Qripdən qorunmağın 3 əsas şərti

Adil Qeybulla: “Virusun bu qədər sürətlə yayılmasının əsas səbəbi…”

Sozcu.az kaspi.az-a istinadən yazını təqdim edir.

Qrip və qripə bənzər yoluxucu xəstəliklərin aktiv olduğu dövrdür. Kimi danışdırsan, qripdən, boğaz ağrısından şikayət edir. Bir qrup insan isə qripə yoluxmaqdan ehtiyat edir. Çünki ətrafında bir çox insanın qrip olduğu təqdirdə, yoluxma ehtimalı çox olur. Bəs qripin daha çox adama yoluxmamağı üçün insanın özündən nələr asılıdır?

Tibbi ekspert Adil Qeybulla bildirdi ki, müvafiq qurumlar insanları bu cəhətdən daha çox məlumatlandırmalıdır. İnsanlar özləri də bu cür xəstəliklərə qarşı daha diqqətli yanaşmalıdırlar: “İlk növbədə, insanlar soyuqdəymə və yuxarı tənəffüs yollarının iltihabı ilə bağlı istənilən xəstəliyə xüsusi diqqətlə yanaşmalıdır. Eyni zamanda dövlət qurumları və müvafiq strukturlar da insanlar arasında maarifləndirici iş aparmalıdırlar. Çünki xəstələrə düzgün istiqamət verilmədiyi halda, xəstəliyin fəsadları daha da artır”.

Adil Qeybulla diqqətə çatdırdı ki, xəstəliyə yoluxma və yoluxdurma hallarının qarşısını almaq üçün üç əsas tədbir görülməlidir: “Birincisi, məktəblərdə və digər kütləvi toplantı yerlərində insanların maskalardan istifadə etməsi, həmin yerlərin tez-tez dezinfeksiya olunması, otaqların mütəmadi olaraq havasının dəyişdirilməsi vacibdir. İkincisi, xəstəliyə yoluxduğu halda, xəstə mütləq yataq rejiminə keçməlidir. Bu, təkrar soyuqdəymənin və xəstəliyin ağırlaşmasının qarşısını alır. Üçüncüsü, xəstə çoxlu maye qəbul etməlidir, çünki immunitetin bu cür vəziyyətlərdə mayeyə daha çox ehtiyacı olur. Əlavə olaraq, xəstə bacardığı qədər çox oksigen qəbul etməlidir. Qeyd etmək lazımdır ki, xəstələr mütləq həkimə müraciət etməli, müvafiq prosedurları həkimin tövsiyəsi ilə icra etməlidirlər. Əgər bu qaydalara əməl edilsə, həm xəstəliklərə yoluxma halları azalar, həm də xəstəliyin ağırlaşmasının qarşısı alınar. Ancaq müvafiq qurumlar da maksimum dərəcədə tədbirlər görməlidirlər”.

Adil Qeybulla bildirdi ki, xəstəlik dövründə fiziki təmasdan maksimum dərəcədə yayınmaq lazımdır, çünki xəstəliklərin bu qədər sürətlə yayılmasının əsas səbəbi, məhz başqaları ilə yaxın təmasda olub onları yoluxdurmaqdır: “Ona görə də, əvvəl qeyd olunduğu kimi, xəstəliyə yoluxmuş şəxs yataq rejiminə keçməlidir. Lakin insanların bunu etməməyinin başlıca səbəbi onların bir çoxunun işləməsindən və işdən qala bilməməyindən irəli gəlir. Halbuki, əmək hüquqlarına əsasən, onlar işlərindən asılı olmayaraq evdə qalmalı, yalnız tam sağaldıqdan sonra işə qayıtmalıdırlar. Bu, həm də onların işlədikləri qurumlar üçün də səmərəlidir, çünki əks halda bir çox işçi xəstələnər və həmin insanlar əmək qabiliyyətini itirər”.

Adil Qeybulla valideynlərin nəzərinə çatdırdı ki, azyaşlılar da xəstəlik müddətində bağça və ya məktəblərə getməyi müvəqqəti olaraq dayandırmalıdırlar: “Uşaqların vitaminli siroplar qəbul etməsi çox yaxşı olar. Valideynlər də uşaqların geyimlərinin düzgün şəkildə, hava şəraitinə uyğun olaraq seçilməsinə diqqət etməlidirlər. Ancaq ən önəmlisi, xəstəliyə tutulduqları halda dərsdən və ya bağçadan qalmalarıdır”.

Adil Qeybulla əlavə olaraq qeyd etdi ki, immuniteti gücləndirmək üçün ilk növbədə insanlar aktiv həyat tərzi sürməli, hərəkətli olmalıdırlar: “Tez-tez idmanla və ya gimnastika ilə məşğul olmaq immunitet üçün faydalıdır. Eyni zamanda qidalanmaya da fikir vermək lazımdır. Daha çox vitaminli qidalara, xüsusilə də meyvə-tərəvəz qəbuluna üstünlük verilməsi yaxşıdır”.

Facebook Comments