Azərbaycan-Ermənistan sərhədində güclü zəlzələ baş verib. Bu barədə Sozcu.az-a Azərbaycan Milli Elmlər Akademiyası nəzdində Respublika Seysmoloji Xidmət Mərkəzinin Zəlzələlərin Tədqiqatı Bürosundan məlumat verilib. Bildirilib ki, yerli vaxtla saat 03:01-də qeydə alınan yeraltı təkanların maqnitudası 4,8 olub. Zəlzələ ocağı 9 kilometr dərinlikdə yerləşib. Zəlzələ episentrdə 4 bal gücündə hiss olunub. Bundan başqa, yerli vaxtla saat 03:03-də yerin 10 kilometr dərinliyində maqnitudası 3 olan zəlzələ baş verib. Zəlzələ hiss olunmayıb. Daha sonra saat 03:07-də 12 kilometr dərinlikdə maqnitudası 3,8 olan üçüncü zəlzələ olub. Zəlzələ episentrdə 4 bala qədər hiss olunub.

Donald Trampın komandası Avropa rəsmilərinə ABŞ-ın yeni prezidentinin Ukraynaya hərbi yardımı davam etdirməyi planlaşdırdığı barədə məlumat verib. Sozcu.az xəbər verir ki, bu barədə “Faynənşl Tayms” nəşri yazıb. Nəşr qeyd edir ki, daha öncə - seçki kampaniyası zamanı Tramp Ukraynaya yardımı kəsəcəyini və Kiyevi dərhal sülh danışıqlarına başlamağa məcbur edəcəyini vəd etsə də, indi o, andiçmə mərasimindən sonra Kiyevə Amerika silahlarının verilməsini davam etdirmək niyyətindədir. Bu məlumatı nəşrə danışıqlarla tanış olan üç nəfər təsdiqləyib. Eyni zamanda, Tramp NATO müttəfiqlərindən müdafiə xərclərini iki dəfədən çox artırmağı tələb etməyi planlaşdırır. Əgər hazırkı hədəf ÜDM-in 2%-dirsə (alyansın 32 üzvündən yalnız 23-ü bu standarta cavab verir), Tramp bu göstəricini 5 faizə qaldırmaq istəyir. Nəşrin həmsöhbətlərindən biri deyir ki, Tramp yəqin ki, sonda 3,5%-lə razılaşacaq. Eyni zamanda, görünür, ABŞ-ın yeni prezidenti böyük müdafiə xərclərini ABŞ-la ticarətin daha əlverişli şərtləri ilə açıq şəkildə əlaqələndirməyi planlaşdırır.

Bu gün Milli Məclisdə “Hərbi xidmət haqqında” qanun layihəsi ikinci oxunuşda müzakirə olunub. Qanuna dəyişikliyin müzakirəsi zamanı parlamentin Regional məsələlər komitəsinin sədri Siyavuş Novruzov deyib ki, iki uşağı olanlar da hərbi xidmətə çağırılmamalıdır. İki uşağın saxlanması özü elə dövlətə köməkdir. Gələcəkdə qanunvericilikdə məsələyə baxılmalıdır, 2 uşağı olan hərbi xidmətə çağırılmamalıdır. İki uşaq il yarım öz valideynini görmür”. Qeyd edək ki, Azərbaycanda iki və ya daha çox uşağı olan kişilərin hərbi xidmətə çağırılmaması təcrübəsi 1992-1994-cü illərdə tətbiq edilib. Bu qərar əsasən həmin dövrdəki spesifik sosial və siyasi vəziyyətlə bağlı idi. Həmin illərdə, Qarabağ müharibəsinin davam etdiyi dövrdə ölkədə ümumi səfərbərlik şəraiti hökm sürürdü. Sosial müdafiəyə ehtiyacı olan ailələrin dəstəklənməsi məqsədilə belə bir qayda müvəqqəti tətbiq edilmişdi. İki və ya daha çox uşağı olan kişilər müvəqqəti olaraq hərbi xidmətə çağırışdan azad edilirdi. Ancaq bu praktika uzun müddət davam etmədi və sonrakı illərdə müvafiq qanunvericiliyin dəyişdirilməsi ilə bu qayda qüvvədən düşdü. Bununla belə illərdir ki, ekspertlər qanunvericilikdə yenidən bu məsələ ilə bağlı dəyişiklik edilməsini təklif edirlər. Bundan əvvəl isə SSRİ-nin "Hərbi borc haqqında qanun"unda konkret güzəştlər göstərilmişdi. İki və ya daha çox uşağı olan kişilər üçün güzəştlər bəzi yerlərdə tətbiq edilə bilərdi, lakin bu, mütləq qayda deyildi və müharibə vəziyyətində bütün kişilər səfərbərlik üçün çağırılırdı. Sovet dövründə bir sıra digər məqamlar da nəzərə alınırdı. Əgər ailə müharibədə itkilər yaşamışdısa (məsələn, Böyük Vətən Müharibəsində), tək oğlan hərbi xidmətə çağırılmaya bilərdi. İki və ya daha çox uşağa təkbaşına baxan ata, hərbi xidmətdən azad ola bilərdi (bu, yerli hərbi komissarlığın qərarından asılı idi). Eləcə də alternativ xidmət (çox uşaq ailələri üçün) mövcud idi. SSRİ-də əksər kişilər üçün hərbi xidmət məcburi idi. Lakin kənd təsərrüfatı və ya sənaye müəssisələrində çalışaraq hərbi xidmətin əvəzində "alternativ xidmət" keçmək praktikası vardı. Bu güzəştlər ailəli və çox uşaqlı kişilər üçün daha geniş tətbiq edilirdi. Ehtiyatda olan polkovnik-leytenant, hərbi ekspert Üzeyir Cəfərov mövzu ilə bağlı Musavat.com-a fikrini bölüşüb: “Azərbaycanda hərbi xidmətlə bağlı əvvəllər çox gözəl təcrübələr var idi. Çox təəssüflər olsun ki, o təcrübələr müasirlik, Qarabağ işğal altında adı ilə dəyişdirildi. Hətta mətbuatda da, sosial şəbəkələrdə də müzakirə olunan mövzulardan biri odur ki, ölkəmizin savadlı uşaqları aparılır, bu və ya digər səbəbdən, ya bədbəxtlikdən, ya xəstəlikdən dünyasını dəyişir. Mən hesab edirəm ki, uşağı olan hərbi qulluqçular Azərbaycanda kifayət qədər çağırışçı potensialı var. Onların alternativ xidmət keçmək hüququ tanınsın. Deməkdən yorulduq, alternativ xidmət keçmək haqqında qanunu qəbul edin. Bu, Azərbaycan dövləti üçün vacib qanundur. Bir valideyni 1 il 6 ay müddətində iki uşaqdan ayırıb hərbi xidmətə apardıq. İl yarım ərzində uşaq ata nəvazişindən də məhrum olur, uşağın problemləri də qalır yazıq qadının boynunda. Niyə biz öz balalarımızın düşməniyik?! Alternativ xidmət nədir- Səhiyyə Nazirliyi, Əmək və Əhalinin Sosial Müdafiəsi Nazirliyi, güc strukturlarının hospitalları, reabilitasiya mərkəzləridir, bunu etmək olar. O təklifi neçə vaxtdır ki, biz səsləndiririk. Nəinki 35 yaşdan 30 yaşa qaytarmaq, hərbi xidmətə çağırış yaşı 27 yaş olmalıdır. Ona görə ki orduda nizamnamədən kənar münasibətlərin sayı azalacaq. İki uşaqla xidmətə çağırılmaq insafsızlıqdır. Biz ailələrin təməl daşını yerindən tərpədirik. Uşaq ata nəvazişi görməlidir. İki uşaqdan biri xəstələndi, həyat yoldaşından başqa yanında kimsə yoxdur, nə etməlidir. Təklifləri sadəcə millət vəkilləri səsləndirməməlidir. Ailə, qadın, uşaq problemləri üzrə Dövlət Komitəsi təklif verməlidirlər, QHT-lər də buna qoşulmalıdır”. O ki qaldı, sui-istifadə hallarına, ekspert dedi ki, xidmət etmək istəməyənlər onsuz da başqa bəhanələr tapacaqlar: “Ya rüşvət verəcəklər, ya özlərini xəstəliyə vuracaqlar. Onsuz da xidmət etmək istəməyənlər etmir. Biz niyə pis tərəfini düşünürük ki. Alternativ xidmətdə ali təhsillilər iki il xidmət edəcək, orta təhsillilər isə üç il edəcək. Yəni seçim veriləcək”. Qeyd edək ki, ötən həftədən Milli Məclis "Hərbi xidmətkeçmə haqqında" Əsasnaməyə təklif olunan dəyişiklikləri I oxunuşda müzakirə edib. Bununla bağlı Cinayət Məcəlləsində, Miqrasiya Məcəlləsində, İnzibati Xətalar Məcəlləsində, “Əhalinin sağlamlığının qorunması haqqında”, “Hərbi xidmətkeçmə haqqında” Əsasnamənin təsdiq edilməsi barədə, “Psixiatriya yardımı haqqında”, “Azərbaycan Respublikasında səfərbərlik hazırlığı və səfərbərlik haqqında” və “Hərbi vəzifə və hərbi xidmət haqqında” qanunlarında dəyişiklik edilməsi barədə layihə Milli müzakirəyə çıxarılıb. Təklif olunan dəyişikliyə əsasən, çağırışçılar ilkin hərbi qeydiyyata alınmış və ya alınmalı olan müddətli həqiqi hərbi xidmət keçməmiş 18 yaşından 30 yaşınadək Azərbaycanın kişi cinsli vətəndaşları olacaq.

Elm və Təhsil Nazirliyi Nəsirəddin Tusi adına Şamaxı Astrofizika Rəsədxanasının məlumatına görə, bu il Azərbaycanda qış fəsli 21 dekabr saat 13:20-də başlayacaq. Bu zaman Şimal yarımkürəsində ən qısa gündüz (9 saat 17 dəqiqə 22 saniyə) və ən uzun gecə (14 saat 42 dəqiqə 38 saniyə) müşahidə olunacaq. Sozcu.az xəbər verir ki, alimlərin hesablamalarına görə, dekabrın 21-i bu ilin ən qısa günü olacaq. 21 dekabr qış gündönümü günüdür. Alimlər bildiriblər ki, 21dekabrda gecənin müddəti maksimum, gündüzün müddəti isə minimum olacaq. Sonra gün tədricən uzanmağa başlayacaq.

Milli Hidrometeorologiya Xidməti dekabrın 21-22-də bəzi bölgələrdə gözlənilən küləkli hava şəraiti ilə bağlı sarı xəbərdarlıq verib. Sozcu.az xəbər verir ki, Qobustan, Şabran, Xızı, Siyəzən, Xaçmazda sarı xəbərdarlığa uyğun olaraq fasilələrlə qərb küləyi əsəcək və küləyin sürəti 13.9-20.7 m/san təşkil edəcək.

Goranboyda dəm qazından zəhərlənərək ölən qadınlarla bağlı bəzi məqamlar məlum olub. Sozcu.az apa-ya istinadla xəbər verir ki, ölən qadınlar əmi qızları olublar. SUPER40 endirim kodu - Sən sifariş edənə qədər bəlkə də bu məhsullar tükənəcək! Hadisə ötən gecə Xocalı rayon sakini 1972-ci il təvəllüdlü Xumar Səlimovanın Goranboyun Ağcakənd qəsəbəsində yaşadığı evdə baş verib. 52 yaşlı Xumar Səlimova hadisə baş verən mənzildə tək yaşayırmış. 1979-cu il təvəllüdlü əmisi qızı Sevil Səlimova ötən gün onun evinə qonaq gəlib. Onlar evdə dəm qazından boğularaq ölüblər. 52 yaşlı Xumar Səlimovanın Xocalı faciəsi zamanı atası və 3 qardaşı şəhid olub. Qardaşı Araz Səlimov Azərbaycanın Milli Qəhrəmanıdır. Faktla bağlı Goranboy rayon prokurorluğunda araşdırma aparılır.

Dekabrın 20-də saat 12:00 radələrində Azərbaycan Ordusunun hərbi qulluqçusu Salmanov Ziyad İlqar oğlu Azərbaycan-Ermənistan şərti sərhədinin Naxçıvan Muxtar Respublikasının Sədərək rayonu istiqamətində xidməti-döyüş tapşırıqlarını yerinə yetirərkən piyada əleyhinə minaya düşərək xəsarət alıb. Sozcu.az xəbər verir ki, bu barədə Müdafiə Nazirliyi məlumat yayıb. İlk tibbi yardım göstərildikdən sonra yaralı hərbi qulluqçumuz dərhal hərbi tibb müəssisəsinə təxliyə edilib. Onun həyatı üçün təhlükə yoxdur. Baş vermiş hadisə ilə bağlı araşdırma aparılır.

Suriyanın devrilmiş Prezidenti Bəşər Əsədin həyat yoldaşı Əsma Əsədin boşanmaq istədiyi iddia olunur. Sozcu.az xarici KİV-ə istinadla xəbər verir ki, o, artıq boşanma ərizəsi ilə məhkəməyə müraciət edib. Əsma Əsəd, həmçinin Moskvanı tərk etmək üçün məhkəmədən xüsusi icazə istəyib. Qeyd olunur ki, o, proses başa çatdıqdan sonra İngiltərənin paytaxtı Londona köçməyi planlaşdırır. İddialara əsasən, Əsma Əsədin müraciəti ilə bağlı araşdırma aparıldığı üçün hələ yekun qərar verilməyib. 1975-ci ildə Londonda anadan olan Əsma Fəvvaz əl-Əsəd Suriyanın devrilmiş Prezidenti Bəşər Əsədin həyat yoldaşıdır. Onların 3 övladı var. Əsma Əsəd əvvəllər investisiya bankçılığı sahəsində karyera qurub, lakin Hafiz Əsədin ölümündən sonra 2000-ci ilin dekabrında prezident Bəşər Əsədlə evlənərək Suriyaya köçüb və bankçılıq karyerasını yarımçıq qoyub. Əsma Əsədin Britaniya vətəndaşlığı da var.

Bir müddət əvvəl anasını itirən müğənni Şəbnəm Tovuzlu atası Ələddinin ikinci dəfə evləndiyini deyib.  Sozcu.az xəbər verir ki, sənətçi bu haqda "Qonaqcanlı" verilişində deyib. O bildirib ki, atasını özü evləndirib: "Ölüncəyə qədər onun qulluğundayam. Yaxşı ki, varsan. Anam 5 ildir rəhmətə gedib. Atama nə qədər gözəl baxsa da, təkliyini hiss etdim. Onu Günəş xanımla evləndirdim. Atama gözəl baxır". Qeyd edək ki, Ələddin Şəbnəmin doğma atası deyil. İfaçı 1 yaşında olarkən anasını itirib və onu xalası ilə həyat yoldaşı saxlayıb. Şəbnəm uzun illər onları doğma valideyn bildiyini deyib. 

Həmədan əyalətinin Kəbudərahəng şəhərindən olan azərbaycanlı sosial media fəalı Mürtəza Xaki Həmədan həbsxanasında qeyri-müəyyən vəziyyətdə saxlanılır. Bu barədə insan haqları təşkilatları Xakinin ailəsinə istinadən məlumat yayıb. "25 gün əvvəl həbs edilən Mürtəza Xakinin 1 milyard tümən girov qarşılığında müvəqqəti olaraq məhkəməyə qədər sərbəst buraxılması barədə qərar verilməsinə və ailəsinin bu məbləği təmin etməsinə baxmayaraq, müxtəlif bəhanələrlə onun sərbəst buraxılmasına maneçilik törədilir",- mlumatda bildirilib. Mürtəza Xaki noyabrın 25-də Həmədan əyalətinin Kəbudərahəng şəhərinin təhlükəsizlik idarəsinə çağırıldıqdan sonra saxlanılıb və 3 gün sonra Həmədan şəhərinin həbsxanasına köçürülüb. O, "islam inqilabının banisi və müqəddəsləri təhqir etmək"də günahlandırılıb. Qeyd edək ki, Mürtəza Xaki həbs olunmadan əvvəl sosial mediadakı paylaşımlarına görə təzyiqlərlə üzləşib və İran Ali Məhkəməsi sentyabr ayından onun telefon nömrəsi və bank hesabının bağlanması barədə qərar çıxarıb. GünazTV

"Qalatasaray"ın baş məşqçisi Okan Buruk "Roma"nın hücumçusu Paulo Dibalanın klubun transfer hədəfi olması ilə bağlı yayılan xəbərlərə münasibət bildirib. Sozcu.az "NTV Spor"a istinadən xəbər verir ki, Yeni il tədbirinə qatılan mütəxəssis jurnalsitlərə müsahibə verib. O, 31 yaşlı futbolçunun mümkün transferi ilə bağlı sualı belə cavablandırıb:  "Transfer dövrü yaxınlaşdıqca belə xəbərlərin ortaya çıxması olduqca normaldır. Gələcək planlar qururuq, heyətimizi gücləndirmək istəyirik, amma hazırda bütün diqqətim "Kayserispor"la matça yönəlib. Bundan sonra transfer işlərinə başlayacağıq". "Roma"nın baş məşqçisi Klaudio Ranyeri də iki gün əvvəl bu məsələ ilə bağlı danışıb. "Dibalanın başqa prioritetləri varsa, qalmaq istəmirsə, gedə bilər. Amma bu, hər iki tərəfin razılaşmalı olduğu bir şeydir. Mən yalnız burada qalmaqdan məmnun olan oyunçuları istəyirəm.  Dibalada bir narahatlıq hiss etməmişəm". Qeyd edək ki, Argentina millisinin üzvü bu mövsüm "Roma"da bütün turnirlərdə 18 oyuna 2 qol vurub, 1 qol ötürməsi edib.

ABŞ Prezidenti Co Bayden yanvarın 9-12-də Romaya səfər edəcək. Sozcu.az xəbər verir ki, bu barədə Ağ Evin mətbuat katibi Karine Jan-Pyerin yazılı bəyanatında deyilib. “Bayden 9-12 yanvar tarixlərində Romaya səfər edərək Papa Fransisk, İtaliya Prezidenti Serjio Mattarella və Baş nazir Meloni ilə görüşlər keçirəcək. Yanvarın 10-da prezident Bayden Papa ilə görüşü zamanı dünya sülhünü təşviq etmək səylərini müzakirə edəcək”, - məlumatda qeyd olunub.

İmişlidə itkin düşmüş şəxsin meyiti tapılıb. Sozcu.az “Qafqazinfo”ya istinadən xəbər verir ki, rayonun Oruclu kənd sakini 59 yaşlı Şükürov Rasim Pəsi oğlu dekabrın 18-i saat 08 radələrində yaşadığı evdən çıxıb və bir daha geri qayıtmayıb. Onun yaxınları polisə müraciət edərək, R.Şükürovun itkin düşməsi barədə məlumat verib və axtarışlara başlanılıb. Dekabrın 19-da Rasim Şükürovun meyiti kənd ərazisində yerləşən transformatorda tapılıb. Onun cərəyan vurmasından öldüyü bildirilir. Faktla bağlı araşdırma aparılır.

Xəbər verdiyimiz kimi, Tovuz rayon Aşağı Quşçu kənd 1 nömrəli tam orta ümumtəhsil məktəbinin  2 sinfində pelet sobasının tıxanması tüstülünməyə səbəb olub. Hadisə nəticəsində 70-dən artıq şagird və bəzi müəllimlər tüstüdən zəhərlənib. Onlara rayon xəstəxanasında yardım edilib və hər biri evə buraxılıb. Hadisə ilə əlaqədar Tovuz rayon prokurorluğunda araşdırma aparılır. Bəs hadisədən sonra məktəbdə dərslər bərpa olunubmu? Məsələ ilə əlaqədar Modern.az-ın sorğusuna cavab olaraq Qazax-Tovuz Regional Təhsil İdarəsindən məlumat verilib ki, Tovuz rayon Aşağı Quşçu kənd 1 nömrəli tam orta məktəbdə tədris prosesi bərpa olunub. Bildirilib ki, ötən gün sobalara baxış keçirilib, problem aradan qaldırılıb və istilik təmin olunub. "Hazırda təhsil sektorunun nümayəndələri də məktəbdədir. Vəziyyət nəzarətdə saxlanılır", - deyə cavabda qeyd olunub.

Dövlət İmtahan Mərkəzi (DİM) imtahan iştirakçılarını qaydalarla bağlı diqqətli olmağa çağırıb. Sozcu.az DİM-ə istinadən xəbər verir ki, imtahanlarda əsasən mobil telefonla binaya daxil olmağa cəhd, müxtəlif əyani vəsaitlərdən istifadə, öz yerinə başqasını göndərmək, köçürməyə cəhd və digər hallara rast gəlinir. Qeyd olunub ki, istər imtahan binasına daxil olan zaman, istər imtahan müddətində, istərsə də imtahandan sonra baş verən bütün hallar, qayda pozuntuları DİM əməkdaşları, zərurət olduqda isə hüquq-mühafizə orqanları tərəfindən araşdırılır və müvafiq addımlar atılır: "Bəzi qayda pozuntuları hüquqi məsuliyyət yaradır və qanunvericiliklə adekvat tədbirlərin görülməsini tələb edir. Xatırlayırsınızsa, bir neçə il bundan öncə saxta və ya başqasına aid sənəd təqdim etmək, imtahana öz yerinə başqasını göndərmə faktları aşkar olunub və cinayət işi başlanılaraq həmin şəxslər barədə müvafiq qərarlar qəbul olunub. Bu yaxınlarda isə ötən il keçirilən ali təhsil müəssisələrinə qəbul imtahanlarında baş verən qayda pozuntuları ilə bağlı Dövlət İmtahan Mərkəzinin hüquq mühafizə orqanlarına müraciəti əsasında başlanılan cinayət işinə lazımi hüquqi qiymət verilib. Belə ki, 2023-cü ilin iyul ayında keçirilən qəbul imtahanlarında bir imtahan iştirakçısında binanın girişində yoxlama zamanı komplekt halda xüsusi ötürücü qurğu (“Mifi” aparatı, mikroqulaqlıq, telefon, kamera və s.) aşkar olunub. Abituriyent imtahandan kənarlaşdırılandan sonra həmin qurğular hüquq mühafizə orqanlarına təqdim olunub və aparılan araşdırmalar nəticəsində həmin cihazların satışını təşkil edən şəxs cinayət məsuliyyətinə cəlb edilib. Onun müxtəlif sosial şəbəkə hesablarında imtahanlarda istifadə etmək üçün satışı qadağan olunmuş mikroqulaqlıqlarla bağlı iştirakçılara çoxsaylı müraciətlər etdiyi müəyyən olunub. Həmin şəxs artıq cinayət məcəlləsinin müvafiq maddələrinə əsasən məsuliyyətə cəlb olunub və məhkəmənin hökmü ilə 3 il müddətinə azadlığın məhdudlaşdırılması cəzasına məhkum edilib". Dövlət İmtahan Mərkəzi gələcək imtahan iştirakçılarına müraciət edərək tələb olunan imtahan qaydaları ilə bağlı diqqətli olmağa çağırır, həmçinin valideynlərdən xahiş edirik ki, övladlarını imtahan binasına yola salarkən belə məqamların vacib olduğunu onların diqqətinə çatdırmağı unutmasınlar. Bu sahədə mövcud tələbləri pozan şəxslərə qarşı ciddi tədbirlərin görülməsi davam etdiriləcək.

Neftçala rayonunda motosiklet kanala düşüb, ölən var. Sozcu.az Report-a istinadən xəbər verir ki, hadisə rayonun Sarıqışlaq kəndində qeydə alınıb. İlkin məlumata görə, hərəkətdə olan motosiklet idarəetmədən çıxaraq yolun kənarındakı kanala düşüb. Qəza nəticəsində kənd sakini, 1962-ci il təvəllüdlü Məzahim Səttar oğlu Hüseynov hadisə yerində ölüb. Faktla bağlı araşdırma aparılır.

19 dekabr günü ustad söz adamlarından olan, tanınmış jurnalist və şair Ədalət Nəbi Qarabuludun 69 yaşı tamam oldu. Ədalət bəy Paytaxt.org-a açıqlamasında bildirib ki, doğum gününü ailəsi, nəvələri ilə birlikdə qeyd edəcək: “Bu günü ailəmlə, nəvələrimlə bir arada olacam. Coxdandır onların bəzilərini görmürəm. Doğum günü bizi birləşdirəcək. Bilirsiniz, mən yazdıglarımı özümcün yazıram. Ad günü münasibəti ilə yeni şeirlər yazmışam. Çox güman ki, onların bəzilərinin ilk dinləyiciləri elə nəvələrim olacaq." 70 yaşa qədəm qoyan şair bu rəqəmin ona bir az qəribə gəldiyini dedi: “Yeni şeirlərim var, 70 illik yubileyə kimi onları çap etdirib, oxucuların öhdəsinə verəcəm. 70 ilə seçmə şeirlərdən ibarət geniş həcmli bir kitab hazırlamağı düşünürük. Kitabın redaktorluğunu dostum Vəli Xramçaylı boynuna götürüb. Təki, sağlıq olsun...”. Ədalət Nəbi Qarabuludun fikrincə, qələm adamı belədir - yaşının üstünə yaş gələndə adi insanlardan tam fərqli görünür: “Sanki, özünə hesabat verirsən. Yəni, bu yaşa kimi neylədim? Nəyi edə bildim, nə qaldı? Əslində, nəyi eləməliydik, amma edə bilmədik? İnsan yaşlaşdıqca həmişə tələsir. İstəyir ki, nəsə iş görsün.” "İlin sonuna bir şey qalmayıb, 69-cu yaşınızın işığında şəxsi həyatınızda hec vaxt unutmayacagınız günlərinizi xatırlayırsınızmı?" sualımıza Ədalət bəyin cavabı maraqlı oldu: "Şəkildə gördüyünüz bu yeniyetmə, qız nəvəm Abduləziz Əzizlidir. 1918-1920-ci illərdə Azərbaycan Xalq Cümhuriyyətinin fəal tərəfdarlarından olan Molla Cümənin nəslindəndir. Bu bala bu il dövlətimizin başını ucaldanlardan olub - Hindistanda kecirilən Dünya Robot Çempionatında uğurla iştirak edərək dünya cempionu adını qazanıb. Bir baba olaraq mənimcün bundan möhtəşəm sevinc ola bilməz. Allah bütün balaları qorusun!" Şair sonda onu da vurğulayıb ki, o, oxucularına və xalqa demək istədiklərinin hələ hamısını deməyib: “1970-ci ildən dövrü mətbuatdayam. Hələ deyilməmiş, yazılmamış çox şey var. Hələ hamısını deməmişəm. Bunun üçün 70 il də azdır”. Ədalət Nəbi Qarabulud 1955-cı il dekabrın 19-da Ağsu şəhərində anadan olub. Ağsu şəhər 1 saylı orta məktəbdə oxuyub. Azərbaycan Dövlət Universitetinin jurnalistika fakültəsində qiyabi təhsil alıb. İlk iş yeri rayonda cıxan "Birlik" qəzeti olub. O, mətbəə müdirliyindən baş redaktor vəzifəsinə qədər yüksəlib. O, 2000-ci ildə Bakı şəhərin köcüb. Bir müddət "Paklıq" qəzetində, sonradan Aydın Quliyevin baş redaktor olduğu gündəlik dərc olunan "Hüriyyət" qəzetində calışıb. Sonradan o. həftəlik "Qulaqburması" satirik jurnalına rəhbərlik edib. 3 ilə qədər həfdədə 3 dəfə dərc olunan "Qaynar xətt" qəzetinin baş redaktoru olub. Hazırda BİA.az-ın (Bakı İnformasıya Agentliyi) baş direktorudur. Ədalət Nəbi Qarabulud həmcinin Xalq hərəkatının öncüllərindəndir. AXC yarandığı gündən onun ön sıralarında olub. AXC Ali Məclisinin üzvü, Ağsu rayon şöbəsi idarə heyətinin üzvü, 1991-ci ildən isə AXC Ağsu rayon şöbəsinin sədri olub.

Hər səhər həyatın bəxş elədiyi, İlk sevgi məktubu kimidir mənə. Hər səhər oyanıb şükr eləyirəm,  Açılan gün üçün, Allahım sənə. Həyat bir kitabdır, səhifə fərqli,  Necə ki, bənzəməz, bu gün o günə.  Keçmişdən ibrət al, gəl dərs çıxart ki, Xoşbəxt  yaşayasan,  baxıb dünənə. Dünən bir dərs idi, bu günsə fürsət, Sabah nə olacaq, gəlir mənə sirr.  Elə bil zaman da, surətlə uçur, Elə bil zaman da, sona tələsir.  Hər qürub son deyil, bir başlangıcdır, Hər pis arxasında, bir yaxşı gələr. Hər nəfəs yenidən yaşamaq şansı, Yaşamaq sevgisi, qəlblə yüksələr.  Həyat suda yanan, bir nurdu, sanki, Tutmaq istədikdə, əlindən qaçar. Həyat gözəllikdi, qürurdu sanki, Xəfifcə toxunub, külək tək uçar. Həyat dag çayıdır, su kimi axar, Axara qovuşub, gedəndən olma. Bu çayın önündə, yolunu tut ki, Sonda axmaz olub, göllərə dolma. Ey Zakir bu həyat kətana bənzər,  Rəngləri seçmək də, sənin əlində. Elə seç çəkdiyin bir məna versin, Nəgməyə qovuşsun elin dilində. Müəllif: Zakir İsmayil

İsrail Hərbi Hava Qüvvələri Qəzzada daha iki məktəbə zərbə endirib. Sozcu.az xəbər verir ki, bu barədə İsrail ordusunun (ÇAXAL) məlumatında deyilir. Bildirilib ki, zərbələrin hədəfi məktəblərdə gizlənən HƏMAS üzvləri olub. Bildirilib ki, radikallar məktəblərdən terror fəaliyyətinin planlaşdırılması, həyata keçirilməsi üçün istifadə edirmiş.

İmişli rayonunda elektrik cərəyanının vurduğu 59 yaşlı kişi ölüb. Sozcu.az xəbər verir ki, hadisə İmişlinin Oruclu kəndi ərazisində qeydə alınıb. Adıçəkilən kənd sakini Rasim Şükürov ötən gün evdən çıxıb, daha sonra ondan bir xəbər olmayıb. Ailə üzvləri tərəfindən hüquq-mühafizə orqanlarına müraciət daxil olduqdan sonra şəxsin axtarışlarına başlanılıb. Bu gün günorta saatlarında Rasim Şükürovun kənd ərazisində olan transformatorun ətrafında cəsədi aşkarlanıb. İlkin ehtimallara görə, onu cərəyan vurub. Faktla bağlı araşdırma aparılır.

"Ermənistan sülh sazişi imzalandıqdan sonra beynəlxalq məhkəmələrdə Azərbaycana qarşı iddialarını geri götürməyə hazırdır". Sozcu.az xəbər verir ki, bu barədə Ermənistanın baş naziri Nikol Paşinyan "Armenpress"ə verdiyi müsahibəsində bildirib. Paşinyan sülh müqaviləsi imzalanan zaman iddiaları geri götürməyi məntiqli adlandırıb. "Burada iki nüans var. Onlardan biri ondan ibarətdir ki, beynəlxalq forumlarda müzakirə olunan müəyyən humanitar məsələlərin ikitərəfli formatda həlli üçün aydın perspektiv olmalıdır, ikincisi isə, aydın olmalıdır ki, digər məsələlər üzrə mübahisələr beynəlxalq platformalar formatından aradan qaldırıldıqdan sonra tərəflər artıq eyni məsələləri gündəmə gətirməməli və ikitərəfli münasibətlərin gündəmini gərginləşdirməməli, onları daimi eskalasiya mənbəyinə çevirməlidir", - Paşinyan bildirib.

Prezident Vladimir Zelenski Ukraynada Avropa hərbi kontingentinin yerləşdirilməsi ilə bağlı Fransa Prezidenti Emmanuel Makronun ideyasına qoşulmaq təklifi ilə Avropa Birliyi liderlərinə müraciət edib. Sozcu.az xəbər verir ki, bu barədə Ukrayna Prezident Administrasiyasının məlumatında deyilir. “Biz bu zəmanətlər çərçivəsində Fransanın Ukraynadakı hərbi kontingentlə bağlı təşəbbüsünü dəstəkləyirik və digər tərəfdaşları bu səylərə qoşulmağa çağırırıq, bu, müharibənin sona çatmasına kömək edəcək”, - deyə o bildirib.

Əgər Ermənistan Konstitusiyasında Azərbaycana ərazi iddiaları olsaydı, onda qarabağlılar (Qarabağdan könüllü olaraq köçən ermənilər – red.) qaçqın statusu almazdı. Sozcu.az xəbər verir ki, bu sözləri Ermənistan Baş naziri Nikol Paşinyan “Armenpress” agentliyinə müsahibəsində deyib. “Sentyabrın 26-da qəbul edilmiş qərarda (Ermənistan Konstitusiya Məhkəməsinin qərarı nəzərdə tutulur – red.) qeyd olunub ki, Konstitusiyanın preambulasında İstiqlal Bəyannaməsinə istinad yalnız Konstitusiyanın maddələrində hərfi təsdiqini almış müddəalara aiddir. Ermənistan Konstitusiyasının heç bir maddəsində isə birbaşa və ya dolayısı ilə Qarabağa istinad yoxdur. Əgər biz Konstitusiyanın məzmununu Azərbaycanın şərh etdiyi kimi qəbul etsək, o zaman sual yaranır ki, Qarabağ niyə 1995-ci ildə keçirilən Konstitusiya referendumunda iştirak etmədi? O vaxt Qarabağda heç bir seçki dairəsi açılmadı və insanlar (Qarabağda o vaxt yaşayan ermənilər – red.) Konstitusiya məsələsinə səs vermədilər”.

Juninyo "Sevilya"dan təklif alanda bu xəbərə çox sevinib. Sozcu.az Report-a istinadən xəbər verir ki, bunu "Qarabağ"ın baş məşqçisi Qurban Qurbanov deyib. Misli Premyer Liqasının III turundan təxirə salınmış "Şamaxı" oyundan sonra mətbuat konfransında açıqlama verən təcrübəli mütəxəssis Ağdam təmsilçisinin hücumçusu Juninyonun İspaniya təmsilçisi "Sevilya"ya keçidini istisna etməyib: "Juninyo bu xəbəri eşidəndə çox sevinib. Futbolçuya səmimi davranışına görə təşəkkür edirəm. Onun gedişi hər bir futbolçu kimi bizə problem yarada bilər. Çünki yeni gələnlər uyğunlaşma problemi yaşayırlar. "Sevilya" kimi klubdan təklif gəlməyi xoşdur. Hazırda danışıqlar davam edir. Futbolçularımız artıq Avropa bazarına çıxıb". Qeyd edək ki, III turun görüşündə "Qarabağ" səfərdə "Şamaxı"ya 1:0 hesabı ilə qalib gəlib.