək müddətə azadlıqdan məhrum etmə və ya ömürlük azadlıqdan məhrum etmə ilə cəzalandırılır. Maddə 274 — Dövlətə xəyanət Dövlətə xəyanət, yəni Azərbaycan Respublikasının suverenliyi, ərazi toxunulmazlığı, dövlət təhlükəsizliyi və ya müdafiə qabiliyyəti zərərinə olaraq Azərbaycan Respublikasının vətəndaşı tərəfindən qəsdən törədilən əməl: düşmən tərəfinə keçmə, casusluq, dövlət sirrini xarici dövlətə vermə, Azərbaycan Respublikasına qarşı düşmənçilik fəaliyyəti aparmaqda xarici dövlətə, təşkilata və ya onların nümayəndələrinə kömək etmə; Cəza: əmlakı müsadirə olunmaqla və ya olunmamaqla on iki ildən iyirmi ilədək müddətə azadlıqdan məhrum etmə və ya ömürlük azadlıqdan məhrum etmə ilə cəzalandırılır. Maddə 193-1.3.2 — Cinayət yolu ilə əldə edilmiş əmlakı leqallaşdırma (xeyli miqdarda) Cəza: Üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə , əmlakı müsadirə olunmaqla yeddi ildən on iki ilədək müddətə azadlıqdan məhrum etmə ilə cəzalandırılır.axar.az)

Rusiya Ukraynada müharibə başlayandan bəri təqribən 1 milyon 118 min, o cümlədən bu il 332 min hərbçi itirib. Sozcu.az xəbər verir ki, bu barədə Britaniya kəşfiyyatının məlumatında deyilir. Statistikaya görə, Rusiya qüvvələrinin qeydə alınmış itkisi 2025-ci ilin martından avqust ayına qədər azalıb, lakin oktyabr ayında davamlı olaraq artaraq gündəlik 1000 nəfəri (oktyabrın 5-dən 12-nə kimi) ötüb. Eyni zamanda, sentyabr ayında düşmənin orta gündəlik itkiləri 2024-cü ilin aprelindən bəri ən aşağı səviyyədə olub.

Hazırda "Birbank" mobil tətbiqinin QR bilet ödəniş sistemində texniki çətinlik müşahidə olunur. Bu barədə Axar.az-a “Bakı Metropoliteni” QSC-nin mətbuat xidmətindən məlumat verilib. "Problemin həlli istiqamətində aidiyyəti qurumlar tərəfindən işlər aparılır və qısa müddətdə aradan qaldırılacağı bildirilir. Sərnişinlərə yaranmış narahatlıqla bağlı müvəqqəti olaraq "BakıKart"ın mobil tətbiqi, "m10" rəqəmsal ödəniş sitemi və ya fiziki kartlardan istifadə etmələri tövsiyə olunur", - məlumatda qeyd olunub. Qeyd edək ki, bir neçə saatdır ictimai nəqliyyatda bank kartları ilə ödəniş sistemində problem müşahidə olunur. Bu səbəbdən metro və avtobuslarda sıxlıq yaranıb.

Azərbaycan Dövlət Su Ehtiyatları Agentliyinin (ADSEA) tabeliyində Su və Meliorasiya Kompleksinin Layihələndirilməsi İnstitutu və Su və Meliorasiya Elmi Tədqiqat İnstitutunun birləşdirilərək yenidən təşkil edilməsi nəzərdə tutulur. Sozcu.az APA-ya istinadən xəbər verir ki, bununla bağlı Agentlikdən müvafiq dövlət qurumlarına müraciət ünvanlanıb. Nəticədə, sözügedən qurumların bu ilin sonunadək birləşdirilməsi gözlənilir. Qeyd edək ki, qanunvericiliyə əsasən, Agentliyin tərkibinə daxil olan qurumların yenidən təşkili və ləğv edilməsini Azərbaycan Prezidenti həyata keçirir. Xatırladaq ki, Azərbaycan Prezidentinin Fərmanı ilə 2023-cü ilin noyabr ayında ADSEA-nın yeni strukturu təsdiq edilib. Bununla da qurumun tabeliyində Azərbaycan Meliorasiya və Su Təsərrüfatı ASC-nin çevrilmə formasında yenidən təşkili yolu ilə Regional Su Meliorasiya Xidməti, “Azərsu” ASC-nin çevrilmə formasında yenidən təşkili yolu ilə İri Şəhərlərin Birləşmiş Su Təchizatı Xidməti, Meliorasiya Elmi Tədqiqat İnstitutunun çevrilmə formasında yenidən təşkili yolu ilə Su və Meliorasiya Elmi Tədqiqat İnstitutu, Tikilməkdə olan meliorasiya və irriqasiya obyektlərinin birləşmiş müdiriyyətinin çevrilmə formasında yenidən təşkili yolu ilə Tikilməkdə Olan Obyektlərin Müdiriyyəti, Su təsərrüfatı obyektlərinin layihələndirilməsi üzrə Azərbaycan Dövlət İnstitutu “Azdövsutəslayihə”nin və tabeliyindəki “Azərsu” Açıq Səhmdar Cəmiyyətinin “Sukanal” Elmi Tədqiqat və Layihə İnstitutunun çevrilmə formasında yenidən təşkili yolu ilə Su və Meliorasiya Kompleksinin Layihələndirilməsi İnstitutu yaradılıb.

Tovuz rayonunda qatarın vurduğu piyada hadisə yerində ölüb. Sozcu.az Teleqraf-a istinadən xəbər verir ki, hadisə Aşağı Quşçu kəndində baş verib. Ölən şəxsin kişi olduğu bildirilir. Hazırda onun şəxsiyyəti dəqiqləşdirilir.