Müsavatçının 13 yaşlı oğlu polis şöbəsinə aparılıb

Dünən Müsavat Partiyasının Sumqayıt şəhər təşkilatının üzvü Sərvər Hüseynov və 13 yaşlı oğlu Səid Hüseynzadə Sumqayıtda polis şöbəsinə aparılıblar.

Bu haqda Müsavat Partiyası Sumqayıt şəhər təşkilatının sədri Elşad İsrafilov məlumat verib.

“Şöbədə bunun profilaktik tədbir olduğunu bildiriblər. Qohumları haqqında izahat aldıqdan sonra buraxdılar. Qoşqar Xəlilov adlı bir təsübkeşimiz də feysbukdakı yazılarına görə dünən polis şöbəsinə çağırılıb. Ona da nədən müxalifət yönümlü olduğunu, mitinqlərdə niyə iştirak etdiyini soruşublar, ailə tərkibi haqda məlumat aldıqdan sonra sərbəst buraxıblar”, – deyə, Elşad İsrafilov bildirib.

Təkilat sədri qeyd edib ki, bundan öncə 19 yanvar mitinqində 10 nəfər polis şöbəsinə çağırılıbmış: “Bunların fikrincə, bizləri qorxutmaq istəyirlər, amma bunu bacarmayacaqlar. Hər yola əl atırlar 13 yaşlı uşağı polisə çağırmaq nə deməkdir?! Polisin hərəkətləri tamamilə qanuna zidd hərəkətdir”.

Müsavat başqanının müavini Fərəc Kərimli hadisəyə sərt etiraz edib: “Əliyev rejimi artıq heç bir sərhəd, dəyər tanımadığını bir daha nümayiş etdirir. Təsəvvür edin 13 yaşlı uşaqdan bölmədə izahat alıblar! Bundan iki gün əvvəl də Müsavatın Sumqayıt təşkilatının üzvü Samir Xəlilov polisə çağırılıb. Ona yuxarılar tərəfindən fb-da müxalifətçi kimi qeydə alındığını bildiriblər və polisə də nədən müxalifətə qoşlduğunu araşdırmağı tapşırdıqlarını deyiblər”.

Basta

Facebook Comments