Güneyli fəal Məleykə Qaragözlüyə 4 il 4 ay həbs cəzası verildi

O, həbs cəzası ilə yanaşı cərimə cəzasına da məhkum edilib.

“Əllamə Təbatəbayi” Universitetinin jurnalistika fakültəsinin öyrəncisi, gənc fəal Məleykə Qaragözlü Tehran İnqilab Məhkəməsi tərəfindən 4 il 4 ay həbs cəzasına məhkum edilib.

Həbslə bağlı çıxarılan qərarda fəal barəsində çıxarılan qərarın ən azı 3 il 8 ayının mütləq icra edilməsinin vacibliyi, həbs müddəti bitdikdən sonra ictimai fəaliyyətlərinin qadağan edildiyi qeyd olunub.

Bununla yanaşı Məleykə Qaragözlünün ictimai, siyasi təşkilatlara üzv olması və iki il müddətinə sosial media fəaliyyətlərinə, ölkədən çıxışına qadağa qoyulduğu bildirilir.

Məleykə Qaragözlü iyulun 13-də məcburi hicaba etiraz olaraq yaylığını başından açıb yerə atdığı videonu paylaşdıqdan sonra təhlükəsizlik məmurları tərəfindən həbs edilib.

O, bundan öncə 2019-cu il oktyabrın 18-də Tehran Universitetinin qarşısında keçirilən etiraz aksiyaları zamanı da saxlanılıb və 6 ay həbs cəzasına məhkum edilərək Evin zindanına köçürülüb.

Facebook Comments